ដ្រូនអ៊ុយក្រែន ហោះកាត់មេឃ ១ ១០០គ.ម ទម្លាក់គ្រាប់បែកឆេះឃ្លាំងប្រេងធំជាងគេ នៅ St. Petersburg

កងកម្លាំងអ៊ុយក្រែន បានបើកយុទ្ធនាការវាយប្រហាររយៈចម្ងាយឆ្ងាយ ទៅលើទីក្រុង St. Petersburg ដែលជាទីក្រុងមានអត្ថន័យនយោបាយ និងជានិមិត្តរូបដ៏សំខាន់បំផុតមួយរបស់រុស្ស៊ី។

តាមសេចក្ដី​រាយការណ៍​របស់​ CNN និង Kyiv Post ចុះផ្សាយ​ថ្ងៃទី​៣ ខែ​មិថុនា ឆ្នាំ​២០២៦ យន្តហោះដ្រូនអ៊ុយក្រែន បានហោះកាត់ដែនអាកាសជាង ១ ១០០​គីឡូម៉ែត្រ ពីព្រំដែន រួចចូលទៅទម្លាក់គ្រាប់បែកចំគោលដៅ បង្កជាអគ្គិភ័យយ៉ាងសន្ធោសន្ធៅ ឆាបឆេះធុងស្តុកប្រេងឥន្ធនៈដ៏ធំសម្បើម របស់ក្រុមហ៊ុន JSC Petersburg Oil Terminal ដែលជាកំពង់ផែ និងដេប៉ូស្តុកផលិតផលប្រេងធំជាងគេមួយរបស់រុស្ស៊ី នៅក្នុងតំបន់សមុទ្របាល់ទិក។

អ្វីដែលធ្វើឱ្យរដ្ឋាភិបាលទីក្រុងមូស្គូអាប់ឱនមុខមាត់យ៉ាងខ្លាំងនោះគឺ ការវាយប្រហារនេះ បានកើតឡើង ចំថ្ងៃទី៣មិថុនា ដែលជាថ្ងៃបើកឆាកនៃ «វេទិកាសេដ្ឋកិច្ចអន្តរជាតិ St. Petersburg» ជាព្រឹត្តិការណ៍សេដ្ឋកិច្ចលំដាប់កំពូលរបស់រុស្ស៊ី ដែលត្រូវបានរៀបចំឡើង ដើម្បីទទួលស្វាគមន៍គណៈប្រតិភូ និងភ្ញៀវធុរកិច្ចបរទេស។ វីដេអូជាច្រើន ដែលថតដោយប្រជាពលរដ្ឋមូលដ្ឋាន បានបង្ហាញពីផ្សែងខ្មៅក្រាស់ឃ្មឹកពាស​ពេញផ្ទៃមេឃ និងសំឡេងផ្ទុះជាច្រើនលើក ខណៈប្រព័ន្ធការពារអាកាសរបស់រុស្ស៊ី បានព្យាយាមបាញ់ស្ទាក់ចាប់ដ្រូនទាំងនោះទាំងប្រផិតប្រផើយ។ ហេតុការណ៍នេះ ក៏បានបង្កឱ្យមានការយឺតយ៉ាវ និងលុបចោលជើងហោះហើរជាច្រើន នៅព្រលានយន្តហោះ Pulkovo នៅក្នុងទីក្រុងផងដែរ។

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី (Volodymyr Zelenskyy) បានចេញមុខបញ្ជាក់ និងអបអរសាទរ ចំពោះជោគជ័យនៃប្រតិបត្តិការនេះ ដោយលោកហៅវាថាជា «ទណ្ឌកម្មរយៈចម្ងាយឆ្ងាយ» អនុវត្តដោយវីរកងទ័ពអ៊ុយក្រែន។ លោកបានសង្កត់ធ្ងន់ថា ឃ្លាំងប្រេងទំហំ ៣៧ហិកតា ដែលមានសមត្ថភាពផ្ទុកប្រេងរហូតដល់ ១២,៥លានតោនក្នុងមួយឆ្នាំនេះ គឺជារចនាសម្ព័ន្ធសេដ្ឋកិច្ច និងថាមពលដ៏សំខាន់ ដែលកំពុងបម្រើឱ្យម៉ាស៊ីន​សង្គ្រាមរបស់រុស្ស៊ី។ ក្រៅពីឃ្លាំងប្រេងនេះ ដ្រូនអ៊ុយក្រែន ក៏បានវាយប្រហារចំគោលដៅយោធានៅមូលដ្ឋាន Kronstadt និងរោងចក្រផលិតអាវុធមួយកន្លែងទៀត នៅក្នុងតំបន់ Tambov ដែលមានចម្ងាយជិត ៦០០គីឡូម៉ែត្រពីសមរភូមិមុខ។

ការវាយប្រហារដ៏ខ្លាំងក្លានៅដើមខែមិថុនានេះ ធ្វើឡើង បន្ទាប់ពីយុទ្ធនាការបំប្លែងដ្រូនរបស់អ៊ុយក្រែន ទៅបំផ្លាញហេដ្ឋារចនាសម្ព័ន្ធថាមពលរុស្ស៊ី បានហក់ឡើងដល់កម្រិតខ្ពស់បំផុតមិនធ្លាប់មានកាលពីខែឧសភា។ សកម្មភាពបំផ្លិចបំផ្លាញឥតឈប់ឈរនេះ កំពុងតែដាក់សម្ពាធយ៉ាងធ្ងន់ធ្ងរលើសេដ្ឋកិច្ចរុស្ស៊ី រហូតដល់ថ្នាក់បង្ខំឱ្យទីក្រុងមូស្គូ ប្រកាសហាមឃាត់ការនាំចេញប្រេងឥន្ធនៈសម្រាប់យន្តហោះ និងកំពុងគំរាមកំហែងដល់សង្វាក់ផលិតកម្មកែច្នៃប្រេងរបស់រុស្ស៊ី ឱ្យធ្លាក់ចុះដល់កម្រិតទាបបំផុតក្នុងរយៈពេល ១៦ឆ្នាំចុងក្រោយនេះផងដែរ៕

ប្រែសម្រួល៖ ឈាង