ដោយទទួលបានការចាត់តាំងពី សាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល អ្នកស្រី យក់ សម្បត្តិ រដ្ឋលេខាធិការក្រសួងសុខាភិបាល បានអញ្ជើញចូលរួមមហាសន្និបាតអង្គការសហប្រជាជាតិ លើកទី៧៩ ​ក្រោមប្រធាន​បទ​ ស្តីពីភាពស៊ាំនឹងឱសថប្រឆាំងមេរោគ​ (AMR) នៅទីក្រុងញូវយ៉ក សហរដ្ឋអាមេរិក ចាប់ពីថ្ងៃទី២៤ ដល់ថ្ងៃទី២៦ ខែកញ្ញា ឆ្នាំ២០២៤។

អង្គ​មហាសន្និបាតមានការ​ចូលរួម​ពី​ប្រទេសជាសមាជិក​ ចំនួន​ ១៣១ ប្រទេស និងមានដៃគូអភិវឌ្ឍន៍ចំនួនសរុបប្រមាណ ១ ៣០០ នាក់។ រដ្ឋជាសមាជិកទាំងអស់ត្រូវធ្វើ​បទអន្តរគមន៍ ចំនួន​ ៣ ​នាទី​ រួម​ទាំង​កម្ពុជា​ ដៃលតំណាងដោយ លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួហសុខាភិបាល។

ការបេ្តជ្ញាចិត្ត របស់​កម្ពុជាបានទទួលស្គាល់ថា ភាពស៊ាំនឹងឱសថប្រឆាំងមេរោគ (AMR) គឺជាការគំរាមកំហែងផ្នែកសុខភាពជាសកលដែលប៉ះពាល់ដល់សមត្ថភាពក្នុងការព្យាបាលការឆ្លងមេរោគ និងការអនុវត្តនីតិវិធីវេជ្ជសាស្រ្តសំខាន់ៗ។ AMR មិនគ្រាន់តែជាវិបត្តិសុខភាពប៉ុណ្ណោះទេ ប៉ុន្តែជាបញ្ហាប្រឈមក្នុងការអភិវឌ្ឍន៍ដែលប៉ះពាល់ដល់សេដ្ឋកិច្ច សន្តិសុខស្បៀង និងសុខុមាលភាពទូទៅដែលទាមទារឱ្យមានការឆ្លើយតបរួម និងជាបន្ទាន់។

ដើម្បីគាំទ្រការប្តេជ្ញាចិត្តនេះ កម្ពុជាបានឈានមុខ​ ក្នុង​ការបង្កើតគណៈកម្មាធិការសម្របសម្រួលពហុវិស័យសម្រាប់សុខភាពតែមួយ ដែល​ AMR ជាការងារ​អាទិភាព​សំខាន់​ និងបានធ្វើបច្ចុប្បន្នភាពផែនការសកម្មភាពពហុវិស័យសម្រាប់ AMR (២០២៤ –២០២៨)។

គួរបញ្ជាក់ថា នាថ្ងៃទី​៣ នៃអង្គ​មហាសន្និបាតអង្គការសហប្រជាជាតិ​ បានបន្ត​ចូល​ដល់​ប្រធាន​បទ​ ស្តីពី ភាពស៊ាំនឹងឱសថប្រឆាំងមេរោគ​ ( AMR) ដោយ​អំពាវនាវ​ដល់​ប្រទេស​ជា​សមាជិក​ គាំទ្រ​ការ​វិនិយោគ​ខ្ពស់​ និង​ធានា​បាន​នូវ​សុវត្ថិភាព​សម្រាប់អនាគត​ រួម​គ្នា​ដោយ​បង្កេីន​កិច្ច​សហប្រតិបត្តិការ​រួម​គ្នា​ ថ្នាក់​សកល​ ថ្នាក់​តំបន់​ ថ្នាក់​ជាតិ​ ដោយ​ត្រូវ​រៀបចំ​ផែនការ​យុទ្ធសាស្ត្រ ​ដើម្បី​ឆ្លើយតប​ទៅ​នឹង​ AMR “Investing in the present and securing our future together: Accelerating multi-sectoral global, regional and national action plan to address Antimicrobial Resistance(AMR)” នៅថ្ងៃទី២៦ ខែកញ្ញា ឆ្នាំ២០២៤៕

The post ក្នុងមហាសន្និបាត UN កម្ពុជា បញ្ជាក់ថា ភាពស៊ាំឱសថ ជាការគំរាមកំហែងសុខភាពជាសកល appeared first on Kampuchea Thmey Daily.

ព្រះភិក្ខុ រឹម ឈាវ ស្ថាបនិក និងប្រធានប្រតិបត្តិសមាគមបណ្ណាល័យគំនិត មានថេរដីកាឱ្យ “កម្ពុជាថ្មី” ដឹងថា ការរៀបចំពិធីបុណ្យកាន់បិណ្ឌ និងភ្ជុំបិណ្ឌ គឺមានប្រារព្ធតែ ព្រះពុទ្ធសាសនានៅប្រទេសកម្ពុជាប៉ុណ្ណោះ ពោលគឺមិនទូលំទូលាយសម្រាប់ពុទ្ធសាសនិក ឬអ្នកកាន់ព្រះពុទ្ធសាសនានៅតាមបណ្ដាប្រទេសដទៃទេ។

ព្រះភិក្ខុ រឹម ឈាវ មានសង្ឃដីកាបញ្ជាក់ថា ប៉ុន្តែយើងឃើញប្រទេសជិតខាងកម្ពុជាមួយចំនួន ដែលមានប្រជាពលរដ្ឋខ្មែរដើមរស់នៅ ដូចជា ខ្មែរលើនៅថៃ កម្ពុជាក្រោម នៅវៀតណាមសព្វថ្ងៃ ក៏មានការប្រារព្ធពិធីបុណ្យរបៀបដូចភ្ជុំបិណ្ឌកម្ពុជាខ្លះដែរ ដែលការប្រារព្ធនោះអាចទទួលឥទ្ធិពលកិច្ចកម្មវិធី ការរៀបចំទៅតាមទំនៀមទម្លាប់ព្រះពុទ្ធសាសនាកម្ពុជា។ ប្រទេសកាន់ព្រះពុទ្ធសាសនាជិតខាងកម្ពុជាដូចជា ប្រទេសថៃ ឡាវ មីយ៉ាន់ម៉ា ក៏រដ្ឋាភិបាលគេមិនមានចែងឱ្យប្រជាជនគេរៀបចំពិធីបុណ្យនេះ ទូលំទូលាយទូទាំងប្រទេសដែរ។

ព្រះភិក្ខុ រឹម ឈាវ មានថេរដីកាបន្ថែមថា សូម្បីប្រទេសឥណ្ឌា ដែលជាប្រភពដើមព្រះពុទ្ធសាសនា ក៏មិនមានរៀបចំពិធីបុណ្យកាន់បិណ្ឌ ភ្ជុំបិណ្ឌ ដូចកម្ពុជាដែរ លើកលែងតែករណី ព្រះសង្ឃ ឬពុទ្ធសាសនិកជនជាតិខ្មែរ ដែលទៅគង់ និងរស់នៅប្រទេសឥណ្ឌា គឺដោយសារការរក្សាប្រពៃណីទំនៀមទម្លាប់របស់ខ្មែរ ដោយនាំគ្នាប្រារព្ធរៀបចំធ្វើតែក្នុងចំណោមពលរដ្ឋខ្មែរតែប៉ុណ្ណោះ។

គួរបញ្ជាក់ថា បើតាមតម្រាចារតាមប្រវត្តិសាស្ត្រនៃប្រទេសកម្ពុជា បានបង្ហាញថា ពិធីបុណ្យភ្ជុំបិណ្ឌ គឺកើតមានតាំងពីបុរាណកាលមកម្ល៉េះ។ កាលពីសម័យបុរាណកាល គេធ្វើពិធីបុណ្យនេះ គឺដើម្បីរៀបចំធ្វើសង្ឃភត្ត ទំនុកបម្រុងព្រះសង្ឃ ដែលគង់ចាំវស្សាក្នុងវត្តរយៈពេល ៣ ខែ ចាប់តាំងពីថ្ងៃចូលវស្សារហូតដល់ថ្ងៃចេញវស្សា។ នៅក្នុងចំណេរកាលបុរាណបានចារថា ដោយនៅក្នុងរដូវវស្សាមានភ្លៀងធ្លាក់ជោកជាំ រលឹមពព្រិច ធ្វើឱ្យមានការលំបាកដល់ព្រះសង្ឃក្នុងពេលធ្វើគោចរ (ដើរ) បិណ្ឌបាត។ ដូច្នេះទើបបណ្ដាពុទ្ធបរិស័ទនាំគ្នារៀបចំពិធីនេះ ដើម្បីផ្គត់ផ្គង់ព្រះសង្ឃប្រចាំថ្ងៃរហូតដល់ថ្ងៃចេញវស្សា។ ម្យ៉ាងវិញទៀត នៅក្នុងពិធីបុណ្យនេះ គឺធ្វើឡើងដើម្បីផ្សាយឧទ្ទិសកុសលដល់ពពួក ប្រេតជនញាតិ និងញាតិទាំង ៧សណ្ដាន ព្រមទាំងតំណញាតិច្រើនមហាកប្បនោះផងដែរ តាមរយៈអនុភាព នៃសង្ឃគតាទក្ខិណាទាន ដែលរស់រងទុក្ខវេទនា កើតជាប្រេតមានកម្មពៀរជាប់ទោសធ្ងន់ រងកម្មក្រហល់ក្រហាយអត់ឃ្លានទាំងអស់នោះ បានរួចផុតពីក្ដីលំបាកសោកសៅ៕

អត្ថបទ៖ ច័ន្ទ វីរៈ

The post ពិធីបុណ្យកាន់បិណ្ឌ និងភ្ជុំបិណ្ឌ មាននៅគ្រប់ប្រទេសកាន់ព្រះពុទ្ធសាសនា ឬយ៉ាងណា? appeared first on Kampuchea Thmey Daily.

១. ការប្រែក្លាយមជ្ឈមណ្ឌលគរុកោសល្យភូមិភាគ ៤ ឱ្យទៅជាវិទ្យាស្ថានគរុកោសល្យ ដោយច្របាច់បញ្ចូលមជ្ឈមណ្ឌលគរុកោសល្យភូមិភាគ និងសាលាគរុកោសល្យនិង វិក្រឹតការខេត្ត រួមមាន៖ កណ្តាល កំពង់ចាម ព្រៃវែង និងតាកែវ តាមគំរូបាត់ដំបង និង រាជធានីភ្នំពេញ ដោយប្រើប្រាស់ថវិការដ្ឋ និងដៃគូអភិវឌ្ឍ

២. ការពិនិត្យឡើងវិញតួនាទីសាលាគរុកោសល្យ និងវិក្រឹតការខេត្ត៖ ដោយផ្តោតលើការ ធ្វើវិក្រឹតការគ្រូបង្រៀន

៣. ការបណ្តុះបណ្តាលមិនផ្តល់ក្របខណ្ឌ៖ សម្រាប់ជំនួសគ្រូជាប់កិច្ចសន្យា ឈានឆ្ពោះ ទៅអនុវត្តអាជ្ញាប័ណ្ណគ្រូបង្រៀន (គ្រូបង្រៀនកិច្ចសន្យាពិសេស) សម្រាប់សាលារៀន នៅជនបទ និងជួមការលំបាក ដោយប្រើប្រាស់គុណវុឌ្ឍដូចគ្នា

៤. ការបន្តផ្តល់ឋានៈសាស្ត្រាចារ្យ៖ សម្រាប់គ្រូឧទ្ទេស

៥. ការប្រឹក្សាគរុកោសល្យ៖ ការបណ្តុះបណ្តាលប្រឹក្សាគរុកោសល្យ សម្រាប់ការចុះគាំទ្រ ដល់គ្រូបង្រៀន

៦. ការលើកកម្ពស់គុណវុឌ្ឍ៖ ក្រសួងនឹងអនុវត្តកម្មវិធីលើកកម្ពស់គុណវុឌ្ឍគ្រូបង្រៀន និងនាយកសាលាចំនួន ១៣០០០នាក់ ក្នុងរយៈពេលពីឆ្នាំ ២០២៤ ដល់ ២០២៧

៧. ការអភិវឌ្ឍវិជ្ជាជីវៈជាប្រចាំ៖ ការលើកកម្ពស់ការអភិវឌ្ឍវិជ្ជាជីវៈជាប្រចាំ

៨. ការអប់រំឌីជីថល៖ ការប្រើប្រាស់បច្ចេកវិទ្យាក្នុងការបណ្តុះបណ្តាលគ្រូ និងការបណ្តុះ បណ្តុះបណ្តាលវិជ្ជាជីវៈជាប្រចាំ ការបង្កើត APPS សម្រាប់អំណាន ថ្នាក់ដំបូង និង គណិតវិទ្យាថ្នាក់ដំបូង និងសាលាឌីជីថល ដើម្បីឱ្យគ្រូធ្វើស្វ័យសិក្សាដោយខ្លួនឯង តែមកប្រឡងដើម្បីទទួលស្គាល់

៩. មគ្គុទេសក៍ និងការផ្តល់ប្រឹក្សាអាជីព៖ ការរៀបចំមុខងារគ្រូផ្នែកមគ្គទេសក៍អាជីព និង ការផ្តល់ប្រឹក្សា ដើម្បីជួយសិស្ស ក្នុងការអភិវឌ្ឍបុគ្គលិកលក្ខណៈ ការសិក្សារៀនសូត្រ និងការអភិវឌ្ឍអាជីព

១០. ការបន្តបណ្តុះបណ្តាលគ្រូអប់រំពិសេស៖ បណ្តុះបណ្តាលគ្រូជំនាញផ្នែក គ ថ្លង់ ពិការភ្នែក និង ខ្សោយសតិបញ្ញា

១១. ការអភិវឌ្ឍមជ្ឈមណ្ឌលគរុកោសល្យភូមិភាគខេត្តស្ទឹងត្រែង៖ ការបណ្តុះបណ្តាលគ្រូ អប់រំពហុភាសា សម្រាប់ជនជាតិដើមភាគតិច (ព្នង កាវ៉ែត គ្រឹង ទំពួន ពៅ និង ចារ៉ាយ)។

គួរបញ្ជាក់ថា ការបង្កើតទិវាគ្រូបង្រៀនគឺជាការរំឭកគុណគ្រូ ដែលបានខិតខំ ប្រឹងប្រែង តស៊ូលះបង់ក្នុងការបង្ហាត់បង្រៀន និងការផ្ទេរចំណេះដឹងតាមគ្រប់រូបភាព និងគ្រប់ មធ្យោបាយដល់ក្មួយៗសិស្ស និស្សិត និងយុវជនគ្រប់ៗរូប ហេតុនេះហើយទើប សម្តេចអគ្គ មហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃ ព្រះរាជាណាចក្រកម្ពុជានាពេលបច្ចុប្បន្ន បានផ្តួចផ្តើមគំនិតបង្កើតទិវាគ្រូបង្រៀនដំបូងនៅ កម្ពុជា ដោយកំណត់យកថ្ងៃទី៥ ខែតុលា ជារៀងរាល់ឆ្នាំ ដើម្បីប្រារព្ធទិវាគ្រូបង្រៀននៃព្រះរាជាណា ចក្រកម្ពុជា។ ការប្រារព្ធទិវាគ្រូបង្រៀនមានគោលបំណងបំផុសឡើងវិញនូវវប្បធម៌និងប្រពៃណី របស់សិស្ស និស្សិត និងយុវជន ឱ្យរំឭកនូវគុណូបការៈដ៏ថ្លៃថ្លារបស់គ្រូបង្រៀននៅទូទាំងប្រទេស ដែលបានបូជាកម្លាំងកាយ ចិត្ត ប្រាជ្ញា និងស្មារតី ក្នុងការបង្ហាត់បង្រៀនសិស្សានុសិស្ស និស្សិត ព្រមទាំងជាវិស្វករព្រលឹង ជារៀមច្បងក្នុងការងារអប់រំ ការបណ្តុះបណ្តាលធនធានមនុស្ស សម្រាប់ការការពារ ការកសាង និងការអភិវឌ្ឍជាតិមាតុភូមិលើគ្រប់វិស័យ។ ការរំឭកគុណគ្រូនិង ដឹងគុណគ្រូបានក្លាយទៅជាចលនាជាតិដ៏ផុសផុលមួយ តាមរយៈ ការជួបជុំសិស្សឬអតីតសិស្ស ដើម្បីប្រារព្ធទិវារំឭកគុណគ្រូនៅតាមសាលារៀន ក៏ដូចជាការបង្កើតឱកាសសម្រាប់ការសួរសុខ ទុក្ខ និងការជួបជុំជាមួយគ្រូបង្រៀននៅតាមសាលារៀនផងដែរ៕

អត្ថបទ៖ ច័ន្ទ វីរៈ

The post ទិសដៅនាពេលអនាគត ១១ ចំណុច ក្រសួងត្រៀមធ្វើកំណែទម្រង់វិស័យអប់រំ appeared first on Kampuchea Thmey Daily.

ការគាំទ្រនេះ ធ្វើឡើងក្នុងឱកាស បណ្ឌិត ឌី ខាំបូលី ឧត្តមមន្ត្រីសហគមន៍សង្គម-វប្បធម៌អាស៊ានសម្រាប់កម្ពុជា បានដឹកនាំប្រតិភូកម្ពុជា ចូលរួម កិច្ចប្រជុំឧត្តមមន្រ្តីសហគមន៍សង្គម-វប្បធម៌អាស៊ានលើកទី៣៧ (37th SOCA Meeting)​ រសៀលថ្ងៃទី២៥ ខែកញ្ញា ឆ្នាំ២០២៤ នៅទីក្រុងវៀងចន្ទន៍ ប្រទេសឡាវ ដែលមានការចូលរួមពីឧត្តមមន្ត្រីសហគមន៍សង្គម-វប្បធម៌អាស៊ានទំាង១០ អគ្គលេខាធិការរងអាស៊ានទទួលបន្ទុកសហគមន៍សង្គម-វប្បធម៌អាស៊ាន ឧត្តមមន្ត្រីសហគមន៍សង្គម-វប្បធម៌អាស៊ាន​ នៃប្រទេសទីម័រខាងកើតក្នុងនាមជាប្រទេសសង្កេតការណ៍អាស៊ាន និងមន្ត្រីតំណាងសហគមន៍សង្គម-វប្បធម៌ប្រចាំអាស៊ាន។

កម្ពុជាក៏បានសង្កត់ធ្ងន់លើ ផែនការចក្ខុវិស័យសហគមន៍សង្គម-វប្បធម៌អាស៊ានឆ្នាំ២០២៥ ដែលជំរុញឱ្យមានការពង្រឹងការចូលរួមរបស់គ្រប់ភាគីពាក់ព័ន្ធ, ការផ្តល់សិទ្ធិអំណាចនិងការពង្រឹងស្ថាប័ន, ការពង្រឹងការបន្សាំខ្លួនទៅនឹងអាកាសធាតុប្រកបដោយនិរន្តរភាព ការថែរក្សាបរិស្ថាន និងការគ្រប់គ្រងធនធាន, ការលើកកម្ពស់ភាពធន់របស់អាស៊ាន និងការត្រៀមលក្ខណៈចំពោះគ្រោះមហន្តរាយផ្សេងៗ, ការពង្រឹងប្រព័ន្ធសុខាភិបាល ហេដ្ឋារចនាសម្ព័ន្ធ និងសុខុមាលភាពសង្គម, ការបណ្តុះតម្លៃវប្បធម៌ ការបង្កើតថ្មី និងសហគ្រិនភាពក្នុងចំណោមរដ្ឋសមាជិកអាស៊ានទាំងមូល។

កិច្ចប្រជុំនេះបានពិនិត្យ និងពិភាក្សាលើចំណុចសំខាន់ៗចំនួន៤ រួមមាន៖ ១. ការងារពាក់ព័ន្ធដែលបានសម្រេចក្នុងកិច្ចប្រជុំឧត្តមមន្រ្តីសហគមន៍សង្គម-វប្បធម៌អាស៊ានលើកទី៣៦ កិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ានលើកទី៣១ និងកិច្ចប្រជុំពាក់ព័ន្ធ រួមមានការអភិវឌ្ឍផែនការយុទ្ធសាស្រ្តសហគមន៍សង្គម-វប្បធម៌អាស៊ាន លទ្ធផលកិច្ចប្រជុំក្រុមការងារស្តីពីវប្បធម៌នៃការការពារលើកទី៧ ស្ថានភាពនៃការអនុវត្តផែនការចក្ខុវិស័យសហគមន៍សង្គម-វប្បធម៌អាស៊ានឆ្នាំ២០២៥ ក្របខណ្ឌសេដ្ឋកិច្ចវិលជុំរបស់សហគមន៍សេដ្ឋកិច្ចអាស៊ាន យុទ្ធសាស្ត្ររួមស្តីពីបដិវត្តន៍ឧស្សាហកម្មទី៤, ការចូលជាសមាជិកអាស៊ានរបស់ប្រទេសទីម័រខាងកើត ផែនការមេឆ្នាំ២០២៥ របស់អាស៊ាន ស្តីពី ការពង្រឹងសិទ្ធមនុស្ស និងជនមានពិការភាព កម្មវិធីស្រាវជ្រាវនិងអភិវឌ្ឍមាតិកាសហគមន៍សង្គម-វប្បធម៌អាស៊ាន ទស្សនវិស័យអភិវឌ្ឍន៍អាស៊ាន, សេចក្តីប្រកាស Bandar Seri Begawan ស្តីពី ការអនុវត្តប្រកបដោយយុទ្ធសាស្ត្រនិងជាសកលរបស់អាស៊ានដើម្បីភ្ជាប់ការឆ្លើយតបអាស៊ានទៅនឹងគ្រោះអាសន្ននិងគ្រោះមហន្តរាយ, សៀវភៅយុទ្ធសាស្រ្តអាស៊ាន មន្ត្រីតំណាងសហគមន៍សង្គម-វប្បធម៌ប្រចាំអាស៊ាន, បច្ចុប្បន្នភាព នៃការបង្កើតមជ្ឈមណ្ឌលអាស៊ាន និងការអភិវឌ្ឍផែនការមេ ស្តីពី ការទំនាក់ទំនង របស់អាស៊ានដំណាក់ទី៣។

២. បច្ចុប្បន្នភាពរបស់សាធារណរដ្ឋប្រជាធិបតេយ្យប្រជាមានិតឡាវលើភាពជាប្រធានអាស៊ានប្តូរវេនឆ្នាំ២០២៤ ឯកសារលទ្ធផលសម្រាប់ការគត់សម្គាល់ និងអនុម័តរបស់មេដឹកនាំអាស៊ានក្នុងកិច្ចប្រជុំកំពូលអាស៊ានលើកទី៤៤ និងលើកទី៤៥ និងបញ្ហាឆ្លងសសរស្តម្ភ។ ៣. កិច្ចដំណើការរៀបចំសម្រាប់កិច្ចប្រជុំប្រឹក្សាសហគមន៍សង្គម-វប្បធម៌អាស៊ានលើកទី៣២ និង ៤. ពេលវេលា និងកាលបរិច្ឆេទកិច្ចប្រជុំឧត្តមមន្រ្តីសហគមន៍សង្គម-វប្បធម៌អាស៊ានលើកទី៣៨ និងកិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ានលើកទី៣៣៕

The post កម្ពុជា គាំទ្រ ការបង្កើតឯកសារលទ្ធផលសហគមន៍សង្គម-វប្បធម៌អាស៊ាន appeared first on Kampuchea Thmey Daily.

អ្នកស្រី នង បូរ៉ាវី មន្រ្តីបច្ចេកទេសគ្រប់គ្រងការដ្ឋានជួសជុលច្រាំងកសិន្ធុប្រាសាទអង្គរវត្ត បានឱ្យដឹងថា ស្ថានភាពច្រាំងកសិន្ធុប្រវែង ២០ ម៉ែត្រ ដែលត្រូវបន្តជួសជុលនេះ កាំជណ្តើរថ្មភក់មួយចំនួនស្រុតធ្លាក់ចូលក្នុងកសិន្ធុ និងកប់ក្នុងភក់ នាំឱ្យខូចខាតប្រមាណ ៦០ ភាគរយ។

អ្នកជំនាញរូបនេះ បញ្ជាក់ថា ដំបូងគឺត្រូវធ្វើទំនប់ហើយបូមទឹកចេញ ធ្វើសម្រង់ប្លង់ សម្អាតកំណកដី ហើយលើកកាំជណ្តើរ​ថ្មភក់មកលាងសម្អាត ចុះបញ្ជីថ្ម គូសប្លង់លម្អិតស្ថានភាពដុំថ្មនីមួយៗមុននឹងជួសជុលពង្រឹងថ្មដែលខូចខាត។ ជួសជុលពង្រឹងគ្រឹះ ហើយរៀបកាំជណ្តើរថ្មបាយក្រៀមថ្មីចំនួន ៧ កាំ ជំនួសថ្មបាយក្រៀមចាស់ដែលខូចខាត។ បន្ទាប់មក រៀបកាំជណ្តើរថ្មភក់ចំនួន ៤ កាំតាមលំនាំដើមឡើងវិញ។

អ្នកស្រី នង បូរ៉ាវី បន្ថែមថា ការដ្ឋានជួសជុលដែលស្ថិតនៅជាប់នឹងទឹកនេះ មានបញ្ហាប្រឈមមួយចំនួនត្រូវការពេលវេលា ការយកចិត្តទុកដាក់ អត់ធ្មត់ ការស្រឡាញ់ និងចង់ថែរក្សាមរតកដូនតា ដើម្បីឱ្យរឹងមាំគង់វង្សយូរអង្វែងបន្តទៀត។

គួរបញ្ជាក់ថា មកដល់បច្ចុប្បន្ននេះ គិតទាំងនៅដំណាក់កាលទី៨ នេះផង ការងារជួសជុលច្រាំងកសិន្ធុប្រាសាទអង្គរវត្ត ផ្នែកខាងជើងស្ពានហាល សរុបបានប្រវែងចំនួន ១៦៣ ម៉ែត្រហើយ៕

The post ច្រាំងកសិន្ធុប្រាសាទអង្គរវត្ត ត្រូវបានជួសជុល ក្នុងដំណាក់កាលទី៨ appeared first on Kampuchea Thmey Daily.

អ្នកស្រី​រដ្ឋលេខាធិការ​ប្រចាំការ បាន​ថ្លែង​អំណរ​គុណ និង​នូវ​ការ​កោត​សរសើរ​លោកនាយក​វិទ្យាស្ថាន និង​បុគ្គលិក​​​​អ្នក​ពាក់ព័ន្ធ​ទាំង​អស់ ជាពិសេស​រដ្ឋាភិបាលនៃសាធារណរដ្ឋកូរ៉េ ក្នុងការធានានូវនិរន្តរភាព និង​ផល​ជះ​ជា​វិជ្ជមាន​យ៉ាង​ច្រើន​ដល់​ការ​លើក​កម្ពស់​បរិវត្ត​កម្ម​ឌីជីថល​នៅ​ក្នុង​ប្រព័ន្ធ​អប់រំ​នៅ​កម្ពុជា​​​​ ចាប់​ពី​ឆ្នាំ២០០៥​ រហូត​មក​ដល់​បច្ចុប្បន្ន​។​ អ្នកស្រី បាន​បន្ត​លើក​ឡើង​ថា ការ​លើកកម្ពស់​ការ​អប់រំ​ឌីជីថល គី​ជា​អាទិភាព​សំខាន់​មួយ ​នៃ​​កំណែ​ទម្រង់​វិស័យ​អប់រំ យុវជន និង​កីឡា និង​ជា​កិច្ច​ឆ្លើយ​តប​ក្នុង​ការ​​សម្រេច​បាន​ការ​អភិវឌ្ឍ​ធនធាន​មនុស្ស គាំ​ទ្រ​ដល់​យុទ្ធសាស្ត្រ​បញ្ចកោណ ដំណាក់កាលទី១ ផ្តោត​ការ​យក​ចិត្ត​ទុក​ដាក់​ទៅ​លើ មនុស្ស ទឹក ភ្លើង ផ្លូវ និង​បច្ចេកវិទ្យា ដើម្បី​ធានា​នូវ​ការ​កសាង​មូលដ្ឋាន​គ្រឹះ​ឆ្ពោះ​ទៅ​សម្រេច​ចក្ខុ​វិស័យ​កម្ពុជា ​ឆ្នាំ២០៥០។

​​​​

អ្នកស្រីបាន​លើកឡើង​អំពី​ផល​ជះ ​នៃ​​កិច្ច​សហ​ប្រតិបត្តិ​ការ​រវាង​ភាគី​ទាំង​ពីរ ដែល​បាន​នាំ​មក​នូវ​ការ​ផ្លាស់​ប្តូរ​គួរ​ឱ្យសម្គាល់​ជា​វិជ្ជមាន​ជាច្រើន​​នៅ​កម្រិត​សាលារៀន​ ដោយ​ក្នុង​នោះ​សិក្ខាកាម​ដែល​ធ្លាប់​ទៅ​ចូលរួម​វគ្គ​បណ្ដុះ​បណ្ដាល​នៅ​ទី​ក្រុង​ប៊ូ​សាន បាន​បង្កើត​ជា​សហគមន៍​សិក្សា​វិជ្ជាជីវៈ ​នៃ​ការ​អប់រំ​ឌីជីថល ដោយ​បាន​បន្ត​អនុវត្ត​ជាក់​ស្តែង​នៅ​តាម​សាលារៀន​ផ្ទាល់​របស់​គាត់​ឱ្យបាន​ល្អ​បំផុត​តាម​ដែល​អាច​ធ្វើ​បាន ដើម្បី​ប្រែ​ក្លាយ​សាលារៀន​ជា​សាលារៀន​ឆ្លាតវៃ ដែល​មាន​គ្រូ​បង្រៀន​មាន​សមត្ថភាព​ឌីជីថល​គ្រប់​គ្រាន់ អាច​បន្ត​ដឹក​នាំ​សិស្សានុសិស្ស​ឱ្យសម្រេច​បាន​នូវ​លទ្ធផល​ការ​សិក្សា​ប្រកប​ដោយ​គុណភាព ជា​ពិសេស​ការ​កាត់​បន្ថយ​គម្លាត​ឌីជីថល​នៅ​សាលារៀន។

ដោយ​បាន​ឃើញ​នូវ​លទ្ធផល​ល្អ​ទាំងនេះ និង​ជា​កិច្ច​អបអរសាទរ ​នៃ​កិច្ច​សហការ​ប្រតិបត្តិការ​​រយៈពេល ២០ឆ្នាំ ​ជាមួយ​គ្នា អ្នកស្រីរដ្ឋលេខាធិការ បាន​ស្នើ​សុំ​ឱ្យមានការ​​ចុះ​ហត្ថលេខា​លើ​អនុស្សារណៈយោគយល់​ជាមួយ​គ្នា​សារ​ជាថ្មី​នៅ ​ឆ្នាំ​២០២៥ ដោយ​លើក​ឡើង​ពី​ការ​ពង្រីក​ការ​ងារ​លើក​កម្ពស់​ការ​អប់រំ​បែប​ឌី​ជី​ថល​នៅ​កម្ពុជា ឱ្យបាន​កាន់​តែ​ទូលំទូលាយ​ជា​ពិសេស​ផ្ដោត​ការ​អភិវឌ្ឍ​កម្រិត​ស្ថាប័ន​នៅ​គ្រឹះ​ស្ថាន​បណ្ដុះ​បណ្ដាល​​គ្រូ ដើម្បី​កាន់​តែ​ធានា​បាន​នូវ​ការ​អប់រំ​ឌីជីថល​ប្រកប​ប្រសិទ្ធភាព និង​មាន​និរន្តរភាព​។​​​​​​​

គួរបញ្ជាក់ថា បន្ទាប់​​ពី​ជំនួប​ពិភាក្សា​ជាមួយ ​រដ្ឋលេខាធិការប្រចាំការ នាថ្ងៃទី២៤ ខែកញ្ញា ឆ្នាំ២០២៥ នេះ គណៈប្រតិភូ​បាន​ជួប​ពិភាក្សា​ការ​ងារ​កម្រិត​បច្ចេកទេស​ជាមួយ​ថ្នាក់ដឹកនាំ​នាយកដ្ឋាន​បរិវត្ត​កម្ម​ឌីជីថល​ ដែល​អង្គភាព​សម្រប​សម្រួល​កិច្ច​សហប្រតិបត្តិការ​លើ​ការ​ងារ​នេះ ក៏​ដូច​ជា​បាន​​ជួប​សំណេះ​សំណាល​ជាមួយ​លោកគ្រូ អ្នកគ្រូ ដែល​ជា​អតីត​សិក្ខាកាម​​ធ្លាប់​បាន​ទៅ​​ចូលរួម​បណ្ដុះ​បណ្ដាល​​អភិវឌ្ឍ​សមត្ថភាព​ឌីជីថល ​នៅ​ទី​ក្រុង​ប៊ូសាន ​​​កាល​ពីខែ​មិថុនា ឆ្នាំ២០២៤៕

The post កូរ៉េ សហប្រតិបត្តិការ​ភាព​ជាដៃគូ​ការ​លើក​កម្ពស់​ការ​អប់រំ​បែប​ឌីជីថល ​នៅ​កម្ពុជា​​ appeared first on Kampuchea Thmey Daily.

វេជ្ជបណ្ឌិត ស៊ុង វិនតៈ រដ្ឋលេខាធិការ បានអញ្ជើញចុះហត្ថលេខា លើអនុស្សរណៈ នៃការយោគយល់គ្នា (MOU) រវាងក្រសួងសុខាភិបាល និងក្រុមហ៊ុន VINCI នៃសាធារណរដ្ឋបារាំង ក្រោមអធិបតីភាព សាស្ត្រាចារ្យ កុយ វ៉ាន់នី តំណាង សាស្ត្រាចារ្យ ឈាង រ៉ា រដ្ឋមន្ត្រី ក្រសួងសុខាភិបាល និង លោក Junsereiwath SOK Economic Attaché តំណាង លោក Jacques Pellet ឯកអគ្គរដ្ឋទូតវិសាមញ្ញ ពេញសមត្ថភាព នៃស្ថានទូតបារាំងប្រចាំព្រះរាជាណាចក្រកម្ពុជា។

អនុស្សរណៈ នៃការយោគយល់គ្នានេះ រៀបចំឡើងនៅរសៀល ត្រូវនឹងថ្ងៃទី២៣ ខែកញ្ញា ឆ្នាំ២០២៤ នៅទីស្តីការក្រសួងសុខាភិបាល ក្នុងគោលបំណងសំខាន់ រៀបចំប្រតិបត្តិគម្រោងសិក្សាលទ្ធភាព នៃការសាងសង់មន្ទីរពេទ្យអន្តរជាតិ កម្ពុជា-បារាំង ដែលគ្រោងជាមន្ទីរពេទ្យ ចូលរួមចំណែកក្នុងការធ្វើឱ្យកាន់តែប្រសើរឡើង នូវសេវាសុខាភិបាលប្រកបដោយបច្ចេកទេសខ្ពស់ ព្រមទាំងបម្រើឱ្យការបណ្តុះបណ្តាល និងការធ្វើការសិក្សាស្រាវជ្រាវផងដែរ។

នៅក្នុងពិធីនោះ សាស្ត្រាចារ្យរដ្ឋលេខាធិការបានថ្លែងអំណរគុណដល់ ក្រុមហ៊ុន Vinci និង Assistance Publique des Hôpitaux de Paris (AP-HP) ភាគីពាក់ព័ន្ធផ្សេងទៀតក្នុងគម្រោងនេះ ជាពិសេសស្ថានទូតបារាំង ប្រចាំកម្ពុជា ក៏ដូចជារដ្ឋាភិបាល នៃសាធារណរដ្ឋបារាំង ដែលតែងតែបានជួយឧបត្ថម្ភគាំទ្រវិស័យសុខាភិបាល នៃព្រះរាជាណាចក្រកម្ពុជា។ សាស្ត្រាចារ្យរដ្ឋលេខាធិការ បានជំរុញលើកទឹកចិត្តឱ្យភាគីពាក់ព័ន្ធទាំងអស់ខិតខំអនុវត្តឱ្យសម្រេចនូវគោលបំណងដែលបានចែងក្នុងអនុស្សរណៈយោគយល់គ្នានេះ។

គួរបញ្ជាក់ថា គម្រោងសិក្សាដែលមានរយៈពេលប្រមាណជា ៩ ខែនេះ ទទួលបានការគាំទ្រពី រដ្ឋាភិបាលបារាំង ក៏ដូចជាឆ្លុះបញ្ចាំង អំពីកិច្ចសហប្រតិបត្តិការយ៉ាងរឹងមាំ រវាងរដ្ឋាភិបាលនៃប្រទេសទាំងពីរ៕

The post កម្ពុជា បារាំង រៀបចំគម្រោងសិក្សាលទ្ធភាព សាងសង់ មន្ទីរពេទ្យអន្តរជាតិ កម្ពុជា-បារាំង appeared first on Kampuchea Thmey Daily.

គោលបំណងសំខាន់ នៃសិក្ខាសាលានេះគឺ៖ ១. ពិនិត្យសេចក្តីព្រាងចុងក្រោយ “សេចក្តីណែនាំសកម្មភាពបង្គ្រប់សម្រាប់សេវាព្យាបាលជំងឺផ្លូវចិត្ត និងភាពញៀនគ្រឿងញៀន” (Operational Guidelines of Complementary Package of Activities for Mental Health and Substance Abuse Services in Referral Hospitals) និង ២. ពិនិត្យសេចក្តីព្រាងចុងក្រោយ នៃមគ្គុទេសក៍គ្លីនិកសម្រាប់ធ្វើរោគវិនិច្ឆ័យ និងព្យាបាលបញ្ហាសុខភាពផ្លូវចិត្ត និងវិបត្តិបណ្តាលមកពីការប្រើប្រាស់សារធាតុញៀនក្នុងមន្ទីរពេទ្យបង្អែក (Clinical Practice Guidelines for Management of Mental and Substance Use Disorders in Referral Hospitals)។

គួរបញ្ជាក់ថា កិច្ចប្រជុំនេះ មានការចូលរួមពី លោកស្រីវេជ្ជបណ្ឌិត យូ សុគន្ធ ប្រធានស្តីទី នៃមន្ទីរសុខាភិបាល នៃរដ្ឋបាលខេត្តកំពត និង លោកវេជ្ជបណ្ឌិត ឈិត សុផល ប្រធាននាយកដ្ឋានសុខភាពផ្លូវចិត្ត និងការបំពានគ្រឿងញៀន ព្រមទាំង តំណាងនាយកដ្ឋាន តំណាងមន្ទីរពេទ្យជាតិ មន្ទីរសុខាភិបាលខេត្ត មន្ទីរពេទ្យបង្អែក មួយចំនួន អ្នកជំនាញសុខភាពផ្លូវចិត្ត តំណាងមកពីដៃគូអភិវឌ្ឍន៍ អង្គការមិនមែនរដ្ឋាភិបាល ព្រមទាំងតំណាងមកពីភាគីពាក់ព័ន្ធ សរុបមានអ្នកចូលរួមប្រមាណ ៤៥ រូប៕

The post ក្រសួងសុខាភិបាលពិនិត្យសេចក្តីព្រាងចុងក្រោយ សេវាព្យាបាលជំងឺផ្លូវចិត្តនឹងគ្រឿងញៀន appeared first on Kampuchea Thmey Daily.