​របាយការណ៍​ដដែល​បង្ហាញ​ថា ​ក្នុង​ចំណោមភ្ញៀវទេសចរណ៍​អន្តរជាតិជាង​ ១,៧៥ ​លាននាក់​ មាន​ទេសចរ​ចិនជាង ៤៥ ម៉ឺននាក់ ធ្លាក់ចុះ ២៣% វៀតណាម ចំនួនជាង ៤៤ ម៉ឺននាក់ធ្លាក់ចុះជាង ២៧% អាមេរិកចំនួនជាង ១០ ម៉ឺននាក់ ធ្លាក់ចុះជាង ១១% អង់គ្លេសចំនួនជាង ៦ ម៉ឺននាក់ ធ្លាក់ចុះជិត ១៥% បារាំងជាងចំនួន​ ៦ ម៉ឺននាក់ ធ្លាក់ចុះជាង ១៦%។​

​លោក ធួន ស៊ីណាន ​ប្រធាន​សមាគម​ទេសចរណ៍​អាស៊ី​ប៉ាស៊ីហ្វិក​កម្ពុជា​ (PATA) ​មានប្រសាសន៍​មក​កាន់​កម្ពុជាថ្មីថា​ មាន​កក្ដា​ជាច្រើនដែលបាន​ធ្វើឱ្យភ្ញៀវទេសចរអន្តរជាតិ​មកទស្សនា​កម្ពុជា​ថមថយ​ចុះ ​ក្នុងនោះមាន​កត្តា​ខាងក្នុង​ ​និង​ខាង​កត្តា​ក្រៅ ដោយសារតែភាពមិន​ប្រាកដ​ប្រជា​នៃសេដ្ឋកិច្ច​សកល ​និង​ភាពតានតឹងភូមិសាស្រ្តនយោបាយ។​

​លោកបន្ថែមថា ​ស្ថានភាពសេដ្ឋកិច្ចពិភពលោកនៅតែមិនទាន់មានស្ថិរភាព ដែល​ធ្វើ​ឱ្យ​អ្នកដំណើរជា​ច្រើន​កាត់បន្ថយការចំណាយលើការធ្វើដំណើរកម្សាន្ត​ និងផ្លាស់ប្ដូរទៅ​ជ្រើស​រើស​គោលដៅ​ដែល​មាន​តម្លៃប្រកួតប្រជែងជាងមុន។​

​ម្យ៉ាងទៀត ​ការប្រកួតប្រជែងក្នុងតំបន់អាស៊ានកាន់តែខ្លាំង ​ប្រទេសជិតខាងដូចជា ថៃ វៀតណាម និងម៉ា​ឡេស៊ី បានវិនិយោគយ៉ាងច្រើនលើការផ្សព្វផ្សាយទេសចរណ៍ ការបើកជើងហោះហើរថ្មី ការលើកលែងទិដ្ឋាការ និងការផ្ដល់កញ្ចប់ទេសចរណ៍ ដែលមានភាពទាក់ទាញខ្ពស់។​

ទោះជាយ៉ាងណា សក្ដានុពលទេសចរណ៍កម្ពុជានៅតែមានភាពរឹងមាំ។ កម្ពុជាមានបេតិកភណ្ឌ​ដ៏អស្ចារ្យ ​ឆ្នេរសមុទ្រ ​និង​កោះដែលមានសម្រស់ធម្មជាតិ ព្រមទាំងទេសចរណ៍ធម្មជាតិ ទេសចរណ៍​សហគមន៍ ទេសចរណ៍ម្ហូបអាហារ និងទេសចរណ៍សុខមាលភាព​ ដែលកំពុងមានការចាប់​អារម្មណ៍​កាន់​តែ​ច្រើនពីទីផ្សារអន្តរជាតិ។​

​លោក ធួន ស៊ីណាន​ យល់ឃើញថា៖ «​ការថយចុះនេះ គួរត្រូវបានចាត់ទុកជាឱកាសមួយសម្រាប់​យើងក្នុង​ការពិនិត្យ ឡើងវិញនូវយុទ្ធសាស្ត្រ បង្កើនគុណភាពសេវាកម្ម បង្កើតផលិតផលថ្មីៗ ពង្រីកទីផ្សារថ្មី និងពង្រឹងកិច្ច សហការរវាងរាជរដ្ឋាភិបាល និងវិស័យឯកជន។ ប្រសិនបើយើងអាចធ្វើបានជាប្រព័ន្ធ និងមានការចូលរួម ពីគ្រប់ភាគី លោកជឿជាក់ថា វិស័យទេសចរណ៍កម្ពុជានឹង​អាចស្តារកំណើន​ឡើង​វិញ​បានយ៉ាងរឹងមាំ និងប្រកបដោយចីរភាព»។​

​នៅ​ក្នុងឆ្នាំ ​២០២៥ ​កម្ពុជា​ទទួល​បាន​ភ្ញៀវ​ទេសចរអន្តរជាតិចំនួន​ ៥,៥៧ ​លាននាក់ ​ធ្លាក់ចុះ ១៦,៧% ​ធៀបនឹង​ឆ្នាំ ២០២៤ ​ខណៈចំណូលបានពី​វិស័យ​ទេសចរណ៍​មាន​ចំនួន ៣.៨៧៨ លាន​ដុល្លារ​ កើន​ឡើង ៦,៦%៕​

អត្ថបទ៖ ឡេង ដេត

The post ​កម្ពុជា​ ស្វាគមន៍ភ្ញៀវ​ទេសចរ​អន្តរជាតិ​ជិត ២ ​លាននាក់ ​នៅ​​ក្នុងឆមាសទី១ ​ឆ្នាំនេះ​ appeared first on Kampuchea Thmey Daily.

អស់រយៈពេលជាយូរ កម្ពុជាបានពឹងផ្អែកលើការនាំចូលផលិតផលចំណីអាហារជាច្រើន រាប់ចាប់ពីទឹកដោះ​គោ​ស្រស់ មីកញ្ចប់ រហូតដល់គ្រឿងទេស និងទឹកជ្រលក់ផ្សេងៗ។

ការគាំទ្ររបស់អូស្ត្រាលីចំពោះក្រុមហ៊ុនលាងឡេង ក្នុងការបង្កើតរោងចក្រកែច្នៃទឹកជ្រលក់ និងពង្រីកទីផ្សារ គ្រំចំពុះទាក្នុងស្រុក ដែលជាគ្រឿងផ្សំដ៏សំខាន់សម្រាប់ផលិតទឹកជ្រលក់។

គម្រោងនេះ ត្រូវបានរំពឹងថា នឹងបង្កើនតម្រូវការគ្រំចំពុះទា ពី៧២តោន ទៅជាង ៩៥០ តោន ក្នុងមួយឆ្នាំ និងរួមចំណែកផ្តល់ប្រាក់ចំណូលទៅគ្រួសារយ៉ាងហោចណាស់ ៤០០ គ្រួសារ នៅក្នុងសហគមន៍នេសាទពាមក្រសោប។

អូស្ត្រាលី កំពុងជួយភ្ជាប់ផលិតផលដែលផលិតនៅកម្ពុជា ជាមួយអ្នកចែកចាយធំៗ ដើម្បីឱ្យផលិតផលទាំងនោះអាចដាក់លក់បានកាន់តែទូលំទូលាយនៅតាមផ្សារទំនើបទូទាំងប្រទេស។

តាមរយៈការគាំទ្រអ្នកផលិតក្នុងស្រុក អូស្ត្រាលីកំពុងជួយកម្ពុជា ដើម្បីកសាងប្រព័ន្ធស្បៀងអាហារ ឱ្យមានភាព​ម្ចាស់ការជាងមុន ព្រមទាំងបង្កើតការងារ គាំទ្រជីវភាពរស់នៅរបស់ប្រជាជននៅតំបន់ជនបទ និងជំរុញកំណើនសេដ្ឋកិច្ចឱ្យកាន់តែមានភាពធន់៕

The post អូស្ត្រាលីគាំទ្រផលិតករកម្ពុជា កាត់បន្ថយការនាំចូល appeared first on Kampuchea Thmey Daily.

​ពន្ធគយពាក់ព័ន្ធការងារដោយបង្ខំផ្នែកទី ៣០១ ដែលទើបប្រកាសនាពេលថ្មីៗ កើតមានឡើង បន្ទាប់ពីយន្តការបណ្តោះអាសន្ននៃពន្ធគយសកលផ្នែកទី ១២២ បានផុតសុពលភាព។ ដូច្នេះ វាពុំមែន ជាពន្ធគយបន្ថែមពីលើអត្រាពន្ធគយសកល ១០% ដែលមានពីមុននោះទេ ប៉ុន្តែជាវិធានការថ្មីមួយ ​ដែលត្រូវបានអនុវត្តក្រោមផ្នែកទី ៣០១ នៃច្បាប់​ពាណិជ្ជកម្មសហរដ្ឋអាម៉េរិក។

​ម្យ៉ាងទៀត ​ចំណាត់ការក្រោមផ្នែក ៣០១ នេះ មិនមែនផ្តោតសំខាន់​ ទៅលើវត្តមាននៃការប្រើ​ប្រាស់​ការងារដោយបង្ខំ នៅក្នុងវិស័យផលិតកម្មសម្លៀកបំពាក់ វាយនភណ្ឌ ស្បែកជើង​ និងផលិតផល​ធ្វើដំណើរ​របស់កម្ពុជានោះទេ។ ​

ផ្ទុយទៅវិញ ការស៊ើបអង្កេតរបស់តំណាងពាណិជ្ជកម្មសហរដ្ឋអាមេរិក (USTR)​ ផ្តោតទៅលើថា​ តើដៃគូ​ពាណិជ្ជ​កម្ម​បានដាក់ចេញ ​និង​អនុវត្តប្រកបដោយប្រសិទ្ធភាពនូវវិធានការនានា​ ដើម្បីទប់ស្កាត់ការ​នាំចូល​ទំនិញ ឬវត្ថុធាតុដើម ដែលផលិតឡើងដោយប្រើប្រាស់ការងារដោយបង្ខំពី​ក្រៅប្រទេស​របស់​ពួកគេ មិនឱ្យចូលទៅក្នុងខ្សែច្រវាក់ផ្គត់ផ្គង់ក្នុងស្រុករបស់ពួកគេដែរឬទេ។​

​ដើម្បីឆ្លើយតបទៅនឹងតម្រូវការអន្តរជាតិដែលកំពុងវិវត្តនេះ កម្ពុជាបាន​ពង្រឹងក្របខ័ណ្ឌ​ច្បាប់​របស់ខ្លួន នាពេលថ្មីៗនេះ ដោយបានចេញនូវប្រកាស​អន្តរក្រសួងមួយ​ដែលហាម​ឃាត់ការ​នាំចូល​ទំនិញដែលផលិតឡើងទាំងស្រុង ឬផ្នែកណាមួយដោយប្រើប្រាស់ការងារដោយបង្ខំ។

​សកម្មភាពនេះឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាល​កម្ពុជា ក្នុងការការ​ពារភាពត្រឹម​ត្រូវនៃ​ខ្សែ​ច្រវាក់ផ្គត់ផ្គង់របស់កម្ពុជា​ និងការអនុវត្តស្របតាមស្តង់ដារ​ទិញអន្តរជាតិប្រកប​ដោយការទទួល​ខុស​ត្រូវ។

​TAFTAC លើកទឹកចិត្តសមាជិកទាំងអស់ឱ្យបន្តអនុវត្តការត្រួតពិនិត្យយ៉ាងហ្មត់ចត់ និងត្រឹមត្រូវលើខ្សែ ច្រវាក់​​ផ្គត់ផ្គង់ ​ដោយធានាថា វត្ថុធាតុដើម និងគ្រឿងបន្ទាប់បន្សំដែលនាំចូលត្រូវបានទិញប្រកបដោយការទទួលខុសត្រូវ រក្សាទុកព័ត៌មានដែលអាចតាមដានប្រភពដើមនៃអ្នកផ្គត់ផ្គង់ ​និង​ឯកសារគាំទ្រ​នានា ​ព្រមទាំងសហការជាមួយអ្នកផ្គត់ផ្គង់ ដើម្បីកាត់បន្ថយហានិភ័យ នៃការប្រើប្រាស់ការងារដោយបង្ខំ នៅក្នុងខ្សែច្រវាក់ផ្គត់ផ្គង់របស់ពួកគេ។​

​បើពិនិត្យលើទិដ្ឋភាពនៃភាពអាចប្រកួតប្រជែងផ្នែកពាណិជ្ជកម្ម កម្ពុជានៅតែស្ថិតក្នុងស្ថានភាពអំណោយ​ផល​​គួរសមក្រោមវិធានការបច្ចុប្បន្នរបស់សហរដ្ឋអាមេរិក។

​កម្ពុជា ជាប់ពន្ធគយក្នុងអត្រា ១០% ខណៈប្រទេសផ្គត់ផ្គង់ដៃគូប្រកួតប្រជែងមួយចំនួន ត្រូវជាប់ពន្ធក្នុងអត្រា​ខ្ពស់ជាងគឺ ១២,៥%។

USTR បានស្នើបង្កើតយន្តការកូតាអត្រាពន្ធ (TRQ) សម្រាប់ប្រទេស​កម្ពុជា​ ដោយផ្អែកលើការប្រើប្រាស់ធាតុ​ចូលវាយនភណ្ឌ ​និងកប្បាសអាអាមេរិក។ វិសាលភាពលម្អិត ​លក្ខណៈ​វិនិច្ឆ័យនៃសិទ្ធិទទួលបាន និងនីតិវិធីនៃការអនុវត្ត ​មិនទាន់ត្រូវ​បានប្រ​កាស​នៅ​ឡើយ​ទេ៕

The post សមាគមកាត់ដេរអះអាង ​កម្ពុជានៅតែមាន​អំណោយផល​ ទោះជាប់ពន្ធអាមេរិក ​១០%​ appeared first on Kampuchea Thmey Daily.

លោកស្រីប្រាប់សារព័ត៌មាន Bloomberg នៅថ្ងៃសុក្រទី ២៤ កក្កដា ២០២៦ថា កម្ពុជា រួមជាមួយប្រទេសបង់ក្លាដែស ឥណ្ឌូណេស៊ី និងម៉ាឡេស៊ី កំពុងពិភាក្សាជាមួយទីក្រុងវ៉ាស៊ីនតោនអំពីប្រព័ន្ធកូតាពន្ធ (tariff-rate quota system) ដើម្បីលើកទឹកចិត្តឱ្យមានការប្រើប្រាស់កប្បាស ដែលមានប្រភពមកពីសហរដ្ឋអាមេរិក ព្រម​ទាំងគាំទ្រដល់ការនាំចេញសម្លៀកបំពាក់។

ការចរចានេះធ្វើឡើងបន្ទាប់ពីការសម្រេចចិត្តរបស់ការិយាល័យតំណាងពាណិជ្ជកម្មសហរដ្ឋអាមេរិក (USTR)​ ក្នុងការដាក់អត្រាពន្ធ ១០ភាគរយ ក្រោមមាត្រា ៣០១ លើទំនិញនាំចូលពីកម្ពុជា ប៉ុន្តែ​បានដាក់អត្រាពន្ធដល់ទៅ ១២,៥ភាគរយ សម្រាប់ប្រទេសថៃ និងវៀតណាម។ USTR បញ្ជាក់ថា កម្ពុជាមាលក្ខណៈ​​​​សម្បត្តិគ្រប់គ្រាន់សម្រាប់ទទួលបានអត្រាពន្ធទាបជាងនេះ ​បន្ទាប់ពីបានដាក់ចេញនូវវិធានការហាមឃាត់ការនាំចូលទំនិញដែលផលិត ដោយកម្លាំងពលកម្មដោយបង្ខំ។

លោកស្រី និមល បញ្ជាក់ថា៖ «យើងក៏កំពុងស្ថិតក្នុងដំណើរការចរចាសម្រាប់ប្រព័ន្ធកូតាជាមួយសហ​រដ្ឋអាមេរិកផងដែរ។ ជាពិសេសគឺការនាំចូលវត្ថុធាតុដើមសម្រាប់ផលិតផលសម្លៀកបំពាក់ពីសហ​រដ្ឋអាមេរិក ដើម្បីយកមកកែច្នៃនៅកម្ពុជា និងនាំចេញត្រឡប់ទៅកាន់សហរដ្ឋអាមេរិកវិញ ដោយមិនជាប់ពន្ធ និងមិនកំណត់កូតា»។

លោកស្រីបានលើកឡើងថា កិច្ចព្រមព្រៀងនេះនឹងជួយពង្រីកជម្រើសនៃការស្វែងរកប្រភពវត្ថុធាតុដើម និងបង្កើនប្រសិទ្ធភាពផលិតកម្ម។

លោកស្រីបានបន្ថែមថា៖ «ប្រព័ន្ធផលិតកម្មសម្លៀកបំពាក់បែបខ្សែសង្វាក់រួមបញ្ចូលគ្នារបស់យើង មានភាព​បត់បែនខ្ពស់ក្នុងការឆ្លើយតបទៅនឹងវត្ថុធាតុដើមដែលនាំចូលមក។ កាលណាយើងមានជម្រើសក្នុងការស្វែង​រកប្រភពវត្ថុធាតុដើមកាន់តែច្រើន នោះសមត្ថភាពរបស់យើងក្នុងការសម្របខ្លួន កាត់បន្ថយថ្លៃដើមផលិតកម្ម និងរក្សាភាពប្រកួតប្រជែង ក៏កាន់តែប្រសើរឡើងដែរ»។

លោកស្រី និមល បានបន្ថែមថា កម្ពុជាកំពុងធ្វើទំនើបកម្មនីតិវិធីគយ ការសម្របសម្រួលស្តង់ដារ និងសម្រួលនីតិវិធីផ្តល់អាជ្ញាប័ណ្ណ ដែលជាផ្នែកមួយនៃការកែទម្រង់ ដើម្បីត្រៀមខ្លួនសម្រាប់ការចាកចេញពីឋានៈជាប្រទេសអភិវឌ្ឍន៍តិចតួច (LDC) នៅឆ្នាំ២០២៩។

លោកស្រីបានលើកឡើងថា យន្តការកូតាផ្អែកលើកប្បាសដែលបានស្នើឡើងនេះ អាចជួយធ្វើពិពិធកម្មប្រភពវត្ថុធាតុដើម ព្រមទាំងពង្រឹងទំនាក់ទំនងពាណិជ្ជកម្មទ្វេភាគីផងដែរ៕

The post កម្ពុជា សម្លឹងរកការនាំចេញសម្លៀកបំពាក់ទៅទីផ្សារអាមេរិក ដោយមិនជាប់ពន្ធ តាមរយៈកូតាកប្បាស appeared first on Kampuchea Thmey Daily.

តម្លៃប្រេងឆៅ Brent បានកើនឡើង ៦,៦២ ដុល្លារ ឬ ៧% ​ដល់​ ១០០,៦៩ ដុល្លារ/បារ៉ែល ​ដែលជាកម្រិតខ្ពស់បំផុតរាប់ចាប់តាំងពីថ្ងៃទី ២២ ខែឧសភា។ ដោយឡែកតម្លៃប្រេងអាមេរិក ​WTI វិញ បានកើនឡើង ៥,៣៦ ដុល្លារ​ ឬ ៦,២% ដល់​ ៩២,១៩ ដុល្លារ/បារ៉ែល ដែលជាកម្រិតខ្ពស់បំផុតចាប់តាំងពីដើមខែមិថុនា។​

តម្លៃប្រេងទាំង២បាន​ធ្លាក់ចុះតិចតួចពេលបើកការជួញដូរនៅថ្ងៃសុក្រ ហើយរំពឹងថានឹងកើនឡើងបើគិតជាអត្រាប្រចាំសប្ដាហ៍។

កំណើនតម្លៃប្រេងនៅពេលនេះកើតឡើងចំពេលដែលអាមេរិកបន្តវាយប្រហារលើអ៊ីរ៉ង់។ ដោយឡែក​ក្រុមហ៊ូធី​នៅយេម៉ែនឯណោះវិញ អះអាងថាបានវាយប្រហារលើនាវាដឹកប្រេងរបស់អារ៉ាប៊ីសាអូឌីតចំនួន ២ គ្រឿងនៅសមុទ្រក្រហម។ ភាគីអារ៉ាប៊ីសាអូឌីតបានបញ្ជាក់ថា នាវាមួយបានឆេះ ប៉ុន្តែមិនបានបញ្ជាក់ថា អ្នកណាជាអ្នកវាយប្រហារនោះទេ។

ការវាយប្រហារនេះបានបង្កើនការព្រួយបារម្ភថា ការផ្គត់ផ្គង់ប្រេងពិភពលោកអាចរងផលប៉ះពាល់កាន់តែខ្លាំង ខណៈការដឹកជញ្ជូនតាមច្រកហ័រមូហ្សនៅតែមានការរាំងស្ទះខ្លាំងដោយសារតែការបិទខ្ទប់របស់អ៊ីរ៉ង់។ ច្រក​ហ័រមូហ្ស និង បាប អែល ម៉ាន់ដេប គឺជាផ្លូវដឹកជញ្ជូនប្រេងដ៏សំខាន់ ដែលរួមគ្នាដឹកប្រេងប្រហែល ១/៤ នៃការផ្គត់ផ្គង់ប្រេងពិភពលោក។

អ្នកវិភាគបានលើកឡើងថា ភាពតានតឹងនៅមជ្ឈិមបូព៌ា និងហានិភ័យលើការដឹកជញ្ជូនប្រេង កំពុងជំរុញឱ្យតម្លៃប្រេងបន្តកើនឡើង។ ធនាគារ Goldman Sachs ព្យាករថា តម្លៃប្រេង Brent អាចឡើងលើស ១២០ ដុល្លារ/បារ៉ែល នៅត្រីមាសទី៤ ប្រសិនបើការរាំងស្ទះនៅច្រក​ហ័រមូហ្សបន្តអូសបន្លាយ ហើយអាចកើនថែមទៀត ប្រសិនបើច្រកបាបអែលម៉ាន់ដេប និងព្រែកជីកហ្ស៊ុយអេ ក៏ជួបការរំខានដែរ។

ទន្ទឹមនឹងនេះ កងឆ្មាំបដិវត្តន៍អ៊ីរ៉ង់វិញបានអះអាងថា នាវាដឹកប្រេងមួយបានឆេះបន្ទាប់ពីមានការផ្ទុះនៅក្បែរឆ្នេរអូម៉ង់ ខណៈនាវា ២ ផ្សេងទៀតបានត្រឡប់ក្រោយ។ IRGC ក៏អះអាងថា ច្រក​ហ័រមូហ្ស ស្ថិតក្រោមការគ្រប់គ្រងរបស់ខ្លួន ហើយនាវាដឹកប្រេងនឹងមិនអាចឆ្លងកាត់បានឡើយ ដោយគ្មានការសម្របសម្រួលជាមួយអ៊ីរ៉ង់។

ជាការឆ្លើយតប ប្រធានាធិបតីអាមេរិក Donald Trump បានព្រមានថា អ៊ីរ៉ង់ និងសម្ព័ន្ធមិត្តរបស់ខ្លួន នឹងប្រឈមមុខនឹង «ការវាយប្រហារយោធាធ្ងន់ធ្ងរ»។

យោងតាមអ្នកវិភាគរបស់ធនាគារ UBS ការវាយប្រហារលើនាវានៅច្រក​ហ័រមូហ្ស បានធ្វើឱ្យចំនួននាវាដឹកប្រេងឆ្លងកាត់តំបន់នេះធ្លាក់ចុះយ៉ាងខ្លាំង។ ទន្ទឹមនឹងនេះ ការនាំចេញប្រេងរបស់អ៊ីរ៉ង់ក៏ត្រូវបានរំពឹងថាបានធ្លាក់មកជិតសូន្យ បន្ទាប់ពីសហរដ្ឋអាមេរិកបង្កើនសម្ពាធលើការដឹកជញ្ជូនប្រេងរបស់អ៊ីរ៉ង់​៕

The post តម្លៃប្រេងអន្តរជាតិហក់ដល់ ១០០ ដុល្លារ/បារ៉ែលជាថ្មី ជុំវិញភាពតានតឹងមជ្ឈិមបូព៌ា appeared first on Kampuchea Thmey Daily.

​លើសពីនេះ សហរដ្ឋអាមេរិកបានផ្តល់ការលើកលែងពន្ធដល់កម្ពុជា​ សម្រាប់បញ្ជីទំនិញ​ដែលសហរដ្ឋ​អាមេរិកមិនផលិត ដូចជាគ្រាប់ស្វាយចន្ទីជាដើម។​

ចំណុចសំខាន់នោះគឺ សហរដ្ឋអាមេរិកផ្តល់ជូនកម្ពុជានូវការលើក​លែងពន្ធពិសេស​សម្រាប់​ផលិត​ផលសម្លៀកបំពាក់ ដោយផ្អែកលើបរិមាណកប្បាស ឬក្រណាត់កប្បាសអាមេរិក ដែលកម្ពុជា​នាំចូល។ ​ការលើកលែងពន្ធសម្រាប់ការនាំចូលកប្បាសអាមេរិកនេះ​ មានគោលបំណងជំរុញ​ផលិតកម្មក្នុង​សហរដ្ឋអាមេរិក ​និង​កាត់បន្ថយការពឹងផ្អែកលើប្រទេសចិន។

​លោក Casey Barnett អតីត​ប្រធានសភាពាណិជ្ជកម្មអាមេរិកនៅកម្ពុជា​យល់ឃើញថា​ នេះជាឱកាស ​ប៉ុន្តែក៏ជាហានិភ័យផងដែរ ​ក្នុងឆ្នាំ​ ២០២៥​ កម្ពុជា​បាននាំចេញសម្លៀកបំពាក់​ទៅសហរដ្ឋអាមេរិក​ក្នុង​ទឹក​ប្រាក់ ៤ ពាន់លានដុល្លារ។ ​ក្នុងឆ្នាំដដែលនោះ កម្ពុជាបាននាំចូលកប្បាស​ និងក្រណាត់​ពីប្រទេសចិនក្នុងទឹកប្រាក់ ២.៨ ពាន់លានដុល្លារ ដែលត្រូវបានប្រើប្រាស់ដើម្បី​ផលិតសម្លៀក​បំពាក់​នាំចេញ​ទៅសហរដ្ឋអាមេរិក ​និង​សហភាពអឺរ៉ុប។ ​ចំណែកឯការនាំចូលកប្បាស និងក្រណាត់​ពីស​ហ​រដ្ឋ​អាមេរិកវិញ មានត្រឹមតែ ​១៣៧ ០០០​ដុល្លារប៉ុណ្ណោះ ដែលជាចំនួន​តូចតាចបំផុត។​

ហានិភ័យនោះគឺថា ក្នុងរយៈពេលខ្លី កម្ពុជាអាចបាត់បង់ការបញ្ជាទិញទៅឱ្យប្រទេសឥណ្ឌូនេស៊ី និងបង់ក្លា​ដែស​ ដែលទទួលបានអត្រាពន្ធ ១០% ពីសហរដ្ឋអាមេរិកដូចគ្នា​ ព្រមទាំងការលើក​លែង​ពន្ធសម្រាប់សម្លៀកបំពាក់ផងដែរ។​

​ប្រទេសទាំងពីរនេះជាដៃគូប្រកួតប្រជែងរបស់កម្ពុជាក្នុងវិស័យកាត់ដេរ ហើយពួកគេមាន​ឧស្សា​ហកម្ម​ផលិតក្រណាត់ដ៏ធំស្រាប់ផងដែរ។ កម្ពុជាខ្វះរោងចក្រផលិតក្រណាត់។ ដូច្នេះ កម្ពុជា​ត្រូវតែធ្វើសកម្មភាពឱ្យបានឆាប់រហ័ស ​ដើម្បីទាក់ទាញការវិនិយោគលើផលិតកម្មក្រណាត់ បើពុំ​ដូច្នោះ​ទេ ​នឹង​បាត់បង់ការបញ្ជាទិញបន្តិចម្តងៗ។ ​ឧបសគ្គរួមមាន ​តម្លៃអគ្គិសនីខ្ពស់នៅកម្ពុជា និង​ដំណើរ​ការវាយតម្លៃផលប៉ះពាល់បរិស្ថានដ៏លំបាក។​

លោក Casey Barnett បន្ថែមថា ​កម្ពុជាក៏ប្រឈមនឹងហានិភ័យ ​និងឱកាសផងដែរ ​ចំពោះពន្ធគយសំណុំទីពីរ ដែលនឹងត្រូវប្រកាសដោយ USTR ជាការឆ្លើយតបទៅនឹងការស៊ើបអង្កេតតាមមាត្រា ៣០១​ ស្តីពីសមត្ថភាពផលិតកម្មលើស។ ពន្ធទីពីរនេះ ត្រូវបានរំពឹងថានឹងចេញក្នុង​រយៈពេលពីរ​ខែ​ខាងមុខ។ ​

​កម្ពុជាអាចនឹងទទួលបានអត្រាអំណោយផលក្នុងពន្ធបន្ទាប់នេះ ប៉ុន្តែក៏អាចមានលក្ខខណ្ឌតម្រូវឱ្យ​កាត់បន្ថយការពឹងផ្អែកលើវត្ថុធាតុដើមពីប្រទេសចិនផងដែរ។

​បន្ទាប់ពីពន្ធស្តីពីសមត្ថភាពផលិតកម្មលើសនេះ USTR ត្រូវបានរំពឹងថានឹងវិលត្រឡប់​មកពិភាក្សា​ជាមួយកម្ពុជាឡើងវិញ អំពីកិច្ចព្រមព្រៀងពាណិជ្ជកម្មទៅវិញទៅមក (Agreement on Reciprocal Trade) ដើម្បីបញ្ចប់ការធ្វើវិសោធនកម្ម និងជំរុញឱ្យរដ្ឋសភាកម្ពុជាផ្តល់សច្ចាប័ន។​

ឧបសគ្គមួយទៀតចំពោះឧស្សាហកម្មកាត់ដេររបស់កម្ពុជា គឺកង្វះវឌ្ឍនភាពជាសាធារណៈណាមួយ ឆ្ពោះទៅរកកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុប។​

កម្ពុជានឹងបាត់បង់ការលើកលែងក្រោមប្រព័ន្ធ EBA (អ្វីៗគ្រប់យ៉ាងលើកលែងតែអាវុធ) ពីសហ​ភាពអឺរ៉ុប​ក្នុងពេលឆាប់ៗនេះ ហើយម៉ាកយីហោនានាមិនសុខចិត្ត​បង្កើនការ​បញ្ជាទិញ​នៅកម្ពុជា​ឡើយ ​លុះត្រាតែមានសញ្ញានៃវឌ្ឍនភាពឆ្ពោះទៅសម្រេចបាន FTA ឬរបបពន្ធអំណោយ​ផល​ផ្សេង​ទៀត នៅពេលការលើកលែង EBA ផុតកំណត់៕

The post អាមេរិកដាក់ពន្ធថ្មី ​១០% ​លើកម្ពុជា ​និង១២.៥% ​លើប្រទេស ៣៨ ​ផ្សេងទៀត ​រួមទាំងថៃ ​និងវៀតណាម​ appeared first on Kampuchea Thmey Daily.

អ្នកឧកញ៉ា គិត ម៉េង បានលើកឡើងនៅក្នុងជំនួបពិភាក្សាការងារជាមួយលោកស្រី វីវៀន ឡូស សាន់ម៉ាទីន (Vivian Loss Sanmartin) ឯកអគ្គរដ្ឋទូតវិសាមញ្ញ និងពេញសមត្ថភាពនៃ​សាធារណរដ្ឋសហព័ន្ធប្រេស៊ីលប្រចាំកម្ពុជា នៅព្រឹកថ្ងៃទី ២៣ កក្កដា ២០២៦។

លោកស្រី វីវៀន ឡូស សាន់ម៉ាទី បានបង្ហាញនូវបំណងប្រាថ្នាយ៉ាងមុតមាំក្នុងការជំរុញកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅបន្ថែមទៀត តាមរយៈការលើកកម្ពស់​ទំនាក់ទំនងសេដ្ឋកិច្ច ពាណិជ្ជកម្ម និងជំរុញគណៈប្រតិភូធុរកិច្ចរវាងប្រទេសទាំងពីរ ដើម្បី​ពង្រីកឱកាសវិនិយោគថ្មីៗ និងនាំមកនូវប្រយោជន៍ទៅវិញទៅ​មក​សម្រាប់ប្រជាជាតិ​ទាំងពីរ និង​បានវាយតម្លៃខ្ពស់ចំពោះសក្តានុពលសេដ្ឋកិច្ចកម្ពុជា។

អ្នកឧកញ៉ា គិត ម៉េង អបអរសាទរចំពោះការ បង្កើតស្ថានទូតប្រេស៊ីលនៅរាជធានីភ្នំពេញ ក្នុងការបន្តពង្រឹងទំនាក់ទំនងការទូត និងសេដ្ឋកិច្ចរវាងប្រទេសទាំងពីរ។

រាជរដ្ឋាភិបាលកម្ពុជាបានបង្កើតក្របខ័ណ្ឌធុរកិច្ចដ៏ល្អប្រសើរ ដែលអនុញ្ញាតឱ្យវិនិយោគិន​បរទេសមានកម្ម​សិទ្ធិ ១០០% លើស្ទើរគ្រប់វិស័យ ដើម្បីទាក់ទាញ ការវិនិយោគផ្ទាល់ ព្រមទាំងការបង្កើតតំបន់សេដ្ឋកិច្ចពិសេស ក្នុងនោះរដ្ឋាភិបាលកម្ពុជាកំពុងការពារការ​វិនិយោគដែលមានស្រាប់ ទាក់ទាញធុរកិច្ចថ្មីៗ និងអនុវត្តការកែទម្រង់យ៉ាង​សកម្មដើម្បីគាំទ្រ​ដល់សហគ្រាសធុនតូច និងមធ្យម (SMEs)។

អ្នកឧកញ៉ា បានស្នើ​ លោកជំទាវ​ឯក​អគ្គរដ្ឋ​ទូត​ ជំរុញ​ដល់​រដ្ឋាភិបាល​ប្រទេស​ទាំងពីរ​៖ ១) ជំរុញ​កិច្ចព្រមព្រៀង​​ពាណិជ្ជកម្មសេរីទ្វេភាគី (FTA) ២)កិច្ចព្រមព្រៀងជំរុញ និងការពារការវិនិយោគ និង ៣) កិច្ចព្រមព្រៀងស្តីពីការចៀសវាងការយកពន្ធត្រួតគ្នា (DTA)។

អ្នក​ឧកញ៉ាជំរុញ​លើកកម្ពស់វិស័យទេសចរណ៍ និងលំហូរភ្ញៀវទេសចរ តាមរយៈការសិក្សាលើការបង្កើតជើងហោះហើរត្រង់ និងការសម្របសម្រួលទិដ្ឋាការទេសចរណ៍។

អ្នក​ឧកញ៉ា បន្ថែម​ថា កម្ពុជាមានទីតាំងយុទ្ធសាស្ត្រនៅចំកណ្តាលអាស៊ាន ដែលផ្តល់នូវច្រកចូលទីផ្សារតំបន់ដ៏ធំ​ ហើយ​អាស៊ាន​គឺ​ជា​តំបន់​ដែល​កំពុង​មាន​កំណើន​ខ្ពស់ ទោះបីជាមានបញ្ហាប្រឈម និងជម្លោះនៅមជ្ឈិមបូព៌ាក៏ដោយ។

ភាគីទាំងពីរបានឯកភាព​ជា​គោលការណ៍​ លើចំណុចដែល​បាន​ពិភាក្សា​ និងត្រៀមខ្លួនក្នុងការ​ស្វាគមន៍ដំណើរទស្សនកិច្ចរបស់គណៈប្រតិភូធុរកិច្ចប្រេស៊ីលមកកម្ពុជា និងពីកម្ពុជាទៅ​ប្រេស៊ីល​នាពេលអនាគត ដើម្បីទាក់​ទាញការវិនិយោគផ្ទាល់ និងពង្រឹងទំនាក់ទំនងការទូត និងសេដ្ឋកិច្ចនៃប្រទេសទាំងពីរ៕

The post កម្ពុជាស្នើឱ្យប្រេស៊ីល ជំរុញ​កិច្ចព្រមព្រៀងពាណិជ្ជកម្មសេរីទ្វេភាគី appeared first on Kampuchea Thmey Daily.

តំណាងពាណិជ្ជកម្មអាមេរិក (USTR) លោក Jamieson Greer បានបង្ហើបក្នុងបទសម្ភាសជាមួយ CNBC កាលពីថ្ងៃអង្គារ ក្រោយត្រូវបានចោទសួរពាក់ព័ន្ធនឹងពន្ធថ្មីថា៖ «យើងរំពឹងថានឹងមានវិធានការមួយចំនួនក្នុងពេលឆាប់ៗនេះ» ប៉ុន្តែលោកមិនអាចបញ្ជាក់ពេលវេលាច្បាស់លាស់បានទេ ដោយសារត្រូវជូនដំណឹងដល់សភា និងភាគីពាក់ព័ន្ធជាមុន។

ការប្រកាសនេះកើតឡើង​ប៉ុន្មានថ្ងៃប៉ុណ្ណោះ បន្ទាប់ពីរដ្ឋបាល ត្រាំ បានដាក់ពន្ធថ្មី ៥០% លើទំនិញពីកាណាដា និង ២៥% លើទំនិញនាំចូលពីប្រេស៊ីល ​ខណៈពន្ធបណ្តោះអាសន្នមួយទៀតរបស់អាមេរិក ​នឹងផុតកំណត់នៅថ្ងៃសុក្រនេះ។

ហេតុអ្វីអាមេរិក​ដាក់ពន្ធថ្មី?

កាលពីខែកុម្ភៈ តុលាការកំពូលអាមេរិកបានសម្រេចថា ពន្ធគយបដិការ​ ឬ ​«Reciprocal Tariffs» ដែលលោក ត្រាំ ប្រកាសឡើងកាលពីឆ្នាំ ២០២៥ ថាខុសច្បាប់ និងត្រូវលុបចោល។ តុលាការបានសម្រេចថា ច្បាប់​​ស្តីពីអំណាចសេដ្ឋកិច្ច​ក្នុងគ្រាអាសន្នអន្តរជាតិ (IEEPA) ដែលរដ្ឋបាល ត្រាំ បានប្រើប្រាស់ គឺមិនបានផ្តល់សិទ្ធិគ្រប់គ្រាន់សម្រាប់ការដាក់ពន្ធ​នោះទេ។

​ក្រោយការសម្រេចនេះ រដ្ឋបាល ត្រាំ បានស្វែងរកមូលដ្ឋានច្បាប់ផ្សេងទៀត ដើម្បីបន្តយុទ្ធសាស្ត្រពន្ធរបស់ខ្លួន។ ពន្ធថ្មី​រដ្ឋបាលគ្រោងប្រកាសឡើងនោះ នឹងប្រើប្រាស់មាត្រា ៣០១ នៃច្បាប់ពាណិជ្ជកម្មឆ្នាំ១៩៧៤ ដែលអនុញ្ញាតឱ្យអាមេរិកចាត់វិធានការលើប្រទេសដែលខ្លួនចោទថាមានការអនុវត្តពាណិជ្ជកម្មមិនយុត្តិធម៌ ដែលរួមបញ្ជូលទាំងបញ្ហា​កម្លាំងពលកម្មដោយបង្ខំ។

លោក Greer បាននិយាយថា ការស៊ើបអង្កេតថ្មីផ្តោតលើបញ្ហាពលកម្មដោយបង្ខំ ដោយបញ្ជាក់ថា៖ «សហរដ្ឋអាមេរិកមានច្បាប់ហាមឃាត់ការជួញដូរទំនិញដែលផលិតដោយពលកម្មដោយបង្ខំ។ ប្រទេសផ្សេងៗជាច្រើនមិនមានច្បាប់បែបនេះ ឬមិនបាន​អនុវត្តវា​ឱ្យ​មានប្រសិទ្ធភាព»។

គួរកត់សម្គាល់ថា មុន​ដាក់វិធានការថ្មី រដ្ឋបាល ត្រាំ ក៏បានប្រើពន្ធបណ្តោះអាសន្នតាមមាត្រា ១២២ នៃច្បាប់ពាណិជ្ជកម្មឆ្នាំ១៩៧៤ ដែលដាក់ពន្ធ ១០% លើការនាំចូលទូទៅ។ ពន្ធនេះត្រូវផុតកំណត់នៅថ្ងៃសុក្រ ប្រសិនបើសភាមិនចាត់វិធានការបន្ត។

ដើម្បីបន្តគោលនយោបាយពន្ធ រដ្ឋបាលអាមេរិកកំពុងប្តូរទៅប្រើមាត្រា ៣០១ ដែលអ្នកជំនាញមួយចំនួនមើលឃើញថាអាចមានភាពរឹងមាំជាងផ្នែកច្បាប់។

កម្ពុជានិងប្រទេសអាស៊ីក្នុងបញ្ជី

យោងតាម USTR ប្រទេសប្រមាណ ៦០ រួមទាំងសហភាពអឺរ៉ុប និងសម្ព័ន្ធមិត្តជាច្រើន ត្រូវបានស៊ើបអង្កេតពាក់ព័ន្ធនឹងពលកម្មដោយបង្ខំ និងបញ្ហាពាណិជ្ជកម្ម រួមទាំងផលិតកម្មលើសលុប។

កម្ពុជាស្ថិតក្នុងក្រុមប្រទេសដែលអាចទទួលរងអត្រាពន្ធ ១០% ដោយសារតែ​មាន​កិច្ចព្រមព្រៀងពាណិជ្ជកម្មបដិការជាមួយអាមេរិក ដែលចែកអំពីការប្ដេជ្ញាចិត្តលើដំណោះស្រាយបញ្ហាកម្លាំងពលកម្មដោយបង្ខំ។ ប្រទេស ឬដែនដីក្នុងតំបន់ដែលប្រឈមនឹងពន្ធក្នុងអត្រាដូចគ្នារួមមាន​បង់ក្លាដែស ឥណ្ឌូណេស៊ី ម៉ាឡេស៊ី និងតៃវ៉ាន់ជាដើម។

​ដោយឡែក​ប្រទេសដូចជា ថៃ ហ្វីលីពីន ចិន ជប៉ុន និងកូរ៉េខាងត្បូង អាចប្រឈមអត្រាពន្ធប្រហែល ១២,៥% ដោយសារ​​​បរាជ័យ «ក្នុងការអនុវត្តការហាមឃាត់ការនាំចូលកម្លាំងពលកម្មដោយបង្ខំប្រកបដោយប្រសិទ្ធភាព»។

ផលប៉ះពាល់លើពាណិជ្ជកម្មពិភពលោក

អ្នកជំនាញពាណិជ្ជកម្មបានព្រមានថា ពន្ធថ្មីអាចបង្កើនភាពមិនប្រាកដប្រជាសម្រាប់ខ្សែច្រវ៉ាក់ផ្គត់ផ្គង់ពិភពលោក ខណៈប្រទេសនាំចេញនៅអាស៊ី អាចរងសម្ពាធពីការកើនឡើងថ្លៃដើម និងការផ្លាស់ប្តូរទិសដៅវិនិយោគ។

លោក Blake Harden អ្នកជំនាញគោលនយោបាយពាណិជ្ជកម្ម បាននិយាយប្រាប់ CNBC ថា រដ្ឋបាល ត្រាំ កំពុងព្យាយាម «បង្កើតឡើងវិញ» នូវយុទ្ធសាស្ត្រពន្ធសកល តាមរយៈឧបករណ៍ច្បាប់ផ្សេងទៀត។

ការផ្លាស់ប្តូរនេះបង្ហាញថា សង្គ្រាមពាណិជ្ជកម្មរបស់អាមេរិកអាចបន្តជាបញ្ហាសំខាន់សម្រាប់សេដ្ឋកិច្ចពិភពលោក ក្នុងពេលដែលប្រទេសនាំចេញកំពុងតាមដានយ៉ាងជិតស្និទ្ធនូវវិធានការថ្មីពីទីក្រុងវ៉ាស៊ីនតោន៕

The post ពិភពលោកប្រឈមនឹងពន្ធអាមេរិកថ្មី ដោយរដ្ឋបាល ត្រាំ គ្រោងប្រកាសពន្ធពលកម្មដោយបង្ខំ ហើយប៉ះទាំងកម្ពុជា appeared first on Kampuchea Thmey Daily.