កម្ពុជាស្នើឱ្យប្រេស៊ីល ជំរុញ​កិច្ចព្រមព្រៀងពាណិជ្ជកម្មសេរីទ្វេភាគី

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និង ជាប្រធានក្រុមប្រឹក្សាពិគ្រោះយោបល់​ធុរ​កិច្ច​អាស៊ាន​សម្រាប់កម្ពុជា​ បានស្នើ​ឱ្យ​ឯក​អគ្គរដ្ឋ​ទូតប្រេស៊ីលប្រចាំកម្ពុជា​ ជំរុញ​កិច្ចព្រមព្រៀង​ពាណិជ្ជកម្មសេរីទ្វេភាគី (FTA) ដើម្បីបង្កើនកិច្ចសហប្រតិបត្តិការពាណិជ្ជកម្ម។

អ្នកឧកញ៉ា គិត ម៉េង បានលើកឡើងនៅក្នុងជំនួបពិភាក្សាការងារជាមួយលោកស្រី វីវៀន ឡូស សាន់ម៉ាទីន (Vivian Loss Sanmartin) ឯកអគ្គរដ្ឋទូតវិសាមញ្ញ និងពេញសមត្ថភាពនៃ​សាធារណរដ្ឋសហព័ន្ធប្រេស៊ីលប្រចាំកម្ពុជា នៅព្រឹកថ្ងៃទី ២៣ កក្កដា ២០២៦។

លោកស្រី វីវៀន ឡូស សាន់ម៉ាទី បានបង្ហាញនូវបំណងប្រាថ្នាយ៉ាងមុតមាំក្នុងការជំរុញកិច្ចសហប្រតិបត្តិការទ្វេភាគីឱ្យកាន់តែស៊ីជម្រៅបន្ថែមទៀត តាមរយៈការលើកកម្ពស់​ទំនាក់ទំនងសេដ្ឋកិច្ច ពាណិជ្ជកម្ម និងជំរុញគណៈប្រតិភូធុរកិច្ចរវាងប្រទេសទាំងពីរ ដើម្បី​ពង្រីកឱកាសវិនិយោគថ្មីៗ និងនាំមកនូវប្រយោជន៍ទៅវិញទៅ​មក​សម្រាប់ប្រជាជាតិ​ទាំងពីរ និង​បានវាយតម្លៃខ្ពស់ចំពោះសក្តានុពលសេដ្ឋកិច្ចកម្ពុជា។

អ្នកឧកញ៉ា គិត ម៉េង អបអរសាទរចំពោះការ បង្កើតស្ថានទូតប្រេស៊ីលនៅរាជធានីភ្នំពេញ ក្នុងការបន្តពង្រឹងទំនាក់ទំនងការទូត និងសេដ្ឋកិច្ចរវាងប្រទេសទាំងពីរ។

រាជរដ្ឋាភិបាលកម្ពុជាបានបង្កើតក្របខ័ណ្ឌធុរកិច្ចដ៏ល្អប្រសើរ ដែលអនុញ្ញាតឱ្យវិនិយោគិន​បរទេសមានកម្ម​សិទ្ធិ ១០០% លើស្ទើរគ្រប់វិស័យ ដើម្បីទាក់ទាញ ការវិនិយោគផ្ទាល់ ព្រមទាំងការបង្កើតតំបន់សេដ្ឋកិច្ចពិសេស ក្នុងនោះរដ្ឋាភិបាលកម្ពុជាកំពុងការពារការ​វិនិយោគដែលមានស្រាប់ ទាក់ទាញធុរកិច្ចថ្មីៗ និងអនុវត្តការកែទម្រង់យ៉ាង​សកម្មដើម្បីគាំទ្រ​ដល់សហគ្រាសធុនតូច និងមធ្យម (SMEs)។

អ្នកឧកញ៉ា បានស្នើ​ លោកជំទាវ​ឯក​អគ្គរដ្ឋ​ទូត​ ជំរុញ​ដល់​រដ្ឋាភិបាល​ប្រទេស​ទាំងពីរ​៖ ១) ជំរុញ​កិច្ចព្រមព្រៀង​​ពាណិជ្ជកម្មសេរីទ្វេភាគី (FTA) ២)កិច្ចព្រមព្រៀងជំរុញ និងការពារការវិនិយោគ និង ៣) កិច្ចព្រមព្រៀងស្តីពីការចៀសវាងការយកពន្ធត្រួតគ្នា (DTA)។

អ្នក​ឧកញ៉ាជំរុញ​លើកកម្ពស់វិស័យទេសចរណ៍ និងលំហូរភ្ញៀវទេសចរ តាមរយៈការសិក្សាលើការបង្កើតជើងហោះហើរត្រង់ និងការសម្របសម្រួលទិដ្ឋាការទេសចរណ៍។

អ្នក​ឧកញ៉ា បន្ថែម​ថា កម្ពុជាមានទីតាំងយុទ្ធសាស្ត្រនៅចំកណ្តាលអាស៊ាន ដែលផ្តល់នូវច្រកចូលទីផ្សារតំបន់ដ៏ធំ​ ហើយ​អាស៊ាន​គឺ​ជា​តំបន់​ដែល​កំពុង​មាន​កំណើន​ខ្ពស់ ទោះបីជាមានបញ្ហាប្រឈម និងជម្លោះនៅមជ្ឈិមបូព៌ាក៏ដោយ។

ភាគីទាំងពីរបានឯកភាព​ជា​គោលការណ៍​ លើចំណុចដែល​បាន​ពិភាក្សា​ និងត្រៀមខ្លួនក្នុងការ​ស្វាគមន៍ដំណើរទស្សនកិច្ចរបស់គណៈប្រតិភូធុរកិច្ចប្រេស៊ីលមកកម្ពុជា និងពីកម្ពុជាទៅ​ប្រេស៊ីល​នាពេលអនាគត ដើម្បីទាក់​ទាញការវិនិយោគផ្ទាល់ និងពង្រឹងទំនាក់ទំនងការទូត និងសេដ្ឋកិច្ចនៃប្រទេសទាំងពីរ៕