ព័ត៌មានជាតិ - Kampuchea Thmey Daily

បន្តត្រួតពិនិត្យបទល្មើសONLINE SCAMS ៨៨ទីតាំងក្នុងភូមិសាស្ដ្ររាជធានី តែរកមិនឃើញបទល្មើស

Sokhom Khon — Mon, 15 Jun 2026 04:40:47 +0000

គណៈបញ្ជាការឯកភាពរដ្ឋបាលរាជធានីភ្នំពេញ នៅថ្ងៃទី១៤ ខែមិថុនា ឆ្នាំ២០២៦ម្សិលម៉ិញនេះ បានដឹកនាំគណៈបញ្ជាការឯកភាពរដ្ឋបាលខណ្ឌទាំង១៤ ធ្វើការត្រួតពិនិត្យតាមទីតាំងអគារខុនដូរ អាផាតមិន បុរី ផ្ទះសំណាក់ និងសណ្ឋាគារមួយចំនួន ក្នុងគោលដៅប្រតិបត្តិការបោសសម្អាតទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងភូមិសាស្ដ្ររាជធានីភ្នំពេញ បានចំនួន ៨៨ទីតាំង តែមិនបានរកឃើញបទល្មើសនោះទេ។

លោកស្រី ដោ សម្ផស្ស នាយករងរដ្ឋបាល និងជាអ្នកនាំពាក្យរដ្ឋបាលរាជធានីភ្នំពេញ បានឲ្យដឹងនាព្រឹកថ្ងៃទី១៥មិថុនានេះថា នៅថ្ងៃទី១៤ខែមិថុនា រដ្ឋបាលខណ្ឌទាំង១៤ បានចុះត្រួតពិនិត្យទីតាំងសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ក្នុងភូមិសាស្ដ្ររាជធានីភ្នំពេញ បានចំនួន ៨៨ទីតាំង ដោយមិនមានរកឃើញបទល្មើសអ្វីនោះទេ។

លោក ឃួង ស្រេង អភិបាលរាជធានីភ្នំពេញ ធ្លាប់បានណែនាំហើយថា កិច្ចការទាំងអស់នេះ រដ្ឋបាលខណ្ឌទាំង១៤ត្រូវតែបន្តត្រួតពិនិត្យ ព្រមៗគ្នាក្នុងប្រតិបត្តិការបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams) ដោយមិនត្រូវ រាថយដាច់ខាត៕

អត្ថបទ៖ ស្រីរ័ត្ន

The post បន្តត្រួតពិនិត្យបទល្មើសONLINE SCAMS ៨៨ទីតាំងក្នុងភូមិសាស្ដ្ររាជធានី តែរកមិនឃើញបទល្មើស appeared first on Kampuchea Thmey Daily.

ក្រសួងការងារត្រៀមអនុវត្តកម្មវិធីបណ្ដុះបណ្ដាលជំនាញចល័តតាមរថយន្ត ក្នុងការនាំជំនាញដល់ខ្នងផ្ទះពលរដ្ឋ

Thoeun Vansong — Mon, 15 Jun 2026 04:23:43 +0000

ក្រសួងការងារ និងបណ្ដុះបណ្ដាលវិជ្ជាជីវៈ ត្រៀមអនុវត្តកម្មវិធីថ្មីមួយបន្ថែមទៀត ដើម្បីជំរុញការបណ្ដុះបណ្ដាលជំនាញទៅដល់ប្រជាពលរដ្ឋ តាមរយៈថ្នាក់បណ្ដុះបណ្ដាលជំនាញចល័តតាមរថយន្ត។ ការអនុវត្តកម្មវិធីបណ្តុះបណ្តាលជំនាញចល័តតាមរថយន្តនេះ ប្រមុខរាជរដ្ឋាភិបាល សម្ដេចធិបតី ហ៊ុន ម៉ាណែត បញ្ជាក់ថា គឺដើម្បីនាំជំនាញទៅដល់មូលដ្ឋាន។

សម្ដេច បានមានប្រសាសន៍ក្នុងទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៩ នៅព្រឹកថ្ងៃទី១៥ ខែមិថុនានេះ ថា ការបង្កើតថ្នាក់បណ្ដុះបណ្ដាលចល័តនេះ គឺជាការរុញសាលាទៅដល់មូលដ្ឋាន ដោយនាំយកនូវការបណ្ដុះបណ្ដាលជំនាញទៅរកប្រជាពលរដ្ឋដល់ក្នុងភូមិ ដើម្បីធានាថាគ្មានពលរដ្ឋ ឬយុវជនណាម្នាក់ត្រូវបានបោះបង់ចោលដោយសារបញ្ហាភូមិសាស្ត្រ ឬលទ្ធភាពនៃការធ្វើដំណើរឡើយ។

នៅពេលក្រសួងការងារដាក់ឱ្យដំណើរការជាផ្លូវការថ្នាក់បណ្ដុះបណ្ដាលចល័តនេះ សម្តេចធិបតី រំពឹងថា ប្រជាពលរដ្ឋ ក៏ដូចជាយុវជន នឹងចូលរួមចុះឈ្មោះដើម្បីទទួលបានការបណ្តុះបណ្តាលជំនាញវិជ្ជាជីវៈនេះ តាមរយៈរថយន្តចល័តនៅតាមមូលដ្ឋានផ្ទាល់តែម្ដង។

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងឱ្យដឹងថា ក្រសួងបានរៀបចំ និងត្រៀមដាក់ឱ្យដំណើរការថ្នាក់បណ្ដុះបណ្ដាលជំនាញចល័តនេះ ដែលជាការបំពាក់នូវសម្ភារៈ ឧបករណ៍តាមជំនាញនីមួយៗលើរថយន្តអគ្គិសនី ដែលអាចឱ្យគ្រឹះស្ថាន TVET នានា ចុះទៅបណ្ដុះបណ្ដាលជំនាញខ្លីៗដល់កៀកខ្នងផ្ទះរបស់ពលរដ្ឋ ឬនៅតាមវត្ត ឬក៏នៅតាមសាលាឃុំ ជាដើម។

តាមការគូសបញ្ជាក់របស់លោករដ្ឋមន្ត្រី មកដល់ពេលនេះ ក្រសួងការងារក្រោមកិច្ចសហការជាមួយដៃគូអភិវឌ្ឍន៍ បានផលិតរថយន្តចល័តចំនួន៨គ្រឿង សម្រាប់ជំនាញថែទាំបរិក្ខាត្រជាក់ ការដំឡើងបណ្ដាញអគ្គិសនី ការដំឡើងបំពង់ទឹក ការថែទាំ និងជួសជុលរថយន្ត ការជួសជុលម៉ាស៊ីនត្រជាក់ ធុរកិច្ចភេសជ្ជៈ ឆុងកាហ្វេ និងសាឡន។ ក្រោយការអនុវត្តសាកល្បង ក្រសួងនឹងបន្តពង្រីកថ្នាក់បណ្ដុះបណ្ដាលចល័តនេះឱ្យដល់៤០គ្រឿង នៅត្រឹមឆ្នាំ២០២៧ និង៥០គ្រឿង នៅត្រឹមឆ្នាំ២០២៨។

ការបណ្ដុះបណ្ដាលជំនាញវិជ្ជាជីវៈនេះ សម្ដេចនាយករដ្ឋមន្ត្រី បានចង្អុលទៅកាន់ក្រសួងការងារ កុំធ្វើឱ្យមានតែរូបភាព និងបរិមាណ តែត្រូវយកចិត្តទុកដាក់លើគុណភាព។ គុណភាពនេះ សម្ដេចបានសង្កត់ធ្ងន់ដល់ការរៀបចំគ្រូឱ្យច្បាស់ ឱ្យប្រាកដ និងមេរៀនបង្រៀនឱ្យចំគោលដៅ៕

ដោយ៖ ធឿន វ៉ាន់សុង

The post ក្រសួងការងារត្រៀមអនុវត្តកម្មវិធីបណ្ដុះបណ្ដាលជំនាញចល័តតាមរថយន្ត ក្នុងការនាំជំនាញដល់ខ្នងផ្ទះពលរដ្ឋ appeared first on Kampuchea Thmey Daily.

សេដ្ឋីកសិកម្មមើលឃើញរបត់ផ្លាស់ប្តូរដ៏ធំ ខណៈធនាគារចាប់ផ្តើមបោះដៃជួយគាំទ្រដល់វិស័យកសិកម្ម

Dy Bunnara — Mon, 15 Jun 2026 04:16:27 +0000

ខណៈកន្លងមក គេមើលឃើញការវិនិយោគវិស័យកសិកម្មជួបបញ្ហាប្រឈម ក្រៅពីបញ្ហាទីផ្សារលក់ផលិតផល ជាពិសេសការស្វែងរកប្រភពទុនដើម្បីពង្រីកការវិនិយោគការធ្វើកសិកម្ម។

យ៉ាងណាមិញ របត់និងការផ្លាស់ប្តូរថ្មីនាពេលបច្ចុប្បន្នមានការប្រែប្រួលជាវិជ្ជមាន។ នេះបើតាមអ្នកឧកញ៉ា ម៉ុង ឫទ្ធី ខណៈដែលធនាគារបានផ្លាស់ប្តូរគំនិតច្រើន ដោយងាកមកគាំទ្រវិស័យកសិកម្មវិញ។

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឬទ្ធី គ្រុបបានប្រាប់ថា ពីដើមឡើយ ធនាគារភាគច្រើនមិនព្រមផ្តល់កម្ចីដល់អ្នកធ្វើការលើវិស័យកសិកម្មនោះទេ។

សេដ្ឋីកសិកម្មរូបនេះអះអាងថា «សូម្បីតែមានសម្ភារធានាដូចជា អាជីវកម្ម ដីធ្លី ឬផលដំណាំ ក៏ធនាគារមិនទទួលយកដែរ ដែលនេះបញ្ជាក់បានថា ធនាគារហាក់ដូចជាមានបំណងមិនផ្តល់កម្ចីតែម្តង»។

យ៉ាងណាមិញ អ្នកឧកញ៉ាមើលឃើញរបត់ថ្មីបានផ្លាស់ប្តូរ ដោយបច្ចុប្បន្នមានការបន្ធូរបន្ថយការរឹតត្បិតដែលធ្វើឲ្យកសិករអាចមានលទ្ធភាពទទួលបានកម្ចី សម្រាប់វិនិយោគលើការធ្វើកសិកម្ម។

នៅក្នុងជំនួបជាមួយកសិករចិញ្ចឹមសត្វ និងដាំដំណាំកម្ពុជានៅតំបន់កសិទេសចរណ៍ក្រុមហ៊ុន ម៉ុង ឫទ្ធី នៅខេត្តកំពង់ស្ពឺ អ្នកឧកញ៉ា លាង ម៉េង ប្រធានក្រុមអគ្គនាយកក្រុមហ៊ុន ជីប ម៉ុង បានគូសបញ្ជាក់ថា ធនាគារ ជីប ម៉ុង បានរៀបចំទុនប្រមាណ ៥០០ លានដុល្លារ សម្រាប់ជួយកសិករធ្វើកសិកម្ម។

លោកថា គោលដៅមិនមែនបញ្ចប់ត្រឹមការផ្តល់កម្ចី ៥០០ លានដុល្លារនោះទេ ពោលគឺចង់ធ្វើឱ្យបានបន្ថែមលើសពីនេះទៀត។

ឆ្លើយតបការសាកសួររបស់អ្នកសារព័ត៌មាន ហេតុអ្វីបានជាធនាគារ ជីប ម៉ុង ហ៊ានវិនិយោគលើវិស័យកសិកម្មនៅពេលនេះ ខណៈដែលមានហានិភ័យខ្ពស់? អ្នកឧកញ៉ាបញ្ជាក់ថា ទោះបីជាវិស័យកសិកម្មធនាគារភាគច្រើនតែងតែចៀសវាង ឬទាមទារទ្រព្យបញ្ចាំក៏ដោយ ប៉ុន្តែលោកចង់ជួយដល់ការអភិវឌ្ឍវិស័យកសិកម្មក្នុងប្រទេសកម្ពុជាឲ្យរីកចម្រើន និងក៏យល់ពីតម្រូវការរបស់កសិករដែលជួបបញ្ហាប្រភពទុនក្នុងការពង្រីកការធ្វើកសិកម្ម។

«កសិករខ្លះជួបការលំបាកដោយសារត្រូវខ្ចីលុយពីឯកជនក្រៅប្រព័ន្ធ ដែលមានអត្រាការប្រាក់ខ្ពស់ ខណៈគោលការណ៍គាំទ្ររបស់ធនាគារជីប ម៉ុង គឺផ្តល់អត្រាការប្រាក់ទាបនិងមិនមានតម្រូវការទ្រព្យធានា ឬបញ្ចាំឡើយ»។

លោកលើកឡើង តាមរយៈការជួបកសិករដែលដាំដំណាំពោត។ កសិករប្រាប់ថា ដំណាំពោតចំណាយពេលប្រហែល ៦ ខែក្នុងការប្រមូលផល ដូច្នេះ ធនាគារ ជីប ម៉ុង គ្រោងបង្កើតផលិតផលឥណទានដែលមានរយៈពេល ៨ ទៅ ៩ ខែ ដែលចំគោលដៅ និងស្របតាមរដូវកាលប្រមូលផលរបស់កសិករ»។

«នៅពេលកសិករប្រមូលផល និងលក់រួចរាល់ ពួកគេអាចយកប្រាក់មកទូទាត់សងធនាគារវិញដោយមិនបាច់ទុកលុយចោល ឬខាតបង់ការប្រាក់ក្នុងរដូវកាលដែលគ្មានទិន្នផលឡើយ»។

បន្ថែមពីនេះ ពាក់ព័ន្ធការជំរុញដើម្បីកសាងគ្រឹះកសិកម្មក្នុងប្រទេសកម្ពុជាឲ្យរឹងមាំ អ្នកឧកញ៉ាបានលើកពីទស្សនវិស័យមួយគឺត្រូវតែមានការរួមដៃគ្នា រវាងអ្នកដាំដុះ អ្នកចិញ្ចឹម អ្នកប្រមូលទិញ និងធនាគារ ដោយមិនចង់ឱ្យនាំវត្ថុធាតុដើមចេញទៅក្រៅប្រទេសទាំងមិនទាន់កែច្នៃនោះទេ ព្រោះវាធ្វើឱ្យបាត់បង់តម្លៃបន្ថែមនៃផលិតផលជាតិ៕

The post សេដ្ឋីកសិកម្មមើលឃើញរបត់ផ្លាស់ប្តូរដ៏ធំ ខណៈធនាគារចាប់ផ្តើមបោះដៃជួយគាំទ្រដល់វិស័យកសិកម្ម appeared first on Kampuchea Thmey Daily.

អាជ្ញាធររាជធានី បន្តរកឃើញទំនិញ ១៧មុខនាំចូលពីប្រទេសថៃ នៅក្នុងមូលដ្ឋានខណ្ឌច្បារអំពៅ

Sokhom Khon — Mon, 15 Jun 2026 04:00:50 +0000

គណៈបញ្ជាការឯកភាពរដ្ឋបាលរាជធានីភ្នំពេញ ក្រោមការដឹកនាំ និងបញ្ជាផ្ទាល់ដោយលោក ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរដ្ឋបាលរាជធានីភ្នំពេញ រដ្ឋបាលខណ្ឌទាំង១៤ សហការជាមួយកម្លាំងចម្រុះមកពីស្នងការដ្ឋាននគរបាលរាជធានីភ្នំពេញ អគ្គនាយកដ្ឋាន ក.ប.ប កាលពីថ្ងៃទី១៤ ខែមិថុនា ឆ្នាំ២០២៦ បានបន្តរកឃើញទំនិញចំនួន១៧មុខនាំចូលពីប្រទេសថៃ នៅចំណុចផ្ទះលេខ ៣៥២ ផ្លូវ ៣៥១ ភូមិឫស្សីស្រស់ សង្កាត់និរោធ ខណ្ឌច្បារអំពៅ។

បើតាមរដ្ឋបាលរាជធានីភ្នំពេញ ទីតាំងនេះ គឺជាឃ្លាំងស្តុកទំនិញប្រភេទគ្រឿងទេស ភេសជ្ជៈ និងសម្ភារប្រើប្រាស់ជាច្រើនប្រភេទ មានសរុបចំនួន ១.៦៤៧កេស ស្មើនឹង ១៤.៦៣៨,៥គីឡូក្រាម នាំចូលពីបរទេស ក្នុងនោះការិយាល័យ ក.ប.ប រាជធានីភ្នំពេញ បានរកឃើញទំនិញចំនួន ១៧មុខ ជាទំនិញនាំចូលពីប្រទេសថៃ និងមានទំនិញចំនួន ២មុខ គឺទឹកតែអូអ៊ិឈិ ចំនួន ៣៤កេស និងទឹកវីតាមីន Blue ចំនួន ៤កេស ហួសកាលបរិច្ឆេទប្រើប្រាស់។

ក្រោយការត្រួតពិនិត្យ ក្រោមការសម្របសម្រួលផ្លូវច្បាប់ពីព្រះរាជអាជ្ញារង កម្លាំងចម្រុះបានសម្រេចបិទឃ្លុំទីតាំងនេះបណ្តោះអាសន្នដើម្បីបន្តនីតិវិធី។

សូមជម្រាបថា ទីតាំងដែលរកឃើញទំនិញនាំចូលពីប្រទេសថៃនេះ គឺជាទីតាំងមួយក្នុងចំណោមទីតាំងចំនួន១២ ដែលរដ្ឋបាលរាជធានីប្រតិបត្តិការចុះត្រួតពិនិត្យកាលពីថ្ងៃទី១៤មិថុនា ម្សិលមិញដើម្បីបង្ការទប់ស្កាត់ការនាំចូលសាច់បង្កក ឬទំនិញពីប្រទេសថៃ៕

The post អាជ្ញាធររាជធានី បន្តរកឃើញទំនិញ ១៧មុខនាំចូលពីប្រទេសថៃ នៅក្នុងមូលដ្ឋានខណ្ឌច្បារអំពៅ appeared first on Kampuchea Thmey Daily.

និស្សិតកម្ពុជាជិត ៦០០នាក់ ប្រកួតប្រជែងដណ្តើមអាហារូបករណ៍ MEXT ទៅសិក្សានៅជប៉ុន

Samean Lay — Mon, 15 Jun 2026 03:48:39 +0000

និស្សិតកម្ពុជាចំនួន ៥៥៩នាក់ ក្នុងនោះមានស្រី ២៥៩នាក់ កំពុងចូលរួមប្រឡងប្រកួតប្រជែងដើម្បីទទួលបានអាហារូបករណ៍រដ្ឋាភិបាលជប៉ុន (MEXT Scholarship) សម្រាប់បន្តការសិក្សានៅប្រទេសជប៉ុន ក្នុងឆ្នាំសិក្សា ២០២៧។

ការប្រឡងសរសេរនេះ បានប្រព្រឹត្តទៅកាលពីថ្ងៃទី១៤ ខែមិថុនា ឆ្នាំ២០២៦ នៅវិទ្យាស្ថានភាសាបរទេស (IFL) ដោយមានបេក្ខជនសរុប ៥៥៩នាក់ ចែកជា ២៤បន្ទប់ប្រឡង និងបែងចែកជា ៤កម្រិត រួមមាន ថ្នាក់ក្រោយឧត្តមសិក្សា ថ្នាក់ឧត្តមសិក្សា ថ្នាក់មធ្យមសិក្សាបច្ចេកទេស (Kosen) និងថ្នាក់បណ្តុះបណ្តាលវិជ្ជាជីវៈ។

បេក្ខជនដែលជាប់ការប្រឡងសរសេរ នឹងត្រូវបន្តចូលរួមការប្រឡងសម្ភាសន៍នៅស្ថានទូតជប៉ុនប្រចាំកម្ពុជា។ សម្រាប់ប្រភេទនិស្សិតស្រាវជ្រាវ (Research Students) ការសម្ភាសន៍នឹងធ្វើឡើងនៅខែមិថុនា ឆ្នាំ២០២៦ ខណៈប្រភេទនិស្សិតថ្នាក់បរិញ្ញាបត្រ និស្សិតមហាវិទ្យាល័យបច្ចេកវិទ្យា (Kosen) និងនិស្សិតវិទ្យាស្ថានបណ្តុះបណ្តាលវិជ្ជាជីវៈ នឹងធ្វើឡើងនៅខែកក្កដា ឆ្នាំ២០២៦។

សម្រាប់អ្នកជាប់ជ័យលាភី អាហារូបករណ៍ MEXT នឹងទទួលបានប្រាក់ឧបត្ថម្ភប្រចាំខែចំនួន ១១៧,០០០ យ៉េន សម្រាប់និស្សិតថ្នាក់បរិញ្ញាបត្រ និស្សិត Kosen និងនិស្សិតបណ្តុះបណ្តាលវិជ្ជាជីវៈ ខណៈនិស្សិតស្រាវជ្រាវ នឹងទទួលបានប្រាក់ឧបត្ថម្ភ ១៤៣,០០០ យ៉េនក្នុងមួយខែ។

ការរៀបចំដំណើរការប្រឡងសំណេរខាងលើនេះ ធ្វើឡើងក្រោមកិច្ចសហប្រតិបត្តិការរវាងនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន នៃក្រសួងអប់រំ យុវជន និងកីឡា និងស្ថានទូតជប៉ុនប្រចាំព្រះរាជាណាចក្រកម្ពុជា ដោយនាយកដ្ឋានសហប្រតិបត្តិការអន្តរជាតិ និងកិច្ចការអាស៊ាន។

ក្រសួងអប់រំ យុវជន និងកីឡា បានឱ្យដឹងថា បេក្ខជនទាំងអស់ ត្រូវឆ្លងកាត់ការប្រឡងលើមុខវិជ្ជាផ្សេងៗ ទៅតាមកម្រិតសិក្សា និងជំនាញដែលខ្លួនបានជ្រើសរើស។ ដំណើរការប្រឡងនៅថ្ងៃទី ១៤ ខែមិថុនា បានប្រព្រឹត្តទៅដោយរលូន ស្ងប់ស្ងាត់ និងមានសណ្តាប់ធ្នាប់ល្អ ខណៈគណៈកម្មការទទួលខុសត្រូវគ្រប់ផ្នែក រួមទាំងគណៈកម្មការអប្បមាទ គណៈមេប្រយោគ គណៈកម្មការកណ្តាលសំណេរ គណៈកម្មការអនុរក្ស និងក្រុមសន្តិសុខ បានបំពេញភារកិច្ចប្រកបដោយការទទួលខុសត្រូវខ្ពស់។

សូមជម្រាបថា អាហារូបករណ៍ MEXT ត្រូវបានចាត់ទុកថាជាអាហារូបករណ៍ដ៏មានកិត្យានុភាពមួយរបស់រដ្ឋាភិបាលជប៉ុន ដែលបានផ្តល់ឱកាសដល់និស្សិតកម្ពុជាជាច្រើនជំនាន់ បានបន្តការសិក្សា និងអភិវឌ្ឍជំនាញនៅប្រទេសជប៉ុន៕

The post និស្សិតកម្ពុជាជិត ៦០០នាក់ ប្រកួតប្រជែងដណ្តើមអាហារូបករណ៍ MEXT ទៅសិក្សានៅជប៉ុន appeared first on Kampuchea Thmey Daily.

មន្ត្រីជាន់ខ្ពស់អប់រំ ៖ សហភាពអឺរ៉ុបជាដៃគូអភិវឌ្ឍន៍ដ៏សំខាន់ សម្រាប់វិស័យអប់រំនៅកម្ពុជា

Chan Sotheavy — Mon, 15 Jun 2026 03:42:45 +0000

លោកបណ្ឌិត សោម រតនា អនុរដ្ឋលេខាធិការក្រសួងអប់រំ យុវជន និងកីឡា បានអះអាងថា សហភាពអឺរ៉ុប (EU) គឺជាដៃគូអភិវឌ្ឍន៍ដ៏សំខាន់សម្រាប់វិស័យអប់រំនៅកម្ពុជា តាមរយៈការផ្តល់អាហារូបករណ៍ជាច្រើន ដើម្បីជួយឱ្យនិស្សិតកម្ពុជាអភិវឌ្ឍសមត្ថភាព និងក្លាយជាមូលធនមនុស្សដ៏មានតម្លៃសម្រាប់ការអភិវឌ្ឍប្រទេសជាតិនាពេលអនាគត។

ការលើកឡើងនេះធ្វើឡើងក្នុងសិក្ខាសាលាផ្សព្វផ្សាយព័ត៌មានស្តីពីអាហារូបករណ៍អឺរ៉ុប និងកម្មវិធី Erasmus+ កាលពីថ្ងៃទី១៣ ខែមិថុនា ឆ្នាំ២០២៦ នៅសាកលវិទ្យាល័យសម្តេចមហាសង្ឃរាជ បួរ គ្រី ។

លោកបណ្ឌិត សោម រតនា បានថ្លែងអំណរគុណដល់លោក Bryan Fornari តំណាងសហភាពអឺរ៉ុប ព្រមទាំងបណ្តាប្រទេសសមាជិកសហភាពអឺរ៉ុបទាំងអស់ ដែលបានសហការជាមួយសម្តេចព្រះវង្ស អានេត្តា សាកលវិទ្យាធិការនៃសាកលវិទ្យាល័យសម្តេចមហាសង្ឃរាជ បួរ គ្រី ក្នុងការរៀបចំយុទ្ធនាការផ្សព្វផ្សាយអាហារូបករណ៍អឺរ៉ុបនេះ។

លោកបណ្ឌិតបានបញ្ជាក់ថា កម្មវិធីអាហារូបករណ៍ Erasmus+ គឺជាផ្នែកមួយនៃការគាំទ្ររបស់សហភាពអឺរ៉ុប ដើម្បីផ្តល់ឱកាសដល់និស្សិតកម្ពុជាក្នុងការបង្កើនចំណេះដឹង ជំនាញ និងបទពិសោធន៍អន្តរជាតិ ដែលជាមូលដ្ឋានសម្រាប់ការអភិវឌ្ឍប្រទេសជាតិប្រកបដោយចីរភាព។

សិក្ខាសាលានេះមានគោលបំណងបង្កើនការយល់ដឹងរបស់សិស្ស-និស្សិតកម្ពុជាអំពីឱកាសទទួលបានអាហារូបករណ៍តាមរយៈកម្មវិធី Erasmus+ និងបណ្តាប្រទេសសមាជិកសហភាពអឺរ៉ុប ព្រមទាំងលើកកម្ពស់ការយល់ដឹងអំពីការប្តេជ្ញាចិត្តរបស់អឺរ៉ុបក្នុងការគាំទ្រការអប់រំជាសកល ការផ្លាស់ប្តូរវប្បធម៌ និងកិច្ចសហប្រតិបត្តិការអន្តរជាតិ។

ជាមួយគ្នានេះ សិក្ខាសាលាក៏មានគោលបំណងជំរុញសមធម៌ និងបរិយាបន្នក្នុងការទទួលបានព័ត៌មាន និងអាហារូបករណ៍ ដោយធានាថា សិស្ស-និស្សិតនៅតាមបណ្តាខេត្តមានឱកាសស្មើគ្នាជាមួយសិស្ស-និស្សិតនៅរាជធានីភ្នំពេញ។ លើសពីនេះ កម្មវិធីក៏បានរួមចំណែកពង្រឹងភាពជាដៃគូរវាងគ្រឹះស្ថានឧត្តមសិក្សានៅកម្ពុជា និងបណ្តាញគ្រឹះស្ថានអប់រំនៅអឺរ៉ុប ដើម្បីគាំទ្រដល់កិច្ចសហប្រតិបត្តិការ និងការផ្លាស់ប្តូរបទពិសោធន៍នាពេលអនាគត៕ អត្ថបទ៖ សំអឿន

The post មន្ត្រីជាន់ខ្ពស់អប់រំ ៖ សហភាពអឺរ៉ុបជាដៃគូអភិវឌ្ឍន៍ដ៏សំខាន់ សម្រាប់វិស័យអប់រំនៅកម្ពុជា appeared first on Kampuchea Thmey Daily.

រដ្ឋបាលខណ្ឌសែនសុខ បន្តស្ថាបនាផ្លូវបេតុងមួយខ្សែ ដើម្បីសម្រួលការធ្វើដំណើររបស់ប្រជាពលរដ្ឋប្រចាំថ្ងៃ

Ung Meng — Mon, 15 Jun 2026 03:22:25 +0000

ផ្លូវបេតុងថ្មី មួយខ្សែប្រវែងជាង ៤០០ម៉ែត្រ សម្រេចបាន ៩០ភាគរយហើយ ដើម្បីកាត់បន្ថយទុក្ខលំបាក និងដោះស្រាយបញ្ហាជូនពលរដ្ឋ។ ជាក់ស្តែងកំណាត់ផ្លូវលេខ ១០០៣ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រដ្ឋបាលខណ្ឌ កំពុងបន្តយកចិត្តទុកដាក់ លើការចាក់ផ្លូវបេតុងថ្មី មួយខ្សែជូនពលរដ្ឋ។

កញ្ញា ពេជ្រ រ័ត្ន ជាពលរដ្ឋបានលើកឡើងថា គាត់បានឃើញអាជ្ញាធរបានដាក់គ្រឿងចក្រ ចាក់បេតុងនៅចំណុចផ្លូវ ១០០៣នេះ រយៈពេលជាង ៨ថ្ងៃហើយ ហើយនៅពេលនោះអាជ្ញាធរក៏បានសុំការអធ្យាស្រ័យពី ពួកគាត់ជាប្រជាពលរដ្ឋ និងបានសន្យាថា សម្រាប់ការជួសជុល និងចាក់បេតុងផ្លូវខាងលើនេះ និងពន្លឿនអោយបានឆាប់រហ័សបំផុត ។ ពលរដ្ឋបន្តថា ដោយគិតមកទល់ពេលនេះ ផ្លូវបេតុងថ្មីមួយខ្សែខាងលើ សម្រេចប្រហែល ៩០ភាគរយទៅហើយ។

លោក សេង ជាប្រជាពលរដ្ឋនៅតំបន់នោះ បានលើកការកោតសរសើរទៅដល់ ថ្នាក់ដឹកនាំ ក៏ដូចជាអាជ្ញាធរគ្រប់ជាន់ថ្នាក់ ដែលបានគិតគូរពីទុក្ខលំបាក ដល់ពលរដ្ឋតែងតែជួបកន្លងមក ហើយបានធ្វើតាមការសន្យា អោយរួចរាល់តាមវេលាកំណត់ មិនអោយពួកគាត់ជាប្រជាពលរដ្ឋខាតពេលវេលាយូរ ក្នុងការប្រកបអាជីវកម្ម និងឆ្លងកាត់នោះឡើយ ។

លោក ជុំ សារ៉ាយ ចៅសង្កាត់ភ្នំពេញថ្មី បានបញ្ជាក់មកកាន់ក្រុមការងារកម្ពុជាថ្មីថា ដំណើរការ ការដ្ឋានកំពុងស្ថាបនាផ្លូវបេតុងនេះ ជាគម្រោងអភិវឌ្ឍន៍របស់ រដ្ឋបាលរាជធានីភ្នំពេញ ដើម្បីឆ្លើយតបទៅនឹងតម្រូវការចាំបាច់ ក៏ដូចជាការបង្កលក្ខណៈងាយស្រួលក្នុងការធ្វើដំណើររបស់បងប្អូនប្រជាពលរដ្ឋ នៅផ្លូវបេតុងថ្មីមួយខ្សែ ប្រវែងជាង៤០០ម៉ែត្រ ទទឹងប្រហែល១០ម៉ែត្រ មានកម្រាស់ ២តឹក ។

ជាចុងក្រោយ លោក ចៅសង្កាត់ភ្នំពេញថ្មីបានបន្ថែមថា សូមប្រជាពលរដ្ឋរស់នៅអមសងខាងផ្លូវទាំងអស់ មេត្តានាំគ្នាចូលរួមថែរក្សា បរិស្ថាន នឹងសណ្តាប់ធ្នាប់សាធារណៈទាំងអស់គ្នា ដើម្បីលើកកម្ពស់សោភ័ណភាព កែប្រែមុខមាត់ សហគមន៍ ឱ្យមានភាពស្អាតបាត មានរបៀបរៀបរយ និងអនាម័យខ្ពស់ ក៏ដូចជាប្រើប្រាស់បានយូរអង្វែងផងដែរ ៕ អត្ថបទ ៖ រដ្ឋា

The post រដ្ឋបាលខណ្ឌសែនសុខ បន្តស្ថាបនាផ្លូវបេតុងមួយខ្សែ ដើម្បីសម្រួលការធ្វើដំណើររបស់ប្រជាពលរដ្ឋប្រចាំថ្ងៃ appeared first on Kampuchea Thmey Daily.

ការប្រកួតបាល់ទាត់សប្បុរសធម៌រវាងក្រុមសុខសាន្ត និងតោក្រហម បញ្ចប់ដោយស្នាមញញឹម

Sina Noun — Mon, 15 Jun 2026 02:22:20 +0000

ការប្រកួតបាល់ទាត់សប្បុរសធម៌រវាងក្រុមបាល់ទាត់សុខសាន្ត និងក្រុមតោក្រហម ដើម្បីរៃអង្គាសថវិកាជួយសាងសង់ជម្រកដ៏កក់ក្តៅជូនដល់កុមារងាយរងគ្រោះ និងកុមារកំព្រា ជាង២០០នាក់ នៅមណ្ឌលមែកឈើ កាលពីថ្ងៃទី១៤ ខែមិថុនា ២០២៦ នេះបានបញ្ចប់ដោយលទ្ធផល ៥-៥ និងប្រកបដោយស្នាមញញឹមនៅឯកីឡដ្ឋានបាល់ទាត់ អាយ អេស អាយ ផាក។

ទិដ្ឋភាពប្រកួតម្សិលមិញ

នេះជាការបើកទំព័រប្រវត្តិសាស្ត្រមនុស្សធម៌ថ្មីមួយទៀតរបស់ក្រុមបាល់ទាត់មិនមែនអាជីពគឺក្រុមបាល់ទាត់សុខសាន្ត (Sok San FC) និងក្រុមបាល់ទាត់តោក្រហម (Red Lion Casumina) បានរួមគ្នារៀបចំកម្មវិធីប្រកួតមិត្តភាពសប្បុរសធម៌ប្រចាំឆ្នាំ២០២៦ នៅកីឡដ្ឋាន អាយ អេស អាយ ផាក (ISI Park)។

ទិដ្ឋភាពប្រកួតម្សិលមិញ

ប្រធានក្រុមទាំងពីរខាងលើលើកឡើងថា គំនិតផ្តួចផ្តើមដ៏មានអត្ថន័យនេះកើតចេញពីបេះដូងស្រលាញ់ និងបំណងប្រាថ្នាចង់ផ្តល់ជម្រកដ៏កក់ក្តៅ ព្រមទាំងស្នាមញញឹមឡើងវិញដល់កុមារៗ។ នៅក្នុងឆ្នាំនេះព្រឹត្តិការណ៍ទាំងមូលទទួលបានការគាំទ្រយ៉ាងខ្លាំងពីសំណាក់សប្បុរសជន ដោយទទួលថវិកាពីសប្បុរសធម៌ប្រមាណជាង ៦លានរៀល និងបានប្រគល់ជូនថ្នាក់ដឹកនាំនៃមណ្ឌលមែកឈើដើម្បីយកទៅបំពេញក្តីស្រមៃសង់ផ្ទះជូនកុមារៗប្រមាណជាង ២០០នាក់។

ប្រធានក្រុមសុខសាន្ត

ការប្រកួតបាល់ទាត់សប្បុរសធម៌នេះកើកមានឡើងពីស្មារតីរបស់កីឡាករទាំងពីរក្រុម និងការលៈបង់នូវពេលវេលាចូលហ្វឹកហាត់ ប្រកួត និងពិសេសនោះគឺការរៃអង្គាសថវិកាគ្នានេះតែម្ដងដើម្បីជួយដល់កុមារៗដែលកំពុងជួបការលំបាកក្នុងការរស់នៅប្រចាំថ្ងៃ។ លោកសូមអរគុណចំពោះការលៈបង់ និងទឹកចិត្តដ៏ល្អរបស់ក្រុមទាំងពីរក្នុងការចូលរួមការប្រកួតបាល់ទាត់សប្បុរសធម៌មួយនេះ។ សម្ដីលោក «រាល់ការចូលរួមរបស់បងប្អូន ទោះតិចក្តីច្រើនក្តី គឺក្លាយទៅជាឥដ្ឋ ស៊ីម៉ង់ត៍ ដែក និងជាដំបូលផ្ទះសម្រាប់កុមារៗ»។

ចំណែកលោក ផន ផល្លា ប្រធានមជ្ឈមណ្ឌលមែកឈើ បានថ្លែងអំណរគុណដល់ក្រុមបាល់ទាត់ទាំងពីរព្រមទាំងសប្បុរសជនទាំងអស់ ដែលបានចូលរួមគាំទ្រដល់មណ្ឌលមែកឈើ ជាពិសេសការចូលរួមបរិច្ចាគថវិកា និងសម្ភារៈ តាមរយៈកម្មវិធីប្រកួតបាល់ទាត់មិត្តភាពសប្បុរសធម៌ និងការជាវអាវរបស់លោក ដើម្បីឱ្យលោកមានលទ្ធភាពយកប្រាក់ទាំងអស់នេះទៅផ្គត់ផ្គង់កុមារ និងសាងសង់ជម្រករបស់ពួកគេឱ្យបានចប់សព្វគ្រប់។ ក្នុងឱកាសនោះ លោកផល្លា ក៏បានបន្តសំណូមពរ និងអំពាវនាវដល់សាធារណជន និងសប្បុរជនទាំងអស់ ចូលរួមបរិច្ចាគជាថវិកាក្តី និងសម្ភារៈក្តី ដើម្បីឱ្យកុមារនៃមណ្ឌលមែកឈើមានជម្រកដ៏កក់ក្តៅ។

ទិដ្ឋភាពប្រកួតម្សិលមិញ

គួរបញ្ជាក់ថា ការប្រកួតសប្បុរសធម៌នេះចាប់ផ្តើមនាពេលព្រឹកចាប់ពីម៉ោង ៧ព្រឹក ដល់ម៉ោង ១១ព្រឹកដោយការប្រកួតដំបូងធ្វើឡើងរវាងកុមារក្រោមអាយុ១២ឆ្នាំ និងការជួបគ្នារវាងក្រុម Sok San FC ដឹកនាំដោយលោក ឈុន កុសល និងក្រុម Red Lion Casumina ដឹកនាំដោយលោក ញឹក សេរីវុធ ដែលបានប្រកួតគ្នាយ៉ាងស្វិតស្វាញចំនួន ៣ តង់។ ក្រៅពីអ្នកគាំទ្រផ្ទាល់នៅលើទីលាន ព្រឹត្តិការណ៍នេះក៏បានទាក់ទាញទស្សនិកជនទស្សនាតាមអនឡាញ (ការផ្សាយផ្ទាល់លើទំព័រហ្វេសប៊ុកផ្លូវការ) យ៉ាងច្រើនកុះករផងដែរ៕

ទិដ្ឋភាពប្រកួតម្សិលមិញ

អត្ថបទ៖ នួន ស៊ីណា

The post ការប្រកួតបាល់ទាត់សប្បុរសធម៌រវាងក្រុមសុខសាន្ត និងតោក្រហម បញ្ចប់ដោយស្នាមញញឹម appeared first on Kampuchea Thmey Daily.

ព័ត៌មានជាតិ - Kampuchea Thmey Daily

បន្តត្រួតពិនិត្យបទល្មើសONLINE SCAMS ៨៨ទីតាំងក្នុងភូមិសាស្ដ្ររាជធានី តែរកមិនឃើញបទល្មើស

ក្រសួងការងារត្រៀមអនុវត្តកម្មវិធីបណ្ដុះបណ្ដាលជំនាញចល័តតាមរថយន្ត ក្នុងការនាំជំនាញដល់ខ្នងផ្ទះពលរដ្ឋ

អាជ្ញាធររាជធានី បន្តរកឃើញទំនិញ ១៧មុខនាំចូលពីប្រទេសថៃ នៅក្នុងមូលដ្ឋានខណ្ឌច្បារអំពៅ

និស្សិតកម្ពុជាជិត ៦០០នាក់ ប្រកួតប្រជែងដណ្តើមអាហារូបករណ៍ MEXT ទៅសិក្សានៅជប៉ុន

មន្ត្រីជាន់ខ្ពស់អប់រំ ៖ សហភាពអឺរ៉ុបជាដៃគូអភិវឌ្ឍន៍ដ៏សំខាន់ សម្រាប់វិស័យអប់រំនៅកម្ពុជា

រដ្ឋបាលខណ្ឌសែនសុខ បន្តស្ថាបនាផ្លូវបេតុងមួយខ្សែ ដើម្បីសម្រួលការធ្វើដំណើររបស់ប្រជាពលរដ្ឋប្រចាំថ្ងៃ

ការ​ប្រកួត​បាល់ទាត់​សប្បុរសធម៌​រវាង​ក្រុម​សុខសាន្ត​ និង​តោ​ក្រហម​ បញ្ចប់​ដោយ​ស្នាម​ញញឹម

ការប្រកួតបាល់ទាត់សប្បុរសធម៌រវាងក្រុមសុខសាន្ត និងតោក្រហម បញ្ចប់ដោយស្នាមញញឹម