ព័ត៌មានអន្ដរជាតិ

ហ្សេលេនស្គីផ្តាស់ប្តូរក្បាលម៉ាស៊ីនក្នុងវិស័យយោធា ដោយតែងតាំងអ្នកជំនាញផលិតដ្រូន

បានផុស

៥ ខែ មុន

នៅ

ថ្ងៃសៅរ៍ ៣ មករា ២០២៦

ដោយ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី (Volodymyr Zelensky) នៅថ្ងៃទី២ខែមករា បានស្នើឲ្យមានការផ្លាស់ប្តូរមួយចំនួននៅក្នុងក្បាលម៉ាស៊ីនដឹកនាំផ្នែកយោធា បន្ទាប់ពីមានរឿងអាស្រូវពុករលួយក្នុងការគ្រប់គ្រងជំនួយក្នុងវិស័យយោធា រហូតដល់មានការឆ្មក់ចូលលើលំនៅឋានជំនួយការរបស់លោក ដោយអង្គភាពប្រឆាំងអំពើពុករលួយ។

ប្រធានាថិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ពេលទៅជួបកងទ័ពជួរមុខនៅតំបន់ Donbass។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារព័ត៌មានរ៉យទ័រ បានផ្សាយថា លោក ហ្សេលេនស្គី បានតែងតាំងឧបនាយករដ្ឋមន្ត្រីទីមួយ លោក Mykhailo Fedorov ជារដ្ឋមន្ត្រីការពារជាតិថ្មីរបស់អ៊ុយក្រែន ជំនួស លោក Denys Shmyhal ដោយសរសើរសមត្ថភាពរបស់គាត់ក្នុងការអភិវឌ្ឍន៍យន្តហោះគ្មានមនុស្សបើក និងឌីជីថលដែលចាំបាច់សម្រាប់ការពារប្រទេស។

នៅក្នុងការផ្លាស់ប្តូរដ៏សំខាន់នេះដែរ លោក ហ្សេលេនស្គី បានតែងតាំង លោក Kyrylo Budanov ដែលជាប្រធានអង្គភាពចារកម្មអ៊ុយក្រែនជាជំនួយការជាន់ខ្ពស់ជំនួស លោក Andriy Yermak ដែលបានស្ម័គ្រចិត្តលាលែងពីតំណែង ក្រោយភ្នាក់ងារប្រឆាំងអំពើពុករលួយបានឆ្មក់ចូលផ្ទះរបស់ដើម្បីស៊ើបអង្កេតក្នុងករណីសង្ស័យប្រព្រឹត្តអំពើពុករលូយ។ នេះបើយោងតាមការចេញផ្សាយរបស់សារព័ត៌មានអ៊ុយក្រែន Kyiv Post។

យោងការដកស្រង់ពីរ៉យទ័រ លោក ហ្សេលេនស្តី បាននិយាយនៅក្នុងការបង្ហោះវីដេអូពេលយប់របស់គាត់ថា «Mykhailo ត្រូវបានចូលរួមយ៉ាងស៊ីជម្រៅនៅក្នុងគំនិតផ្តួចផ្តើមផលិតយន្តហោះគ្មានមនុស្សបើក ហើយធ្វើការយ៉ាងមានប្រសិទ្ធភាពលើការធ្វើឌីជីថលនៃសេវាកម្មរដ្ឋ និងដំណើរការនានា»។

ប្រធានាធិបតីអ៊ុយក្រែន បានលើកឡើងបន្តថា៖«រួមគ្នាជាមួយបុគ្គលិកយោធា បញ្ជាការយោធា ក្រុមហ៊ុនផលិតអាវុធជាតិ និងដៃគូរបស់អ៊ុយក្រែនទាំងអស់ យើងត្រូវអនុវត្តការផ្លាស់ប្តូរនៅក្នុងវិស័យការពារជាតិ ដែលនឹងជួយយ៉ាងពិតប្រាកដ»។

ប្រទេសអ៊ុយក្រែនកំពុងប្រយុទ្ធសង្គ្រាមឈ្លានពានរបស់រុស្ស៊ីដែលបានអូសបន្លាយអស់រយៈពេលជិត៤ឆ្នាំទៅហើយ ប៉ុន្តែរដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រឹងប្រែងដើម្បីរកវិធីបញ្ចប់សង្គ្រាមនេះជាមួយប្រធានាធិបតីរុស្ស៊ី លោក វ៉្លាឌីមៀរ ពូទីន ដែលដាក់លក្ខខណ្ឌម្តងហើយម្តងទៀត ឲ្យអ៊ុយក្រែងកាត់ទឹកដីឲ្យរុស្ស៊ី និងឲ្យអ៊ុយក្រែនបោះបង់ការចូលជាសមាជីករបស់អង្គការណាតូ ជាដើម៕

រ៉ាន់ រើយ