ន័រវែស នឹងរារាំងអ្នកទេសចរ រុស្ស៊ី មិនឲ្យចូលប្រទេស

ប្រទេសន័រវេសនឹងរឹតត្បិតអ្នកទេសររុស្ស៊ីដែលចូលក្នុងប្រទេសខ្លួន ដោយសារតែសង្គ្រាមនៅក្នុងប្រទេសអ៊ុយក្រែនកំពុងបន្តប្រយុទ្ធឥតឈប់ឈរ ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី២៣ ខែ ឧសភា ។

ប្រទេសន័រវេសដែលជាសមាជិកអង្គការណាតូ និងមានព្រំប្រទល់ជាប់នឹងរុស្ស៊ីនៅតំបន់អាក់ទិក មានចម្ងាយជិត ២០០ គីឡូម៉ែត្រ ធ្លាប់បានដាក់ការហាមប្រាមលើកដំបូងលើទិដ្ឋាការទេសចរណ៍រុស្ស៊ីក្នុងឆ្នាំ ២០២២ ហើយមកដល់ពេលនេះក៏ចាប់ផ្ដើមរឹតបន្តឹងបន្ថែមទៀត ។

យោងតាមរដ្ឋមន្ត្រីក្រសួងយុត្តិធម៌ន័រេសបាននិយាយនៅក្នុងសេចក្តីថ្លែងការណ៍មួយថា ការសម្រេចចិត្តរឹតបន្តឹងច្បាប់ចូលគឺស្របតាមវិធីសាស្រ្តរបស់ន័រវេសក្នុងគាំទ្រសម្ព័ន្ធមិត្តណាតូ និងដៃគូក្នុងការឆ្លើយតបទៅនឹងសង្គ្រាមលុកលុយខុសច្បាប់របស់រុស្ស៊ីលើអ៊ុយក្រែន ។ នៅក្នុងច្បាប់នេះមានន័យថា ប៉ូលិសអាចបដិសេធការចូលរបស់ពលរដ្ឋរុស្ស៊ីទៅតាមលក្ខខណ្ឌនានាដែលបានកំណត់ ខណៈគោលនយោបាយថ្មីនេះនឹងចូលជាធរមាននៅថ្ងៃទី២៩ ខែឧសភាខាងមុខ ។

នៅក្នុងគោលនយោបាយថ្មីនេះ ពលរដ្ឋរុស្ស៊ីដែលមានគោលបំណងធ្វើដំណើរទេសចរណ៍ និងការធ្វើដំណើរផ្សេងទៀត នឹងត្រូវបដិសេធ នៅពេលចូលឆ្លងកាត់ប្រទេសនេះ ប៉ុន្តែក៏មានករណីលើកលែងដូចជាការទៅសួរសុខទុក្ខគ្រួសារ ដែលរស់នៅក្នុងប្រទេសន័រវេសជាដើម ។

គួរបញ្ជាក់ថា​ ចាប់តាំងពីការសង្គ្រាមលុកលុយរបស់រុស្ស៊ីលើអ៊ុយក្រែនមក បណ្ដាប្រទេសនៅអឺរ៉ុបបានចាប់ផ្ដើមដាក់ទណ្ឌកម្មប្រទេសនេះតាមរបៀបផ្សេងៗដូចជា ដាក់ទណ្ឌកម្មទៅលើការនាំចេញ និងហាមប្រាមទិដ្ឋា​ការរបស់រុស្ស៊ីជាដើម ជាពិសេសក្រុមប្រទេសដែលជាសម្ព័ន្ធមិត្តអង្គការណាតូតែម្ដង ៕

អត្ថបទ៖ ប៊ុន សុភាព​