ថ្ងៃបុណ្យណូអែល រុស្ស៊ី បាញ់មីស៊ីលស្រោចពេញទំហឹងលើ អ៊ុយក្រែន

ស្របពេលប្រទេសជាច្រើននៅលើពិភពលោក កំពុងអបអរថ្ងៃបុណ្យណូអែលនោះ, រុស្ស៊ី ឯណោះបែរជាបាញ់មីស៊ីលស្រោចលើប្រទេសអ៊ុយក្រែន ជាពិសេស តម្រង់គោលដៅយ៉ាងពេញទំហឹងលើហេដ្ឋារចនាសម្ព័ន្ធថាមពលតែម្តង ខណៈមានសេចក្តីរាយការណ៍អំពីមនុស្សស្លាប់មួយចំនួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Kyiv Independent នៅថ្ងៃពុធទី២៥ខែធ្នូឆ្នាំ២០២៤, រុស្ស៊ី បានបើកការវាយប្រហារទ្រង់ទ្រាយធំ​ដោយបាញ់មីស៊ីល Kalibr ចេញពីសមុទ្រខ្មៅ បង្ខំឲ្យអ៊ុយក្រែន បន្លឺស៊ីរ៉ែនប្រកាសអាសន្នទូទាំងប្រទេស។

រដ្ឋមន្ត្រីក្រសួងថាមពលអ៊ុយក្រែន German Galushchenko បង្ហោះលើបណ្តាញ Telegram ថា សត្រូវបានបើកការវាយប្រហារលើហេដ្ឋារចនាសម្ព័ន្ធថាមពលទៀតហើយ ស្របពេលរដូវរងាចូលមកដល់ ធ្វើឲ្យប្រជាជនរងទុក្ខវេទនា។

ក្រុមហ៊ុនថាមពលឯកជនធំបំផុតរបស់អ៊ុយក្រែនគឺ DTEK និយាយថា រុស្ស៊ីបានវាយប្រហារលើរោងចក្រថាមពលរបស់ខ្លួន ដែលបណ្តាលឲ្យខូចខាតម៉ាស៊ីនយ៉ាងធ្ងន់ធ្ងរ។ ដូច្នេះហើយ ការផ្គត់ផ្គត់អគ្គិសនីនៅ Kyiv, Dnipropetrovsk និង Odesa ត្រូវរអាក់រអួល។ តាមការបញ្ជាក់របស់ DTEK, នេះគឺជាការវាយប្រហារទ្រង់ទ្រាយធំលើកទី១៣ហើយ លើវិស័យថាមពលរបស់អ៊ុយក្រែននៅឆ្នាំនេះ។

ជុំវិញរឿងនេះផងដែរ ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានហៅការវាយប្រហាររបស់រុស្ស៊ីនៅថ្ងៃបុណ្យណូអែលថាជាទង្វើអមនុស្សធម៌បំផុត។ ប្រមុខរដ្ឋាភិបាលទីក្រុងកៀវ ថ្កោលទោសថា «លោកពូទីន រើសយកថ្ងៃបុណ្យណូអែលសម្រាប់ការវាយប្រហារ។ តើមានអ្វីអមនុស្សធម៌ជាងនេះទៀត? មីស៊ីលជាង៧០គ្រាប់ រួមទាំងគ្រាប់ផ្លោងនិងយន្តហោះគ្មានមនុស្សបើកជាង១០០គ្រឿងផងដែរ។ គោលដៅគឺវិស័យថាមពលរបស់យើង ពួកគេបន្តប្រយុទ្ធដើម្បីផ្ដាច់ភ្លើងនៅអ៊ុយក្រែន»។

សូមបញ្ជាក់ថា នារយៈពេលប៉ុន្មានខែចុងក្រោយនេះ រុស្ស៊ីបានពន្លឿនការវាយលុកនៅទូទាំងភាគខាងកើតប្រទេសអ៊ុយក្រែន ដើម្បីដណ្តើមយកទឹកដីឲ្យបានច្រើនតាមដែលអាចធ្វើទៅបាន មុនពេលប្រធានាធិបតីជាប់ឆ្នោតអាមេរិកលោក ដូណាល់ ត្រាំ ឡើងកាន់អំណាចក្នុងខែមករា។

មេដឹកនាំ​គណបក្ស​សាធារណរដ្ឋ​រូបនេះ​សន្យា​ថា ​នឹង​បញ្ចប់​ជម្លោះ​រយៈពេល​ជិត​បី​ឆ្នាំ​យ៉ាង​ឆាប់​រហ័ស ប៉ុន្តែមិនលាតត្រដាងលក្ខខណ្ឌណាមួយឡើយ៕

អត្ថបទ៖ សុខ សុវណ្ណ

ចុចអាន៖ មេ​ដឹកនាំ​អ៊ុយក្រែន៖ នាយករដ្ឋមន្ត្រី​ស្លូវ៉ាគី ជួយរុស្ស៊ី​រក​លុយ​ធ្វើ​សង្គ្រាម