បាក់ស្ពាន​​និង​ក្រឡាប់រថយន្ត​នៅ​រុស្ស៊ី​ សម្លាប់មនុស្សយ៉ាងតិច៧នាក់ និង​របួស​រាប់សិបនាក់​

ការបាក់ស្ពានពីរដាច់ដោយឡែកពីគ្នានៅក្នុងទីBryansk និងទីក្រុង Kursk របស់ប្រទេសរុស្ស៊ី ដែលទាំងពីរជាប់ព្រំដែន​អ៊ុយក្រែន បានសម្លាប់មនុស្សយ៉ាងហោចណាស់ ៧នាក់ និងរាប់សិបនាក់រងរបួស ដោយបង្កើនការព្រួយបារម្ភអំពីការបំផ្លិចបំផ្លាញ និងការកើនឡើងភាពតានតឹងឆ្លងព្រំដែន។ នេះបើយោងតាមការចេញផ្សាយរបស់សារព័ត៌មាន​CNN កាលពីថ្ងៃទី០២ខែមិថុនានេះ។

នៅទីក្រុង Bryansk ស្ពានផ្លូវមួយបានបាក់រលំទៅលើរថភ្លើងដឹកអ្នកដំណើរ៤០០នាក់សម្លាប់មនុស្ស ៧នាក់និងរងរបួស ៦៦នាក់រួមទាំងកុមារផងដែរ។ អាជ្ញាធររុស្ស៊ីចោទទៅលើការផ្ទុះមួយទើបបណ្ដាលឲ្យមានការបាក់រលំនេះ។

ចំណែកនៅទីក្រុង Kursk របស់​ប្រទេស​រុស្ស៊ី​ រថភ្លើងដឹកទំនិញមួយបានក្រឡាប់ និងឆេះ បន្ទាប់ពីស្ពានរថភ្លើងបានបាក់រលំ។ អ្នកបើកបរម្នាក់រងរបួស ខណៈក្រុមសង្គ្រោះបន្ទាន់បានធ្វើការពេញមួយយប់ដើម្បីទប់ស្កាត់ការឆាបឆេះនេះ។

ឧប្បត្តិហេតុទាំងពីរកំពុងស្ថិតក្រោមការស៊ើបអង្កេត ដោយដំបូងឡើយគណៈកម្មាធិការស៊ើបអង្កេតរបស់រុស្ស៊ីបានហៅហេតុការណ៍ទាំងនេះថាជា «អំពើភេរវកម្ម» ។

ចំពេលមានការសង្ស័យកាន់តែខ្លាំងឡើងនៃការបំផ្លិចបំផ្លាញ និងការវាយប្រហារឆ្លងព្រំដែន មន្ត្រីអ៊ុយក្រែនបានច្រាន​ចោល​ការចោទប្រកាន់របស់រុស្ស៊ីអំពីអំពើភេរវកម្ម ដោយបង្ហាញថា ទីក្រុងមូស្គូកំពុងព្យាយាមរារាំងកិច្ចចរចាសន្តិភាពនាពេលខាងមុខ។

ជាមួយគ្នានេះប្រធានាធិបតីអ៊ុយក្រែន លោក Volodymyr Zelensky បានបញ្ជាក់ថា អ៊ុយក្រែននឹងចូលរួមការចរចាបន្ទាប់​នៅអ៊ីស្តង់ប៊ុល ដោយអំពាវនាវឱ្យមានបទឈប់បាញ់ ការដោះលែងឈើ្លយសឹក​ និងការវិលត្រឡប់របស់កុមារដែលត្រូវបានចាប់ពង្រត់​ដោយ​ភាគី​រុស្ស៊ី​៕

អត្ថបទ៖ ប៊ុន សុភាព