ខ្លាធំ ឬខ្លាដំបងផុត​ពូជ​ពី​ប្រទេស​កម្ពុជា ជា​អំបូរ​សត្វ​មានមាឌធំជាងគេបំផុតក្នុងចំណោមអំបូរឆ្មា

កម្ពុជា​នឹង​នាំយក​សត្វខ្លាធំ​ចំនួន ៤ក្បាល ពីប្រទេសឥណ្ឌានាពេលឆាប់ៗខាងមុខដើម្បី​ស្តារ​សត្វ​ខ្លា​ធំ​ឡើង​វិញ​ ក្រោយ​សត្វ​​ដ៏​កម្រ​នេះ​បាន​ផុត​ពូជ​ពី​ដែន​ជម្រកព្រៃ​​ធម្មជាតិ​ក្នុង​ប្រទេស​កម្ពុជា។

បើយោង​តាម​ឯកសារ​ក្រសួង​បរិស្ថាន ខ្លាធំ ឬខ្លាដំបង ជាប្រភេទ​អំបូរ​សត្វ​ដែលមានមាឌធំជាងគេបំផុតក្នុង​ចំណោម​អំបូរឆ្មា និងងាយស្រួលចំណាំ ដោយសារ​វាមាន​សម្បុរក្រហម លឿង ឬត្នោតខ្ចី មាន​ឆ្នូត​បង្កង់​ពណ៌ក្រមៅ កាត់ទទឹងដងខ្លួន​។ នៅផ្នែក​ខាងក្រោមចង្កា និង​បំពង់កមានព​ណ៌ស ខណៈកន្ទុយមានសម្បុរខ្មៅជាកង់ៗ និង​ខ្មៅផ្នែក​ខាងចុង។ ចំពោះលក្ខណៈជីវសាស្ត្រ គឺវាអាចរស់នៅក្នុងជម្រក គ្រប់ប្រភេទដែលមានទឹក ចំណី និង​ម្លប់​គ្រប់គ្រាន់ ព្រោះវាជាសត្វចាញ់កម្ដៅថ្ងៃ។

នៅពេលថ្ងៃក្តៅខ្លាំង គឺវាចំណាយពេលច្រើនម៉ោង ដើម្បីដេកត្រាំទឹក។ វាមានភាពស្ទាត់ជំនាញ ក្នុង​ការ​ហែលទឹក ហើយវាមិនឡើងដើមឈើទេ បើសិនមិនចាំបាច់។ ខ្លាធំអាចចាប់​ចំណីបានចាប់ពីសត្វតូចរហូតដល់សត្វធំ និងអាចបង្កាត់​ពូជ​បាន​គ្រប់រដូវ និងអាច​បង្កើត​កូន​បានពី ១-៧ ក្បាល បន្ទាប់ពីពពោះរយៈពេលប្រហែល ១០០ ថ្ងៃ។ វាអាចមាន​អាយុរហូត​ដល់​ ២៥ ឆ្នាំក្នុងធម្មជាតិ។

ក្រោម​កិច្ច​សហការ​រវាង​រដ្ឋាភិបាល​កម្ពុជា និង​ឥណ្ឌា សត្វខ្លាធំ​ចំនួន ៤ ក្បាល​ ដែល​មានឈ្មោលចំនួន ១ ក្បាល និងញីចំនួន ៣ ក្បាល គ្រោងនាំមកកាន់កម្ពុជាក្នុងជំហានទី១ នៅ​អំឡុង​ចុង​ឆ្នាំ ២០២៤។ បើកម្ពុជាទទួលជោគជ័យ ក្នុងការថែទាំ និងអភិរក្សខ្លាធំចំនួន ៤ ក្បាល ដែលនឹងមកដល់ រដ្ឋាភិបាលប្រទេស​ឥណ្ឌា​ នឹងបង្កើនការផ្ដល់ជូនដល់ ១១ ក្បាលបន្ថែម។

កញ្ញា​បណ្ឌិត សុវណ្ណា ហ្គោឡែត ​បាន​បញ្ជាក់​ថា សត្វខ្លាធំទាំង ៤ ក្បាល នឹង​លែងក្នុងតំបន់​ស្នូលនៃជួរ​ភ្នំក្រវាញ ដែល​ត្រូវបានការពារ និងចាត់ទុកថា មាន​សុវត្ថិភាព​បំផុត ក្នុងការស្តារ​សត្វខ្លាធំ​នៅកម្ពុជា​ឡើងវិញ។

សត្វខ្លាធំដែលគ្រោងលែងក្នុងតំបន់ស្នូលនៃជួរភ្នំក្រវាញ នឹងផ្តល់ការគាំទ្រការត្បាតរបស់ឧទ្យានុរក្ស ការផ្តល់ជំនួយ​បច្ចេកទេសដូចជាការបំពាក់វិទ្យុទាក់ទង​លើ​ក​សត្វ​ខ្លា ការតាមដានដំណើរសត្វខ្លា ពី​ផ្កាយរណប ហើយទិន្នន័យដែលប្រមូលបាន គឺគ្រប់គ្រងដោយក្រសួងបរិស្ថាន ខណៈ​អង្គការ​សម្ព័ន្ធ​មិត្តសត្វព្រៃ និងក្រសួងបរិស្ថាន បានរៀបចំដំឡើងកាំមេរ៉ាស្វ័យប្រវត្តិ ចំនួន៤១០គ្រឿង នៅ​ឧទ្យាន​ជាតិ​ជួរភ្នំក្រវាញ ដើម្បីសិក្សាឱ្យបានច្បាស់លាស់ នូវរបាយចំនួនសត្វព្រៃ ដែលជា​ចំណីសត្វខ្លាឱ្យបានជាក់លាក់។

គម្រោងស្តារសត្វខ្លាធំ ឬ ខ្លាដំបងនេះ គឺជាគម្រោងរួមគ្នារវាងរាជរដ្ឋាភិបាលកម្ពុជា និងរដ្ឋាភិបាល​ឥណ្ឌា ដោយផ្អែកលើការចុះហត្ថលេខាលើអនុស្សរណៈ រវាងប្រទេសទាំងពីរ​កាលពីខែវិច្ឆិកាឆ្នាំ ២០២២ ដើម្បីជាការបោះជំហាន​ទៅមុខជាប្រវត្តិសាស្ត្រ សម្រាប់ការអភិរក្សសត្វខ្លាធំនៅកម្ពុជា។

នៅក្នុងសន្និសីទព័ត៌មានស្តីពីការគ្រប់គ្រងសត្វព្រៃ និងយុទ្ធសាស្ត្រស្ដារសត្វខ្លាធំនៅកម្ពុជា នៅ​រសៀល​ថ្ងៃទី២៣ ខែ​ឧសភា ឆ្នាំ២០២៤ លោកជំទាវ​បណ្ឌិត Devyani Khobragade ឯកអគ្គរដ្ឋទូត​សាធារណរដ្ឋ​ឥណ្ឌា​ប្រចាំកម្ពុជាបានឱ្យដឹងថា​ ការប្រគល់សត្វខ្លាធំនេះ​អាចនឹងធ្វើឡើងអំឡុង​ពេល​ខែវិច្ឆិកា ឬខែធ្នូខាងមុខ។

យ៉ាងណាក្តីការប្រគល់ខ្លាមកកម្ពុជានេះ អាចពន្យាពេលយូរជាង​នេះ​បន្ថែមទៀតក៏អាចថាបានអាស្រ័យ​ទៅលើ​អាកាសធាតុ និងកត្តារួមផ្សំមួយចំនួនទៀត។

លោក ជា សំអាង រដ្ឋលេខាធិការក្រសួងបរិស្ថានបានបញ្ជាក់ថា ការនាំសត្វខ្លាធំមកកម្ពុជា​គឺនឹង​នាំ​មក​នូវ​សារៈប្រយោជន៍​ជាច្រើន​ដល់កម្ពុជា ក្នុងនេះក្រៅពីស្តារសត្វព្រៃដែលបាត់បង់ហើយ នៅ​អាច​ជាផ្នែកមួយ​សំខាន់​សម្រាប់​បម្រើលើវិស័យ​ទេសចរណ៍ សម្រាប់​បង្កើនជីវភាពសហគមន៍​មូលដ្ឋាន​ថែម​ទៀត។

សម្រាប់គម្រោងស្តារ​សត្វខ្លាធំ​ឡើងវិញនេះ បន្ទាប់ពី​បាត់វត្តមានពីទឹកដីកម្ពុជាកាលពី​អំឡុងឆ្នាំ​២០០៧ ដោយការបរបាញ់ ដើម្បីពាណិជ្ជកម្មឆ្អឹង និងស្បែក។ វត្តមានរបស់វាធ្លាប់បានរកឃើញនៅតាមតំបន់មួយចំនួនដូចជាភូមិភាគឦសាន និរតី និងខាងជើងប្រទេសកម្ពុជា។

ក្រសួងបរិស្ថាន និងអង្គការសម្ព័ន្ធមិត្តសត្វព្រៃ WA បានរៀបចំដីព្រៃទំហំ ៩០ ហិកតា ស្ថិតក្នុងដែន ជម្រក​សត្វព្រៃតាតៃ​នៃតំបន់ជួរភ្នំក្រវាញ ដោយមានរបងដែក ទ្រុងដែក អាងទឹក និងសត្វព្រៃ​សម្រាប់ជា​ចំណី​សម្រាប់បន្ស៊ាំសត្វខ្លាធំ ដែលគ្រោងទទួលពីរដ្ឋាភិបាលប្រទេសឥណ្ឌា មុនលែង​ចូលតំបន់ស្នូល​នៃតំបន់ការពារធម្មជាតិ៕