ក្រុមការងាររាជរដ្ឋាភិបាលចុះមូលដ្ឋានស្រុកកំពង់សៀមប្រគេនទៀនព្រះវស្សា និងទេយ្យទាន ព្រះសង្ឃគង់នៅវត្តហាន់ជ័យ

លោក កត្តា អ៊ន រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ និងជាអនុ​ប្រធានក្រុមការងាររាជរដ្ឋាភិបាលចុះមូលដ្ឋានខេត្ត​កំពង់ចាម និងជា​ប្រធាន​ក្រុម​ការ​ងារ​រាជ​រដ្ឋា​ភិបា​ល​ចុះមូលដ្ឋានស្រុកកំពង់សៀម រួមជា​មួយ​សមាជិកក្រុមការងាររាជរដ្ឋាភិបាល នៅព្រឹកថ្ងៃអាទិត្យ ទី២០ ខែកក្កដា ឆ្នាំ​២០២៥នេះ បាននាំយកទៀនវស្សា និងទេយ្យទានប្រគេនព្រះសង្ឃទាំង ៨៥អង្គ និងជូនយាយជី តាជី ចំនួន ៥០នាក់ នៅ​វត្ត​ហាន់​ជ័យ ស្រុកកំពង់សៀម ខេត្តកំពង់ចាម។

ទេយ្យទានដែលបានប្រគេនរួមមាន ទៀន​ព្រះ​វស្សា១គូ សាដក៥ ស្ករស១បាវ ទឹក​ដោះ​គោ​ខាប់១កេស ត្រីខ១កេស ទៀន​ក្រមួន១គីឡូ ធូប​មាសដុំធំ១ដុំ អង្ករ២បាវ ទឹកក្រូច៥កេស ទឹក​សុទ្ធ​៥កេស មីជាតិ៥កេសធំ និងបច្ច័យ​មួយ​ចំនួន​ទៀត។ ការប្រគេនទៀនព្រះវស្សា និងទេយ្យទាននេះ គឺជាការរួមចំណែកទ្រទ្រង់ដល់ព្រះសង្ឃ ដែល​គង់​នៅវត្តក្នុងរយៈពេល៣ ខែនៃ​ការចូល​កាន់​ព្រះវស្សានេះ។

ពិធីបុណ្យចូលព្រះវស្សា គឺជាពិធីបុណ្យមួយ​ដែល​មានសារៈសំខាន់ក្នុងព្រះពុទ្ធសាសនា និងជា​ពេល​វេលាដ៏សំខាន់សម្រាប់ភិក្ខុសង្ឃ និង​សាម​ណេរបានរៀនធម៌ និងវិន័យ​យ៉ាង​ខ្ជាប់​ខ្ជួន​តាម​ពុទ្ធ​ឱវាទ៕