ក្នុងឱកាសទៅចូលរួមកិច្ចប្រជុំវិសាមញ្ញគណៈកម្មាធិការព្រំដែនទូទៅ (GBC) ជាមួយភាគីថៃ នៅប្រទេសម៉ាឡេស៊ី លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ និងគណៈប្រតិភូយោធាជាន់ខ្ពស់នៃកងយោធពលខេមរភូមិន្ទ កាលពីថ្ងៃទី៦ ខែសីហា ឆ្នាំ២០២៥ បានឆ្លៀតជួបជាមួយនាយឧត្តមនាវី Samuel Paparo មេបញ្ជាការបញ្ជាការដ្ឋានឥណ្ឌូប៉ាស៊ីហ្វិក សហរដ្ឋអាមេរិក និងលោក Edgard Kagan ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសម៉ាឡេស៊ី។

ថ្លែងក្នុងសន្និសីទសារព័ត៌មាន នៅម៉ោង៧ព្រឹកថ្ងៃទី៧ ខែសីហា ឆ្នាំ២០២៥ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានបញ្ជាក់ថា សហរដ្ឋអាមេរិកបានបញ្ជាក់ពីជំហររបស់ខ្លួនក្នុងការគាំទ្របទឈប់បាញ់ ដែលជាគំនិតផ្តួចផ្តើមរបស់លោកប្រធានាធិបតី ដូណាល់ ត្រាំ និងបានដឹកនាំដោយប្រទេសម៉ាឡេស៊ី ដែលជាប្រធានអាស៊ានប្តូរវេន ក្នុងការអនុវត្តបទឈប់បាញ់។

លោកស្រី ម៉ាលី សុជាតា បានបន្តថា ក្នុងជំនួបទល់មុខជាមួយលោកនាយឧត្តមសេនីយ៍ ទៀ សីហា រដ្ឋមន្ត្រីការពារជាតិកម្ពុជា លោកនាយឧត្តមនាវី Samuel Paparo មេបញ្ជាការឥណ្ឌូប៉ាស៊ីហ្វិក សហរដ្ឋអាមេរិក និងEdgard Kagan ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសម៉ាឡេស៊ី អះអាងថា សហរដ្ឋអាមេរិក នឹងតាមដានយ៉ាងយកចិត្តទុកដាក់បំផុតដើម្បីឱ្យការអនុវត្តនេះដំណើរទៅប្រកបដោយភាពជោគជ័យ និងមានប្រសិទ្ធភាព។

ដើម្បីគាំទ្រដល់ការតាមដានការអនុវត្តបទឈប់បាញ់នេះ បើតាមលោកស្រីអ្នកនាំពាក្យ សហរដ្ឋអាមេរិកនឹងចូលរួមគាំទ្រផ្នែកភស្តុភា និងបច្ចេកទេសសំខាន់ៗ ដើម្បីបង្កើតក្រុមការងារអ្នកសង្កេតការណ៍អាស៊ាន (AMT) ឱ្យបានលឿនបំផុត។ លើសពីនេះទៅទៀត សហរដ្ឋអាមេរិក ក៏បានបង្ហាញពីអ្វីដែលជាការអនុវត្តបន្តរបស់ខ្លួន រួមមាន៖ ការធ្វើផែនការយោធា គ្រឿងបរិក្ខារ ប្រព័ន្ធបញ្ជូនកម្លាំង ប្រព័ន្ធឃ្លាំមើលតាមអាកាស និងសម្ភារបច្ចេកទេសទំនើបជាច្រើនទៀត។

ការរួមចំណែករបស់សហរដ្ឋអាមេរិកទាំងនេះ ត្រូវបានអ្នកនាំពាក្យក្រសួងការពារជាតិកម្ពុជា បានថ្លែងចាត់ទុកថា គឺជាការបង្ហាញពីការតាំងចិត្តខ្ពស់ និងបានត្រៀមខ្លួនចូលរួមកសាងឱ្យមានសន្តិភាពកើតឡើងពិតប្រាកដឡើងវិញ៕  

ដោយ៖ ធឿន វ៉ាន់សុង

The post អាមេរិកបញ្ជាក់ពីជំហរគាំទ្រ និងបន្តតាមដានការអនុវត្តបទឈប់បាញ់ដ៏ពេញលេញរវាងកម្ពុជា-ថៃ appeared first on Kampuchea Thmey Daily.

ការអះអាងរបស់សម្ដេចតេជោបែបនេះ ខណៈនាពេលថ្មីៗកន្លងទៅ មេបញ្ជាការកងទ័ពកម្ពុជា ក៏បានទៅប្រជុំនៅរដ្ឋហាវ៉ៃ សហរដ្ឋអាមេរិក ដែលសម្ដេចតេជោ ចាត់ទុកថា គឺជាការបង្កើនទំនុកចិត្តឱ្យគ្នាទៅវិញទៅមកបន្ថែមទៀតទៅលើកិច្ចសហប្រតិបត្តិការផ្សេងៗរវាងកម្ពុជា និងអាមេរិក ដែលមានស្រាប់ ក៏ដូចជាតាមរយៈសកម្មភាពរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)។

សម្ដេចតេជោ លើកឡើងដូច្នេះ ក្នុងឱកាសទទួលភារធារីស្តីទីស្ថានទូតសហរដ្ឋអាមេរិកប្រចាំកម្ពុជា លោកស្រី ប្រៃហ្គេត អែលវ៉កឃឺរ (Bridgette L. Walker) នាព្រឹកថ្ងៃទី១៧ ខែធ្នូ ឆ្នាំ២០២៤ នៅវិមានព្រឹទ្ធសភា រាជធានីភ្នំពេញ។

ជាការកត់សម្គាល់ តបតាមសំណើរបស់ភាគីសហរដ្ឋអាមេរិកក្នុងការចូលសំចតនាវា និងដោយទទួលបានការឯកភាពពីក្រសួងការពារជាតិកម្ពុជា នាវាចម្បាំងកងទ័ពជើងទឹកសហរដ្ឋអាមេរិក ឈ្មោះ USS SAVANNAH (LCS28) ដែលមាននាវិកសរុបចំនួន ១០៣នាក់ បានចូលសំចតនៅកំពង់ផែស្វយ័តក្រុងព្រះសីហនុ ចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២៤។ បើតាមក្រសួងការពារជាតិកម្ពុជា ចាប់តាំងពីឆ្នាំ២០០៧ ការចូលសំចតនាវាចម្បាំងកងទ័ពជើងទឹកអាមេរិក មានចំនួន២៧គ្រឿងហើយ ខណៈការចូលសំចតលើកនេះ ជាលើកដំបូង បន្ទាប់ពីខកខានអស់រយៈពេល៨ឆ្នាំ។

លោកស្រី ប្រៃហ្គេត អែលវ៉កឃឺរ ភារធារីស្ដីទីអាមេរិក គូសបញ្ជាក់ជូនសម្តេចតេជោ ថា ការចូលចតឡើងវិញនាវាចម្បាំងអាមេរិកនៅកម្ពុជានាពេលនេះ គឺក្រោយដំណើរទស្សនកិច្ចរបស់លោក ឡយ អូស្ទីន (Lloyd Austin) រដ្ឋមន្រ្តីការពារជាតិអាមេរិកនៅកម្ពុជា កន្លងទៅ ដែលនេះសបញ្ជាក់ឱ្យឃើញពីទំនាក់ទំនងយូរអង្វែង និងកិច្ចសហប្រតិបត្តិការដ៏ល្អរវាងប្រទេសទាំងពីរលើវិស័យយោធា ក៏ដូចជានៅក្នុងវិស័យនានាផ្សេងៗ រួមមាន សុខាភិបាល អប់រំ ការដោះមីន ជាដើម។

លោកស្រីភារធារីស្ដីទី ក៏បានបង្ហាញក្ដីសង្ឃឹម និងចង់ឃើញទំនាក់ទំនងកម្ពុជា និងអាមេរិកកាន់តែមានភាពខ្ពង់ខ្ពស់ ដូចដែលបានលើកឡើងនៅក្នុងសារអបអរសាទររបស់សម្តេចតេជោ ផ្ញើជូនលោកប្រធានាធិបតីថ្មី ដូណាល់ ត្រាំ ផងដែរ។

តបនឹងការលើកឡើងរបស់ភាគីអាមេរិក សម្ដេចតេជោ ហ៊ុន សែន បានទទួលស្គាល់ថា ប្រទេសទាំងពីរមានទំនាក់ទំនងយូរអង្វែង ដោយសហរដ្ឋអាមេរិកបានភ្ជាប់ទំនាក់ទំនងការទូតជាមួយកម្ពុជា គឺមុនកម្ពុជាទទួលបានឯករាជ្យពេញលេញទៅទៀត។ ជាមួយនឹងការវិលត្រលប់នៃរដ្ឋបាលលោក ដូណាល់ ត្រាំ នាពេលខាងមុខ សម្តេចតេជោ រំពឹងថា កិច្ចសហប្រតិបត្តិការនៃប្រទេសយើងទាំងពីរកាន់តែត្រូវបានពង្រឹង និងពង្រីកបន្ថែមទៀត។

សម្តេចតេជោ ថា រឿងចាស់ គឺជាបទពិសោធ ក្នុងការរៀបចំឥរិយាបថសម្រាប់ទំនាក់ទំនងនៃអនាគតរបស់ប្រទេសយើងទាំងពីរ ជាពិសេសក្នុងការកសាងទំនុកចិត្តរវាងប្រទេសយើងទាំងពីរ និងការពិនិត្យចំណុចអាទិភាពនៃកិច្ចសហប្រតិបត្តិការផ្សេងៗទៀត រួមទាំងវិស័យសេដ្ឋកិច្ច និងការវិនិយោគផងដែរ៕

ដោយ៖ ធឿន វ៉ាន់សុង

The post សម្ដេចតេជោ ថា វត្តមានជាថ្មីនាវាចម្បាំងអាមេរិកនៅកម្ពុជា បង្ហាញពីទំនាក់ទំនងល្អក្នុងវិស័យការពារជាតិ appeared first on Kampuchea Thmey Daily.

លោក Jayme Lee ដែលជាភ្នាក់ងាររបស់ក្រុមហ៊ុន Korean Air បានថ្លែងប្រាប់កម្ពុជាថ្មីថា អ្នកដំណើរនៅលើសេវា ភ្នំពេញ-សេអ៊ូល អ៊ីនឈុន របស់ក្រុមហ៊ុនអាកាសចរណ៍ Korean Air អាចភ្ជាប់ជើងហោះហើរទាំងនេះទៅកាន់អាមេរិកខាងជើងបានចាប់ពីពេលនេះតទៅ។

​លោកបានបញ្ចាក់ទៀតថា៖«សម្រាប់ការ​អាជីវកម្មរលើវិស័យដឹកជញ្ជូនវាងកូរ៉េខាងត្បូង និងកម្ពុជា ត្រូវបានជំរុញដោយសារកំណើននៃក្រុមហ៊ុនកូរ៉េខាងត្បូងដែលមានប្រហែល 300 ដែលកំពុងប្រតិបត្តិការនៅក្នុងប្រទេសកម្ពុជាក្នុងវិស័យផ្សេងៗដូចជា ផលិតកម្ម សំណង់ និងហិរញ្ញវត្ថុ»។

លោកថា ​ បច្ចុប្បន្នក្រុមហ៊ុនអាកាសចរណ៍ Korean Air ហោះហើរទៅកាន់គោលដៅចំនួន ១៣ នៅអាមេរិកខាងជើងមានដូចជាទីក្រងុ Los Angeles, New York, Boston, Seattle, Chicago, Dallas, Toronto និង San Francisco។

យោង​តាមរបាយការណ៍របស់គ្រឹះស្ថានអង្គរនៅក្នុងរយៈពេល ៨ ខែ ឆ្នាំ ២០២៤ មាន​ភ្ញៀវទេស​ចរ​​បរទេស​ជាង ៦៥ ម៉ឺន បានទិញសំបុត្រ​ចូលទស្សនារមណី​យដ្ឋាន​អង្គរ គិតជាទឹក​ប្រាក់​​​ប្រមាណ​​ជាង ៣០ លានដុល្លារ កើនឡើង ៣១,៣៦% ប្រៀបធៀបរយៈពេលដូចគ្នានៅឆ្នាំ ២០២៣។

យោងតាមក្រសួងទេសចរណ៍ គិតចាប់ពីខែមករា ដល់ខែកក្កដា ឆ្នាំ ២០២៤ កម្ពុជា​ទទួល​បាន​ភ្ញៀវ​បរទេសជាង ៣,៧៤ លាន​នាក់ កើន​ឡើង ២៣,២​ ភាគ​រយ​​ធៀបនឹង​​រយៈ​ពេល​ដូច​គ្នា​ឆ្នាំ​ ២០២៣ដែល​មាន​ចំនួន ៣,០៣ លាននាក់។

ក្នុងចំណោមទេសចរជាង ៣,៧៤ លាននាក់ទេសចរថៃឈរនៅ​លំដាប់​លេខរៀងទី ១ មានចំនួន ១ ១៤៧ ៥៣៤ នាក់ កើន ១១,៦% វៀតណាមចំនួន ៧៥៧ ៤៣៧ កើន ៣៧,៤% ចិន ៤៦៣ ៩៨០ នាក់ កើន ៤៥,៧% ឡាវ ២២៤ ៨៧១ កើន ២៩,៣% អាមេរិក ១១៧ ២២៣ នាក់ កើន ១៧%៕

The post អ្នកធ្វើដំណើរមកពីប្រទេសកម្ពុជានឹងមានជម្រើស​ហោះហើរទៅកាន់អាមេរិកខាងជើង appeared first on Kampuchea Thmey Daily.

ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា លោកW.PATRICK MURPHY បានអបអរសាទរចំពោះប្រទេសកម្ពុជា ត្រូវបានដកចេញពីបញ្ជីប្រផេះនៃការលាងលុយកខ្វក់ និងបានស្នើឱ្យកម្ពុជាយកចិត្តទុកដាក់ ក្នុងការថែរក្សាការងារសម្អាតប្រាក់នេះ ឱ្យកាន់តែប្រសើរថែមទៀត។ លោក ផាទ្រិក ម័រហ្វី បានអបអរបែបនេះ នៅចំពោះមុខ លោក ស ថេត អគ្គស្នងការនគរបាលជាតិ នាព្រឹកថ្ងៃទី​ ០៥ ខែតុលានេះ។

ជាមួយគ្នានោះ លោកក៏បានកោតសរសើរចំពោះសមិទ្ធផលក្រុមការងារ Task Force ដែលបានផ្តល់កិច្ចសហការយ៉ាងល្អប្រសើរជាមួយ កងកម្លាំងអនុវត្តច្បាប់អាមេរិកអមស្ថានទូតប្រចាំកម្ពុជា ជាពិសេស លោក លើកឡើងពីទីភ្នាក់ងារអនុវត្តច្បាប់ប្រឆាំងគ្រឿងញៀន ដែលទើបបង្កើតថ្មី ប៉ុន្តែសម្រេចបានសមិទ្ធផលរួមសហការគ្នាក្នុងការទប់ស្កាត់ និងប្រឆាំងបទល្មើសគ្រឿងញៀនបានជាច្រើនករណីធំៗ ដែលការងារនេះមិនត្រឹមតែជួយកម្ពុជាឱ្យគេចផុតពីបទល្មើសដោយសារតែការចរាចរជួញដូរចែកចាយគ្រឿងញៀន និងក៏ជាការជួយដល់សហរដ្ឋអាមេរិក ក្នុងការទប់ស្កាត់ការនាំចូលគ្រឿងញៀន ទៅកាន់ទីផ្សារសហរដ្ឋអាមេរិកផងដែរ។

ជាការឆ្លើយតប ស ថេត អគ្គស្នងការនគរបាលជាតិ រីករាយស្វាគមន៍ជាមួយនឹងកិច្ចសហការ ដែល លោកឯកអគ្គរដ្ឋទូត បានលើកឡើងឱ្យកាន់តែរឹងមាំ និងទទួលបានលទ្ធផលល្អបន្ថែមទៀត ដោយលើកទឹកចិត្តឱ្យកងកម្លាំងអនុវត្តច្បាប់អមស្ថានទូតអាមេរិក បន្តធ្វើការជាមួយនាយកដ្ឋានជំនាញពាក់ព័ន្ធទាំងជំនាញផ្ទាល់ រួមទាំង ក្រុមការងារចម្រុះ Task Force ។

បន្ថែមពីនេះ លោកឯកអគ្គរដ្ឋទូតអាមេរិក ក៏បានលើកទឹកចិត្តឱ្យនគរបាលជាតិកម្ពុជា រៀបចំចាត់តាំងមន្ត្រី ដើម្បីទៅចូលរួមទទួលការបណ្តុះបណ្តាល នៅសាលាបណ្ឌិត្យសភាអាយលា (ILEA) ប្រចាំនៅទីក្រុងបាងកក ដោយនៅទីនោះ ជាមជ្ឈមណ្ឌលប្រកបដោយសក្តានុពល ក្នុងការបណ្តុះបណ្តាលកសាងសមត្ថភាពកងកម្លាំងអនុវត្តច្បាប់ គ្រប់មុខជំនាញ។

ស្របនឹងបញ្ហានេះ លោកស ថេត ក៏បានអរគុណភាគីអាមេរិក ដែលបានផ្តល់ការបណ្តុះបណ្តាល ហើយលោកប្រាប់ឯកអគ្គរដ្ឋទូតអាមេរិកថា នគរបាលជាតិកម្ពុជា បានត្រៀមខ្លួនជានិច្ច ដើម្បីទៅចូលរួមវគ្គបណ្តុះបណ្តាល ទទួលយកបទពិសោធន៍ពី សាលាបណ្ឌិត្យសភាអាយលា (ILEA) យកមកប្រើប្រាស់ឱ្យចំមុខជំនាញ។ ជាមួយគ្នានោះ លោកនាយឧត្តមសេនីយ៍ អគ្គស្នងការនគរបាលជាតិ ក៏បានស្នើសុំឱ្យអាមេរិកបន្តការគាំទ្របន្ថែមទៀត ទាំងផ្នែកធនធានមនុស្ស និងជំនាញព្រមទាំងចែករំលែកព័ត៌មានសំខាន់ៗ ដែលឈានទៅដល់ការប្រយុទ្ធប្រឆាំងបទល្មើសឆ្លងដែនគ្រប់ប្រភេទ។

ជាចុងក្រោយ លោកW.PATRICK MURPHY ក៏បានថ្លែងអំណរគុណចំពោះការធានាសន្តិសុខប្រកបដោយសុវត្ថិភាព ដែលនគរបាលជាតិកម្ពុជា បានផ្តល់ជូនស្ថានទូត រួមមានទាំងកិច្ចការពារស្ថានទូតអាមេរិក ការពារប្រតិភូ បុគ្គលិកការទូត និងនិវេសនដ្ឋាន រួមទាំងពលរដ្ឋអាមេរិកដែលស្នាក់នៅកម្ពុជា ប្រកបដោយកាយវិការទន់ភ្លន់ ម៉ត់ចត់ ម៉ឺងម៉ាត់ អត់ធ្មត់៕

ដោយ៖ ង៉ិល ណារ៉ាត់

The post ឯកអគ្គរដ្ឋទូតអាមេរិក អបអរកម្ពុជា ដែលត្រូវដកចេញពីបញ្ជីប្រផេះលាងលុយកខ្វក់ appeared first on Kampuchea Thmey Daily.

លោក នេត្រ ភក្ត្រា រដ្ឋមន្ត្រី​ក្រសួង​ព័ត៌មាន បញ្ជាក់​ពី​ជំហរ​បែបនេះ ក្នុង​ឱកាស​ទទួល​ជួប​ពិភាក្សា​ការងារ​ជាមួយ លោក ប៉ាទ្រិក ម័រហ្វី (Patrick Murphy) ឯកអគ្គរដ្ឋទូត​អាមេរិក​ប្រចាំ​ព្រះរាជាណាចក្រ​កម្ពុជា កាលពី​ព្រឹក​ថ្ងៃ​ទី ០២ ខែ​តុលា ឆ្នាំ ២០២៣ នា​ទីស្ដីការ​ក្រសួង​ព័ត៌មាន។

នា​ឱកាស​នោះ លោក នេត្រ ភក្ត្រា បាន​បញ្ជាក់​ពី​ជំហរ​ក្នុង​ការ​បន្ត​ពង្រឹង​ពង្រីក​កិច្ច​សហ​ប្រតិបត្តិការ​លើ​វិស័យ​ព័ត៌មាន ក្នុង​ក្របខ័ណ្ឌ​ក្រសួង​ព័ត៌មាន ជាមួយ​ស្ថានទូត​សហរដ្ឋអាមេរិក ឲ្យ​បាន​កាន់តែ​រលូន និង​ល្អ​ប្រសើរ​ទៅមុខ​ជានិច្ច។

ទន្ទឹម​នោះ​ដែរ លោក នេត្រ ភក្ត្រា បាន​សម្ដែង​នូវ​ការ​អរគុណ​ដល់ លោក ប៉ាទ្រិក ម័រហ្វី ឯកអគ្គរដ្ឋ​ទូត​អាមេរិក​ប្រចាំ​កម្ពុជា ដែល​អញ្ជើញ​មក​ធ្វើការ​អបអរសាទរ​សម្រាប់​អាណត្តិ​ការងារ​ជា​រដ្ឋមន្ត្រី​ក្រសួង​ព័ត៌មាន។

ជាមួយ​នេះ លោក ប៉ា​ទ្រិ​ក ម័​រ​ហ្វី (Patrick Murphy) ឯកអគ្គរដ្ឋទូត​អាមេរិក​ប្រចាំ​ប្រទេស​កម្ពុជា ក៏បាន​សម្ដែង​នូវ​ការ​ចូលរួម​អបអរសាទរ​ដល់ លោក នេត្រ ភក្ត្រា ដែល​ត្រូវ​តែងតាំង​ជា​រដ្ឋមន្ត្រី​ក្រសួង​ព័ត៌មាន ក្នុង​អាណត្តិ​ទី ៧ នៃ​រាជរដ្ឋាភិបាល​កម្ពុជា នេះ​ផង​ដែរ។

គួរ​ជម្រាប​ថា ក្នុង​ជំនួប​ពិភាក្សា​ការងារ​រវាង លោក នេត្រ ភក្ត្រា រដ្ឋមន្ត្រី​ក្រសួង​ព័ត៌មាន និង លោក ប៉ាទ្រិក ម័រហ្វី (Patrick Murphy) ឯកអគ្គរដ្ឋទូត​អាមេរិក​ប្រចាំ​ប្រទេស​កម្ពុជា ព្រឹកមិញ បាន​ផ្ដោត​ជា​សំខាន់​លើ​កិច្ច​សហ​ប្រតិបត្តិការ​ក្នុង​ក្របខ័ណ្ឌ​ក្រសួង​ព័ត៌មាន រវាង​ប្រទេស​កម្ពុជា និង សហរដ្ឋអាមេរិក លើ​កិច្ច​ការងារ​ពង្រឹង​ពង្រីក​វិស័យ​ព័ត៌មាន​ឲ្យ​បាន​កាន់តែ​ល្អ​បន្ត​ទៅ​មុខ​ទៀត ដើម្បី​នាំ​មក​នូវ​ផលប្រយោជន៍​ជា​រួម​ដល់​ប្រជាជន និង​រដ្ឋាភិបាល នៃ​ប្រទេស​ទាំងពីរ កម្ពុជា-សហរដ្ឋអាមេរិក៕

អត្ថបទ ៖ ពិសី

The post លោក នេត្រ ភក្ត្រា បញ្ជាក់ជំហរបន្តពង្រឹងពង្រីកកិច្ចសហប្រតិបត្តិការ លើវិស័យព័ត៌មាន ជាមួយស្ថានទូតអាមេរិក appeared first on Kampuchea Thmey Daily.

ការថ្លែងអំណរគុណនេះ គ្រាដែលសម្តេចធិបតី ហ៊ុន ម៉ាណែត បានទទួលជួបសម្ដែងការគួរសម និងពិភាក្សាការងារជាមួយលោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា កាលពីព្រឹកថ្ងៃទី ២៧ ខែកញ្ញា ឆ្នាំ ២០២៣។

នៅក្នុងជំនួបនេះ សម្តេចធិបតី ហ៊ុន ម៉ាណែត បានទទួលស្វាគមន៍ ចំពោះលោកឯកអគ្គរដ្ឋទូត និងសហការី និងបានជម្រាបពីលទ្ធផលល្អដែលសម្តេចធិបតី និងគណៈប្រតិភូកម្ពុជាទទួលបានពីជំនួបទ្វេភាគីនានា នៅទីក្រុងញូវយ៉ក, ជាពិសេសនាជំនួបទ្វេភាគីជាមួយ លោកជំទាវ វ៉ិចតូរីយ៉ា នូលែន (Victoria Nuland) អនុរដ្ឋមន្ត្រីការបរទេសស្ដីទីសហរដ្ឋអាមេរិក ។

ក្នុងនាមរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត បានថ្លែងអំណរគុណចំពោះរដ្ឋាភិបាលអាមេរិក ដែលបានផ្តល់ជូនឡើងវិញនូវជំនួយក្នុងទំហំទឹកប្រាក់ប្រមាណ ១៨ លានដុល្លារអាមេរិក តាមរយៈទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (US AID)។ ប្រាក់ជំនួយដែលត្រូវបានផ្តល់ជូនឡើងវិញនេះ នឹងត្រូវយកទៅប្រើប្រាស់នៅក្នុងវិស័យសំខាន់ៗ ដូចជា៖ (១) ការកែលម្អការផ្ដល់សេវាសុខាភិបាលទាំងក្នុងផ្នែករដ្ឋ និងផ្នែកឯកជន (២) ការការពារបរិស្ថានប្រកបដោយចិរភាព (៣) ការការពារ និងការប្រយុទ្ធនឹងជំងឺរបេង និង (៣) ការបណ្ដុះបណ្ដាលផ្នែកសហគ្រិនភាពដល់យុវជនកម្ពុជា ជាដើម។

ពាក់ព័ន្ធនឹងការធ្វើមាតុភូមិនិវត្តន៍ពលរដ្ឋខ្មែរ, ភាគីទាំងពីរបានឯកភាពគ្នា ក្នុងការបន្តសម្របសម្រួល និងសហប្រតិបត្តិការយ៉ាងជិតស្និទ្ធ នៅគ្រប់ជំហាននៃនីតិវិធី ពោលគឺ៖ (១) ពន្លឿននីតិវិធីក្នុងការកំណត់អត្តសញ្ញាណ និងការរៀបចំបញ្ជូនពលរដ្ឋខ្មែរ មកកម្ពុជា (២) ធ្វើសាមញ្ញកម្មនីតិវិធី នៅពេលបញ្ជូន និង (៣) រៀបចំផែនការសកម្មភាពនៃការគាំទ្រ និងការធ្វីសមាហរណកម្ម សម្រាប់ឲ្យពលរដ្ឋខ្មែរ អាចបន្ស៊ាំ និងអាចធ្វីសមាហរណកម្មទៅក្នុងសង្គមកម្ពុជាវិញ សំដៅកសាងជីវិតថ្មីមួយ ឲ្យបានល្អសមស្រប នៅលើទឹកដីកម្ពុជា។

ចំពោះបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួន (POW/MIA) សម្តេចធិបតី ហ៊ុន ម៉ាណែត បានជម្រាបជូនលោកឯកអគ្គរដ្ឋទូត ថា រាជរដ្ឋាភិបាលកម្ពុជា បានយកចិត្តទុកដាក់ខ្ពស់ និងបានរៀបចំកែសម្រួលសមាសភាព នៃគណៈកម្មការ POW/MIA ក្នុងការសម្របសម្រួល និងសហការជាមួយគ្រប់ភាគីពាក់ព័ន្ធទាំងអស់ ដើម្បីអនុវត្តបេសកកម្មស្រាវជ្រាវ និងជីករុករកអដ្ឋិធាតុជនជាតិអាមេរិកបាត់ខ្លួន ឲ្យបានរហ័សទាន់ពេល និងជោគជ័យ ប្រកបដោយកាយវិការនៃការគោរព និង ស្រឡាញ់ ចំពោះក្រុមគ្រួសារនៃយុទ្ធជនដែលបានបាត់ខ្លួន។

ក្រៅពីនេះ ភាគីទាំងពីរក៏បានពិភាក្សា និងបន្តកិច្ចប្រតិបត្តិការ នៅក្នុងវិស័យផ្សេងទៀត ដែលប្រទេសទាំងពីរកំពុងយកចិត្តទុកដាក់បំផុត។ ក្នុងជំនួបនោះដែរ សម្តេចធិបតី ហ៊ុន ម៉ាណែត បានកោតសរសើរ និងវាយតម្លៃខ្ពស់ ចំពោះកិច្ចសហប្រតិបត្តិការទ្វេភាគីកម្ពុជា-សហរដ្ឋអាមេរិក នាពេលកន្លងមក។ ភាគីទាំងពីរ ក៏បានប្តេជ្ញាចិត្តផងដែរ ក្នុងបន្តនូវកិច្ចសហប្រតិបត្តិជាមួយគ្នា ឲ្យកាន់តែជិតស្និទ្ធបន្ថែមទៀត សម្រាប់ជាឧត្តមប្រយោជន៍នៃប្រទេសទាំងពីរ៕

The post សម្តេចធិបតី ហ៊ុន ម៉ាណែត ថ្លែងអំណរគុណអាមេរិកដែលបានផ្ដល់ជំនួយឡើងវិញ នូវទឹកប្រាក់ ១៨លានដុល្លារ appeared first on Kampuchea Thmey Daily.

ការលើកឡើងរបស់លោក តាន់ ហ្សង់ហ្វ្រង់ស័រ បែបនេះ ក្រោយមានជំនួបរវាងសម្ដេចធិបតី ហ៊ុន ម៉ាណែត ប្រមុខរាជរដ្ឋាភិបាលកម្ពុជា និងអនុរដ្ឋមន្ត្រីការបរទេសអាមេរិក លោកស្រី វ៉ិចតូរីយ៉ា នូលែន (Victoria Nuland) ក្នុងឱកាសសម្ដេចធិបតី អញ្ជើញទៅចូលរួមមហាសន្និបាតអង្គការសហប្រជាជាតិ នាទីក្រុងញូវយ៉ក កាលពីថ្ងៃទី២២ ខែកញ្ញា។

បើតាមលោក តាន់ ហ្សង់ហ្វ្រង់ស័រ ជំនួបការងារនេះ សម្ដេចធិបតី ហ៊ុន ម៉ាណែត និងលោកស្រីអនុរដ្ឋមន្ត្រីការបរទេសអាមេរិក សុទ្ធតែមានបង្ហាញនូវឆន្ទៈមុះមុតក្នុងការពង្រីកពង្រឹងទំនាងក់ទំនងរវាងប្រទេសទាំងពីរ កម្ពុជា-អាមេរិក ឱ្យកាន់ តែរឹងមាំ និងមានភាពប្រសើរឡើងថែមទៀត។ លោក ហ្សង់ហ្វ្រង់ស័រ បានបន្តឱ្យដឹងថា ភាគីទាំងពីរមិនទាន់បាននិយាយអំពីវិធីសាស្ត្រ ឬមធ្យោបាយណាមួយក្នុងការធ្វើឱ្យប្រទេសទាំងពីរអាចចាប់ដៃគ្នាឱ្យជាប់ ដើម្បីដើរទៅតាមទិសដៅតែមួយនោះទេ។

តែយ៉ាងណា លោក តាន់ ហ្សង់ហ្វ្រង់ស័រ បញ្ជាក់ថា ទំនាក់ទំនងរវាងប្រទេស និងប្រទេស បើមិនមានផលប្រយោជន៍រួមទេ គឺមិនអាចឈានទៅដល់គោលដៅរួមគ្នាតែមួយបានឡើយ។ លោក លើកឡើងដូច្នេះថា៖ «គួរមានសុទិដ្ឋិនិយមចំពោះទំនាក់ទំនងរវាងកម្ពុជា និងអាមេរិក ព្រោះកម្ពុជា ជាប្រទេសតូចខ្សោយ ខណៈសហរដ្ឋអាមេរិក ជាកំពូលមហាអំណាច ដូច្នេះ កម្ពុជា និងអាមេរិក អាចត្រូវរ៉ូវគ្នា ចាប់ដៃគ្នារលាក់យ៉ាងកក់ក្ដៅបាន នៅពេលណាដែលមានប្រយោជន៍រួមគ្នា»។

លោក បន្តថា ទំនាក់ទំនងរវាងប្រទេស និងប្រទេស ជាពិសេសទំនាក់ទំនងជាមួយប្រទេសមហាអំណាចមួយ ហើយកម្ពុជា ជាប្រទេសតូចផងនោះ គេសំលឹងមើលមិនឃើញទេ។ ត្រង់ន័យនេះ លោក ហ្សង់ហ្វ្រង់ស័រ បានបញ្ជាក់ថា ការផ្ដល់ផលប្រយោជន៍រួមគ្នានេះ គឺសំដៅដល់ទំនាក់ទំនងពាណិជ្ជកម្ម សេដ្ឋកិច្ច ឬផលប្រយោជន៍ភូមិសាស្ត្រនយោបាយ និងទំនាក់ទំនងនយោបាយរវាងប្រទេសទាំងពីរ។ ដូច្នេះ ជាគោលដៅទៅមុខ កម្ពុជានឹងខិតខំធ្វើយ៉ាងណាទាក់ទាញវិនិយោគិនអាមេរិកឱ្យមកបណ្ដាក់ទុនរកស៊ីនៅកម្ពុជាកាន់តែច្រើនថែមទៀត។

បើតាមមន្ត្រីជាន់ខ្ពស់រាជរដ្ឋាភិបាលរូបនេះ មកទល់ពេលនេះ កម្ពុជា និងសហរដ្ឋអាមេរិក មានទំនាក់ទំនងពាណិជ្ជកម្មល្អដោយកិច្ចសហប្រតិបត្តិការពាណិជ្ជកម្ម និងវិនិយោគរវាងប្រទេសទាំងពីរ នៅក្នុងឆ្នាំ២០២២ កន្លងទៅនេះ មានប្រមាណជាង ១៣,៥ ប៊ីលានដុល្លារ។ លោក ចាត់ទុកទំនាក់ទំនងពាណិជ្ជកម្មរវាងកម្ពុជា-អាមេរិក ក្នុងពេលនេះមានទំហំធំ ដែលនេះហើយជាកត្តាកំណត់អាចជំរុញឱ្យទំនាក់ទំនងរវាងប្រទេសទាំងពីរបោះពួយទៅមុខកាន់តែលឿន និងរីកចម្រើន៕

The post លោក តាន់ ហ្សង់ហ្វ្រង់ស័រ៖ ទំនាក់ទំនងកម្ពុជា-អាមេរិក កាន់តែប្រសើរឡើង បើមានប្រយោជន៍រួម appeared first on Kampuchea Thmey Daily.

សម្តេច បានលើកឡើងថា ការវិនិយោគដោយផ្ទាល់ពីអាមេរិក នៅកម្ពុជា មានកម្រិតទាបនៅឡើយ បើទោះជាអាមេរិក គឺជាប្រភពវិនិយោគដ៏ធំមួយនៅក្នុងសកលលោក។ នៅកម្ពុជាទំហំវិនិយោគផ្ទាល់ពីអាមេរិក បានបន្តកើនពី ២២៥លាន​ដុល្លារ នៅឆ្នាំ ២០១០ កើនឡើង ៨៩៣លានដុល្លារ នៅឆ្នាំ ២០២២។

បើតាមសម្តេច ហ៊ុន ម៉ាណែត រដ្ឋាភិបាលបន្តផ្តល់ការគាំទ្រយ៉ាងមុតមាំ ដល់កាលានុវត្តភាពសម្រាប់បង្កើត ប្រតិបត្តិការ និងការពង្រឹងធុរកិច្ច ព្រមទាំងដោះស្រាយបញ្ហាប្រឈម ទាំងចាស់ និងថ្មី ដើម្បីជំរុញសន្ទុះនៃការអភិវឌ្ឍ ឱ្យបានពេញ​លេញ និងក្លាយជាដៃគូគន្លឹះរបស់រដ្ឋាភិបាល ក្នុងលើកកម្ពស់អភិវឌ្ឍ សម្រាប់ប្រយោជន៍ទៅវិញទៅមក។

ទន្ទឹមនេះ សម្តេចនាយករដ្ឋមន្រ្តីបានរំលឹកថា នាពេលថ្មីៗនេះ សាជីវកម្មពហុជាតិអាមេរិកវិនិយោគនៅកម្ពុជា រួមមាន ក្រុមហ៊ុន Ford កូកាកូឡា និងក្រុមហ៊ុន General Electric ដែលបានឆ្លុះបញ្ចាំងពីកំណើននៃទំហំទីផ្សារកម្ពុជា និងប្រាក់ចំណូលរបស់ប្រជាន។

ជាមួយសុខសន្តិភាពពេញកម្ពុជា រក្សាបានភាពរឹងមាំ សណ្តាប់ធ្នាប់សង្គម សន្តិសុខ សុវត្ថិភាព និងស្ថិរភាពនយោបាយ ដូចអាមេរិកដែរ ដោយកម្ពុជា ជឿជាក់លើសេរីភាព និងបានចាក់ឬសក្នុងលទ្ធិប្រជាធិបតេយ្យ ដូចមានចែងក្នុង​រដ្ឋធម្ម​នុញ្ញ។ រាជរដ្ឋាភិបាល កម្ពុជា មានការតាំងចិត្តខ្ពស់ ក្នុងការគោរពអនុវត្តតាមលទ្ធិប្រជាធិបតេយ្យសេរីពហុបក្ស និងសិទ្ធិមនុស្ស។ នេះជាការគូសបញ្ជាក់បន្ថែមរបស់សម្តេច ហ៊ុន ម៉ាណែត។

សម្តេច បានសង្កត់ធ្ងន់ថា ទោះបីជាមានភាពវឹកវរនៅក្នុងសេដ្ឋកិច្ចសកល កម្ពុជាបានខិតខំប្រឹងប្រែង និងសម្រេចបាន​កំណើនសេដ្ឋកិច្ច ក្នុងរង្វង់ ៥.៦ ក្នុងឆ្នាំ ២០២៣នេះ។ យើងមានឆន្ទៈ ដើម្បីក្លាយជាប្រទេស​មានប្រាក់ចំណូល​ខ្ពស់នៅឆ្នាំ ២០៥០។ រដ្ឋាភិបាលបានដាក់ចេញយុទ្ធសាស្រ្តបញ្ចកោណ ដែលជារបៀបវារៈនៃការអភិវឌ្ឍសង្គម សេដ្ឋកិច្ច ក្នុងរយៈពេល ២៥ឆ្នាំខាងមុខ។ យុទ្ធសាស្រ្តនេះ កំណត់យកអាទិភាពគន្លឹះចំនួន ៥គឺ មនុស្ស ផ្លូវ ទឹក និងបច្ចេកវិទ្យា ដើម្បីឆ្លើយតបទៅនឹងបដិវត្តន៍ឧស្សាហកម្ម៤.០ និងការរីកចម្រើនលើផ្នែកឌីជីថលសម្រាប់ការអភិវឌ្ឍសេដ្ឋកិច្ច សង្គម។ យុទ្ធសាស្រ្តនេះ បានផ្តោតសំខាន់លើការអភិវឌ្ឍមូលធនមនុស្ស និងបច្ចេកវិទ្យាឌីជីថល។

សម្តេច បានគូសបញ្ជាក់ទៀតថា គោលដៅចម្បងនៃយុទ្ធសាស្រ្តនេះ គឺមានពីរផ្នែក គឺមួយផ្នែកដើម្បីរក្សាចលនការ​នៃសុខសន្តិភាព កំណើនសេដ្ឋកិច្ច និងការអភិវឌ្ឍរួម ដើម្បីកសាង និងពង្រឹងមូលដ្ឋានគ្រឹះ សម្រាប់ជំរុញសម្ទុះ​នៃការអភិវឌ្ឍប្រទេសជាតិ៕

The post សម្តេច ហ៊ុន ម៉ាណែត សង្ឃឹមវិនិយោគិនអាមេរិក សិក្សាអំពីសក្តានុពលសេដ្ឋកិច្ច និងឱកាសវិនិយោគនៅកម្ពុជា appeared first on Kampuchea Thmey Daily.