អាមេរិកបញ្ជាក់ពីជំហរគាំទ្រ និងបន្តតាមដានការអនុវត្តបទឈប់បាញ់ដ៏ពេញលេញរវាងកម្ពុជា-ថៃ

សហរដ្ឋអាមេរិក នឹងតាមដានយ៉ាងយកចិត្តទុកដាក់បំផុត ដើម្បីឱ្យការអនុវត្តបទឈប់បាញ់រវាងកម្ពុជា-ថៃ ដំណើរទៅប្រកបដោយភាពជោគជ័យ និងមានប្រសិទ្ធភាព។ ការបញ្ជាក់នេះបានធ្វើឡើងដោយមន្ត្រីជាន់ខ្ពស់សហរដ្ឋអាមេរិកក្នុងជំនួបជាមួយប្រមុខការពារជាតិកម្ពុជា លើទឹកដីប្រទេសម៉ាឡេស៊ី។

ក្នុងឱកាសទៅចូលរួមកិច្ចប្រជុំវិសាមញ្ញគណៈកម្មាធិការព្រំដែនទូទៅ (GBC) ជាមួយភាគីថៃ នៅប្រទេសម៉ាឡេស៊ី លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ និងគណៈប្រតិភូយោធាជាន់ខ្ពស់នៃកងយោធពលខេមរភូមិន្ទ កាលពីថ្ងៃទី៦ ខែសីហា ឆ្នាំ២០២៥ បានឆ្លៀតជួបជាមួយនាយឧត្តមនាវី Samuel Paparo មេបញ្ជាការបញ្ជាការដ្ឋានឥណ្ឌូប៉ាស៊ីហ្វិក សហរដ្ឋអាមេរិក និងលោក Edgard Kagan ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសម៉ាឡេស៊ី។

ថ្លែងក្នុងសន្និសីទសារព័ត៌មាន នៅម៉ោង៧ព្រឹកថ្ងៃទី៧ ខែសីហា ឆ្នាំ២០២៥ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានបញ្ជាក់ថា សហរដ្ឋអាមេរិកបានបញ្ជាក់ពីជំហររបស់ខ្លួនក្នុងការគាំទ្របទឈប់បាញ់ ដែលជាគំនិតផ្តួចផ្តើមរបស់លោកប្រធានាធិបតី ដូណាល់ ត្រាំ និងបានដឹកនាំដោយប្រទេសម៉ាឡេស៊ី ដែលជាប្រធានអាស៊ានប្តូរវេន ក្នុងការអនុវត្តបទឈប់បាញ់។

លោកស្រី ម៉ាលី សុជាតា បានបន្តថា ក្នុងជំនួបទល់មុខជាមួយលោកនាយឧត្តមសេនីយ៍ ទៀ សីហា រដ្ឋមន្ត្រីការពារជាតិកម្ពុជា លោកនាយឧត្តមនាវី Samuel Paparo មេបញ្ជាការឥណ្ឌូប៉ាស៊ីហ្វិក សហរដ្ឋអាមេរិក និងEdgard Kagan ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសម៉ាឡេស៊ី អះអាងថា សហរដ្ឋអាមេរិក នឹងតាមដានយ៉ាងយកចិត្តទុកដាក់បំផុតដើម្បីឱ្យការអនុវត្តនេះដំណើរទៅប្រកបដោយភាពជោគជ័យ និងមានប្រសិទ្ធភាព។

ដើម្បីគាំទ្រដល់ការតាមដានការអនុវត្តបទឈប់បាញ់នេះ បើតាមលោកស្រីអ្នកនាំពាក្យ សហរដ្ឋអាមេរិកនឹងចូលរួមគាំទ្រផ្នែកភស្តុភា និងបច្ចេកទេសសំខាន់ៗ ដើម្បីបង្កើតក្រុមការងារអ្នកសង្កេតការណ៍អាស៊ាន (AMT) ឱ្យបានលឿនបំផុត។ លើសពីនេះទៅទៀត សហរដ្ឋអាមេរិក ក៏បានបង្ហាញពីអ្វីដែលជាការអនុវត្តបន្តរបស់ខ្លួន រួមមាន៖ ការធ្វើផែនការយោធា គ្រឿងបរិក្ខារ ប្រព័ន្ធបញ្ជូនកម្លាំង ប្រព័ន្ធឃ្លាំមើលតាមអាកាស និងសម្ភារបច្ចេកទេសទំនើបជាច្រើនទៀត។

ការរួមចំណែករបស់សហរដ្ឋអាមេរិកទាំងនេះ ត្រូវបានអ្នកនាំពាក្យក្រសួងការពារជាតិកម្ពុជា បានថ្លែងចាត់ទុកថា គឺជាការបង្ហាញពីការតាំងចិត្តខ្ពស់ និងបានត្រៀមខ្លួនចូលរួមកសាងឱ្យមានសន្តិភាពកើតឡើងពិតប្រាកដឡើងវិញ៕  

ដោយ៖ ធឿន វ៉ាន់សុង