កាត់ទោស Archives - Kampuchea Thmey Daily

អតីតរដ្ឋមន្រ្តីយុត្តិធម៌ចិនត្រូវកាត់ទោសឲ្យជាប់គុកមួយជីវិត ពីបទទទួលសំណូក

Minea Neu — Tue, 03 Feb 2026 03:51:59 +0000

តុលាការប្រទេសចិនបានកាត់ទោសអតីតរដ្ឋមន្ត្រីយុត្តិធម៌ម្នាក់ឱ្យជាប់ពន្ធនាគារអស់មួយជីវិត កាលថ្ងៃចន្ទទី២ខែកុម្ភៈ បន្ទាប់ពីរកឃើញថា អតីតរដ្ឋមន្ត្រីរូបនោះទទួលសំណូកសរុបជិត ២០លានដុល្លារ អស់រយៈពេលលើសមួយទសវត្សរ៍។

លោក Tang Yijun ។ State Council Information Office website

យោងតាមភ្នាក់ងារសាព័ត៌មានបារាំង AFP, លោក Tang Yijun អាយុ ៦៤ឆ្នាំ គឺជារដ្ឋមន្ត្រីយុត្តិធម៌របស់ប្រទេសចិន ពីឆ្នាំ ២០២០ ដល់ ២០២៣ ហើយបានកាន់មុខតំណែងផ្សេងទៀត អំឡុងពេលលោកនៅមានដំណែង រួមទាំងអភិបាល ខេត្ត Liaoning និងជាប្រធានបក្សកុម្មុយនីស្តចិន (CCP) ក្នុងទីក្រុង Ningbo ។

គួរឱ្យដឹងថា ប្រធានាធិបតីចិន លោក ស៊ី ជីនពីង (Xi Jinping) បានបោសសំអាតប្រឆាំងអំពើពុករលួយយ៉ាងខ្លាំងមិនធ្លាប់មាន ចាប់តាំងពីលោកឡើងកាន់អំណាចក្នុងឆ្នាំ ២០១២ ។ ការបង្រ្កាបនេះ អ្នករិះគន់លើកឡើងថាអនុញ្ញាតឱ្យលោកលុបបំបាត់គូប្រជែងនយោបាយ ដែលមានសក្តានុពល។

លើសពីនេះ តុលាការប្រជាជនកម្រិតមធ្យម Xiamen នៅភាគខាងកើតប្រទេសចិនបានលើកឡើងក្នុងសេចក្តីថ្លែងការណ៍មួយថា៖ « លោក Tang បានបំពាននូវគុណសម្បត្តិ ទាក់ទងនឹងមុខតំណែងដែលគាត់បានកាន់កាប់ជាបន្តបន្ទាប់ ដើម្បីទទួលបានផលប្រយោជន៍សម្រាប់ខ្លួនឯងនិងអ្នកផ្សេងទៀត ចន្លោះឆ្នាំ ២០០៦ និង ២០២២ ។

តុលាការបានបន្តទៀតថា ជាថ្នូរនឹងការបង់ប្រាក់ អតីតមន្ត្រីរូបនេះបានជួយបុគ្គល និងក្រុមហ៊ុនផ្សេងទៀត ផ្តល់ប្រាក់ជាសាធារណៈ ដើម្បីធានាប្រាក់កម្ចីធនាគារ ការទិញដី និងបញ្ហាផ្សេងទៀត។

លោក Tang បានទទួលប្រាក់សរុបចំនួន ១៩.៧ លានដុល្លារអាមេរិក។

សេចក្តីថ្លែងការណ៍បន្ថែមទៀតថា៖ « ចំនួនប្រាក់សំណូកខ្ពស់ ជាពិសេសបណ្តាលឱ្យខូចខាតយ៉ាងធ្ងន់ធ្ងរដល់ផលប្រយោជន៍របស់រដ្ឋ និងប្រជាជន»។

មិនតែប៉ុណ្ណោះ អតីតរដ្ឋមន្ត្រីក្រសួងយុត្តិធម៌ចិនម្នាក់ទៀត គឺលោក Fu Zhenghua ត្រូវបានកាត់ទោសពីបទពុករលួយក្នុងឆ្នាំ ២០២២ និងបានកាត់ទោសប្រហារជីវិត តែបានបន្ធូរបន្ថយរយៈពេល ២ឆ្នាំ។ តែការកាត់ទោសនេះ ត្រូវបានកាត់ឱ្យជាប់ពន្ធនាគារអស់មួយជីវិតដូចគ្នា៕

ប្រែសម្រួល៖ ណឺ មិនា

The post អតីតរដ្ឋមន្រ្តីយុត្តិធម៌ចិនត្រូវកាត់ទោសឲ្យជាប់គុកមួយជីវិត ពីបទទទួលសំណូក appeared first on Kampuchea Thmey Daily.

កាត់ទោស លោក នី ណាក់ ជាលើកទី ២

អ៊ិន ពិសី — Mon, 29 Jul 2024 08:18:35 +0000

កាលពីព្រឹកថ្ងៃទី ២៩ ខែកក្កដា ឆ្នាំ ២០២៤ នេះ ចៅក្រមសាលាដំបូងរាជធានីភ្នំពេញ បានបើកសវនាការកាត់ទោស លោក នី ណាក់ ពាក់ព័ន្ធនឹងបទល្មើសបរិហារកេរ្តិ៍ជាសាធារណៈ និងញុះញង់ឲ្យមានការរើសអើង។

ជនជាប់ចោទត្រូវបានអនុរក្សពន្ធនាគារផ្ទេរពីពន្ធនាគារខេត្តត្បូងឃុំ មកកាន់មណ្ឌលកែប្រែ ម ១ និងមកកាន់សាលាដំបូងរាជធានីភ្នំពេញ នៅព្រឹកថ្ងៃនេះ ដើម្បីចូលរួមឆ្លើយដោះសាសម្រាលបន្ទុកក្នុងសវនាការតាមនីតិវិធីនៅចំពោះមុខចៅក្រមជំនុំជម្រះដែលដឹកនាំដោយលោក ទិតសុទ្ធី បូរ៉ាឆាត ជាចៅក្រម លោកព្រះរាជអាជ្ញារង សេង ហៀង ជាតំណាងអយ្យការ និងចំពោះមុខមេធាវីគូក្ដី។

ដើមបណ្ដឹងក្នុងរឿងក្ដីនេះគឺមេធាវីតំណាងរបស់ លោក ហេង សួ រដ្ឋមន្ត្រីក្រសួងការងារ ដោយភ្ជាប់អង្គហេតុ នៃការផ្សាយរបស់ លោក នី ណាក់ តាមគណនីហ្វេសប៊ុកឈ្មោះ «Iman KH» ដែលចោទប្រកាន់ថា លោក ហេង សួ មានដីទំហំ ៩១ ហិតា នៅខេត្តកំពត។

ទោះបីយ៉ាងណា ក្រោយបញ្ចប់ការសួរដេញដោល តុលាការបានសម្រេចលើកយករឿងក្ដីនេះទៅប្រកាសសាលក្រមនៅថ្ងៃទី ២២ ខែសីហា ឆ្នាំ ២០២៤ ខាងមុខ។

ចៅក្រមស៊ើបសួរសាលាដំបូងរាជធានីភ្នំពេញ លោក ញឹម ពិសាល កាលពីថ្ងៃទី ៥ ខែមករា ឆ្នាំ ២០២៤ បានចេញដីកាបង្គាប់ឲ្យឃុំខ្លួន លោក នី ណាក់ ភេទប្រុស កើតឆ្នាំ ១៩៧៩ ជនជាតិខ្មែរ សញ្ជាតិខ្មែរ មុខរបរអាជីវករ មានកន្លែងកំណើតភូមិរកា ឃុំរកា ស្រុកសង្កែ ខេត្តបាត់ដំបង និង ទីលំនៅមុនពេលឃាត់ខ្លួនស្នាក់នៅផ្ទះលេខ ៤៧ ផ្លូវបេតុង ភូមិគោកឃ្លាង ខណ្ឌសែនសុខ រាជធានី ភ្នំពេញ។

នៅក្នុងដីកាបង្គាប់ឲ្យឃុំខ្លួនបញ្ជាក់ថា ៖ «ជននេះត្រូវបានដាក់ឲ្យស្ថិតនៅក្រោមការពិនិត្យ ពីបទ«ការមិនរាងចាល ក្នុងបទមជ្ឈិម បន្ទាប់ពីការផ្ដន្ទាទោសបទមជ្ឈិម បរិហារកេរ្តិ៍ជាសាធារណៈ និងញុះញង់ ឲ្យមានការរើសអើង ប្រព្រឹត្តនៅរាជធានីភ្នំពេញ កាលពីថ្ងៃទី ១២ ថ្ងៃទី ១៧ ខែធ្នូ ឆ្នាំ ២០២៣ បទល្មើសព្រហ្មទណ្ឌ ដែលមានចែងឲ្យផ្ដន្ទាទោសតាមបញ្ញត្តិ មាត្រា ៨៨ មាត្រា ៣០៧ មាត្រា ៤៩៥ និងមាត្រា ៤៩៦ នៃក្រមព្រហ្មទណ្ឌ»។

លោក នី ណាក់ ត្រូវបានសមត្ថកិច្ចឃាត់ខ្លួន និងបញ្ជូនទៅតុលាការភ្លាមៗ កាលពីព្រឹកថ្ងៃទី ៥ ខែមករា ឆ្នាំ ២០២៤។

សូមរំឭកថា លោក នី ណាក់ ធ្លាប់ជាប់ពន្ធនាគារម្តងរួចមកហើយ កាលពីឆ្នាំ ២០២០ ក្រោមបទចោទ «ញុះញង់ឲ្យប្រព្រឹត្តបទឧក្រិដ្ឋ» ទាក់ទិននឹងការប្រកាសពីផែនការទិញម៉ាស់មកពាក់ឲ្យសត្វមាន់ក្នុងអំឡុងពេល នៃការឆ្លងរាតត្បាតជំងឺកូវីដ-១៩ ដោយតុលាការបានផ្ដន្ទាទោសរយៈពេល ១៨ ខែ ហើយលោកបានចេញពីពន្ធនាគារវិញ កាលពីថ្ងៃទី ១០ ខែមិថុនា ឆ្នាំ ២០២១៕

អត្ថបទ ៖ មករា

The post កាត់ទោស លោក នី ណាក់ ជាលើកទី ២ appeared first on Kampuchea Thmey Daily.

កាត់ទោសសំណុំរឿងស្រីស្អាត ម៉ន សូលីដែត ប្រើមន្តអាគមយកមាសក្លែងក្លាយ ឆបោកដូរប្រាក់ជាង៣០ ម៉ឺនដុល្លារ

Kang Tola — Mon, 15 Jan 2024 16:13:28 +0000

ភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី១៥ ខែមករា ឆ្នាំ២០២៤ បានលើកយកសំណុំរឿង ឆបោក មួយករណី មកបើកសវនាការជាសាធារណៈ ដើម្បីផ្តន្ទាទោសលើជន ជាប់ចោទ ដែលសវនាការនោះដឹកនាំដោយលោក ហុក ពៅ ចៅក្រមជំនុំជម្រះ និងលោក ស៊ីន រក្សា ព្រះរាជអាជ្ញារង ជាតំណាងអយ្យការអមសាលាដំបូងរាជធានីភ្នំពេញ។ នៅចំពោះ មុខអង្គសវនាការមានជនជាប់ចោទឈ្មោះ ម៉ន សូលីដែត ភេទស្រី អាយុ៣០ ឆ្នាំ មុខរបរ ជាអាជីវករ អមមេធាវីការពារក្តី រីឯដើមបណ្តឹងរដ្ឋប្បវេណីមានឈ្មោះ វ៉ា សូលីដា ភេទស្រី អាយុ៣១ ឆ្នាំ មុខរបរ អ្នករកស៊ី (ដើមបណ្តឹង និងជនជាប់ចោទត្រូវជាបងថ្លៃ និងប្អូនថ្លៃ)។ សវនាការបានសាកសួរដេញដោលទៅលើជនជាប់ ចោទ និងដើមបណ្តឹងរដ្ឋប្បវេណី ដែលមានមេធាវីការពារក្តីរៀងៗខ្លួនរហូតដល់ទីបញ្ចប់ ទើបចៅក្រមជំនុំជម្រះបានលើកពេលប្រកាសសាលក្រម ផ្តន្ទាទោសលើជនជាប់ទៅថ្ងៃទី២៥ ខែមករា ឆ្នាំ២០២៤ ខាងមុខនេះ។

ប៉ុន្តែអ្វីដែលសាធារណៈមានការចាប់អារម្មណ៍នៅក្នុងអង្គសវនាការនោះ គេពិនិត្យឃើញជនជាប់ចោទពាក់ព័ន្ធករណី ឆបោក ដែលមានទំហំប្រាក់ជិតកន្លះលានដុល្លារអាមេរិក បែរជាបង្ហូរទឹកភ្នែកយំឱ្យគេអាណិតទៅ ព្រមទាំងបានសំណូមពរឱ្យតុលាការដោះរូបគេឱ្យនៅក្រៅឃុំ ដើម្បីមានឱកាសរកប្រាក់សងដើមបណ្តឹងវិញ។ តែការសំណូមពរនេះ ត្រូវបានជនរងគ្រោះប្រឆាំងដាច់អហង្ការមិនយល់ស្របឡើយ ដោយយោងទៅលើហេតុផលច្រើនយ៉ាង ដែលជនជាប់ចោទមានល្បិចគេចវេសតាំង ពីមិនទាន់ត្រូវបានចាប់ខ្លួន។

ទាក់ទិននឹងអង្គហេតុក្នុងសំណុំរឿង ឆបោក ដែលតុលាការបានលើកយកមកបើកសវនាការពេលនេះត្រូវបានគេដឹងថា ជនរងគ្រោះឈ្មោះ វ៉ា សុលីដា និងជនជាប់ ចោទឈ្មោះ ម៉ន សូលីដែត ត្រូវជាបងថ្លៃនិងប្អូនថ្លៃតាំងពីឆ្នាំ២០ ២០ បន្ទាប់ពីឈ្មោះ ម៉ន សូលីដែត បានរៀបការជាមួយប្អូនប្រុសដើមបណ្តឹងមក ពួកគេបានស្នាក់នៅផ្ទះលេខ២៤បេ ផ្លូវលេខ៩៩ ភូមិឬស្សី១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

ក្នុងអំឡុងពេលស្នាក់នៅជាមួយគ្នា ឈ្មោះ ម៉ន សូលីដែត តែងតែនិយាយពីរឿងអបិយជំនឿប្រាប់បងថ្លៃ ថា គាត់(ដើមបណ្តឹង)ជាមនុស្សអភ័ព្វគូ និងរកស៊ីមិនសមប្រកប បើចង់កែប្រែវាសនា គេ(ជនជាប់ចោទ) ស្គាល់លោកសង្ឃមួយអង្គឈ្មោះ ថុង រី (រស់ដោយធម៌) ដែលល្បី និងពូកែ គង់នៅវត្តព្រៃម្លូរ ខេត្តតាកែវ។ មិនតែប៉ុណ្ណោះឈ្មោះ ម៉ន សូលីដែត តែងតែនិយាយប្រើល្បិចអូសទាញជនរងគ្រោះឲ្យជឿជាក់លើខ្លួន ដោយប្រៀបធៀបទៅលើបុគ្គលដែលរកស៊ីដោយជោគជ័យមួយចំនួននៅក្នុងស្រុកខ្មែរ គឺពួកគាត់សុទ្ធតែបានទៅរកលោកសង្ឃអង្គនោះ ឲ្យជួយធ្វើមន្តអាគមអូមអាម ទើបរកស៊ីមានបានរហូតដល់សព្វថ្ងៃ។

ដោយមានការជឿលើអបិយជំនឿ និងទុកចិត្តទាំងស្រុងលើឈ្មោះ ម៉ន សូលីដែត ជាប្អូនថ្លៃ ជនរងគ្រោះបានយល់ព្រមឱ្យជួយទាក់ទងទៅលោកសង្ឃអង្គនោះ ដើម្បីឱ្យជួយធ្វើកិច្ចកែប្រែវាសនាឱ្យគាត់ ដើម្បីឱ្យរកស៊ីកាត់តែលូតលាស់មានបានទៅមុខទៀត។ ឈ្មោះ ម៉ន សូលីដែត បានប្រាប់ជនរងគ្រោះទៀតថា រាល់ការទាក់ទងទៅជាមួយលោកសង្ឃ គឺរូបគេជាអ្នកទាក់ទងផ្ទាល់ ដោយហាមមិនឱ្យជនរងគ្រោះទាក់ទងទេ ពោលគឺការងារចាត់ចែងអ្វីៗ ដែលទាក់ទងទៅជាមួយលោកសង្ឃនោះ ឈ្មោះ ម៉ន សូលីដែត អនុវត្តផ្ទាល់ ។

បន្ទាប់មកទៀត ម៉ន សូលីដែត បានប្រាប់ជនរងគ្រោះឱ្យវេលុយផ្តល់តាមអាខោន ABA ឈ្មោះ MORN SOLIDETH ជាបន្តបន្ទាប់សរុបទឹកប្រាក់ ២០៧.៥៧៩ ដុល្លារអាមេរិក ដើម្បីយកទៅតម្កល់កំណល់”ជើងព្រះ” មាស ចំនួនពីរដុំទម្ងន់២០តំម្លឹង ស្មើទឹកប្រាក់ចំនួន ៤៧.០០០ ដុល្លារអាមេរិក សម្រាប់តម្កល់នៅក្នុងបន្ទប់សមាធិ និងតម្កល់លុយសុទ្ធនៅក្រោមខ្នើយរបស់ខ្លួន(ម៉ន សូលីដែត)សម្រាប់ចម្លងដៃ(ចម្លងកិច្ចអបិយជំនឿ)លើទឹកប្រាក់ចំនួន ៣៤.៦០០ ដុល្លារអាមេរិក។

តាមពាក្យបណ្តឹងបានបញ្ជាក់ទៀតថា ក្រោយមកទៀតឈ្មោះ ម៉ន សូលីដែត តែងតែល្បួងលួងលោមជនរងគ្រោះឱ្យផ្តល់លុយបន្ថែម ប៉ុន្តែជនរងគ្រោះមានការសង្ស័យ និងអស់ជំនឿព្រោះនៅពេលដាក់លុយឱ្យម្តងៗ មិនដែលឃើញបានផលប្រយោជន៍មកវិញទេ ហើយជនរងគ្រោះក៏បានឈប់បន្តធ្វើកិច្ចនោះទៀត ហើយនៅថ្ងៃទី២៧ ខែមករា ឆ្នាំ២០២៣ ជនរងគ្រោះបានសុំដកលុយ និងមាសយកមកវិញ ពេលនោះឈ្មោះ ម៉ន សូលីដែត បានទៅកាយយកមាសដែលកប់ក្នុងបន្ទប់សមាធិន ស្រាប់តែឃើញសុទ្ធតែមាសក្លែងក្លាយយកមកប្រគល់ឲ្យជនរងគ្រោះ ឃើញដូច្នោះជនរងគ្រោះបានឆោឡោ ទើបឈ្មោះ ម៉ន សូលីដែត និយាយថារូបគេជាអ្នកទទួលខុសត្រូវ។ លុះព្រឹកថ្ងៃទី២៨ ខែកក្កដា ឆ្នាំ២០២៣ ជនរងគ្រោះបានទៅដាក់ពាក្យបណ្តឹងនៅកងរាជអាវុធហត្ថរាជធានីភ្នំពេញ ដើម្បីឲ្យជួយអន្តរាគមន៍ឆែកឆេរលើឈ្មោះ ម៉ន សូលីដែត ស្រាប់តែឃើញលុយដុល្លារ និងមាសក្លែងក្លាយទាំងអស់ ទើបសមត្ថកិច្ចនាំយកជនសង្ស័យទៅធ្វើការសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី ហើយជនសង្ស័យត្រូវតុលាការសម្រេចឃុំខ្លួនដាក់ពន្ធនាគារព្រៃសចាប់ពីពេលនោះ៕

ដោយ ៖ មករា

The post កាត់ទោសសំណុំរឿងស្រីស្អាត ម៉ន សូលីដែត ប្រើមន្តអាគមយកមាសក្លែងក្លាយ ឆបោកដូរប្រាក់ជាង៣០ ម៉ឺនដុល្លារ appeared first on Kampuchea Thmey Daily.

កាត់ទោសអតីតផ្កាយពីរ ម្នាក់ ស៊ីដាច់ប្រាក់វិនិយោគជិត ៧ លានដុល្លារ

អ៊ិន ពិសី — Wed, 26 Jul 2023 09:38:35 +0000

សំណុំរឿងអតីតមេទាហានផ្កាយពីរ ឈ្មោះ ហៃ ច័ន្ទភារិទ្ធ ស៊ីដាច់ប្រាក់ទុនវិនិយោគពីបរទេសជិត ៧ លានដុល្លារ ក្រោមរូបភាពទិញលក់ដីខ្យល់នៅឧទ្យានមុនីវង្សបូកគោ ត្រូវបានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លើកយកមកកាត់ទោស កាលពីព្រឹកថ្ងៃទី ២៦ ខែកក្កដា ឆ្នាំ ២០២៣ នេះ ចំពោះមុខជនជាប់ចោទ។

លោកស្រី ទិត្យ ដាលីន ប្រធានក្រុមប្រឹក្សាជំនុំជម្រះ បានលើកឡើងថា តុលាការបានចោទប្រកាន់លោក ហៃ ច័ន្ធភារិទ្ធ និងឈ្មោះ គៀត សូនី ពី «បទឆបោក បទរំលោភលើទំនុកចិត្ត បទសម្អាតប្រាក់ និងបទប្រើប្រាស់លិខិតក្លែង» ប្រព្រឹត្តនៅរាជធានីភ្នំពេញ កាលពីថ្ងៃទី ២៧ ខែកុម្ភៈ ឆ្នាំ ២០១៩ បទល្មើសព្រហ្មទណ្ឌដែលមានចែងឲ្យផ្ដន្ទាទោសតាមបញ្ញត្តិមាត្រា ៦២៩ និងមាត្រា ៦៣០ នៃក្រមព្រហ្មទណ្ឌ។ បទល្មើសទាំងនេះ នឹងត្រូវបញ្ចូលក្នុងសំណុំរឿងតែមួយ ដើម្បីជំនុំជម្រះតាមច្បាប់។

ប្រឈមមុខការចោទប្រកាន់នេះ ជនជាប់ចោទ បានសារភាពថា កាលពីអំឡុងឆ្នាំ ២០១៨ ខ្លួនបានស្គាល់ និងរាប់អានជនជាតិម៉ាឡេស៊ីម្នាក់ មានប្រពន្ធខ្មែរ បានពឹងពាក់ឲ្យខ្លួនរកទិញដីនៅខេត្តកំពត។ បន្ទាប់មក ខ្លួនបានជួបឈ្មោះ គៀត សូនី ដែលជាអ្នកប្រមូលទិញដី ដំបូងឡើយ ទិញបាន ១៦២ ហិកតា នៅភូមិព្រែកត្នោត ឃុំព្រែកត្នោត ស្រុកទឹកឈូ ខេត្តកំពត តាមរយៈកិច្ចសន្យាទិញលក់ជាមួយខ្លួន ហៃ ច័ន្ធភារិទ្ធ និង ឈ្មោះ គៀត សូនី ក្នុងតម្លៃ ១,២៥ លានដុល្លារ។ ក្រោយមក ជនជាតិម៉ាឡេស៊ី នោះ ស្រលាញ់ដីនៅម្ដុំនោះទៀត ខ្លួនក៏បានឲ្យឈ្មោះ គៀត សូនី ប្រមូលទិញបន្ថែមបាន ៤១ ហិកតាទៀត ដោយសរុបទាំងអស់ ខ្លួនបានទទួលប្រាក់ជាបន្តបន្ទាប់ពីក្រុមហ៊ុនចំនួន ៦,៧ លានដុល្លារ រួមទាំងប្រាក់រត់ការធ្វើប្លង់ដីផង ព្រោះដីដែលប្រមូលទិញ គឺមានលិខិតទិញលក់ត្រឹមមេភូមិប៉ុណ្ណោះ ដោយសារដីនោះជាប់ពាក់ព័ន្ធនឹងដីគម្របឧទ្យានមុនីវង្សបូកគោ លុះក្រោយមកក្រុមហ៊ុនវីនហ៊ីលស៊ីធី ក៏បានដាក់ពាក្យប្ដឹងខ្លួនតែម្ដង នៅពេលដែលក្រសួងបរិស្ថានធ្វើលិខិតបញ្ជាក់ថា ជាដីរដ្ឋ។

លោក ហៃ ច័ន្ធភារិទ្ធ បានសារភាពទៀតថា ក្នុងទំហំដី ២០៣ ហិកតា ដែលខ្លួនប្រមូលទិញឲ្យក្រុមហ៊ុននោះ គឺ មានតែ ២ ហិកតាប៉ុណ្ណោះ មិនស្ថិតក្នុងដីរដ្ឋឧទ្យានជាតិមុនីវង្ស។

ជាមួយគ្នានោះ ដោយសារជនជាប់ចោទបានសារភាព តំណាងអយ្យការ លោក ទី មុនិន្ទ បានតម្កល់ទុកបទចោទប្រកាន់ទាំងអស់លើ លោក ហៃ ច័ន្ទភារិទ្ធ និង ឈ្មោះ គៀត សូនី ហើយស្នើឲ្យតុលាការសម្រេចតាមច្បាប់។

ចំណែកមេធាវីតំណាងក្រុមហ៊ុន បានទាមទារសំណងខូចខាតចំនួន ៦,៧ លានដុល្លារ និងប្រាក់ជំងឺចិត្តចំនួន ២ លានដុល្លារ ពីជនជាប់ចោទ ហៃ ច័ន្ទភារិទ្ធ និងសុំឲ្យតុលាការផ្ដន្ទាទោសជនជាប់ចោទតាមច្បាប់។

លោកស្រី ទិត្យ ដាលីន ជាប្រធានក្រុមប្រឹក្សាជំនុំជម្រះ បានកំណត់យកថ្ងៃទី ៣១ ខែកក្កដា ឆ្នាំ ២០២៣ ខាងមុខ ដើម្បីប្រកាសសាលក្រម៕

អត្ថបទ ៖ មករា

The post កាត់ទោសអតីតផ្កាយពីរ ម្នាក់ ស៊ីដាច់ប្រាក់វិនិយោគជិត ៧ លានដុល្លារ appeared first on Kampuchea Thmey Daily.

កាត់ទោសអតីតប្ដីបាញ់សម្លាប់ប្រពន្ធ ថ្ងៃ ២៧ មេសា ប្រកាសសាលក្រម

អ៊ិន ពិសី — Wed, 29 Mar 2023 07:56:28 +0000

សំណុំរឿងឃាតកម្មគិតទុកមុនដែលបុរសអតីតប្ដីបានបាញ់សម្លាប់អតីតប្រពន្ធនៅសង្កាត់ចាក់អង្រែក្រោម ត្រូវបានចៅក្រមសាលាដំបូងរាជធានីភ្នំពេញលើកយកមកបើកសវនាការកាត់ទោសកាលពីព្រឹកថ្ងៃទី ២៩ ខែមីនា ឆ្នាំ ២០២៣ នេះ។

ជនដៃដល់ដែលត្រូវកាត់ទោសឈ្មោះ ជា អូន ភេទប្រុស អាយុ ២៥ ឆ្នាំ គ្មានមុខរបរពិតប្រាកដ។ ចំណែកជនរងគ្រោះឈ្មោះ នូ សុខនីតា ហៅ ស៊ីវ អេង ភេទស្រី អាយុ ២២ ឆ្នាំ។ តុលាការបានចោទប្រកាន់ឈ្មោះ ជា អូន ពីបទ ឃាតកម្មគិតទុកមុន និងប្រើប្រាស់អាវុធខុសច្បាប់។

ក្នុងសវនាការជនជាប់ចោទបានរៀបរាប់ថា កាលពីថ្ងៃទី ១០ ខែឧសភា ឆ្នាំ ២០១៨ ខ្លួនបានរៀបការជាមួយប្រពន្ធឈ្មោះ នូ សុខនីតា។ លុះមកដល់អំឡុងខែមីនា ឆ្នាំ ២០២២ ពួកគេទាំងពីរមានទំនាស់ឈ្លោះប្រកែកគ្នា ដោយខ្លួនបានដឹងថា ប្រពន្ធឈ្មោះ នូ សុខនីតា មានទំនាក់ទំនងស្នេហាជាមួយបុរសជនជាតិចិនម្នាក់(មិនស្គាល់ឈ្មោះ)។ ពេលនោះពួកគេក៏បាននាំគ្នាមកលែងលះនៅសាលាសង្កាត់ចាក់អង្រែក្រោម។ ក្រោយពីលែងលះគ្នាមួយរយៈ ខ្លួនបានមកសុំប្រពន្ធយកគ្នាជាប្ដីប្រពន្ធវិញ តែនាងមិនព្រម ទើបខ្លួនមានកំហឹង រួចបានទំនាក់ទំនងទិញអាវុធខ្លីមួយដើមម៉ាក K៥៩(រលប់លេខ) មានបង់ចំនួន ០១ និងគ្រាប់ចំនួន ០៦ គ្រាប់ ពីបុរសម្នាក់មិនស្គាល់អត្តសញ្ញាណតាមរយៈហ្វេសប៊ុកផេក (មិនចាំឈ្មោះក្រោយពេលទិញរួចបានលុបឆាតនោះចោលទាំងអស់) ក្នុងតម្លៃ ៦៥០ ដុល្លារអាមេរិក (ដោយគេផ្ញើអាវុធនោះតាមរថយន្តវីរៈប៊ុនថាំ ខណ្ឌសែនសុខ) នៅថ្ងៃទី ០៦ ខែមិថុនា ឆ្នាំ ២០២២ ក្នុងគោលបំណងយកមកគំរាមប្រពន្ធឲ្យព្រមទទួលយកខ្លួនជាប្ដីវិញ បើមិនព្រមរូបគេនឹងបាញ់សម្លាប់ចោលតែម្ដង រួចបាញ់សម្លាប់ខ្លួនឯងតាមក្រោយ។

លុះមកដល់ថ្ងៃទី ១០ ខែមិថុនា ឆ្នាំ ២០២២ វេលាម៉ោង ១៤ និង ១៥ នាទី ខ្លួនបានជិះម៉ូតូមួយគ្រឿងម៉ាក សេ ១២៥ ពណ៌ខ្មៅ ស៊េរីឆ្នាំ ២០១៥ ពាក់ស្លាកលេខ កណ្ដាល ១D-៥០១១ ដោយយកអាវុធខ្លីមួយដើមម៉ាក K៥៩ ដាក់តាមខ្លួនមកជួបឈ្មោះ នូ សុខនីតា នៅចំណុចក្នុងបន្ទប់ ផ្ទះលេខ ១៤០៣A ផ្លូវជាតិលេខ ២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ (កន្លែងកើតហេតុ) ពេលមកដល់ខ្លួនបាននាំជនរងគ្រោះចូលទៅក្នុងបន្ទប់និយាយសុំត្រូវគ្នាវិញ(ប្តីប្រពន្ធ) តែជនរងគ្រោះមិនយល់ព្រមទេ ខណៈនោះ ខ្លួនក៏បានដកអាវុធខ្លីមួយដើមម៉ាក K៥៩ ពីចង្កេះមកអាមេបញ្ចូលគ្រាប់ រួចបាញ់គំរាមជនរងគ្រោះចំនួន ០១ គ្រាប់ ត្រូវជញ្ជាំងបន្ទប់ ហើយបាញ់មួយគ្រាប់ទៀតត្រូវជនរងគ្រោះចំពីលើក្បាលបណ្ដាលឲ្យស្លាប់ភ្លាមៗតែម្ដង បន្ទាប់មកខ្លួនបាញ់ខ្លួនឯងចំនួន ០៣ គ្រាប់ទៀតតែមិនផ្ទុះ ទើបក្រុមគ្រួសារទាំងសងខាង (ទាំងជនរងគ្រោះ និងជនសង្ស័យ) និងកម្លាំងអធិការដ្ឋាននគរបាលខណ្ឌមានជ័យ ចូលទៅអន្តរាគមន៍ឃាត់ខ្លួនតែម្ដង។

ក្រោយពីស្ដាប់ការរៀបរាប់យ៉ាងក្បោះក្បាយរបស់ជនដៃដល់រួចមក លោក វង្ស សាវ៉ាត តំណាងអយ្យការ បានធ្វើសេចក្ដីសន្និដ្ឋានតម្កល់ទុកបទចោទប្រកាន់លើឈ្មោះ ជា អូន ដដែល ហើយសំណូមពរក្រុមប្រឹក្សាតុលាការផ្ដន្ទាទោសជនជាប់ចោទតាមច្បាប់។

លោក ម៉ម ច័ន្ទវណ្ណៈ ជាប្រធានក្រុមប្រឹក្សាជំនុំជម្រះ បានកំណត់យកថ្ងៃទី ២៧ ខែមេសា ឆ្នាំ ២០២៣ ដើម្បីប្រកាសសាលក្រម៕

អត្ថបទ ៖ មករា

The post កាត់ទោសអតីតប្ដីបាញ់សម្លាប់ប្រពន្ធ ថ្ងៃ ២៧ មេសា ប្រកាសសាលក្រម appeared first on Kampuchea Thmey Daily.

កាត់ទោសបុរសជនជាតិចិនតៃវ៉ាន់ ៤ នាក់ លួចផលិតគ្រឿងញៀនច្រើនតោន នៅកំពង់ស្ពឺ

អ៊ិន ពិសី — Thu, 09 Mar 2023 08:50:56 +0000

បុរសជនជាតិចិនតៃវ៉ាន់ ៤ នាក់ ដែលទទួលខុសត្រូវខ្ពស់បំផុតក្នុងរោងចក្រកែច្នៃផលិតគ្រឿងញៀនដ៏សម្បើមមួយនៅខេត្តកំពង់ស្ពឺ ត្រូវបានចៅក្រមសាលាដំបូងរាជធានីភ្នំពេញលើកយកមកកាត់ទោសនាថ្ងៃទី ០៩ ខែមីនា ឆ្នាំ ២០២៣ នេះ។

អង្គសវនាការដែលដឹកនាំដោយលោក សុង ប៊ុណ្ណារិទ្ធ ជាប្រធានក្រុមប្រឹក្សាជំនុំជម្រះ និងលោក ទី មុនិន្ទ ជាតំណាងអយ្យការ បានផ្ដើមចោទប្រកាន់បុរសជនជាតិចិនទាំង ៤ នាក់ ពីបទ ៖ កែច្នៃ ផលិត និងដឹកជញ្ជូនដោយខុសច្បាប់នូវសារធាតុញៀន ប្រព្រឹត្តនៅខេត្តកំពង់ស្ពឺ និងរាជធានីភ្នំពេញ កាលពីថ្ងៃទី ១៩ ខែឧសភា ឆ្នាំ ២០២២ តាមមាត្រា ៣៩ មាត្រា ៤០ នៃច្បាប់ ស្ដីពីការត្រួតពិនិត្យគ្រឿងញៀន។

ជនត្រូវចោទទាំង ៤ នាក់ ដែលតុលាការកាត់ទោសនេះមានឈ្មោះ ៖

១/ TIEN CHAN FU ភេទប្រុស អាយុ ២៨ ឆ្នាំ ជាមេការធំ។

២/ ឈ្មោះ KHOU PO WEN ភេទប្រុស អាយុ ២៨ ឆ្នាំ (អ្នកបច្ចេកទេស)

៣/ ឈ្មោះ TENG KUO CHING ភេទប្រុស អាយុ ៣៩ ឆ្នាំ (អ្នកបច្ចេកទេស)

៤/ ឈ្មោះ LIN YI CHHENG ភេទប្រុស អាយុ ៣១ ឆ្នាំ (អ្នកបច្ចេកទេស)។

នៅក្នុងសវនាការពួកគេទាំង ៤ នាក់ បានឆ្លើយសារភាពត្រឹមតែមកស៊ីឈ្នួលគេលាយសារធាតុគីមីប៉ុណ្ណោះ ហើយបដិសេធថា មិនមែនជាម្ចាស់គ្រឿងញៀនទាំងនោះទេ។

យ៉ាងហោចណាស់មានគ្រឿងញៀនដែលផលិតរួចទម្ងន់ ១ ៤០០ គីឡូក្រាម និងសារធាតុគីមីផ្សំ ១១ តោន ដែលត្រូវកាត់ទោសក្នុងបទឧក្រិដ្ឋនេះ។

លោកចៅក្រម សុង ប៊ុណ្ណារិទ្ធ ជាប្រធានក្រុមប្រឹក្សាជំនុំជម្រះ បានប្រកាសបិទសវនាការនៅម៉ោង ១១ និង ៣០ នាទី ចំពោះការប្រកាសសាលក្រម នឹងជូនដំណឹងពេលក្រោយ។

គួររំលឹកថា សមត្ថកិច្ចជំនាញ នៃមន្ទីរប្រឆាំងគ្រឿងញៀន និងនាយកដ្ឋានកណ្ដាលសន្តិសុខ បានស្រាវជ្រាវអស់រយៈពេលជាង ០២ ខែរួចមកហើយ ទើបនៅថ្ងៃទី ១៩ ខែឧសភា ឆ្នាំ ២០២២ វេលាម៉ោង ១៨ និង ៣០ នាទី សមត្ថកិច្ចបានបើកប្រតិបត្តិការបង្ក្រាបមន្ទីរពិសោធន៍លួចលាក់កែច្នៃផលិតសារធាតុញៀន នៅ ៣ ទីតាំងផ្សេងគ្នាជាបន្តបន្ទាប់។

ចំណុចទី១ ៖ នៅបន្ទប់លេខ ៨០២ ក្នុងខុនដូ J CITY ផ្លូវលេខ ៣២២ សង្កាត់បឹងកេងកង ១ ខណ្ឌបឹងកេងកង រាជធានីភ្នំពេញ, ចំណុចទី២ ៖ ស្ថិតនៅក្នុងចម្ការស្វាយ ភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ និងចំណុចទី៣ ៖ ស្ថិតនៅក្នុងចម្ការស្វាយ ភូមិស្រល់ ឃុំយាយម៉ៅពេជ្រនិល ស្រុកភ្នំស្រួច ខេត្តកំពង់ស្ពឺ ដោយដកហូតបានរួមមាន ៖ ម៉ាស៊ីន ឧបករណ៍សម្ភារៈសម្រាប់កែច្នៃ ផលិតវេចខ្ចប់មួយចំនួនធំ, សារធាតុញៀនប្រភេទកេតាមីន ទម្ងន់ ៤០ គីឡូ ៥១.៧ ក្រាម, ល្បាយសារធាតុញៀនកេតាមីន ទម្ងន់ ១,៤២៥ គីឡូក្រាម, ថ្នាំគ្រាប់នីមេតាហ្សេប៉ាម ទម្ងន់ ០.៩ ក្រាម និងសារធាតុគីមីផ្សំ ១១ តោន ៥២៥ គីឡូក្រាម និងជនជាតិចិនតៃវ៉ាន់ចំនួន ៤ នាក់ បញ្ជូនមកតុលាការឃុំខ្លួនមកដល់ថ្ងៃកាត់ទោសនេះ៕

អត្ថបទ ៖ មករា

The post កាត់ទោសបុរសជនជាតិចិនតៃវ៉ាន់ ៤ នាក់ លួចផលិតគ្រឿងញៀនច្រើនតោន នៅកំពង់ស្ពឺ appeared first on Kampuchea Thmey Daily.

តុលាការកំពូលកាត់ទោសឃាតកសម្លាប់សង្សារ ហើយដេកឱបខ្មោច

អ៊ិន ពិសី — Wed, 01 Feb 2023 09:14:10 +0000

ក្រុមប្រឹក្សាជំនុំជម្រះតុលាការកំពូល កាលពីព្រឹកថ្ងៃទី ០១ ខែកុម្ភៈ ឆ្នាំ ២០២៣ បានបើកសវនាការលើបណ្ដឹងសារទុក្ខលើកទី ២ របស់ជនជាប់ចោទ ឈ្មោះ សែម សាន ភេទប្រុស អាយុ ២៨ ឆ្នាំ ជាប់ចោទពីបទ ឃាតកម្មគិតទុកជាមុន បន្ទាប់ពីសាលាឧទ្ធរណ៍ផ្ដន្ទាទោសឲ្យជាប់ពន្ធនាគារ ៣០ ឆ្នាំ។

ជនជាប់ចោទ ឈ្មោះ សែម សាន ត្រូវបានចៅក្រមជំនុំជម្រះសាលាដំបូងរាជធានីភ្នំពេញ កាលពីឆ្នាំ ២០១៨ បានផ្ដន្ទាទោសដាក់ពន្ធនាគារអស់មួយជីវិត ពីបទ ឃាតកម្មគិតទុកជាមុន និងបង្គាប់ឲ្យសងសំណងចំនួន ៤០ លានរៀល ទៅដើមបណ្ដឹង។

ក្រោយមកជនជាប់ចោទឈ្មោះ សែម សាន មិនសុខចិត្តនឹងសេចក្ដីសម្រេចរបស់សាលាដំបូងរាជធានីភ្នំពេញ ក៏បានឧទ្ធរណ៍។ ក្រោយមកចៅក្រមជំនុំជម្រះសាលាឧទ្ធរណ៍ ក៏បានបើកសវនាការជំនុំជម្រះលើបណ្ដឹងឧទ្ធរណ៍របស់ជនជាប់ចោទ និងប្រកាសសាលដីកា តម្កល់សាលក្រមរបស់សាលាដំបូងរាជធានីភ្នំពេញទុកជាបានការដដែល។ ដោយសាលាឧទ្ធរណ៍តម្កល់ទោសខ្លួននៅដដែល ជនជាប់ចោទឈ្មោះ សែម សាន បានប្ដឹងសារទុក្ខមកតុលាការកំពូល ហើយតុលាការកំពូល ក៏បានចាត់របៀបបង្វិលសំណុំរឿងឲ្យទៅសាលាឧទ្ធរណ៍ជំនុំជម្រះសាជាថ្មី សាលាឧទ្ធរណ៍ភ្នំពេញ ក៏បានសម្រេចប្រកាសសាលដីកាផ្ដន្ទាទោសដាក់ពន្ធនាគារកំណត់ចំនួន ៣០ ឆ្នាំ។ ដោយការសម្រេចនេះហើយ ទើបជនជាប់ចោទឈ្មោះ សែម សាន សម្រេចប្ដឹងសារទុក្ខលើកទី ២ មកតុលាការកំពូល ហើយតុលាការកំពូលបានបើកសវនាការនៅព្រឹកថ្ងៃទី ០១ ខែកុម្ភៈ ឆ្នាំ ២០២៣ និងប្រកាសសាលដីកានៅព្រឹកថ្ងៃទី ១៣ ខែកុម្ភៈ ឆ្នាំ ២០២៣ ខាងមុខ។

ករណីឃាតកម្មគិតទុកជាមុន ប្រព្រឹត្តនៅចំណុចផ្ទះជួល បន្ទប់លេខ ២៦z ជាន់ទី ៦ ផ្លូវលេខ ៣០ ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ កាលពីថ្ងៃទី ០៧ ខែមីនា ឆ្នាំ ២០១៨ តាមមាត្រា ២០០ នៃក្រមព្រហ្មទណ្ឌ។ នៅក្នុងសវនាការដោយជនជាប់ចោទប្ដឹងសារទុក្ខមកតុលាការកំពូលនេះ ដោយសុំឲ្យលោកជំទាវចៅក្រមបន្ធូរបន្ថយទោសពី ៣០ ឆ្នាំ មក ១៥ ឆ្នាំវិញ ដោយសារខ្លួនមានជំងឺប្រចាំកាយ និងម្ដាយឪពុកចាស់ត្រូវការអ្នកមើលថែ៕

អត្ថបទ ៖ មករា

The post តុលាការកំពូលកាត់ទោសឃាតកសម្លាប់សង្សារ ហើយដេកឱបខ្មោច appeared first on Kampuchea Thmey Daily.

កាត់ទោសក្រុមយុវជនវាយសម្លាប់គូទំនាស់

អ៊ិន ពិសី — Thu, 19 Jan 2023 08:22:35 +0000

ក្រុមយុវជន ៣ នាក់ ដែលប្រព្រឹត្តអំពើសម្លាប់មនុស្ស ត្រូវបានតុលាការកាត់ទោសកាលពីព្រឹកថ្ងៃទី ១៩ ខែមករា ឆ្នាំ ២០២៣ នេះ ក្រោមការចោទប្រកាន់ពីបទ «ឃាតកម្ម និងបទរួមគំនិតក្នុងអំពើឃាតកម្ម» តាមមាត្រា ១៩៩ និងមាត្រា ២៩ នៃក្រមព្រហ្មទណ្ឌ។

ជនជាប់ចោទទាំង ៣ នាក់ ដែលមានវត្តមានក្នុងរង្វង់ក្រចកសេះ ទី១-ឈ្មោះ រ៉ាត់ ណារ៉ាក់ (ហោ រ៉ាក់) ភេទប្រុស អាយុ ២២ ឆ្នាំ មុខរបរចុងភៅ ជនជាតិខ្មែរ ស្នាក់នៅភូមិ ៥ សង្កាត់មនោរម្យ ខណ្ឌ ៧ មករា (គ្មានសារធាតុញៀន)។ ទី២-ឈ្មោះ ពិន បូរី (ហៅ រី) ភេទប្រុស អាយុ ១៨ ឆ្នាំ ជាសិស្ស ជនជាតិខ្មែរ ស្នាក់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ(គ្មានសារធាតុញៀន)។ និងទី៣-ឈ្មោះ អូន ដារ៉ា (ហៅហេង) ភេទប្រុស អាយុ ២១ ឆ្នាំ ជាសិស្សសាលា ជនជាតិខ្មែរ ស្នាក់នៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ (គ្មានសារធាតុញៀន)។

នៅក្នុងសវនាការជនជាប់ចោទទាំង ៣ នាក់ បានសារភាពពីការសម្លាប់គូទំនាស់ ក្រោយពួកគេឈ្លោះគ្នានៅក្នុងក្លឹបរាំរែក ហើយចេញមកក្រៅបន្តឈ្លោះតាមផ្លូវទៀត ដែលបានកើតឡើងកាលពីថ្ងៃទី ៨ ខែមិថុនា ឆ្នាំ ២០២២ វេលាម៉ោង ២២ និង ០០ នាទីយប់ ចំណុចហ្គោឡាញ ផ្លូវ ១៩៨៦ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។

ជនដៃដល់បានសារភាពថា ជនរងគ្រោះដែលត្រូវបានពួកខ្លួនទាំង ៣ នាក់ វាយ និងគប់នឹងដុំថ្មបណ្ដាលឲ្យស្លាប់នោះ មានឈ្មោះ មាស វុទ្ធី ភេទប្រុស អាយុ ២៤ ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅផ្ទះជួល ផ្លូវបេតុង ភូមិត្រពាំងថ្លឹង សង្កាត់ចោមចៅ ១ ខណ្ឌពោធិ៍សែនជ័យ រាជធានីភ្នំពេញ។

ដោយសារជនដៃដល់បានសារភាពច្បាស់ៗពីកំហុសក្នុងការសម្លាប់មនុស្ស លោក ហេង ផេង ជាតំណាងអយ្យការ បានស្នើឲ្យចៅក្រមតុលាការផ្ដន្ទាទោសតាមច្បាប់កំណត់។

លោក ធាម ច័ន្ទពិសិដ្ឋ ជាប្រធានក្រុមប្រឹក្សាជំនុំជម្រះ បានកំណត់យកថ្ងៃទី ០២ ខែកុម្ភៈ ឆ្នាំ ២០២៣ ខាងមុខ ដើម្បីប្រកាសសាលក្រម៕

អត្ថបទ ៖ មករា

The post កាត់ទោសក្រុមយុវជនវាយសម្លាប់គូទំនាស់ appeared first on Kampuchea Thmey Daily.

កាត់ទោស Archives - Kampuchea Thmey Daily

​អតីត​រដ្ឋមន្រ្តី​យុត្តិធម៌​​ចិនត្រូវ​កាត់​​ទោស​​ឲ្យ​ជាប់​គុក​​មួយ​ជីវិត ពីបទទទួលសំណូក​

កាត់ទោស លោក នី ណាក់ ជាលើកទី ២

កាត់ទោសអតីតផ្កាយពីរ ម្នាក់ ស៊ីដាច់ប្រាក់វិនិយោគជិត ៧ លានដុល្លារ

កាត់ទោសអតីតប្ដីបាញ់សម្លាប់ប្រពន្ធ ថ្ងៃ ២៧ មេសា ប្រកាសសាលក្រម

កាត់ទោសបុរសជនជាតិចិនតៃវ៉ាន់ ៤ នាក់ លួចផលិតគ្រឿងញៀនច្រើនតោន នៅកំពង់ស្ពឺ

តុលាការកំពូលកាត់ទោសឃាតកសម្លាប់សង្សារ ហើយដេកឱបខ្មោច

កាត់ទោសក្រុមយុវជនវាយសម្លាប់គូទំនាស់

អតីតរដ្ឋមន្រ្តីយុត្តិធម៌ចិនត្រូវកាត់ទោសឲ្យជាប់គុកមួយជីវិត ពីបទទទួលសំណូក