Connect with us

សន្តិសុខសង្គម

កាត់ទោសអតីតប្ដីបាញ់សម្លាប់ប្រពន្ធ ថ្ងៃ ២៧ មេសា ប្រកាសសាលក្រម

បានផុស

នៅ

សំណុំរឿង​ឃាតកម្ម​គិតទុក​មុន​ដែល​បុរស​អតីត​ប្ដី​បាន​បាញ់សម្លាប់​អតីត​ប្រពន្ធ​នៅ​សង្កាត់​ចាក់​អង្រែ​ក្រោម ត្រូវ​បាន​ចៅក្រម​សាលាដំបូង​រាជធានី​ភ្នំពេញ​លើក​យក​មក​បើកសវនាការ​កាត់ទោស​កាលពី​ព្រឹក​ថ្ងៃ​ទី ២៩ ខែ​មីនា ឆ្នាំ ២០២៣ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជន​ដៃដល់​ដែល​ត្រូវ​កាត់ទោស​ឈ្មោះ ជា អូន ភេទ​ប្រុស អាយុ ២៥ ឆ្នាំ គ្មាន​មុខរបរ​ពិតប្រាកដ។ ចំណែក​ជនរងគ្រោះ​ឈ្មោះ នូ សុខ​នី​តា ហៅ ស៊ីវ អេង ភេទ​ស្រី អាយុ ២២ ឆ្នាំ។ តុលាការ​បាន​ចោទ​ប្រកាន់​ឈ្មោះ ជា អូន ពី​បទ ឃាតកម្ម​គិតទុក​មុន និង​ប្រើប្រាស់​អាវុធ​ខុសច្បាប់។

ក្នុង​សវនាការ​ជនជាប់ចោទ​បាន​រៀបរាប់​ថា កាលពី​ថ្ងៃ​ទី ១០ ខែ​ឧសភា ឆ្នាំ ២០១៨ ខ្លួន​បាន​រៀបការ​ជាមួយ​ប្រពន្ធ​ឈ្មោះ នូ សុខ​នី​តា។ លុះ​មក​ដល់​អំឡុង​ខែ​មីនា ឆ្នាំ ២០២២ ពួកគេ​ទាំងពីរ​មាន​ទំនាស់​ឈ្លោះ​ប្រកែក​គ្នា ដោយ​ខ្លួន​បាន​ដឹង​ថា ប្រពន្ធ​ឈ្មោះ នូ សុខ​នី​តា មាន​ទំនាក់ទំនង​ស្នេហា​ជាមួយ​បុរស​ជនជាតិ​ចិន​ម្នាក់​(​មិន​ស្គាល់​ឈ្មោះ​)។ ពេលនោះ​ពួកគេ​ក៏បាន​នាំគ្នា​មក​លែងលះ​នៅ​សាលា​សង្កាត់​ចាក់​អង្រែ​ក្រោម។ ក្រោយពី​លែងលះ​គ្នា​មួយ​រយៈ ខ្លួន​បាន​មក​សុំ​ប្រពន្ធ​យក​គ្នា​ជា​ប្ដី​ប្រពន្ធ​វិញ តែ​នាង​មិន​ព្រម ទើប​ខ្លួន​មាន​កំហឹង រួច​បាន​ទំនាក់ទំនង​ទិញ​អាវុធ​ខ្លី​មួយ​ដើម​ម៉ាក K៥៩(​រលប់​លេខ​) មាន​បង់​ចំនួន ០១ និង​គ្រាប់​ចំនួន ០៦ គ្រាប់ ពី​បុរស​ម្នាក់​មិន​ស្គាល់​អត្តសញ្ញាណ​តាមរយៈ​ហ្វេស​ប៊ុក​ផេក (​មិន​ចាំ​ឈ្មោះ​ក្រោយ​ពេល​ទិញ​រួច​បាន​លុប​ឆាត​នោះ​ចោល​ទាំងអស់​) ក្នុង​តម្លៃ ៦៥០ ដុល្លារ​អាមេរិក (​ដោយ​គេ​ផ្ញើ​អាវុធ​នោះ​តាម​រថយន្ត​វីរៈ​ប៊ុន​ថាំ ខណ្ឌ​សែន​សុខ​) នៅ​ថ្ងៃ​ទី ០៦ ខែ​មិថុនា ឆ្នាំ ២០២២ ក្នុង​គោលបំណង​យក​មក​គំរាម​ប្រពន្ធ​ឲ្យ​ព្រម​ទទួល​យក​ខ្លួន​ជា​ប្ដី​វិញ បើ​មិន​ព្រម​រូបគេ​នឹង​បាញ់​សម្លាប់​ចោល​តែម្ដង រួច​បាញ់សម្លាប់​ខ្លួនឯង​តាម​ក្រោយ។

លុះ​មក​ដល់​ថ្ងៃ​ទី ១០ ខែ​មិថុនា ឆ្នាំ ២០២២ វេលា​ម៉ោង ១៤ និង ១៥ នាទី ខ្លួន​បាន​ជិះ​ម៉ូតូ​មួយ​គ្រឿង​ម៉ាក សេ ១២៥ ពណ៌​ខ្មៅ ស៊េរី​ឆ្នាំ ២០១៥ ពាក់​ស្លាក​លេខ កណ្ដាល ១D-៥០១១ ដោយ​យក​អាវុធ​ខ្លី​មួយ​ដើម​ម៉ាក K៥៩ ដាក់​តាម​ខ្លួន​មក​ជួប​ឈ្មោះ នូ សុខ​នី​តា នៅ​ចំណុច​ក្នុង​បន្ទប់ ផ្ទះ​លេខ ១៤០៣A ផ្លូវជាតិ​លេខ ២ ភូមិ​ទួល​រកា សង្កាត់​ចាក់​អង្រែ​ក្រោម ខណ្ឌ​មានជ័យ រាជធានី​ភ្នំពេញ (កន្លែង​កើតហេតុ​) ពេល​មក​ដល់​ខ្លួន​បាន​នាំ​ជនរងគ្រោះ​ចូល​ទៅ​ក្នុង​បន្ទប់​និយាយ​សុំ​ត្រូវ​គ្នា​វិញ​(​ប្តី​ប្រពន្ធ​) តែ​ជនរងគ្រោះ​មិន​យល់ព្រម​ទេ ខណៈ​នោះ ខ្លួន​ក៏បាន​ដក​អាវុធ​ខ្លី​មួយ​ដើម​ម៉ាក K៥៩ ពី​ចង្កេះ​មក​អា​មេ​បញ្ចូល​គ្រាប់ រួច​បាញ់​គំរាម​ជនរងគ្រោះ​ចំនួន ០១ គ្រាប់ ត្រូវ​ជញ្ជាំង​បន្ទប់ ហើយ​បាញ់​មួយ​គ្រាប់​ទៀត​ត្រូវ​ជនរងគ្រោះ​ចំ​ពី​លើ​ក្បាល​បណ្ដាល​ឲ្យ​ស្លាប់​ភ្លាមៗតែម្ដង បន្ទាប់មក​ខ្លួន​បាញ់​ខ្លួនឯង​ចំនួន ០៣ គ្រាប់​ទៀត​តែ​មិន​ផ្ទុះ ទើប​ក្រុម​គ្រួសារ​ទាំងសងខាង (​ទាំង​ជនរងគ្រោះ និង​ជនសង្ស័យ​) និង​កម្លាំង​អធិការដ្ឋាន​នគរបាល​ខណ្ឌ​មានជ័យ ចូល​ទៅ​អន្តរាគមន៍​ឃាត់ខ្លួន​តែម្ដង។

ក្រោយពី​ស្ដាប់​ការ​រៀបរាប់​យ៉ាង​ក្បោះក្បាយ​របស់​ជន​ដៃដល់​រួចមក លោក វង្ស សាវ៉ាត តំណាង​អយ្យការ បាន​ធ្វើ​សេចក្ដីសន្និដ្ឋាន​តម្កល់ទុក​បទ​ចោទ​ប្រកាន់​លើ​ឈ្មោះ ជា អូន ដដែល ហើយ​សំណូមពរ​ក្រុមប្រឹក្សាតុលាការ​ផ្ដន្ទាទោស​ជនជាប់ចោទ​តាមច្បាប់។

លោក ម៉ម ច័ន្ទ​វណ្ណៈ ជា​ប្រធាន​ក្រុមប្រឹក្សា​ជំនុំជម្រះ បាន​កំណត់​យក​ថ្ងៃ​ទី ២៧ ខែ​មេសា ឆ្នាំ ២០២៣ ដើម្បី​ប្រកាស​សាលក្រម៕

អត្ថបទ ៖ មករា

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម