ការឈឺធ្មេញ Archives - Kampuchea Thmey Daily

ចូលដល់រដូវរងាចេះតែឈឺធ្មេញ? សាកតិចនិកបង្ការទាំង៤នេះមើល៍

សាង ស្រីល័ក្ខ — Mon, 09 Jan 2023 01:19:45 +0000

គ្នាយើងណាខ្លះតែងប្រឈមនឹងបញ្ហាឈឺធ្មេញនៅរដូវរងា? ពិតណាស់ រដូវរងា មិនត្រឹមតែធ្វើឲ្យស្បែកស្ងួតប៉ុណ្ណោះទេ ថែមទាំងបង្កើនហានិភ័យនៃបញ្ហាមាត់ធ្មេញដូចគ្នា។ ដូច្នេះហើយ ដើម្បីបង្ការអាការៈឈឺធ្មេញ អំឡុងរដូវរងានេះ គ្នាយើងអាចសាកល្បងគន្លឹះងាយៗខាងក្រោមនេះ។

គន្លឹះទាំង៤ ជួយថែទាំសុខភាពមាត់ធ្មេញ និងបង្ការបញ្ហាឈឺធ្មេញ

១. រក្សាជាតិទឹក

ទឹកអាចជួយពង្រឹងកាចាធ្មេញ និងជួយការពារធ្មេញពីបាក់តេរីដ៏គ្រោះថ្នាក់ផ្សេងៗ។ លើសពីនេះ ការរក្សាជាតិទឹកក្នុងរាងកាយគ្រប់គ្រាន់ ក៏អាចជួយឲ្យខ្យល់ដង្ហើមយើងមានក្លិនល្អ ដោយលាងសម្អាតអណ្តាត ធ្មេញ និងអញ្ចាញធ្មេញថែមទៀតផង។

២. កាត់បន្ថយការញ៉ាំជាតិស្ករ

ទន្ទឹមនឹងនេះដែរ អំឡុងរដូវរងារ យើងគួរកាត់បន្ថយការញ៉ាំជាតិស្ករ ពីព្រោះស្ករអាចបង្កឲ្យមានបាក់តេរីតូចៗ ដែលបណ្តាលឲ្យរលាកអញ្ចាញធ្មេញ និងបង្កជាជំងឺអញ្ចាញធ្មេញផងដែរ។

៣. ពិនិត្យសុខភាពមាត់ធ្មេញជាទៀងទាត់

ជាក់ស្តែង គ្នាយើងជាច្រើនអាចមិនដឹងទេថា បញ្ហាមាត់ធ្មេញអាចបង្កើនហានិភ័យនៃការវិវត្តទៅរកជំងឺបេះដូង និងជំងឺទឹកនោមផ្អែម។ ហេតុនេះហើយ ទើបការពិនិត្យសុខភាពមាត់ធ្មេញជាមួយនឹងគ្រូពេទ្យជំនាញជារៀងរាល់៦ខែម្តង ជារឿងដ៏ចាំបាច់មួយដែលយើងមិនគួរធ្វេសប្រហែសឡើយ។

៤. ចៀសវាងអាហារ និងភេសជ្ជៈមានជាតិអាស៊ីដ

អាហារ និងភេសជ្ជៈមានជាតិអាស៊ីដ អាចធ្វើឲ្យស្រទាប់ខាងក្រៅនៃធ្មេញទន់ ដែលងាយនឹងពុកផុយ ព្រមទាំងឆាប់សឹក។ អីចឹងហើយ គ្នាយើងគួរកាត់បន្ថយពពួកអាហារទាំងនេះ ព្រមទាំងលាងសម្អាតមាត់ធ្មេញជាមួយនឹងទឹក ឬទឹកខ្ពុរមាត់ក្រោយញ៉ាំអាហារដែលផ្ទុកជាតិអាស៊ីដរួច។

អត្ថបទផ្ដល់ដោយ៖Helli Krupet

ចុចអាន៖ចែកគ្នាដឹង! តិចនិកដោះស្រាយបញ្ហាឈឺធ្មេញ ពេលយប់

The post ចូលដល់រដូវរងាចេះតែឈឺធ្មេញ? សាកតិចនិកបង្ការទាំង៤នេះមើល៍ appeared first on Kampuchea Thmey Daily.

ត្រូវដឹងហេតុផលចាំបាច់ មិនគួរទុកថ្គាមទាល់ដាច់ខាត

Boa Sokunveary — Sat, 10 Dec 2022 06:00:00 +0000

ថ្គាមទាល់ភាគច្រើនដុះមិនត្រង់ជួរ ពិបាកសម្អាត នាំឲ្យមានបញ្ហាប៉ះពាល់ដល់សុខភាពធ្មេញទាំងមូលនិងរលាកអញ្ចាញធ្មេញ។ អ្នកខ្លះកើតមកមិនមានថ្គាមទាល់ពេញមួយជីវិតគឺជាសំណាងណាស់ ចំណែកឯអ្នកខ្លះទៀតដុះថ្គាមទាល់បុកជាមួយធ្មេញថ្គាមបើទុកយូរៗទៅនឹងនាំឲ្យមានការឈឺចាប់ ខ្ទុះ រលាកអញ្ចាញ ពុកធ្មេញ ខូចធ្មេញផ្សេងៗ ជាពិសេសគឺស្អុយមាត់ខ្លាំង។ អាស្រ័យបញ្ហាធំៗដូចនេះហើយ ទើបគ្រូពេទ្យណែនាំឲ្យធ្វើការដក ឬវះថ្គាមទាល់ចេញ។

ការសម្រេចចិត្តថាដក ឬមិនដក ត្រូវស្រេចលើការណែនាំរបស់គ្រូពេទ្យ ជួនកាលធ្មេញដុះមកផុតមិនចាំបាច់ដកចេញក៏មាន។ យោងតាមការសិក្សានៅឆ្នាំ ២០១៥ បានបង្ហាញថា ក្នុងចំណោមអ្នកជំងឺ ៥២នាក់ មាន ១១,៥ភាគរយ ជួបបញ្ហាខូចសាច់អញ្ចាញ ៧,៧ភាគរយទៀតឆ្លងបាក់តេរីតទៅធ្មេញផ្សេងៗដោយសារតែសម្អាតមិនដល់។ ជាក់ស្ដែងការវះឬដកថ្គាមមិនគួរឲ្យខ្លាចដូចអ្វីដែលអ្នកធ្លាប់ឮកន្លងមកទេ ពេទ្យជំនាញមានឧបករណ៍ទំនើបៗសម្រាប់ថតមុននឹងវះជៀសវាងគ្រោះថ្នាក់ដូចសម័យមុន មុនគេធ្វើការវះគ្រូពេទ្យតែងប្រើថ្នាំស្ពឹកដូច្នេះអ្នកនឹងមិនមានអារម្មណ៍អ្វីទាំងអស់។ ក្រោយពីធ្វើការវះរួចរាល់ហើយ ការឈឺចាប់នឹងកើតមានឡើងក្នុងកម្រិតអាចទ្រាំបានគ្រាន់តែពិបាកទទួលទានអាហារប៉ុណ្ណោះ។ លើសពីនេះគេហាមហូបរបស់ក្ដៅក្រោយការវះកាត់ ២៤ម៉ោង ហាមខ្ជាក់ទឹកមាត់ ខាំសំឡីជាប់ និងហាមប្រើទុយោបឺតទឹក។ ជាមួយគ្នានេះដែរ ថ្នាំសម្រាប់លេបមានច្រើនឬតិចអាស្រ័យលើសុខភាពអ្នកជំងឺម្នាក់រៀងៗខ្លួន។

គួរបន្ថែមថា សម្រាប់អ្នកមិនទៅដកឬវះចេញនឹងមានបញ្ហាធ្ងន់ជាងនេះព្រោះការព្យាបាលមានការឈឺចាប់ច្រើនជាង ទៅពេទ្យញឹកជាង ពិបាកទទួលទានអាហារជាង គួបផ្សំទាំងស្អុយមាត់បានឆ្ងាយផងដែរ៕

ប្រែសម្រួលដោយ៖ វារី

ចុចអាន៖ ចែកគ្នាដឹង! តិចនិកដោះស្រាយបញ្ហាឈឺធ្មេញ ពេលយប់

ចុចអាន៖ ពាក់ម៉ាសយូរម៉ោង អាចធ្វើឲ្យឈឺក្បាល ឬថ្គាម? 

The post ត្រូវដឹងហេតុផលចាំបាច់ មិនគួរទុកថ្គាមទាល់ដាច់ខាត appeared first on Kampuchea Thmey Daily.

ចែកគ្នាដឹង! តិចនិកដោះស្រាយបញ្ហាឈឺធ្មេញ ពេលយប់

សាង ស្រីល័ក្ខ — Sun, 14 Nov 2021 06:02:00 +0000

ឈឺធ្មេញ អ្នកណាក៏ជួបប្រទះក្នុងជីវិតដែរ ប៉ុន្តែបើឈឺចំពេលយប់វិញ ហើយគ្មានថ្នាំនៅផ្ទះទៀត ច្បាស់ជាវីរវរហើយ។ គ្នាយើងធ្លាប់ឆ្លងកាត់បទពិសោធន៍នេះ បានដឹងថាវេទនាប៉ុនណា។ ប៉ុន្តែក៏មានវិធីដោះទ័លខ្លះដែរទាំងវិធីព្យាបាលដោយថ្នាំ ទាំងវិធីព្យាបាលបែបធម្មជាតិ។

១. វិធីដោះស្រាយបញ្ហាឈឺធ្មេញពេលយប់

ព្យាបាលអាការៈឈឺធ្មេញនៅផ្ទះ ជាធម្មតាអាចពាក់ព័ន្ធនឹងថ្នាំបំបាត់ការឈឺចាប់។ ខណៈខាងក្រោយនេះ ជាវិធីសាស្ត្រខ្លះៗ អាចបន្ធូរបន្ថយការឈឺធ្មេញពេលយប់ ជួយឲ្យយើងអាចគេងលក់យ៉ាងសុខស្រួលបាន។

ថ្នាំបំបាត់ការឈឺចាប់ដោយមិនចាំបាច់វេជ្ជបញ្ជា៖ ការប្រើថ្នាំបំបាត់ការឈឺចាប់ពពួក Ibuprofen (Advil, Motrin) ពពួកថ្នាំ Acetaminophen (Tylenol) និងអាស្ពីរីនជាដើម សុទ្ធតែអាចជួយបន្ថយការឈឺចាប់ធ្មេញបានតួចតិចដែរ។ គ្នាយើងក៏អាចប្រើថ្នាំស្ពឹក ជែលស្ពឹកដែលជារឿយៗមានលាយជាតិ Benzocaine ក៏អាចជួយផ្អាកការឈឺចាប់បានមួយសន្ទុះធំ គ្រាប់គ្រាន់ឲ្យយើងគេងលក់បាន។ យ៉ាងណាត្រូវចាំ កុំប្រើផលិតផលណាមានសារធាតុ Benzocaine ទៅលើទារក ឬក្មេងក្រោមអាយុ ២ឆ្នាំឲ្យសោះ។

មុនចូលគេងកុំញ៉ាំអាហារ ឬភេសជ្ជៈមានជាតិអាស៊ីដ ត្រជាក់ ឬអាហាររឹង៖ ព្រោះអាហារប៉ុន្មានប្រភេទនេះ នឹងធ្វើឲ្យអាការៈឈឺធ្មេញរបស់យើងកាន់តែធ្ងន់ធ្ងរ។ ករណីខ្លះ ធ្មេញយើងមានប្រហោងស្រាប់ ត្រូវចៀសវាងឲ្យបាន បើមិនចង់ឈឺចាប់កាន់តែខ្លាំង។
លាងជម្រះធ្មេញជាមួយទឹកខ្ពុរមាត់៖ ប្រើទឹកខ្ពុរមាត់ដែលមានលាយជាតិអាល់កុល អាចជួយទាំងលាងសម្អាតធ្មេញផង ជួយឲ្យស្ពឹកមិនឈឺចាប់ថែមទៀត។
ស្អំថង់ទឹកកកមុនចូលគេង៖ អាចវេចខ្ចប់ទឹកកកមួយថង់ នឹងដាក់ទៅលើថ្ពាល់ខាងណាមួយយើងកំពុងឈឺធ្មេញ។ បែបនេះអាចជួយបន្ថយការឈឺចាប់បាន ធ្វើឲ្យយើងសម្រាកលក់ស្រួល។

២- ឱសថធម្មជាតិសម្រាប់ព្យាបាលឈឺធ្មេញ

អាការៈឈឺធ្មេញពេលយប់ ប្រហែលជាទាន់ហន់ពេក ពេលខ្លះយើងមិនមានថ្នាំព្យាបាលទាំងនោះនៅក្នុងផ្ទះ ចេញទៅពេទ្យក៏ពិបាក។ ប៉ុន្តែកុំទាន់បារម្ភ យោងតាមការសិក្សាគួរឲ្យជឿជាក់ជាច្រើន វិធីសាស្ត្របែបធម្មជាតិមួយចំនួន សុទ្ធតែអាចប្រើបំបាត់ការឈឺចាប់បណ្តោះអាសន្ន ដោយក្នុងនោះអ្នកជំនាញណែនាំឲ្យយើងប្រើឱសថធម្មជាតិ អាចមានតាមផ្ទះដូចជា៖

ខ្ទឹមស

ខ្ទឹមសត្រូវបានគេប្រើប្រាស់ជាឱសថតាំងពីយូរណាស់មកហើយ។ ខ្ទឹមសផ្ទុកសារធាតុ allicin ដែលមាននាទីជាសារធាតុប្រឆាំងបាក់តេរី។ ដើម្បីកាត់បន្ថយការឈឺចាប់ យើងអាចយកខ្ទឹមសមួយកំពឹសមកបំបែក និងលាយជាមួយអំបិលបន្តិច រួចយកទៅបិតនៅធ្មេញដែលឈឺ។

តែជីរអង្កាម

ជីរអង្កាមមានសារធាតុធ្វើឲ្យស្ពឹកដែលអាចបន្ថយការឈឺធ្មេញបាន។ សារធាតុម៉ង់តុល (Menthol) នៅក្នុងជីរអង្កាមគឺជាសារធាតុប្រឆាំងបាក់តេរី។ យើងអាចដាក់ជីរអង្កាមក្រៀមមួយស្លាបព្រាកាហ្វេទៅក្នុងទឹកកំពុងពុះ និងទុកចោល២០នាទី។ ក្រោយពីនេះទុកឲ្យត្រជាក់ និងយកមកខ្ពុរមាត់។ យើងអាចស្ដោះចេញ ឬផឹកក៏បាន។

ប្រទាលកន្ទុយក្រពើ

ជែលប្រទាលកន្ទុយក្រពើអាចព្យាបាលការរលាក ឬរបួសតូចៗ និងមនុស្សមួយចំនួនបានប្រើជែលនេះសម្អាត និងបំបាត់ការឈឺចាប់នៅអញ្ចាញធ្មេញ។ ការសិក្សាជាច្រើនក៏បានបង្ហាញថាប្រទាលកន្ទុយក្រពើមានសារធាតុប្រឆាំងបាក់តេរីដែលជួយកំចាត់ពពួក germ ធ្វើឲ្យធ្មេញពុក។ ដើម្បីកាត់បន្ថយការឈឺធ្មេញ យើងអាចយកជែលប្រទាលកន្ទុយក្រពើទៅលាបលើកន្លែងដែលឈឺនៅនឹងមាត់ រួចម៉ាស្សាថ្នមៗទៅក្នុងអញ្ចាញធ្មេញ។

វិធីទាំងនេះគ្រាន់តែបន្ថយអាការៈឈឺចាប់រយៈពេលខ្លីប៉ុណ្ណោះ យកល្អគួរទៅជួបទន្តពេទ្យដើម្បីទទួលបានការព្យាបាលត្រឹមត្រូវ៕

អត្ថបទផ្ដល់ដោយ៖ Hello Krupet

ចុចអាន៖ស្ងួតមាត់ក្រោយភ្ញាក់ពីគេង តាមពិត មកពីមូលហេតុទាំងនេះ

ចុចអាន៖ដុសធ្មេញរាល់ថ្ងៃ ដឹងអត់ថាគួរប្ដូរច្រាសដុសធ្មេញ នៅពេលណា?

The post ចែកគ្នាដឹង! តិចនិកដោះស្រាយបញ្ហាឈឺធ្មេញ ពេលយប់ appeared first on Kampuchea Thmey Daily.

ការឈឺធ្មេញ Archives - Kampuchea Thmey Daily

ចូលដល់រដូវរងាចេះតែឈឺធ្មេញ? សាកតិចនិកបង្ការទាំង៤នេះមើល៍

គន្លឹះ​​ទាំង​៤ ជួយ​ថែ​ទាំ​សុខភាព​មាត់​ធ្មេញ និង​បង្ការ​បញ្ហា​ឈឺ​ធ្មេញ

ត្រូវដឹងហេតុផលចាំបាច់ មិនគួរទុកថ្គាមទាល់ដាច់ខាត

ចែកគ្នាដឹង! តិចនិកដោះស្រាយបញ្ហាឈឺធ្មេញ ពេលយប់

គន្លឹះទាំង៤ ជួយថែទាំសុខភាពមាត់ធ្មេញ និងបង្ការបញ្ហាឈឺធ្មេញ