កីឡាករ Takaki Ose Archives - Kampuchea Thmey Daily

Takaki ទម្លាយ ថា បានបដិសេធក្លិបមួយចំនួន មុនចូលរួមជាមួយ ព្រះខ័នរាជស្វាយរៀង ដោយកត្តាធំ ២

Kosal Sem — Fri, 12 Jun 2026 04:27:19 +0000

ខ្សែការពារជនជាតិ ជប៉ុន សញ្ជាតិ ខ្មែរ កីឡាករ Takaki Ose បានទម្លាយបានហេតុផលធំ ២ នៅពីក្រោយការសម្រេចចិត្តចូលរួមជាមួយក្រុម ព្រះខ័នរាជស្វាយរៀង នៅរដូវកាល ២០២៦-២០២៧។

នៅព្រឹកថ្ងៃ សុក្រ ទី ១២ ខែ មិថុនា ឆ្នាំ ២០២៦ ក្លិបព្រះខ័នរាជស្វាយរៀង បានប្រកាសជាផ្លូវការ ក្នុងការនាំចូលខ្សែការពារ Takaki មកចូលរួមជាមួយក្លិបនៅរដូវកាលថ្មី។ នេះជាក្លិបកម្ពុជាទី ៣ ហើយ ដែលខ្សែការពារវ័យ ៣០ ឆ្នាំបានលេង បន្ទាប់ពី ២ ក្លិបដំបូងរូបគេលេងនៅ អង្គរថាយហ្គឺរ និង ភ្នំពេញក្រោន។

បន្ទាប់ពីចូលរួមជាមួយក្លិប ព្រះខ័នរាជស្វាយរៀង Takaki បានទម្លាយ ថា រូបគេត្រូវបានក្លិបមួយចំនួនទាក់ទងមកផងដែរ ក្រោយចែកផ្លូវជាមួយក្លិប BG Pathum ប៉ុន្តែចុងក្រោយ កីឡាករបានសម្រេចចិត្តចូលរួមជាមួយក្រុមជើងឯកលីគកំពូល កម្ពុជា ដោយសារមើលឃើញ ថា ទីនេះជាក្លិបធំមួយនៅ កម្ពុជា ហើយមានប្រព័ន្ធលេងត្រូវនឹងការលេងរបស់រូបគេផ្ទាល់។

ថ្លែងនៅក្នុងកិច្ចសម្ភាសជាមួយក្លិប កីឡាករជម្រើសជាតិ កម្ពុជា បាននិយាយដូច្នេះ ថា៖ «ជាដំបូង ខ្ញុំសប្បាយចិត្ត ដែលបានមកទីនេះ។ ទីនេះជាក្រុមធំមួយនៅក្នុងប្រទេស កម្ពុជា។ ដូច្នេះ ខ្ញុំទន្ទឹងរង់ចាំរដូវកាលថ្មីខាងមុខនេះ ដែលយើងនឹងត្រូវលេងពានរង្វាន់អន្តរជាតិ ដូចជាពាន Shopee Cup និងពាន AFC Champions League Two»។

កីឡាករបានបន្ថែមទៀត ថា៖ «នៅពេលខ្ញុំចាកចេញពីលីគប្រទេស ថៃ។ មានក្រុមមួយចំនួនបានទាក់ទងមកខ្ញុំ។ ហើយខ្ញុំក៏បានសម្រេចចិត្តចូលរួមជាមួយក្រុម ព្រះខ័នរាជស្វាយរៀង ពីព្រោះដូចអ្វីដែលខ្ញុំបានលើកឡើងអ៊ីចឹង ជាក្រុមដ៏ធំមួយនៅក្នុងប្រទេស កម្ពុជា។ ក្រុមមានទម្រង់លេងមួយ ដែលខ្ញុំគិតថា ខ្ញុំអាចសម្របខ្លួនបានច្រើនជាងមុន។ ខ្ញុំអាចបង្ហាញអ្វី ដែលខ្ញុំមាន។ ដូច្នេះបានជាខ្ញុំសម្រេចចិត្តចូលរួមជាមួយក្លិបបាល់ទាត់ ព្រះខ័នរាជស្វាយរៀង»។

គួរបញ្ជាក់ផងដែរ ថា នេះជាកីឡាករចំណូលថ្មីទី ១ ដែល ព្រះខ័នរាជស្វាយរៀង ចុះកុងត្រានៅរដូវកាលនេះ ដើម្បីត្រៀមខ្លួនក្នុងការប្រជែងពានក្នុងស្រុក ក៏ដូចជាពានរង្វាន់អន្តរជាតិ ASEAN Club Championship Shopee Cup និងពាន AFC Champions League Two៕

អត្ថបទ៖ សេម កុសល

The post Takaki ទម្លាយ ថា បានបដិសេធក្លិបមួយចំនួន មុនចូលរួមជាមួយ ព្រះខ័នរាជស្វាយរៀង ដោយកត្តាធំ ២ appeared first on Kampuchea Thmey Daily.

ក្លិបកម្ពុជាបានស្រោចស្រង់ជីវិតបាល់ទាត់ Takaki Ose ឲ្យជោគជ័យដ៏ត្រចះត្រចង់

chean virakbot — Wed, 03 Jun 2026 03:45:36 +0000

កីឡាករជប៉ុនសញ្ជាតិកម្ពុជា Takaki Ose បានចាត់ទុកក្លិបបាល់ទាត់នៅប្រទេសកម្ពុជាជាអ្នកស្រោកស្រង់អាជីពបាល់ទាត់របស់ខ្លួនរហូតទទួលបានជោគជ័យដ៏ត្រចះត្រចង់ដែលគ្មានថ្ងៃបំភ្លេចបាន។

កីឡាករ Takaki បានចាប់ផ្តើមលេងបាល់ទាត់ដំបូងនៅក្រុមបាល់ទាត់វិទ្យាល័យ Jessen Gakuen និងបន្តលេងឲ្យក្រុមបាល់ទាត់សកលវិទ្យាល័យ Senshu ក្នុងឆ្នាំ ២០១៨។ ពេលនោះ រូបគេមិនទាន់លេងជាលក្ខណៈអាជីពទេ ប៉ុន្តែក៏សាកល្បងចេញទៅលេងនៅក្រៅប្រទេសដោយចូលរួមជាមួយក្លិប Pieta Hotspurs រដូវកាល ២០១៨ នៅប្រទេសម៉ាល់តា ក្នុងតំបន់អឺរ៉ុប ប៉ុន្តែក៏នៅតែមិនទាន់អាជីពពិតប្រាកដដែរ ដោយសារស្ថានភាពក្លិបមិនល្អប្រសើរ និងមិនទទួលបានប្រាក់ជាងពាក់កណ្តាលរដូវកាល។

នៅឆ្នាំ ២០១៩ Takaki Ose បានសម្រេចចាកចេញពីតំបន់អឺរ៉ុបមកកាន់តំបន់មជ្ឈិមបូព៌ាដោយចូលរួមជាមួយក្លិប Ahli Sidab ក្នុងប្រទេសអូម៉ង់។ នៅក្លិបថ្មីនេះ រូបគេមិនបានលេងនៅលើទីលានច្រើនទេ ហើយក៏មិនទទួលបានប្រាក់ខែទៀងទាត់ថែមទៀត។ កីឡាករបានគិតថា ប្រសិនបើនៅបែបនេះ អាជីពបាល់ទាត់របស់ខ្លួននឹងត្រូវបានបញ្ចប់។

នៅឆ្នាំ ២០១៩ដដែល កីឡាករក៏បានសម្រេចចិត្តចាកចេញពីប្រទេសអូម៉ង់ដោយឲ្យភ្នាក់ងារទាក់ទងរកក្លិបថ្មីនៅប្រទេសផ្សេង។ ភ្នាក់ងារបានទាក់ទងក្លិប អង្គរថាយហ្គឺរ ដែលមានមូលដ្ឋាននៅខេត្តសៀមរាប ហើយរូបគេសម្រេចមកចូលរួមជាមួយក្លិបដែលមានម្ចាស់ជាជនជាតិជប៉ុនដូចគ្នា។

កីឡាករ Takaki Ose បានរម្លឹកថា ៖«ពេលមកដល់កម្ពុជា ទើបខ្ញុំមានអារម្មណ៍ថា ខ្លួនឯងចាប់លេងបាល់ទាត់មានលក្ខណៈអាជីពពិតប្រាកដ។ ខុសពីក្រុមមុនៗដែលខ្ញុំលេងគឺមិនអាជីពទេ»។

«នៅក្លិបអង្គរថាយហ្គឺរ សម្រាប់ខ្ញុំគឺជាការចាប់ផ្តើមជាកីឡាករពិតប្រាកដ។ នៅពេលនោះ ខ្ញុំទទួលបានប្រាក់ខែ ហើយខ្ញុំអាចចាយតាមអ្វីដែលខ្ញុំចង់។ ពីមុនខ្ញុំមិនមានលុយតាមចិត្តចង់ទេ។ ខ្ញុំខំសន្សំសំចៃផង សុំលុយពីពុកម៉ែផងដើម្បីចាយ ប៉ុន្តែពេលមកដល់ក្លិបនៅកម្ពុជា ទើបខ្ញុំឈប់សុំលុយពីក្រុមគ្រួសារ»។

បន្ទាប់ពីអភិវឌ្ឍខ្លួនយ៉ាងល្អក្នុងមួយរដូវកាលជាមួយ អង្គរថាយហ្គឺរ រូបគេបានផ្លាស់មកចូលរួមជាមួយក្លិប ភ្នំពេញក្រោន ឆ្នាំ ២០២០ ដែលជាកន្លែងរូបគេទទួលបានជោគជ័យបំផុត។

កីឡាករ Takaki Ose បានរម្លឹកទៀតថា ៖«អនុស្សាវរីយ៍ដ៏អស្ចារ្យបំផុតសម្រាប់ខ្ញុំគឺនៅពេលជួយភ្នំពេញក្រោន ឈ្នះ បឹងកេត ១-០ ហើយបានឈ្នះជើងឯកលីគកំពូលកម្ពុជា នៅឆ្នាំ ២០២១។ នោះគឺជាការឈ្នះពានដំបូងនៅក្នុងជីវិតរបស់ខ្ញុំ។ ខ្ញុំពិតជារំភើបណាស់»។

រឿងមិននឹកស្មានដល់មួយទៀតនោះគឺ នៅឆ្នាំ ២០២៤ រូបគេទទួលបានសញ្ជាតិខ្មែរដើម្បីលេងតំណាងជម្រើសជាតិកម្ពុជាលើឆាកអន្តរជាតិដែលស្ទើរតែមិនគួរឲ្យជឿនៅក្នុងជីវិតរបស់ខ្លួនទទួលបានអ្វីលើសពីបាល់ទាត់។

សូមបញ្ជាក់ថា សម្រាប់ការលេងរយៈពេល ៦ ឆ្នាំនៅកម្ពុជា Takaki Ose បានឈ្នះជើងឯកលីគកំពូលកម្ពុជា ២ លើក ឈ្នះពានសម្តេចតេជោ ហ៊ុន សែន ១ លើក ឈ្នះពានខេមបូឌានស៊ុបភើខាប់ ២ លើក និងឈ្នះពានខេមបូឌានលីគខាប់ ២ លើក ព្រមទាំងទទួលបានសញ្ជាតិខ្មែរ៕

អត្ថបទ៖ វិរបុត្រ

The post ក្លិបកម្ពុជាបានស្រោចស្រង់ជីវិតបាល់ទាត់ Takaki Ose ឲ្យជោគជ័យដ៏ត្រចះត្រចង់ appeared first on Kampuchea Thmey Daily.

Takaki Ose ជ្រើសរើសខ្សែប្រយុទ្ធ ៣ នាក់ នៅលីគកម្ពុជា ដែលខ្លួនពិបាកបិទបំផុត

Kosal Sem — Tue, 02 Jun 2026 05:30:00 +0000

ខ្សែការពារជនជាតិជប៉ុន សញ្ជាតិខ្មែរ Takaki Ose បាននិយាយដោយមិនលាក់លាមអំពីខ្សែប្រយុទ្ធ ៣ នាក់នៅក្នុងលីគកំពូល កម្ពុជា Cambodian Premier League ដែលខ្លួនពិបាកបិទបំផុត។

Takaki បានលេងនៅលីគកំពូល កម្ពុជា រយៈពេល ៦ ឆ្នាំ មុនផ្លាស់ទៅចូលរួមជាមួយក្លិប BG Pathum United នៃលីគកំពូល ថៃ កាលពីរដូវកាលមុន។ ខ្សែការពារវ័យ ៣០ ឆ្នាំ បានលេងនៅក្លិប អង្គរថាយហ្គឺរ ១ រដូវកាលពីឆ្នាំ ២០១៩ ដល់ ២០២០ និងបានលេងនៅក្រុម ភ្នំពេញក្រោន ៥ រដូវកាលពីឆ្នាំ ២០២០ ដល់ ២០២៥។

ចំពោះបទពិសោធលេងនៅលីគកំពូល កម្ពុជា ៥ រដូវកាល គឺ Takaki បានទម្លាយ ថា មានខ្សែប្រយុទ្ធ ៣ នាក់ ដែលគេពិបាកបិទបំផុត ក្នុងនោះមានអតីតខ្សែប្រយុទ្ធ ព្រះខ័នរាជស្វាយរៀង Privat Mbarga, Cristian និងខ្សែប្រយុទ្ធ បឹងកេត កីឡាករ Iago Bento។ Takaki បានបន្ថែម ថា មូលហេតុ ដែលពិបាកកីឡាករទាំង ៣ នេះ ដោយសារពួកគេមានគុណភាព និងល្បឿនលឿន។

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» Takaki បាននិយាយ ថា៖ «សម្រាប់ការលេងនៅកម្ពុជា ខ្សែប្រយុទ្ធសុទ្ធតែពិបាកបិទទាំងអស់ ប៉ុន្តែបើឲ្យជ្រើសរើស គឺ Privat, Cristian និង Bento។ ពួកគេជាកីឡាករមានគុណភាព ល្បឿនលឿន ពិបាកបញ្ឈប់ពួកគេណាស់។ ពួកគេជាខ្សែប្រយុទ្ធដ៏ល្អ»។

គួរឱ្យដឹងថា បច្ចុប្បន្ន Takaki មិនទាន់មានព័ត៌មានផ្លូវការ ក្នុងការទៅចូលរួមជាមួយក្លិបថ្មីណាមួយនៅឡើយទេ បន្ទាប់ពីចាកចេញពីក្រុម BG Pathum។ ទោះបីជាយ៉ាងណា នាមួយរយៈចុងក្រោយនេះ មានព័ត៌មានចចាមអារ៉ាមមួយចំនួន ថា កីឡាករទំនឹងជានឹងចូលរួមជាមួយក្រុម ព្រះខ័នរាជស្វាយរៀង៕

អត្ថបទ៖ សេម កុសល

The post Takaki Ose ជ្រើសរើសខ្សែប្រយុទ្ធ ៣ នាក់ នៅលីគកម្ពុជា ដែលខ្លួនពិបាកបិទបំផុត appeared first on Kampuchea Thmey Daily.

Takaki Ose ទម្លាយរឿងទៅលេងតំបន់អឺរ៉ុបដំបូង យកលុយពីឪពុកម្តាយទៅចាយ

chean virakbot — Tue, 02 Jun 2026 00:25:00 +0000

ខ្សែការពារជម្រើសជាតិកម្ពុជា Takaki Ose បានចេញទៅលេងបាល់ទាត់នៅតំបន់អឺរ៉ុបជាលើកដំបូងដោយមិនទទួលបានប្រាក់ខែអស់កន្លះរដូវកាល រហូត យកលុយពីឪពុកម្តាយដើម្បីបន្តអាជីពនៅទីនោះ។

ក្នុងបទសម្ភាសជាមួយ«កម្ពុជាថ្មី» កីឡាករជប៉ុនសញ្ជាតិកម្ពុជា Takaki បានឲ្យដឹងថា អាជីពរបស់ខ្លួនដំបូងនៅតំបន់អឺរ៉ុប ក្នុងប្រទេស ម៉ាល់តា។ ការលេងនៅទីនោះបានតែមួយរដូវកាល ក៏បានផ្លាស់មកលេងនៅប្រទេសអូម៉ង់ ក្នុងតំបន់មជ្ឈឹមបូព៌ា បានប្រមាណ ៤ ខែប៉ុណ្ណោះ ក៏ផ្លាស់មកចូលរួមជាមួយក្លិប អង្គរថាយហ្គឺរ ក្នុងប្រទេសកម្ពុជា។

កីឡាករបាននិយាយថា ៖«តាមពិតទៅជារៀងរាល់ឆ្នាំ ការលេងបាល់ទាត់សំខាន់ណាស់សម្រាប់ខ្ញុំ។ ពេលលេងនៅប្រទេសម៉ាល់តា ខ្ញុំអត់ទទួលបានប្រាក់ខែកន្លះរដូវកាល។ ពេលនោះអត់មានលុយចាយ ខ្ញុំយកលុយសន្សំ សុំលុយពីគ្រួសារនៅជប៉ុន ដើម្បីចំណាយនៅទីនោះ»។

កីឡាករបានបញ្ជាក់ថា ៖«ក្រោយពាក់កណ្តាលរដូវកាល ពួកគេបើកលុយឲ្យខ្ញុំខ្លះដែរ តែតិចតួច។ ខ្ញុំក៏បានផ្លាស់ទៅប្រទេសអូម៉ង់។ នៅប្រទេសអូម៉ង់ មិនបានប្រាក់ខែច្រើនទេ តែក៏អាចចិញ្ចឹមខ្លួនបាន»។

អ្វីដែលជារឿងមិនល្អនៅប្រទេសអូម៉ង់ គឺពីរខែចុងក្រោយ ក្លិបមិនបានបើកលុយឲ្យរូបគេទេ។ កីឡាករនិយាយថា ៖«ពួកគេអត់បើកប្រាក់ខែឲ្យខ្ញុំពីរខែចុងក្រោយ។ អីចឹងខ្ញុំគិតថា បើនៅតែបែបនេះទៀត អាជីពបាល់ទាត់របស់ខ្ញុំ ប្រហែលជាត្រូវចប់។ ខ្ញុំក៏បានប្រាប់ទៅភ្នាក់ងាឲ្យស្វែងរកក្លិបថ្មី នៅប្រទេសផ្សេង»។

បន្ទាប់មក ភ្នាក់ងាររបស់កីឡាករបានទាក់ទងក្លិប អង្គរថាយហ្គឺរដែលជាកន្លែងរូបគេបានចូលរួមជាមួយនៅឆ្នាំ២០២០៕

អត្ថបទ៖ វិរបុត្រ

The post Takaki Ose ទម្លាយរឿងទៅលេងតំបន់អឺរ៉ុបដំបូង យកលុយពីឪពុកម្តាយទៅចាយ appeared first on Kampuchea Thmey Daily.

Takaki Ose មិននឹកស្មានខ្លួនមានតម្លៃរហូតទទួលបានសញ្ជាតិកម្ពុជា

chean virakbot — Sat, 30 May 2026 02:15:11 +0000

កីឡាករជប៉ុន Takaki Ose ទទួលបានសញ្ជាតិកម្ពុជាដើម្បីលេងឲ្យក្រុមបាល់ទាត់ជម្រើសជាតិកម្ពុជាលើឆាកអន្តរជាតិ កាលពីឆ្នាំ ២០២៤ បន្ទាប់ពីរូបគេបានលេងបាល់ទាត់រយៈពេល ៥ ឆ្នាំនៅក្នុងប្រទេសកម្ពុជា។

កីឡាករ Takaki លេខ ១៥

កីឡាករបានប្រាប់«កម្ពុជាថ្មី»ថា មុនពេលមកប្រទេសកម្ពុជា ការលេងបាល់ទាត់របស់ខ្លួនមិនទាន់ចាត់ទុកជាអាជីពទេ ប៉ុន្តែក្រោយពេលចូលរួមជាមួយក្លិប អង្គរថាយហ្គឺរ កាលពីឆ្នាំ ២០២០ ទើបយល់ឃើញពីការលេងបាល់ទាត់របស់ខ្លួនចាប់ផ្តើមដោយអាជីពពិតប្រាកដ។

ក្លិបភ្នំពេញក្រោនជាកន្លែងដែលរូបគេលេងរយៈពេល ៤ ឆ្នាំ Takaki Ose ទទួលបានជោគជ័យបំផុតក្នុងនាមជាខ្សែការពារ គឺឈ្នះជើងឯកលីគកំពូលកម្ពុជា ២ លើក ឈ្នះជើងឯកពានរង្វាន់សម្តេចតេជោ ហ៊ុន សែន ១ លើក ឈ្នះជើងឯកខេមបូឌានស៊ុបភើខាប់ ២ លើក និងឈ្នះជើងឯកខេមបូឌានលីគខាប់ ២ លើក។

នៅខែវិច្ឆិកា ឆ្នាំ ២០២៤ កីឡាករជប៉ុនរូបនេះត្រូវបានសហព័ន្ធកីឡាបាល់ទាត់កម្ពុជាផ្តល់សញ្ជាតិកម្ពុជាដើម្បីមានសិទ្ធិលេងឲ្យជម្រើសជាតិកម្ពុជាលើឆាកអន្តរជាតិ។ កីឡាករបានរៀបរាប់ថា ៖«ដំបូងឡើយ សហព័ន្ធកីឡាបាល់ទាត់កម្ពុជាទាក់ទងខ្ញុំឲ្យចូលជាមួយក្រុមជម្រើសជាតិកម្ពុជា។ ពេលខ្ញុំបានឮហើយ ខ្ញុំពិតជារំភើបមែនទែន។ ខ្ញុំបានចំណាយពេល ៥ ឆ្នាំនៅទីនេះ។ ខ្ញុំមិននឹកស្មានថា ខ្ញុំមានតម្លៃសម្រាប់បាល់ទាត់កម្ពុជាទេ ប៉ុន្តែពួកគាត់ចង់បានខ្ញុំឲ្យក្លាយជាកីឡាករជម្រើសជាតិកម្ពុជា»។

Takaki Ose បាននិយាយថា ៖«ពេលនោះខ្ញុំសប្បាយចិត្តណាស់។ នៅកម្ពុជាខ្ញុំមិនធ្លាប់ភ័យខ្លាចអ្វីឡើយ។ ខ្ញុំមិននឹកស្រមៃភ័យព្រួយអ្វីឡើយ។ មិត្តភក្តិរបស់ខ្ញុំនៅតែសួរខ្ញុំថា តើកម្ពុជាមានសុវត្ថិភាពទេ ហើយការរស់នៅយ៉ាងដូចម្តេចដែរ? ខ្ញុំតែងតែប្រាប់ពួកគាត់ថា កម្ពុជាជាប្រទេសដ៏អស្ចារ្យ»។

សម្រាប់ការរស់នៅ និងលេងបាល់ទាត់ដ៏ជោគជ័យរយៈពេល ៥ ឆ្នាំ ខ្សែការពាររូបនេះចាត់ទុកប្រទេសកម្ពុជាពិតជាមានផាសុកភាពណាស់សម្រាប់ខ្លួន។ ប្រទេសកម្ពុជាមិនទំនើបដូចជប៉ុន ប៉ុន្តែប្រជាជនចិត្តល្អ កក់ក្តៅ ជាពិសេស ទីក្រុងភ្នំពេញតូចងាយស្រួលធ្វើដំណើរទៅណាមកណា៕

អត្ថបទ៖ វិរបុត្រ

The post Takaki Ose មិននឹកស្មានខ្លួនមានតម្លៃរហូតទទួលបានសញ្ជាតិកម្ពុជា appeared first on Kampuchea Thmey Daily.

កាន់ ម៉ូ និង Takaki ប្រហែលអាចជួយ កម្ពុជា បានក្នុងពាន ASEAN Championship

chean virakbot — Fri, 29 May 2026 00:59:53 +0000

ខ្សែការពារសំខាន់របស់ក្រុមបាល់ទាត់ជម្រើសជាតិកម្ពុជា កាន់ ម៉ូ និង តាកាគិ អូសិ (Takaki Ose) អាចនឹងជាសះស្បើយទាន់ពេលវេលា សម្រាប់ការប្រកួតជើងឯកអាស៊ាន ASEAN Championship នៅខែកក្កដា ឆ្នាំ ២០២៦។

កីឡាករជប៉ុនសញ្ជាតិកម្ពុជា Takaki Ose បានរបួសដល់ទៅ ៣ ដងសម្រាប់ការប្រកបអាជីពបាល់ទាត់របស់ខ្លួនជាមួយក្លិប BG Pathum United នៅក្នុងប្រទេសថៃ។ នៅដើមរដូវកាល កីឡាករជម្រើសជាតិកម្ពុជារូបនេះបានបង្ហាញខ្លួនយ៉ាងទៀងទាត់ទាំងពានក្នុងស្រុក និងអន្តរជាតិ។ បន្ទាប់មក រូបគេបានរបួសភ្លៅខាងស្តាំ ហើយក៏អាក់ខានក្នុងការបង្ហាញខ្លួន។ ក្រោយជាសះស្បើយ រូបគេបានចូលលេងវិញ ហើយក៏បានរបួសកន្លែងដដែលទៀតនាំឲ្យការចំណាយពេលវេលាព្យាបាលកាន់តែយូរ ប៉ុន្តែបានជាសះស្បើយ និងបានចូលលេងវិញមិនបានប៉ុន្មានផង ក៏ស្រាប់តែរបួសជើងខាងស្តាំវិញម្តង។

ក្នុងបទសម្ភាសជាមួយ«កម្ពុជាថ្មី» តាកាគី បានប្រាប់ថា ប្រសិនបើមិនមានបញ្ហារបួសទេ រូបគេនឹងអាចបានបង្ហាញខ្លួនយ៉ាងទៀងទាត់ នៅលីគថៃ តាំងដើមរដូវកាលរហូតមក ប៉ុន្តែជាកុសល របួសបានកើតឡើងម្តងហើយម្តងទៀតបានធ្វើឲ្យរូបគេឃ្លាតឆ្ងាយពីទីលានយូរ។ ជិតចប់រដូវកាល ក្លិបក៏បានប្រកាសចែកផ្លូវតែម្តង ហើយរូបគេបានវិលត្រឡប់មកកម្ពុជាវិញ។

កីឡាករបានប្រាប់ថា រូបគេមិនអាចលេងបានទេសម្រាប់ការប្រកួតមិត្តភាពអន្តរជាតិពីរលើករបស់ ក្រុមជម្រើសជាតិកម្ពុជាជាមួយ ប៊ូតាន និង ហុងកុង ខែមិថុនា ប៉ុន្តែរបួសរបស់ខ្លួនក៏មានការល្អប្រសើរច្រើន ដូច្នេះអាចនឹងជាសះស្បើយទាន់ពេលសម្រាប់ការប្រកួតពានរង្វាន់ ASEAN Championship នៅខែកក្កដា។ ទោះបីជាយ៉ាងណា រូបគេក៏មិនទាន់ច្បាស់ ១០០% ថាអាចបានលេងឬយ៉ាងណានោះទេ ដោយរង់ចាំមើលស្ថានភាពរបួសជាក់ស្តែង។

ជាមួយគ្នានេះ កីឡាករ កាន់ ម៉ូ ប្រធានក្រុមជម្រើសជាតិកម្ពុជា របស់ វិសាខា ក៏បានឃ្លាតឆ្ងាយពីទីលានជាច្រើនខែមកហើយ។ រូបគេមិនមានឈ្មោះសម្រាប់ការប្រកួតមិត្តភាពអន្តរជាតិ ២ លើកនៅខែមិថុនានេះដែរ ប៉ុន្តែមួយរយៈពេលចុងក្រោយស្ថានរបួសរបស់គេបានល្អប្រសើរជាលំដាប់ដែលផ្តល់ក្តីសង្ឃឹមអាចជាសះស្បើយទាន់ពាន ASEAN Championship។

កីឡាករ Takaki Ose

ក្រៅពីអវត្តមានខ្សែការពារដ៏សំខាន់ខាងលើ កម្ពុជាក៏គ្មានវត្តមានខ្សែមប្រើការពារស្លាប Nick Taylor ដោយសារមានបញ្ហារបួសដាច់សរសៃជង្គង់ ACL។

បន្ទាប់ពីការប្រកួតមិត្តភាពអន្តរជាតិជាមួយ ប៊ូតាន និង ហុងកុង ក្រុមបាល់ទាត់ជម្រើសជាតិកម្ពុជា ត្រូវធ្វើម្ចាស់ផ្ទះទទួលក្រុមជម្រើសជាតិសិង្ហបុរី ថ្ងៃទី២៤ ខែកក្កដា ឆ្នាំ ២០២៦ ក្នុងពាន ASEN Championship។ បន្ទាប់មក កម្ពុជា ត្រូវធ្វើដំណើរទៅទឹកដី ឥណ្ឌូណេស៊ី ថ្ងៃទី២៧ ខែកក្កដា និងធ្វើម្ចាស់ផ្ទះ ទទួល ទីម័រខាងកើត ឬ ព្រុយណេ ថ្ងៃទី៣ ខែសីហា នៅកម្ពុជា ហើយចុងក្រោយត្រូវធ្វើដំណើរទៅទឹកដី វៀតណាម នៅថ្ងៃទី៧ ខែសីហា ឆ្នាំ ២០២៦៕

កីឡាករ កាន់ ម៉ូ

អត្ថបទ៖ វិរបុត្រ

The post កាន់ ម៉ូ និង Takaki ប្រហែលអាចជួយ កម្ពុជា បានក្នុងពាន ASEAN Championship appeared first on Kampuchea Thmey Daily.

កីឡាករ Takaki Ose Archives - Kampuchea Thmey Daily

Takaki ទម្លាយ ថា បានបដិសេធក្លិបមួយចំនួន មុន​ចូលរួមជាមួយ ព្រះខ័នរាជស្វាយរៀង ​ដោយ​កត្តាធំ ២

ក្លិប​កម្ពុជា​​​បាន​ស្រោច​ស្រង់ជីវិត​បាល់ទាត់​ Takaki Ose ឲ្យ​ជោគជ័យ​ដ៏​ត្រចះត្រចង់

Takaki Ose ជ្រើសរើសខ្សែប្រយុទ្ធ ៣ នាក់ នៅលីគកម្ពុជា ដែលខ្លួនពិបាកបិទបំផុត

Takaki Ose ទម្លាយ​រឿង​ទៅ​លេង​តំបន់​អឺរ៉ុបដំបូង​ យក​លុយ​ពី​ឪពុក​ម្តាយ​ទៅ​ចាយ

Takaki Ose មិន​នឹក​ស្មាន​ខ្លួន​មាន​តម្លៃ​រហូត​​ទទួល​បាន​សញ្ជាតិ​កម្ពុជា

កាន់ ម៉ូ និង​​ Takaki ប្រហែល​អាច​​​ជួយ​ កម្ពុជា បាន​​ក្នុងពាន ASEAN Championship

Takaki ទម្លាយ ថា បានបដិសេធក្លិបមួយចំនួន មុនចូលរួមជាមួយ ព្រះខ័នរាជស្វាយរៀង ដោយកត្តាធំ ២

ក្លិបកម្ពុជាបានស្រោចស្រង់ជីវិតបាល់ទាត់ Takaki Ose ឲ្យជោគជ័យដ៏ត្រចះត្រចង់

Takaki Ose ទម្លាយរឿងទៅលេងតំបន់អឺរ៉ុបដំបូង យកលុយពីឪពុកម្តាយទៅចាយ

Takaki Ose មិននឹកស្មានខ្លួនមានតម្លៃរហូតទទួលបានសញ្ជាតិកម្ពុជា

កាន់ ម៉ូ និង Takaki ប្រហែលអាចជួយ កម្ពុជា បានក្នុងពាន ASEAN Championship