កីឡាបាល់ទឹក Archives - Kampuchea Thmey Daily

កីឡាករ អ៊ុក វន្ថា ចែករំលែកបទពិសោធល្អៗពីការលេងកីឡាបាល់ទឹក ២ឆ្នាំមកនេះ

Sina Noun — Wed, 03 Sep 2025 08:00:21 +0000

កីឡាករបាល់ទឹក អ៊ុក វន្ថា ថាបន្ទាប់ពីហ្វឹកហាត់ និងប្រកួតបាល់ទឹកប្រហែល ២ឆ្នាំមកនេះគឺកីឡាមួយនេះបានធ្វើឲ្យខ្លួនមានភាពសប្បាយរីករាយ មានសុខភាពល្អ ចេះសម្របខ្លួនឲ្យនៅក្នុងទឹកបានយូរទៀតផង។

ទិដ្ឋភាពប្រកួតបាល់ទឹកកន្លងទៅ

អ៊ុក វន្ថា បានឲ្យដឹងថា តាមបទពិសោធរយៈប្រហែល ២ឆ្នាំមកនេះការលេងបាល់ទឹកនេះគឺបានធ្វើឲ្យខ្លួនមានភាពសប្បាយរីករាយ ចេះសាមគ្គីគ្នា ចេះហែលទឹក មានសុខភាពល្អ និងធ្វើឲ្យចេះសម្របខ្លួនឲ្យនៅក្នុងទឹកបានយូរ និងអាចលេងបាល់នៅក្នុងទឹកបាន។

កីឡាករ អ៊ុក វន្ថា

ការលេងបាល់ទឹកនេះគឺត្រូវការកម្លាំងខ្លាំង និងមានបច្ចេកទេសច្រើនទើបអាចដណ្ដើមយកជ័យជម្នះលើដៃគូប្រកួតបាន។ លេងកីឡាមួយនេះមានអារម្មណ៍ប្លែកម្យ៉ាងខុសពីលេងកីឡាផ្សេងៗដោយសារវាតម្រូវឲ្យលេងក្នុងទឹក មានហែលទឹកផង និងមានបាល់ផង។

ទិដ្ឋភាពប្រកួតបាល់ទឹកកន្លងទៅ

បញ្ជាក់ដែរថា កីឡាបាល់ទឹកជាប្រភេទកីឡាថ្មីមួយដែលទើបចូលមកកាន់ប្រទេសកម្ពុជាប្រហែល ២-៣ ឆ្នាំនោះទេ។ សម្រាប់កម្ពុជាកំពុងតែដំណើរការអភិវឌ្ឍន៍ប្រភេទកីឡាមួយនេះជាបន្តបន្ទាប់ដូចជាមានវគ្គបណ្ដុះបណ្ដាលគ្រូបង្វឹក ការប្រកួតមិត្តភាពជាតិ និងជាតិ មិត្តភាពអន្តរជាតិ និងមានការហ្វឹកហាត់ផងដែរ៕

ទិដ្ឋភាពប្រកួតបាល់ទឹកកន្លងទៅ

អត្ថបទដោយ៖ នួន ស៊ីណា

The post កីឡាករ អ៊ុក វន្ថា ចែករំលែកបទពិសោធល្អៗពីការលេងកីឡាបាល់ទឹក ២ឆ្នាំមកនេះ appeared first on Kampuchea Thmey Daily.

ក្រុមបាល់ទឹកកម្ពុជា ចាញ់ សិង្ហបុរី ១៥-១២ ប៉ុន្តែបង្ហាញពីភាពរីកចម្រើនលើការហ្វឹកហាត់

Sina Noun — Mon, 05 May 2025 04:30:03 +0000

ក្រុមកីឡាបាល់ទឹកជម្រើសជាតិកម្ពុជា ចាញ់ សិង្ហបុរី ១៥-១២ ក្នុងជំនួបមិត្តភាពអន្តរជាតិកាលល្ងាចថ្ងៃទី៣ ខែឧសភា ឆ្នាំ២០២៥ នៅអាងទឹក នៃពហុកីឡដ្ឋានជាតិ។

ទិដ្ឋភាពប្រកួត (រូបភាពផេកសហព័ន្ធ)

អគ្គលេខាធិការសហព័ន្ធលោក ហែល គិរី បានឲ្យដឹងថា ប្រទេសសិង្ហបុរីនេះហើយដែលជាម្ចាស់មេដាយមាស កាលពីស៊ីហ្គេម លើកទី៣២ នៅកម្ពុជាកន្លងទៅ។ រំលឹកកាលស៊ីហ្គេមនៅកម្ពុជាពេលនោះគឺសិង្ហបុរី យកឈ្នះលើកម្ពុជាជាច្រើនគ្រាប់ក្នុងប្រភេទកីឡាបាល់ទឹកនេះ។

ទិដ្ឋភាពប្រកួត (រូបភាពផេកសហព័ន្ធ)

លោក ហែម គិរី បន្ថែមទៀតថា លទ្ធផលចាញ់-ឈ្នះ គ្នាលើកនេះគឺមិនអាក្រក់សម្រាប់ក្រុមកម្ពុជានោះទេចំនួនពិន្ទុប្រដំប្រសងគ្នា វាខុសពីការប្រកួតគ្នានៅស៊ីហ្គេមលើកមុន។ យ៉ាងណាលោកឃើញពីភាពរីកចម្រើនរបស់ក្រុមបាល់ទឹកកម្ពុជាតាមរយៈការខំប្រឹងប្រែងហ្វឹកហាត់កន្លងទៅដោយចាញ់ក្រុមខ្លាំងសិង្ហបុរីមិនច្រើនដូចមុន។

ទិដ្ឋភាពប្រកួត (រូបភាពផេកសហព័ន្ធ)

អគ្គលេខាធិការខាងលើបន្ថែមទៀតថា បាល់ទឹកនេះជាកីឡាថ្មីសម្រាប់កម្ពុជា ដូច្នេះកីឡាករទើបតែបានហ្វឹកហាត់រយៈពេលប៉ុន្មានឆ្នាំនោះទេ។ បើទោះជាថ្មីមែនតែក្រុមកម្ពុជាបង្ហាញពីភាពរីកចម្រើនខ្លាំងលើសមត្ថភាពប្រកួតហើយពិសេសនោះគឺឆន្ទៈខ្ពស់លើការប្រកួត និងប្រកួតដោយការខំប្រឹងអស់ពីសមត្ថភាព។

បញ្ជាក់ដែរថា ការប្រកួតបាល់ទឹកមិត្តភាពអន្តរជាតិរវាងកម្ពុជា និងសិង្ហបុរី នេះធ្វើឡើងកាលពីល្ងាចថ្ងៃទី៣ ខែឧសភា ឆ្នាំ២០២៥ នៅក្នុងអាងទឹកពហុកីឡដ្ឋានជាតិ៕

ទិដ្ឋភាពប្រកួត (រូបភាពផេកសហព័ន្ធ)

អត្ថបទដោយ៖ នួន ស៊ីណា

The post ក្រុមបាល់ទឹកកម្ពុជា ចាញ់ សិង្ហបុរី ១៥-១២ ប៉ុន្តែបង្ហាញពីភាពរីកចម្រើនលើការហ្វឹកហាត់ appeared first on Kampuchea Thmey Daily.

គួន ម៉ុម ផ្តាំទៅ សុវណ្ណនាថ លេងទម្រង់អ្វីក៏ព្រមឲ្យតែលក្ខណៈអាជីព

chean virakbot — Mon, 29 Jan 2024 02:19:32 +0000

កីឡាករបាល់ទះជម្រើសជាតិកម្ពុជាដ៏ឆ្នើម គួន ម៉ុម បានយល់ព្រមទទួលគ្រប់ទម្រង់សម្រាប់ជំនួបមិត្តភាពជាមួយអ្នកលេងបាល់ទះដ៏ល្បី រ៉េត សុវណ្ណនាថ ប៉ុន្តែសំណូមពរឲ្យលេងលក្ខណៈស្តង់ដាអាជីពដើម្បីជាគំរូដល់ក្មេងៗជំនាន់ក្រោយ។

រ៉េត សុវណ្ណនាថ បានប្រកាសជួបសមាជិកវិសាខា គួន ម៉ុន និងមិត្តរួមអាជីពមួយចំនួនទៀតសម្រាប់ជំនួបមិត្តភាពខ្លាំងប៉ះខ្លាំងដែលអាចជា៣ទល់៣ ឬ៤ទល់៤ដើម្បីបង្កើតភាពសប្បាយរីករាយទាំងសាមីខ្លួន និងដល់អ្នកទស្សនា។ ទោះបីជាយ៉ាងណា សុវណ្ណនាថ មិនមែនជាកីឡាករលេងបាល់ទះលក្ខណៈអាជីព និងស្តង់ដាអន្តរជាតិទេ ខណៈ គួន ម៉ុម ជាកីឡាករបាល់ទះអាជីពពិតប្រាកដ។

ក្នុងបទសម្ភាសជាមួយសារព័ត៌មាន«កម្ពុជាថ្មី» គួន ម៉ុម បាននិយាយថា ៖«ភាគរយតិច និយាយបង្ហើបតិចចុះ ប្រហែលជាចប់លីគ អត់អាចមានពេលជាមួយគាត់ (សុវណ្ណនាថ) ច្រើនទេ ពីព្រោះលាក់ប្រទេសសិនដែលត្រូវទៅ សុំលាក់សិន តែចុះកុងត្រារួចហើយ។ ចប់ប្រកួតលីគនេះគឺពេលខ្លីមែនទែន ត្រូវលេងពានខែមីនាមួយទៀត ចាំមើលជាក់ស្តែងសិន។ ប៉ុន្តែបើគាត់ទទូចចង់បែបនេះ ឲ្យតែប៉ះសេដាច់ អាចខ្ញុំឆ្លងទៅថ្នាក់ដឹកនាំដើម្បីសុំយោបល់ដើម្បីលេងមិត្តភាពជាមួយគាត់ ដើម្បីឲ្យសកម្មភាពបាល់ទះកាន់តែផុសផុលទៀត តែខ្ញុំត្រូវការលេងបែបស្តង់ដា។ គាត់រើសអី យកពីខាងណា រើសចុះ ឲ្យតែលក្ខណៈប៉ះសេស្តង់ដា ព្រោះខ្ញុំចង់បង្ហាញលក្ខណៈអាជីព បច្ចេកទេសល្អៗដល់ប្អូនៗជំនាន់ក្រោយរៀនសូត្រតាម»។

«យើងអត់បន្ទោសគាត់ទេ ដោយសារគាត់មិនមែនជាអ្នកហាត់អាជីព អីចឹងបំណាច់យើងលេង បង្ហាញជាវីដេអូហើយ យើងគួរនាំគ្នាលេងលក្ខណៈស្តងដា អាជីព បច្ចេកទេសល្អៗដើម្បីជាគំរូក្នុងការផ្សព្វផ្សាយ។ លេងប៉ុន្មានទល់ប៉ុន្មាន ខ្ញុំទទួលតែទាំងអស់ហ្នឹង ហើយដឹងតែជួបគាត់ហើយ ពីព្រោះគាត់ឆ្លងទ្វីបចង់ជួបយើង។ ខ្ញុំសូមផ្ញើជូនបង សុវណ្ណនាថ បន្ទាប់ពីខ្ញុំជួយក្លិបក្នុងតេជោលីគរួចរាល់ ខ្ញុំនឹងឆ្លៀងលេងជាមួយបង ដើម្បីឲ្យបងសប្បាយចិត្ត ព្រោះគាត់ខំឆ្លងទ្វីបមក ចង់ជួបពួកខ្ញុំ២ខែហើយ»។

កាលពីប៉ុន្មានខែមុន រ៉េត សុវណ្ណនាថ បានទៅរស់នៅសហរដ្ឋអាមេរិកជាមួយភរិយា ប៉ុន្មានថ្មីៗនេះរូបគេបានវិលត្រឡប់មកប្រទេសកម្ពុជាវិញជាមួយនឹងការប្រកួតចង់ជួបតារាបាល់ទះឆ្នើម គួន ម៉ុម។

គួន ម៉ុម កំពុងជួយក្លិបបាល់ទះវិសាខាទទួលបានជ័យជម្នះ១៨លើកជាប់គ្នាក្នុងលីគបាល់ទះកំពូលកម្ពុជា ហើយជាក្រុមដែលត្រូវបានគេរំពឹងក្លាយជាជើងឯកតេជោលីគរដូវកាលដំបូងនេះ។ ជាពិសេសរូបគេបានបង្ហើបពីការចុះកុងត្រារួចរាល់ក្នុងការទៅលេងនៅក្រៅប្រទេស៕

អត្ថបទ៖ វីរបុត្រ

The post គួន ម៉ុម ផ្តាំទៅ សុវណ្ណនាថ លេងទម្រង់អ្វីក៏ព្រមឲ្យតែលក្ខណៈអាជីព appeared first on Kampuchea Thmey Daily.

Messi, Mbappe និង Benzema ក្លាយជាបេក្ខភាពចុងក្រោយសម្រាប់ពានរង្វាន់កីឡាករល្អបំផុតរបស់ FIFA

Sorn Phanith — Sat, 11 Feb 2023 07:28:14 +0000

មិត្តរួមក្រុម Paris Saint-Germain កីឡាករ Lionel Messi និង Kylian Mbappe ត្រូវបានជ្រើសរើសក្នុងបញ្ជីចុងក្រោយសម្រាប់ពានរង្វាន់កីឡាករល្អបំផុតរបស់ FIFA (The Best FIFA Men’s Player Award) ឆ្នាំ២០២២។ Karim Benzema ខ្សែប្រយុទ្ធជួរមុខរបស់ Real Madrid គឺជាបេក្ខភាពចុងក្រោយផងដែរ។

បញ្ជីសម្រាំងដើមចំនួន ១៤ នាក់ ត្រូវបានកាត់បន្ថយមកត្រឹម ៣ នាក់កាលពីថ្ងៃសុក្រ ដោយមានអ្នកឈ្នះ ២ សម័យកាល Robert Lewandowski ក្នុងចំណោមកីឡាករដែលត្រូវកាត់ចេញពីបញ្ជីនេះ។

អ្នកឈ្នះនឹងត្រូវបានប្រកាសជាផ្លូវការ ហើយពានរង្វាន់របស់គេត្រូវប្រគល់ជូននៅថ្ងៃទី ២៧ ខែកុម្ភៈ នៅឯពិធីប្រគល់ពានរង្វាន់បាល់ទាត់ល្អបំផុតរបស់ FIFA។ ពានរង្វាន់ឆ្នាំ ២០២២ គឺផ្អែកលើការបង្ហាញទម្រង់លេងរបស់កីឡាករនៅចន្លោះថ្ងៃទី ០៨ ខែសីហា ឆ្នាំ ២០២១ ដល់ថ្ងៃទី ១៨ ខែធ្នូ ឆ្នាំ ២០២២ ដែលជាថ្ងៃដែលការប្រកួតវគ្គផ្ដាច់ព្រ័ត្រពានរង្វាន់បាល់ទាត់ពិភពលោក (FIFA World Cup)។ ទាំងប្រធានក្រុមអាហ្សង់ទីន Messi និងតារាឆ្នើមវ័យក្មេងរបស់បារាំង Mbappe បានបញ្ចេញពន្លឺយ៉ាងត្រចះត្រចង់ក្នុងវគ្គផ្តាច់ព្រ័ត្រនោះ។

Mbappe រកបាន ៣ គ្រាប់ដើម្បីឈ្នះស្បែកជើងមាស World Cup ខណៈ Messi រកបាន ២ គ្រាប់នៅវគ្គផ្តាច់ព្រ័ត្រ ខណៈដែលអាហ្សង់ទីនបានយកឈ្នះដោយការស៊ុតបាល់ប៉េណាល់ទីបន្ទាប់ពីស្មើ ៣-៣។

Messi ត្រូវបានគេប្រគល់ពានរង្វាន់ FIFA World Cup Golden Ball ក្រោយចប់វគ្គផ្ដាច់ព្រ័ត្រ ដោយត្រូវបានគេបោះឆ្នោតជាកីឡាករល្អបំផុតប្រចាំការប្រកួត។

Benzema មិនមានវត្តមាននៅកាតា ឆ្នាំ ២០២២ ដោយសាររបួសក្នុងពេលហ្វឹកហាត់ជាមួយបារាំង។ ការដែលគេមានឈ្មោះ គឺផ្អែកលើទម្រង់ជាមួយក្លិបដ៏អស្ចារ្យ នៅក្នុងរដូវកាល ២០២១/២២។ Benzema បានស៊ុតបញ្ចូលទីបាន ៤៤ គ្រាប់ ក្នុង ៤៦ ប្រកួតសម្រាប់ក្រុម Real Madrid ដោយបានជួយក្រុមរបស់គេឱ្យលើកពាន La Liga, UEFA Champions League និង Supercopa de Espana។

ដោយឡែកចំពោះពានរង្វាន់គ្រូបង្វឹកបុរសល្អបំផុតរបស់ FIFA (The Best FIFA Men’s Coach Award) ក៏ជ្រើសរើសបាន ៣ នាក់ ចុងក្រោយដូចគ្នា គឺលោក Pep គ្រូបង្វឹករបស់ក្លិប Manchester City, លោក Carlo Ancelotti គ្រូបង្វឹករបស់ Real Madrid និងលោក Lionel Scaloni គ្រូបង្វឹកជម្រើសជាតិអាហ្សង់ទីន។ អ្វីដែលគួរឱ្យចាប់អារម្មណ៍ ទាំងលោក Ancelotti, Guardiola ឬ Scaloni មិនដែលឈ្នះពានរង្វាន់នេះពីមុនមកទេ។ ជាការពិតណាស់ លោក Guardiola គឺជាមនុស្សតែម្នាក់គត់ក្នុងចំណោមគ្រូទាំងបី ដែលបានឡើងទៅកាន់បញ្ជី ៣ នាក់ចុងក្រោយ ដោយឈរលេខ ៣ កាលពីឆ្នាំមុន និងលេខ ២ ក្នុងឆ្នាំ ២០១៩។

អ្នកចាំទីវិញរួមមាន Yassine Bounou (មារ៉ុក), Thibaut Courtois (បែលហ្ស៊ីក) and Emiliano Martinez (អាហ្សង់ទីន) ស្ថិតក្នុងបញ្ជីអ្នកចាំទីដ៏ល្អបំផុតផងដែរ៕

ប្រភព៖ FIFA.com

អត្ថបទ៖ មន្នីរ័ត្ន

The post Messi, Mbappe និង Benzema ក្លាយជាបេក្ខភាពចុងក្រោយសម្រាប់ពានរង្វាន់កីឡាករល្អបំផុតរបស់ FIFA appeared first on Kampuchea Thmey Daily.

គ្រូ U-23 កម្ពុជា ថាចាញ់សិង្ហបុរី ១-០ ម្សិលមិញ ដោយសារកូនក្រុមខ្វះការទំនាក់ទំនងគ្នា

Sorn Phanith — Thu, 12 May 2022 01:46:12 +0000

ក្រុមជម្រើសជាតិអាយុក្រោម ២៣ ឆ្នាំកម្ពុជា បានប្រកួតចាញ់ សិង្ហបុរី ដោយលទ្ធផល ១-០ ក្នុងជំនួបទី ២ ប្រចាំពូល B នៃព្រឹត្តិការណ៍កីឡាអាស៊ីអាគ្នេយ៍ លើកទី ៣១ នៅប្រទេសវៀតណាម កាលពីល្ងាចថ្ងៃទី ១១ ខែឧសភា ឆ្នាំ ២០២២ ម្សិលមិញ។

បរាជ័យនេះបានធ្វើឱ្យ លោក Ryu Hirose គ្រូបង្វឹកនៃក្រុម U-23 កម្ពុជា បង្ហើបឱ្យដឹងថា គឺដោយសារកង្វះនៃការទំនាក់ទំនងគ្នា ទើបនាំបរាជ័យ ជាពិសេសលើការបញ្ចប់ទី។

លោក Ryu Hirose បាននិយាយក្រោយចប់ការប្រកួតថា៖ «នេះគឺជាការប្រកួតដ៏លំបាកមួយ។ យើងខកខានឱកាសល្អៗជាច្រើន ហើយត្រូវទទួលបានលទ្ធផលដ៏ក្រៀមក្រំ។ ការទំនាក់ទំនងគ្នារវាងកីឡាករគឺមិនល្អ នោះហើយជាមូលហេតុដែលធ្វើឲ្យការទាត់បញ្ចប់ទីមិនសូវល្អ ហើយការបញ្ចូនបាល់ក៏មិនល្អដូចគ្នា។ យើងនឹង ធ្វើការកែតម្រូវ។ យើងក៏មិនមានសំណាងក្នុងការបញ្ចប់ទី នេះប៉ះពាល់ដល់អារម្មណ៍របស់កីឡាករ។ ខ្ញុំសង្ឃឹមថាកីឡាករនឹងមានភាពចាស់ទុំជាងមុន។»

ក្នុងការប្រកួតកម្ពុជា ព្យាយាមដាក់សម្ពាធទៅលើសិង្ហបុរី ជាមួយនឹងឱកាសទាត់ទីច្រើនជាងនៅត្រឹមដើមវគ្គទី១។ យ៉ាងណាមិញ ការប្រកួតអូសបន្លាយដល់នាទី ៣៦ សិង្ហបុរីឯណោះវិញបានរកគ្រាប់បាល់នាំមុខមុនដោយតែតបញ្ចូលទីដោយកីឡាករ Saifullah Akbar។ បន្ទាប់មកទៀតកម្ពុជា ព្យាយាមរកគ្រាប់បាលតាមស្មើផងដែរប៉ុន្តែការស៊ុតរបស់កីឡាករ ញាន សុស៊ីដាន បានប៉ះនឹងបង្គោលទី ពេលវេលាដែលសេសសល់គ្រាប់បាល់នៅតែមិនកើតឡើង នាំឱ្យសិង្ហបុរី នាំមុខ កម្ពុជា ១ ទល់ ០ នៅវគ្គទី ១។

ចុលដល់វគ្គទី ២ កម្ពុជា ដែលត្រូវការគ្រាប់បាល់មកវិញជាចាំបាច់ បានដាក់សម្ពាធមកលើសិង្ហបុរី ភ្លាមៗក្រោយកែបាល់ ប៉ុន្តែពុំអាចធ្វើបានសម្រេចឡើយជាមួយនឹងឱកាសម្ដងជាពីរដង រួមទាំងបុកបង្គោលទីដូចគ្នា។ ដែលធ្វើឱ្យលទ្ធផលបញ្ចប់ជាផ្លូវការ កម្ពុជា បានចាញ់ សិង្ហបុរី ១-០។

ដោយឡែកគ្រូ U-23 សិង្ហបុរីវិញក៏បានលើកឡើងជុំវិញជ័យជម្នះដែរថា៖ «យើងមិនចុះចាញ់ទេ យើងរាងមានសំណាងបន្តិច។ យើងបានផ្តោតអារម្មណ៍រយៈពេល ៩០ នាទី ធ្វើតាមបច្ចេកទេស។ ជ័យជម្នះបានឆ្លុះបញ្ចាំងពីស្ថានភាពពិតនៃការប្រកួត។ បន្ទាប់ពីការប្រកួតដំបូង វាពិតជាអកុសលណាស់។ យើងរៀនលេងឱ្យបានកាន់តែល្អ យើងឆ្លៀតឱកាសល្អៗ។ យើងសក្តិសមនឹងឈ្នះ។»

សូមបញ្ជាក់ថា លទ្ធផលនេះធ្វើឱ្យកម្ពុជា ចុះមកឈរនៅលេខ ៤ ក្រោយប្រកួត ២ ដង ឈ្នះ ១ និងចាញ់ ១ មាន ៣ ពិន្ទុ ហើយប្រកួតបន្ទាប់ត្រូវជួបថៃ នៅថ្ងៃទី ១៤ ខែឧសភា ឆ្នាំ ២០២២ ខាងមុខ ខណៈសិង្ហបុរី ឈរនៅលេខ ២ មាន ៦ ពិន្ទុ ក្រោយប្រកួត ៣ ដង ឈ្នះ ២ និងចាញ់ ១ ខណៈប្រកួតបន្ទាប់ត្រូវជួបម៉ាឡេស៊ី៕

អត្ថបទ៖ មន្នីរ័ត្ន

The post គ្រូ U-23 កម្ពុជា ថាចាញ់សិង្ហបុរី ១-០ ម្សិលមិញ ដោយសារកូនក្រុមខ្វះការទំនាក់ទំនងគ្នា appeared first on Kampuchea Thmey Daily.

សហព័ន្ធខ្មែរកីឡាហែលទឹករៀបចំការប្រកួតបាល់ទឹកមិត្តភាពអបអរសាទរទិវាហែល ទឹកពិភពលោក

deth leng — Sun, 11 Jul 2021 09:13:53 +0000

សហព័ន្ធខ្មែរកីឡាហែលទឹក បានរៀបចំការ ប្រកួតកីឡាបាល់ទឹកមិត្តភាព ដើម្បីអបអរសាទរ ទិវាហែលទឹកពិភពលោក (FINA World Aquatics Day) ដែលជាសកម្មភាពមួយដើម្បីចូលរួមសហព័ន្ធហែលទឹកអន្តរជាតិ និងការបំផុសវិស័យកីឡាបាល់ទឹកកម្ពុជា កាលពីថ្ងៃទី ១០កក្កដា២០២១ នៅអាងហែលទឹកនៃពហុកីឡដ្ឋានជាតិមរតកតេជោ។

លោកហែម គីរី អគ្គលេខាធិការសហព័ន្ធខ្មែរកីឡាហែលទឹកបានមានប្រសាសន៍ថា ដើម្បីចូលរួមអបអរសាទរទិវាហែលទឹកពិភពលោក (FINA World Aquatics Day) សហព័ន្ធខ្មែរកីឡាហែលទឹកបានរៀបចំការប្រកួតបាល់ទឹកមិត្តភាពកម្សាន្ត ដោយមានការចូលរួមពីកីឡាករ -កីឡាការិនីហែលទឹកជម្រើសជាតិ របស់យើង ក្នុងគោលបំណងចង់បំផុស វិស័យកីឡាបាល់ទឹក តាមអនុសាសន៍ណែនាំរបស់លោកទេសរដ្ឋមន្រ្តី ប្រធានសហព័ន្ធ ដែលចង់បង្កើត និងបំផុសវិស័យកីឡាបាល់ទឹកនៅកម្ពុជាឲ្យមានការរីកដុះដាលកាន់តែច្រើន ហើយនិងមានសកម្មភាព។

លោកបានបន្តថា សកម្មនេះតាមពិតយើងត្រូវធ្វើឡើងតាំងពីខែឧសភា ប៉ុន្តែដោយសារបញ្ហាមេរោគ កូវីដ១៩ ដូច្នេះយើងមិនទាន់អាចរៀបចំរាល់ការប្រកួតនិងហ្វឹកហាត់ឲ្យបានជាប់ លាប់ឡើយដោយសារបញ្ហាមួយនេះ យើងនឹងប្រឹងប្រែងបន្តក្នុងគោលបំណង ដែលយើងធ្វើការប្រកួតនេះ គឺចង់អបអរសាទរ ទៅដល់ការរៀបចំទីវាលហែលទឹកពិភពលោកផងដែរ (FINA Aquatic Day 2021) និងចង់បំផុសវិស័យកីឡាបាល់ទឹក ដល់មហាជនឲ្យស្គាល់កីឡាបាល់ទឹកនេះកានតែច្រើន។

លោកអគ្គលេខាធិការបន្ថែមទៀតថា ការប្រកួតបាល់ទឹកមិត្តភាពដើម្បីអបអរសាទរ ទិវាហែល ទឹកពិភពលោក និងការបំផុសស្មារតីដល់ប្រជា ពលរដ្ឋកម្ពុជាឲ្យដឹង និងស្គាល់វិស័យកីឡាបាល់ទឹកកាន់តែច្រើន ហើយសហព័ន្ធមានគោល បំណងធ្វើការប្រកួតផ្សេងទៀតជាច្រើនតាមលទ្ធ ភាពដែលអាចធ្វើទៅបាន៕ អត្ថបទ៖ វិសិទ្ធ

The post សហព័ន្ធខ្មែរកីឡាហែលទឹករៀបចំការប្រកួតបាល់ទឹកមិត្តភាពអបអរសាទរទិវាហែល ទឹកពិភពលោក appeared first on Kampuchea Thmey Daily.

កីឡាបាល់ទឹក Archives - Kampuchea Thmey Daily

កីឡាករ​ អ៊ុក​ វន្ថា​ ចែក​រំលែក​បទ​ពិសោធ​ល្អៗ​ពី​ការ​លេង​កីឡា​បាល់ទឹក​ ២ឆ្នាំ​មក​នេះ​

ក្រុម​បាល់​ទឹក​កម្ពុជា​ ​ចាញ់​ សិង្ហបុរី​ ១៥-១២​ ប៉ុន្តែ​បង្ហាញ​ពី​ភាព​រីកចម្រើន​លើ​ការ​ហ្វឹកហាត់​

គួន ម៉ុម ផ្តាំទៅ សុវណ្ណនាថ លេងទម្រង់អ្វីក៏ព្រមឲ្យតែលក្ខណៈអាជីព

Messi, Mbappe និង Benzema ក្លាយជាបេក្ខភាពចុងក្រោយសម្រាប់ពានរង្វាន់កីឡាករល្អបំផុតរបស់ FIFA ​

គ្រូ U-23 កម្ពុជា ថាចាញ់សិង្ហបុរី ១-០ ម្សិលមិញ ដោយសារកូនក្រុមខ្វះការទំនាក់ទំនងគ្នា

សហព័ន្ធខ្មែរកីឡាហែលទឹករៀបចំការប្រកួតបាល់ទឹកមិត្ត​ភាពអបអរសាទរទិវាហែល ទឹកពិភពលោក

កីឡាករ អ៊ុក វន្ថា ចែករំលែកបទពិសោធល្អៗពីការលេងកីឡាបាល់ទឹក ២ឆ្នាំមកនេះ

ក្រុមបាល់ទឹកកម្ពុជា ចាញ់ សិង្ហបុរី ១៥-១២ ប៉ុន្តែបង្ហាញពីភាពរីកចម្រើនលើការហ្វឹកហាត់

Messi, Mbappe និង Benzema ក្លាយជាបេក្ខភាពចុងក្រោយសម្រាប់ពានរង្វាន់កីឡាករល្អបំផុតរបស់ FIFA

សហព័ន្ធខ្មែរកីឡាហែលទឹករៀបចំការប្រកួតបាល់ទឹកមិត្តភាពអបអរសាទរទិវាហែល ទឹកពិភពលោក