កីឡាម៉ារ៉ាតុងអន្តរជាតិចក្រភពអង្គរ Archives - Kampuchea Thmey Daily

ជាប់ចិត្តព្រឹត្តិការណ៍រត់តំបន់ប្រាសាទ បុរសជនជាតិបារាំងប្តេជ្ញាមកទៀតឆ្នាំក្រោយ

chean virakbot — Tue, 09 Dec 2025 08:24:22 +0000

លោក Mathias Hau ជាជនជាតិបារាំងអាយុ ២៤ឆ្នាំ បានប្តេជ្ញាវិលត្រឡប់មកកម្ពុជាទៀត បន្ទាប់ពីបានចូលរួមរត់ក្នុងព្រឹត្តិការណ៍កីឡាម៉ារ៉ាតុងអន្តរជាតិអង្គរ លើកទី៣០ កាលពីព្រឹកថ្ងៃអាទិត្យ ទី៧ ខែធ្នូ ឆ្នាំ ២០២៥ នៅប្រាសាទអង្គរវត្ត។

លោក Mathias បានប្រាប់ថា ខ្លួនកំពុងធ្វើការនៅប្រទេសវៀតណាម ហើយបានមកប្រទេសកម្ពុជាជាលើកដំបូងដើម្បីដើរកម្សាន្តផង និងចូលរួមរត់ក្នុងព្រឹត្តិការណ៍កីឡាម៉ារ៉ាតុងផង។ ព្រឹត្តិការណ៍កីឡារត់បែបទេសចរណ៍នេះពិតជាអស្ចារ្យដែលរៀបចំនៅតំបន់ប្រាសាទបុរាណ និងមានមនុស្សចូលរួមយ៉ាងច្រើនកុះករ។

បុរសវ័យ២៤ឆ្នាំ បាននិយាយថា ៖«ព្រឹត្តិការណ៍នេះពិតជាអស្ចារ្យសម្រាប់ខ្ញុំដែលមកកម្ពុជាជាលើកដំបូង។ នៅទីនេះពិតជាអស្ចារ្យ។ ខ្ញុំមិនធ្លាប់ទៅទីក្រុងភ្នំពេញទេ ប៉ុន្តែខេត្តសៀមរាប ពិតជាល្អខ្លាំង។ យើងបានធ្វើអ្វីជាច្រើន។ ព្រឹត្តិការណ៍ពាក់កណ្តាលម៉ារ៉ាតុងអន្តរជាតិជាមួយប្រាសាទអង្គរវត្តដ៏ស្រស់ស្អាត»។

ការរត់តាមដងផ្លូវអមដោយព្រៃប្រឹក្សាសងខាងផ្លូវដ៏ស្រស់ស្អាត នៅក្នុងតំបន់ប្រាសាទបុរាណ ដោយមានមនុស្សចូលរួមយ៉ាងច្រើនកុះករ បានទាក់ទាញបុរសជាតិបារាំងឲ្យស្រឡាញ់ជាប់ចិត្ត និងប្តេជ្ញាមកចូលរួមទៀតនៅឆ្នាំក្រោយ។

លោក Mathias បាននិយាយថា ៖«ខ្ញុំរស់នៅវៀតណាម អីចឹងច្បាស់ណាស់ ខ្ញុំនឹងមកទីនេះទៀត ពីព្រោះនេះជាប្រទេសដ៏ស្រស់ស្ងាត ហើយប្រជាជនរួសរាយរាក់ទាក់។ ខ្ញុំមានគ្នាមួយក្រុមជាជនជាតិបារាំង ហើយយើងមិនសូវបានរត់ច្រើនទេ អីចឹងពិបាកខ្លាំង តែបើមើលពីទិដ្ឋភាព និងអ្នកចូលរួមពិតជាសប្បាយរីករាយ»។

លោកបានសង្កត់ធ្ងន់ថា ៖«ឆ្នាំក្រោយ ខ្ញុំនឹងរត់ចម្ងាយ ៤២គីឡូម៉ែត្រនៅប្រាសាទអង្គរវត្តទៀត។ កម្ពុជាគឺជាប្រទេសមានសុវត្ថិភាព។ យើងឃើញហើយថា ព្រឹត្តិការណ៍រត់ម៉ារ៉ាតុងមានអ្នកចូលរួមរាប់ពាន់ ហើយមានសុវត្ថិភាព។ ខ្ញុំដឹងថា មានបញ្ហានៅព្រំដែន ហើយសង្ឃឹម អ្វីៗនឹងល្អប្រសើរឡើងវិញឆាប់ៗ»។

ព្រឹត្តិការណ៍កីឡាទេសចរណ៍«ពាក់កណ្តាលម៉ារ៉ាតុងអន្តរជាតិអង្គរ» លើកទី៣០ បានបំបែកកំណត់ត្រា២៩ឆ្នាំរបស់ខ្លួនដែលមានអ្នកចូលរួមច្រើនបំផុតរហូតដល់ជាង ១៦០០០នាក់ មកពី ៨៦ ប្រទេសទូទាំងពិភពលោក ក្នុងនោះជនជាតិខ្មែរជាង ១៣០០០នាក់ និងជនជាតិបរទេសជាង ៣០០០នាក់។

លោក សែម ផល្លា នាយកម៉ារ៉ាតុងកម្ពុជា បានឲ្យដឹងថា កំណត់ត្រាអ្នកចូលរួមច្រើនបំផុតនេះគឺជាអ្វីដែលអ្នករៀបចំចង់បាន ប៉ុន្តែព្រឹត្តិការណ៍នេះបានបិទការចុះឈ្មោះចូលរួមមុន ១ ខែដោយសារខ្វះសម្ភារមានដូចជា មេដាយ និងស្លាកលេខជាដើម។ ប្រសិនបើបន្តបើកចុះឈ្មោះ អ្នកចូលរួមអាចចន្លោះពី១៨០០០ ដល់ ២០០០០នាក់៕

អត្ថបទ៖ វីរបុត្រ

The post ជាប់ចិត្តព្រឹត្តិការណ៍រត់តំបន់ប្រាសាទ បុរសជនជាតិបារាំងប្តេជ្ញាមកទៀតឆ្នាំក្រោយ appeared first on Kampuchea Thmey Daily.

ទិវារត់ម៉ារ៉ាតុងអង្គរនាខែធ្នូ រំពឹងរកបានប្រាក់ជាង១០ម៉ឺនដុល្លារដើម្បីសប្បុរសធម៌

chean virakbot — Sat, 28 Sep 2024 00:32:30 +0000

ព្រឹត្តិការណ៍រត់ប្រណាំងអន្តរជាតិពាក់កណ្តាលម៉ារ៉ាតុងអង្គរ លើកទី២៩ នៅថ្ងៃទី១ ខែធ្នូ ឆ្នាំ២០២៤ នៅមុខប្រាសាទអង្គរវត្ត ខេត្តសៀមរាប រំពឹងរៃអង្គាសបានប្រាក់ជាង១០ម៉ឺនដុល្លារអាមេរិកដើម្បីកិច្ចការមនុស្សធម៌។

ព្រឹត្តិការណ៍លើកទី២៩ នឹងមានអ្នកចូលរួមជាងម៉ឺននាក់ដែលជាចំនួនច្រើនបំផុតមិនធ្លាប់មាន ក្រោយពេលវិបត្តិជំងឺកូវីដ-១៩ និងកាន់តែវិសេសវិសាលជាមួយវត្តមានដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាចូលរួមរត់កម្សាន្តដើម្បីសុខភាព។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជាបានថ្លែងក្នុងសន្និសីទសារព័ត៌មានកាលពីរសៀលថ្ងៃទី២៧ ខែកញ្ញា ឆ្នាំ២០២៤ ថា វត្តមានចូលរួមរត់របស់សម្តេចធិបតីនាយករដ្ឋមន្ត្រីនៃកម្ពុជាគឺជាមហាកិត្តិយសសម្រាប់ទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ លើកទី២៩ និងអ្នកចូលរួមទាំងអស់។ ការចូលរួមរបស់សម្តេចធិបតីគឺរឹតតែជំរុញឲ្យព្រឹត្តិការណ៍ទទួលបានជោគជ័យ និងមានអ្នកចូលរួមច្រើនទ្វេឡើង។

លោក សែម ផល្លា នាយកប្រតិបត្តិម៉ារ៉ាតុងកម្ពុជា បានលើកឡើងថា ទិវារត់ពាក់កណ្តាលម៉ារ៉ាតុងអន្តរជាតិអង្គរគឺជាព្រឹត្តិការណ៍រត់ដែលទទួលបានជោគជ័យបំផុត។ កាលពីជិត៣០ឆ្នាំមុន អ្នកចូលរួមប្រមាណក្រោម៥០០នាក់ប៉ុណ្ណោះសម្រាប់ព្រឹត្តិការណ៍លើកទី១ ប៉ុន្តែឆ្នាំបន្តបន្ទាប់មកអ្នកចូលរួមបានកើនឡើងជាលំដាប់រហូតដល់ជាង១ម៉ឺននាក់។

ទោះជាយ៉ាងណា ក្រោយវិបត្តិកូវីដ-១៩ អ្នកចូលរួមបានថយចុះខ្លះ ប៉ុន្តែសម្រាប់លើកទី២៩ នាថ្ងៃអាទិត្យ ទី១ ខែធ្នូ ឆ្នាំ២០២៤ នឹងមានអ្នកចូលរួមជាង១ម៉ឺននាក់ ហើយរំពឹងមានអ្នកចូលរួមច្រើនបំផុតរហូតបំបែកកំណត់ត្រាប្រវត្តិសាស្ត្ររបស់ខ្លួនក្នុងរយៈពេល៣០ឆ្នាំកន្លងទៅ។

ការចូលរួមយ៉ាងច្រើនពីជនជាតិខ្មែរ និងអន្តរជាតិជាចំណែកដ៏សំខាន់ក្នុងការប្រមូលបានថវិកាដើម្បីកិច្ចការមនុស្សធម៌។ ក្នុងសន្និសីទសារព័ត៌មានតំណាងក្រុមហ៊ុន មេនូឡាយហ្វ៍ ខេមបូឌា ដែលដៃគូឧបត្ថម្ភបានថ្លែងថា ក្រុមហ៊ុនរំពឹងប្រមូលបានថវិកាប្រមាណ១០ម៉ឺនដុល្លារអាមេរិក។ ថវិកាដែលរំពឹងនេះគឺទទួលបានពីការចូលរួមរបស់បុគ្គលិកក្រុមហ៊ុនទូទាំងពិភពលោកដូចដែលធ្លាប់ធ្វើកន្លងមក។

តំណាងក្រុមហ៊ុនបានបញ្ជាក់ថា ចាប់ពីបានឧបតត្ថម្ភទិវារត់ពាក់កណ្តាលម៉ារ៉ាអន្តរជាតិអង្គរតាំងពីឆ្នាំ២០១៤មកពោលគឺរយៈពេល១១ឆ្នាំហើយ ក្រុមហ៊ុនប្រមូលបានថវិកាប្រមាណ៦៥ម៉ឺនដុល្លារអាមេរិកដើម្បីកិច្ចការមនុស្សធម៌។

ព្រឹត្តិការណ៍រត់ពាក់កណ្តាលម៉ារ៉ាតុងអន្តរជាតិអង្គរនេះមាន៤វិញ្ញាសាគឺ មានចម្ងាយ២១គីឡូម៉ែត្រ ចម្ងាយ១០គីឡូម៉ែត្រ ចម្ងាយ៥គីឡូម៉ែត្រ និងរត់កម្សាន្ដ៣គីឡូម៉ែត្រ ខណៈសម្តេចធិបតីនាយករដ្ឋមន្ត្រីនឹងចូលរួមរត់ចម្ងាយ៥គីឡូម៉ែត្រ។

ក្នុងសន្និសីទសារព័ត៌មានកាលពីថ្ងៃទី២៧ ខែកញ្ញា ឆ្នាំ២០២៤ ក៏មានការប្រគល់ថវិកាសប្បុរសធម៌ដែលជាថវិកាព្រឹត្តិការណ៍ឆ្នាំ២០២៣។ មន្ទីរពេទ្យកុមារគន្ធបុប្ផាទទួលបាន៥០០០ដុល្លារ អង្គការ Cambodia Trust ទទួលបាន២៥០០ដុល្លារ អង្គការជនពិការអន្តរជាតិ (Handicap International) ទទួលបាន២០០០ដុល្លារ និង អង្គការបេះដូងមាសទទួលបាន១០៥០០ដុល្លារសម្រាប់បែងចែកបន្តដល់អង្គការសប្បុរសធម៌ចំនួន៦ផ្សេងទៀត៕

អត្ថបទ៖ វីរបុត្រ

The post ទិវារត់ម៉ារ៉ាតុងអង្គរនាខែធ្នូ រំពឹងរកបានប្រាក់ជាង១០ម៉ឺនដុល្លារដើម្បីសប្បុរសធម៌ appeared first on Kampuchea Thmey Daily.

វ៉ាន់ ភារ៉ា ថា ទទួលឈ្នះមេដាយមាស៤២គីឡូម៉ែត្រមុខអង្គរ ឡើងព្រឺសម្បុរ

chean virakbot — Mon, 05 Aug 2024 03:58:51 +0000

កីឡាកររត់ប្រណាំងជម្រើសជាតិកម្ពុជា វ៉ាន់ ភារ៉ា ទទួលបានចំណាត់ថ្នាក់លេខ១លើវិញ្ញាសារត់ចម្ងាយ៤២គីឡូម៉ែត្រ ក្នុងព្រឹត្តិការណ៍ទិវារត់ប្រណាំងម៉ារ៉ាតុងចក្រភពអង្គរអន្តរជាតិ លើកទី៩ នៅព្រឹកថ្ងៃអាទិត្យ ទី៤ ខែសីហា ឆ្នាំ២០២៤ នៅមុខប្រាសាទអង្គរវត្ត។

វ៉ាន់ ភារ៉ា បានប្រាប់ថា នេះជាលើកទី១ដែលខ្លួនបានប្រកួតចម្ងាយ៤២គីឡូម៉ែត្រ បន្ទាប់ពីធ្លាប់ប្រកួតចម្ងាយ១០គីឡូម៉ែត្រ និង២១គីឡូម៉ែត្រជាច្រើនលើក។ ការប្រកួតចម្ងាយយ៤២គីឡូម៉ែត្រនេះ រូបគេពិតជាមានក្តីរំភើបរីករាយ និងមានមោទនភាពដែលអាចប្រជែងជាមួយកីឡាករបរទេសខ្លាំងៗ។

កីឡាកររូបនេះបានលើកឡើងថា កីឡាករបរទេសបានចុះឈ្មោះចូលរួមប្រកួតគឺភាគច្រើនរត់ចម្ងាយ២១គីឡូម៉ែត្រ និង៤២គីឡូម៉ែត្រ។ ពួកគេមកពីក្រៅប្រទេសសុទ្ធតែល្អលើការរត់ចម្ងាយឆ្ងាយ ដូច្នេះលទ្ធផលនេះពិតជាអស្ចារ្យណាស់សម្រាប់ខ្លួន។

វ៉ាន់ ភារ៉ា បាននិយាយថា ៖«នៅមុខប្រាសាទអង្គរវត្ត ខ្ញុំឡើងឈរលើក្តារចំណាត់ថ្នាក់លេខ១ ធ្វើឲ្យខ្ញុំមានអារម្មណ៍ព្រឺសម្បុរ ដោយសារខ្ញុំមើលឃើញខ្លួនឯងឈរលេខ១ ហើយកីឡាករបរទេសលេខ២ លេខ៣»។

សមិទ្ធផលថ្មីនេះបានជំរុញឲ្យ វ៉ាន់ ភារ៉ា មានទំនុកចិត្តកាន់ខ្ពស់ក្នុងការបង្កើនសមត្ថភាពឆ្ពោះទៅរកលទ្ធផលកាន់តែល្អក្នុងព្រឹត្តិការណ៍កីឡាស៊ីហ្គេម ឆ្នាំ២០២៥ នៅប្រទេសថៃ។ កាលស៊ីហ្គេម ឆ្នាំ២០២៥ រូបគេទទួលបានចំណាត់ថ្នាក់លេខ៥ ខណៈប្រទេសឥណ្ឌូណេស៊ី ថៃ ម៉ាឡេស៊ី និងវៀតណាម សុទ្ធតែស្ថិតចំណាត់ថ្នាក់ល្អជាងខ្លួនលើវិញ្ញាសាចម្ងាយ៤២គីឡួម៉ែត្រ។ ទោះបីជាយ៉ាងណា បន្ទាប់ពីចប់ស៊ីហ្គេម ឆ្នាំ២០២៣ រូបគេបានស្គាល់ខ្លួនឯងកាន់តែច្បាស់ដែលបានជំរុញឲ្យបង្កើនការហ្វឹកហាត់ខ្លាំងក្នុងរយៈពេលមួយឆ្នាំចុងក្រោយ។

បុរសវ័យ២៨ឆ្នាំបាននិយាយថា ៖«រត់ចម្ងាយ៤២គីឡូម៉ែត្រនេះ ខ្ញុំឃើញចំណុចខ្សោយខ្លួនឯង ឲ្យតែដល់ចម្ងាយចន្លោះពី៣០ទៅ៤២គីឡូម៉ែត្រ ខ្ញុំចុះខ្សោយ។ អីចឹងខ្ញុំប្រឹងប្រែងបង្កើនការហ្វឹកហាត់សម្រាប់ចម្ងាយចាប់ពី៣០គីឡូម៉ែត្រឡើង»។

«ខ្ញុំបានប្រើថិរវេលាបំបែកកំណត់ត្រាខ្លួនឯងកាលពីស៊ីហ្គេម២០២៣ជាង១នាទី អីចឹងសល់រយៈពេលជាងមួយឆ្នាំទៀត ទើបដល់ស៊ីហ្គេម២០២៥ ខ្ញុំគិតថា ខ្ញុំកាន់តែល្អប្រសើរ។ ខ្ញុំជឿជាក់ និងមានទំនុកចិត្តខ្លួនឯងថា នឹងធ្វើកាន់តែល្អសម្រាប់ស៊ីហ្គេមនៅថៃ។ ខ្ញុំមិនហ៊ានសន្និដ្ឋានពីការឈានដល់កម្រិតមេដាយទេ តែខ្ញុំសង្ឃឹមថា នឹងធ្វើបានល្អជាងស៊ីហ្គេម ឆ្នាំ២០២៣»។ វ៉ាន់ ភារ៉ា បានបញ្ជាក់។

សូមបញ្ជាក់ថា ទិវារត់ប្រណាំងម៉ារ៉ាតុងអង្គរអន្តរជាតិ លើកទី៩ ឆ្នាំ២០២៤នេះមានគោលបំណងសំខាន់៣យ៉ាង។ គោលបំណងទី១គឺដើម្បីស្វែងរកថវិកាជួយដល់មន្ទីរពេទ្យគន្ធបុប្ផាដូចដែលបានធ្វើឡើងជារៀងរាល់ឆ្នាំ។ គោលបំណងទី២គឺដើម្បីអបអរសាទរដល់ការបើកការដ្ឋានសាងសង់ ព្រែកជិក ហ្វូណនតេជោ ដែលនឹងត្រូវបានបើកជាផ្លូវការនៅថ្ងៃចន្ទ ទី៥ ខែសីហា និងគោលបំណងទី៣ដើម្បីថែរក្សាបរិស្ថានក្នុងតំបន់បេតិកភណ្ឌអង្គរក្នុងការរួមចំណែកជំរុញផ្សព្វផ្សាយដល់វិស័យទេសចរណ៍ក្នុងប្រទេសកម្ពុជា។

ម៉ារ៉ាតុងពេញ (៤២គីឡូម៉ែត្រ) ផ្នែកបុរស

– លេខ១ កីឡាករកម្ពុជា វ៉ាន់ ភារ៉ា ប្រើថិរវេលា ២ម៉ោង ៤០នាទី និង ៥១វិនាទី
– លេខ២ កីឡាករជប៉ុន Yuki Kaneyama ប្រើថិរវេលា ២ម៉ោង ៤៧វិនាទី និង ២៩វិនាទី
– លេខ៣ កីឡាករវៀតណាម Dai Be Thanh ប្រើថិរវេលា ២ម៉ោង ៥៤នាទី និង ០៥វិនាទី

ម៉ារ៉ាតុងពេញ (៤២គីឡូម៉ែត្រ) ផ្នែកនារី

– លេខ១ កីឡាការិនីអៀកឡង់ Caitriona Jennings ប្រើថិរវេលា ៣ម៉ោង ០៥នាទី និង ៤៣.១៩វិនាទី
– លេខ២ កីឡាការិនីវៀតណាម Nguyen Thi Linh ប្រើថិរវេលា ៣ម៉ោង ១៣នាទី និង ៣៥.៥៤វិនាទី
– លេខ៣ កីឡាការិនីចិន Qi Wang ប្រើថិរវេលា ៣ម៉ោង ៤១នាទី និង ០៧.៨០វិនាទី

ពាក់កណ្ដាលម៉ារ៉ាតុង (២១គីឡូម៉ែត្រ) ផ្នែកបុរស

– លេខ១ កីឡាករកម្ពុជា Lai Terence ប្រើថិរវេលា ១ម៉ោង ១១នាទី និង ៥០.០៧វិនាទី
– លេខ២ កីឡាករកម្ពុជា អ៊ុក រ៉ូហ៊ីត ប្រើថិរវេលា ១ម៉ោង ១៤នាទី និង ៤៤.៦៧វិនាទី
– លេខ៣ កីឡាករកម្ពុជា Kuniaki Takizaki ប្រើថិរវេលា ១ម៉ោង ១៨នាទី និង ១៣.៥៩វិនាទី

ពាក់កណ្ដាលម៉ារ៉ាតុង (២១គីឡូម៉ែត្រ) ផ្នែកនារី

– លេខ១ កីឡាការិនីសង្ហបុរី Vernagoh Shilei ប្រើថិរវេលា ១ម៉ោង ៣៥ និង ៥៣.១៣វិនាទី
– លេខ២ កីឡាការិនីកម្ពុជា អេង មួយងីម ប្រើថិរវេលា ១ម៉ោង ៣៨នាទី និង ៤៦.១៦វិនាទី
– លេខ៣ កីឡាការិនីជប៉ុន Ota Natsuko ប្រើថិរវេលា ១ម៉ោង ៤០នាទី និង ៥៥.៧៨វិនាទី

ចម្ងាយ១០គីឡូម៉ែត្រផ្នែកបុរស

– លេខ១ កីឡាករកម្ពុជា ស៊ន ពិសី ប្រើថិរវេលា ៣៥នាទី និង ០៥.៥៣វិនាទី
– លេខ២ កីឡាករកម្ពុជា ឆន សុផាន ប្រើថិរវេលា ៣៦នាទី និង ០៦.៦២វិនាទី
– លេខ៣ កីឡាករហុងកុង Dickson Pang ប្រើថិរវេលា ៣៩នាទី និង ០.៤៦។

ចម្ងាយ១០គីឡូម៉ែត្រផ្នែកនារី

– លេខ១ កីឡាការិនីកម្ពុជា កាន់ ស្រីរ័ត្ន ប្រើថិរវេលា ៤១នាទី និង ២២.១៣វិនាទី
– លេខ២ កីឡាការិនីបែលហ្ស៊ិក Maena Limeiette ប្រើថិរវេលា ៤២នាទី និង ៤៣.៧៥វិនាទី
– លេខ៣ កីឡាការិនីហូឡង់ Klaske Feersma Haekstra ប្រើថិរវេលា ៤៣នាទី និង ៤៣.៨០វិនាទី

អត្ថបទ៖ វីរបុត្រ

The post វ៉ាន់ ភារ៉ា ថា ទទួលឈ្នះមេដាយមាស៤២គីឡូម៉ែត្រមុខអង្គរ ឡើងព្រឺសម្បុរ appeared first on Kampuchea Thmey Daily.

ទិវារត់ម៉ារ៉ាតុងអង្គរព្រឹកស្អែកជាផ្នែកមួយអបអរ ព្រែកជីកហ្វូណនតេជោ

chean virakbot — Sat, 03 Aug 2024 11:56:48 +0000

ទិវារត់ម៉ារ៉ាតុងអង្គរអន្តរជាតិ លើកទី៩ ព្រឹកថ្ងៃអាទិត្យ ទី៤ ខែសីហា ឆ្នាំ២០២៤ នៅមុខប្រាសាទអង្គរវត្ត មានគោលដៅសំខាន់៣យ៉ាងដោយមានអ្នកចូលរួមជាង៣ពាន់នាក់។

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការនៃគណៈកម្មាធិការជាតិអូឡាំពិកកម្ពុជា បានឲ្យដឹងថា ព្រឹត្តិការណ៍រត់ម៉ារ៉ាតុងអង្គរអន្តរជាតិ លើកទី៩ ឆ្នាំ២០២៤ មានអ្នកចុះឈ្មោះចំនួន៣០២១នាក់ ដែលកើនឡើងជាងឆ្នាំមុន២០%។ ប្រជាពលរដ្ឋខ្មែរចំនួន២២០៦នាក់ និងជនបរទេស៨១៥នាក់ ដែលមកពី៥១ប្រទេសផ្សេងគ្នា។ ក្នុងចំណោមជនបរទេសដែលបានចុះឈ្មោះចូលរួមប្រកួតគឺជនជាតិជប៉ុនច្រើនជាងគេលំដាប់លេខ១ បន្ទាប់មកជនជាតិចិនលំដាប់លេខ២ វៀតណាមលេខ៣ ចក្រភពអង់គ្លេសលេខ៤ និងថៃលេខ៥។

រដ្ឋលេខាធិការក្រសួងអប់រំ យុវជន និងកីឡាបានបញ្ជាក់ថា ទិវារត់ប្រណាំងម៉ារ៉ាតុងអង្គរអន្តរជាតិ លើកទី៩ ឆ្នាំ២០២៤នេះមានគោលបំណងសំខាន់៣យ៉ាង។ គោលបំណងទី១គឺដើម្បីស្វែងរកថវិកាជួយដល់មន្ទីរពេទ្យគន្ធបុប្ផាដូចដែលបានធ្វើឡើងជារៀងរាល់ឆ្នាំ។ គោលបំណងទី២គឺដើម្បីអបអរសាទរដល់ការបើកការដ្ឋានសាងសង់ ព្រែកជិក ហ្វូណនតេជោ ដែលនឹងត្រូវបានបើកជាផ្លូវការនៅថ្ងៃចន្ទ ទី៥ ខែសីហា និងគោលបំណងទី៣ដើម្បីថែរក្សាបរិស្ថានក្នុងតំបន់បេតិកភណ្ឌអង្គរក្នុងការរួមចំណែកជំរុញផ្សព្វផ្សាយដល់វិស័យទេសចរណ៍ក្នុងប្រទេសកម្ពុជា។

ព្រឹត្តិការណ៍រត់ម៉ារ៉ាតុងអង្គរអន្តរជាតិ លើកទី៩ មាន៤វិញ្ញាសា គឺម៉ារ៉ាតុងពេញចម្ងាយ៤២ម៉ែត្រ ដែលនឹងចាប់ចេញដំណើរវេលាម៉ោង៤:៣០នាទីទៀបភ្លឺ វិញ្ញាសាពាក់កណ្តាលម៉ារ៉ាតុងចម្ងាយ២១គីឡូម៉ែត្រចេញដំណើរវេលាម៉ោង៥:៣០នាទីព្រឹក វិញ្ញាសាចម្ងាយ១០គីឡូម៉ែត្រចេញដំណើរវេលាម៉ោង៥:៤០នាទីព្រឹក និងវិញ្ញាសារត់កម្សាន្តចម្ងាយ៣គីឡូម៉ែត្រ ចេញដំណើរវេលាម៉ោង៥:៥០នាទីព្រឹក។

ពិធីប្រកាសចេញដំណើរនឹងអញ្ជើញជាអធិបតីដោយឯកឧត្តមទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជា តំណាងដ៏ខ្ពង់ខ្ពស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា អភិបាលខេត្តសៀមរាប អភិបាលខេត្តរង និងឥស្សរជនជាច្រើនរូបទៀត៕

អត្ថបទ៖ វីរបុត្រ

The post ទិវារត់ម៉ារ៉ាតុងអង្គរព្រឹកស្អែកជាផ្នែកមួយអបអរ ព្រែកជីកហ្វូណនតេជោ appeared first on Kampuchea Thmey Daily.

ម៉ារ៉ាតុងចក្រភពអង្គរ២០២៤ មានអ្នកចុះឈ្មោះច្រើនជាងឆ្នាំមុន

chean virakbot — Thu, 25 Jul 2024 01:34:29 +0000

ព្រឹត្តិការណ៍កីឡាម៉ារ៉ាតុងអន្តរជាតិចក្រភពអង្គរ លើកទី៩ ឆ្នាំ២០២៤ នឹងធ្វើនៅថ្ងៃអាទិត្យ ទី៤ ខែសីហា នៅមុខប្រាសាទអង្គរវត្ត ខេត្តសៀមរាប ដែលពេលនេះមានអ្នកចុះឈ្មោះចូលរួមប្រកួតច្រើនជាងឆ្នាំមុនហើយ។

តាមគោលដៅកំណត់គឺយ៉ាងហោចណាស់ឲ្យបានអ្នកចុះឈ្មោះចូលរួមប្រកួតជាង៣ពាន់នាក់។ គិតត្រឹមថ្ងៃទី២៣ ខែកក្កដា ឆ្នាំ២០២៤ ការចុះឈ្មោះចូលរួមប្រកួតទាំងប្រជាជនខ្មែរ និងបរទេសបានជិតដល់គោលដៅកំណត់ហើយគឺទទួលបានចំនួន២៩២៤នាក់។

សម្រាប់ប្រជាជនកម្ពុជាមានចំនួន២១២២នាក់ និងជនបរទេសចំនួន៨០២នាក់។ ជនបរទេសដែលបានចុះឈ្មោះមកពី៣៦ប្រទេសផ្សេងគ្នាទូទាំងពិភពលោកគឺជប៉ុនមានអ្នកចុះឈ្មោះចូលរួមច្រើនជាងគេ ឈរនៅលំដាប់ទី១ ចិនលេខ២ និងវៀតណាម ឈរលេខ៣។

ចំពោះវិញ្ញាសាម៉ារ៉ាតុងពេញ (Full Marathon) ចម្ងាយ៤២គីឡូម៉ែត្រ មានអត្តពលិកចុះឈ្មោះរត់ ចំនួន៤៥៧នាក់។ វិញ្ញាសាពាក់កណ្តាលម៉ារ៉ាតុង (Haft Marathon) ចម្ងាយ២១គីឡូម៉ែត្រ មានអ្នកចុះឈ្មោះចំនួន៦៣០នាក់។ វិញ្ញាសាចម្ងាយ១០គីឡូម៉ែត្រមានអ្នកចុះឈ្មោះ១៣៨០នាក់ និងវិញ្ញាសារត់កម្សាន្តលក្ខណៈគ្រួសារ៣គីឡូម៉ែត្រ មានចំនួន៤៥៧នាក់។

កាលពីឆ្នាំ២០២៣កន្លងទៅ ការចុះឈ្មោះចូលរួមប្រកួតមានប្រមាណតែជាង២០០០នាក់ប៉ុណ្ណោះ ដូច្នេះមានន័យថា ឆ្នាំ២០២៤ទទួលបានអ្នកចុះឈ្មោះច្រើនជាងឆ្នាំមុន។

ព្រឹត្តិការណ៍កីឡាទេសចរណ៍នេះធ្វើឡើងដោយមានគោលដៅធំសំខាន់២យ៉ាងគឺទី១ដើម្បីជួយដល់វិស័យទេសចរណ៍។ នៅពេលជនបរទេសចុះឈ្មោះចូលរួមប្រកួតកាន់តែច្រើន នឹងជួយដល់វិស័យទេសចរណ៍កាន់តែច្រើនទាំងការធ្វើដំណើរ ការស្នាក់នៅ និងម្ហូបអាហារ។ ទី២ ថវិកាដែលសល់ពីការចំណាយលើការផលិតមេដាយ អាវយឹត និងស្លាកលេខសម្រាប់អ្នកចូលរួមទាំងអស់ នឹងប្រើប្រាស់សម្រាប់កិច្ចសប្បុរសធម៌ដូចជាជួយដល់មន្ទីរពេទ្យគន្ធបុប្លា មន្ទីរពេទ្យកុមារអង្គរ និងអង្គការសប្បុរសធម៌ជាច្រើនទៀត។

ព្រឹត្តិការណ៍កីឡាម៉ារ៉ាតុងអន្តរជាតិចក្រភពអង្គរ លើកទី៩ ឆ្នាំ២០២៤ មាន៤វិញ្ញាសាគឺចម្ងាយ៤២គីឡូម៉ែត្រ ចម្ងាយ២១គីឡូម៉ែត្រ ចម្ងាយ១០គីឡូម៉ែត្រ និងចម្ងាយ៥គីឡូម៉ែត្រ។ កីឡាម៉ារ៉ាតុងអន្តរជាតិចក្រភពអង្គរនេះជាព្រឹត្តិការណ៍រត់ម៉ារ៉ាតុងពេញ (Full Marathon) តែមួយគត់នៅក្នុងប្រទេសកម្ពុជាដែលមានចម្ងាយ៤២គីឡូម៉ែត្រ ខណៈព្រឹត្តិការណ៍ម៉ារ៉ាតុងផ្សេងៗទៀតសុទ្ធតែពាក់កណ្តាលម៉ារ៉ាតុងពោលគឺមានចម្ងាយឆ្ងាយបំផុតត្រឹមតែ២១គីឡូម៉ែត្រ៕

អត្ថបទ៖ វីរបុត្រ

The post ម៉ារ៉ាតុងចក្រភពអង្គរ២០២៤ មានអ្នកចុះឈ្មោះច្រើនជាងឆ្នាំមុន appeared first on Kampuchea Thmey Daily.

កម្ពុជាកំពុងជំរុញឲ្យជនជាតិចិនយ៉ាងតិច៥០០នាក់ចូលរួមម៉ារ៉ាតុងចក្រភពអង្គរ

chean virakbot — Thu, 20 Jun 2024 08:31:18 +0000

ព្រឹត្តិការណ៍កីឡាម៉ារ៉ាតុងអន្តរជាតិចក្រភពអង្គរ លើកទី៩ ឆ្នាំ២០២៤ នឹងធ្វើនៅថ្ងៃអាទិត្យ ទី៤ ខែសីហា នៅមុខប្រាសាទអង្គរវត្ត ខេត្តសៀមរាប ដែលថ្នាក់ដឹកនាំរំពឹងទទួលបានអ្នកចូលរួមជាតិ និងអន្តរជាតិច្រើនជាងឆ្នាំមុន។

លោក វ៉ាត់ ចំរើន

លោក វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជាបានឲ្យដឹងក្នុងសន្និសីទសារព័ត៌មាននៅទីស្នាក់ការនៃគណៈកម្មាធិការជាតិអូឡាំពិកកម្ពុជាថា គិតត្រឹមថ្ងៃទី២០ ខែមិថុនា ឆ្នាំ២០២៤ ការចុះឈ្មោះចូលរួមរត់ទទួលបានចំនួន១៣៧៦នាក់ហើយ។ ចំនួននេះប្រៀបធៀបនឹងឆ្នាំមុនគឺកើនឡើងបន្តិច ពីព្រោះឆ្នាំមុនអ្នកចុះឈ្មោះសរុបចុងក្រោយបានជាង២០០០នាក់។ ដូច្នេះទម្រាំដល់បិទការចុះឈ្មោះ អាចនឹងកើនឡើងចន្លោះពី២៥០០ទៅជាង៣០០០នាក់។

ទោះបីជាយ៉ាងណា ចំនួននៃការចុះឈ្មោះ បើប្រៀបធៀបនឹងឆ្នាំមុនៗ ជាពិសេសមុនវិបត្តិកូវីដ-១៩ គឺមានការថយចុះ។ លោក វ៉ាត់ ចំរើន បានលើកឡើងពីមូលហេតុថា បណ្តាលមកពីទីផ្សារចុះឈ្មោះជនជាតិចិនថយចុះពាក់ព័ន្ធនឹងបញ្ហាសេដ្ឋកិច្ច និងសុខមាលភាពសង្គមក្នុងរយៈពេលប៉ុន្មានឆ្នាំចុងក្រោយ។

ដើម្បីបង្កើនការចុះឈ្មោះពីប្រជាជនចិនត្រឡប់មកវិញ ថ្នាក់ដឹកនាំកីឡាដែលមានលោកទេសរដ្ឋមន្ត្រី ថោង ខុន ប្រធានគណៈកម្មាធិការជាតិអូឡាំពិកកម្ពុជាទទួលបន្ទុកអភិវឌ្ឍវិស័យកីឡាបានអញ្ជើញទៅប្រទេសចិនកាលពីពេលថ្មីៗដើម្បីធ្វើកិច្ចសហប្រតិបត្តិការជាមួយភាគីចិនក្នុងគោលបំណងបង្កើនការចុះឈ្មោះរបស់ជនជាតិចិន ក៏ដូចជារួមដៃគ្នារៀបចំព្រឹត្តិការណ៍ម៉ារ៉ាតុងនៅកម្ពុជាឲ្យកាន់តែល្អប្រសើរ។

លោក វ៉ាត់ ចំរើន មានប្រសាសន៍ថា ៖«ក្នុងខ្លឹមសារចុះហត្ថលេខាគឺ យើងផ្តល់អត្ថប្រយោជន៍គ្នាទៅវិញទៅមក។ ជាពិសេសគឺផ្តល់អ្នករត់ទៅវិញទៅមក។ ប្រសិនបើអ្នករត់ជនជាតិចិនអាជីពនៅខេត្តយូណាន១០០នាក់ ហើយយើងក៏មានអ្នករត់ជាអាជីព១០០នាក់ដែរគឺយើងនឹងផ្លាស់ប្តូរគ្នាដោយឥតគិតថ្លៃ។ ប៉ុន្តែក្រៅពីអ្នករត់អាជីព គឺយើងផ្តល់ឲ្យពួកគាត់ចុះឈ្មោះចូលរួមដូចគេឯងធម្មតា»។

តំណាងគណៈកម្មាធិការជាតិអូឡាំពិកកម្ពុជារូបនេះបានបន្តឲ្យដឹងទៀតថា កម្ពុជាកំពុងរង់ចាំនាប៉ុន្មានថ្ងៃខាងមុខទៀត ខាងភាគីចិននៅខេត្តយូណាននឹងបញ្ជាក់ពីចំនួនប៉ុន្មានរយនាក់ដែលត្រូវចូលរួមរត់ម៉ារ៉ាតុងចក្រភពអង្គរ។

លោកបានបញ្ជាក់ថា ៖«ឯកឧត្តមបណ្ឌិត ថោង ខុន កំពុងជំរុញលើរឿងនេះដែលយ៉ាងហោចណាស់ឲ្យមានការចូលរួម៥០០នាក់ពីភាគីចិន។ ឥឡូវនេះ យើងកំពុងរង់ចាំពីរដ្ឋបាល ឬអាជ្ញាធរខេត្តយូណានបញ្ជាក់ពីការចូលរួម ហើយយើងក៏ត្រូវត្រៀមលក្ខណៈសម្បត្តិដើម្បីធ្វើបដិសណ្ឋារកិច្ចពួកគាត់»។

កន្លងមកជនជាតិចិនចុះឈ្មោះឈានមុខគេក្នុងព្រឹត្តិការណ៍ម៉ារ៉ាតុងអន្តរជាតិនៅប្រទេសកម្ពុជា ប៉ុន្តែបច្ចុប្បន្នការចុះឈ្មោះគឺជនជាតិជប៉ុនឈានមុខគេ ដោយចិនធ្លាក់មលេខ២ បន្ទាប់មកមានជនជាតិម៉ាឡេស៊ី និងប្រទេសផ្សេងៗទៀត។

ព្រឹត្តិការណ៍កីឡាទេសចរណ៍នេះធ្វើឡើងដោយមានគោលដៅធំសំខាន់២យ៉ាងគឺទី១ដើម្បីជួយដល់វិស័យទេសចរណ៍។ នៅពេលជនបរទេសចុះឈ្មោះចូលរួមប្រកួតកាន់តែច្រើន នឹងជួយដល់វិស័យទេសចរណ៍កាន់តែច្រើនទាំងការធ្វើដំណើរ ការស្នាក់នៅ និងម្ហូបអាហារ។ ទី២ដើម្បីកិច្ចការសប្បុរសធម៌។ ថវិកាដែលសល់ពីការចំណាយលើការផលិតមេដាយ អាវយឹត និងស្លាកលេខសម្រាប់អ្នកចូលរួមទាំងអស់ នឹងប្រើប្រាស់សម្រាប់កិច្ចសប្បុរសធម៌ដូចជាជួយដល់មន្ទីរពេទ្យគន្ធបុប្លា មន្ទីរពេទ្យកុមារអង្គរ និងអង្គការសប្បុរសធម៌ជាច្រើនទៀត។

សូមបញ្ជាក់ថា ព្រឹត្តិការណ៍កីឡាម៉ារ៉ាតុងអន្តរជាតិចក្រភពអង្គរ លើកទី៩ ឆ្នាំ២០២៤ មាន៤វិញ្ញាសាគឺចម្ងាយ៤២គីឡូម៉ែត្រ ចម្ងាយ២១គីឡូម៉ែត្រ ចម្ងាយ១០គីឡូម៉ែត្រ និងចម្ងាយ៥គីឡូម៉ែត្រ។ កីឡាម៉ារ៉ាតុងអន្តរជាតិចក្រភពអង្គរនេះជាព្រឹត្តិការណ៍រត់ម៉ារ៉ាតុងពេញ (Full Marathon) តែមួយគត់នៅក្នុងប្រទេសកម្ពុជាដែលមានចម្ងាយ៤២គីឡូម៉ែត្រ ខណៈព្រឹត្តិការណ៍ម៉ារ៉ាតុងផ្សេងៗទៀតសុទ្ធតែពាក់កណ្តាលម៉ារ៉ាតុងពោលគឺមានចម្ងាយឆ្ងាយបំផុតត្រឹមតែ២១គីឡូម៉ែត្រ៕

អត្ថបទ៖ វីរបុត្រ

The post កម្ពុជាកំពុងជំរុញឲ្យជនជាតិចិនយ៉ាងតិច៥០០នាក់ចូលរួមម៉ារ៉ាតុងចក្រភពអង្គរ appeared first on Kampuchea Thmey Daily.

កីឡាម៉ារ៉ាតុង​អន្តរជាតិ​ចក្រភព​អង្គរ​ Archives - Kampuchea Thmey Daily

ជាប់​ចិត្ត​ព្រឹត្តិការណ៍​រត់​តំបន់​ប្រាសាទ បុរស​ជន​ជាតិ​បារាំង​ប្តេជ្ញា​មក​ទៀត​ឆ្នាំ​ក្រោយ

ទិវារត់​ម៉ារ៉ាតុង​អង្គរនាខែធ្នូ រំពឹង​រក​បាន​ប្រាក់​ជាង​១០ម៉ឺន​ដុល្លារដើម្បី​សប្បុរសធម៌

វ៉ាន់ ភារ៉ា ថា ទទួលឈ្នះ​មេដាយ​មាស​៤២​គីឡូម៉ែត្រមុខ​អង្គរ ឡើងព្រឺសម្បុរ

ទិវារត់​ម៉ារ៉ាតុងអង្គរព្រឹកស្អែកជាផ្នែក​មួយអបអរ ព្រែកជីកហ្វូណនតេជោ

ម៉ារ៉ាតុងចក្រភព​អង្គរ២០២៤ ​មាន​​អ្នក​ចុះឈ្មោះ​ច្រើនជាងឆ្នាំមុន

កម្ពុជា​កំពុង​ជំរុញឲ្យជន​ជាតិចិនយ៉ាងតិច៥០០​នាក់​ចូលរួម​​ម៉ារ៉ាតុងចក្រភពអង្គរ

កីឡាម៉ារ៉ាតុងអន្តរជាតិចក្រភពអង្គរ Archives - Kampuchea Thmey Daily

ជាប់ចិត្តព្រឹត្តិការណ៍រត់តំបន់ប្រាសាទ បុរសជនជាតិបារាំងប្តេជ្ញាមកទៀតឆ្នាំក្រោយ

ទិវារត់ម៉ារ៉ាតុងអង្គរនាខែធ្នូ រំពឹងរកបានប្រាក់ជាង១០ម៉ឺនដុល្លារដើម្បីសប្បុរសធម៌

វ៉ាន់ ភារ៉ា ថា ទទួលឈ្នះមេដាយមាស៤២គីឡូម៉ែត្រមុខអង្គរ ឡើងព្រឺសម្បុរ

ទិវារត់ម៉ារ៉ាតុងអង្គរព្រឹកស្អែកជាផ្នែកមួយអបអរ ព្រែកជីកហ្វូណនតេជោ

ម៉ារ៉ាតុងចក្រភពអង្គរ២០២៤ មានអ្នកចុះឈ្មោះច្រើនជាងឆ្នាំមុន

កម្ពុជាកំពុងជំរុញឲ្យជនជាតិចិនយ៉ាងតិច៥០០នាក់ចូលរួមម៉ារ៉ាតុងចក្រភពអង្គរ