អាជ្ញាធរមូលដ្ឋានបានឲ្យដឹងថា ដីតំបន់នោះត្រូវបានគេដឹងថា ជាដីចំណីព្រែក និងជាព្រៃចាកដែលជាសម្បត្តិសាធារណៈរបស់រដ្ឋ ប៉ុន្តែបែរជាលេចមុខបុគ្គលម្នាក់ឈ្មោះ តុល ចំរើន ធ្វើសកម្មភាពចាក់ដីលុបរំលោភចូលព្រែកកែប្រែស្ថានភាពទីតាំងរបស់ខ្លួនទៅវិញ។

លោក គង់ សុផុន ចៅសង្កាត់អណ្ដូងខ្មែរ បានប្រាប់ឱ្យដឹងថា ម្ចាស់ទីតាំងខាងលើពិតជាពុំមានប្លង់កម្មសិទ្ធិកាន់កាប់ស្របច្បាប់នោះឡើយ ដោយគ្រាន់តែអាស្រ័យផលជាយូរឆ្នាំមកហើយតែប៉ុណ្ណឹង។ លោកចៅសង្កាត់អណ្ដូងខ្មែរបានប្រាប់បន្តទៀតថា ការចាក់ដីនេះ គឺយកដីដែលកាយចេញពីអណ្ដូងក្នុងបរិវេណនោះផ្ទាល់ ប៉ុន្តែការអនុវត្តនេះគឺ “ពុំមានសុំច្បាប់អនុញ្ញាតពីអាជ្ញាធរនោះឡើយ។

បើតាមលោកចៅចង្កាត់ ការពាក់ព័ន្ធនឹងទំហំនៃការប៉ះពាល់ដល់ចំណីព្រែកកម្រិតណានោះ លោកមិនទាន់អាចបញ្ជាក់បាននៅឡើយនោះទេ ដោយរង់ចាំមន្ត្រីជំនាញ និងអាជ្ញាធរចុះវាស់វែង និងពិនិត្យជាក់ស្ដែងដើម្បីធ្វើរបាយការណ៍ និងបន្តនីតិវិធីទៅតាមផ្លូវច្បាប់។ ជាមួយគ្នានេះ អាជ្ញាធរបានសម្ដែងការគាំទ្រចំពោះការផ្ដល់ព័ត៌មានពីសំណាក់មហាជន និងអ្នកសារព័ត៌មាន ដើម្បីចូលរួមទប់ស្កាត់ការរំលោភបំពានលើដីរដ្ឋក្នុងមូលដ្ឋាននោះទេ៕

អត្ថបទ៖ សឹង រ៉ាត់

The post អាជ្ញាធរក្រុងកំពត ចុះពិនិត្យទីតាំងចាក់ដីលុបចំណីព្រែក និងព្រៃលិចទឹកនៅសង្កាត់អណ្ដូងខ្មែរ ដែលជាធនធានធម្មជាតិ appeared first on Kampuchea Thmey Daily.

នាថ្ងៃទី ១ ខែតុលា ឆ្នាំ២០២៤នេះ លោក អែត សារិទ្ធ អភិបាលរងក្រុងកំពតបានចុះសង្កេតពិនិត្យមើលជាក់ស្តែងរបស់អាជីវករលក់គ្រឿងសមុទ្រនៅផ្សារសាមគ្គីទីរួមខេត្តកំពតហើយអាជីវករលក់ដូរក៏បានបញ្ជាក់ដែរថា ទោះបីថ្ងៃបុណ្យភ្ជុំបិណ្ឌមានភ្ញៀវច្រើន លក់ដាច់ក៏ពិតមែន តែពួកគាត់មិនបានដំឡើងថ្ងៃនោះទេ ខណៈដែលអាជ្ញាធរក្រុងកំពត បានបញ្ជាក់ថា ការផ្តល់សេវាទេសចរណ៍ផ្សេងៗក្នុងក្រុង ពិសេសអាជីវករលក់ដូរគ្រឿងសមុទ្រតាមផ្សារនានា ស្តាប់តាមការណែនាំបានល្អ ដោយពួកគាត់បានរក្សាតម្លៃនៅធម្មតាដដែល។

អាជីវករលក់គ្រឿងសមុទ្រនៅផ្សារសាមគ្គីទីរួមខេត្តកំពត បានបញ្ចាក់ថា ថ្ងៃបុណ្យភ្ជុំបិណ្ឌនេះ ការលក់ដូរដាច់ច្រើនជាងថ្ងៃធម្មតា ប៉ុន្តែពួកគាត់មិនបានដំឡើងថ្លៃគ្រឿងសមុទ្រទេ។ នៅកន្លែងគាត់ ធ្លាប់លក់នៅថ្ងៃធម្មតាតម្លៃប៉ុន្មាន ថ្ងៃបុណ្យភ្ជុំបិណ្ឌនេះ នៅរក្សាតម្លៃនោះដដែល ព្រោះពួកគាត់យល់ថា ពួគគាត់លក់រៀងរាល់ថ្ងៃ ត្រូវការឲ្យភ្ញៀវមកទិញជាប្រចាំ មិនមែនទិញម្តង រាងហើយបាត់មុខរហូតនោះទេ។

អភិបាលរងក្រុងកំពត លោក អែត សារិទ្ធ បានបញ្ជាក់ថា តាមការសង្កេតពិនិត្យជាក់ស្តែង និងតាមបទពិសោធនាពេលកន្លងមក អាជីវករខេត្តកំពត រក្សាបាននូវភាពស្មោះត្រង់ ថ្លៃថ្នូរ មិនដែលធ្វើឲ្យអតិថិជន ឬភ្ញៀវទេសចរណាម្នាក់ថ្នាំងថ្នាក់ចិត្តនោះទេ។ លោក អែត សារិទ្ធ អភិបាលរងក្រុងកំពតបានកោតសរសើរចំពោះ ទឹកចិត្តរបស់អ្នកផ្តល់សេវាទេសចរណ៍ក្នុងខេត្តកំពត ទាំងម្ចាស់កន្លែងស្នាក់នៅ អាហារដ្ឋាន ភោជនីយដ្ឋាន និងបងប្អូនលក់ដូរតាមផ្សារនានា បានរក្សាតម្លៃថេរល្អ មិនថាថ្ងៃធម្មតា ឬថ្ងៃបុណ្យទានធំៗឡើយ ។

ទោះជាយ៉ាងណាក៏ដោយ លោកអភិបាលរងក្រុងកំពត ស្នើសុំឲ្យបងប្អូនដែលប្រកបរបរលើវិស័យទេសចរណ៍ក្នុងក្រុង ក៏ដូចជាខេត្តកំពតទាំងមូល ជួយពង្រឹងបន្ថែមនូវ គុណភាពសេវា ការបដិសណ្ឋាកិច្ចល្អ និងមានទំនួលខុសត្រូវលើកការររៀបចំអនាម័យបរិស្ថាន សណ្តាប់ធ្នាប់សាធារណៈ ឲ្យបានកាន់តែល្អប្រសើរ៕

អត្ថបទ៖ សឹង រ៉ាត់

The post អាជ្ញាធរក្រុងកំពតបញ្ជាក់ថា មិនមានអាជីវករណាលក់គ្រឿងសមុទ្រដំឡើងតម្លៃនោះទេ appeared first on Kampuchea Thmey Daily.

តាមការលើកឡើងរបស់ លោក លាង រឿនសុធី អភិបាលក្រុងកំពតបានឱ្យដឹងថា កម្ពុជានាបច្ចុប្បន្នជ្រកក្រោមដំបូលនៃសុខសន្តិភាព សមិទ្ធផលជាច្រើនបានលេចឡើងពេញផ្ទៃប្រទេស ក្នុងនោះខេត្តកំពតក្រោមការដឹកនាំនិងចង្អុលបង្ហាញ​ពី​លោក​ម៉ៅ ធនិន តែងតែគិតគូរអំពីសុខទុក្ខនិងការលំបាករបស់ពលរដ្ឋ ហើយក្នុងនោះផ្លូវក្នុងក្រុងកំពតក៏​បានកំពុងស្ថាបនា​ជាផ្លូវបេតុងទាំងអស់។

លោក លាង រឿនសុធី អភិបាលក្រុងកំពតបានប្រាប់ឱ្យដឹងថា ផ្លូវទាំងពីរខ្សែនេះរួមមាន ខ្សែទី ១ នៅខាងជើងពហុកីឡដ្ឋាន​​ខេត្តកំពត ដែលមានបណ្តោយប្រវែង ២០៥ ម៉ែត្រ និងមានទទឹង ១២ ម៉ែត្រ (ពង្រីក ៤ ម៉ែត្របន្ថែម) ដែលមានកម្រាស់ ០.១៥ម៉ែត្រ អមដោយលូដោះទឹកសងខាង និងខ្សែទី២ ផ្លូវខាងត្បូងផ្សាររុយ (ផ្លូវមន្ទីរកសិកម្មចាស់) ដែលមានបណ្តោយ​ប្រវែង ២០៨ ម៉ែត្រ និងមានទទឹង ៧ ម៉ែត្រ កម្រាស់ ០.១៥ម៉ែត្រដូចគ្នា។

បើតាមការលើកឡើងពីអាជ្ញាធរក្រុងកំពត មកដល់ពេលនេះមានផ្លូវបេតុងជាង ២០ ខ្សែ នៅក្នុងមូលដ្ឋាននៃក្រុងកំពត៕

អត្ថបទ៖ សឹង រ៉ាត់

The post ផ្លូវបេតុងពីរខ្សែនៅក្រុង​កំពត បើកការដ្ឋាន​សាងសង់​ សម្រួល​ការ​ធ្វើ​ដំណើរពលរដ្ឋក្នុងមូលដ្ឋាន appeared first on Kampuchea Thmey Daily.