ក្រុមហ៊ុន SAILUN Group Archives - Kampuchea Thmey Daily

ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា

Dy Bunnara — Wed, 17 Dec 2025 03:24:30 +0000

ប្រទេសចិនជាប្រភពវិនិយោគដ៏ធំក្នុងប្រទេសកម្ពុជា ដែលបានបោះទុនវិនិយោគស្ទើរគ្រប់វិស័យ។ ក្រុមហ៊ុនចិនកាន់តែមានទំនុកចិត្តក្នុងការបោះទុនពង្រីកការវិនិយោគនៅក្នុងប្រទេសកម្ពុជា ស្របពេលដែលរដ្ឋាភិបាលកម្ពុជាបានដាក់ចេញគោលការណ៍លើកទឹកចិត្តដល់វិនិយោគិន ដែលនាំឲ្យមានការបង្កើនទំហំទុនវិនិយោគដល់រាប់រយរាប់ពាន់លានដុល្លារ។

ក្រុមហ៊ុនចិនធំៗចំនួន ៦ នេះ កំពុងវិនិយោគលើវិស័យសំខាន់ៗមានដូចជា ឧស្សាហកម្ម អចលទ្រព្យ ហេដ្ឋារចនាសម្ព័ន្ធ និងបដិសណ្ឋារកិច្ចក្រោមទុនវិនិយោគខ្ទង់ពាន់លានដុល្លារ។

ក្រុមហ៊ុន“សាជីវកម្មថ្នល់ និងស្ពានចិន (CRBC)

ក្រុមហ៊ុន “សាជីវកម្មថ្នល់ និងស្ពានចិន (CRBC) ជាក្រុមហ៊ុនបុត្រសម្ព័ន្ធនៃក្រុមហ៊ុន China Communications Construction Company ដែលមានការិយាល័យកណ្ដាលនៅទីក្រុងបេកាំង ប្រទេសចិន។

ប្រតិបត្ដិការអាជីវកម្មចម្បងរបស់ក្រុមហ៊ុន ផ្តោតលើការសាងសង់ផ្នែកហេដ្ឋារចនាសម្ព័ន្ធផ្លូវនិងស្ពាន។ បច្ចុប្បន្នក្រុមហ៊ុនបានអភិវឌ្ឍផ្លូវល្បឿនលឿនចំនួនពីរខ្សែនៅក្នុងប្រទេសកម្ពុជាក្នុងនោះមាន ផ្លូវល្បឿនលឿនភ្នំពេញ-ក្រុងព្រះសីហនុ ក្រោមទុនវិនិយោគប្រមាណ ២ ប៊ីលានដុល្លារ ដែលបានបញ្ចប់ដាក់ឲ្យដំណើរការកាលពីឆ្នាំ២០២២ និងផ្លូវល្បឿនលឿនទីពីរភ្នំពេញ-បាវិត ក្រោមទុនវិនិយោគប្រមាណ ១,៣៥ ប៊ីលានដុល្លារ ដែលកំពុងដំណើរការសាងសង់តាមផែនការគ្រោងបញ្ចប់នៅក្នុងឆ្នាំ ២០២៧។

បន្ថែមពីនេះ ក្រុមហ៊ុនក៏កំពុងសិក្សាគម្រោងសាងសង់ផ្លូវល្បឿនលឿនទី ៣ ភ្នំពេញ-សៀមរាបផងដែរ។

ក្រុមហ៊ុនអភិវឌ្ឍតំបន់សេដ្ឋកិច្ចពិសេសក្រុងព្រះសីហនុ (SSEZ)

តំបន់សេដ្ឋកិច្ចពិសេសក្រុងព្រះសីហនុ ត្រូវបានប្រសិទ្ធិនាមថាជាគំរូនៃកិច្ចសហប្រតិបត្តិការជាក់ស្ដែងរវាងរដ្ឋាភិបាលកម្ពុជា-ចិន។

តំបន់សេដ្ឋកិច្ចពិសេសក្រុងព្រះសីហនុ បានសម្ពោធដាក់ឲ្យដំណើរការនៅឆ្នាំ២០០៨ និងនៅឆ្នាំ២០០៩ បានក្លាយជាតំបន់សហប្រតិបត្តិការសេដ្ឋកិច្ចនិងពាណិជ្ជកម្មក្រៅប្រទេសដំបូងគេ ដែលឆ្លងកាត់ការវាយតម្លៃរបស់ក្រសួងពាណិជ្ជកម្មចិន។

តំបន់សេដ្ឋកិច្ចក្រុងព្រះសីហនុជាសួនឧស្សាហកម្មដែលមានបណ្តុំរោងចក្រឧស្សាហកម្មដ៏ធំនៅខេត្តជាប់មាត់សមុទ្រប៉ែកនិរតីនៃប្រទេសកម្ពុជា ដែលបច្ចុប្បន្នមានរោងចក្រចំនួន ២០២ កំពុងដំណើរការ ដែលបង្កើតឱកាសការងារបានប្រមាណ ៣ ម៉ឺន ២ ពាន់កន្លែង។

នៅក្នុងឆ្នាំ ២០២៤ តំបន់សេដ្ឋកិច្ចពិសេសក្រុងព្រះសីហនុសម្រេចបានការនាំចេញនាំចូល គិតជាទំហំទឹកប្រាក់ប្រមាណ ៤,៧៨ ប៊ីលានដុល្លារកើនឡើង ២១,៣% ធៀបឆ្នាំ ២០២៣។

ក្រុមហ៊ុនអភិវឌ្ឍន៍ Peninsula Bay Investment

ក្រុមហ៊ុន ផឹនីនស៊្យូឡឺ បេ អ៊ិនវេសម៉ិន (Peninsula Bay Investment) កំពុងអភិវឌ្ឍសណ្ឋាគារលំដាប់ផ្កាយប្រាំ និងមជ្ឈមណ្ឌលពាណិជ្ជកម្មនៅលើផ្ទៃដីទំហំ ១៦ ហិកតា នៅជិតទីលានតេជោ ភូមិ៤ សង្កាត់លេខ៤ ក្រុងព្រះសីហនុ ដែលចាយទុនប្រមាណ ១ ប៊ីលានដុល្លារ។

Peninsula Bay Investment ជាគម្រោងអភិវឌ្ឍដ៏សំខាន់មួយនៅខេត្តព្រះសីហនុ ដែលជាខេត្តតំបន់ឆ្នេររបស់ប្រទេសកម្ពុជា។ ការអភិវឌ្ឍន៍របស់ក្រុមហ៊ុនបែងចែកជា ២ តំបន់៖

-តំបន់ A: មានសណ្ឋាគារលំដាប់ផ្កាយ ៥ (កម្ពស់ ៣៧ ជាន់), ផ្សារទំនើប និងសួនកម្សាន្តផ្សេងៗដែលគ្រោងបញ្ចប់នៅឆ្នាំ២០២៨
-តំបន់ B: អគារខុនដូរ និងអគារពាណិជ្ជកម្ម ដែលគ្រោងបញ្ចប់នៅដើមឆ្នាំ២០២៦

ចាយទុនជាង ១ ប៊ីលានដុល្លារ គម្រោងអភិវឌ្ឍន៍របស់ក្រុមហ៊ុន Peninsula Bay Investment នឹងចូលរួមចំណែកយ៉ាងសកម្មក្នុងការប្រែក្លាយខេត្តព្រះសីហនុឱ្យទៅជាតំបន់ពាណិជ្ជកម្ម និងទេសចរណ៍លំដាប់អន្តរជាតិ។

ក្រុមហ៊ុនផលិតសំបកកង់ Sailun

ក្រុមហ៊ុន Sailun បានបោះទុនវិនិយោគប្រមាណ ១ ប៊ីលានដុល្លារ ដើម្បីដំណើរការរោងចក្រផលិតសំបកកង់យានយន្តក្នុងប្រទេសកម្ពុជា ដែលមានទីតាំងនៅខេត្ដស្វាយរៀង។

ដំណើរការខ្សែសង្វាក់ផលិតកម្មរបស់ក្រុមហ៊ុន ក្នុងមួយថ្ងៃប្រើប្រាស់ជ័រកៅស៊ូអស់ជាង ៥០០ តោន ជាមួយសមត្ថភាពផលិតបានប្រមាណ ៣០ លានគ្រាប់ក្នុងមួយឆ្នាំ។

ក្នុងឱកាសជំនួបពិភាក្សាការងារជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាឱកាសចូលរួមកិច្ចប្រជុំកំពូលមហាអនុតំបន់មេគង្គ (GMS) លើកទី ៨ នាថ្ងៃទី៦ ខែវិច្ឆិកា ឆ្នាំ២០២៤ នៅទីក្រុងគុនមិញ ខេត្តយូណាន ប្រទេសចិន លោក Yuan Zhongxue ប្រធានកិត្តិយសក្រុមហ៊ុន Sailun Group បានលើកអំពីគោលបំណងរបស់ក្រុមហ៊ុនក្នុងការពង្រីកការវិនិយោគរបស់ខ្លួននៅកម្ពុជា ដោយផ្ដោតលើការកែច្នៃផលិតផលកៅស៊ូ ដើម្បីផលិតចេញជាផលិតផលផ្សេងៗ រួមទាំងការបង្កើតសួនឧស្សាហកម្មសម្រាប់ខ្សែច្រវាក់ផលិតកម្មនៃឧស្សាហកម្មកែច្នៃកៅស៊ូ ក៏ដូចជាសមត្ថភាពផលិតរបស់ក្រុមហ៊ុននៅក្នុងតំបន់។

ក្រុមហ៊ុនអភិវឌ្ឍន៍តំបន់វិស្សមកាលឆ្នេរមាស ឆ្នេរប្រាក់

លោក ហ្វូ ហាង អគ្គនាយកក្រុមហ៊ុន យិះ ចៀ ដែលវិនិយោគនៅតំបន់ឆ្នេរមាសឆ្នេរប្រាក់ក្នុងខេត្តព្រះសីហនុបានឲ្យដឹងថា ក្នុងរយៈពេលជិត ១០ ឆ្នាំ ក្រុមហ៊ុនបានចាយទុនវិនិយោគអស់ប្រមាណ ៦០០ លានដុល្លារ ក្នុងទុនបម្រុងគ្រោងចំណាយសរុបប្រមាណ ៥ ០០០ លានដុល្លារ ខណៈការវិនិយោគទាំងមូលខ្ទង់ប្រើប្រាស់ពេលប្រហែល ២០ ឆ្នាំ។

លោកថា គម្រោងអភិវឌ្ឍន៍ឆ្នេរមាស ឆ្នេរប្រាក់ជាគម្រោងខ្នាតយក្សនៅខេត្តព្រះសីហនុ ដែលត្រូវបានអភិវឌ្ឍតាមដំណាក់កាលផ្ដោតលើវិស័យទេសចរណ៍។

នៅតំបន់វិស្សមកាលឆ្នេរមាសឆ្នេរប្រាក់ ក្រុមហ៊ុនកំពុងអភិវឌ្ឍនៅលើផ្ទៃដីទំហំជាង ៣ ០០០ ហិកតា។ ក្រៅពីការសាងសង់ហេដ្ឋារចនាសម្ពន្ធនានាដែលមានខ្សែផ្លូវប្រវែងជាង ១០០ គីឡូម៉ែត្រ ប្រព័ន្ធភ្លើងអគ្គិសនី ទឹកស្អាត ក្រុមហ៊ុនបានសាងសង់សណ្ឋាគារជាច្រើនកន្លែង រៀបចំតំបន់ទេសចរនៅកោះសំពោច (កោះរាជបុត្រ) បង្កើតសួនផ្កា បូករួមទីលានបាញ់ព្រួយ ហើយទៅថ្ងៃមុខនឹងរៀបចំឲ្យមានតំបន់ទេសចរណ៍ជាច្រើនថែមទៀត។

គម្រោង Bay Of Light

Bay of Lights ជាគម្រោងអភិវឌ្ឍទីក្រុងជាមួយទំហំទឹកប្រាក់វិនិយោគប្រមាណ ១៦ ពាន់លានដុល្លាអាមេរិក ដើម្បីកែប្រែមុខមាត់ឆ្នេរសមុទ្រកម្ពុជា តាមរយៈការបង្កើតទីក្រុងអនាគតមួយដែលលាតសន្ធឹងលើផ្ទៃដី ៩៣៤ ហិកតាតាមបណ្តោយឆ្នេរសមុទ្ររាម។

ចក្ខុវិស័យរបស់គម្រោង Bay of Lights គឺប្រែក្លាយខេត្តព្រះសីហនុក្លាយទៅជាមជ្ឈមណ្ឌលពាណិជ្ជកម្ម វប្បធម៌ និងកិច្ចសហប្រតិបត្តិការអន្តរជាតិ ដោយទីក្រុងនេះនឹងមិនត្រឹមតែជាកន្លែងរស់នៅ និងធ្វើការ ប៉ុន្តែនឹងក្លាយទៅជាចំណុចចាប់ផ្ដើមថ្មីមួយ ដែលបង្ហាញពីអនាគត ការច្នៃប្រឌិត និងសក្តានុពលរបស់តំបន់ឆ្នេរសមុទ្រកម្ពុជា៕

The post ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា appeared first on Kampuchea Thmey Daily.

Sailun បានលើកស្ទួយអក្សរសាស្ត្រខ្មែរ និងទងជាតិខ្មែរលើសំបកកង់ឡានរបស់ខ្លួន!

Sous Sith — Wed, 03 Sep 2025 07:01:00 +0000

សំបកកង់ឡាន សៃលុន (Sailun Tire Cambodia) ជាក្រុមហ៊ុនផលិតសំបកកង់ឡានធំជាងគេនៅកម្ពុជា ដែលកំពុងប្រតិបត្តិការច្រវាក់ផលិតកម្ម ផលិត ចែកចាយក្នុងស្រុក និងនាំចេញទៅទីផ្សារតាមប្រទេសជុំវិញពិភពលោក។

ខាងក្រោមនេះ ជាចំណុចពិសេសទាំង៥ របស់សំបកកង់ខ្មែរ ម៉ាក សៃលុន៖

១.ទង់ជាតិប្រទេសកម្ពុជានៅលើសំបកកង់នឹងអក្សរខ្មែរ៖ ជាមួយនឹងផលិតផលថ្មីរោងចក្រសំបកកង់កម្ពុជាមួយនេះ បានបំពាក់ស្លាកបន្ថែមជាមួយនឹងអក្សរខ្មែរ រួមទាំងទង់ជាតិខ្មែរដ៏ធំនៅលើសំបកកង់នីមួយៗ ដែលជាមោទនភាពជាតិមួយសម្រាប់កម្ពុជា។

២.សមិទ្ធផលនៃការលក់នាំចេញជាង ៣០ប្រទេស៖ សំបកកង់ឡាន សៃលុន បាននិងកំពុងនាំចេញលើទីផ្សារអន្តរជាតិចំនួនជាង ៣០ប្រទេស រួមមាន អាម៉េរិក ចិន អង់គ្លេស អាល្លឺម៉ង់ បារាំង អ៊ីតាលី ហូឡង់ កាណាដា កូរ៉េខាងត្បូង កូរ៉េខាងជើង ជប៉ុន ម៉ាឡេស៊ី វៀតណាម រួមទាំងប្រទេសមួយចំនួនទៀត ខណៈដែលទង់ជាតិទាំង៣០ប្រទេសនោះ ក៏បានបិទស្លាកនៅលើសំបកកង់ផងដែរ។

៣. ចំណាត់ថ្នាក់លេខ ៨ ជុំវិញពិភពលោក៖ សំបកកង់ សៃលុន ជាក្រុមហ៊ុនផលិតសំបកកង់នៅខ្មែរតែមួយគត់ ដែលទទួលបានចំណាត់ថ្នាក់លេខ ៨ ទូទាំងពិភពលោក។

៤. គុណភាពនៃសំបកកង់ស្តង់ដារអន្តរជាតិ៖ សំបកកង់ម៉ាកសៃលុនផលិតមកជាមួយបច្ចេកវិទ្យា EcoPoint3 ស្តង់ដារអន្តរជាតិ គុណភាពខ្ពស់ តម្លៃសមរម្យ និងអាចជួយសន្សំសំចៃឥន្ធនៈបានច្រើន។

៥. ដកប្រាក់ចំណេញ ៤០០រៀល ក្នុងមួយគ្រាប់ចូលរួមមូលនិធិគន្ធបុប្ផា៖ ក្រុមហ៊ុនសំបកកង់ខ្មែរ សៃលុន បានដកប្រាក់ចំណេញ ៤០០រៀល ក្នុងមួយគ្រាប់ ដើម្បីបរិច្ចាគជូនដល់មន្ទីរពេទ្យគន្ធបុប្ផា ក្នុងបុព្វហេតុរួមចំណែកជួយព្យាបាលជំងឺជូនកុមារកម្ពុជា។

សូមជម្រាបជូនថា រោងចក្រផលិតសំបកកង់ឡាន សៃលុន មានទីតាំងនៅតំបន់សេដ្ឋកិច្ចពិសេសឈីលូ ភូមិតាណរ សង្កាត់ស្វាយតឿ ក្រុងស្វាយរៀង ខេត្ដស្វាយរៀង។ រោងចក្រផលិតសំបកកង់ឡាន សៃលុន បាននឹងស្រូបទាញទិន្នផលកៅស៊ូ ប្រមាណជាង ៣០% នៃទិន្នផលកៅស៊ូសរុប គិតតែក្នុងឆ្នាំ ២០២៤ ប្រមាណ ៥ ម៉ឺនតោន និង គ្រោងកែឆ្នៃទិន្នផលកៅស៊ូក្នុងស្រុកប្រមាណ ១ សែនតោនគិតជាសាច់ប្រាក់ប្រមាណជាង ២០០ លានដុល្លារអាមេរិក ក្នុងឆ្នាំ២០២៥នេះ៕

អត្ថបទពាណិជ្ជកម្ម

The post Sailun បានលើកស្ទួយអក្សរសាស្ត្រខ្មែរ និងទងជាតិខ្មែរលើសំបកកង់ឡានរបស់ខ្លួន! appeared first on Kampuchea Thmey Daily.

រោងចក្រផលិតសំបកកង់រថយន្ត សៃលុន ប្រកាសផ្ដល់ការងារដល់ពលករខ្មែររហូតដល់៧០០ នាក់ ដែលមានតួនាទី និងប្រាក់ខែ

deth leng — Sun, 15 Jun 2025 09:26:26 +0000

រោងចក្រផលិតសំបកកង់រថយន្ត Sailun ប្រកាសផ្ដល់ការងារដល់ពលករខ្មែរវិលមកពីប្រទេសថៃ ចំនួន ៧០០ នាក់ និងបុគ្គលិកការិយាល័យ ១០០ នាក់ នៅចំពេលដែលសម្ដេចតេជោ ហ៊ុន សែន ប្រធានព្រឹទ្ធសភា បានប្រកាសត្រៀមទទួលយកពលករខ្មែរវិលត្រឡប់មកពីប្រទេសថៃវិញ បន្ទាប់ពីរងការប្រមាថម៉ាកងាយ នៅក្នុងប្រទេសថៃ បន្ទាប់ពីផ្ទុះឡើងនូវជម្លោះព្រំដែន។

លោក គឹន ឧត្តមមុនីស៊ីណាត នាយកប្រតិបត្តិក្រុមហ៊ុន PICG (សៃលុន) បានប្រាប់ឱ្យដឹងថា ស្របពេលដែលមានបញ្ហា និងឃើញប្រជាពលករខ្មែរចាប់ផ្ដើមវិលត្រឡប់មកស្រុកវិញ នៅចំពេលដែលរោងចក្រកំពុងមានតម្រូវករបុគ្គលិក និងកម្មករ ៨០០ នាក់ ក្នុងនោះមាន កម្មករ ៧០០ នាក់ ចំណែកឯបុគ្គលិកក្នុងការិយាល័យ ១០០ នាក់ ដែលមានជាងភ្លើង មេកានិក និងអ្នកបកប្រែភាសាចិន។

លោក គឹន ឧត្តមមុនីស៊ីណាត បញ្ជាក់ថា៖ «ក្រុមហ៊ុនទទួលសិទ្ធផ្ដាច់មុខ PICG បានឧបត្ថម្ភមធ្យោបាយធ្វើដំណើរ ដើម្បីចុះឈ្មោះនៅក្រុមហ៊ុនសៃលុន ហើយបើសិនគាត់ទៅមើលមិនពេញចិត្ត មិនត្រូវប្រាក់ខែអី គឺយើងអាចដឹកគាត់មកវិញបាន»។

បញ្ហាប្រឈមរឿងខ្វះសំបកកង់ឡានប្រើក្នុងស្រុកមិនមែនជាបញ្ហាប្រឈមនោះទេ។ ដោយរោងចក្រនេះមានសមត្ថភាពផលិតរហូត២២លានគ្រាប់ហើយកម្ពុជាខ្លួនឯងប្រើអស់ត្រឹម១លានគ្រាប់ប៉ុណ្ណោះក្នុងមួយឆ្នាំ PCR។ អ្វីដែលកាន់តែពិសេសទៀតនោះសំកបកង់មួយនេះបានបរិច្ចាគ៤០០៛ក្នុងមួយគ្រាប់ជូនមន្ទីរពេទ្យ គន្ធ បុប្ផា ដើម្បីកុមារកម្ពុជាយើងផងដែរ៕

The post រោងចក្រផលិតសំបកកង់រថយន្ត សៃលុន ប្រកាសផ្ដល់ការងារដល់ពលករខ្មែររហូតដល់៧០០ នាក់ ដែលមានតួនាទី និងប្រាក់ខែ appeared first on Kampuchea Thmey Daily.

ក្រុមហ៊ុនផលិតកង់រថយន្តនៅស្វាយរៀង បោះទុនវិនិយោគ $១១០លាន បង្កើតរោងចក្រមួយទៀតនៅខេត្តកំពត

deth leng — Tue, 01 Apr 2025 09:18:00 +0000

ក្រុមហ៊ុនផលិតកង់រថយន្ត Sailun បានបោះទុនវិនិយោគនូវទំហំទឹកប្រាក់ចំនួន ១១០ លានដុល្លារ បង្កើតរោងចក្រគ្រឿងបង្គុំនៅក្នុងវិស័យសំបកកង់រថយន្ត នៅក្នុងខេត្តកំពត ដើម្បីផ្គត់ផ្គង់ក្នុងស្រុក និងនាំចេញ។

គិតមកដល់ពេលនេះ ក្រុមហ៊ុន Sailun បានបោះទុនវិនិយោគជាង ១ ពាន់លានដុល្លារ សាងសង់រោងចក្រផលិតសំបកកង់រថយន្តចំនួន ៣ នៅខេត្តស្វាយរៀងនៅលើទំហំផ្ទៃដីជាង ១២០ ហិកតា។

លោក គឹន ឧត្តមមុនីស៊ីណាត នាយកប្រតិបត្តិក្រុមហ៊ុន Sailun មានប្រសាសន៍ថា វត្តមានរោងចក្រផលិតសំបកកង់រថយន្តនៅកម្ពុជា បានស្រូបទាញជ័រកៅស៊ូក្នុងស្រុកកាន់តែច្រើន។ លោកថា កន្លងមកកៅស៊ូកម្ពុជាពឹងផ្អែកទៅលើទីផ្សារនាំចេញ ប៉ុន្តែបច្ចុប្បន្នវត្តមានរោងចក្រផលិតសំបកកង់រថយន្តកាន់តែច្រើន នឹងធ្វើឱ្យតម្លៃទីផ្សារជ័រកៅស៊ូកម្ពុជាមានភាពល្អប្រសើរ។

លោកបានបញ្ជាក់ថា៖ «ក្រុមហ៊ុន Sailun បានស្រូបទាញកៅស៊ូចំនួន ៣០% នៃផ្ទៃដីដាំដុះជាង ៤០ ម៉ឺនហិកតានៅកម្ពុជា ខណៈមកទល់ពេលនេះ ក្រុមហ៊ុនបានប្រើប្រាស់កៅស៊ូក្នុងស្រុករហូតដល់ ៥ ម៉ឺនតោនរួចហើយ និងគ្រោងប្រើឱ្យបានដល់ ១០ ម៉ឺនតោននៅឆ្នាំ ២០២៥ សម្រាប់លក់ក្នុងស្រុក និងនាំចេញ»។

យោងតាមក្រសួងពាណិជ្ជកម្ម ក្នុងឆ្នាំ២០២៤កន្លងទៅនេះ កម្ពុជាបាននាំចេញផលិតផលសំបងកង់រថយន្តមានទឹកប្រាក់ជាង៨៧៤,៦លានដុល្លារកើនឡើងជិត១៣០ភាគរយធៀបនឹងឆ្នាំ២០២៣ដែលមានទឹកប្រាក់តែជាង៣៨០,៦លានដុល្លារ។

នៅក្នុងឆ្នាំ ២០២៤ ផលិតផលជ័រកៅស៊ូសម្រេចបានជាង ៤០ ម៉ឺនតោន (៤០៧ ២០៩) កើន ៣,៩៣% ធៀបនឹងឆ្នាំ ២០២៣ ក្នុងនោះនាំចេញបាន ៣៣ ម៉ឺន ៨ ពាន់តោន ដែលនាំឱ្យកម្ពុជារកចំណូលបានជាង ៦៧១ លានដុល្លារ កើន ៣៦,៣៨%។

យោងតាមអគ្គនាយកដា្ឋនកៅស៊ូ កម្ពុជាមានផ្ទៃដីដាំដុះកៅស៊ូសរុបជាង៤២ម៉ឺនហិកតា ក្នុងនោះផ្ទៃដីចៀរជ័រមានចំនួនជាង៣៣ម៉ឺនហិកតា និងផ្ទៃដីថែទាំមានចំនួនជាង ៩ ម៉ឺនហិកតា។

សម្រាប់ផ្ទៃដីកៅស៊ូកសិឧស្សាហកម្មមានចំនួនជាង២២ម៉ឺនហិកតា និងផ្ទៃដីកៅស៊ូគ្រួសារមានចំនួនជាង ២០ ម៉ឺនហិកតា៕

អត្ថបទ៖ ឡេង ដេត

The post ក្រុមហ៊ុនផលិតកង់រថយន្តនៅស្វាយរៀង បោះទុនវិនិយោគ $១១០លាន បង្កើតរោងចក្រមួយទៀតនៅខេត្តកំពត appeared first on Kampuchea Thmey Daily.

ក្រុមហ៊ុន SAILUN Group ផលិតសំបកកង់យានយន្ត មានទុនវិនិយោគ ១ ពាន់លានដុល្លារ

deth leng — Thu, 27 Jun 2024 09:56:45 +0000

ក្រុមហ៊ុន Sailun Group ដែលមានក្រុមហ៊ុនបុត្រសម្ព័ន្ធកំពុងវិនិយោគរោងចក្រផលិតសំបកកង់យានយន្តក្នុងប្រទេសកម្ពុជា មានទំហំទឹកប្រាក់វិនិយោគប្រមាណ ១ ពាន់លានដុល្លារ។ នេះបើយោងតាមក្រុមប្រឹក្សាអភិវឌ្ឍកម្ពុជា។

ក្រុមហ៊ុន SAILUN Group បានដាក់សម្ពោធផលិតផលកង់រថយន្តថ្មីម៉ាក SAILUN កាលពីថ្ងៃទី ០៣ ខែកុម្ភៈ ឆ្នាំ២០២៤ ដែលផលិតផលថ្មីមួយនេះ ផលិតដំបូងនៅកម្ពុជា ព្រមទាំងមានរោងចក្រនៅខេត្តស្វាយរៀង។

លោក គឹន ឧត្តមមុនីស៊ីណាត ប្រធានគ្រប់គ្រងក្រុមហ៊ុន PIC TIRE Co., LTD ដែលជាក្រុមហ៊ុនទទួលសិទិ្ធចែកចាយ បានឱ្យដឹងថា រោងចក្រផលិតកង់រថយន្តនេះមានទំហំផ្ទៃដីសរុប ១២០ ហិកតា បង្កើនការងារជូនប្រជាពលរដ្ឋប្រមាណ ៣៥០០ កន្លែង ដែលឧស្សាហកម្មនេះ ប្រើប្រាស់ជ័រកៅស៊ូដែលជាដំណាំកសិផលខ្មែរស្ទើតែទាំងស្រុង។

ទាក់ទងដំណើរការផលិតកម្ម លោកបញ្ជាក់ថា ក្នុងមួយថ្ងៃក្រុមហ៊ុនបានប្រើប្រាស់ជ័រកៅស៊ូអស់ជាង ៥០០ តោន សម្រាប់ដំណាក់កាលទី១ និងទី២៕

អត្ថបទ៖ ឡេង ដេត

The post ក្រុមហ៊ុន SAILUN Group ផលិតសំបកកង់យានយន្ត មានទុនវិនិយោគ ១ ពាន់លានដុល្លារ appeared first on Kampuchea Thmey Daily.

បោះទុនជាង ៧០០ លានដុល្លារវិនិយោគនៅខ្មែរ លោក ស៊ុន ចាន់ថុល ចុះដល់ក្រុមហ៊ុនមេនៅចិន ទាក់ទាញវិនិយោគបន្ថែមទៀត

Dy Bunnara — Sun, 07 Jan 2024 02:38:01 +0000

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាបានដឹកនាំប្រតិភូកម្ពុជារួមមានអ្នកជំនួញគ្រាក់ៗក្នុងស្រុកមួយចំនួនទៅទស្សនកិច្ចនៅសម្ព័ន្ធក្រុមហ៊ុន Sailun Group ជាក្រុមហ៊ុនវិនិយោគដ៏ធំមួយដែលមានក្រុមហ៊ុនបុត្រសម្ព័ន្ធមួយកំពុងវិនិយោគរោងចក្រផលិតសម្បកកង់យានយន្តនៅកម្ពុជា។

ក្នុងដំណើរទស្សនិច្ច លោក ស៊ុន ចាន់ថុល បានជួបពិភាក្សាជាមួយលោក Yuan Zhongxue ក្រុមប្រឹក្សាភិបាលមជ្ឈមណ្ឌលកៅស៊ូជាតិ និងជាអគ្គនាយកសម្ព័ន្ធក្រុមហ៊ុន Sailun និងថ្នាក់ដឹកនាំក្រុមហ៊ុនមួយចំនួនទៀត។

ក្នុងដំណើរបេសកកកម្មគោះទ្វារវិនិយោគនៅក្រុងឈីងតាវ ខេត្តសានដុង សាធារណរដ្ឋប្រជាមានិតចិន លោកឧបនាយករដ្ឋមន្ត្រី ស៊ុន ចាន់ថុល បានថ្លែងអំណរគុណចំពោះក្រុមហ៊ុន Sailun ដែលបានសម្រេចដាក់ទុនវិនិយោគបង្កើតរោងចក្រផលិតសំបកកង់យានយន្តក្នុងប្រទេសកម្ពុជានាពេលកន្លងមក។ នៅក្នុងឱកាសនោះ លោកឧបនាយករដ្ឋមន្រ្តីក៏បានលើកឡើងអំពីជំហររបស់កម្ពុជាក្នុងការបើកទទួលរាល់វិនិយោគិនទាំងអស់ ពិសេសលើកទឹកចិត្តចំពោះក្រុមហ៊ុនក្នុងការពង្រីកខ្សែច្រវាក់ផលិតកម្មរបស់ខ្លួននៅកម្ពុជាបន្ថែមទៀត។

លោក ស៊ុន ចាន់ថុល ក៏បានបង្ហាញអំពីទិសដៅដែលចង់ឃើញមានការវិនិយោគលើវិស័យនានានៅកម្ពុជា ស្របទៅគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ក្នុងការជំរុញឱ្យកម្ពុជាជាប្រទេសមានចំណូលខ្ពស់នៅឆ្នាំ២០៥០។

រាជរដ្ឋាភិបាលចាត់ទុកផ្នែកឯកជនជាដៃគូរដ៏សំខាន់ ដោយក្នុងនោះបានរៀបចំបង្កើតក្រុមការងារចំនួន ១៤ ពីវិស័យរដ្ឋនិងឯកជន ដើម្បីធ្វើការរួមគ្នាដោះស្រាយបញ្ហានានារបស់វិស័យឯកជន។ នេះបើតាមលោកស៊ុន ចាន់ថុល ប្រាប់អ្នកវិនិយោគចិន។

លោកបានអះអាងថា កម្ពុជាមានច្បាប់វិនិយោគដែលផ្ដល់ការលើកទឹកចិត្តដល់គ្រប់វិនិយោគិនដែលដាក់ទុនវិនិយោគនៅកម្ពុជា។ ក្នុងនោះក្រុមប្រឹក្សាអភិវឌ្ឍន៍កម្ពុជាជាអ្នកទាក់ទាញ សម្របសម្រួល និងថែទាំគម្រោងវិនិយោគទាំងអស់នៅក្នុងព្រះរាជាណាចក្រកម្ពុជា។

គួរបញ្ជាក់ថា ក្រុមហ៊ុន Cart Tire ជាក្រុមហ៊ុនបុត្រសម្ព័ន្ធរបស់ Sailun Group កំពុងវិនិយោគរោងចក្រផលិតសំបកកង់យានយន្តក្នុងខេត្តស្វាយរៀងជាមួយទុនវិនិយោគប្រមាណ ៧០០ លានដុល្លារអាមេរិក និងបង្កើតការងារប្រមាណ ២ ពាន់កន្លែង។ សាងសង់នៅលើផ្ទៃដីទំហំជាង ១២០ ហិចតា ផលិតផលរបស់ក្រុមហ៊ុនត្រូវបាននាំចេញទៅកាន់ទីផ្សារសហរដ្ឋអាមេរិក កាណាដា ម៉ាឡេស៊ី និងកូរ៉េខាងត្បូង៕

The post បោះទុនជាង ៧០០ លានដុល្លារវិនិយោគនៅខ្មែរ លោក ស៊ុន ចាន់ថុល ចុះដល់ក្រុមហ៊ុនមេនៅចិន ទាក់ទាញវិនិយោគបន្ថែមទៀត appeared first on Kampuchea Thmey Daily.

ក្រុមហ៊ុន SAILUN Group Archives - Kampuchea Thmey Daily

ក្រុមហ៊ុនចិនធំៗ បោះទុន​វិនិយោគ​ខ្ទង់ពាន់​លាន​ដុល្លារ​ កំពុងមានវត្តមាននៅកម្ពុជា

Sailun បានលើកស្ទួយអក្សរសាស្ត្រខ្មែរ និងទងជាតិខ្មែរលើសំបកកង់ឡានរបស់ខ្លួន!

រោងចក្រផលិតសំបកកង់រថយន្ត សៃលុន ប្រកាសផ្ដល់ការងារដល់ពលករខ្មែររហូតដល់៧០០ នាក់ ដែលមានតួនាទី និងប្រាក់ខែ

ក្រុមហ៊ុនផលិតកង់រថយន្តនៅស្វាយរៀង បោះទុន​វិនិយោគ $១១០លាន បង្កើតរោងចក្រមួយទៀតនៅខេត្តកំពត

ក្រុមហ៊ុន SAILUN Group ផលិតសំបកកង់យានយន្ត មានទុនវិនិយោគ ​១ ពាន់លានដុល្លារ

ក្រុមហ៊ុនចិនធំៗ បោះទុនវិនិយោគខ្ទង់ពាន់លានដុល្លារ កំពុងមានវត្តមាននៅកម្ពុជា

ក្រុមហ៊ុនផលិតកង់រថយន្តនៅស្វាយរៀង បោះទុនវិនិយោគ $១១០លាន បង្កើតរោងចក្រមួយទៀតនៅខេត្តកំពត

ក្រុមហ៊ុន SAILUN Group ផលិតសំបកកង់យានយន្ត មានទុនវិនិយោគ ១ ពាន់លានដុល្លារ