ក្រុមហ៊ុន SAILUN Group ផលិតសំបកកង់យានយន្ត មានទុនវិនិយោគ ​១ ពាន់លានដុល្លារ

ក្រុមហ៊ុន Sailun Group ដែលមានក្រុមហ៊ុនបុត្រសម្ព័ន្ធកំពុងវិនិយោគ​រោងចក្រ​ផលិត​សំ​បកកង់យានយន្តក្នុងប្រទេសកម្ពុជា ​មានទំហំទឹកប្រាក់វិនិយោគប្រមាណ ១ ពាន់​លាន​ដុល្លារ។ នេះបើយោងតាមក្រុមប្រឹក្សាអភិវឌ្ឍកម្ពុជា។

ក្រុមហ៊ុន SAILUN Group បានដាក់សម្ពោធផលិតផលកង់រថយន្តថ្មីម៉ាក SAILUN កាលពីថ្ងៃទី ០៣ ខែកុម្ភៈ ឆ្នាំ២០២៤ ដែលផលិតផលថ្មីមួយនេះ ផលិតដំបូងនៅកម្ពុជា ព្រមទាំងមាន​រោង​ចក្រនៅខេត្តស្វាយរៀង។

លោក គឹន ឧត្តមមុនីស៊ីណាត ប្រធានគ្រប់គ្រងក្រុមហ៊ុន PIC TIRE Co., LTD ដែលជាក្រុមហ៊ុនទទួល​សិទិ្ធ​ចែក​ចាយ បានឱ្យដឹងថា រោងចក្រផលិតកង់រថយន្តនេះ​មានទំហំ​ផ្ទៃដីសរុប ១២០ ហិកតា បង្កើនការងារជូនប្រជាពលរដ្ឋប្រមាណ ៣៥០០ កន្លែង ដែលឧស្សាហកម្មនេះ ប្រើប្រាស់ជ័រកៅស៊ូដែលជាដំណាំកសិផលខ្មែរស្ទើតែទាំងស្រុង។

ទាក់ទងដំណើរការ​ផលិតកម្ម លោក​បញ្ជាក់ថា ក្នុងមួយថ្ងៃក្រុមហ៊ុនបានប្រើប្រាស់ជ័រកៅស៊ូអស់ជាង ៥០០ តោន សម្រាប់ដំណាក់កាលទី១ និងទី២៕

អត្ថបទ៖ ឡេង ដេត