តាមរយៈលិខិតដាក់តាមលោក ជា សារ៉ាក់ ដែលជាអគ្គលេខាធិការគណបក្ស គឺលោក ផន ផល្លា បានប្រាប់លោក ពេជ្រ ស្រស់ ប្រធានគណបក្សយុវជនកម្ពុជា ថា លោកសូមលាឈប់ពីតួនាទីទាំងអស់នៅក្នុងគណបក្សយុវជនកម្ពុជា ដោយសារលោក ត្រូវផ្លាស់ប្តូរការងារថ្មីសម្រាប់ខ្លួនឯង ក្នុងរយៈពេល៥ឆ្នាំម្តង។

មុនការប្រកាសលាលែងនេះ លោក ផន ផល្លា មានតួនាទីជាអនុប្រធានគណបក្ស អនុប្រធានគណៈកម្មាធិការអចិន្ត្រៃយ៍គណបក្ស ប្រធានគណៈពង្រឹងខេត្តព្រៃវែង និងជាប្រធានមូលនិធិគណបក្សយុវជនកម្ពុជា។ ទន្ទឹមនេះ លោកអនុប្រធានរូបនេះ ក៏បានបង្ហាញការអរគុណដល់គណបក្សយុវជនកម្ពុជា សម្រាប់រយៈពេល៥ឆ្នាំមកនេះ ជាពិសេសអរគុណលោក ពេជ្រ ស្រស់ ប្រធានគណបក្ស ក៏ដូចជាមិត្តរួមការងារ និងអ្នកគាំទ្របក្សយុវជនកម្ពុជាទាំងអស់។

នៅពេលកន្លងមក ក៏មានសមាជិកមួយចំនួនរបស់គណបក្សយុវជនកម្ពុជានេះ បានដើរចេញពីគណបក្សផងដែរ ជាអាទិ៍ លោក ឯម សុខសុវណ្ណ ដែលជាអតីតអគ្គលេខាធិការគណបក្ស ជាដើម។ ក្រោយការលាលែងពីគណបក្សយុវជនកម្ពុជា លោក ឯម សុខសុវណ្ណ ក៏បានស្នើក្រសួងមហាផ្ទៃ ដើម្បីបង្កើតគណបក្សថ្មី តែមិនត្រូវបានក្រសួងអនុញ្ញាតឡើយ៕

The post អនុប្រធានម្នាក់របស់គណបក្សយុវជនកម្ពុជា បានប្រកាសដើរចេញពីបក្ស appeared first on Kampuchea Thmey Daily.

សេចក្ដីសម្រេចនេះបានតែងតាំងលោក ជា សារ៉ាក់ ជាអគ្គលេខាធិការគណបក្សយុវជនកម្ពុជា និងអគ្គលេខាធិការរងគណបក្សចំនួន៣រូប រួមមាន លោក លឹម រ័ត្ន លោក ពេជ្រ គឹមស្រ៊ាង និងលោក ហែន វិសុទ្ធ។ លោក ពេជ្រ ស្រស់ បានបញ្ជាដល់គណៈកម្មាធិការគណបក្សយុវជនកម្ពុជាគ្រប់ជាន់ថ្នាក់នៅទូទាំងប្រទេស ត្រូវគោរពប្រតិបត្តិតាមសេចក្ដីសម្រេចនេះឱ្យមានប្រសិទ្ធភាពខ្ពស់បំផុត។

ការតែងតាំងមន្រ្តីថ្មីរបស់បក្សពេលនេះ គឺក្រោយគណបក្សមួយនេះ មិនទទួលបានអាសនៈនៅក្នុងរដ្ឋសភា សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ។ ក្រោយបរាជ័យក្នុងការបោះឆ្នោតជាតិនេះ លោក ឯម សុខសុវណ្ណ ដែលជាអគ្គលេខាធិការគណបក្សយុវជនកម្ពុជា បានប្រកាសលាឈប់​ពីតំណែងជាន់ខ្ពស់នៅក្នុងគណបក្សនេះ។ បន្ទាប់មក គណបក្សយុវជនកម្ពុជា ក៏បានបើកកិច្ចប្រជុំគណៈកម្មាធិការអចិន្រ្តៃយ៍របស់ខ្លួន កាលពីចុងខែសីហា ឆ្នាំ២០២៣ ដើម្បីវាយតម្លៃការងារបក្ស កន្លងមក ហើយលើកទិសដៅការងារបន្ត បំពេញបន្ថែមចំណុចខ្វះខាត និងជាពិសេស គឺការសម្រេចចិត្តចូលរួមក្នុងឧត្តមក្រុមប្រឹក្សាពិគ្រោះ និងផ្តល់យោបល់ នៅអាណត្តិទី៧នេះ៕

The post គណបក្សលោក ពេជ្រ ស្រស់ តែងតាំងអគ្គលេខាធិការថ្មី១រូប និងអគ្គលេខាធិការរង៣រូប appeared first on Kampuchea Thmey Daily.

គណបក្សយុវជនកម្ពុជា បានចូលរួមការបោះឆ្នោតជ្រើសតាំង តំណាងរាស្រ្ដ ម្ដងរួចមកហើយ​ នៅនីតិកាលទី ៦ ឆ្នាំ​២០១៨កន្លងទៅនេះ។ តើលោក ពេជ្រ ស្រស់ មានប្រវត្តិសិក្សា និងការងារបែបណាខ្លះ មុនបង្កើត និងដឹកនាំគណបក្សយុវជនកម្ពុជា នោះ? ខាងក្រោមនេះ ជាប្រវត្តិសិក្សា និងការងាររបស់លោក ពេជ្រ ស្រស់៖

លោក ពេជ្រ ស្រស់ កើតនៅថ្ងៃទី ៦ ខែតុលា ឆ្នាំ ១៩៧៩ នៅភូមិចក ឃុំចក ស្រុកអូរាំងឪ ខេត្តកំពង់ចាម។ នៅឆ្នាំ ២០០៨ បានបញ្ចប់ការសិក្សាថ្នាក់បរិញ្ញាបត្ររង ផ្នែកនីតិសាស្រ្ត នៃសកលវិទ្យាល័យមេគង្គកម្ពុជា ហើយនៅឆ្នាំ ២០១៩ លោកបានបញ្ចប់ថ្នាក់បរិញ្ញាបត្រ ផ្នែកគ្រប់គ្រង នៃសាកលវិទ្យាល័យបញ្ញាជាតិ។ បន្ទាប់មកទៀត នៅឆ្នាំ ២០២០ លោក ពេជ្រ ស្រស់ បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ផ្នែកនីតិសាស្រ្ត នៃសាកលវិទ្យាល័យបញ្ញាជាតិ និងនៅចុងក្រោយនេះនៅឆ្នាំ ២០២៣ លោកបញ្ចប់ការសិក្សាថ្នាក់បណ្ឌិត ឯកទេសវិទ្យាសាស្រ្តនយោបាយ នៃសាកលវិទ្យាល័យខេមរៈ។

ពាក់ព័ន្ធនឹងការប្រវត្តិការងារវិញម្ដង ពីឆ្នាំ ១៩៩៦ ដល់ឆ្នាំ ១៩៩៧ លោក ពេជ្រ ស្រស់ បានធ្វើការងារជាកម្មករសំណង់ ហើយចាប់ពីឆ្នាំ ១៩៩៧ ដល់ឆ្នាំ ២០០៤ លោកបានធ្វើការងារជា កម្មករក្នុងរោងចក្រកាត់ដេរសំលៀកបំពាក់ នៅរាជធានីភ្នំពេញ។ នៅឆ្នាំ ២០០៥ ដល់ឆ្នាំ ២០០៦ លោក ពេជ្រ ស្រស់ បានក្លាយជាអនុប្រធាន សហព័ន្ធសហជីពចំរើនកម្មករ ក្នុងរោងចក្រកាត់ដេរសំលៀកបំពាក់ ហើយពីចាប់ឆ្នាំ ២០០៦ ដល់ឆ្នាំ ២០០៧ លោកបានក្លាយជាប្រធានការិយាល័យរដ្ឋបាល នៃអង្គការខ្មែរដើម្បីសុខភាព និងសិល្បៈ។

បន្ទាប់មកទៀត ចាប់ពីឆ្នាំ ២០០៧ ដល់ឆ្នាំ ២០០៨ លោក ពេជ្រ ស្រស់ បានក្លាយជាប្រធានចលនាយុវជនប្រចាំរាជធានីភ្នំពេញ នៃគណបក្សសិទ្ធិមនុស្ស និងជាជំនួយការបេក្ខជនតំណាងរាស្រ្តប្រចាំខេត្តឧត្តរ​​មានជ័យ នៃគណបក្សសិទ្ធិមនុស្ស។ នៅឆ្នាំ ២០០៩ ដល់ឆ្នាំ ២០១០ លោកបានក្លាយជាអគ្គលេខា​ធិការសមាគមភាពយន្តកម្ពុជា និងនៅឆ្នាំ ២០១០ ដល់ឆ្នាំ ២០១៥ លោកបានក្លាយជាប្រធានអង្គការរួមគ្នាដើម្បីភាពរីកចំរើន។ ក្រោយមកទៀត ចាប់ពីឆ្នាំ ២០១៥ ដល់ឆ្នាំ ២០១៦ លោក ពេជ្រ ស្រស់ បានក្លាយជាសមាជិកស្ថាបនិក គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ។

ចាប់ពីឆ្នាំ ២០១៦ មកដល់បច្ចុប្បន្ន លោក ពេជ្រ ស្រស់ ជាស្ថាបនិក និងជាប្រធានគណបក្សយុវជនកម្ពុជា ហើយចាប់ពីឆ្នាំ ២០១៨ មកដល់បច្ចុប្បន្ន លោកក៏ជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ និងជាទីប្រឹក្សារាជរដ្ឋាភិបាល ដែលមានឋានៈស្មើទេសរដ្ឋមន្រ្តី៕

The post តើលោក ពេជ្រ ស្រស់ មានប្រវត្តិសិក្សា និងការងារបែបណា មុនក្លាយជាប្រធានគណបក្សយុវជនកម្ពុជា? appeared first on Kampuchea Thmey Daily.

The post គណបក្សយុវជនកម្ពុជា តែងតាំងលោក ឯម សុខសុវណ្ណ ជាអគ្គលេខាធិការថ្មីរបស់បក្ស appeared first on Kampuchea Thmey Daily.

និក្ខេបបទថ្នាក់បណ្ឌិតរបស់លោក ពេជ្រ ស្រស់ គឺលោកបានស្រាវជ្រាវលើប្រធានបទស្ដីពីដំណើរការបោះឆ្នោតនៅកម្ពុជា (ឆ្នាំ ២០០៨ ដល់ឆ្នាំ២០១៨) ហើយនៅថ្ងៃទី២៤ ខែមករា ឆ្នាំ២០២៣ លោកក៏ត្រូវបានប្រកាសជាប់សញ្ញាបត្របណ្ឌិតដោយជោគជ័យលើឯកទេសវិទ្យាសាស្ត្រនយោបាយ នៃសាកលវិទ្យាល័យខេមរៈ។ មុនពេលទទួលបានសញ្ញាបត្របណ្ឌិតនេះ លោក ពេជ្រ ស្រស់ ក៏មានសញ្ញាបត្របរិញ្ញាបត្រជាន់ខ្ពស់ផ្នែកនីតិសាស្ត្រ និងសញ្ញាបត្របរិញ្ញាបត្រផ្នែកគ្រប់គ្រង នៅសាកលវិទ្យាល័យបញ្ញាជាតិ។

បច្ចុប្បន្ន លោក ពេជ្រ ស្រស់ មានតួនាទីជាប្រធានគណបក្សយុវជនកម្ពុជា។ ទន្ទឹមនេះ ក្រោយការបោះឆ្នោតជ្រើសតាំងតំណាងរាស្ត្រអាណត្តិទី៦ លោក ពេជ្រ ស្រស់ ក៏បានចូលរួមក្នុងយន្តការឧត្តមក្រុមប្រឹក្សាពិគ្រោះ និងផ្ដល់យោបល់ ក្នុងនាមជាប្រធានប្រតិភូគណបក្សយុវជនកម្ពុជា ដែលលោកមានឋានៈស្មើទេសរដ្ឋមន្ត្រី។

មុនឈានចូលប្រឡូកក្នុងឆាកនយោបាយ ហើយក្លាយជាប្រធានគណបក្សនេះ លោក ពេជ្រ ស្រស់ គ្រាន់តែជាកម្មករ និងជាជាងជួសជុលម៉ាស៊ីននៅក្នុងរោងចក្រកាត់ដេរមួយតែប៉ុណ្ណោះ។ ប៉ុន្តែ ដោយការអភិវឌ្ឍខ្លួនជាបន្តបន្ទាប់ លោក ពេជ្រ ស្រស់ ក៏បានចាប់ផ្ដើមចូលបម្រើការងារជាមន្ត្រីស្ម័គ្រចិត្តនៅអង្គការមួយផ្នែកសុខភាព និងសិល្បៈ ធ្លាប់ធ្វើជាបុគ្គលិកនៅក្រុមហ៊ុនឯកជន រហូតដល់ឆ្នាំ២០០៩ លោកក៏បានបើកអង្គការមួយដែលមានឈ្មោះថា «អង្គការរួមគ្នាដើម្បីភាពរីកចម្រើន» ជាដើម៕

ដោយ៖ ធឿន វ៉ាន់សុង

The post ស្ងាត់ៗ លោក ពេជ្រ ស្រស់ បញ្ចប់ការសិក្សាថ្នាក់បណ្ឌិតវិទ្យាសាស្ត្រនយោបាយ appeared first on Kampuchea Thmey Daily.

រាជរដ្ឋាភិបាលកម្ពុជា បានកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ គឺជាថ្ងៃបោះឆ្នោតជ្រើសតាំងតំណាងរាស្ត្រ សម្រាប់អាណត្តិទី៧។ ដោយឡែក ចាប់ពីថ្ងៃទី១ ដល់ថ្ងៃទី២១ ខែកក្កដា ឆ្នាំ២០២៣ គឺជាថ្ងៃយុទ្ធនាការនៃការឃោសនារកសំឡេងឆ្នោត ដែលមានរយៈពេល ២១ថ្ងៃ។

លោក ពេជ្រ ស្រស់ ប្រធានគណបក្សយុវជន ដែលជាអ្នកនយោបាយជំនាន់ថ្មីមួយរូប បានប្រកាសត្រៀមលក្ខណៈរួចជាស្រេចក្នុងការចូលរួមប្រកួតប្រជែងការបោះឆ្នោតជ្រើសរើសតំណាងរាស្ត្រសម្រាប់អាណត្តិទី៧ នាពេលខាងមុខនេះ។ ក្នុងនោះ ប្រធានគណបក្សរូបនេះ បានឲ្យដឹងថា គណបក្សរបស់លោក នឹងដាក់បេក្ខជនឈរឈ្មោះនៅ ២៥រាជធានី-ខេត្តទូទាំងប្រទេសតែម្តង។

ជាមួយនឹងការត្រៀមសម្រាប់ការបោះឆ្នោតនាពេលខាងមុខនេះ គណបក្សយុវជនកម្ពុជា បានប្រកាសដាក់ចេញគោលនយោបាយទាំង ៩ចំណុចនេះ រួមមានដូចជា ធានាតម្លៃផលិតផលកសិកម្ម ហើយរដ្ឋបញ្ចេញកញ្ចប់ថវិកា នៅពេលផលិតផលកសិកម្មធ្លាក់ចុះ លុបបំបាត់ការភាពមិនប្រក្រតីនៅតាមគ្រប់មន្ទីរពេទ្យ លុបបំបាត់ការផ្សព្វផ្សាយគ្រឿងស្រវឹងដោយអនាធិបតេយ្យ ការបោសសម្អាតគ្រឿងញៀនពីលើដល់ក្រោម លុបបំបាត់អំពើពុករលួយ ពិនិត្យមើលឡើងវិញចំពោះការអនុវត្ត និងការគ្រប់គ្រងលើជនអន្តោប្រវេសន៍ បង្កើតមណ្ឌលថែទាំចាស់ជរា និងជនពិការគ្មានទីពឹង និងការឧបត្ថម្ភប្រាក់ដល់ជនចាស់ជរាចាប់ពីអាយុ ៦០ឆ្នាំឡើង។ 

អ្នកនយោបាយរូបនេះ បានបង្ហាញក្ដីសង្ឃឹមថា គណបក្សរបស់លោកនឹងទទួលបានទំនុកចិត្ត និងការគាំទ្រពីប្រជាពលរដ្ឋជាម្ចាស់ឆ្នោតនៅក្នុងការបោះឆ្នោតជ្រើសរើសតំណាងរាស្ត្រអាណត្តិនេះ ដើម្បីឲ្យគណបក្សរបស់លោកមានលទ្ធភាពចូលរួមបម្រើជាតិ និងប្រជាជនកម្ពុជា៕

ដោយ៖ ធឿន វ៉ាន់សុង

The post គណបក្សយុវជនត្រៀមដាក់បេក្ខជននៅ ២៥មណ្ឌលសម្រាប់ការបោះឆ្នោតតំណាងរាស្ត្រ អាណត្តិនេះ appeared first on Kampuchea Thmey Daily.

សូមជម្រាបថា គណបក្សយុវជនកម្ពុជា កាលពីថ្ងៃទី ៨ ខែកក្កដា ឆ្នាំ ២០២២ បានដាក់លិខិតស្នើសុំជួបពិភាក្សាជាមួយប្រធាន គ.ជ.ប អំពីភាពមិនច្បាស់លាស់មួយចំនួន នៃកិច្ចការបោះឆ្នោតកន្លងទៅ ដើម្បីកែលម្អការបោះឆ្នោតនាថ្ងៃខាងមុខ។  

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ១២ ខែកក្កដានេះថា បន្ទាប់ពីបានទទួលលិខិត របស់គណបក្សយុវជនកម្ពុជាហើយ គឺប្រធាន គ.ជ.ប បានណែនាំឲ្យមន្ត្រីជំនាញចាត់ ចែង រៀបចំជំនួបនេះហើយ។

លោកថា «ពាក់ព័ន្ធនឹងការស្នើសុំ របស់គណបក្សយុវជនកម្ពុជានេះ ឯកឧត្ដមប្រធានគណៈកម្មាធិការជាតិរៀបចំការបោះឆ្នោត បានចារជូនឯកឧត្ដមអគ្គលេខាធិការ ទេព នីថា ដើម្បីមុខការ ហើយនៅក្នុងចំណាត់ការនេះ ឯកឧត្ដមអគ្គលេខាធិការ បានចាត់ឲ្យនាយកដ្ឋានសេវាកម្មច្បាប់ និងវិវាទកម្ម ទំនាក់ទំនងជាមួយនឹងគណបក្សយុវជនកម្ពុជា ដើម្បីទីមួយស្នើសុំសមាសភាពខាងគណបក្សចូលពិភាក្សា ដើម្បីឲ្យយើងដឹងថា មាននរណាខ្លះចូលរួម និងងាយស្រួល ក្នុងការរៀបចំសមាសភាពដើម្បីជួប ទីពីរគឺទៅលើកម្មវត្ថុនៃការពិភាក្សា»។

អ្នកនាំពាក្យ គ.ជ.ប បានបញ្ជាក់បន្ថែមថា ចំពោះពេលវេលានៃការជួបពិភាក្សារវាងថ្នាក់ដឹកនាំ គ.ជ.ប និងថ្នាក់ដឹកនាំគណបក្សយុវជនកម្ពុជា នឹងបញ្ជាក់នៅពេលនាយកដ្ឋានសេវាកម្មច្បាប់ និងវិវាទកម្ម នៃគ.ជ.ប បានទំនាក់ទំនងជាមួយគណបក្សយុវជនកម្ពុជារួចរាល់។

លោក ពេជ្រ​ ស្រស់ ប្រធានគណបក្សយុវជនកម្ពុជា មានប្រសាសន៍ប្រាប់កម្ពុជាថ្មីបន្ថែមថា គណបក្សរបស់លោក ដែលបានចូលរួមការបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥កន្លងទៅ។ ដូច្នេះគណបក្សយុវជនកម្ពុជា មានគំនិតប្រមូលធាតុចូលមួយចំនួនពិភាក្សាជាមួយ គ.ជ.ប ដើម្បីកែលម្អការបោះឆ្នោតនាពេលខាងមុខឲ្យកាន់តែល្អប្រសើរ។

លោក ពេជ្រ ស្រស់ បានបន្ថែមថា «គណបក្សយុវជនកម្ពុជា យើងរកឃើញភាពមិនច្បាស់លាស់មួយចំនួន ដែលយើងចាត់ទុកថា ត្រូវតែជជែកជាមួយនឹងស្ថាបន គ.ជ.ប ក្នុងការកែលម្អឲ្យមានភាពល្អប្រសើរ ក្នុងការរៀបចំការបោះឆ្នោតនៅកម្ពុជា អញ្ចឹងគណបក្សយុវជនកម្ពុជា យើងសម្រេចចិត្តដាក់លិខិតទៅ គ.ជ.ប ដើម្បីជួបសន្ទនាគ្នា»។

ជាមួយគ្នានេះ ប្រធានគណបក្សយុវជនកម្ពុជា ក៏បានបញ្ជាក់ផងដែរថា អំពីមូលហេតុដែលគណបក្សរបស់លោក ស្នើ សុំជួបប្រធាន គ.ជ.ប តែមួយគណបក្ស។ លោក ពេជ្រ ស្រស់ បន្ថែមថា «សំណួរ សួថា ម៉េចបានយើងមិនធ្វើជាមួយគេ? មែនទែនទៅទស្សនៈគណបក្សនយោបាយទាំងអស់ គឺតែងតែខុសគ្នា ហើយការវាយតម្លៃ និងកំណត់អត្តសញ្ញាណនៃបញ្ហា គឺក៏ខុសគ្នាដែរ អញ្ចឹងគណបក្សយុវជនកម្ពុជា យើងវាយតម្លៃបែបផ្សេង កំណត់អត្តសញ្ញាណបញ្ហាបែបផ្សេង យើងអត់អាចទៅចូលជាមួយអ្នកដែលគេ មានគំនិតផ្សេងខុសពីយើងទេ»៕

អត្ថបទ៖ ឃួន សុភ័ក្រ

The post មន្ត្រី គ.ជ.ប កំពុងទំនាក់ទំនងជាមួយគណបក្សយុវជនកម្ពុជា ដើម្បីរៀបចំឲ្យមានជំនួបពិភាក្សា appeared first on Kampuchea Thmey Daily.

តាមរយៈសេចក្ដីថ្លែងការណ៍របស់ខ្លួន នៅថ្ងៃទី ៦ ខែមិថុនានេះ គណបក្សយុវជនកម្ពុជា បានសរសេរថា នៅក្នុងប្រទេសកម្ពុជា កាលពីថ្ងៃទី ៥ ខែមិថុនា ឆ្នាំ ២០២២ បានរៀបចំការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥ ដែលមានគណបក្សនយោបាយចូលរួម ប្រកួតប្រជែងចំនួន ១៧គណបក្ស។

ក្នុងនោះ គណបក្សយុវជនកម្ពុជា គឺបានចូលរួមប្រកួតប្រជែងផងដែរនោះ បានកត់សម្គាល់ឃើញថា ដំណើរការនៃការបោះឆ្នោត គឺបានប្រព្រឹត្តទៅដោយរលូន ក្នុងស្ថានភាពសន្តិសុខល្អ សណ្ដាប់ធ្នាប់ល្អ និងក្នុងបរិយាកាស សេរី ត្រឹមត្រូវ យុត្តិធម៌ គ្មានរូបភាពគំរាមកំហែងកើតឡើងនោះទេ ជាពិសេសប្រជាពលរដ្ឋបានទៅបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥នេះ យ៉ាងច្រើនកុះករផងដែរ។

សូមជម្រាបថា ប្រធាន គ.ជ.ប លោក ប្រាជ្ញ ចន្ទ មានប្រសាសន៍ក្នុងសន្និសីទសារព័ត៌មាន កាលពីល្ងាចថ្ងៃទី ៥ ខែមិថុនា ឆ្នាំ ២០២២ ដែលជាថ្ងៃបោះឆ្នោតថា មានប្រជាពលរដ្ឋចំនួន ៧ ១៧២ ៤៤៨នាក់ បានអញ្ជើញទៅបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥នេះ ក្នុងចំណោមអ្នកដែលមានឈ្មោះក្នុងបញ្ជីបោះឆ្នោតចំនួន ៩ ២០៥ ៦៨១នាក់ ដែលស្មើនឹង ៧៧,៩១ភាគរយ។

លោកប្រធាន គ.ជ.ប បានបញ្ជាក់ដែរថា ការបោះឆ្នោតជ្រើសរើស ក្រុមប្រឹក្សាឃុំ-សង្កាត់អាណត្តិទី ៥នេះ ប្រព្រឹត្តទៅដោយជោគជ័យ ​និងក្នុងបរិយាកាសស្ងប់ស្ងាត់ មានសន្តិសុខ សុវត្ថិភាព និងសណ្ដាប់ធ្នាប់សាធារណៈ គ្មានអំពើហិង្សា គ្មានការគំរាមកំហែង៕

អត្ថបទ៖​ ឃួន សុភ័ក្រ

The post គណបក្សយុវជនកម្ពុជា ៖ ការបោះឆ្នោតឃុំ-សង្កាត់អាណត្តិទី ៥ ប្រព្រឹត្តទៅដោយរលូន ក្នុងបរិយាកាស សេរី ត្រឹមត្រូវ និងយុត្តិធម៌ appeared first on Kampuchea Thmey Daily.