គណបក្សលោក ពេជ្រ ស្រស់ តែងតាំងអគ្គលេខាធិការថ្មី១រូប និងអគ្គលេខាធិការរង៣រូប

លោក ពេជ្រ ស្រស់ ប្រធានគណបក្សយុវជនកម្ពុជា បានសម្រេចតែងតាំងមន្ត្រីថ្មីរបស់គណបក្សនេះចំនួន៤រូប ដែលនោះក្នុង អគ្គលេខាធិការ១រូប និងអគ្គលេខាធិការរង៣រូប។ នេះបើតាមសេចក្ដីសម្រេចរបស់លោក ពេជ្រ ស្រស់ ចុះនៅថ្ងៃទី៤ ខែកញ្ញា ឆ្នាំ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីសម្រេចនេះបានតែងតាំងលោក ជា សារ៉ាក់ ជាអគ្គលេខាធិការគណបក្សយុវជនកម្ពុជា និងអគ្គលេខាធិការរងគណបក្សចំនួន៣រូប រួមមាន លោក លឹម រ័ត្ន លោក ពេជ្រ គឹមស្រ៊ាង និងលោក ហែន វិសុទ្ធ។ លោក ពេជ្រ ស្រស់ បានបញ្ជាដល់គណៈកម្មាធិការគណបក្សយុវជនកម្ពុជាគ្រប់ជាន់ថ្នាក់នៅទូទាំងប្រទេស ត្រូវគោរពប្រតិបត្តិតាមសេចក្ដីសម្រេចនេះឱ្យមានប្រសិទ្ធភាពខ្ពស់បំផុត។

ការតែងតាំងមន្រ្តីថ្មីរបស់បក្សពេលនេះ គឺក្រោយគណបក្សមួយនេះ មិនទទួលបានអាសនៈនៅក្នុងរដ្ឋសភា សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ។ ក្រោយបរាជ័យក្នុងការបោះឆ្នោតជាតិនេះ លោក ឯម សុខសុវណ្ណ ដែលជាអគ្គលេខាធិការគណបក្សយុវជនកម្ពុជា បានប្រកាសលាឈប់​ពីតំណែងជាន់ខ្ពស់នៅក្នុងគណបក្សនេះ។ បន្ទាប់មក គណបក្សយុវជនកម្ពុជា ក៏បានបើកកិច្ចប្រជុំគណៈកម្មាធិការអចិន្រ្តៃយ៍របស់ខ្លួន កាលពីចុងខែសីហា ឆ្នាំ២០២៣ ដើម្បីវាយតម្លៃការងារបក្ស កន្លងមក ហើយលើកទិសដៅការងារបន្ត បំពេញបន្ថែមចំណុចខ្វះខាត និងជាពិសេស គឺការសម្រេចចិត្តចូលរួមក្នុងឧត្តមក្រុមប្រឹក្សាពិគ្រោះ និងផ្តល់យោបល់ នៅអាណត្តិទី៧នេះ៕