គណបក្សហ៊្វុនស៊ិនប៉ិច Archives - Kampuchea Thmey Daily

អ្នកនាំពាក្យ ៖ ព្រះអង្គម្ចាស់ នរោត្តម ចក្រាវុធ យាងចុះទៅតាមបណ្ដាខេត្ត ដើម្បីពង្រឹងនូវសាមគ្គីភាព

sopheak khoun — Wed, 22 Dec 2021 06:05:42 +0000

លោក ញឿន រ៉ាដែន អ្នកនាំពាក្យ នៃគណបក្សហ៊្វុនស៊ិនប៉ិច មានប្រសាសន៍ប្រាប់កម្ពុជាថ្មី នៅព្រឹកថ្ងៃទី ២២ ខែធ្នូនេះថា ព្រះអង្គម្ចាស់ នរោត្តម ចក្រាវុធ ព្រះប្រធានស្តីទីគណបក្សហ៊្វុនស៊ិនប៉ិច បានយាងចុះទៅកាន់ខេត្តកណ្ដាល និងខេត្តកំពង់ធំ កាលពីពេលថ្មីៗនេះ ដើម្បីជួបសួរសុខទុក្ខ និងសំណេះសំណាលជាមួយថ្នាក់ដឹកនាំ ដែលជារចនាសម្ព័ន្ធថ្នាក់ខេត្ត និងស្រុក។ សមាជិកា-សមាជិកា នៃគណបក្សហ៊្វុនស៊ិនប៉ិច ក្នុងខេត្តទាំងពីរនេះ បានទទួលស្វាគមន៍ និងមានការប្ដេជ្ញាចិត្តខ្ពស់ សម្រាប់ការគាំទ្រការដឹកនាំរបស់ព្រះអង្គម្ចាស់ នរោត្តម ចក្រាវុធ នាពេលបច្ចុបុ្បន្ន និងពេលខាងមុខទៀត។

ក្នុងឱកាសនោះ ព្រះអង្គម្ចាស់ នរោត្តម ចក្រាវុធ បានណែនាំដល់សមាជិក-សមាជិកា របស់ព្រះអង្គឲ្យមានការខិតខំធ្វើការបម្រើប្រជារាស្រ្ត និងប្រទេសជាតិបន្ថែមទៀត ក្នុងការរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេសជាតិ ឲ្យកាន់តែមានការរីកចំរើនបន្ថែមទៀត និងរូបរួមគ្នាស្តារកិត្តិយសគណបក្សហ៊្វុនស៊ិនប៉ិចឡើងវិញផងដែរ។

ព្រះអង្គម្ចាស់ ក៏បានប្ដេជ្ញាចិត្តខ្ពស់ក្នុងការថែរក្សាមរតក ដែលបន្សល់ទុកពីសម្ដេចតា ដោយសម្ដេចតាបានព្រះប្រទាន ដល់សម្ដេចក្រុមព្រះ ហើយសម្ដេចក្រុមព្រះ ក៏បានព្រះប្រទានដល់ព្រះអង្គម្ចាស់ ចក្រាវុធ បន្ត។ ក្នុងនោះ ក៏យាងចុះទៅតាមបណ្ដាខេត្តទាំងនោះ ក៏មានគោលបំណងពង្រឹងនូវសាមគ្គីភាព ដើម្បីត្រៀមចូលរួមការបោះឆ្នោត ជ្រើសរើសក្រុមប្រឹក្សាឃុំ-សង្កាត់ នាពេលខាងមុខ។

លោក ញឿន រ៉ាដែន មានប្រសាសន៍បន្តថា ការដែលព្រះអង្គម្ចាស់ នរោត្តម ចក្រាវុធ យាងទៅកាន់ខេត្តទាំងនោះ ពុំមែនទៅកៀរគរសមាជិក-សមាជិកា មកគាំទ្រព្រះអង្គ ជាប្រធានគណបក្សហ៊្វុនស៊ិនប៉ិចនោះទេ តែថាសមាជិក-សមាជិកាទាំងនោះ ជាអ្នកយាងព្រះអង្គទៅ ដើម្បីបង្ហាញការគាំទ្រព្រះអង្គតែម្ដង។

អ្នកនាំពាក្យ នៃគណបក្សហ៊្វុនស៊ិនប៉ិច បានបញ្ជាក់ថា «អត់ទេ! គឺមានការយាងអញ្ជើញតាមខេត្ត មកព្រះអង្គផ្ទាល់ ដើម្បីសួរសុខទុក្ខ ព្រោះតាំងពីលោកគង់ជាព្រះប្រធានស្ដីទីមក លោករវល់ក្នុងការមើលថែព្រះបិតារបស់លោក ហើយឥឡូវព្រះបិតារបស់លោក សោយទិវង្គត់ហើយ អញ្ចឹងឆ្លៀតឱកាសមុនពេលសមាជនេះ ព្រះអង្គមានគម្រោងចុះទៅតាមបណ្ដារាជធានី-ខេត្តហ្នឹង ឲ្យបានច្រើនរហូតទៅដល់ដែលយើងគិតថា អាចថា ៨០ភាគរយនៅទូទាំង ២៥រាជធានី-ខេត្ត»។

ជាមួយគ្នានេះលោក ញឿន រ៉ាដែន បានឲ្យដឹងដែរថា គណបក្សហ៊្វុនស៊ិនប៉ិច បាននិងកំពុងត្រៀមរៀបចំ នៅក្នុងការរៀបចំសមាជ ដើម្បីជ្រើសតាំងព្រះអង្គម្ចាស់ នរោត្តម ចក្រាវុធ ជាប្រធានគណបក្សហ៊្វុនស៊ិនប៉ិច នៅខែមករា ឆ្នាំ ២០២២ខាងមុខនេះ ផងដែរ៕

អត្ថបទ៖ ឃួន សុភ័ក្រ

The post អ្នកនាំពាក្យ ៖ ព្រះអង្គម្ចាស់ នរោត្តម ចក្រាវុធ យាងចុះទៅតាមបណ្ដាខេត្ត ដើម្បីពង្រឹងនូវសាមគ្គីភាព appeared first on Kampuchea Thmey Daily.

លោក ហេង ហាក់លីម ដែលមានឈ្មោះនៅក្នុងដីកាកោះហៅ ប្រកាសចូលបំភ្លឺដោយមិនគេចវេសឡើយ

Kang Tola — Tue, 19 Oct 2021 11:03:44 +0000

លោក ហេង ហាក់លីម ជាមនុស្សម្នាក់ក្នុងចំណោម៣ នាក់ នៃគណបក្សហ៊្វុនស៊ិនប៉ិច ដែលត្រូវបានអយ្យការអមសាលាដំបូងរាជធានីភ្នំពេញ កោះហៅដើម្បីសាកសួរទាក់ទងទៅនឹងបទរំលោភអំណាច និងប្រើប្រាស់លិខិតក្លែងនោះ បានអះអាងថា លោកនឹងចូលបំភ្លឺតាមដីកា ដោយមិនគេចវេសទៅណាឡើយ ពីព្រោះនោះជាការចោទប្រកាន់ដោយគ្មានភស្តុតាង។

លោក ហេង ហាក់លីម ដែលដីកាបានបញ្ជាក់ថា មានតួនាទីនៅក្នុងការិយាល័យទី៥ នៃនាយកដ្ឋានសន្តិសុខផ្ទៃក្នុង អគ្គស្នងការដ្ឋាននគរបាលជាតិ បានថ្លែងប្រាប់កម្ពុជាថ្មីយ៉ាងដូច្នេះថា “ខ្ញុំអត់មានអីទេខ្ញុំនឹងចូលឆ្លើយបំភ្លឺនៅតុលាការតាមធម្មតា បើមានបណ្តឹងគេសួរហើយ នេះជារឿងធម្មតាទេ ខ្ញុំអត់មានបញ្ហាអីទេ”។ លោកថា លោកគ្មានតួនាទីអ្វីជាប់ពាក់ព័ន្ធទៅនឹងគណបក្សហ៊្វុនស៊ិនប៉ិចនោះទេ។

បើតាមលោក ហេង ហាក់លីម ការប្ដឹងរឿងត្រា និងការរំលោភអំណាចនោះ លោកខ្លួនឯងគ្មានអំណាចឯណាទៅរំលោភគេទេ ហើយលោកក៏គ្មានតួនាទីនៅក្នុងគណបក្សនោះដែរ ដូច្នេះការចោទប្រកាន់ដោយគ្មានមូលដ្ឋានបែបនេះគួរឲ្យឆ្ងល់ដែរ។ លោកថា ទាក់ទងទៅនឹងត្រានេះ គួរតែសួរទៅប្រធានស្ថាប័ន ឬអង្គភាពរបស់ពួកគាត់ល្អជាង ជាជាងនិយាយគ្មានហេតុផល ទម្លាក់កំហុស ទៅលើរូបលោក។

លោកបញ្ជាក់ថា “ខ្ញុំគ្មានតួនាទីណាមួយទៅកាន់ត្រាគណបក្សហ្នឹងទេ ហើយឈប់ឱ្យគាត់មានទស្សនៈបែបនេះ ហើយការចោទប្រកាន់នោះ វាអត់មានមូលដ្ឋានអីទេ ពីព្រោះខ្ញុំអត់មានតួនាទីផ្លូវការអីទេ”។

ចំពោះការលើកឡើងមួយចំនួនទាក់ទងទៅនឹងការរារាំងមិនឲ្យមានការរួបរួមរវាងគណបក្សខ្មែររួបរួមជាតិ របស់លោក ញឹក ប៊ុនឆៃ ជាមួយគណបក្សហ៊្វុនស៊ិនប៉ិចនោះ លោក ហេង ហាក់លីម បានអះអាងថា នៅក្នុងគណបក្សមានប្រធាន អនុប្រធាន មានអគ្គលេខាធិការ មានសមាជិក រចនាសម្ព័ន្ធ តែលោកគ្មានតួនាទីណាមួយនៅក្នុងគណបក្ស ដែលអាចរារាំងអំណាចដូចការចោទប្រកាន់នោះទេ។ លោកថា លោកគ្មានអំណាច ដើម្បីរារាំងមិនឲ្យគណបក្សទាំងពីរត្រូវរ៉ូវគ្នាទេ ហើយកន្លងមកមានការចោទប្រកាន់លើលោកទាក់ទងទៅនឹងការរារាំងនេះ តែលោកមិនបានឆ្លើយតបទេ។

ឈ្មោះ ហេង ហាក់លីម ធ្លាប់ត្រូវបានមន្ត្រីជាន់ខ្ពស់គណបក្សហ៊្វុនស៊ិនប៉ិច ក៏ដូចជាលោក ញឹក ប៊ុនឆៃ បានចោទប្រកាន់ថា បានធ្វើសកម្មភាពរារាំង មិនឲ្យរួបរួមរវាងគណបក្សខ្មែររួបរួមជាតិ ជាមួយគណបក្សហ៊្វុនស៊ិនប៉ិច និងការប្រើតួនាទីរំលោភអំណាច នៅក្នុងគណបក្សហ៊្វុនស៊ិនប៉ិចជាដើម។

គួររំលឹកថា មន្ត្រីជាន់ខ្ពស់គណបក្សហ៊្វុនស៊ិនប៉ិចចំនួន៣រូប ត្រូវបានព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក សេង ហៀង កោះហៅអោយចូលមកកាន់តុលាការ ដើម្បីសាកសួរទាក់ទងទៅនឹងបទរំលោភអំណាច និងប្រើប្រាស់លិខិតក្លែងបន្តបន្ទាប់គ្នានៅថ្ងៃទី២១ ខែតុលា ឆ្នាំ២០២១ខាងមុខ។

បើតាមដីកាកោះដែលកម្ពុជាថ្មីទទួលបាន មន្ត្រីជាន់ខ្ពស់គណបក្សហ៊្វុនស៊ិនប៉ិចចំនួន៣រូប ដែលតុលាការកោះហៅនោះរួមមាន៖ ទី១, លោក អាំង សំបូរ អាយុ៦២ ឆ្នាំ មានតួនាទីជាអគ្គលេខាធិការប្រតិបត្តិគណបក្ស មានទីលំនៅសង្កាត់បឹងកក់ទី២ ខណ្ឌដូនពេញ រាជធានីភ្នំពេញ ឲ្យចូលទៅកាន់សាលាដំបូងរាជធានីភ្នំពេញនៅថ្ងៃទី២១ ខែតុលា ឆ្នាំ២០២១ វេលាម៉ោង១០ ព្រឹក ដើម្បីសាកសួរពីបទពីដំណើររឿង “រំលោភអំណាច” និងបទ “ប្រើប្រាស់លិខិតក្លែង”។

ទី២, លោក ហេង ហាក់លីម ការិយាល័យទី៥ នៃនាយកដ្ឋានសន្តិសុខផ្ទៃក្នុង អគ្គស្នងការដ្ឋាននគរបាលជាតិ និងជាជំនួយការព្រះអង្គម្ចាស់ក្សត្រី នរោត្តម ម៉ារី ឲ្យចូលទៅកាន់អយ្យការអមសាលាដំបូងរាជធានីភ្នំពេញ នៅថ្ងៃទី២១ ខែតុលា ឆ្នាំ២០២១ វេលាម៉ោង១១ ព្រឹក ដើម្បីសាកសួរពីដំណើររឿង “រំលោភអំណាច” និងបទ “ប្រើប្រាស់លិខិតក្លែង”។

ទី៣, ឈ្មោះ ឆឹង ចំរើន អាយុ៧២ ឆ្នាំ មានតួនាទីជាអនុប្រធានគណបក្ស ឲ្យចូលទៅកាន់អយ្យការអមសាលាដំបូងរាជធានីភ្នំពេញនៅថ្ងៃទី២១ ខែតុលា ឆ្នាំ២០២១ វេលាម៉ោង៩ ព្រឹក ដើម្បីសាកសួរពីដំណើររឿងរំលោភអំណាច និងបទប្រើប្រាស់លិខិតក្លែង។

មន្ត្រីជាន់ខ្ពស់គណបក្សហ៊្វុនស៊ិនប៉ិចទាំង៣នាក់នេះ ត្រូវបានប្ដឹងដោយមន្ត្រីជាន់ខ្ពស់គណបក្សគណបក្សហ៊្វុនស៊ិនប៉ិចចំនួន៤រូប គឺឈ្មោះ ហេង ចន្ថា, ឈ្មោះ សាយ ហាក់, ឈ្មោះ ចាប ញ៉ាលីវុធ និងឈ្មោះ ផាន់ សិទ្ធី៕

ដោយ ៖ កោះកែវ

The post លោក ហេង ហាក់លីម ដែលមានឈ្មោះនៅក្នុងដីកាកោះហៅ ប្រកាសចូលបំភ្លឺដោយមិនគេចវេសឡើយ appeared first on Kampuchea Thmey Daily.

ព្រះអង្គម្ចាស់ក្សត្រីយ៍ នរោត្តម ម៉ារី បដិសេធមិនពាក់ព័ន្ធជាមួយការយកត្រារបស់គណបក្សហ៊្វុនស៊ិនប៉ិច

Kang Tola — Mon, 27 Sep 2021 14:54:18 +0000

ព្រះអង្គម្ចាស់ក្សត្រីយ៍ នរោត្តម ម៉ារី ព្រះប្រធានមូលនិធិស្ត្រីសម្ដេចរស្មីសោភ័ណ បានបដិសេធចំពោះការលើកឡើងរបស់ក្រុមថ្នាក់ដឹកនាំគណបក្សហ៊្វុនស៊ិនប៉ិចមួយចំនួនដូចជា លោក ផាន់ សិទ្ធី, លោក សាយ ហាក់ , លោក ហេង ចន្ថា និងលោក ចាប ញ៉ាលីវុធ ជាដើម ថាព្រះអង្គជាអ្នករក្សាទុកត្រាគណបក្សហ៊្វុនស៊ិនប៉ិច ហើយព្រះអង្គម្ចាស់ក្សត្រីយ៍ នរោត្តម ម៉ារី ក៏បានព្រមានក្រុមនេះឲ្យបញ្ឈប់ជាបន្ទាន់ ក្នុងការយកព្រះនាមព្រះអង្គម្ចាស់ក្សត្រីយ៍ទៅប្រើប្រាស់ និងភ្ជាប់ជាមួយបញ្ហា និងរឿងផ្សេងៗរបស់ខ្លួនតទៅទៀត នេះបើយោងតាមសេចក្ដីប្រកាសព័ត៌មានរបស់ព្រះអង្គម្ចាស់ក្សត្រីយ៍ នរោត្តម ម៉ារី ព្រះប្រធានមូលនិធិស្ត្រីសម្តេចរស្មីសោភ័ណ ចុះថ្ងៃទី២៧ ខែកញ្ញា នេះ។

ព្រះអង្គម្ចាស់ក្សត្រីយ៍ នរោត្តម ម៉ារី បញ្ជាក់ថា រយៈពេលថ្មីៗនេះមានបុគ្គល២-៣នាក់ បានផ្សព្វផ្សាយលើសារព័ត៌មានមួយចំនួន ដោយបានធ្វើការចោទប្រកាន់មកលើព្រះអង្គម្ចាស់ក្សត្រី នរោត្តម ម៉ារី ព្រះប្រធានមូលនិធិស្ត្រីសម្ដេចរស្មីសោភ័ណថាជាអ្នក រក្សាទុកត្រាគណបក្សហ៊្វុនស៊ិនប៉ិច។ ជាមួយគ្នានោះ ព្រះអង្គម្ចាស់ក្សត្រី បានធ្វើសេចក្តីបដិសេធទាំងស្រុង ដោយសំអាងថា ជាការចោទប្រកាន់ដោយគ្មានមូលដ្ឋានការពិតច្បាស់លាស់ និងបានធ្វើអោយប៉ះពាល់យ៉ាងធ្ងន់ធ្ងរលើព្រះកិត្តិយស និងព្រះកិត្តិនាមរបស់ព្រះអង្គម្ចាស់ក្សត្រី ព្រោះថា កិច្ចការគណបក្សហ៊្វុនស៊ិនប៉ិចមិនជាប់ពាក់ព័ន្ធជាមួយព្រះអង្គម្ចាស់ក្សត្រីនោះឡើយ។

បើតាមសេចក្ដីប្រកាសព័ត៌មាន បច្ចុប្បន្ននេះព្រះអង្គម្ចាស់ក្សត្រីយ៍កំពុងមានកិច្ចការផ្ទាល់ខ្លួនគង់ នៅប្រទេសបារាំង។ ម្យ៉ាងវិញទៀត ព្រះអង្គម្ចាស់ក្សត្រីយ៍ ក៏គ្មានត្រាអ្វីត្រូវប្រគល់ជូនបុគ្គល២-៣នាក់ ខាងលើនោះដែរ។ ជាមួយគ្នានេះ បានព្រមានដល់បុគ្គលខាងលើ ត្រូវបញ្ឈប់ជាបន្ទាន់ក្នុងការយកព្រះនាមព្រះអង្គម្ចាស់ក្សត្រីយ៍ទៅប្រើប្រាស់ និងភ្ជាប់ជាមួយបញ្ជ និងរឿងផ្សេងៗរបស់ខ្លួនតទៅទៀត។

សូមបញ្ជាក់ថា ថ្មីៗនេះ លោក ផាន់ សិទ្ធី អគ្គលេខាធិការរង និងជាអគ្គលេខាធិការប្រតិបត្តិស្ដីទី រួមជាមួយក្រុមថ្នាក់ដឹកនាំគណបក្សហ៊្វុនស៊ិនប៉ិចមួយចំនួនទៀតបានធ្វើសន្និសីទសារព័ត៌មានមួយ ដោយបានលើកឡើងថា កន្លងមកគណបក្សបានប្រគល់ត្រា របស់គណបក្សហ៊្វុនស៊ិនប៉ិច និងត្រាព្រះហស្តលេខាសម្ដេចក្រុមព្រះនរោត្ដមរណឫទ្ធិ ទៅឲ្យព្រះអង្គម្ចាស់ក្សត្រីម៉ារី ជាអ្នកកាន់កាប់ ហើយបើចង់ប្រើត្រានេះ លុះត្រាតែមានការអនុញ្ញាតពីអនុប្រធានគណបក្សទាំង៤នាក់ និងសម្ដេចក្រុមព្រះ នរោត្តម នរោត្តម រណឫទ្ធិ ទើបអាចប្រើបាន ប៉ុន្តែមួយរយៈចុងក្រោយនេះ ដោយសារតែព្រះអង្គនៅឆ្ងាយ ពិបាកក្នុងការទំនាក់ ទំនង ទើបថ្នាក់ដឹកនាំសម្រេចស្នើសុំយកត្រានេះយកមករក្សាទុក ដើម្បីប្រើប្រាស់ជាប្រយោជន៍គណបក្ស។

លោក ផាន់ សិទ្ធី បានលើកឡើងទៀតថា មួយរយៈចុងក្រោយនេះ មានភាពមិនប្រក្រតីយ៉ាងខ្លាំង នៅក្នុងគណបក្សទាក់ទងទៅនឹងការតែងតាំងថ្នាក់ដឹកនាំនៅតាមមូលដ្ឋាន ថ្នាក់ប្រធានក្រុមការងារថ្នាក់ប្រតិបត្តិ រាជធានី ខេត្ត ទាំង២៥ ហើយមានការតែងតាំងមួយចំនួនដោយមិនឆ្លងថ្នាក់ដឹកនាំ គឺអនុប្រធានទាំង៤ នាក់ ដែលកំពុងធ្វើការនាពេលបច្ចុប្បន្ន។

បើតាមលោក ផាន់ សិទ្ធី អ្នកដែលសម្រេច ហើយឈានដល់ការតែងតាំងនោះ គឺលោក ហេង ហាក់លីម ដែលមិនមែនជាសមាជិកគណបក្សហ៊្វុនស៊ិនប៉ិច តែជាជំនួយការរបស់ព្រះអង្គម្ចាស់ក្សត្រីយ៍ម៉ារី។ លោកថា កន្លងមក ថ្នាក់ដឹកនាំគណបក្សចេះតែនៅស្ងៀមដោយគិតថា មិនចង់ឲ្យមានបញ្ហាអ្វីនោះទេ ប៉ុន្តែដោយមានភាពមិនប្រក្រតីកាន់តែខ្លាំងឡើង ថ្នាក់ដឹកនាំត្រូវតែរកវិធានការណាមួយ ដើម្បីរៀបចំគណបក្សឡើងវិញ។

លោក ផាន់ សិទ្ធី បានឲ្យដឹងដែរថា រហូតដល់ពេលនេះ សូម្បីតែព្រះរាជសុខភាពរបស់សម្ដេចក្រុមព្រះ ដែលជាព្រះប្រធានគណបក្សផ្ទាល់ ក៏ថ្នាក់ដឹកនាំគណបក្សមិនអាចដឹងបានដែរ ហើយតាមរយៈលោក ចាប ញ៉ាលីវុធ ដែលជាប្អូន បង្កើតរបស់ព្រះអង្គ ដែលបានធ្វើដំណើរទៅប្រទេសបារាំង ចង់ជួបព្រះភ័ក្ត្រព្រះអង្គ ក៏ត្រូវបានរារាំងដែរ។ ដូច្នេះក្នុងនាមថ្នាក់ ដឹកនាំបានរួមគ្នាគិតថា ត្រូវទៅធ្វើអ្វីមួយ ដើម្បីស្ដារស្ថានការណ៍គណបក្សហ៊្វុនស៊ិនប៉ិចឡើងវិញ។ ជៀសវាងឱ្យបុគ្គលដែលនៅក្រៅគណបក្សមកធ្វើព្យុះធ្វើភ្លៀងតាមចិត្ត។

នៅក្នុងសន្និសីទសារព័ត៌មាននោះ លោក ផាន់ សិទ្ធី បានបញ្ជាក់ដែរថា ថ្នាក់ដឹកនាំគណបក្សបានជូនដំណឹងទៅក្រសួងមហាផ្ទៃហើយ សុំឱ្យប្រគល់ត្រា ហើយកំណត់ត្រឹមថ្ងៃទី២៣ ខែកញ្ញា ប្រសិនបើលោកមិនប្រគល់ត្រា ហើយលោកនៅតែប្រើប្រាស់ត្រានោះ ដោយមិនប្រក្រតីទៀត ថ្នាក់ដឹកនាំនឹងរៀបចំនីតិវិធីតាមផ្លូវច្បាប់របស់កម្ពុជា៕

ដោយ ៖ កោះកែវ

The post ព្រះអង្គម្ចាស់ក្សត្រីយ៍ នរោត្តម ម៉ារី បដិសេធមិនពាក់ព័ន្ធជាមួយការយកត្រារបស់គណបក្សហ៊្វុនស៊ិនប៉ិច appeared first on Kampuchea Thmey Daily.

ថ្នាក់ដឹកនាំគណបក្សហ៊្វុនស៊ិនប៉ិច ជូនដំណឹងទៅក្រសួងមហាផ្ទៃ ពាក់ព័ន្ធនឹងត្រារបស់គណបក្ស

sopheak khoun — Thu, 23 Sep 2021 00:11:43 +0000

ថ្នាក់ដឹកនាំគណបក្សហ៊្វុនស៊ិនប៉ិច បានជូនដំណឹងទៅក្រសួងមហាផ្ទៃ ដើម្បីស្នើសុំអន្តរាគមន៍ ឲ្យព្រះអង្គម្ចាស់ក្សត្រីយ៍ នរោត្ដមម៉ារី ប្រគល់ត្រាឲ្យថ្នាក់ដឹកនាំគណបក្សហ្វ៊ុនស៊ិនប៉ិច ដើម្បីរៀបចំរចនាសម្ព័ន្ធគណបក្សឡើងវិញ។ នេះបើការឲ្យដឹងពីមន្ត្រីជាន់ខ្ពស់គណបក្សហ៊្វុនស៊ិនប៉ិច នៅក្នុងសន្និសីទសារព័ត៌មានមួយ កាលពីរសៀលថ្ងៃទី២២ ខែកញ្ញា ឆ្នាំ២០ ២១នេះ។

នៅក្នុងសន្និសីទសារព័ត៌មាននេះ លោក ផាន់ សិទ្ធី អគ្គលេខាធិការរង និងជាអគ្គលេខាធិការប្រតិបត្តិ ស្ដីទីគណបក្សហ្វ៊ុនស៊ិនប៉ិច បានលើកឡើងថា កន្លងមកគណបក្សបានប្រគល់ត្រា របស់គណបក្សហ៊្វុនស៊ិនប៉ិច និងត្រាព្រះហស្តលេខា សម្ដេចក្រុមព្រះនរោត្ដមរណឫទ្ធិ ទៅឲ្យព្រះអង្គម្ចាស់ក្សត្រីយ៍នរោត្ដមម៉ារី ជាអ្នកកាន់កាប់ ហើយបើចង់ប្រើត្រានេះ លុះត្រាតែមានការអនុញ្ញាត ពីអនុប្រធានគណបក្សទាំង ៤នាក់ និងសម្ដេចក្រុមព្រះ នរោត្តម រណឫទ្ធិទើបអាចប្រើបាន។ ប៉ុន្តែមួយរយៈចុងក្រោយនេះ ដោយសារតែព្រះអង្គនៅឆ្ងាយ ពិបាកក្នុងការទំនាក់ទំនង ទើបថ្នាក់ដឹកនាំសម្រេចស្នើសុំ យកត្រានេះយកមករក្សាទុក ដើម្បីប្រើប្រាស់ជាប្រយោជន៍គណបក្ស។

លោក ផាន់ សិទ្ធី បានលើកឡើងទៀតថា មួយរយៈចុងក្រោយនេះ មានភាពមិនប្រក្រតីយ៉ាងខ្លាំង នៅក្នុងគណបក្សទាក់ទងទៅនឹង ការតែងតាំងថ្នាក់ដឹកនាំនៅតាមមូលដ្ឋាន ថ្នាក់ប្រធានក្រុមការងារថ្នាក់ប្រតិបត្តិ រាជធានី ខេត្ត ទាំង២៥ ហើយមានការតែងតាំងមួយចំនួន ដោយមិនឆ្លងថ្នាក់ដឹកនាំ គឺអនុប្រធានទាំងបួន ដែលកំពុងធ្វើការនាពេលបច្ចុប្បន្ន។

បើតាមលោក ផាន់ សិទ្ធី អ្នកដែលសម្រេច ហើយឈានដល់ការតែងតាំងនោះ គឺលោក ហេង ហាក់លីម ដែលមិនមែនជាសមាជិកគណបក្សហ្វ៊ុនស៊ិនប៉ិច តែជាជំនួយការរបស់ព្រះអង្គម្ចាស់ក្សត្រីយ៍នរោត្តមម៉ារី។ លោកថា កន្លងមក ថ្នាក់ដឹកនាំគណបក្ស ចេះតែនៅស្ងៀមដោយគិតថា មិនចង់ឲ្យមានបញ្ហាអ្វីនោះទេ។ ប៉ុន្តែដោយ មានភាពមិនប្រក្រតីកាន់តែខ្លាំងឡើង ថ្នាក់ដឹកនាំត្រូវតែរកវិធានការណាមួយ ដើម្បីរៀបចំគណបក្សឡើងវិញ។

លោក ផាន់ សិទ្ធី បានឲ្យដឹងដែរថា រហូតមកដល់ពេលនេះ សូម្បីតែព្រះរាជសុខភាពរបស់សម្ដេចក្រុមព្រះ ដែលជាព្រះប្រធានគណបក្សផ្ទាល់ ក៏ថ្នាក់ដឹកនាំគណបក្សមិនអាចដឹងបានដែរ ហើយតាមរយៈលោក ចាប ញ៉ាលីវុធ ដែលជាប្អូនបង្កើតរបស់ព្រះអង្គ ដែលបានធ្វើដំណើរទៅប្រទេសបារាំង ចង់ជួបព្រះភ័ក្រ្តព្រះអង្គ ក៏ត្រូវបានរារាំងដែរ។ ដូច្នេះ ក្នុងនាមថ្នាក់ដឹកនាំបានរួមគ្នាគិតថា ត្រូវទៅធ្វើអ្វីមួយ ដើម្បីស្ដារស្ថានការណ៍គណបក្សហ៊្វុនស៊ិនប៉ិចឡើងវិញ ជៀសវាងឲ្យបុគ្គលដែលនៅក្រៅគណបក្ស មកធ្វើព្យុះធ្វើភ្លៀងតាមចិត្ត។

ឆ្លើយតបសំណួរអ្នកសារព័ត៌មាន ដែលបានលើកឡើងថា តើគណបក្សមានគម្រោងប្ដឹងទប់ស្កាត់សកម្មភាព ព្រះអង្គម្ចាស់ក្សត្រីយ៍ នរោត្ដមម៉ារី និងមនុស្សមួយចំនួនទៀត ដែលបានប្រើប្រាស់ត្រា ក្នុងលក្ខណៈមិនប្រក្រតីដែរឬទេ? លោក ផាន់ សិទ្ធី បានបញ្ជាក់ថា «យើងបានជូនដំណឹងទៅក្រសួងមហាផ្ទៃហើយ ថាយើងសុំឲ្យប្រគល់ត្រា ហើយយើងដាក់ឱសានវាទត្រឹមថ្ងៃទី២៣ ខែកញ្ញា ប្រសិនបើលោកមិនប្រគល់ត្រា ហើយលោកនៅតែ ប្រើប្រាស់ត្រាហ្នឹង អញ្ចឹងយើងនឹងរៀបចំនីតិវិធី តាមផ្លូវច្បាប់នៃព្រះរាជាណាចក្រកម្ពុជា … យកត្រានេះទាល់តែបាន។ ជាបឋមប្រហែលជាយើង ប្ដឹងទៅក្រសួងមហាផ្ទៃ ពីព្រោះជាអាណាព្យាបាល របស់គណបក្សនយោបាយ ហើយអាចបន្តដំណើរទៀត ប្រសិនបើមិនយល់ព្រម»។

សន្និសីទសារព័ត៌មាននេះ បានធ្វើឡើងនៅអតីតទីស្នាក់ការគណបក្សហ្វ៊ុនស៊ិនប៉ិច នៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ដឹកនាំដោយលោក ផាន់ សិទ្ធី អគ្គលេខាធិការរង និងជាអគ្គលេខាធិការប្រតិបត្តិ ស្តីទីគណបក្ស និងលោក សាយ ហាក់ អនុប្រធានគណបក្ស ដោយមានការចូលរួម ពីថ្នាក់ដឹកនាំប្រមាណ ២០នាក់៕

អត្ថបទ៖ កោះកែវ

The post ថ្នាក់ដឹកនាំគណបក្សហ៊្វុនស៊ិនប៉ិច ជូនដំណឹងទៅក្រសួងមហាផ្ទៃ ពាក់ព័ន្ធនឹងត្រារបស់គណបក្ស appeared first on Kampuchea Thmey Daily.

គណបក្សហ៊្វុនស៊ិនប៉ិច ទទួលស្គាល់ថាខ្លួនពិតជារៀបចំបច្ចេកទេសយឺតបន្តិចមែន ប៉ុន្តែជាគោលការណ៍នៅតែចង់រូបរួម

Kang Tola — Wed, 07 Jul 2021 13:46:37 +0000

លោក ផាន់ សិទ្ធី ប្រធានក្រុមការងាររាជធានីភ្នំពេញ និងជាអ្នកនាំពាក្យគណបក្សហ៊្វុនស៊ិនប៉ិច បានថ្លែងប្រាប់កម្ពុជាថ្មីនៅរសៀលថ្ងៃទី០៧ ខែកក្កដា ឆ្នាំ២០២១ ថា គណបក្សហ៊្វុនស៊ិនប៉ិច ពិតជារៀបចំបច្ចេកទេសយឺតបន្តិចមែន ប៉ុន្តែជាគោលការណ៍នៅតែចង់រូបរួម ហើយអ្វីដែលជាការជំរុញរបស់លោក ញឹក ប៊ុនឆៃ ពិតជាមិនខុសទេ ពីព្រោះពេលវេលានៃការបោះឆ្នោតក្រុមប្រឹក្សាឃុំ សង្កាត់ កាន់តែកៀកណាស់ទៅហើយ។

ការបញ្ជាក់របស់លោក ផាន់ សិទ្ធី បានធ្វើឡើងបន្ទាប់ពីលោក ញឹក ប៊ុនឆៃ ប្រធានគណបក្សខ្មែររួបរួមជាតិបានប្រកាសផ្អាកការចរចា ដើម្បីរួបរួមគ្នារវាងក្រុមការងារគណបក្សហ៊្វុនស៊ិនប៉ិច និងគណបក្សខ្មែររួបរួមជាតិ ដោយសារតែមានបញ្ហាខាងគណបក្សហ៊្វុនស៊ិនប៉ិច ជាពិសេសលោក ញឹក ប៊ុនឆៃ អះអាងថា មកពីបុគ្គលឈ្មោះ ហេង ហាក់លីម ហើយលោកបានទុកពេលវេលាឲ្យ២សប្តាហ៍ទៀត ប្រសិនបើគណបក្សហ៊្វុនស៊ិនប៉ិច ដោះស្រាយបញ្ហាផ្ទៃក្នុងមិនបានទេ លោកមិនអាចចាំបានទៀតទេ។

លោក ផាន់ សិទ្ធី ថ្លែងថា លោក ញឹក ប៊ុនឆៃ ក្នុងនាមគណបក្សខ្មែររួបរួមជាតិ គាត់ចង់ផ្អាកការជជែកគ្នារឿងរួបរួម ប៉ុន្តែខាងគណបក្សហ៊្វុនស៊ិនប៉ិចយើង ផ្អាកក៏មិនថា ស្អីក៏មិនថា តែយើងនៅរក្សាគោលជំហរមួយបើកចំហ ដើម្បីធ្វើកិច្ចសហប្រតិបត្តិការជាមួយគណបក្សនយោបាយទាំងអស់ ដែលមានទស្សននយោបាយដូចគ្នា ជាពិសេសគណបក្សខ្មែររួបរួមជាតិនេះ។ ពីព្រោះកាលពីខែតុលា ឆ្នាំ២០១៩ លោក ញឹក ប៊ុនឆៃ បានទៅជួបសម្ដេចក្រុមព្រះ ជជែកគ្នាថា យើងនឹងរូបរួមគ្នារវាងគណបក្សទាំងពីរ តែក្រោយមកយើងមានបញ្ហារអាក់រអួល។

បើតាមលោក ផាន់ សិទ្ធី “បន្ទាប់ពីមានបញ្ហាការរីករាល នៃជំងឺកូវីដ១៩ ពីខែមីនា ឆ្នាំ២០២០ មក យើងបានខកខានរហូតមក ហើយចេះតែពន្យារពន្យាររហូតមកដល់ពេលនេះ។ តែឥឡូវនេះ យើងចង់ចាប់ផ្ដើមវិញ តែដោយសារមានការរអាក់រអួលផ្នែកបច្ចេកទេសបន្តិច ដូចឯកឧត្តម ញឹក ប៊ុនឆៃ គាត់លើកពីបញ្ហារាំងស្ទះ ដោយសារបុគ្គលម្នាក់ ពីរនាក់អីចឹង តែគណបក្សហ៊្វុនស៊ិនប៉ិច មិនយល់ថា នោះជាបញ្ហាធ្វើឲ្យរាំងស្ទះនោះទេ ពីព្រោះជាគោលការណ៍ យើងនៅតែមានការចង់រួបរួមគ្នា ពីព្រោះការចង់រួបរួមនេះ មិនមែនចង់តែហ៊្វុនស៊ិនប៉ិចទេ យើងចង់ទាំងសងខាង ហើយហេតុអ្វីយើងចង់ទាំងសងខាង ? ពីព្រោះយើងយល់ថា យើងសាមគ្គីគ្នាទៅវាល្អ បើបាក់បែកគ្នាទៅវាអត់ល្អទេ អីចឹងគាត់ (ញឹក ប៊ុនឆៃ) លើកឡើងនោះ គ្រាន់តែជាសារមួយ គោលបំណងរបស់គាត់ នៅតែចង់រូបរួមដែរទេ”។

ទាក់ទងទៅនឹងសំណួរសួរថា តើគណបក្សអាចជំរុញការងារនេះ ឱ្យរូបរួមគ្នាមុនការបោះឆ្នោតក្រុមប្រឹក្សាឃុំ សង្កាត់ បានដែរឬទេ ? លោក ផាន់ សិទ្ធី បានអះអាងថា អ្វីដែលយើងធ្វើមិនទាន់នោះ គឺកាលបរិច្ឆេទ ពីព្រោះលោក ញឹក ប៊ុនឆៃ បានប្រាប់ឱ្យយើងរៀបចំរយៈពេលពីរសប្តាហ៍ ដូច្នេះទាក់ទងពេលវេលានេះ ខាងគណបក្សហ៊្វុនស៊ិនប៉ិចពិបាកបន្តិច ពីព្រោះយើងមានកិច្ចការជាច្រើនទៀតត្រូវធ្វើ នេះទីមួយ ហើយទីពីរទៀត ការសម្រេចចិត្តទាំងឡាយទាក់ទងទៅដល់សម្ដេចព្រះប្រធាន ដែលនៅទីក្រុងប៉ារីសឯណោះ “ដូច្នេះធ្វើឱ្យយើងយឺតយ៉ាវបន្តិចមែន តែគោលជំហរគណបក្សហ៊្វុនស៊ិនប៉ិចនៅតែមានស្មារតីថា យើងរួបរួមគ្នា ហើយឯកឧត្តម ញឹក ប៊ុនឆៃ ខ្លួនឯង ក៏គាត់មានជំហររួបរួមគ្នាដែរ ប៉ុន្តែគាត់ដាក់ឱសានុវាទនេះ ដើម្បីចង់ឲ្យគណបក្សហ៊្វុនស៊ិនប៉ិច ប្រឹងឱ្យឆាប់បន្តិចទៅ ពីព្រោះពេលវេលា គាត់និយាយនេះមិនខុសទេ ពេលវេលា នៃការដាក់បេក្ខជនក្រុមប្រឹក្សាឃុំ សង្កាត់ កាន់តែកៀកណាស់ទៅហើយ តែយើងទទួលស្គាល់ខ្លួនយើងពិតជាយឺតមែន តែធ្វើម៉េច នេះមកពីបច្ចេកទេសវាយឺតអញ្ចឹង វាផ្សំនឹងកូវីដផង ផ្សំនឹងបញ្ហាផ្សេងៗផង។

សូមបញ្ជាក់ថា កាលពីរសៀលថ្ងៃទី២៨ ខែមិថុនា លោក ញឹក ប៊ុនឆៃ ប្រធានគណបក្សខ្មែររួបរួមជាតិបានថ្លែងនៅក្នុងសន្និសីទសារព័ត៌មានថា ការរួបរួមគ្នារវាងហ៊្វុនស៊ិនប៉ិច និងខ្មែររួបរួមជាតិ មិនបាន ដោយសារតែបុគ្គល ហេង ហាក់លីម។

លោកថា ការចរចារវាងក្រុមការងារគណបក្សហ៊្វុនស៊ិនប៉ិច និងគណបក្សខ្មែររួបរួមជាតិ មកដល់ពេលនេះបានចំណាយអស់រយៈពេលមួយឆ្នាំហើយ ដើម្បីរួបរួមគ្នាជាគណបក្សតែមួយ ហើយក៏មានការឯកភាពគ្នាលើចំណុចជាច្រើនផងដែរ ប៉ុន្តែអ្វីដែលមិនអាចរួបរួមគ្នាបាន គឺដោយសារតែបុគ្គល ហេង ហាក់លីម ដែលជាអ្នកបម្រើផ្ទាល់ថ្នាក់ដឹកនាំគណបក្សហ៊្វុនស៊ិនប៉ិច ដូច្នេះលោកទុកពេលឲ្យ២សប្តាហ៍ទៀត ប្រសិនបើគណបក្សហ្វ៊ុនស៊ិនប៉ិច ដោះស្រាយបញ្ហាផ្ទៃក្នុងមិនបានទេ លោកមិនអាចចាំបានទេ ពីព្រោះពេលវេលានៃការបោះឆ្នោតឃុំ សង្កាត់ កាន់តែកៀកទៅហើយ។

បើតាមលោក ញឹក ប៊ុនឆៃ ការរួបរួមគ្នារវាងគណបក្សហ៊្វុនស៊ិនប៉ិច និងគណបក្សខ្មែររួបរួមជាតិនេះ បានបរាជ័យចំនួន៣លើករួចមកហើយ ហើយការចរចានាពេលនេះ គឺជាលើកទី៤។ លោកអះអាងថា ការបរាជ័យនៅក្នុងការរួបរួមគ្នារវាងគណបក្សទាំងពីរនាពេលកន្លងមក គឺដោយសារតែការបែងចែកកូតា ទាំងរចនាសម្ព័ន្ធថ្នាក់ជាតិ និងមូលដ្ឋាន ប៉ុន្តែសម្រាប់ការចរចា ដើម្បីរួបរួមគ្នានៅពេលនេះ មិនបានបែងចែកកូតាទេ មានន័យថា មិនយករូបមន្តនោះមកធ្វើទៀតទេ។ លោកសម្តែងក្តីសង្ឃឹមថា នៅពេលរួមគ្នារវាងគណបក្សទាំងពីរនេះ នឹងទទួលបានការគាំទ្រច្រើន៕

ដោយ ៖ កោះកែវ

The post គណបក្សហ៊្វុនស៊ិនប៉ិច ទទួលស្គាល់ថាខ្លួនពិតជារៀបចំបច្ចេកទេសយឺតបន្តិចមែន ប៉ុន្តែជាគោលការណ៍នៅតែចង់រូបរួម appeared first on Kampuchea Thmey Daily.

គណបក្សហ៊្វុនស៊ិនប៉ិច Archives - Kampuchea Thmey Daily

អ្នកនាំពាក្យ ៖ ព្រះអង្គម្ចាស់ នរោត្តម ចក្រាវុធ យាងចុះទៅតាមបណ្ដាខេត្ត ដើម្បីពង្រឹងនូវសាមគ្គីភាព

លោក ហេង ហាក់​លីម ដែល​មាន​ឈ្មោះ​នៅក្នុង​ដីកា​កោះហៅ ប្រកាស​ចូល​បំភ្លឺ​ដោយ​មិន​គេចវេស​ឡើយ

ថ្នាក់ដឹកនាំគណបក្សហ៊្វុនស៊ិនប៉ិច ជូនដំណឹងទៅក្រសួងមហាផ្ទៃ ពាក់ព័ន្ធនឹងត្រារបស់គណបក្ស

លោក ហេង ហាក់លីម ដែលមានឈ្មោះនៅក្នុងដីកាកោះហៅ ប្រកាសចូលបំភ្លឺដោយមិនគេចវេសឡើយ