គំនិតអាជីវកម្ម Archives - Kampuchea Thmey Daily

អាជីវកម្មក្លឹបហាត់ប្រាណកំពុងពេញនិយម ខណៈមនុស្សចាប់ផ្តើមគិតពីសុខភាពរាងកាយ

Paul Tearith — Wed, 18 Oct 2023 04:11:51 +0000

អាជីវកម្មក្លឹបហាត់ប្រាណ បានកំពុងពេញនិយមនារយៈពេលប៉ុន្មានឆ្នាំចុងក្រោយនេះ ខណៈដែលមនុស្សគ្រប់ស្រទាប់ វណ្ណៈ និងគ្រប់វ័យបានយកចិត្តទុកដាក់ខ្លាំងទៅលើបញ្ហាសុខភាព។

លោក ជីវ ម៉េងហួរ ម្ចាស់ក្លឹបហាត់ប្រាណមួយកន្លែងឈ្មោះ One Goal Jumping Club ដែលជាក្លឹបផ្ដោតសំខាន់ ទៅលើលំហាត់ប្រាណក្នុងការសម្រក និងដំឡើងគីឡូ បានលើកឡើងថា សព្វថ្ងៃនេះ ការទទួលទានអាហាររបស់ប្រជា ពលរដ្ឋមានជាតិខ្លាញ់ខ្ពស់ ខ្វះសារធាតុចិញ្ចឹមគ្រប់គ្រាន់ ដែលងាយនឹងបណ្ដាលឱ្យឡើងគីឡូ ឬលើសជាតិខ្លាញ់ ជាដើម។

ដោយមើញឃើញអំពីបញ្ហាបែបនេះ លោក ជីវ ម៉េងហួរ និងសមាជិកពីរនាក់ទៀត បានចូលរួមសហការគ្នាជាក្រុមដើម្បី បង្កើតក្លឹបហាត់ប្រាណឈ្មោះថា One Goal នេះឡើង។ លោក ម៉េងហួរ បានបញ្ជាក់បន្ថែមថា សម្រាប់ក្លឹបផ្ដោតតែទៅ លើការលោតតាមចង្វាក់បទភ្លេង ដូច្នេះដើមទុនក្នុងចាប់ផ្ដើមដំបូងមានប្រហែលជាង ៥ ពាន់ដុល្លារ ដែលចំណាយ សំខាន់ទៅឧបករណ៍ Jumping តែប៉ុណ្ណោះ។

លោក ជីវ ម៉េងហួរ បានបន្ថែមថា ចំពោះចំនួនអ្នកដែលមកហាត់ប្រាណជាប្រចាំប្រមាណមានចន្លោះពី ៣៥-៥០នាក់នៅ ក្នុងមួយថ្ងៃ។ សម្រាប់តម្លៃវិញសមរម្យ ដោយក្នុងមួយនាក់ត្រឹមតែ ២ម៉ឺនរៀលក្នុងមួយម៉ោង និងបើគិតជាខែវិញមានតម្លៃ ៩៩ ដុល្លារ ក្នុងនោះមានគ្រូបង្វឹក និងអាហារបំប៉នផ្សេងៗ។

សម្រាប់ក្លឹបទទួលបានប្រាក់ចំណេញជាមធ្យម ២ ១០០ដុល្លារនៅក្នុងមួយខែ ក្រោយត្រូវចំណាយផ្សេងៗរួមមានទៅលើក ថ្លៃទីតាំង, ទឹកភ្លើង, សន្ដិសុខ, អ្នកគិតលុយ និងចំណាយចាំបាច់ផ្សេងៗសរុបប្រមាណ ១ ៩០០ ដុល្លារ។

កញ្ញា ឆិល ស្រីរដ្ឋ ជាអ្នកបង្វឹកផ្នែកស្រក-ឡើងគីឡូ នៅក្លឹប One Goal បានរៀបរាប់ដូច្នេះថា ការហាត់ប្រាណបែប លោត ជាវិធីម្យ៉ាងដែលមានភាពងាយស្រួល ដោយគ្រាន់តែលោតតាមចង្វាក់បទភ្លេង ទៅតាមការណែនាំរបស់គ្រូបង្វឹក ប៉ុណ្ណោះ។ កញ្ញាបន្តថា ការធ្វើដូច្នេះគឺសប្បាយ ហើយអាចស្រកគីឡូបានទៀតផងដែរ។

លោក ជីវ ម៉េងហួរ បានលើកឡើងថា «ខ្ញុំពិតជាលើកទឹកចិត្តសម្រាប់អ្នកចង់ចាប់ផ្ដើមអាជីវកម្មប្រភេទក្លឹបហាត់ប្រាណ នេះ ព្រោះមានហានិភ័យទាប ចំណាយដើមទុនតិច ពិសេសអាចជូយដល់មនុស្សដែលរស់នៅក្នុងសហគមន៍ជុំវិញក្លឹប ឱ្យសុខភាពល្អបានទៀតផងដែរ»។

អត្ថបទ៖ ផល ធារិត

The post អាជីវកម្មក្លឹបហាត់ប្រាណកំពុងពេញនិយម ខណៈមនុស្សចាប់ផ្តើមគិតពីសុខភាពរាងកាយ appeared first on Kampuchea Thmey Daily.

ចង់ជួយកូនៗឲ្យមានគំនិតអាជីវកម្មតាំងពីនៅវ័យក្មេង?

សាង ស្រីល័ក្ខ — Fri, 06 Nov 2020 03:01:01 +0000

ចាប់ផ្ដើមអាជីវកម្មផ្ដល់នូវបទពិសោធន៍ជីវិត ដែលមិនអាចកាត់ថ្លៃបានសម្រាប់កុមារ បូករួមនឹងការអភិវឌ្ឍជំនាញជាក់ស្ដែង ដូចជាការរៀបចំការគ្រប់គ្រង ដោះស្រាយបញ្ហាប្រាក់ និងការប្រាស្រ័យទាក់ទងជាដើម។

នេះជាគន្លឹះមួយចំនួនដែលឪពុកម្ដាយត្រូវជួយកូនតូចៗ ឲ្យកាន់តែមានបទពិសោធន៍ក្នុងជីវិតពួកគេ ៖

១. ឲ្យកូនដេញតាមចំណង់ចំណូលចិត្តរបស់ពួកគេ

បើចង់ឲ្យកូនរីករាយនឹងបទពិសោធន៍ ហើយមិនបាត់បង់ចំណាប់អារម្មណ៍ ជាការសំខាន់ដែលត្រូវឲ្យកូនងប់ងុលនឹងរឿងដែលពួកគេកំពុងធ្វើ។ បើកូនមិនមានគំនិតអាជីវកម្មនៅក្នុងចិត្ត ទុកឲ្យពួកគេធ្វើបញ្ជីដែលពួកគេចូលចិត្តធ្វើ។ បើកូនស្រឡាញ់សត្វ អាចចាប់ផ្ដើមអាជីវកម្មសត្វចិញ្ចឹមបាន។

ពួកគេអាចរៀបចំសិក្ខាសាលាស្ដីពីការសម្ដែងសម្រាប់ក្មេងតូចៗ នៅក្នុងសង្កាត់ បង្រៀនមេរៀនតន្ត្រី ឬអាចរចនាកម្មវិធីទូរស័ព្ទចល័តជាដើម។

២. កំណត់គោលដៅនិងធ្វើផែនការ

ឲ្យកូនគិតពីគ្រប់រឿងទាំងអស់ដែលត្រូវការ ដើម្បីបង្វែរគំនិតរបស់កូនឲ្យក្លាយជាការពិត។ តើពួកគេត្រូវការឧបករណ៍អ្វីខ្លះ ការផ្គត់ផ្គង់ ឬការបណ្ដុះបណ្ដាល? បើកូនកំពុងកាត់ស្មៅ តើពួកគេត្រូវការអ្វីខ្លះ?

ពួកគេគួរតែសរសេរគោលដៅសម្រាប់អាជីវកម្ម រួមមានទាំងគោលដៅហិរញ្ញវត្ថុ និងអ្វីផ្សេងទៀតដែលកូនៗចង់សម្រេចបាន។

៣. ណែនាំគំនិតនៃការគ្រប់គ្រងប្រាក់

អាជីវកម្មគឺជាវិធីដ៏ល្អមួយ ដើម្បីណែនាំកុមារឲ្យចេះជំនាញគ្រប់គ្រងប្រាក់មូលដ្ឋាន ក៏ដូចជាប្រធានបទស្មុគស្មាញដូចជាការគណនាប្រាក់ចំណេញ និងការគ្រប់គ្រងប្រាក់។ ក្មេងជំទង់អាចតាមដានប្រាក់ចំណូលនិងចំណាយអាជីវកម្ម។ ក្មេងតូចៗអាចអនុវត្តបន្ថែមតម្លៃ និងការផ្លាស់ប្ដូរ។

បើយើងផ្ដល់ប្រាក់ឲ្យកូនដើម្បីចាប់ផ្ដើមអាជីវកម្ម សូមឲ្យពួកគេចាត់ចែងរាល់ការចំណាយរបស់ពួកគេ ដើម្បីដឹងច្បាស់ថា ត្រូវការចំនួនប៉ុន្មាន។

៤. ធ្វើការលើជំនាញបម្រើអតិថិជននិងទំនាក់ទំនង

ក្នុងនាមជាអ្នកប្រាស្រ័យទាក់ទងប្រកបដោយប្រសិទ្ធភាព និងជាអ្នកស្ដាប់ចេះយល់ចិត្ត គឺជាគ្រឹះដ៏ចាំបាច់សម្រាប់ភាពជាសហគ្រិន។ ជួយកូនឲ្យអភិវឌ្ឍវិធីពន្យល់ផលិតផល និងសេវាកម្មរបស់ពួកគេឲ្យបានច្បាស់ និងយល់ពីការស្នើសុំតម្លៃអាជីវកម្មរបស់ពួកគេ។

សង្កត់ធ្ងន់ទៅលើសារៈសំខាន់នៃសេវាកម្មអតិថិជន និងលើកទឹកចិត្តកូនឲ្យស្ដាប់និងទទួលយកសំណើពិសេសនៅពេលចាំបាច់។

៥. គ្រប់គ្រងតម្រូវការផ្នែកច្បាប់

ម្ចាស់អាជីវកម្មកុមារត្រូវគោរពតាមច្បាប់និងតម្រូវការស្របច្បាប់ ដូចមនុស្សពេញវ័យដែរ។ ពន្យល់កូន នៃការអនុញ្ញាតក្នុងតំបន់ណាមួយដែលត្រូវការ ដោយជួយកូនឆែកជាមួយការិយាល័យ ស្មៀន ឬខេត្តក្រុងដែលរស់នៅ។

៦. បង់ពន្ធ

បើប្រាក់ចំណូលរបស់កូនលើសពី ៤០០ ដុល្លារ ពួកគេនឹងត្រូវប្រកាសពន្ធផ្ទាល់ខ្លួន។ ភាគច្រើនពួកគេមិនស្ថិតនៅក្នុងស្ថានភាពជំពាក់ពន្ធលើប្រាក់ចំណូលនោះទេ ប៉ុន្តែកូនយើងនឹងត្រូវបង់ពន្ធលើការងារផ្ទាល់ខ្លួន។

ជួយពួកគេឲ្យត្រៀមលក្ខណៈជាមុន ឬត្រូវទុកប្រាក់ចំណេញ ១៥ % សម្រាប់ពន្ធ។ អ្វីដែលសំខាន់បំផុតត្រូវចងចាំថា ដំណើរការគួរតែរីករាយ។

ភាពជាសហគ្រិនគឺជាកម្លាំងពលកម្មនៃសេចក្ដីស្រឡាញ់ មិនត្រឹមតែកម្លាំងពលកម្មប៉ុណ្ណោះទេ តែក៏ជាការចាប់យកឱកាសធ្វើឱ្យមានកំហុស ដើម្បីរៀនពីកំហុសទាំងនោះ ហើយធ្វើវាម្ដងទៀត៕

ប្រែសម្រួល៖ សាង ស្រីល័ក្ខ

ចុចអាន៖៣ យ៉ាងដែលស្ត្រីម្នាក់ៗអាចឈានមុខខ្លាំងឡើងៗក្នុងអាជីព

ចុចអាន៖មុនបានជោគជ័យ សហគ្រិនភាគច្រើន មានកំហុសធំៗ៥នេះ

The post ចង់ជួយកូនៗឲ្យមានគំនិតអាជីវកម្មតាំងពីនៅវ័យក្មេង? appeared first on Kampuchea Thmey Daily.

៥គន្លឹះ ទប់លំហូរសាច់ប្រាក់អាជីវកម្មបានយ៉ាងល្អ

សាង ស្រីល័ក្ខ — Thu, 05 Nov 2020 07:03:04 +0000

សម្រាប់សហគ្រិន លំហូរសាច់ប្រាក់គឺជាធាតុផ្សំដ៏សំខាន់នៃប្រតិបត្តិការអាជីវកម្ម។ ម្ចាស់អាជីវកម្មមិនគួរកត់សំគាល់ពីសាច់ប្រាក់ដែលអាចរកបាន នៅពេលដែលពេលវេលាតឹងតែងនោះទេ។

ខាងក្រោមនេះគឺជាគន្លឹះមួយចំនួន ក្នុងការរក្សាលំហូរសាច់ប្រាក់ដែលចាំបាច់ សម្រាប់សុវត្ថិភាពអាជីវកម្ម ៖

១. ផ្ដល់ជូនការបញ្ចុះតម្លៃទូទាត់មុនកាលកំណត់

លើកទឹកចិត្តអតិថិជនរបស់យើង ដោយផ្ដល់ឲ្យពួកគេនូវការបញ្ចុះតម្លៃសម្រាប់ការទូទាត់មុន។ ការបញ្ចុះតម្លៃដែលអាចទទួលយកបានគឺ ២% រហូតដល់ ៥ % សម្រាប់កាត់បន្ថយប្រាក់ចំណូលបន្តិចបន្តួច។ អតិថិជនរបស់យើងមិនថាបុគ្គលឬអាជីវកម្មផ្សេងទៀតទេ គឺពួកគេក៏ចង់សន្សំប្រាក់ដែរ។

ផ្ដល់ឲ្យពួកគេនូវហេតុផលដើម្បីបង់ឲ្យយើងភ្លាមៗ និងកាត់បន្ថយហានិភ័យនៃការទូទាត់យឺត ឬខកខាន ដែលបណ្ដាលឲ្យមានការធ្លាក់ចុះនៃលំហូរសាច់ប្រាក់របស់យើង។

២. កំណត់ពេលវេលានៃការទូទាត់បន្ថែម

សូមបង់អ្វីដែលយើងបានជំពាក់អ្នកលក់ភ្លាមៗ ដោយរៀបចំកិច្ចព្រមព្រៀងបង់ប្រាក់បន្ថែមជាមួយមនុស្សដែលយើងជំពាក់។ កុំបង់ប្រាក់យឺត ប្រសិនបើយើងមានប្រាក់នៅក្នុងដៃ ប៉ុន្តែត្រូវរៀបចំក្នុងករណីដែលយើងត្រូវការប្រើជម្រើសនោះ ក្នុងឱកាសណាមួយ។

នេះក៏អាចជួយសន្សំសំចៃប្រាក់របស់យើង លើថ្លៃឈ្នួលយឺត ហើយថែមទាំងផ្ដល់ពេលវេលាបន្ថែមទៀត ដើម្បីទទួលបានប្រាក់ចំណូលដើម្បីបង់វិក្កយបត្រផ្សេងទៀត។

៣. កសាងប្រាក់បម្រុងទុក

គិតពីប្រាក់បម្រុងជាគណនីសន្សំមួយប្រភេទ សម្រាប់អាជីវកម្មរបស់យើងថ្ងៃមុខ។ អ្នកជំនាញផ្នែកហិរញ្ញវត្ថុណែនាំឲ្យរក្សាទុកចំណាយប្រតិបត្តិការរយៈពេលពី ៣ ទៅ ៦ ខែ នៅក្នុងប្រាក់បម្រុង ប៉ុន្តែយើងអាចកែតម្រូវលេខទាំងនោះ ដោយផ្អែកលើដំណាក់កាលនៃអាជីវកម្មរបស់យើង និងអ្វីដែលយើងគ្រោងនឹងចំណាយនៅប៉ុន្មានខែខាងមុខនេះ។

៤. ជួលអ្នកគ្រប់គ្រងប្រាក់

ពេលខ្លះយើងត្រូវចំណាយប្រាក់ដើម្បីរកប្រាក់មកវិញ ហើយនោះប្រាកដជាកើតឡើងនៅពេលដោះស្រាយបញ្ហាហិរញ្ញវត្ថុមិនខាន។ នេះជារឿងមួយពិបាកក្នុងការមានគោលដៅលើការចំណាយសម្រាប់អាជីវកម្មរបស់យើង នៅពេលដែលយើងកាន់កាប់វា។ ទុកឲ្យនរណាម្នាក់(គណនេយ្យករ )ពិចារណា ឬជាអ្នកគិតគូរអំពីប្រាក់ចូលនិងចេញ ហើយផ្ដល់នូវដំបូន្មានលើការចំណាយនិងសន្សំមកយើងវិញ។

៥. ធ្វើតាមថវិកានិងតាមដានលំអិត

នេះគឺជាគន្លឹះចុងក្រោយ ហើយក៏មានសារៈសំខាន់ណាស់ ចំពោះសុខភាពនៃលំហូរសាច់ប្រាក់របស់សហគ្រិនគ្រប់គ្នា។ ម្ចាស់អាជីវកម្មច្រើនតែផ្ដោតលើប្រាក់ចំណេញច្រើនពេក តែមិនគ្រប់គ្រាន់សម្រាប់ចំណាយឡើយ។

យើងមិនអាចឈានទៅមុខទេ ប្រសិនបើចំនួនទឹកប្រាក់ដែលយើងបានលក់ចេញមិនអាចគ្របដណ្ដប់លើការចំណាយផ្សេងៗរបស់យើងបាន។ សន្សំប្រាក់គ្រប់ទីកន្លែងដែលយើងអាចធ្វើបាន និងតាមដានរាល់ការចំណាយអាជីវកម្មរបស់យើង។

ការមានសៀវភៅបញ្ជីដែលអាចបំបែកសាច់ប្រាក់ចូលនិងត្រលប់មកវិញបានយ៉ាងលឿន នឹងធ្វើឲ្យយើងគិតកាន់តែច្បាស់ ពីរបៀបដែលប្រាក់ជំនួញដែលពិបាករកបានត្រូវចំណាយ។

ចំណែកការរក្សាលំហូរសាច់ប្រាក់រឹងមាំ ត្រូវការការប្រុងប្រយ័ត្ន ប៉ុន្តែវានឹងជួយការពារអាជីវកម្មរបស់យើងក្នុងគ្រាលំបាក៕

ប្រែសម្រួល៖ សាង ស្រីល័ក្ខ

ប្រភព៖lifehack

ចុចអាន៖រដ្ឋអ្នកមានទាំង ៦ ដែលមានមហាសេដ្ឋីរស់នៅច្រើនជាងគេ

ចុចអាន៖តើស្លឹកតែនិងការប្រើមកជាភេសជ្ជៈ មានប្រវត្តិមកពីទីណា?

The post ៥គន្លឹះ ទប់លំហូរសាច់ប្រាក់អាជីវកម្មបានយ៉ាងល្អ appeared first on Kampuchea Thmey Daily.

មុនពេលបង្កើតមុខរបរថ្មី បីយ៉ាងបន្ទាន់នេះដែលត្រូវគិត

Sonya — Thu, 25 Jun 2020 10:36:14 +0000

អាកប្បកិរិយាជាទូទៅក្នុងចំណោមអ្នកប្រើប្រាស់ទំនិញ ឬសេវាកម្មនានាបានផ្លាស់ប្តូរហើយ។ អ្វីដែលអ្នកកំពុងគិត អាចថាមិនត្រូវទំាងស្រុងទៀតនោះទេ អ្វីដែលអ្នកជោគជ័យមុននិយាយក៏មិនប្រាកដថាត្រូវដែរ ព្រោះទីផ្សារកំពុងប្តូរ ក្រឡាប់ចាក់។

ប្រសិនអ្នករឹងទទឹងត្រូវតែធ្វើ អ្នកនឹងខកចិត្តប្រសិនមិនបានគិតបីចំណុចនេះសិន។

១ ការបង្កើតម៉ាកឬយីហោហាង
ការបង្កើតយីហោសម្រាប់សហគ្រិនឬអាជីវកម្មខ្នាតតូច និងការស្វែងរកអតិថិជន នឹងពិបាកការកំណត់ដោយភ្នែកឬត្រឹមការឮអ្នកផងនិយាយនឹងក្លាយជារឿងគ្មានប្រយោជន៍ ។ គួរចូលរួមជាមួយក្រុមបណ្តាញ ឬសភាពាណិជ្ជកម្មណាមួយដែលមិនកុហក ហើយមានសមាជិកមានប្រយោជន៍ មិនមែនគ្រាន់តែសម្រាប់មកជួបជុំជប់លៀងឡូយឆាយ។

ការជួបជាមួយម្ចាស់អាជីវកម្មផ្សេងទៀត ចែករំលែកយោបល់គឺមានតម្លៃ ។

២ កំណត់ទីផ្សារនិងគូប្រជែង
កំណត់ថាតើអតិថិជនគោលដៅរបស់អ្នកជានរណា ពួកគេមានអាយុ របៀបរស់នៅកម្រិតណា ប្រាក់ចំណូល ការចំណាយ ដែលគេហ៊ានចាយ។

ក្រោយមក ការស៊ើបអង្កេតរកអ្នកប្រជែងកាន់តែ មានសារៈសំខាន់ដើម្បីនឹងស្វែងយល់ថាតើបច្ចេកទេសទីផ្សារអ្វីខ្លះដែលគេកំពុងប្រើ។ វាយតម្លៃភាពខ្លាំងនិងចំណុចខ្សោយរបស់ពួកគេយកមកអភិវឌ្ឍគំនិតថ្មីៗឱ្យយើងលេចធ្លោជាងឈានទៅព្យាយាមសេវាកម្រិតខ្ពស់ជាងនិងថោកជាង។

៣ ពង្រឹងផលិតផល ឬសេវាកម្មរបស់យើង
ការកាត់បន្ថយតម្លៃរបស់យើង មិនមែនជាយុទ្ធសាស្រល្អ ផ្តួលដៃគូប្រកួតប្រជែងនោះទេ។ ត្រូវប្រៀបធៀបតម្លៃនិងចំណូលចិត្តអតិថិជន។ លុយដែលបានចំណាយលើការស្រាវជ្រាវនិងការអភិវឌ្ឍន៍សេវាកម្ម គឺប្រាក់ខែសម្រាប់ទទួលបានបុគ្គលិកជំនាញដែលល្អៗជាង អាចជាយុទ្ធសាស្ត្រឈ្នះៗ។ ប្រតិទិនទីផ្សារគួរតែត្រូវបានគ្រោងទុកមួយឆ្នាំជាមុន។ រៀបចំថវិកាសម្រាប់គំាទ្រការផ្សាយពាណិជ្ជកម្មពេញមួយឆ្នាំ ពិសេសថ្ងៃឈប់សម្រាកលើបណ្តាញសង្គម និងកំណត់ពេលវេលាឱ្យបានល្អិតល្អន់បំផុត៕

ប្រែសម្រួល៖ សាយ ពេជ្រ

ចុចអាន៖ អ្នករកស៊ីមានទង្វើទាំងនេះ កុំសង្ឃឹមមានភ្ញៀវចូលហាង

The post មុនពេលបង្កើតមុខរបរថ្មី បីយ៉ាងបន្ទាន់នេះដែលត្រូវគិត appeared first on Kampuchea Thmey Daily.

គំនិតអាជីវកម្ម Archives - Kampuchea Thmey Daily

អាជីវកម្មក្លឹបហាត់ប្រាណកំពុងពេញនិយម ខណៈមនុស្សចាប់ផ្តើមគិតពីសុខភាពរាងកាយ

ចង់​ជួយ​កូនៗ​ឲ្យ​មានគំនិត​អាជីវកម្ម​តាំង​ពី​នៅ​វ័យក្មេង​?

៥គន្លឹះ ទប់លំហូរ​សាច់ប្រាក់​អាជីវកម្ម​បាន​យ៉ាង​ល្អ

មុនពេលបង្កើតមុខរបរថ្មី បីយ៉ាងបន្ទាន់នេះដែល​ត្រូវគិត

ចង់ជួយកូនៗឲ្យមានគំនិតអាជីវកម្មតាំងពីនៅវ័យក្មេង?

៥គន្លឹះ ទប់លំហូរសាច់ប្រាក់អាជីវកម្មបានយ៉ាងល្អ

មុនពេលបង្កើតមុខរបរថ្មី បីយ៉ាងបន្ទាន់នេះដែលត្រូវគិត