លោក ផន សត្យា ជាអ្នករស់នៅឃុំភ្នំសំពៅ ក្នុងភូមិសាស្ត្រស្រុកបាណន់ ដែលកំពុងអង្គុយកាប់ឆ្កឹះយកគ្រាប់ត្នោតពីរនាក់ភរិយា បានរៀបរាប់ថា ផ្លែត្នោតទាំងនេះគឺលោកតែងតែចុះទៅទិញពីអ្នកឡើងត្នោត នៅតំបន់ឃុំតាគ្រាម តាមផ្លូវទៅកាន់អាងកំពីងពួយ ព្រោះនៅទីនោះសំបូរដើមត្នោតណាស់។

លោក សត្យា បានបន្តថា នៅតាមតំបន់ខាងលើនោះ មិនមែនមានតែរូបលោកម្នាក់នោះទេ ដែលចុះទៅទិញផ្លែត្នោត គឺមានច្រើនណាស់។ ពិសេស គេទិញយកទៅកាប់លក់នៅតាមផ្លូវជាតិលេខ ៥៧ ក្បែរភ្នំក្រពើ ដោយនៅទីនោះមានអ្នកលក់ត្នោតចាស់ត្នោតខ្ចី ជាហូរហែតាមដងផ្លូវ បើអ្នកត្រូវការគ្រាប់ត្នោតចាស់ក៏មាន ឯអ្នកត្រូវការត្នោតខ្ចីយកទៅស្លក៏មានដែរ ទៅតាមតម្រូវការរបស់អតិថិជន។

លោកបានបន្ថែមថា សម្រាប់រូបលោកជាមួយនឹងភរិយា គឺលោកទិញយកមកកាប់យកគ្រាប់លក់នៅឯផ្សារមួយកន្លែង ក្នុងក្រុងបាត់ដំបង ព្រោះនៅទីនេះមិនមានអ្នកលក់ទេ ដូច្នេះលោកអាចលក់ដាច់គ្រាន់បើ។ ចំណែកតម្លៃវិញ លោកទិញផ្លែទាំងមូលក្នុងមួយផ្លូនចាប់ពី ៥.០០០ រៀល ដល់ ៧.០០០ រៀល ដែលផ្លែត្នោតទាំងនោះចាប់ពី ២ គ្រាប់ឡើងទៅ បើផ្លែណាតូចក្តឹប ហើយមានតែមួយគ្រាប់ក៏គេមិនរាប់ដែរ។

លោកបញ្ជាក់ថា នៅក្នុងតម្លៃដែលលោកទិញជាផ្លែយកមកកាប់លក់នេះ គឺអាចរកប្រាក់ចំណេញបានគ្រាន់បើ ដែលលោកច្រកគ្រាប់លក់វិញក្នុងមួយផ្លូនបានតម្លៃ ១២.០០០ រៀល។ បើថង់តូចដែលមានគ្រាប់ចំនួន ២០ គ្រាប់ គឺ លក់ក្នុងតម្លៃ ៦.០០០ រៀល ដូច្នេះលោកអាចរកកម្រៃបានពាក់កណ្ដាល នៃតម្លៃដើម បើគ្រាន់តែចំណាយកម្លាំង និងការប្រើប្រាស់សាំងម៉ូតូជិះរកទិញតែប៉ុណ្ណោះ។ ទោះបីជាយ៉ាងណា ក៏លោកអាចរកប្រាក់ចំណូលដើម្បីទប់លើជីវភាពប្រចាំថ្ងៃបានគ្រាន់បើដែរ ដែលនេះគឺជាផ្លែឈើរបស់ខ្មែរសុទ្ធសាធ៕
អត្ថបទ ៖ សោ និយមរ័ត្ន

The post គ្រួសារកសិករមួយ អាចរកប្រាក់ចំណូលបានគ្រាន់បើពីការលក់គ្រាប់ត្នោត appeared first on Kampuchea Thmey Daily.

​លោក ក្អោ​ប រ៉​ន ចៅសង្កាត់​ជ្រាវ បាន​ឲ្យ​ដឹងថា នៅ​ព្រឹក​ថ្ងៃទី​ ២៨ ខែធ្នូ ឆ្នាំ​ ២០២១​ នេះ អាជ្ញាធរ​ខេត្តសៀមរាប និង​ក្រសួង​ពាក់ព័ន្ធ ដោយមាន​ការចូលរួម​ពី​ប្រជា​ការពារ​មកពី​ភូមិ​ទាំង ​៧ ​នៃ​សង្កាត់​ជ្រាវ បាន​ចុះ​ដាំ​គ្រាប់ត្នោត​ប្រមាណ​ជា ​២​ ពាន់​គ្រាប់ នៅតាម​ព្រំប្រទល់​តំបន់​៣​នៃ​បឹង​ទន្លេសាប​។ លោក​ថា ការដាំ​នេះ ស្ថិតក្នុង​ភូមិសាស្ត្រ​សង្កាត់​ជ្រាវ ចាប់ពី​ចំណុច​ព្រំប្រទល់​សង្កាត់​ជ្រាវ​ និង​ឃុំ​ក​ណ្តែ​ក ស្រុក​ប្រាសាទបាគង ដល់​ព្រំប្រទល់​សង្កាត់​ជ្រាវ និង​សង្កាត់​សៀមរាប នៃ​ក្រុង​សៀមរាប​។​

​លោក ចៅសង្កាត់​ជ្រាវ បាន​ឲ្យ​ដឹង​ទៀតថា ការដាំ​គ្រាប់ត្នោត​នេះ ជា​ផ្នែក​មួយ​នៃ​ការ​ស្តារឡើងវិញ នូវ​និរន្តរភាព​របស់​បឹង​ទន្លេសាប បន្ទាប់ពី​រាជរដ្ឋាភិបាល​កម្ពុជា បានប្រកាស​សង្គ្រោះ​បឹង​ជង្រុក​ត្រី​ដ៏​ធំ​របស់​កម្ពុ​ជាមួយនេះ ឲ្យ​រួច​ផុតពី​ការទន្ទ្រាន​របស់​ជនខិលខូច​។

ខេត្ដ​សៀមរាប មាន​ដីព្រៃ​លិច​ទឹក​ជាង ​១២​ ម៉ឺន​ហិកតា គ្របដណ្តប់​ក្រុង​ស្រុក​ចំនួន​ ៦ មានស្រុក​ជីក្រែង ស្រុក​សូទ្រនិគម ស្រុក​ប្រាសាទបាគង ក្រុង​សៀមរាប ស្រុក​ពួក និង​ស្រុក​ក្រឡាញ់។ បន្ទាប់ពី​មានការ​ប្រកាស​របស់​ប្រមុខ​រាជរដ្ឋាភិបាល អាជ្ញាធរ​គ្រប់​ជាន់ថ្នាក់​របស់​ខេត្តសៀមរាប ជារឿយៗ​បាន​ចុះ​ធ្វើ​ការដាំដុះ​កូនឈើ​ព្រៃ​លិច​ទឹក​ឡើងវិញ ដើម្បី​ស្តារ​នូវ​ជម្រក​របស់​មច្ឆជាតិ​៕

អត្ថបទ៖ គឿន​វេត​

The post គ្រាប់ត្នោត ២ ពាន់គ្រាប់ ត្រូវអាជ្ញាធរខេត្តចុះដាំនៅតាមព្រំប្រទល់តំបន់ ៣ នៃដែនបឹងទន្លេសាប appeared first on Kampuchea Thmey Daily.

ការផ្តល់គ្រាប់ត្នោតពូជនេះ បានធ្វើឡើងកាលពីព្រឹក ថ្ងៃទី ១៨ ខែធ្នូ ឆ្នាំ ២០២១ ដែលដឹកនាំដោយលោក សោ វណ្ណា ប្រធាននាយកដ្ឋានភូមិសាស្រ្ត នៃក្រសួងរៀបចំដែនដី នគរូបនីយកម្ម និងសំណង់ និងក្រុមការងារ បាននាំយកគ្រាប់ត្នោត (ពូជ) ចំនួន២២.០០០ គ្រាប់បន្ថែមទៀត ដែលជាអំណោយរបស់លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្ដីក្រសួងរៀបចំដែនដី នគរូបនីយកម្ម និងសំណង់ ជូនដល់រដ្ឋបាលខេត្តបាត់ដំបង តាមរយៈលោក អ៊ុយ សុធាវី អភិ បាលរង នៃគណៈអភិបាលខេត្ត និងជាតំណាងលោក សុខ លូ អភិបាល នៃគណៈអភិបាលខេត្តបាត់ដំបង។

លោក សុខ លូ អភិបាល នៃគណៈអភិបាលខេត្ត បានគោរពថ្លែងអំណរគុណយ៉ាងជ្រាលជ្រៅ ជូនចំពោះលោក ជា សុផារ៉ា ដែលបានផ្តល់គ្រាប់ត្នោតបន្ថែមទៀតចំនួន ២២.០០០គ្រាប់ មកដល់រដ្ឋបាលខេត្ត សម្រាប់យកទៅដាក់ដាំឡើងវិញ នៅទីតាំងដីតំបន់ ៣ ដែលទទួលរងការកាប់ទន្រ្ទានដីព្រៃលិចទឹក មាត់បឹងទន្លេសាប នាកន្លងមក បន្ទាប់ពីក្រុមការងារបានដាំកូនឈើលិចទឹកចំនួន ៥.០០០ ដើមរួចមកហើយ។ ក្នុងនោះ ក៏មានកូនឫស្សីអត់បន្លាចំនួន ១.០០០ដើមផងដែរ៕

អត្ថបទ៖ សោ និយមរ័ត្ន

The post គ្រាប់ត្នោតពូជជាង ២ម៉ឺនគ្រាប់ នឹងត្រូវដាំឡើងវិញលើដីតំបន់៣ ដែលបានដកហូតពីជនទុច្ចរិត appeared first on Kampuchea Thmey Daily.

ជាពិសេសផ្លែឈើ​ជនបទ​នេះ ​មាន​លក្ខណៈ​សម្បត្តិ​ជា​ឱសថ ​ប្រើ​សម្រាប់​​ជួយ​រំលាយ​កំហាក​ក្នុង​បំពង់ក បំបាត់​អាការ​ក្អក​រ៉ាំរ៉ៃ។ ដោះស្រាយ​បញ្ហា​ស្រេក​ទឹក ​និង​ជួយ​កាត់បន្ថយ​កម្ដៅ​រាងកាយ។

ផ្លែឈើនេះមានផ្ទុក​កាឡូរីទាប កាបូអ៊ីដ្រាត ជាតិប្រូតេអ៊ីន ជាតិសរសៃ ជាតិខ្លាញ់ ទឹកច្រើន វីតាមីន B វីតាមីន B2 វីតាមីន B3 ​ វីតាមីន​C កាល់ស្យូមជាតិ ដែក និង ផូស្វ័រ ។

១ ​កាបូអ៊ីដ្រាត​ផ្តល់​នូវ​ថាមពល​ល្អ​ដល់​រាងកាយ និង​ផ្ទុក​នូវ​ជាតិ​សរសៃ​ដែល​ជួយ​ឲ្យ​វា​មានរយៈពេលយូរ ជួយឲ្យ​មានដំណើរការល្អ។ ការពារការទល់លាមក ។

២ ផូស្វ័រជួយពង្រឹងឆ្អឹងនិងធ្មេញ ជួយដល់មុខងាររាងកាយធម្មតា។

៣ ជាតិដែកជួយបំប៉នឈាម និងចរាចរឈាមក្នុងរាងកាយឲ្យដំណើរការល្អ។

៤ វីតាមីន C ជារ៉ាឌីកាល់សេរី ដែលល្អសម្រាប់រាងកាយ ជួយធ្វើ​ឲ្យ​រាងកាយមានសុខភាពល្អ។ ការពារជំងឺតែងឈឺជាញឹកញាប់ និង​ពង្រឹងស្បែកឲ្យស្រស់ថ្លា៕

ប្រែសម្រួល៖ សាង ស្រីល័ក្ខ

ចុចអាន៖ទៀបមានរសជាតិផ្អែមមុត និងជាក្រុមឱសថបុរាណ ព្យាបាលជំងឺតម្កាត់បានយ៉ាងសក្ដិសិទ្ធិ

ចុចអាន៖កុំមើលរំលង! ទឹកដោះគោជាផ្លែឈើមានសារធាតុទឹកច្រើន ជួយបំពេញចន្លោះខ្វះខាតនៃសុខភាពទូទៅ

The post គ្រាប់ត្នោតជាឱសថទិព្វ ជួយកាត់បន្ថយកម្ដៅក្នុងរាងកាយនិងរំលាយកំហាក បំបាត់ក្អករ៉ាំរ៉ៃ appeared first on Kampuchea Thmey Daily.