គ្រួសារកសិករមួយ អាចរកប្រាក់ចំណូលបានគ្រាន់បើពីការលក់គ្រាប់ត្នោត

   
គ្រួសាររបស់កសិករមួយ តែងចុះទៅទិញផ្លែត្នោតចាស់ៗ ក្នុងតម្លៃសមល្មម ដែលអាចបានកម្រៃខ្លះដើម្បីកាប់យកគ្រាប់លក់ឲ្យអតិថិជននៅក្រុងបាត់ដំបងទិញយកទៅទទួលទាន ឬក៏អាចយកទៅធ្វើជាបង្អែមផងដែរ។

លោក ផន សត្យា ជាអ្នករស់នៅឃុំភ្នំសំពៅ ក្នុងភូមិសាស្ត្រស្រុកបាណន់ ដែលកំពុងអង្គុយកាប់ឆ្កឹះយកគ្រាប់ត្នោតពីរនាក់ភរិយា បានរៀបរាប់ថា ផ្លែត្នោតទាំងនេះគឺលោកតែងតែចុះទៅទិញពីអ្នកឡើងត្នោត នៅតំបន់ឃុំតាគ្រាម តាមផ្លូវទៅកាន់អាងកំពីងពួយ ព្រោះនៅទីនោះសំបូរដើមត្នោតណាស់។

លោក សត្យា បានបន្តថា នៅតាមតំបន់ខាងលើនោះ មិនមែនមានតែរូបលោកម្នាក់នោះទេ ដែលចុះទៅទិញផ្លែត្នោត គឺមានច្រើនណាស់។ ពិសេស គេទិញយកទៅកាប់លក់នៅតាមផ្លូវជាតិលេខ ៥៧ ក្បែរភ្នំក្រពើ ដោយនៅទីនោះមានអ្នកលក់ត្នោតចាស់ត្នោតខ្ចី ជាហូរហែតាមដងផ្លូវ បើអ្នកត្រូវការគ្រាប់ត្នោតចាស់ក៏មាន ឯអ្នកត្រូវការត្នោតខ្ចីយកទៅស្លក៏មានដែរ ទៅតាមតម្រូវការរបស់អតិថិជន។

លោកបានបន្ថែមថា សម្រាប់រូបលោកជាមួយនឹងភរិយា គឺលោកទិញយកមកកាប់យកគ្រាប់លក់នៅឯផ្សារមួយកន្លែង ក្នុងក្រុងបាត់ដំបង ព្រោះនៅទីនេះមិនមានអ្នកលក់ទេ ដូច្នេះលោកអាចលក់ដាច់គ្រាន់បើ។ ចំណែកតម្លៃវិញ លោកទិញផ្លែទាំងមូលក្នុងមួយផ្លូនចាប់ពី ៥.០០០ រៀល ដល់ ៧.០០០ រៀល ដែលផ្លែត្នោតទាំងនោះចាប់ពី ២ គ្រាប់ឡើងទៅ បើផ្លែណាតូចក្តឹប ហើយមានតែមួយគ្រាប់ក៏គេមិនរាប់ដែរ។

លោកបញ្ជាក់ថា នៅក្នុងតម្លៃដែលលោកទិញជាផ្លែយកមកកាប់លក់នេះ គឺអាចរកប្រាក់ចំណេញបានគ្រាន់បើ ដែលលោកច្រកគ្រាប់លក់វិញក្នុងមួយផ្លូនបានតម្លៃ ១២.០០០ រៀល។ បើថង់តូចដែលមានគ្រាប់ចំនួន ២០ គ្រាប់ គឺ លក់ក្នុងតម្លៃ ៦.០០០ រៀល ដូច្នេះលោកអាចរកកម្រៃបានពាក់កណ្ដាល នៃតម្លៃដើម បើគ្រាន់តែចំណាយកម្លាំង និងការប្រើប្រាស់សាំងម៉ូតូជិះរកទិញតែប៉ុណ្ណោះ។ ទោះបីជាយ៉ាងណា ក៏លោកអាចរកប្រាក់ចំណូលដើម្បីទប់លើជីវភាពប្រចាំថ្ងៃបានគ្រាន់បើដែរ ដែលនេះគឺជាផ្លែឈើរបស់ខ្មែរសុទ្ធសាធ៕
អត្ថបទ ៖ សោ និយមរ័ត្ន