ប្រិយមិត្តជាច្រើនច្បាស់ជាបានជ្រាបរួចមកហើយអំពីភាពល្បីល្បាញរបស់រូបសំណាកគ្រូ កៃកែវ ដែលប្រជាជនថៃរាប់សិបនាក់កំពុងនាំគ្នាផ្អើលគោរពបូជាភ្លូកទឹកភ្លូកដី រហូតបង្កនូវការជជែកវែកញែកអស់ជាច្រើនសប្ដាហ៍រវាងអ្នកជឿ និងអ្នកមិនជឿ។

ជាមួយគ្នានេះ ស្រាប់តែលេចមុខតារាចម្រៀងសិចស៊ី និងមានប្រជាប្រិយមួយរូបរបស់ព្រះរាជាណាចក្រថៃ​គឺកញ្ញា Kratae បានចូលរួមគោរពបូជាដល់គ្រូ កៃកែវ ព្រមទាំងអះអាងថា នាងជាសិស្សរបស់គ្រូរូបនេះអស់ពេល ២០ឆ្នាំមកហើយ ពោលតាំងពីនាងមានអាយុ ១៥ឆ្នាំមកម្ល៉េះ។

ក្រោយបណ្ដាញព័ត៌មានបញ្ចេញវីដេអូ តារាស្រីវ័យ ៣៥ឆ្នាំ នាំគ្រួសារទៅឧទ្ទិសដល់រូបសំណាកគ្រូ កៃកែវ នៅលើបណ្ដាញសង្គម វាបានបង្កឱ្យមានមតិរិះគន់លើរូបនាង ចំពោះអប្បិយជំនឿមួយនេះ ព្រោះពួកគេចាត់ទុកជាជំនឿដ៏ងងឹតងងុល ហើយពួកគេក៏បានសម្ដែងការខកចិត្ត មិនគួរអាយដលពួកគេទៅ​បន់​ស្រន់អ៊ីចឹងសោះ ៕

ប្រែសម្រួល៖ សន្យា

ចុចអាន៖ ខ្លះៗអំពីរូបសំណាកគ្រូ កៃកែវ ដែលប្រជាជនថៃកំពុងផ្អើលគោរពបូជា ភ្លូកទឹកភ្លូកដី

ចុចអាន៖ ប្រជាជនថៃ ២ ក្រុម សំណូមពរឲ្យផ្លាស់ទីតាំងគ្រូកៃកែវ ដោយសារបង្កភាពភ័យខ្លាច

The post មហាជនរិះគន់ Kratae ក្រោយពេលនាងទម្លាយការពិតថាខ្លួនជាសិស្សគ្រូ ​កៃកែវ appeared first on Kampuchea Thmey Daily.

ក្រុមប្រឹក្សាសិល្បៈលើកស្ទួយព្រះពុទ្ធសាសនានៃប្រទេសថៃ គ្រោងនឹងដាក់លិខិតមួយច្បាប់ទៅកាន់នាយកប្រតិបត្តិនៃសណ្ឋាគារ The Bazaar Hotel Bangkok ដោយនិយាយថា រូបសំណាកនេះបង្កការភ័យខ្លាចដល់មនុស្សមួយចំនួន ។

ណាមួយការ​ដំឡើង​រូបសំណាក​ចម្លែក​សម្រាប់​មនុស្ស​គោរព​បូជា ឬ​សុំ​ពរ​គឺ​ផ្ទុយ​នឹង​ការ​បង្រៀន​របស់​ព្រះពុទ្ធ​សាសនាផងដែរ ។

ទន្ទឹមនឹងនោះ ក្រុម Rassadorn Thai Haeng Chart បានដាក់លិខិតទៅអភិបាលក្រុងបាងកក លោក Chadchart Sittipunt ដោយសុំឱ្យគាត់ផ្លាស់ទីរូបសំណាកចេញពីតំបន់ក្បែរស្ថានីយ៍ MRT Lat Phrao ក្នុងសង្កាត់ Huai Khwang វិញ ព្រោះបង្កឲ្យប្រជាជនមានការភ័យខ្លាច ។

ខណៈប្រជាជនខ្លះសម្រុកទៅសុំពរដោយសែនផ្កា ផ្លែឈើ ក៏មានមនុស្សអគតិមួយចំនួនយកជីវិតសត្វឆ្មា ឆ្កែ និងទន្សាយទៅបូជាយញ្ញទៀតផង ។ អាស្រ័យហេតុនេះហើយ ទើបអង្គការ Watchdog Thailand ព្រមានដាក់ទោសអ្នកប្រព្រឹត្តរឿងដ៏ឃោរឃៅនេះ ។

បើតាមសាច់ញាតិរបស់ជាងចម្លាក់បានឲ្យដឹងថា ការពិតគ្រូកៃកែវយកតែផ្លែឈើ ឬបង្អែមជាសំណែនប៉ុណ្ណោះ ដូច្នេះការសែនជីវិតគឺខុសពីអ្វីដែលលោកចង់បាន៕

ប្រែសម្រួល៖ វារី

ប្រភព៖ bangkokpost

ចុចអាន៖ អ្នកយកសត្វចិញ្ចឹមទៅបូជាឲ្យរូបចម្លាក់នៅថៃ ប្រឈមមុខចំពោះការកាត់ទោស

The post ប្រជាជនថៃ ២ ក្រុម សំណូមពរឲ្យផ្លាស់ទីតាំងគ្រូកៃកែវ ដោយសារបង្កភាពភ័យខ្លាច appeared first on Kampuchea Thmey Daily.

ផ្ទុយទៅវិញអ្នកគោរពបូជាមួយចំនួននិយាយថា ការប្រាថ្នាសុំសេចក្ដីសុខ សេចក្ដីចម្រើន ឬសម្រេចបំណងប្រាថ្នា មិនមែនជាអ្វីដែលពួកគេជឿនោះទេ ប៉ុន្តែការគោរពបូជាដល់គ្រូ កៃកែវ គឺដើម្បីសុំការលុបលាងអំពើបាបដែលធ្លាប់សាងកន្លងមក។ ពួកគេបានបន្ថែមថា ចំពោះបុគ្គលដែលធ្លាប់សាងអំពើអាក្រក់ ហើយមានម្ចាស់កម្មពៀរតាមចងអាឃាត បើបានទៅបន់ស្រន់ដល់រូបសំណាក នោះវិញ្ញាណនៃគ្រូ កៃកែវ នឹងតាមឃុំគ្រងថែរក្សា។ ប៉ុន្តែជាថ្នូរនឹងការបន់ស្រន់នេះ អ្នកបន់ត្រូវសម្លាប់សត្វចិញ្ចឹមដើម្បីបូជាដល់ព្រះគ្រូ។ យ៉ាងណាមិញ ព័ត៌មាននេះមិនមានប្រភពច្បាស់ការបញ្ជាក់ឡើយ វាត្រឹមជាពាក្យចចាមអារ៉ាមប៉ុណ្ណោះ។

ដោយឡែកចំពោះប្រវត្តិនៃរូបសំណាកគ្រូ កៃកែវ ក៏មិនសូវច្បាស់លាស់ប៉ុន្មានដែរ ដោយមានការអះអាងនូវដំណើររឿងរបស់លោកគ្រូរូបនេះជាច្រើនផ្សេងៗគ្នា។ រឿងព្រេងមួយក្នុងចំណោមនោះនិយាយថា ប្រហែលកំលុងទសវត្សរ៍៨-១៣ មានបុរសម្នាក់ពូកែខាងអាគមអូមអាម វិជ្ជាផ្លូវងងឹត និងឱសថសាស្ត្រ ដែលគាត់ឈ្មោះថា កៃកែវ ហើយថែមទាំងចេះវិជ្ជាធ្វើឱ្យជីវិតអមតៈទៀតផង។ ក្រោយមក លោកគ្រូមន្តអាគមរូបនេះ បានបាត់ខ្លួន ហើយក៏គ្មានឯកសារណាបរិយាយអំពីរូបរាង ឬមុខមាត់របស់គាត់ដែរ។

រាប់រយឆ្នាំក្រោយមក គ្រូអាគមម្នាក់ឈ្មោះ Suchart Ratanasuk ទំនងជាសិស្សជំនាន់ក្រោយរបស់គ្រូ កៃកែវ បានចាប់ផ្ដើមគូររូបគ្រូ កៃកែវ ដំបូងគេ ដោយលោកអះអាងថា គ្រូ ខៃកែវ បាននិមិត្តខ្លួនឱ្យគាត់បានឃើញ។ បន្ទាប់មក រូបរាងនិងមុខមាត់របស់គ្រូ កៃកែវ ក៏បានលេចចេញជារូបសំណាកដែលវាមានសម្បុរខ្មៅនិល មានស្លាបនៅក្រោយខ្នង ភ្នែកក្រហម មាត់មានចង្កូម និងក្រចកដៃវែងៗ។

គេនិយាយថា រូបរាងរបស់គាត់មានសភាពដូចទៅនឹងបក្សាមួយប្រភេទនៅក្នុងព្រៃហេមពាន្ត ដូច្នេះ​ហើយ​ទើប​គេ​ជឿ​ថាលោកគ្រូរូបនេះ មិនមែនជាមនុស្សពេញលក្ខណៈឡើយ ពោលគឺ​ពាក់កណ្តាល​មនុស្ស និង​ពាក់កណ្តាលទៀត​ជាបក្សា។

បច្ចុប្បន្នរូបសំណាកគ្រូ កៃកែវ មិនមែនមាននៅតែមួយកន្លែងដូចដែលកំពុងល្បីនោះទេ ពោលមាននៅកន្លែងផ្សេងទៀតជាច្រើន ហើយក៏មានរូបសំណាកតូចៗដែលអាចយកទៅតាំងនៅផ្ទះ កន្លែងរកស៊ី និងការិយាល័យសម្រាប់អ្នកជឿនិងគោរពបូជាផងដែរ។ ការ​ថ្វាយ​បង្គំឧទ្ទិសដល់​​គ្រូ ​កៃ​កែវ ក៏មិនមែនមាននៅតែក្នុងប្រទេសថៃនោះទេ ដោយរូបសំណាកនេះ​មាន​ការ​ពេញ​និយមផងដែរ​ដូច​ជា​ចិន តៃវ៉ាន់ និង​ហុងកុង ខណៈក្រៅពីប្រជាជនថៃគេហៅរូបសំណាកគ្រូ កៃកែវ ថា ស្ដេចអាសូរ្យកាយ។

មនុស្សជាច្រើន​​មានជំនឿថា​ការ​គោរព​បូជាដល់រូបសំណាកគ្រូ កៃកែវ ​នឹង​ជួយ​បញ្ចុះបញ្ចូល​ដៃគូឱ្យការចរចាផ្សេងៗទទួលបានជោគជ័យ។ ចំណែកអ្នកធ្វើ​ពាណិជ្ជកម្ម ​នឹងទទួលបានប្រាក​ចំណេញ ទ្រព្យសម្បត្តិ ហើយគ្រប់ទាំងបំណងប្រាថ្នានឹងបានសម្រេច៕

ប្រែសម្រួល៖ សន្យា

ប្រភព៖ Thairath

ចុចអាន៖ ៤ ចំណុច បង្កើនហុងស៊ុយបន្ទប់គេង ទាក់ទាញសំណាង និងថាមពលវិជ្ជមាន

The post ខ្លះៗអំពីរូបសំណាកគ្រូ កៃកែវ ដែលប្រជាជនថៃកំពុងផ្អើលគោរពបូជា ភ្លូកទឹកភ្លូកដី appeared first on Kampuchea Thmey Daily.