៤ ចំណុច បង្កើនហុងស៊ុយបន្ទប់គេង ទាក់ទាញសំណាង និងថាមពលវិជ្ជមាន

បន្ទប់​គេង​ត្រូវ​បាន​គេ​ចាត់​ទុក​ជាកន្លែង​​សំខាន់មួយនៅក្នុងផ្ទះ ដែលគួរយកចិត្តដាក់ ជាពិសេសហុងស៊ុយរៀបចំតុបតែង ព្រោះបើខុសវាអាចនាំរឿងមិនល្អដាក់ខ្លួន។ ផ្ទុយទៅវិញបើដឹងក្បួន និងវិធីមួយចំនួន នោះរឿងមិនល្អនឹងត្រឡប់ទៅជាសំណាងវិញ។ ​

១. វត្ថុតាំងលម្អក្បែរគ្រែ

ដើម្បីទាក់ទាញអំណាចដល់សាមីខ្លួន គប្បីតាំងរូបសត្វខ្លានៅចំហៀងខាងស្ត្រីគេង ហើយតាំងរូបនាគនៅចំហៀងខាងបុរសគេង។ សត្វខ្លាតំណាងឱ្យជីវិតរលូន និងរីកចម្រើន ចំណែកនាគ តំណាងទ្រព្យសម្បត្តិ និងស្ថេរភាព។ យ៉ាងណាមិញ ចំពោះស្ត្រីជាបុគ្គលធ្វើការអ្នកមុខអ្នកការ បើគេងនៅចំហហៀងតាំងរូបនាគ រឹតតែល្អចំពោះអាជីព។

២. អំពូលភ្លើង

បន្ទប់គេងដែលមានហុងស៊ុយជាបន្ទប់ដែលមិនងងឹតស្លុបឈឹង និងមិនភ្លឺចាំងខ្លាំងពេក។ ចូររៀបចំឱ្យមានអំពូលភ្លើងពងមាន់ ឬភ្លើងពណ៌ស្រទន់ ដើម្បីទាក់ទាញភាពត្រជាក់ត្រជុំក្នុងគ្រួសារ និងជីវិតប្ដីប្រពន្ធ។ ទោះយ៉ាងណា ភ្លើងមិនគួរបើកបំភ្លឺ ពេលគេងឡើយ នោះ​ទើបអាចជួយឱ្យគេងលក់ស្កប់ស្កល់ ជាពិសេសបង្កើនហុងស៊ុយសុភមង្គល។

៣. ហាមតាំងវត្ថុឆ្លុះបញ្ចាំងទៅកាន់គ្រែគេង

ចង់ទទួលបានសំណាង និងថាមពលវិជ្ជមានដល់ខ្លួន ​គួរ​តែ​គ្មាន​វត្ថុ​ដែលអាច​ឆ្លុះ​បញ្ចាំងទៅកាន់គ្រែគេង​ដូច​ជា ទូរទស្សន៍ ឬ​កញ្ចក់ឡើយ។ ប្រសិនប្រើទូរទស្សន៍ដាក់នៅចុងគ្រែ ឬក្នុងបន្ទប់គេង ត្រូវបិទបាំងរាល់ពេលមុនពេលចូលគេង ពីព្រោះ​ការ​ដែលមាន​អ្វី​មួយ​ឆ្លុះ​បញ្ចាំង​ពី​ខ្លួន​អ្នក វានឹង​ស្រូបថាមពល​អាក្រក់ ដែល​អាច​នាំ​ឲ្យ​មានបញ្ហា​សុខភាព​។

៤. ចម្ងាយរវាងគ្រែនិងជញ្ជាំង

ចម្ងាយរវាងគ្រែ និងជញ្ជាំងបន្ទប់មិនគួរនៅជាប់គ្នាពេក ប៉ុន្តែមិនឆ្ងាយពេកដែរ។ គួរ​ដាក់នៅ​កម្រិត​ត្រឹម​ត្រូវ​គឺ​មិន​លើស​ពី​១​ថ្នាំងដៃ ព្រោះបើខុស ​គេជឿថា វា​នឹងទាក់ទាញ​ថាមពល​អាក្រក់ឱ្យ​មក​រក​អ្នក ហើយអាចធ្វើឱ្យអ្នកខ្សត់ខ្សោយ៕

អត្ថបទ៖ សន្យា

ចុចអាន៖ បម្រាម ៨យ៉ាង ហាមធ្វើដាច់ខាតនៅលើក្បាលដំណេក

ចុចអាន៖ ហុងស៊ុយរៀបចំតុធ្វើការ​ ​ជួយបង្កើនភាពរីកចម្រើនខាងអាជីព