ចលាចល Archives - Kampuchea Thmey Daily

របបយោធាមីយ៉ាន់ម៉ាធ្វើឲ្យបុណ្យចូលឆ្នាំថ្មីក្លាយជាថ្ងៃបង្ហូរឈាម

chean virakbot — Mon, 19 Apr 2021 01:30:07 +0000

យ៉ាងហោចណាស់មនុស្ស២៦នាក់ត្រូវបានរបបយោធាមីយ៉ាន់ម៉ាសម្លាប់កំឡុងពេលពិធីបុណ្យចូលឆ្នាំថ្មីដែលជាពិធីបុណ្យប្រពៃណីនៃថ្ងៃឈប់សម្រាក និងរីករាយបំផុតប្រចាំឆ្នាំរបស់ប្រជាជនមីយ៉ាន់ម៉ា ប៉ុន្តែបានក្លាយជាពេលវេលាបង្ហូរឈាមទៅវិញ។

តាមសារព័ត៌មានក្នុងស្រុកបានផ្សាយ រាប់ទាំងការសម្លាប់ទាំង២៦នាក់កំឡុងពិធីបុណ្យចូលឆ្នាំថ្មីកន្លងទៅ អ្នកស្លាប់ពីការបង្ក្រាបដ៏សាហាវឃោឃៅរបស់របបយោធាមីយ៉ាន់ម៉ាបានកើនឡើងដល់៧៣៨នាក់ ចាប់តាំងពីរដ្ឋប្រហារ១កុម្ភៈ។

តួលេខស្លាប់ត្រូវគេរំពឹងថា នឹងកើនឡើងខ្ពស់ទៀត ពីព្រោះមនុស្សជាច្រើនបានកំពុងបាត់ខ្លួននិងមនុស្សជាច្រើននាក់ទៀតបានរបួសធ្ងន់ដែលមានសង្ឃឹមរស់ស្តូចស្តើង។

នៅក្នុងពិធីបុណ្យចូលឆ្នាំថ្មីដែលមានរយៈពេល៥ថ្ងៃជាទម្លាប់គឺមានកម្មវិធីសប្បាយរីករាយគ្រប់ក្រុមគ្រួសារ តាមដងផ្លូវជះទឹកដាក់គ្នា និងសកម្មភាពកម្សាន្តដ៏រីករាយដែលមានសក្ខណៈស្រដៀងគ្នានៃពិធីបុណ្យចូលឆ្នាំថ្មីនៅប្រទេសកម្ពុជា ថៃ និងឡាវដែរ។

ទោះបីជាយ៉ាងណា ឆ្នាំនេះនៅទីក្រុងធំៗស្ទើរទូទាំងប្រទេសមីយ៉ាន់ម៉ាបានស្ងប់ស្ងាត់ ដោយសារក្រុមអ្នកតវ៉ាបានអំពាវនាវធ្វើពហិការដើម្បីប្រឆាំងនឹងរបបដឹកនាំយោធា ក៏ដូចជាវិធីឧទ្ទិសដល់ជនរងគ្រោះដែលបានបាត់បង់ជីវិតពីការបង្ក្រាបរបស់កម្លាំងសន្តិសុខ។

ផ្ទុយពីការប្រមូលផ្តុំជួបជុំលក្ខណៈពិធីបុណ្យសប្បាយ ប្រជាជនបានយកថ្ងៃបុណ្យចូលឆ្នាំថ្មីដើម្បីធ្វើការតវ៉ាជាប្រចាំថ្ងៃប្រឆាំងនឹងរបបផ្តាច់ការរបស់យោធា។

ទោះបីជាការតវ៉ាសន្តិវិធីរបស់ពួកគេបែបណាក្តី ក៏មិនអាចគេចផុតពីការបង្ក្រាបដ៏សាហាវឃោឃៅ និងបានក្លាយជាពេលវេលាហូរឈាមដែរ។

ហិង្សាបណ្តាលឲ្យមនុស្សស្លាប់ដំបូងក្នុងថ្ងៃចូលឆ្នាំបានកើតឡើងនៅតំបន់ Myitnge ក្នុងទីក្រុង Mandalay ដែលជនស៊ីវិល៥នាក់ត្រូវបានសម្លាប់។

នៅទីប្រជុំជនតូច Tamu ភាគខាងជើងមីយ៉ាន់ម៉ាដែលជាព្រំដែនជាប់ប្រទេសឥណ្ឌា ប្តីប្រពន្ធ Gurkha ពីរនាក់ត្រូវបានទាហានបាញ់ស្លាបនៅពេលកំពុងជិះម៉ូតូទៅផ្ទះ បន្ទាប់ពីយកទឹកដោះគោទៅលក់។

នៅតំបន់ Yangon បុរសឈ្មោះ U Nyein Htet អាយុ៤៤ឆ្នាំត្រូវបានបាញ់ស្លាប់នៅពេលគាត់កំពុងរង់ចាំរថយន្តក្រុងនៅ MinLan។ ការបាញ់សម្លាប់បានកើតឡើងម៉ោងប្រហែល៥ល្ងាច នៅពេលប៉ូលិស និងទាហានបានបញ្ឈប់រថយន្តនៅលើផ្លូវ U Chit Maung ដើម្បីត្រូតពិនិត្យ។ ទាហានបានបាញ់ទៅលើរថយន្តមួយគ្រឿងបណ្តាលឲ្យត្រូវ U Nyein Htet ដែលកំពុងអង្គុយចាំរថយន្តក្រុង។

បុរសម្នាក់ត្រូវបានបាញ់សម្លាប់ និងរបួសម្នាក់នៅតំបន់ Myitnge ក្នុងទីក្រុង Mandalay នៅពេលទាហានបានវាយឆ្មក់ទៅលើតំបន់វិហារឥស្លាម Thazin។

បុរសអាយុ២៥ឆ្នាំម្នាក់ទៀតត្រូវបានបាញ់សម្លាប់នៅតំបន់ Myingyan ក្នុងទីក្រុង Mandalay។ តាមសមាគមជំនួយអ្នកទោសអ្នកនយោបាយ (AAPP) បានបញ្ជាក់នៅក្នុងរបាយការណ៍ស្លាប់ចុងក្រោយបំផុតថា គាត់ត្រូវបានបាញ់ស្លាប់នៅពេលកំពុងជិះម៉ូតូ។

AAPP បង្ហាញថា នៅ Myingyan ស្ត្រីអាយុ២៨ឆ្នាំត្រូវបានបាញ់ស្លាប់កាលពីថ្ងៃពុធ ហើយសពរបស់គាត់ត្រូវបានកម្លាំងយោធាយកទៅបាត់។

នៅថ្ងៃព្រហស្បតិ៍ ជាថ្ងៃទី២នៃបុណ្យចូលឆ្នាំថ្មី មនុស្ស៩នាក់ត្រូវបានបាញ់ស្លាប់នៅតំបន់ផ្សេងគ្នាគឺនៅតំបន់ Sagaing ៦នាក់ នៅតំបន់ Myingyan ២នាក់ និងតំបន់ Maha Aung Myay ម្នាក់។

នៅថ្ងៃនេះដដែល មនុស្ស៦នាក់ត្រូវបានបាញ់ស្លាប់នៅ Kani នៅពេលកម្លាំងសន្តិសុខបង្ក្រាបលើក្រុមតវ៉ា ហើយមនុស្ស២០នាក់បានកំពុងបាត់ខ្លួន។ ជនរងគ្រោះអាយុ២០ឆ្នាំជាមូស្លីម ត្រូវបានបាញ់សម្លាប់នៅ Maha Aung Myay និង៤នាក់បានរបួស។

នៅថ្ងៃសៅរ៍ដែលជាថ្ងៃបុណ្យចូលឆ្នាំថ្មីដែរ មនុស្ស៣នាក់ត្រូវបានសម្លាប់ និង៤នាក់បានរបួសនៅពេលកម្លាំងសន្តិសុខបង្ក្រាបលើក្រុមតវ៉ានៅ Mogoke។ ស្របពេលជាមួយគ្នានេះ មនុស្ស២នាក់ទៀតត្រូវបានសម្លាប់នៅតំបន់ Sagaing ដែលម្នាក់ស្លាប់នៅកន្លែង និងម្នាក់ទៀតត្រូវបានចាប់ខ្លួន ក្រោយមកបានស្លាប់។

នៅថ្ងៃអាទិត្យម្សិលមិញ យុវជនអាយុ២០ឆ្នាំឈ្មោះ Ko Tun Oo ត្រូវបានកម្លាំងសន្តិសុខមីយ៉ាន់ម៉ាបានបាញ់ស្លាប់ក្នុងការបង្ក្រាបនៅតំបន់ Myingyan។

ក្នុងរយៈពេលពិធីបុណ្យចូលឆ្នាំថ្មីកន្លងទៅនេះ មនុស្សជាច្រើននាក់ត្រូវបានរបបយោធាមីយ៉ាន់ម៉ាចាប់ខ្លួន ហើយគិតត្រឹមថ្ងៃសៅរ៍ មនុស្ស៣១៥២នាក់ត្រូវបានឃុំខ្លួនរាប់ទាំងមេដឹកនាំ អ្នកតវ៉ា និស្សិត សកម្មជន អ្នកសិល្បៈ យុវជន ក្រុមគ្រូពេទ្យ និងបុគ្គលិកសុខាភិបាលជាដើម៕

អានបន្ថែម៖ រដ្ឋាភិបាលស្រមោលមីយ៉ាន់ម៉ាថា បើអាស៊ានចង់ដោះស្រាយវិបត្តិមីយ៉ាន់ម៉ា ត្រូវមានខ្លួនដែរ

ប្រែសម្រួល៖ វីរបុត្រ
ប្រភព៖ irrawaddy

The post របបយោធាមីយ៉ាន់ម៉ាធ្វើឲ្យបុណ្យចូលឆ្នាំថ្មីក្លាយជាថ្ងៃបង្ហូរឈាម appeared first on Kampuchea Thmey Daily.

រដ្ឋាភិបាលស្រមោលមីយ៉ាន់ម៉ាថា បើអាស៊ានចង់ដោះស្រាយវិបត្តិមីយ៉ាន់ម៉ា ត្រូវមានខ្លួនដែរ

chean virakbot — Sun, 18 Apr 2021 23:28:36 +0000

សមាគមប្រជាជាតិអាសីអាគ្នេយ៍ (អាស៊ាន) ត្រូវតែពិភាក្សាជាមួយរដ្ឋាភិបាលឯកភាពជាតិ (រដ្ឋាភិបាលស្រមោលមីយ៉ា់ន់ម៉ា) ប្រសិនបើពួកគេចង់ជួយដោះស្រាយវិបត្តិនៅប្រទេសមីយ៉ាន់ម៉ា ចាប់តាំងពីរដ្ឋប្រហារ១កុម្ភៈមក ហើយពួកគេមិនគួរទទួលស្គាល់របបយោធាមីយ៉ាន់ម៉ាឡើយ។ នេះជាការលើកឡើងរបស់មន្ត្រីរដ្ឋាភិបាលឯកភាពជាតិ។

អាស៊ានបានកំពុងព្យាយាមស្វែងរកច្រកចេញពីវិបត្តិបង្ហូរឈាមនៅប្រទេសមីយ៉ាន់ម៉ាចាប់តាំងពីរដ្ឋប្រហារផ្តួលរំលំរដ្ឋាភិបាលស៊ីវិលជាប់ឆ្នោតដោយប្រជាធិបតេយ្យដែលដឹកនាំដោយលោកស្រី អ៊ុងសាន ស៊ូជី។

របបយោធាមីយ៉ាន់ម៉ាបានបង្ហាញឆន្ទៈតិចតួចដើម្បីភ្ជាប់ទំនាក់ទំនងជាមួយប្រទេសជិតខាងរបស់ខ្លួន ប៉ុន្តែគ្មានសញ្ញានៃការចង់ពិភាក្សាជាមួយរដ្ឋាភិបាលដែលពួកគេបានបណ្តេញចេញឡើយ។

មន្ត្រីរដ្ឋាភិបាលថៃម្នាក់បាននិយាយកាលពីថ្ងៃសៅរ៍ថា នៅក្នុងការវិវត្តដំបូងសម្រាប់ការបង្កើតក្រុមនេះ មេដឹកនាំរបបយោធាមីយ៉ាន់ម៉ាឧត្តមសេនីយ៍ Min Aung Hlaing នឹងចូលរួមកិច្ចប្រជុំកំពូលអាស៊ានដែលគ្រោងនឹងធ្វើនៅថ្ងៃទី២៤ ខែមេសា នៅប្រទេសឥណ្ឌូណេស៊ី។

វានឹងក្លាយជាដំណើរចេញទៅក្រៅប្រទេស និងជួបមួយមេដឹកនាំបរទេសជាលើកដំបូងរបស់មេដឹកនាំរបបយោធាមីយ៉ាន់ម៉ា ចាប់តាំងពីលោកបានដណ្តើមយកអំណាច។ របបយោធាមីយ៉ាន់ម៉ាមិនបាននិយាយអ្វីពាក់ព័ន្ធនឹងកិច្ចប្រជុំអាស៊ាននៅឡើយទេ។

លោក Moe Zaw Oo អនុរដ្ឋមន្ត្រីកិច្ចការបរទេសរបស់រដ្ឋាភិបាលឯកភាពជាតិ (NUG)ដែលត្រូវបានបង្កើតឡើងកាលពីសប្តាហ៍មុនបាននិយាយថា អាស៊ានមិនគួរទទួលស្គាល់របបយោធាមីយ៉ាន់ម៉ាឡើយ។

លោក Moe Zaw Oo បានប្រាប់ VOA ជាភាសាភូមាកាលពីថ្ងៃអាទិត្យម្សិលមិញថា ៖«ប្រសិនបើអាស៊ានពិចារណាលើចំណាត់ការពាក់ព័ន្ធនឹងបញ្ហាមីយ៉ាន់ម៉ា ខ្ញុំសូមនិយាយថា ពួកគេនឹងមិនជោគជ័យទេ ប្រសិនបើគ្មានការពិភាក្សាជាមួយ NUG ដែលត្រូវបានគាំទ្រដោយប្រជាជន និងស្របច្បាប់ពេញលេញ»។

អ្នកនយោបាយគាំទ្រលទ្ធិប្រជាធិបតេយ្យ រាប់ទាំងសមាជិកសភាដែលត្រូវបានបណ្តេញចេញពីគណបក្សរបស់លោកស្រី អ៊ុងសាន ស៊ូជី បានប្រការពីការបង្កើតរដ្ឋាភិបាលស្រមោល(NUG)កាលពីថ្ងៃសុក្រ។ រដ្ឋាភិបាលស្រមោលនេះរាប់បញ្ចូលទាំងលោកស្រី អ៊ុងសាន ស៊ូជី ដែលត្រូវបានឃំខ្លួនតាំងពីរដ្ឋប្រហារ ព្រមទាំងមេដឹកនាំតវ៉ាគាំទ្រលទ្ធិប្រជាធិបតេយ្យ និងក្រុមជនជាតិភាគតិចផងដែរ។

NUG បានអំពាវនាវឲ្យមានការទទួលស្គាល់ជាអន្តរជាតិថា ជាអាជ្ញាធរស្របច្បាប់ និងស្នើសុំឲ្យមានការអញ្ជើញចូលរួមក្នុងកិច្ចប្រជុំកំពូលអាស៊ានជំនួសកន្លែងរបស់លោក Min Aung Hlaing។

«វាពិតសំខាន់ខ្លាំងណាស់ដែលរបបយោធាមីយ៉ាន់ម៉ាមិនត្រូវបានទទួលស្គាល់»។ លោក Moe Zaw Oo បានបញ្ជាក់ និងបន្ថែមថា រដ្ឋាភិបាលឯកភាពជាតិមិនទាន់ត្រូវបានអញ្ជើញទៅចូលរួមប្រជុំអាស៊ាននៅទីក្រុងហ្សាការតា ប្រទេសឥណ្ឌូណេស៊ី នៅឡើយទេ។

យោងតាមសមាគមជំនួយអ្នកទោសនយោបាយ (AAPP) បានឲ្យដឹងថា រហូតដល់ពេលនេះ កម្លាំងសន្តិសុខមីយ៉ាន់ម៉ាបានសម្លាប់មនុស្ស៧៣០នាក់ហើយពីការបង្ក្រាបដ៏ឃោឃៅទៅលើក្រុមអ្នកតវ៉ាប្រឆាំងនឹងរដ្ឋប្រហារ ចាប់តាំងពីថ្ងៃទី១កុម្ភៈ ដែលបានជំរុញឲ្យមានការថ្កោលទោស និងដាក់ទណ្ឌកម្មជាបន្តបន្ទាប់ពីប្រទេសមហាអំណាចលោកខាងលិច ក៏ដូចជាអង្គការសហប្រជាជាតិជាដើម៕

ប្រែសម្រួល៖ វីរបុត្រ
ប្រភព៖ reuters

The post រដ្ឋាភិបាលស្រមោលមីយ៉ាន់ម៉ាថា បើអាស៊ានចង់ដោះស្រាយវិបត្តិមីយ៉ាន់ម៉ា ត្រូវមានខ្លួនដែរ appeared first on Kampuchea Thmey Daily.

អ្នកតវ៉ាមីយ៉ាន់ម៉ាត្រូវបានសម្លាប់ដល់ជាង៧០០នាក់ហើយ

chean virakbot — Sun, 11 Apr 2021 23:18:26 +0000

សន្តិសុខម្នាក់បានរបួសននៅក្នុងការបំផ្ទុះគ្រាប់បែកមួយនៅជិតធនាគារដែលគ្រប់គ្រងដោយយោធានៅក្នុងទីក្រុងធំលំដាប់ទី២របស់ប្រទេសមីយ៉ាន់ម៉ានៅព្រឹកថ្ងៃអាទិត្យ ទី១១ ខែមេសា ខណៈតួលេខជនរងគ្រោះបាត់បង់ជីវិតពីការបង្ក្រាបរបស់របបយោធាមីយ៉ាន់ម៉ាបានកើនឡើងដល់ជាង៧០០នាក់នៅចុងសប្តាហ៍នេះ។

ប្រទេសមីយ៉ាន់ម៉ាបានធ្លាក់ក្នុងវិបត្តិចលាចលដ៏ធ្ងន់ធ្ងរ ចាប់តាំងពីយោធាបានបណ្តេញមេដឹកនាំស៊ីវិលលោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ។

សាខាធំបំផុតរបស់ធនាគារ Myawaddy Bank នៅទីក្រុងម៉ាន់ដាឡាយបានក្លាយជាគោលដៅកាលពីព្រឹកថ្ងៃអាទិត្យ និងមានសន្តិសុខម្នាក់បានរបួសពីការបំផ្ទុះគ្រាប់បែកវាយប្រហារនោះ។ នេះជាការផ្សាយរបស់សារព័ត៌មានក្នុងស្រុក។ មានវត្តមានកម្លាំងសន្តិសុខយ៉ាងច្រើនបានបង្ហាញខ្លួននៅតំបន់នោះ បន្ទាប់ពីមានការផ្ទុះ។

ធនាគារជាផ្នែកមួយដ៏សំខាន់សម្រាប់ជំនួញដែលគ្រប់គ្រងដោយយោធាដែលបានប្រឈមនឹងសម្ពាធធ្វើពហិការ ចាប់តាំងពីរដ្ឋប្រហារ ដោយអតិថិជនជាច្រើនបានទាមទារដកប្រាករបស់របស់ពួកគេ។

ប៉ុន្មានថ្ងៃចុងក្រោយនេះត្រូវបានគេមើលឃើញថា បានក្លាយជាថ្ងៃបង្ហូរឈាមខ្លាំង។ កាលពីថ្ងៃសៅរ៍ ក្រុមអ្នកឃ្លាំមើលក្នុងស្រុកមួយបាននិយាយថា កម្លាំងសន្តិសុខបានបាញ់សម្លាប់បន្ថែមទៀត និងអ្នកតវ៉ាប្រឆាំងរដ្ឋប្រហារចំនួន៨២នាក់ត្រូវបានសម្លាប់ក្នុងថ្ងៃសុក្រ នៅតំបន់ Bago ដែលមានចម្ងាយ៦៥គីឡូម៉ែត្រពីទីក្រុងយ៉ាំងហ្គោន។

មន្ត្រីអង្គការសហប្រជាជាតិនៅប្រទេសមីយ៉ាន់ម៉ាបានសរសេរលើបណ្តាញទំនាក់ទំនងសង្គមកាលពីយប់ថ្ងៃសៅរ៍ថា វាបានក្លាយជាថ្ងៃថ្លុកឈាមនៅតំបន់ Bago ជាកន្លែងដែលមានគេនិយាយថា អ្នករបួសគ្មានគេព្យាបាលថែមទៀត។

សរុបទៅ សមាគមជំនួយអ្នកទោសនយោបាយបានបញ្ជាក់ថា ជនស៊ីវិល៧០១នាក់ត្រូវបានសម្លាប់ចាប់តាំងពីរដ្ឋប្រហារមក។

បើតាមអ្នកនាំពាក្យរបស់របបយោធាបាននិយាយកាលពីថ្ងៃសុក្រថា របបយោធាមានតួលេខអ្នកស្លាប់ទាបជាង២៤៨នាក់ប៉ុណ្ណោះ។

ទោះបីជាពោរពេញដោយថ្លុកឈាម ក៏អ្នកតវ៉ាមិនរុញរាក្នុងការប្រមូលផ្តុំតវ៉ាស្ទើរទូទាំងប្រទេសឡើយ។

សារព័ត៌មានក្នុងស្រុកបានផ្សាយថា ក្រុមនិស្សិត និងសាស្ត្រចារ្យនៅសាកលវិទ្យាល័យបាននាំគ្នាដើរហែក្បួនតាមផ្លូវទីក្រុងយ៉ាំងហ្គោន និងទីក្រុងម៉ៃទីឡា កាលពីព្រឹកថ្ងៃអាទិត្យ។ ការដង្ហែក្បួននេះ អ្នកខ្លះបានកាន់ផ្កា Eugenia ដែលជានិម្មិតរូបនៃជ័យជម្នះ។

ក្នុងទីក្រុងយ៉ាំងហ្គោន អ្នកតវ៉ាបានកាន់បដាដែលសរសេរថា «យើងនឹងទទួលបានជ័យជម្នះ។ យើងនឹងឈ្នះ»។

អ្នកតវ៉ានៅទីក្រុងម៉ុន្នីវ៉ាបានសរសេរសារនយោបាយថា «យើងត្រូវតែឈ្នះ» និងបានអំពាវនាវឲ្យអង្គការសហប្រជាជាតិជួយអន្តរាគមន៍ដើម្បីជួយការពារពួកគេពីការបង្ក្រាបពោរពេញដោយបង្ហូរឈាម។

ការកាត់ទោសប្រហារជីវិតវិលត្រឡប់មកវិញ

ភាពវឹកវរបានផ្ទុះឡើងកាលពីថ្ងៃសៅរ៍នៅភាគខាងជើងទីប្រជុំជន Tamu ដែលនៅជិតព្រំប្រទល់ប្រទេសឥណ្ឌា ដែលអ្នកតវ៉ាបានវាយបកវិញនៅពេលទាហានបានព្យាយាមវ៉ៃបែករបាំងដែលរារាងកម្លាំងសន្តិសុខរបស់របបយោធា។

អ្នកស្រុកនិយាយថា ជនស៊ីវិល២នាក់ត្រូវបានសម្លាប់នៅពេលទាហានបាញ់រះ ហើយអ្នកតវ៉ាបានវាយបកវិញដោយបានបំផ្ទុះគ្រាប់បែកបណ្តាលឲ្យរថយន្តទាហានក្រឡាប់ និងសម្លាប់ទាហាន១២នាក់។

អ្នកស្រុកនិយាយថា ៖«អ្នកភូមិខ្លះកំពុងលាក់ខ្លួន។ យើងភ័យខ្លាចថា ប្រជាជនទទួលរងការសងសឹក»។

ទន្ទឹមជាមួយគ្នានេះ ទូរទស្សន៍រដ្ឋបានផ្សាយនៅថ្ងៃសុក្រថា មនុស្ស១៩នាក់ត្រូវបានកាត់ទោសប្រហារជីវិតពីបទប្លន់ និងឃាតកម្មដោយតុលាការយោធា ក្នុងចំណោមពួកគេ១៧នាក់ត្រូវបានកាត់ទោសកំបាំងមុខ។

លោក Phil Robertson អនុប្រធានឃ្លាំមើលសិទ្ធិមនុស្សប្រចាំនៅអាស៊ីបាននិយាយថា ប្រទេសមីយ៉ាន់ម៉ាមានការកាត់ទោសប្រហារជីវិតយូរមកហើយ ប៉ុន្តែមិនដែលបានអនុវត្តក្នុងរយៈពេលជាង៣០ឆ្នាំកន្លងទៅនេះ។

លោកថា ៖«វាបង្ហាញថា យោធាបានត្រៀមខ្លួនវិលទៅរកពេលវេលាមួយនៅពេលមីយ៉ាន់ម៉ាសម្លាប់ប្រជាជន»៕

ប្រែសម្រួល៖ វីរបុត្រ
ប្រភព៖ CNA

The post អ្នកតវ៉ាមីយ៉ាន់ម៉ាត្រូវបានសម្លាប់ដល់ជាង៧០០នាក់ហើយ appeared first on Kampuchea Thmey Daily.

ច្រើនណាស់ យោធាមីយ៉ាន់ម៉ាសម្លាប់អ្នកវ៉ាជាង៨០នាក់ទៀត

chean virakbot — Sun, 11 Apr 2021 00:25:15 +0000

របបយោធាមីយ៉ាន់បានសម្លាប់អ្នកតវ៉ាគ្មានអាវុធក្នុងដៃច្រើនទៀតហើយដោយគ្រាន់តែកាលពីថ្ងៃសុក្រកន្លងទៅនេះមនុស្សជាង៨០នាក់ត្រូវបានសម្លាប់។

យោធាមីយ៉ាន់ម៉ាវាយប្រហារនៅតំបន់ Bago ដែលបានក្លាយជាការវាយប្រហារស្លាប់មនុស្សច្រើនបំផុតលំដាប់ទី៣ទៅលើអ្នកតវ៉ាក្នុងសប្តាហ៍នេះ។

សារព័ត៌មានក្នុងស្រុករបស់ប្រទេសមីយ៉ាន់ម៉ាបានផ្សាយថា ហោចណាស់មនុស្ស៦០នាក់ត្រូវបានសម្លាប់នៅតំបន់ Bago ដែលជាការបង្ក្រាបដ៏ព្រៃផ្សៃទៅលើអ្នកតវ៉ាស្លូតត្រង់គាំទ្រលទ្ធិប្រជាធិបតេយ្យ។ ប៉ុន្តែ អ្នកស្រុកបាននិយាយថា មនុស្សប្រហែលជាង៨០នាក់ត្រូវបានសម្លាប់នៅតំបន់នេះ។

មែនទែនទៅ ចំនួនអ្នកស្លាប់នៅមានការកើនឡើងច្រើនទៀត ប៉ុន្តែមានការលំបាកក្នុងការស្រង់ទិន្នន័យ។ កម្លាំងសន្តិសុខបានបាញ់អាវុធគ្រាប់ពិត បំផ្ទុះគ្រាប់បែក និងមានទាំងបាញ់អាវុធឆ្ងាយដែលជាប្រភេទគ្រាប់ត្បាល់ផ្លោងពីចម្ងាយថែមទៀត។

តំបន់៣កន្លែងដែលរកការវាយប្រហារខ្លាំងដែរនៅសប្តាហ៍នេះគឺ Shinsawpu, Hmawkan និង Nantawyar ដែលជាតំបន់ភាគខាងជើងទីក្រុងសេដ្ឋកិច្ចយ៉ាំងហ្គោន។ ការវាយប្រហារមានទាំងការទម្លាយរបាំងផ្លូវដែលត្រូវបានក្រុមអ្នកតវ៉ាដាក់បាវខ្សាច់ និងវត្ថុផ្សេងៗដើម្បីរារាំងរថយន្តយោធា។

កម្លាំងសន្តិសុខបានសម្លាប់អ្នកតវ៉ាជាច្រើននៅទីប្រជុំជន Kalay និងតំបន់ Taze។ កំឡុងការវាយប្រហារ ប៉ូលិស និងទាហានត្រូវបានគេរាយការណ៍ថា បានប្រើអាវុធធុនធ្ងន់ និងការបំផ្ទុះគ្រាប់បែក។

តាមសមាគមជំនួយអ្នកទោសនយោបាយ (AAPP) ដែលបានកំពុងកត់ត្រាចំនួនជនរងគ្រោះបាត់់បង់ជីវិត និងអ្នកជាប់ឃុំបាននិយាយថា មនុស្ស៦២នាក់ត្រូវបានបញ្ជាក់ពីការស្លាប់។

ដូច្នេះបានធ្វើឲ្យតួលេខអ្នកតវ៉ាបានបាត់បង់ជីវិតកើនឡើងដល់៦៨០នាក់គិតត្រឹមថ្ងៃសុក្រ ចាប់តាំងពីរដ្ឋប្រហារថ្ងៃទី១កុម្ភៈមក។

អ្នករងរបួសខ្លះត្រូវបានយកចេញបាន ហើយតួលេខអ្នកស្លាប់ច្បាស់លាស់មិនអាចត្រូវបានគេបញ្ជាក់បានឡើយ ពីព្រោះទាំងសកម្មជន ក៏ដូចជាក្រុមអ្នកជួយសង្គ្រោះក៏កំពុងត្រូវបានគំរាមបាញ់សម្លាប់ដែរ ប្រសិនបើនៅតែជួយដល់អ្នកតវ៉ា។

ចំនួនអ្នកស្លាប់ខាងលើគឺត្រូវបានគេស្រង់គិតត្រឹមថ្ងៃសុក្រ ប៉ុន្តែនៅថ្ងៃសៅរ៍ អ្នកស្រុកបាននិយាយថា ពួកគេបានឃើញសាកសពជាច្រើននៅកន្លែងបញ្ចុះសព Sin Phyu Kwin។

អ្នកតវ៉ាវ័យក្មេងម្នាក់និយាយថា ៖«យើងមិនអាចប្រើរថយន្តជួយសង្គ្រោះបានទេរយៈពេល១៥ថ្ងៃហើយ។ តាំងពីចុងខែមីនាមក នៅពេលអ្នកតវ៉ាត្រូវបានបាញ់ស្លាប់ ក្រុមគ្រួសារជនរងគ្រោះត្រូវបានគេប្រាប់ឲ្យយកសាកសពទៅធ្វើបុណ្យ បន្ទាប់ពីទាហានគ្រប់គ្រងសព»៕

ប្រែសម្រួល៖ វីរបុត្រ
ប្រភព៖ BBC & irrawaddy

The post ច្រើនណាស់ យោធាមីយ៉ាន់ម៉ាសម្លាប់អ្នកវ៉ាជាង៨០នាក់ទៀត appeared first on Kampuchea Thmey Daily.

ម្សិលមិញ យោធាមីយ៉ាន់ម៉ាបាញ់ផ្លោងគ្រាប់ត្បាល់សម្លាប់ជាង២០នាក់

chean virakbot — Sat, 10 Apr 2021 02:05:27 +0000

របបយោធាមីយ៉ាន់ម៉ាត្រូវបានគេរាយការណ៍បានបាញ់គ្រាប់ត្បាល់ដែលជាប្រភេទអាវុធធ្ងន់ចម្ងាយឆ្ងាយដើម្បីបង្ក្រាបក្រុមបាតុករនៅតំបន់៣កន្លែងផ្សេងគ្នានៅទីប្រជុំជន Bago ក្នុងតំបន់ Bago កាលពីព្រឹកថ្ងៃសុក្រ។

ការបង្ក្រាបដ៏ធ្ងន់ធ្ងរនេះ កម្លាំងសន្តិសុខបានប្រើគ្រាប់ត្បាល់បន្ថែមលើការបាញ់អាវុធធុនស្រាលគ្រាប់ពិត និងបំផ្ទុះគ្រាប់បែកដើម្បីបង្ក្រាបអ្នកតវ៉ា។

យោងតាមអ្នកស្រុកបានឲ្យដឹងថា មនុស្សជាង២០នាក់ត្រូវបានគេរាយការណ៍បានសម្លាប់ និងរបួសជាច្រើននាក់ក្នុងការវាយប្រហារទាំងនោះ។ ជាមួយគ្នានេះ មនុស្សជាច្រើននាក់ត្រូវបានចាប់ខ្លួន ប៉ុន្តែសារព័ត៌មានក្នុងស្រុក Irrawaddy មិនអាចសុំការបញ្ជាក់ពីចំនួនពិតប្រាកដនោះទេ។

នៅប្រហែលជាម៉ោង៤ព្រឹក ថ្ងៃសុក្រ កម្លាំងសន្តិសុខរបស់របបយោធាបានបើកការបាញ់រះដោយអាវុធស្វ័យប្រវត្តិក្នុងការវាយឆ្មក់ដែលមានគោលដៅលើការបិទផ្លូវដែលត្រូវបានអ្នកតវ៉ាដាក់បាវខ្សាច់ និងវត្ថុផ្សេងៗនៅលើផ្លូវ។

អ្នកស្រុកនិយាយថា កម្លាំងសន្តិសុខបានវាយប្រហារលើទីកន្លែង៣គឺ Shinsawpu, Hmawkan និង Nantawyar ដែលជាមានការតវ៉ាធ្វើឡើងជារៀងរាល់ថ្ងៃ។

អ្នកស្រុកបាននិយាយថា ពួកគេបានឮសំឡេងគ្រាប់ផ្ទុះខ្លាំងៗពីចម្ងាយ៥ដងដែលជាប្រភេទគ្រាប់ធុនធំកំឡុងពេលការវាយប្រហារនោះ។ រូបភាពមួយសន្លឹកបានបង្ហាញកន្ទុយគ្រាប់ត្បាល់ដែលអ្នកស្រុកបានឃើញ។

នៅពេលព្រឹក ច្រកចេញ-ចូលទៅតំបន់ទាំងនោះត្រូវបានដាក់ខ្សែរារាំងដោយកម្លាំងសន្តិសុខ បន្ទាប់ពីទាហានប្រហែលជា២៥០នាក់ត្រូវបានដាក់ពង្រាយនៅតំបន់នោះ។ អ្នកស្រុកមិនត្រូវបានអនុញ្ញាតឲ្យចេញ ឬចូលឡើយ។

ក្រុមសង្គមស៊ីវិលបាននិយាយថា គ្មានក្រុមជួយសង្គ្រោះណាមួយនៅតំបន់នោះហ៊ានចូលទៅយកសាកសព ឬក៏ជួយព្យាបាលអ្នករបួសឡើយ។ កម្លាំងរបស់របបយោធាក៏កំពុងដាក់គោលដៅលើក្រុមសង្គមស៊ីវិលដែរ។

ត្រឹមថ្ងៃព្រហស្បតិ៍ យោងតាមសមាគមជំនួយអ្នកទោសនយោបាយ(AAPP)ថា ជនស៊ីវិលប្រហែលជា៦១៤នាក់ត្រូវបានសម្លាប់ ប៉ុន្តែនៅមិនទាន់មានរបាយការណ៍ណាជាក់លាក់បូកបន្ថែមនឹងចំនួនអ្នកស្លាប់នៅថ្ងៃសុក្រទេ។

ប៉ុន្តែតាមការផ្សាយរបស់សារព័ត៌មានក្នុងស្រុក Irrawaddy នៅថ្ងៃសុក្រម្សិលមិញ មានអ្នកស្លាប់ជាង២០នាក់ទៀត ដូច្នេះតូលេខអាចកើនឡើងដល់ជាង៦៣០នាក់ ដោយសារស្នាដៃបង្ក្រាបឥតមេត្តារបស់របបយោធាមីយ៉ាន់ម៉ា៕

ប្រែសម្រួល៖ វីរបុត្រ
ប្រភព៖ Irrawaddy

The post ម្សិលមិញ យោធាមីយ៉ាន់ម៉ាបាញ់ផ្លោងគ្រាប់ត្បាល់សម្លាប់ជាង២០នាក់ appeared first on Kampuchea Thmey Daily.

ទ្វីបអឺរ៉ុបកំពុងចលាចលធ្ងន់ធ្ងរដោយសារតែបាតុកម្ម

Sok Sovann — Sun, 01 Nov 2020 03:31:15 +0000

ការធ្វើបាតុកម្មប្រឆាំងការបិទប្រទេសកាន់តែពុះកញ្ជ្រោលខ្លាំងឡើងៗនៅជុំវិញទ្វីបអឺរ៉ុបខណៈក្រុមអ្នកតវ៉ានៅទីក្រុង Rome បានគប់គ្រាប់បែកភ្លើង ដបនិងដុំថ្មដាក់ប៉ូលិសហើយក៏មានភាពតានតឹងកើនឡើងផងដែរនៅទីក្រុង Barcelona និង Dresden។

កាលពីយប់ថ្ងៃសៅរ៍ក្នុងទីក្រុង Rome, ការអង្គុយតវ៉ានៅទីលាន Campo dei Fiori ដ៏ល្បីល្បាញបានបញ្ចប់ទៅដោយការប៉ះទង្គិចជាមួយប៉ូលិសខណៈមនុស្សមួយចំនួននៅក្នុងហ្វូងបាតុករដែលមានគ្នាពីរបីរយនាក់បានចាប់ផ្តើមគប់ដបនិងផាវមុនពេលត្រូវបានបំបែកដោយប៉ូលិស។

នៅទីក្រុង Barcelona ក្នុងប្រទេសអេស្ប៉ាញ ក្រុមបាតុករបានគប់ដុំថ្មនិងរបស់របរផ្សេងៗដាក់ប៉ូលិសនៅក្នុងរាត្រីទី២នៃភាពចលាចលក្នុងទីក្រុងធំបំផុតទី២របស់ប្រទេសអេស្ប៉ាញមួយនេះ។ អគ្គិភ័យតូចៗក៏បានផ្ទុះឡើងផងដែរនៅពេលបាតុករដុតបន្ទះក្តារ។

ក៏មានការប៉ះទង្គិចគ្នាផងដែរក្នុងរាជធានី Madrid និងទីក្រុងភាគខាងជើង Logroño ដែលនៅទីនោះ មនុស្សចំនួន១៥០នាក់បានវាយប្រហារប៉ូលិសជាមួយដុំថ្ម ដុតកុងតឺន័រនិងចូលលួចក្នុងហាង។

ថ្វីបើមិនសូវតានតឹងដូចនៅកន្លែងផ្សេង ការតវ៉ាក៏បានផ្ទុះឡើងផងដែរក្នុងទីក្រុង Dresden របស់ប្រទេសអាល្លឺម៉ង់ដែលរៀបចំឡើងដោយក្រុមប្រឆាំងការបិទប្រទេស Querdenken 571។

ការតវ៉ាដែលជាឈុតឆាកដដែលៗក្នុងរយៈពេលប៉ុន្មានថ្ងៃកន្លងមកនេះបានកើតឡើងនៅក្នុងបរិបទនៃវិធានការបិទប្រទេសថ្មីនៅទូទាំងទ្វីបអឺរ៉ុបដើម្បីឆ្លើយតបទៅនឹងការកើនឡើងនៃករណីជំងឺឆ្លងកូវីដ១៩។

ក្នុងប្រទេសអ៊ីតាលី នៅទីក្រុង Naples និង Turin បាតុកម្មបានធ្វើឡើងដើម្បីរិះគន់ការរឹតបន្តឹងថ្មីៗក្នុងគោលបំណងបញ្ឈប់ការកើនឡើងនៃករណីឆ្លងវីរុស។

ពួកគេបានធ្វើឡើងនៅពេលប្រទេសនេះរាយការណ៍ពីការឆ្លងថ្មីចំនួន៣១,៧៥៨ករណីដែលជាកំណត់ត្រាប្រចាំថ្ងៃថ្មី។ ចំនួនអ្នកស្លាប់ថ្មីមានចំនួន២៩៧នាក់។

រដ្ឋមន្រ្តីក្រសួងមហាផ្ទៃ Luciana Lamorgese បាននិយាយកាលពីថ្ងៃសៅរ៍ថា បាតុករមួយចំនួនកំពុងស្វែងរកការកេងចំណេញពីភាពអាសន្ននៃមេរោគនេះ។

លោក Lamorgese បានប្រាប់កាសែត Il Foglio ថា “ជាអកុសល មានធាតុផ្សំនៃអំពើហិង្សាជាច្រើនកំពុងព្យាយាមជ្រៀតចូលទៅក្នុងទីលានដើម្បីទាញយកផលប្រយោជន៍ពីភាពចលាចលខាងសង្គមនិងសេដ្ឋកិច្ចក្នុងពេលដ៏លំបាកនេះ”។

ក្នុងនាមជាប្រទេសដំបូងបង្អស់នៅអ៊ឺរ៉ុបដែលរងការវាយប្រហារពីជំងឺរាតត្បាតកាលពីខែមីនា, អ៊ីតាលីបានដាក់វិធានការនៅដាច់ដោយឡែករយៈពេលជាងពីរខែដែលបានបំផ្លាញសេដ្ឋកិច្ចយ៉ាងធ្ងន់ធ្ងរ៕

ប្រែសម្រួលដោយ៖ Vann Vann

ប្រភព៖ Daily Mail

The post ទ្វីបអឺរ៉ុបកំពុងចលាចលធ្ងន់ធ្ងរដោយសារតែបាតុកម្ម appeared first on Kampuchea Thmey Daily.

ចលាចល Archives - Kampuchea Thmey Daily

របបយោធាមីយ៉ាន់ម៉ា​ធ្វើ​ឲ្យ​បុណ្យ​​ចូល​​ឆ្នាំ​ថ្មី​ក្លាយ​ជាថ្ងៃបង្ហូរឈាម

រដ្ឋាភិបាលស្រមោល​មីយ៉ាន់ម៉ា​​​ថា​ បើ​អាស៊ាន​ចង់​ដោះស្រាយ​វិបត្តិ​មីយ៉ាន់ម៉ា​ ត្រូវ​មាន​ខ្លួនដែរ

អ្នក​​តវ៉ា​​មីយ៉ាន់ម៉ា​ត្រូវ​បាន​សម្លាប់​​​ដល់ជាង​៧០០​នាក់ហើយ