ច្បាប់អាជ្ញាសឹក Archives - Kampuchea Thmey Daily

ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា

Rann Reuy — Tue, 08 Apr 2025 03:08:05 +0000

ប្រធានាធិបតីស្តីទីរបស់ប្រទេសកូរ៉េខាងត្បូង លោក Han Duck-soo ដែលទើបរួចផុតពីការចោទប្រកាន់ទម្លាក់អំណាច បានប្រកាសនៅព្រឹកថ្ងៃអង្គារនេះថា ប្រទេសកូរ៉េខាងត្បូងនឹងរៀបចំការបោះឆ្នោតប្រធានាធិបតីនៅថ្ងៃទី៣ខែមិថុនា គឺមានរយៈពេល៥៩ថ្ងៃ បន្ទាប់ពីអតីតប្រធានាធិបតី លោក Yoon Suk Yeol ត្រូវបានដកចេញពីតំណែងដោយតុលាការធម្មនុញ្កាលថ្ងៃទី៤ខែមេសានេះ។

នាយករដ្ឋមន្ត្រី និងជាប្រធានាធិបតីស្តីទី លោក Han Duck-soo បាននិយាយកាលពីថ្ងៃអង្គារថា រដ្ឋាភិបាលបានពិភាក្សាជាមួយគណៈកម្មាធិការជាតិរៀបចំការបោះឆ្នោត និងទីភ្នាក់ងារពាក់ព័ន្ធដទៃទៀត រួចរាល់ហើយ ដើម្បីគិតគូរពីតម្រូវការក្នុងការធានាឱ្យដំណើរការបោះឆ្នោតប្រព្រឹត្តទៅដោយរលូន និងទុកពេលគ្រប់គ្រាន់សម្រាប់គណបក្សនយោបាយក្នុងការរៀបចំចូលរួមការប្រកួតប្រជែង។ យោងបណ្តាញសារព័ត៌មានសំខាន់ៗរបស់កូរ៉េខាងត្បូងផ្សាយនៅព្រឹកថ្ងៃអង្គារនេះ។

ក្រោយការពិភាក្សា ពួកគេបានសម្រេចចិត្ត «កំណត់ថ្ងៃទី ៣ខែមិថុនា ជាកាលបរិច្ឆេទសម្រាប់ការបោះឆ្នោតប្រធានាធិបតីទី២១របស់កូរ៉េខាងត្បូង» ដោយលោកបានបន្ថែមថា ថ្ងៃនោះនឹងត្រូវកំណត់ជាថ្ងៃឈប់សម្រាកសាធារណៈបណ្តោះអាសន្ន ដើម្បីសម្រួលដល់ការបោះឆ្នោត។ នេះបើយោងតាម AFP។

លោក Han បានអំពាវនាវដល់ក្រសួង និងគណៈកម្មាធិការជាតិរៀបចំការបោះឆ្នោត «ធ្វើឱ្យមានភាពហ្មត់ចត់ ដើម្បីធានាឱ្យមានការបោះឆ្នោតមួយប្រកបដោយភាពយុត្តិធម៌ និងតម្លាភាពជាងពេលណាៗទាំងអស់ និងមួយដែលអាចទទួលបានទំនុកចិត្តពីប្រជាពលរដ្ឋ»។

មិនដូចការបោះឆ្នោតប្រធានាធិបតីដែលប្រព្រឹត្តទៅតាមធម្មតាទេ ប្រធានាធិបតីជាប់ឆ្នោតដែលកើតចេញពីការបោះឆ្នោតក្នុងរយៈពេលអន្តរកាលពីរខែនេះ បេក្ខភាពដែលឈ្នះការបោះឆ្នោតថ្ងៃទី៣ខែមិថុនា នឹងត្រូវធ្វើពិធីឡើងកាន់អំណាចភ្លាមៗនៅថ្ងៃបន្ទាប់ពីការប្រកាសលទ្ធផលតែម្តង។

ចៅក្រមតុលាការធម្មនុញ្ញ៨រូបក្នុងចំណោម៩រូប បានបោះឆ្នោតសម្រេចទម្លាក់លោកYoon Suk Yeol តាមការចោទប្រកាន់របស់សភា។ Reuters

តុលាការធម្មនុញ្ញកូរ៉េខាងត្បូងដែលមានចៅក្រម៨រូបក្នុងចំណោម៩រូប ស្ថិតនៅក្នុងតំណែងកាលពីថ្ងៃសុក្រទី៤ខែមេសាសប្តាហ៍មុន បានសម្រេចជាឯកច្ឆ័ន្ទដកតំណែងលោក Yoon Suk Yeol តាមការចោទប្រកាន់របស់សភា សម្រាប់ការប្រកាសច្បាប់អាជ្ញាសឹករយៈពេលខ្លីរបស់គាត់កាលថ្ងៃទី៣ខែធ្នូឆ្នាំ២០២៤។

ការចេញសាលក្រមដកលោក Yoon Suk Yeol ចេញពីអំណាចនេះ បន្ទាប់ពីតុលាការធម្មនុញ្ញរកឃើញកំហុសលើការរំលោភលើកាតព្វកិច្ចផ្លូវការរបស់គាត់ដោយការចេញក្រឹត្យច្បាប់អាជ្ញាសឹកកាលពីថ្ងៃទី៣ខែធ្នូ និងការចល័តកងទ័ពដើម្បីបញ្ឈប់ដំណើរការសភា។

ច្បាប់ធម្មនុញ្ញរបស់ប្រទេសកូរ៉េខាងត្បូងតម្រូវឱ្យមានការបោះឆ្នោតប្រធានាធិបតីថ្មីក្នុងរយៈពេល៦០ថ្ងៃ ប្រសិនបើអ្នកកាន់អំណាចស្លាប់ ឬត្រូវដកចេញពីតំណែង៕

ដោយ រ៉ាន់ រើយ

នាយករដ្ឋមន្ត្រី និងជាប្រធានាធិបតីស្តីទី លោក Han Duck-soo ទៅកាន់វិមានរដ្ឋាភិបាល ក្រោយតុលាការធម្មនុញ្ញច្រានចោលការចោទប្រកាន់របស់សភា និងប្រគល់អំណាចឲ្យគាត់វិញ។ REUTERS

The post ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា appeared first on Kampuchea Thmey Daily.

កាលបរិច្ឆេទបោះឆ្នោតប្រធានាធិបតីថ្មីនៅកូរ៉េខាងត្បូងទំនងធ្វើនៅថ្ងៃទី៣មិថុនា

Rann Reuy — Mon, 07 Apr 2025 02:19:20 +0000

សារព័ត៌មានយ៉ុនហាប់ ( Yonhap) របស់កូរ៉េខាងត្បូង បានរាយការណ៍នៅថ្ងៃចន្ទនេះថា គណៈរដ្ឋមន្ត្រីរបស់ប្រទេសកូរ៉េខាងត្បូងត្រូវបានគេរំពឹងថានឹងអនុម័តកាលបរិច្ឆេទសម្រាប់ការបោះឆ្នោតប្រធានាធិបតីថ្មីនៅថ្ងៃទី៣ខែមិថុនាបន្ទាប់ពីការតុលាការធម្មនុញ្ញបញ្ចប់តំណែង លោក Yoon Suk Yeol កាលពីថ្ងៃទី៤មេសាកន្លងទៅនេះ។

យ៉ុនហាប់ បានដកស្រង់សម្តីមន្ត្រីរដ្ឋាភិបាលដែលថ្លែងក្នុងលក្ខខ័ណ្ឌមិនបញ្ចេញឈ្មោះ បាននិយាយថា គណៈរដ្ឋមន្ត្រីកូរ៉េខាងត្បូង នឹងធ្វើការសម្រេចចិត្តនៅក្នុងកិច្ចប្រជុំមួយនៅថ្ងៃអង្គារ ដោយសារវាត្រូវការអនុម័តថ្ងៃឈប់សម្រាកសម្រាប់ព្រឹត្តិការណ៍នេះ។

ច្បាប់ធម្មនុញ្ញរបស់ប្រទេសកូរ៉េខាងត្បូងតម្រូវឱ្យមានការបោះឆ្នោតប្រធានាធិបតីថ្មីក្នុងរយៈពេល៦០ថ្ងៃ ប្រសិនបើអ្នកកាន់អំណាចស្លាប់ ឬត្រូវដកចេញពីតំណែង។

តាមយុនហ៉ាប់ដដែល មន្ត្រីនៃគណៈកម្មាធិការជាតិរៀបចំការបោះឆ្នោតបាននិយាយថា កាលបរិច្ឆេទដែលបានលើកឡើងនៅក្នុងរបាយការណ៍ប្រព័ន្ធផ្សព្វផ្សាយមិនមែនជាកាលបរិច្ឆេទចុងក្រោយទេ ហើយនឹងមិនក្លាយជាផ្លូវការទេរហូតដល់ការប្រកាសដោយប្រធានាធិបតីស្តីទីគឺនាយករដ្ឋមន្ត្រី Han Duck-soo៕

The post កាលបរិច្ឆេទបោះឆ្នោតប្រធានាធិបតីថ្មីនៅកូរ៉េខាងត្បូងទំនងធ្វើនៅថ្ងៃទី៣មិថុនា appeared first on Kampuchea Thmey Daily.

អ្នកមានសមានចិត្តនឹងលោក Yoon ចេញតវ៉ា និងហាក់ជូនដំណើរ ក្រោមដំណក់ទឹកភ្លៀង

Rann Reuy — Sat, 05 Apr 2025 07:45:20 +0000

ប្រជាជនកូរ៉េខាងត្បូងរាប់ពាន់នាក់ដែលគាំទ្រអតីតប្រធានាធិបតីកូរ៉េខាងត្បូង Yoon Suk Yeol បានធ្វើបាតុកម្មនៅទីក្រុងសេអ៊ូលនៅថ្ងៃសៅរ៍នេះ គឺមួយថ្ងៃ បន្ទាប់ពីតុលាការធម្មនុញ្ញដែលមានចៅក្រមក្រុមប្រឹក្សា៨រូបបានសម្រេចជាឯកច្ឆ័ន្ទដកតំណែងលោក Yoon Suk Yeol តាមការចោទប្រកាន់របស់រដ្ឋសភា។

ប្រជាជនកូរ៉េខាងត្បូងដែលមានសមានចិត្តនឹងអតីតប្រធានាធិបតី Yoon Suk Yeol។ AP

អ្នកគាំទ្រអតីតប្រធានាធិបតីកូរ៉េខាងត្បូង Yoon Suk Yeol បានប្រមូលផ្តុំគ្នាដោយប្រើឆ័ត្រនិងអាវភ្លៀង ក្រោមដំណក់ភ្លៀងរលឹម ឈរនៅខាងមុខវិមានប្រធានាធិបតីនៅជិតបរិវេណក្រសួងការពារជាតិ ដែលលោកបានប្តូរការិយាល័យប្រធានាធិបតីពីវិមានបៃតង (Blue House) ដែលប្រធានាធិបតីមុនៗធ្លាប់ប្រើប្រាស់ជាការិយាល័យប្រធានាធិបតីមកកាន់ទីតាំងបច្ចុប្បន្នកាលពីពាក់កណ្តាលឆ្នាំ២០២២។

អតីតប្រធានាធិបតីកូរ៉េខាងត្បូង Yoon Suk Yeol ត្រូវបានគេរំពឹងថានឹងផ្លាស់ទៅលំនៅឋានឯកជនរបស់គាត់វិញដែលជាអាផាតមិននៅក្នុងស្រុក Seocho ដែលជាតំបន់រីកចម្រើនបំផុតមួយក្នុងក្រុងសេអ៊ូល។

យោងតាម Yonhap អតីតប្រធានាធិបតី Yoon Suk Yeol បានក្លាយជាប្រធានាធិបតីទី២របស់ប្រទេសកូរ៉៉េខាងត្បូង ដែលត្រូវបានដកចេញពីតំណែងក្រោមសាលក្រមរបស់តុលាការធម្មនុញ្ញ ក្រោយហេតុផលរំលោភអំណាចដោយការប្រកាសដាក់ច្បាប់អាជ្ញាសឹក បន្ទាប់ពីអតីតប្រធានាធិបតីលោកស្រី Park Geun-hye ត្រូវបានបណ្តេញចេញពីតំណែងក្នុងឆ្នាំ ២០១៧ ជុំវិញរឿងអាស្រូវពុករលួយ និងការធ្លាក់ការសម្ងាត់របស់រដ្ឋ៕

ដោយ រ៉ាន់ រើយ

The post អ្នកមានសមានចិត្តនឹងលោក Yoon ចេញតវ៉ា និងហាក់ជូនដំណើរ ក្រោមដំណក់ទឹកភ្លៀង appeared first on Kampuchea Thmey Daily.

ប្រធានាធិបតីស្តីទី Han Duck-soo គោរពសាលក្រម និងឲ្យគណៈរដ្ឋមន្ត្រីសហការជាមួយអាជ្ញាធរបោះឆ្នោត

Rann Reuy — Fri, 04 Apr 2025 07:19:11 +0000

បន្ទាប់ពីតុលាការធម្មនុញ្សម្រេចបញ្ចប់មុខតំណែងប្រធានាធិបតី Yoon Suk Yeol នៅថ្ងៃទី៤ខែមេសា២០២៥ ប្រធានាធិបតីស្តីទី Han Duck-soo បានប្រកាសថា រដ្ឋាភិបាលនឹងគោរពសេចក្តីសម្រេចរបស់តុលាការធម្មនុញ្ញ ដោយសន្យារក្សាស្ថិរភាពនយោបាយនិងជម្នះលើការបែកបាក់ផ្នែកនយោបាយដោយរៀបចំការបោះឆ្នោតស្របតាមរដ្ឋធម្មនុញ្ញដែលចែង។

ប្រធានាធិបតីស្តីទី Han Duck-soo។ Reuters

ភ្លាមៗបន្ទាប់ពីសេចក្តីសម្រេចជាឯកច្ឆ័ន្ទរបស់តុលាការធម្មនុញ្ញត្រូវបានប្រកាសជាសាធារណៈ ប្រធានាធិបតីស្តីទី លោក Han Duck-soo បាននិយាយនៅក្នុងសុន្ទរកថាតាមទូរទស្សន៍ថា លោកនឹងធ្វើការដើម្បីគ្រប់គ្រងការបោះឆ្នោតប្រធានាធិបតីដើម្បីបង្កើតរដ្ឋបាលថ្មីមួយ។

សារព័ត៌មានកូរ៉េខាងត្បូង Korea Times បានរាយការណ៍ថា តាមច្បាប់កូរ៉េខាងត្បូងត្រូវតែរៀបចំការបោះឆ្នោតប្រធានាធិបតីក្នុងរយៈពេល៦០ថ្ងៃ ប្រសិនបើប្រធានាធិបតីត្រូវបានដកចេញដោយតុលាការធម្មនុញ្ញ ឬក្នុងករណីមរណភាព។

ប្រធានាធិបតីស្តីទី Han ត្រូវបានស្រង់សម្តីដូចបាននិយាយថា៖«ថ្ងៃនេះ តុលាការធម្មនុញ្ញបានបញ្ជាក់ពីសាលក្រមរបស់ខ្លួនលើករណីចោទប្រកាន់ប្រធានាធិបតី។ ខ្ញុំមានអារម្មណ៍សោកស្ដាយយ៉ាងខ្លាំងចំពោះស្ថានការណ៍អកុសលមួយដែលប្រមុខរដ្ឋកាន់អំណាចម្នាក់ត្រូវបានចោទប្រកាន់ជាលើកទីពីរក្នុងប្រវត្តិសាស្ត្ររដ្ឋធម្មនុញ្ញ»។

លោក Han ក៏បានសន្យាថានឹងធានាការត្រៀមខ្លួនក្នុងសន្តិសុខជាតិ ដោះស្រាយភាពមិនច្បាស់លាស់ខាងពាណិជ្ជកម្ម និងបង្កើតសុវត្ថិភាពសាធារណៈ មុនពេលប្រធានាធិបតីជាប់ឆ្នោតថ្មីចូលកាន់តួនាទីរបស់ពួកគេ។

បន្ទាប់ពីសុន្ទរកថារបស់គាត់ ប្រធានាធិបតីស្តីទី Han បានធ្វើជាអធិបតីក្នុងកិច្ចប្រជុំបន្ទាន់មួយជាមួយសមាជិកនៃគណៈរដ្ឋមន្ត្រីនៅថ្ងៃសុក្រនៅពេលថ្ងៃត្រង់ ដោយបានបញ្ជាឱ្យរដ្ឋមន្ត្រីខុទ្ទកាល័យរក្សាភាពមិនច្បាស់លាស់ក្នុងការនិយាយកិច្ចការរដ្ឋក្នុងអំឡុងពេលបោះឆ្នោតដំបូង។ លោក Han ក៏បានជំរុញឱ្យក្រសួងនានារក្សាអព្យាក្រឹតនយោបាយ និងសហការជាមួយអាជ្ញាធររៀបចំការបោះឆ្នោត។

ជាមួយនឹងការបណ្តេញ ប្រធានាធិបតី Yoon ចេញពីអំណាច គំនិតផ្តួចផ្តើមកំណែទម្រង់ជាតិរបស់រដ្ឋបាលអភិរក្សនិយមរបស់គាត់ទំនងជានឹងរលាយបាត់។ យោងសេចក្តីរាយការណ៍របស់សារព័ត៌មានខាងលើ។

អតីតប្រធានាធិបតី Yoon Suk Yeol ពិភាក្សាជាមួយមេធាវីក្នុងតុលាការធម្មនុញ្ញក្នុងពេលកន្លងមក។REUTERS

ចាប់តាំងពីឡើងកាន់អំណាចប្រធានាធិបតីក្នុងខែឧសភា ឆ្នាំ២០២២ លោក Yoon Suk Yeol បានគូសវាសផែនការបង្ហាញពីផែនទីសសរស្តម្ភសំខាន់ៗនៃកំណែទម្រង់ជាតិ ដើម្បីដោះស្រាយបញ្ហាកង្វះបុគ្គលិកពេទ្យ និងការធ្លាក់ចុះប្រាក់សោធននិវត្តន៍ ក៏ដូចជាវិបត្តិទីផ្សារការងារ ការអប់រំ និងប្រជាជន។

Yoon បានពិពណ៌នាកំណែទម្រង់ទាំងនេះថាជា «បញ្ហានៃការរស់រានមានជីវិតសម្រាប់ប្រទេស» ប៉ុន្តែក្នុងពេលបោះឆ្នោតសភាកាលពីឆ្នាំ២០២៤ គណបក្សប្រជាធិបតេយ្យបានទទួលអាសនៈសភាកាន់តែច្រើន និងដាក់សម្ពាធនយោបាយកាន់តែខ្លាំងលើអំណាចប្រធានាធិបតី រហូតដល់ពេលស្នើច្បាប់ថវិកាឆ្នាំ២០២៥ កាលពីខែវិច្ឆិកាឆ្នាំ២០២៤ សភាដឹកនាំដោយគណបក្សប្រជាធិបតេយ្យ បានកាត់ការចំណាយលើគម្រោងជាច្រើនរបស់រដ្ឋាភិបាលដែលមានទឹកប្រាក់រហូតដល់ជិត៣ពាន់លានដុល្លារ។

ការកាត់ចំណាយដោយដកគម្រោងនានារបស់រដ្ឋាភិបាលរបស់ប្រធានាធិបតី Yoon Suk Yeol នោះ ជាដើមហេតុនាំឲ្យលោក ក្តៅស្លឹកត្រចៀកកើតគំនិតដាក់ច្បាប់អាជ្ញាសឹក ដោយយកលេសចោទប្រកាន់បក្សប្រឆាំងថាជា«ក្រុមប្រឆាំងរដ្ឋ និងគាំទ្រកូរ៉េខាងជើង» រហូតឈានដល់ប្រកាសច្បាប់អាជ្ញាសឹកនៅថ្ងៃទី៣ខែធ្នូឆ្នាំ២០២៤៕

ដោយ រ៉ាន់ រើយ

អតីតប្រធានាធិបតី Yoon Suk Yeol អរគុណអ្នកគាំទ្រពេលតុលាការសេអ៊ូលដោះលែងនៅក្រៅឃុំ។ REUTERS

The post ប្រធានាធិបតីស្តីទី Han Duck-soo គោរពសាលក្រម និងឲ្យគណៈរដ្ឋមន្ត្រីសហការជាមួយអាជ្ញាធរបោះឆ្នោត appeared first on Kampuchea Thmey Daily.

តើលោក Yoon Suk Yeol មានប្រវត្តិបែបណាក្នុងឆាកនយោបាយកូរ៉េខាងត្បូង មុនថ្ងៃតុលាការធម្មនុញ្ញដកតំណែង?

Rann Reuy — Fri, 04 Apr 2025 03:38:06 +0000

លោក Yoon Suk Yeol ប្រធានាធិបតីកូរ៉េខាងត្បូងដែលបានបង្កការភ្ញាក់ផ្អើលយ៉ាងខ្លាំងមិនត្រឹមតែមជ្ឈដ្ឋានប្រទេសកូរ៉េខាងត្បូងប៉ុណ្ណោះទេ ប៉ុន្តែនៅទូទាំងពីភពលោកទាំងមូលតែម្តង ពីព្រោះតែលោកបានប្រកាសច្បាប់អាជ្ញាសឹកកាលថ្ងៃទី៣ខែធ្នូឆ្នាំ២០៤ដ៏សែនតក់ក្រហល់ និងមិននឹកស្មានដល់ បង្កការតក់ស្លុត និងភាពចលាចលនៅទូទាំងប្រទេសកូរ៉េខាងត្បូង។

កំណត់ត្រាសំខាន់ៗរបស់ លោក Yoon Suk Yeol ក្នុងនយោបាយកូរ៉េខាងត្បូង?

លោក Yoon Suk Yeol កើតនៅទីក្រុងសេអ៊ូលក្នុងឆ្នាំ១៩៦០ គឺជាអ្នកចំណូលថ្មីឬថាជាអ្នកប្រឡូកក្នុងនយោបាយប្រទេសកូរ៉េខាងត្បូង បន្ទាប់ពីលោកបានចំណាយពេល២៧ឆ្នាំជាអ្នកអនុវត្តច្បាប់ដោយកាន់តួនាទីជា រដ្ឋអាជ្ញា និងអគ្គរដ្ឋអាជ្ញាជាបន្តបន្ទាប់ មុនពេលឈរឈ្មោះជាប្រធានាធិបតី និងឈ្នះការបោះឆ្នោតយ៉ាងប្រផិតប្រផើយកាលឆ្នាំ២០២២លើប្រធានគណបក្សប្រជាធិបតេយ្យបច្ចុប្បន្នលោក Lee Jae-myung។
បន្ទាប់ពីសិក្សាច្បាប់ លោក Yoon បានបន្តក្លាយជាព្រះរាជអាជ្ញាសាធារណៈ និងជាអ្នកប្រឆាំងអំពើពុករលួយដ៏សកម្មមួយរូប ដោយចោទប្រកាន់លើប្រធានាធិបតីមុនៗ លើដំណើរការផ្លូវច្បាប់ដ៏តឹងតែងរបស់ប្រទេសកូរ៉េខាងត្បូង។
ក្នុងឆ្នាំ២០១៩ ខណៈពេលដែលនៅជាអគ្គរដ្ឋអាជ្ញាកូរ៉េខាងត្បូង លោកបានដុតបំផ្លាញលិខិតសម្គាល់ខ្លួនជាមេក្លោងផ្លូវច្បាប់ បន្ទាប់ពីបានចោទប្រកាន់ជំនួយការជាន់ខ្ពស់របស់ប្រធានាធិបតីដែលចាកចេញពីអំណាច គឺលោក Moon Jae-in ក្នុងសំណុំរឿងក្លែងបន្លំ និងសំណូក។
បញ្ហានយោបាយការបរទេសរបស់ប្រធានាធិបតី Yoon Suk Yeol ដោយសារមានទំនោរទៅរកលោកសេរីខ្លាំង ដូចជា គាំទ្រអ៊ុយក្រែនខ្លាំង បង្កើតអរិភាពជាមួយកូរ៉េខាងជើងកាន់តែខ្លាំងឡើង ងាកទៅរកសម្ព័ន្ធមិត្តសេរី មានអាមេរិកនិងបង្ហាញភាពស្និទ្ធស្នាល ជាមួយជប៉ុនដែលជាសត្រូវប្រវត្តិសាស្រ្ត។
ប្រធានាធិបតីកូរ៉េខាងត្បូង លោក Yoon Suk Yeol ជាអ្នកកាន់ច្បាប់អស់រយៈពេល២៧ឆ្នាំជាអគ្គរដ្ឋអាជ្ញាដ៏មានឥទ្ធិពលក្នុងការកាន់សំណុំរឿងរសើបនានាទាក់ទិននឹងនយោបាយ ហើយលោកក៏ជាដើរតួដ៏សំខាន់ជាអ្នកកាន់សំណុំរឿងចោទប្រកាន់ប្រឆាំងអតីតប្រធានាធិបតី២រូបគឺ លោកស្រី Park Geun-hye និង លោក Lee Myung-bak ដោយចោទប្រកាន់ពីបទរំលោភអំណាច។
គ្រាន់តែឈ្នះឆ្នោតមិនបានប៉ុន្មានថ្ងៃផង ប្រធានាធិបតីកូរ៉េខាងត្បូង លោក Yoon Suk Yeol បានប្រកាសដូរការិយាល័យប្រធានាធិបតីពី វិមានបៃតង (Blue House) ទៅកាន់ទីស្តីការក្រសួងការពារជាតិ ដោយចំណាយទឹកប្រាក់សម្រាប់ជុសជុល សាងសង់រហូតដល់៤០លានដុល្លារ ដោយបង្កការជំទាស់យ៉ាងខ្លាំងពីបក្សប្រជាធិបតេយ្យ។
ប្រធានាធិបតីកូរ៉េខាងត្បូង លោក Yoon Suk Yeol ក៏ត្រូវបានគេចោទថា បានជឿលើគ្រូហុងស៊ុយមកពីប្រទេសចិនលើការមូលដ្ឋាននៃការសម្រេចចិត្តរបស់លោកសម្រាប់ការប្តូរការិយាល័យប្រធានាធិបតីនេះ ដោយមានការលើកឡើងថា វិមានប្រធានាធិបតី (ឬវិមានបៃតង) ដែលជាអតីតព្រះរាជវាំងគ្មានជោគជាតារាសីទេ ព្រោះក្នុងរយៈពេល២៥ឆ្នាំ មានប្រធានាធិបតីជាប់គុកផង និង ធ្វើអត្តឃាតផង ក្រោយអស់អំណាច។
រឿងអាស្រូវ ឬប្រព្រឹត្តរឿងដែលគេយល់ថា ពុករលួយ ឬអសីលធម៌របស់ភរិយាប្រធានាធិបតី ឬហៅថា ស្ត្រីទី១ Kim Keon-hee បានបន្ថែមរឿងរ៉ាវអាស្រូវបន្ថែមទៀតដល់ការគ្រប់គ្រងអំណាចរបស់លោក ហើយលោកប្រធានាធិបតី រារាំងការស៊ើបអង្កេតដោយឯករាជ្យរបស់រដ្ឋអាជ្ញា។
មុនការប្រកាសច្បាប់អាជ្ញាសឹក ជម្លោះចុងក្រោយធំបំផុតរវាងប្រធានាធិបតី និងរដ្ឋសភាគឺនៅពេលដែលរដ្ឋសភាគ្រប់គ្រងដោយគណបក្សប្រជាធិបតេយ្យ បានបោះឆ្នោតប្រឆាំងផែនការចំណាយថវិការដ្ឋដែលស្នើរបស់ប្រធានាធិបតី Yoon Suk Yeol ដោយកាត់បន្ថយការចំណាយរហូតដល់ជិត៣ពាន់លានដុល្លារពីការគម្រោងស្នើសរុប ដែលធ្វើឲ្យលោកយល់ថា គណបក្សប្រជាធិបតេយ្យដែលគ្រប់គ្រងសំឡេងច្រើនលើសលប់នៅក្នុងសភាក្រោយការបោះឆ្នោតកាលខែតុលា២០២៤ បានបង្កការរាំងស្ទះដល់ដំណើរការរបស់រដ្ឋ។
ប្រធានាធិបតីកូរ៉េខាងត្បូង លោក Yoon Suk Yeol បានប្រកាសច្បាប់អាជ្ញាសឹកកាលថ្ងៃទី៣ខែធ្នូឆ្នាំ២០២៤ ដែលនាំទៅដល់ការចល័តកងទ័ពប្រមាណ១៥០០នាក់ និងត្រូវបានរាយការណ៍ថា ប៉ុនប៉ងចាប់ខ្លួនមេដឹកនាំបក្សប្រឆាំង និងអ្នកនយោបាយល្បីៗ ព្រមទាំងបិទការផ្សាយរបស់សារព័ត៌មានដែលមាននិន្នាការប្រឆាំងផង។
ក្រោយការប្រកាសច្បាប់អាជ្ញាសឹកបរាជ័យ លោក Han Dong-hoon ប្រធានបក្សអំណាចប្រជាជន (PPP) ដែលជាបក្សរបស់លោក Yoon Suk Yeol ទទួលបានអំណាច បានស្នើឲ្យគាត់ចុះចេញពីអំណាចដោយសន្តិវិធី ប៉ុន្តែ លោក Yoon Suk Yeol បដិសេធ និងបានប្តេជ្ញាថា នឹងប្រយុទ្ធដល់ទីបញ្ចប់ «Fight to the end»។ ក្រោយ មកសភាដឹកនាំដោយបក្សប្រជាធិបតេយ្យដោយមានការចូលរួមពីសមាជិកសភារបស់គណបក្សរបស់គាត់ផង ក៏បានបោះឆ្នោតព្យួរអំណាចរបស់លោក Yoon Suk Yeol បានជោគជ័យកាលថ្ងៃទី១៤ខែធ្នូ២០២៤។
ក្រោយពីចួលរួមទម្លាក់ ប្រធានាធិបតី Yoon Suk Yeol ដោយអំណាចសភា ប៉ុន្មានថ្ងៃក្រោយមក លោក Han Dong-hoon បានលាតំណែងពីប្រធានបក្សអំណាចប្រជាជន (PPP)។
ក្នុងអំឡុងពេលព្យួរអំណាច លោក Yoon Suk Yeol ស្នាក់នៅការិយាល័យប្រធានាធិបតីដោយមិនចេញក្រៅ ព្រមទាំងប្រើប្រាស់កងអង្គរក្សការពារ សម្រាប់រារាំងដល់អង្គភាពនានាដែលទាមទារការសួរចម្លើយ និងការស៊ើបអង្កេតនានា។
ដោយសារមានអំពើហិង្សាផ្ទុះឡើងរវាងកងការពាររបស់គាត់ និងក្រុមស៊ើបអង្កេតពុករលួយ CIO លោកក៏សុខចិត្តសហការជាមួយ ដើម្បីឲ្យមានការសួរចម្លើយ ហើយក្រោយមកក៏មានការឃុំខ្លួនលោក ដោយតុលាការក្រុងសេអ៊ូល ដោយមានការចោទប្រកាន់ពីបទបះបោរ និងរំលោភអំណាច។
ក្នុងអំឡុងពេលនោះនៃការឃុំខ្លួននោះ លោក Yoon Suk Yeol បានបន្ទន់ជំហរសហការមកចូលរួមឆ្លើយបំភ្លឺនៅតុលាការធម្មនុញ្ញក្នុងសវនាការជាបន្តបន្ទាប់។ ហើយ នៅចុងខែមីនា តុលាការក្រុងសេអ៊ូលក៏បានដោះលែង លោកពីការចោទប្រកាន់វិញ។
នៅថ្ងៃទី៤ខែមេសាឆ្នាំ២០២៥ តុលាការធម្មនុញ្ញដែលមានសមាជិកចៅក្រមក្រុមប្រឹក្សាចំនួន៨រូបក្នុងចំណោមសមាជិកចៅក្រមសរុប៩រូបរបស់តុលាការនេះ បានសម្រេចជាឯកច្ឆ័ន្ទក្នុងការបោះឆ្នោតទម្លាក់លោក Yoon Suk Yeol ពីអំណាចជាផ្លូវការ ដោយមានរយៈពេល១២២ថ្ងៃបន្ទាប់ពីការដកអំណាចគាត់។
បន្ទាប់ពីអស់អំណាចប្រធានាធិបតីជាផ្លូវការ ប្រទេសកូរ៉េខាងត្បូងត្រូវរៀបចំការបោះឆ្នោតប្រធាធិបតីក្នុងរយៈពេល៦០ថ្ងៃ ចាប់ពីថ្ងៃទី៤មេសានេះតទៅ៕

ដោយ រ៉ាន់ រើយ

The post តើលោក Yoon Suk Yeol មានប្រវត្តិបែបណាក្នុងឆាកនយោបាយកូរ៉េខាងត្បូង មុនថ្ងៃតុលាការធម្មនុញ្ញដកតំណែង? appeared first on Kampuchea Thmey Daily.

តើនឹងមានអ្វីកើតឡើង បើលោក Yoon ត្រូវបានបណ្តេញចេញពីអំណាច?

Rann Reuy — Fri, 04 Apr 2025 02:38:21 +0000

ជោគវាសនាត្រឡប់ទៅកាន់អំណាចក្នុងនាមជាប្រធានាធិបតីកូរ៉េខាងត្បូងវិញរបស់ លោក Yoon Suk-yeol នឹងត្រូវដឹង ក្នុងពេលដ៏ខ្លីខាងមុខនេះ ខណៈតុលាការធម្មនុញ្ញកូរ៉េខាងត្បូងកំពុងរៀបចំប្រកាសសាលក្រមដែលកើតចេញពីការបោះឆ្នោតរបស់ចៅក្រម៨រូប នៃចៅក្រម៩រូបរបស់តុលាការធម្មនុញ្ញ និងក្រោមការរឹតបន្តឹងសន្តិសុខដ៏ខ្លាំងក្លាបំផុតនៅថ្ងៃនេះ។

លោក Yoon Suk-yeol ពេលចូលស្តាប់សវនាការនៅតុលាការធម្មនុញ្ញ។ Reuters

លោក Yoon Suk Yeol ដែលកំពុងដាក់ការតស៊ូចុងក្រោយសម្រាប់ជីវិតនយោបាយរបស់គាត់នៅតុលាការធម្មនុញ្ញដែលជាស្ថាប័នយុត្តិធម៌ចុងក្រោយ បិទផ្លូវតវ៉ា បន្ទាប់ពីការប្រកាសសាលក្រម។ ក្នុងករណី ចៅក្រមតុលាការធម្មនុញ្ញ៦រូបក្នុងចំណោម៨រូប មិនបោះឆ្នោតគាំទ្រការទម្លាក់ពីអំណាច ពេលនោះ ប្រធានាធិបតី Yoon Suk Yeol នឹងត្រូវវិលត្រឡប់ទៅកាន់អំណាចវិញ។

ប៉ុន្តែក្នុងករណីដែលចៅក្រមនៃតុលាការធម្មនុញ្ញ ចាប់ពី៦រូបបានបោះឆ្នោតគាំទ្រការចោទប្រកាន់របស់សភាក្នុងការទម្លាក់អំណាច ពេលនោះ ប្រធានាធិបតី Yoon Suk Yeol នឹងត្រូវអស់អំណាច ហើយ ប្រធានាធិបតីស្តីទីបច្ចុប្បន្ន លោក Han Duck-soo នឹងបន្តតូនាទី ហើយប្រទេសកូរ៉េនឹងត្រូវប្រកាសរៀបចំការបោះឆ្នោតប្រធានាធិបតីថ្មីក្នុងរយៈពេល៦០ថ្ងៃ៕

ដោយ រ៉ាន់ រើយ

The post តើនឹងមានអ្វីកើតឡើង បើលោក Yoon ត្រូវបានបណ្តេញចេញពីអំណាច? appeared first on Kampuchea Thmey Daily.

មានការព្រួយបារម្ភខ្លាំងជុំវិញអំពើហិង្សាផ្ទុះឡើងចំថ្ងៃប្រកាសសាលក្រម លោក Yoon

Rann Reuy — Thu, 03 Apr 2025 10:23:10 +0000

នៅព្រឹកថ្ងៃសុក្រទី៤ខែមេសាឆ្នាំ២០២៥ គឺជាថ្ងៃប្រវត្តិសាស្ត្រថ្មីមួយទៀតរបស់ប្រទេសកូរ៉េខាងត្បូង ដែលតុលាការធម្មនុញ្ញកូរ៉េខាងត្បូងនឹងប្រកាសសាលក្រមលើសំណុំរឿងទម្លាក់អំណាចរបស់ប្រធានាធិបតី Yoon Suk Yeol ដែលបានប្រកាសច្បាប់អាជ្ញាសឹកកាលពីថ្ងៃទី៣ខែធ្នូឆ្នាំ២០២៤។

ក្នុងដំណើរការរឿងក្តីដ៏ចម្រូងចម្រាស់របសប្រទេសកូរ៉េខាងត្បូងនេះ ស្ថានភាពកូរ៉េខាងត្បូងបានធ្លាក់ចូលទៅក្នុងស្ថានភាពដ៏យ៉ាប់យឺនក្នុងប្រវត្តិសាស្រ្តកូរ៉េសម័យទំនើប ដោយសារតែការបែងចែកក្នុងសង្គមកូរ៉េដ៏ខ្លាំងរវាងអ្នកគាំទ្របក្សប្រជាជាធិបតេយ្យ ( DPK) ដែលគ្រប់គ្រងអំណាចសភា និងគណបក្សអំណាចប្រជាជន (PPP) ដែលគ្រប់គ្រងអំណាចប្រធានាធិបតី។

ក្នុងថ្ងៃដ៏សំខាន់នេះ ប៉ូលីសកូរ៉េខាងត្បូងត្រូវបានគេរាយការណ៍ថា នឹងប្រមូលផ្តុំ«ធនធានដែលមានទាំងអស់» ដើម្បីការពារអំពើហឹង្សា នៅពេលដែលតុលាការធម្មនុញ្ញប្រកាសសាលក្រមនៅថ្ងៃសុក្រស្តីពីជោគវាសនារបស់ប្រធានាធិបតី លោក Yoon Suk Yeol ដែលត្រូវបានចោទប្រកាន់ទម្លាក់អំណាចដោយសារសភា ស្របពេលដែលតំបន់ទេសចរណ៍សំខាន់ៗក្នុងក្រុងសេអ៊ូល ត្រូវបានបិទ ហើយស្ថានទូតខ្លះបានព្រមានពលរដ្ឋឱ្យស្ថិតនៅឆ្ងាយ។

តុលាការធម្មនុញ្ញរបស់ប្រទេសនេះ នឹងសម្រេចសេចក្តីមួយដែលបិទផ្លូវតវ៉ា ថាតើត្រូវដកលោក Yoon ចេញពីដំណែង ជុំវិញការប្រកាសច្បាប់អាជ្ញាសឹករបស់គាត់ ដែលបណ្តាលឱ្យអំណាចរបស់គាត់ត្រូវបានព្យួរដោយសមាជិកសភារួចហើយ និងចាប់ខ្លួនពីបទបះបោរ ឬក៏ត្រូវប្រគល់អំណាចឲ្យគាត់វិញ។

ប្រធានស្តីទីនៃ តុលាការធម្មនុញ្ញកូរ៉េខាងត្បូង លោក Moon Hyung-bae

តុលាការធម្មនុញ្ញដែលស្ថិតនៅកណ្តាលទីក្រុងសេអ៊ូលបានក្លាយទៅជាចំណុចដ៏ក្តៅមួយ ជាមួយនឹងការតវ៉ាមិនឈប់ឈរនៅក្នុងតំបន់នេះក្នុងចាប់តាំងពីតុលាការបញ្ចប់សវនាការចុងក្រោយកាលថ្ងៃទី២៥ខែកុម្ភៈ រហូតដល់ប៉ូលីសបានផ្លាស់ប្តូរកាលពីថ្ងៃអង្គារ ដើម្បីបិទផ្លូវនានា ដើម្បីបញ្ចៀសការប៉ះទង្គិចដែលអាចកើតមានរវាងអ្នកគាំទ្ររបស់ភាគីទាំងពីរគណបក្ស។

ទីភ្នាក់ងារព័ត៌មានបារាំង AFP ដកស្រង់សម្តី លោក Lee Ho-young ប្រធានស្តីទីនៃទីភ្នាក់ងារប៉ូលីសជាតិកូរ៉េបាននិយាយកាលពីថ្ងៃពុធថា៖«ស្ថានភាពកាន់តែធ្ងន់ធ្ងរជាងពេលណាៗទាំងអស់»។

លោក Lee បាននិយាយក្នុងអំឡុងកិច្ចប្រជុំជាមួយមន្ត្រីប៉ូលិសកំពូលៗថា ប៉ូលីសមានការព្រួយបារម្ភថា ទោះជាសាលក្រមណាមួយត្រូវបានប្រកាសក៏ដោយ មនុស្សមួយចំនួន «អាចបង្កឲ្យមានការរំជើបរំជួល និងចូលរួមក្នុងការតវ៉ាដ៏ខ្លាំងក្លា ឬដោយហិង្សា»។

អ្នកគាំទ្ររបស់ Yoon បានសម្រុកចូលអគារតុលាការមួយកាលពីខែមករា បន្ទាប់ពីចៅក្រមបានបន្តការឃុំខ្លួនប្រធានាធិបតីដែលត្រូវបានព្យួរ។ ក្រោយមកគាត់ត្រូវបានដោះលែងពីមន្ទីរឃុំឃាំងតាមមូលដ្ឋាននីតិវិធី។

លោក Lee បាននិយាយថា៖«ប៉ូលីសនឹងប្រមូលធនធានដែលមានទាំងអស់ ដើម្បីធានាសុវត្ថិភាពសាធារណៈ និងដើម្បីការពារស្ថានភាពកុំឱ្យកើនឡើងទៅជាជម្លោះសង្គមធ្ងន់ធ្ងរ»។

ដើម្បីទប់ស្កាត់បាតុភាពដែលអាចកើតឡើងជាយថាហេតុនៅទីក្រុងសេអ៊ូល ប៉ូលិសកុបកម្មជាង ១៤០០០នាក់នឹងត្រូវដាក់ពង្រាយ ការពារសន្តិសុខ។

ជុំវិញតំបន់អគារតុលាការធម្មនុញ្ញនោះ សាលារៀននិងហាងជាច្រើននឹងបិទនៅថ្ងៃប្រកាសសាលក្រម ដោយសារបញ្ហាសុវត្ថិភាព។ ក្រៅពីនោះ តំបន់បម្រើឲ្យវិស័យសេវាកម្មទេសចរណ៍ ដូចជា វិមាន Gyeongbok និង Changdeok ទាំងនៅចម្ងាយផ្លូវដើរពីតុលាការក៏នឹងត្រូវបិទផងដែរ។

ស្ថានទូតចិននៅទីក្រុងសេអ៊ូល បានព្រមានប្រជាជនរបស់ខ្លួនឱ្យនៅឆ្ងាយពីការតវ៉ានយោបាយក្នុងស្រុក។ ទន្ទឹមនឹងនោះ ស្ថានទូតអាមេរិកបានព្រមានពលរដ្ឋរបស់ខ្លួនឱ្យ «ជៀសវាងតំបន់ដែលបាតុកម្មកំពុងកើតឡើង ហើយអនុវត្តការប្រុងប្រយ័ត្ននៅតំបន់ជុំវិញនៃហ្វូងមនុស្សច្រើន ការប្រមូលផ្តុំ ការតវ៉ា ឬការប្រមូលផ្តុំ»។

ប្រធានាធិបតីស្តីទី លោក Han Duck-soo បានជំរុញឱ្យមេដឹកនាំនយោបាយ ចៀសវាងការថ្លែងសុន្ទរកថា ដែលអាចញុះញង់ ឬលើកទឹកចិត្តឱ្យមានការតវ៉ាខុសច្បាប់ ឬអំពើហិង្សា៕

ដោយ រ៉ាន់ រើយ

ប្រធានាធិបតី Yoon Suk Yeol ពិភាក្សាជាមួយមេធាវី។ REUTERS

The post មានការព្រួយបារម្ភខ្លាំងជុំវិញអំពើហិង្សាផ្ទុះឡើងចំថ្ងៃប្រកាសសាលក្រម លោក Yoon appeared first on Kampuchea Thmey Daily.

ជោគវាសនារបស់លោក Yoon Suk Yeol នឹងត្រូវដឹងនៅថ្ងៃសុក្រទី៤មេសានេះ

Rann Reuy — Tue, 01 Apr 2025 02:58:51 +0000

សេចក្តីរាយការណ៍របស់សារព័ត៌មានកូរ៉េខាងត្បូង បានឲ្យដឹងថា តុលាការធម្មនុញ្ញរបស់កូរ៉េខាងត្បូង ដែលកំពុងពិនិត្យមើលសំណុំរឿងចោទប្រកាន់ទម្លាក់អំណាចរបស់ប្រធានាធិបតី Yoon Suk Yeol នឹងប្រកាសការសម្រេចចិត្ត (សាលក្រម) នៅថ្ងៃសុក្រទី៤ខែមេសា ដើម្បីបញ្ចប់ការទន្ទឹងរង់ចាំដ៏យូរ។

សាលក្រមរបស់តុលាការធម្មនុញ្ញ នឹងត្រូវកំណត់ថាតើ ត្រូវដកគាត់ចេញពីតំណែងជាអចិន្ត្រៃយ៍ ឬត្រូវប្រគល់អំណាចប្រធានាធិបតីឲ្យគាត់កាន់កាប់វិញ បន្ទាប់ពីការព្យួរអំណាចអស់រយៈពេលជាង១០០ថ្ងៃ ក្រោយសភាបោះឆ្នោតទម្លាក់កាលថ្ងៃទី១៤ខែធ្នូឆ្នាំ២០២៤។

សេចក្តីប្រកាសរបស់តុលាការធម្មនុញ្ញនៅថ្ងៃអង្គារនេះដែលធ្វើឡើងតាមកញ្ចក់ទូរទស្សន៍ បានឲ្យដឹងថា តុលាការបាននិយាយថា ការប្រកាសសាលក្រមនោះនឹងត្រូវធ្វើឡើងនៅម៉ោង ១១ព្រឹក ម៉ោងនៅទីក្រុងសេអ៊ូល (0200 GMT) (ត្រូវម៉ោង៩ព្រឹកម៉ោងនៅប្រទេសកម្ពុជា) ហើយសម័យប្រជុំរបស់តុលាការធម្មនុញ្ញនាពេលនោះក៏នឹងត្រូវបានអនុញ្ញាតឲ្យមានការផ្សាយផ្ទាល់ផងដែរ។

Yoon ត្រូវបានសភាចោទប្រកាន់កាលពីថ្ងៃទី ១៤ខែធ្នូឆ្នាំ២០២៤ បន្ទាប់ពីត្រូវបានចោទប្រកាន់ពីបទរំលោភលើកាតព្វកិច្ចរដ្ឋធម្មនុញ្ញរបស់គាត់ ដោយប្រកាសច្បាប់អាជ្ញាសឹកកាលថ្ងៃទី៣ខែធ្នូឆ្នាំ២០២៤ ដោយគ្មានហេតុផលសមហេតុផល ក្នុងការដាក់ចេញច្បាប់អាជ្ញាសឹកដែលមានរយៈពេលត្រឹមតែប្រមាណ៦ម៉ោងប៉ុណ្ណោះ។

ប្រធានាធិបតី Yoon Suk Yeol ដែលត្រូវបានព្យួរអំណាចនោះ បាននិយាយថា លោកមិនដែលមានបំណងដាក់ច្បាប់អាជ្ញាសឹកពេញលេញនោះទេ ប៉ុន្តែផ្ទុយទៅវិញ មានន័យថា ដើម្បីព្រមានឲ្យដឹងជុំវិញការបំពានច្បាប់របស់គណបក្សប្រជាធិបតេយ្យលើសំឡេងភាគច្រើននៅក្នុងសភា ដែលលោកបានប្រកែកថាកំពុងគំរាមកំហែងបំផ្លាញប្រទេស។

ច្បាប់អាជ្ញាសឹកនោះត្រូវគេដឹងថា លោក Yoon Suk Yeol បានប្រកាសក្រោយគណបក្សប្រជាធិបតេយ្យដែលគ្រប់គ្រងសំឡេងភាគច្រើននៅក្នុងសភា បានទម្លាក់ចោលគម្រោងចំណាយដែលស្នើឡើងដោយគណៈរដ្ឋមន្ត្រីរបស់ប្រធានាធិបតី ដែលធ្វើឲ្យលោកខឹង និងចាត់ទុកគណបក្សប្រជាធិបតេយ្យដែលជាបក្សប្រឆាំងជាអ្នករារាំងការអភិវឌ្ឍន៍ជាតិ និងជាកម្លាំងគំាទ្រកូរ៉េខាងជើង។

នៅក្នុងសេចក្តីថ្លែងការណ៍ចុងក្រោយរបស់ លោក Yoon មុនពេលតុលាការបញ្ចប់ការជជែកវែកញែកកាលថ្ងៃទី២៥ខែកុម្ភៈ២០២៥ លោក Yoon ក៏បាននិយាយថា ការសម្រេចចិត្តរបស់គាត់ក្នុងការប្រកាសច្បាប់អាជ្ញាសឹកគឺជាការអំពាវនាវដល់ប្រជាជនឱ្យយកឈ្នះលើ «កងកម្លាំងប្រឆាំងរដ្ឋ» អ្នកអាណិតអាសូរដែលគាំទ្រកូរ៉េខាងជើង៕

សារព័ត៌មាន JoonAng Daily បានផ្សាយថា សាលក្រមរបស់តុលាការធម្មនុញ្ញក្នុងសំណុំរឿងរបស់លោក Yoon គឺមានរយៈពេល៣៨ថ្ងៃ បន្ទាប់ពីសវនាការចុងក្រោយនៃការកាត់ក្តីរបស់គាត់នៅថ្ងៃទី២៥ខែកុម្ភៈ និង ១១១ថ្ងៃបន្ទាប់ពីរដ្ឋសភាបានដាក់សំណើចោទប្រកាន់ជាផ្លូវការទៅកាន់តុលាការធម្មនុញ្ញ។ ចៅក្រមទាំងប្រាំបីរបស់តុលាការបានធ្វើការពិភាក្សាលើសំណុំរឿងរបស់ Yoon ស្ទើរតែរាល់ថ្ងៃចាប់តាំងពីការកាត់ក្តីរបស់គាត់បានបញ្ចប់៕

ដោយ រ៉ាន់ រើយ

ប្រធានាធិបតី Yoon Suk Yeol មើលទៅកាន់តុលាការក្រុងសេអ៊ូល ពេលដោះលែងនៅក្រៅឃុំកាលថ្ងៃទី ៨មីនា ២០២៥។ REUTERS

The post ជោគវាសនារបស់លោក Yoon Suk Yeol នឹងត្រូវដឹងនៅថ្ងៃសុក្រទី៤មេសានេះ appeared first on Kampuchea Thmey Daily.

ច្បាប់អាជ្ញាសឹក Archives - Kampuchea Thmey Daily

​ផ្លូវការហើយ​! កូរ៉េខាងត្បូង​នឹងរៀបចំបោះឆ្នោត​ប្រធានាធិបតីថ្មីនៅថ្ងៃ​ទី​៣មិថុនា​​

​កាល​បរិច្ឆេទ​បោះឆ្នោត​ប្រធានាធិបតី​ថ្មី​នៅ​កូរ៉េខាងត្បូង​ទំនង​​ធ្វើនៅថ្ងៃទី៣មិថុនា​

​អ្នក​មានសមានចិត្ត​​នឹង​លោក Yoon ចេញតវ៉ា និង​ហាក់​ជូនដំណើរ​ ​​ក្រោមដំណក់​ទឹកភ្លៀង​

ប្រធានាធិបតីស្តីទី​ Han Duck-soo ​​គោរព​​សាលក្រម និង​ឲ្យ​គណៈរដ្ឋមន្ត្រី​សហការ​ជាមួយ​អាជ្ញាធរ​បោះឆ្នោត

​តើលោក Yoon Suk Yeol ​​មានប្រវត្តិបែបណា​​ក្នុង​ឆាកនយោបាយកូរ៉េខាងត្បូង មុនថ្ងៃ​តុលាការ​ធម្មនុញ្ញ​ដក​តំណែង​?​

​តើ​នឹងមានអ្វីកើត​ឡើង បើលោក Yoon ត្រូវ​បាន​​បណ្តេញចេញពីអំណាច​?

​​​មានការ​ព្រួយបារម្ភ​ខ្លាំង​ជុំវិញអំពើ​ហិង្សា​​​ផ្ទុះ​​​ឡើង​ចំថ្ងៃ​ប្រកាសសាលក្រម លោក Yoon

ជោគវាសនា​​​​​​​​របស់​លោក Yoon ​Suk Yeol នឹង​​ត្រូវ​ដឹង​នៅ​ថ្ងៃសុក្រ​ទី​៤​មេសា​នេះ​​

ផ្លូវការហើយ! កូរ៉េខាងត្បូងនឹងរៀបចំបោះឆ្នោតប្រធានាធិបតីថ្មីនៅថ្ងៃទី៣មិថុនា

កាលបរិច្ឆេទបោះឆ្នោតប្រធានាធិបតីថ្មីនៅកូរ៉េខាងត្បូងទំនងធ្វើនៅថ្ងៃទី៣មិថុនា

អ្នកមានសមានចិត្តនឹងលោក Yoon ចេញតវ៉ា និងហាក់ជូនដំណើរ ក្រោមដំណក់ទឹកភ្លៀង

ប្រធានាធិបតីស្តីទី Han Duck-soo គោរពសាលក្រម និងឲ្យគណៈរដ្ឋមន្ត្រីសហការជាមួយអាជ្ញាធរបោះឆ្នោត

តើលោក Yoon Suk Yeol មានប្រវត្តិបែបណាក្នុងឆាកនយោបាយកូរ៉េខាងត្បូង មុនថ្ងៃតុលាការធម្មនុញ្ញដកតំណែង?

តើនឹងមានអ្វីកើតឡើង បើលោក Yoon ត្រូវបានបណ្តេញចេញពីអំណាច?

មានការព្រួយបារម្ភខ្លាំងជុំវិញអំពើហិង្សាផ្ទុះឡើងចំថ្ងៃប្រកាសសាលក្រម លោក Yoon

ជោគវាសនារបស់លោក Yoon Suk Yeol នឹងត្រូវដឹងនៅថ្ងៃសុក្រទី៤មេសានេះ