មកទល់ថ្ងៃនេះ ឆ្កែចចក ៤ ក្បាល ត្រូវពលរដ្ឋវាយងាប់ នៅស្រុកមោងឬស្សី

អ៊ិន ពិសី — Wed, 08 Oct 2025 04:24:45 +0000

សត្វឆ្កែចចកចំនួន ៤ ក្បាល ត្រូវបានប្រជាពលរដ្ឋស្ទាក់វាយងាប់ជាបន្តបន្ទាប់ ក្រោយពីសត្វចចកទាំងនេះ រត់ចូលភូមិ ហើយខាំពលរដ្ឋ ៣ នាក់ បណ្ដាលឲ្យរងរបួស។

តាមការបញ្ជាក់ពី លោក ស គឹមឡុង អធិការនគរបាលស្រុកមោងឬស្សី បានឲ្យដឹងថា កាលពីព្រឹកថ្ងៃទី ៦ ខែតុលា ឆ្នាំ ២០២៥ នៅចំណុចភូមិពោធិ៍ ១ ឃុំគារ ស្រុកមោងឬស្សី ខេត្តបាត់ដំបង មានករណីសត្វឆ្កែចចកបានខាំប្រជាពលរដ្ឋចំនួន ៣ នាក់ មានឈ្មោះដូចខាងក្រោម ៖ ១-ឈ្មោះ លី ជា ភេទប្រុស អាយុប្រហែល ៤៣ ឆ្នាំ រស់នៅភូមិពោធិ៍ ១ ឃុំគារ (ខាំត្រូវដៃស្តាំ) ទៅព្យាបាលនៅពេទ្យបាត់ដំបង ខណៈពេលជនរងគ្រោះដើរហាត់ប្រាណ។ ២-ឈ្មោះ សេង រតនា ភេទស្រី អាយុប្រហែល ២២ ឆ្នាំ រស់នៅភូមិពោធិ៍ ១ ឃុំគារ (ខាំត្រូវដៃខាងឆ្វេង) ខណៈពេលជនរងគ្រោះជិះកង់ទៅរៀន។ ៣-ឈ្មោះ ធឹង ស៊ី ភេទស្រី អាយុប្រហែល ៦២ ឆ្នាំ រស់នៅភូមិពោធិ៍ ១ ឃុំគារ (ខាំត្រូវបបូរមាត់ខាងឆ្វេង និងត្រូវក្រោមភ្នែកខាងឆ្វេង) ទៅព្យាបាលមន្ទីរពេទ្យបាត់ដំបង ខណៈពេលជនរងគ្រោះដើរទៅផ្សារ ដើម្បីលក់នំបញ្ចុក។ បន្ទាប់មក សត្វឆ្កែចចកនោះ ត្រូវបានប្រជាពលរដ្ឋនៅភូមិរាមគន់ នាំគ្នាវាយងាប់បាត់ហើយ។

លោកអធិការ បានបន្តថា នៅព្រឹកថ្ងៃដដែល ក៏មានសត្វឆ្កែចចកមួយក្បាលទៀត បានរត់ចូលទៅភូមិទួលតាថុន ស្ថិតក្នុងភូមិសាស្ត្រឃុំជ្រៃ ស្រុកមោងឬស្សី ហើយត្រូវប្រជាពលរដ្ឋស្ទាក់ព័ទ្ធវាយបានភ្លាមៗ ដោយឆ្កែចចកនេះមិនទាន់ធ្វើសកម្មភាពខាំទៅលើពលរដ្ឋណាមួយឡើយ។ លុះនៅវេលាម៉ោង ៦ ព្រលប់ថ្ងៃដដែល ប្រជាពលរដ្ឋបានស្ទាក់វាយឆ្កែចចកបានមួយក្បាលទៀត ដែលកំពុងរត់ចូលភូមិ នៅចំណុចភូមិម្រះព្រៅ ត្រង់ព្រំប្រទល់ភូមិដូនទ្រី ក្នុងឃុំជ្រៃ។

លោកអធិការ បានបន្ថែមថា ចំណែកឆ្កែចចកមួយក្បាលទៀត ដែលជាក្បាលទី ៤ ក៏ត្រូវបានប្រជាពលរដ្ឋវាយងាប់នៅចំណុចភូមិប្រឡាយស្ដៅ ឃុំតាលាស់ ស្រុកមោងឬស្សី ដដែល។ បញ្ហានេះ ក៏មានប្រភពជាច្រើនបានធ្វើការសន្និដ្ឋានថា ហ្វូងឆ្កែចចកដែលរត់ដាច់សង្វែងចូលក្នុងភូមិប្រជាពលរដ្ឋរស់នៅ គឺទំនងមកពីទឹកទន្លេឡើងខ្លាំង ធ្វើឲ្យហ្វូងសត្វឆ្កែចចកទាំងនេះពុំមានទីជម្រក ហើយក៏ចាប់ផ្ដើមរត់ចូលព្រៃចូលចម្ការ និងចូលក្នុងភូមិតែម្ដង។ ជាមួយនេះ លោកអធិការ ក៏បានអំពាវនាវដល់ប្រជាពលរដ្ឋឲ្យមានការប្រុងប្រយ័ត្ន ព្រោះវាអាចមានបន្តទៀត ប្រសិនបើឆ្កែចចកទាំងនេះនៅសល់៕

អត្ថបទ ៖ សោ និយមរ័ត្ន

The post មកទល់ថ្ងៃនេះ ឆ្កែចចក ៤ ក្បាល ត្រូវពលរដ្ឋវាយងាប់ នៅស្រុកមោងឬស្សី appeared first on Kampuchea Thmey Daily.

ឆ្កែចចកលូ ដោយសារមូលហេតុ ៥ យ៉ាងនេះសោះ

Boa Sokunveary — Mon, 13 Mar 2023 09:20:00 +0000

ជាទូទៅឆ្កែចចកចាប់ផ្ដើមចេះលូនៅអាយុ ៣-៤ ខែ ហើយវាលូភាគច្រើនពេលព្រះចន្ទភ្លឺល្អទើបងាយស្រួលប្រាស្រ័យទាក់ទងគ្នា ។ ខាងក្រោមនេះជាមូលហេតុ ៥ យ៉ាងដែលឆ្កែចចកលូ ៖

១. ប្រាប់ទីតាំង

ឆ្កែចចកលូពេលពួកវាវង្វេងគ្នា ឬចង់ប្រាប់ដំណឹងពីទីតាំងរបស់ខ្លួនទៅឲ្យឆ្កែផ្សេងទៀតបានដឹង ជាពិសេសអំឡុងពេលតាមរកកូនឆ្កែដែលបាត់ខ្លួន ។

២. ការពារទឹកដី

ករណីនេះកើតឡើងពេលរដូវកាលបន្តពូជ ពួកវាលូគំរាមសត្រូវមិនឲ្យចូលឈ្លានពានទឹកដី និងឆ្កែញីក្នុងហ្វូង ។

៣. នឹកគ្នា

យោងតាមការសិក្សានៅ “មជ្ឈមណ្ឌលវិទ្យាសាស្ត្រឆ្កែចចកប្រទេសអូស្ត្រា” បានឲ្យដឹងថា ឆ្កែចចកលូច្រើនព្រោះនឹកឆ្កែផ្សេងទៀតដែលបែកគ្នាយូរ ។

៤. រៀបចំផែនការវាយប្រហារ

ឆ្កែចចកប្រមាញ់ជាក្រុម ដូច្នេះពួកវាលូដើម្បីផ្ដល់ព័ត៌មានឲ្យគ្នាពីអ្វីដែលត្រូវធ្វើ ។

៥. ស្វែងរកញី-ឈ្មោល

ដល់រដូវបន្តពូជពួកគេត្រូវស្វែងរកដៃគូដើម្បីបង្កើតកូន បន្ទាប់ពីមានគូហើយវានឹងនៅជាមួយគ្នារហូតដល់ស្លាប់ម្ខាងទើបរកដៃគូថ្មីទៀត ។

ជាក់ស្ដែងឆ្កែចចកតែងតែចៀសវាងទំនាក់ទំនងជាមួយមនុស្ស លើកលែងតែវានៅជាមួយមនុស្សយើងស្រាប់ យ៉ាងណាមិញអ្នកមិនគួរយកវាមកចិញ្ចឹមឡើយព្រោះសត្វនេះអាចបង្កគ្រោះថ្នាក់ជាងឆ្កែបានគ្រប់វេលា ៕

ប្រែសម្រួល ៖ វារី

ចុចអាន ៖ អាកប្បកិរិយាសត្វឆ្កែ ១៣ ចំណុច ម្ចាស់គួរដឹង

The post ឆ្កែចចកលូ ដោយសារមូលហេតុ ៥ យ៉ាងនេះសោះ appeared first on Kampuchea Thmey Daily.

ឆ្កែចចក Archives - Kampuchea Thmey Daily

មកទល់ថ្ងៃនេះ ឆ្កែចចក ៤ ក្បាល ត្រូវពលរដ្ឋវាយងាប់ នៅស្រុកមោងឬស្សី

ឆ្កែចចកលូ ដោយសារមូលហេតុ ៥ យ៉ាងនេះសោះ