ឆ្លងដែនខុសច្បាប់ Archives - Kampuchea Thmey Daily

យោធាថៃឃាត់ខ្លួន ពលករខ្មែរ ១០ នាក់ និងជនជាតិថៃ ៥នាក់ ឆ្លងដែនខុសច្បាប់

Sorn Phanith — Mon, 27 Dec 2021 06:53:14 +0000

សមត្ថកិច្ចថៃអង្គភាពទី ១២ ឈរជើងតាមបន្ទាត់ព្រំដែនក្នុងស្រុកតាប្រាយ៉ា ខេត្តស្រះកែវ ប្រទេសថៃ ឈមនឹងខេត្តបន្ទាយមានជ័យរបស់ប្រទេសកម្ពុជា ចុះល្បាតក្នុងភូមិសាស្ត្រទទួលខុសត្រូវកាលពីថ្ងៃទី ២៦ ខែធ្នូ ឆ្នាំ ២០២១ បានប្រទះឃើញពលរដ្ឋខ្មែរ លួចឆ្លងដែនចូលប្រទេសថៃតាមច្រករបៀងដោយខុសច្បាប់ដែលប្រថុយ និងគ្រោះថ្នាក់ដល់អាយុជីវិតចំនួន ១០ នាក់ ក្នុងនោះប្រុស ៦ និងស្រី ៤ នាក់ នៅបរិវេណភូមិទ័ពសៀម ឃុំ/ស្រុកតាប្រាយ៉ា ខេត្តស្រះកែវ ។

ពលរដ្ឋខ្មែរទាំង ១០ នាក់នោះ បានប្រាប់ថា សមត្ថកិច្ចថាពួកគាត់ធ្វើដំណើរមកពីខេត្តកំពង់ចាម និងកំពង់ធំ ប្រទេសកម្ពុជា មានគោលបំណងធ្វើដំណើរទៅធ្វើការនៅក្នុងខេត្តប៉ះធំ ថានី និងខេត្តស្រះកែវ របស់ថៃ ទើបសមត្ថកិច្ចថៃឃុំខ្លួនយកទៅសួរនាំបន្ថែម និងបញ្ជូនទៅឲ្យជំនាញស្រុកតាព្រះយ៉ា ដើម្បីចាត់ការតាមច្បាប់បន្ត។

សមត្ថកិច្ចការពារព្រំដែនបន្តថា នៅពេលជាមួយគ្នានេះដែរ កម្លាំងទាហានប្រាណទី ១៣ ប្រចាំស្រុកអារញ្ញ កងកម្លាំងបូរផា បានចេញល្បាតឃ្លាំមើលនិងត្រួតពិនិត្យតំបន់ដែលទទួលខុសត្រូវនេះផងដែរ ក៏បានប្រទះឃើញបុរសជនជាតិថៃកំពង់លួចឆ្លងដែនតាមច្រករបៀង ធ្វើដំណើរចូលទៅទឹកដីកម្ពុជា ចំនួន៥នាក់ នៅបរិវេណភូមិខ្លងលឹក ឃុំ/ស្រុកអារញ្ញ ខេត្តស្រះកែវ នឹងក្រោយពីសមត្ថកិច្ចសួរនាំ បានឲ្យដឹងថា បុរសជនជាតិថៃទាំង ៥ នាក់ ធ្វើដំណើរមកពីទីក្រុងបាងកក មានបំណងធ្វើដំណើរមកធ្វើការនៅក្នុងទឹកដីខេត្តបន្ទាយមានជ័យ របស់កម្ពុជា ទើបសមត្ថកិច្ចថៃឃាត់ខ្លួនបញ្ជូនទៅឲ្យជំនាញសមត្ថកិច្ចស្រុកខ្លងលឹក ដើម្បីចាត់ការតាមច្បាប់បន្ត៕

អត្ថបទ៖ ពៅ

The post យោធាថៃឃាត់ខ្លួន ពលករខ្មែរ ១០ នាក់ និងជនជាតិថៃ ៥នាក់ ឆ្លងដែនខុសច្បាប់ appeared first on Kampuchea Thmey Daily.

កុងស៊ុលកម្ពុជា ជួយសម្រួលដោះលែងពលរដ្ឋខ្មែរជាង ១០០នាក់ ចាញ់បោកមេខ្យល់ នាំចូលថៃ

KC Virak — Tue, 19 Oct 2021 08:36:50 +0000

ស្ថានអគ្គកុងស៊ុលកម្ពុជាប្រចាំខេត្តស្រះកែវ ប្រទេសថៃ បានអន្តរាគមន៍សហការជាមួយអាជ្ញាធរថៃ សម្របសម្រួលដោះលែងពលរដ្ឋខ្មែរចំនួន ១០៤នាក់ ក្នុងនោះប្រុស៦៥នាក់ ដែលត្រូវបានមេខ្យល់នាំចូលមកប្រទេសថៃដោយខុសច្បាប់ តាមច្រករបៀង ហើយត្រូវបានសមត្ថកិច្ចថៃឃាត់ខ្លួន កាលពីថ្ងៃទី១៨ ខែតុលា ឆ្នាំ២០២១។

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានឱ្យដឹងនៅថ្ងៃទី១៩ ខែតុលានេះថា នៅពេលជួបជាមួយពលករខ្មែរទាំងនោះ ក្រុមការងារស្ថានអគ្គកុងស៊ុលបានធ្វើការអប់រំអំពីហានិភ័យ នៃការឆ្លងដែនខុសច្បាប់ និងហានិភ័យ នៃការរីករាលដាលជំងឺកូវីដ-១៩ និងបានសហការជាមួយអាជ្ញាធរថៃ និងអាជ្ញាធរកម្ពុជាបញ្ជូនពួកគាត់ទាំង១០៤នាក់ ត្រឡប់មកកម្ពុជាវិញនៅល្ងាចថ្ងៃដដែល។

គួររំលឹកដែរថា កាលពីថ្ងៃទី១៨ ខែតុលា ឆ្នាំ២០២១ ស្ថានអគ្គកុងស៊ុលកម្ពុជាប្រចាំខេត្តស្រះកែវ ក៏បានជួយពលករខ្មែរចំនួន ០៧នាក់ ក្នុងនោះមានស្រី០៤នាក់ និងកូនក្មេង០១នាក់ ឱ្យត្រឡប់ទៅកម្ពុជាវិញ បន្ទាប់ពីពួកគាត់ទាំងនោះបានធ្វើដំណើរមកពីបណ្តាខេត្តនានា នៅក្នុងទឹកដីប្រទេសថៃ៕

អត្ថបទ៖ កោះកែវ

The post កុងស៊ុលកម្ពុជា ជួយសម្រួលដោះលែងពលរដ្ឋខ្មែរជាង ១០០នាក់ ចាញ់បោកមេខ្យល់ នាំចូលថៃ appeared first on Kampuchea Thmey Daily.

ឃាត់ខ្លួនជនជាតិថៃ ៧នាក់ ដែលមកពីខេត្តសមុទ្រប្រាកាន បម្រុងលបឆ្លងដែនមកធ្វើការនៅក្នុងប្រទេសកម្ពុជា

Kang Tola — Fri, 15 Oct 2021 14:28:13 +0000

ប្រទេសថៃ ៖ ជនជាតិថៃចំនួន ៧ នាក់ ដែលក្នុងនោះមានប្រុស ៥ នាក់ និងស្រី ២ នាក់ ត្រូវបានតម្រួតការពារព្រំដែនថៃលេខ១២ ធ្វើការឃាត់ខ្លួននៅក្បែរខ្សែបន្ទាត់ព្រំដែន ខណៈដែលពួកគេបម្រុងលួចឆ្លងដែនចូលមកក្នុងប្រទេសកម្ពុជាដើម្បីរកការងារធ្វើ។

ការឃាត់ខ្លួននេះបានធ្វើឡើងកាលពីវេលាម៉ោង ៥ ព្រឹក ថ្ងៃទី១៥ ខែតុលា ឆ្នាំ២០២១ ត្រង់ចំណុច ឃុំម៉ាកម៉ុន ស្រុកគោកខ្យូង ខេត្តស្រះកែវ ប្រទេសថៃ បន្ទាប់ពីពួកគេកំពុងធ្វើដំណើរ ជិតដល់ព្រំដែនកម្ពុជា ក្នុងពេលដែលប្រទេសមានការរឹតបន្តឹង ដោយសារការរាតត្បាតនៃជំងឺកូវីដ-១៩ កាន់តែមានសភាពធ្ងន់ធ្ងរ ពិសេសគឺមេរោគបម្លែងខ្លួន ដែលតា។

ពួកគេ បានអះអាងថា ពួកគេបានទាក់ទងការងារជាបុគ្គលិកកាស៊ីណូ អនឡាញ ក្នុងប្រទេសកម្ពុជា តាមរយៈផេកហ្វេសប៊ុក ទើបពួកគេនាំគ្នាជិះរថយន្តមកពីខេត្តសមុទ្រប្រាកាន មកចុះនៅស្រុកអារញ្ញប្រាថេត ហើយក៏មានរថយន្តតួរីស ពណ៌ស មកទទួល ដោយដឹកយកទៅទម្លាក់ត្រង់បរិវេណ ឃុំម៉ាកម៉ុន ដើម្បីដើរឆ្លងព្រំដែន។

ឯការលបឆ្លងដែននេះគឺ ដោយចូលទៅធ្វើការនៅក្នុងកាស៊ីណូអនឡាញដោយទៅដល់ទីនោះក្រុមហ៊ុននឹងជួយគ្រប់យ៉ាងទាំងការហូបចុក និងការស្នាក់នៅ ប៉ុន្តែមិនទាន់បានទៅដល់ផងត្រូវសមត្ថកិច្ចចាប់ខ្លួនទៅហើយ។

បច្ចុប្បន្នជនជាតិថៃទាំង ៧ នាក់ ត្រូវបានបញ្ជូនទៅកាន់អធិការដ្ឋានតម្រួតស្រុកគោកខ្យូង ដើម្បីចាត់ការតាមនីតិវិធី ៕

អត្ថបទ ៖ សោ និយមរ័ត្ន

The post ឃាត់ខ្លួនជនជាតិថៃ ៧នាក់ ដែលមកពីខេត្តសមុទ្រប្រាកាន បម្រុងលបឆ្លងដែនមកធ្វើការនៅក្នុងប្រទេសកម្ពុជា appeared first on Kampuchea Thmey Daily.

ឃាត់ខ្លួនថៃ ១៥ នាក់ និងស្ត្រីភូមាម្នាក់ ប្រុងលបឆ្លងដែនចូលមកធ្វើការនៅកម្ពុជា

Kang Tola — Tue, 12 Oct 2021 12:47:42 +0000

ប្រទេសថៃ ៖ ជនជាតិថៃចំនួន ១៥ នាក់ និងជនជាតិភូមា ១ នាក់ ដែលខំធ្វើដំណើរមកពីបណ្តាខេត្តមួយចំនួន ត្រូវបានកម្លាំងយោធាថៃ ក្នុងកងរយ លេខ១២ សហការជាមួយតម្រួតព្រំដែនលេខ ៤ ធ្វើការឃាត់ខ្លួន ខណៈដែលពួកគេកំពុងឆ្លងដែនចូលមកធ្វើការនៅក្នុងប្រទេសកម្ពុជា។

ការឃាត់ខ្លួនជនជាតិថៃទាំង ១៥ នាក់ និងភូមាម្នាក់នេះ គឺបានធ្វើឡើង នៅចន្លោះម៉ោង ៣ ទៅម៉ោង ៤ ទៀបភ្លឺ ថ្ងៃទី ១២ ខែតុលា ឆ្នាំ២០២១ ត្រង់ចំណុចក្បែរបន្ទាត់ព្រំដែន ត្រង់ចំណុចណងយ៉ាកែវ ក្នុង ស្រុកគោកខ្យូង ខេត្តស្រះកែវ។

ក្នុងកិច្ចប្រតិបត្តិការទប់ស្កាត់បទល្មើសឆ្លងដែនគ្រប់ប្រភេទ ក្នុងដំណាក់កាលនៃការរីករាលដាល នូវជំងឺកូវីដ-១៩ នេះ កម្លាំងបានឃាត់ខ្លួនជនជាតិថៃចំនួន ១៥ នាក់ ក្នុងនោះស្រី ៨ នាក់ និងស្ត្រីជនជាតិភូមា ម្នាក់ផងដែរ ដោយពួកគេមានបំណងឆ្លងដែនទៅធ្វើការក្នុងកាស៊ីណូ អនឡាញ ក្នុងប្រទេសកម្ពុជា ដោយនៅទីនោះបានប្រាក់ខែខ្ពស់ ហើយការចំណាយលើការស្នាក់នៅ និងការហូបចុក ត្រូវក្រុមហ៊ុនជាអ្នកចាយទាំងអស់ លុះពួកគេមកដល់ក្បែព្រំដែន ក៏ត្រូវចាប់ខ្លួនតែម្តង។

បច្ចុប្បន្នក្រោយពេលឃាត់ខ្លួន និងក្រុមគ្រូពេទ្យបានពិនិត្យសុខភាពពួកគេទាំងអស់ ត្រូវបានបញ្ជូនទៅកាន់អធិការដ្ឋានតម្រួត ស្រុកគោកខ្យូង ដើម្បីអនុវត្តន៍តាមវិធានការច្បាប់៕

អត្ថបទ ៖ សោ និយមរ័ត្ន

The post ឃាត់ខ្លួនថៃ ១៥ នាក់ និងស្ត្រីភូមាម្នាក់ ប្រុងលបឆ្លងដែនចូលមកធ្វើការនៅកម្ពុជា appeared first on Kampuchea Thmey Daily.

ឃាត់ខ្លួនពលករខ្មែរ២០នាក់បម្រុងលួចឆ្លងដែនចូលប្រទេសថៃ

Sokhom Khon — Tue, 12 Oct 2021 06:37:42 +0000

ពលករខ្មែរប្រុសស្រីចំនួន២០នាក់ បម្រុងលួចឆ្លងដែនខុសច្បាប់ទៅរកការងារធ្វើនៅប្រទេសថៃត្រូវកម្លាំងចម្រុះឃាត់ខ្លួនបាននៅយប់ថ្ងៃទី១១ ខែតុលា ឆ្នាំ២០២១។

វរសេនីយ៍ទោ យូ សុគន្ធភក្តី មេបញ្ជាការវរសេនាតូចថ្មើរជើងលេខ៥១៣បានប្រាប់ឲ្យដឹងថា ការឃាត់ខ្លួនពលករនេះ បានលោកបានដឹកនាំកម្លាំងនៅជួរមុខតាមខ្សែរបន្ទាត់ព្រំដែនខ្មែរ-ថៃ នៅភូមិបន្ទាយពីរ ឃុំអូរ សំព័រ ស្រុកម៉ាឡៃ ក្នុងនោះលោកបានសហការជាមួយកម្លាំងតំបន់ប្រតិបត្តិការសឹករងបន្ទាយមានជ័យ កម្លាំងចម្រុះចេញល្បាតត្រួតពិនិត្យតាមបន្ទាត់ព្រំដែនក៏បានប្រទះឃើញពលករខ្មែរស្រី ប្រុសចំនួន២០នាក់ នៅត្រង់ចំណុចក្បាលទំនប់ ដែលបម្រុងលួចឆ្លងដែនចូលទៅប្រទេសថៃ ក៏ត្រូវកម្លាំងចម្រុះធ្វើការឃាត់ខ្លួន រួចសួរនាំ និងបានប្រគលទៅឲ្យកម្លាំងជំនាញដើម្បីអនុវត្តទៅតាមច្បាប់បន្ត។

លោកឧត្តមសេនីយ៍ត្រី សឹង្ហ ទុំ មេបញ្ជាការកងពលតូចថ្មើរជើងលេខ៥១ បានប្រាប់ឲ្យដឹងថា កម្លាំងចម្រុះធ្វើការល្បាតតាមបន្ទាត់ព្រំដែនកម្ពុជា-ថៃ ២៤ម៉ោងលើ២៤ម៉ោង ដោយប្តូរវេនគ្នាសហការជាមួយ កម្លាំងចម្រុះដើម្បីទប់ស្កាត់ពលករលួចឆ្លងដែនខុសច្បាប់ និងការឆ្លងរាលដាលនៃជំងឺកូវីដ-១៩ មិនឲ្យចូលទៅក្នុង សហគមន៍ និងតំបន់ផ្សេងទៀត ។

លោកបានបញ្ជាក់ឲ្យដឹងទៀតថា ដើម្បីចូលរួមចំណែកជាមួយរាជរដ្ឋាភិបាល ក្នុងការទប់ស្កាត់ការរីករាលដាលនៃជំងឺកូវីដ-១៩ កុំឲ្យឆ្លងចូលជាសហគមន៍កម្លាំងវរសេនាតូចថ្មើរជើងលេខ៥១១និង៥១៣និង៥១៤ តែងតែយកចិត្តទុកដាក់អនុវត្តតាមបទបញ្ជាថ្នាក់លើទាំង៣ទិសក្នុងខេត្តបន្ទាយមានជ័យ ចាប់ពីទិសអូរ នាងប៉ោយប៉ែត និងទិសម៉ាឡៃ សហការជាមួយកម្លាំងនៅតាមមូលដ្ឋានចេញល្បាតឆែកឆេរត្រួតពិនិត្យ ជាប្រចាំក្នុងការទប់ស្កាត់ពលករឆ្លងដែនខុសច្បាប់ ។

លោកបានបញ្ជាក់ឲ្យដឹងបន្តទៀតថា ចំណែកពលករទាំង២០នាក់នោះត្រូវបានកម្លាំងចម្រុះប្រគល់ទៅឲ្យក្រុមគ្រូពេទ្យយកទៅធ្វើតេស្តរហ័ស និងបន្តយកទៅចត្តាឡីស័ក នៅមណ្ឌលព្យាបាលដើម្បីឲ្យបានគ្រប់ចំនួនដែលក្រុមគ្រូពេទ្យដាក់ឲ្យអនុវត្តទើបអាចឲ្យវិញត្រឡប់ទៅផ្ទះវិញបាន៕

អត្ថបទ៖ វ៉ាន់ ណាង

The post ឃាត់ខ្លួនពលករខ្មែរ២០នាក់បម្រុងលួចឆ្លងដែនចូលប្រទេសថៃ appeared first on Kampuchea Thmey Daily.

ឃាត់ខ្លួនពលរដ្ឋ ៨នាក់ដែលបម្រុងឆ្លងដែនចូលទឹកដីថៃ តាមច្រកស្រុកសំពៅលូន

sopheak khoun — Sat, 02 Oct 2021 01:07:04 +0000

កម្លាំងអធិការដ្ឋាន នគរបាលស្រុកសំពៅលូន នៅល្ងាចថ្ងៃទី១ ខែតុលា ឆ្នាំ២០២១ បានសហការជាមួយកម្លាំង នគរបាលវរៈការពារព្រំដែនគោក ៨១៧ កម្លាំងផ្នែកសឹករងស្រុកសំពៅលូន និងកម្លាំងវរៈសេនាតូច ៥៣៣ ប្រចាំការតាមមាត់អូរព្រំដែនកម្ពុជា-ថៃ ធ្វើការទប់ស្កាត់ប្រជាពលរដ្ឋខ្មែរ បម្រុងឆ្លងដែនចូលទៅក្នុងប្រទេសថៃខុសច្បាប់ចំនួន១លើក។ ការឃាត់ខ្លួននេះ បានធ្វើឡើងនៅចំណុចដីថៃ ជាប់មាត់អូរព្រំដែន ជាប់ភូមិសាស្រ្តភូមិអូរ ឃុំសន្តិភាព ស្រុកសំពៅលូន ខេត្តបាត់ដំបង ប្រជាពលរដ្ឋចំនួន ៨នាក់។

ពលករទាំងអស់នោះ បានធ្វើសកម្មភាពទាក់ទងមេខ្យល់ មិនស្គាល់អត្តសញ្ញាណ តាមរយៈលេខទូរស័ព្ទដោយឲ្យថ្លៃជូនក្នុងតម្លៃម្នាក់ ៧.០០០បាត ឆ្លងដែនចូលទៅក្នុងប្រទេសថៃ តែក៏ត្រូវកម្លាំងសមត្ថកិច្ចសហការ ធ្វើការឃាត់ខ្លួនតែម្ដង។ ចំពោះអ្នកនាំផ្លូវចំនួន ២នាក់ ភេទប្រុស មិនស្គាល់អត្តសញ្ញាណ បានរត់គេចខ្លួនបាត់។

បច្ចុប្បន្នប្រជាពលរដ្ឋទាំង ៨នាក់ ត្រូវបានកម្លាំងសមត្ថកិច្ច បាននាំទៅកាន់កន្លែងអធិការដ្ឋាន នគរបាលស្រុកសំពៅលូន ធ្វើការសាកសួរ ដើម្បីស្រាវជ្រាវរកមេខ្យល់ និងដោយមានការអនុញ្ញាតពីលោក កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង បានសម្រេចឲ្យកម្លាំងសមត្ថកិច្ច ធ្វើការអប់រំចុះកិច្ចសន្យា និងបានឲ្យវិលត្រឡប់ទៅមូលដ្ឋានវិញហើយ៕

អត្ថបទ៖ សោ និយមរ័ត្ន

The post ឃាត់ខ្លួនពលរដ្ឋ ៨នាក់ដែលបម្រុងឆ្លងដែនចូលទឹកដីថៃ តាមច្រកស្រុកសំពៅលូន appeared first on Kampuchea Thmey Daily.

ពលករខ្មែរ ១៦នាក់ ចំណាយលុយឱ្យមេខ្យល់ ឆ្លងដែនខុសច្បាប់ ត្រូវទាហានថៃចាប់បាន

KC Virak — Tue, 07 Sep 2021 00:35:47 +0000

ខេត្តបាត់ដំបង៖ ពលករខ្មែរចំនួន ១៦ នាក់ ត្រូវបានក្រុមទាហានឈុតពិសេសរបស់ថៃចាប់ខ្លួន ខណ:ដែលពួកគេលបឆ្លងដែន ដោយបានចំណាយក្នុងម្នាក់ៗចាប់ពី ៤,៥០០ បាត ដល់ ៩,០០០ បាត ដើម្បីចូលទឹកដីថៃរកការងារធ្វើដោយខុសច្បាប់។

ការឃាត់ខ្លួននេះបានធ្វើឡើងត្រង់ចំណុចភ្នំកូនដំរី ក្នុងភូមិ១៤ ឃុំតាប្រាក់យ៉ា ស្រុកតាប្រាក់យ៉ា ខេត្តស្រះកែវ ប្រទេសថៃ កាលពីព្រឹកថ្ងៃទី០៦ ខែកញ្ញា ឆ្នាំ២០២១ វេលាម៉ោង ៩ ព្រឹក។

នៅមុនពេលឃាត់ខ្លួន គឺមានពលករខ្មែរចំនួន១៦ នាក់ បានលបឆ្លងព្រំដែនចូលទៅក្នុងទឹកដីថៃ ដោយបាននាំគ្នាដើរកាត់តាមចម្ការ ស្របពេលដែលកម្លាំងទាហានឈុតពិសេសថៃ សហការជាមួយកម្លាំងតម្រួតព្រំដែន កំពុងល្បាតក៏បានស្ទាក់ចាប់ ក្នុងនោះមានប្រុស ០៩នាក់ និង ស្រី ០៧នាក់។

ក្រោយការចាប់ ខ្លួនពលករខ្មែរបានសារភាពថា ពួកគេមកពីខេត្តបន្ទាយមានជ័យ ដោយបានប្រមូលផ្តុំគ្នានៅក្នុងឃុំល្មៀត ស្រុកថ្មពួក ដោយមានមេខ្យល់នាំផ្លូវ និងត្រូវចំណាយម្នាក់ៗ ចាប់ពី ៤,៥០០ បាត ទៅ ៩,០០០ បាត និងត្រូវដើរកាត់ចម្ការដើម្បីឡើងទៅលើផ្លូវជាតិលេខ ៣០៨៥ ត្រង់ចំណុច បានណាងង៉ាម ចំណែកលុយកាក់គឺបានប្រគល់ទៅឱ្យមេខ្យល់តាំងពីនៅដីខ្មែរម៉្លេះ ដែលក្នុងគោលដៅទៅធ្វើការនៅ ក្រុងបាងកក ០៨ នាក់ ខេត្តប៉ាធុំថានី ០៣ នាក់ ខេត្តសមុទ្រប្រាកាន ០១ នាក់ ខេត្តនគររាជសីមា ០៣ នាក់ និង ខេត្តរ៉ាក់យ៉ង ០១ នាក់។

ក្រោយពេលឃាត់ខ្លួន ក្រុមយោធាថៃបានត្រួតពិនិត្យសុខភាពពួកគេទាំងអស់ និងបានបញ្ជូនទៅឱ្យអធិការដ្ឋានតម្រួត ស្រុកតាប្រាក់យ៉ា ដើម្បីអនុវត្តតាមនីតិវិធី៕

អត្ថបទ៖ សោ និយមរ័ត្ន

The post ពលករខ្មែរ ១៦នាក់ ចំណាយលុយឱ្យមេខ្យល់ ឆ្លងដែនខុសច្បាប់ ត្រូវទាហានថៃចាប់បាន appeared first on Kampuchea Thmey Daily.

ពលករខ្មែរ លួចឆ្លងដែនចេញពីប្រទេសថៃ តែត្រូវសមត្ថកិច្ចឃាត់ខ្លួន

Sorn Phanith — Wed, 04 Aug 2021 07:28:55 +0000

ពលករខ្មែរចំនួន១០នាក់ ដែលក្នុងនោះមានក្មេងតូចៗផងនោះ ត្រូវបានកម្លាំងដែលឈរជើងតាមបន្ទាត់ព្រំដែន ឃាត់ដើម្បីបញ្ជូនទៅឲ្យភាគីថៃវិញ ខណៈដែលពួកគេបានលបឆ្លងដែនចេញពីទឹកដីថៃ ស្របពេលថៃកំពុងផ្ទុះកូវីដបម្លែងខ្លួនកំពុងវាយលុកខ្លាំង។

កាលពីល្ងាចថ្ងៃទី០៣ ខែសីហា ឆ្នាំ២០២១ ក្រុមការងារទំនាក់ទំនងព្រំដែនកម្ពុជាថៃ ច្រកទ្វារអន្តរជាតិភ្នំដី គីឡូ១៣ ដឹកនាំដោយ លោក វរសេនីយ៍ត្រី ប៊ុន វឌ្ឍនៈ បានដឹកនាំកម្លាំងចំនួន៥ នាក់ និងបានសហការណ៍ជាមួយវរសេនាតូច៥៣៣ ប៉ូលីសរៈ៨១៧ កម្លាំងអធិការស្រុកសំពៅលូន បានចុះអន្តរាគមន៍ ពលករលួចឆ្លងដែនចូលមក កម្ពុជាត្រូវកម្លាំងឈរជើង ចំណុចជំនោជាយដែន ព័ទ្ធចាប់បាននៅចំណុចបូរីជាយដែន ពេលនេះកំពុងស្ថិតក្នុងការគ្រប់គ្រងរបស់កងកម្លាំង ពលករទាំង៧នាក់មានទីលំនៅ ភូមិគីឡូ១៣ ដោយបានទាក់ទងទៅ លោក វរសេនីយ៍ត្រី សូ រ៉ាត់ មេបញ្ជាការកងរយ១៣០៥ ឲ្យមកទទួលពលករខ្មែរទៅទឹកដីថៃវិញ

ពលករចំនួន ៧នាក់ ប្រុស ៥នាក់-ស្រី ២នាក់

១.ឈ្មោះ ព្រឹម សូ ភេទប្រុស អាយុ២៦ឆ្នាំ

២,.ឈ្មោះ ឈួន ចាន់ ភេទប្រុស អាយុ ៣០ឆ្នាំ

៣.ឈ្មោះ ផន បុល ភេទប្រុស អាយុ១៥ឆ្នាំ

៤.ឈ្មោះ វ៉ាន់ សូរីយា ភេទប្រុស អាយុ ១៧ឆ្នាំ

៥.ឈ្មោះ វ៉ាន់ ឡេង ភេទស្រី អាយុ៣៤ឆ្នាំ

៦.ឈ្មោះ វ៉ាន់ លីន ភេទស្រី អាយុ៣១ឆ្នាំ

៧.ឈ្មោះ ឈុំ ចាន់ថន ភេទប្រុស អាយុ ៥ឆ្នាំ ។

ដោយឡែកនៅចំណុចភូមិសាស្ត្រ គីឡូ៩ កាលពីវេលាម៉ោង ០៤និង៣០ នាទីល្ងាច ក៏មានពលករបម្រុងលួចឆ្លងដែនមកកម្ពុជា ត្រូវបានកងកម្លាំង ឈរជើង កងវរសេនាតូចលេខ១ ប៉ូលិសវរ ៨១៧ កម្លាំងសឹករងស្រុកសំពៅលូន ហាមឃាត់មិនឲ្យចូលមកកម្ពុជា និងបានទាក់ទងទៅ លោក វរសេនីយ៍ត្រី សូ រ៉ាត់ មេបញ្ជាការកងរយ១៣០៥ ឲ្យមកទទួលពលករខ្មែរទៅទឹកដីថៃវិញដែរ ដោយពលករទាំងនោះមានចំនួន៣ នាក់

១. ឈ្មោះ បេន បុល អាយុ២៧ ភេទប្រុស នៅភូមិអូ ឃុំសន្តិភាព ស្រុកសំពៅលូន ខេត្តបាត់ដំបង

២. ឈ្មោះ ចាន់ សំអាន់ អាយុ៤០ ភេទប្រុស នៅភូមិចេក ឃុំពង្រលើ ស្រុកជីក្រែង ខេត្តសៀមរាម

៣. ហ៊ិន សុនិន ភេទស្រី អាយុ៣១ នៅភូមិអូ ឃុំសន្តិភាព ស្រុក សំពៅលូន ខេត្តបាត់ដំបង៕

អត្ថបទ៖ សោ និយមរ័ត្ន

The post ពលករខ្មែរ លួចឆ្លងដែនចេញពីប្រទេសថៃ តែត្រូវសមត្ថកិច្ចឃាត់ខ្លួន appeared first on Kampuchea Thmey Daily.