កុងស៊ុលកម្ពុជា ជួយសម្រួលដោះលែងពលរដ្ឋខ្មែរជាង ១០០នាក់ ចាញ់បោកមេខ្យល់ នាំចូលថៃ

ស្ថានអគ្គកុងស៊ុលកម្ពុជាប្រចាំខេត្តស្រះកែវ ប្រទេសថៃ បានអន្តរាគមន៍សហការជាមួយអាជ្ញាធរថៃ សម្របសម្រួលដោះលែងពលរដ្ឋខ្មែរចំនួន ១០៤នាក់ ក្នុងនោះប្រុស៦៥នាក់ ដែលត្រូវបានមេខ្យល់នាំចូលមកប្រទេសថៃដោយខុសច្បាប់ តាមច្រករបៀង ហើយត្រូវបានសមត្ថកិច្ចថៃឃាត់ខ្លួន កាលពីថ្ងៃទី១៨ ខែតុលា ឆ្នាំ២០២១។

លោក កុយ គួង អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានឱ្យដឹងនៅថ្ងៃទី១៩ ខែតុលានេះថា នៅពេលជួបជាមួយពលករខ្មែរទាំងនោះ ក្រុមការងារស្ថានអគ្គកុងស៊ុលបានធ្វើការអប់រំអំពីហានិភ័យ នៃការឆ្លងដែនខុសច្បាប់ និងហានិភ័យ នៃការរីករាលដាលជំងឺកូវីដ-១៩ និងបានសហការជាមួយអាជ្ញាធរថៃ និងអាជ្ញាធរកម្ពុជាបញ្ជូនពួកគាត់ទាំង១០៤នាក់ ត្រឡប់មកកម្ពុជាវិញនៅល្ងាចថ្ងៃដដែល។

គួររំលឹកដែរថា កាលពីថ្ងៃទី១៨ ខែតុលា ឆ្នាំ២០២១ ស្ថានអគ្គកុងស៊ុលកម្ពុជាប្រចាំខេត្តស្រះកែវ ក៏បានជួយពលករខ្មែរចំនួន ០៧នាក់ ក្នុងនោះមានស្រី០៤នាក់ និងកូនក្មេង០១នាក់ ឱ្យត្រឡប់ទៅកម្ពុជាវិញ បន្ទាប់ពីពួកគាត់ទាំងនោះបានធ្វើដំណើរមកពីបណ្តាខេត្តនានា នៅក្នុងទឹកដីប្រទេសថៃ៕

អត្ថបទ៖ កោះកែវ