ជម្លោះព្រំដែន Archives - Kampuchea Thmey Daily

ទាហានថៃលើកទង់ជាតិលើទឹកដីកម្ពុជា បំពានដែនអធិបតេយ្យ និងមិនគោរពវត្តមានគណៈប្រតិភូទូតបរទេស

Ung Meng — Fri, 27 Mar 2026 08:36:23 +0000

គណៈប្រតិភូតំណាងស្ថានទូត និងបេសកកម្មការទូតបរទេសប្រចាំនៅកម្ពុជា បានធ្វើការសង្កេតដោយផ្ទាល់នូវការដំឡើងកុងតឺន័រ និងបន្លាលួស នៅក្នុងឃុំថ្មដា ខេត្តពោធិ៍សាត់ ដែលអាជ្ញាធរបានចាត់ទុកថា ជាសកម្មភាពរបស់យោធាថៃបានរំលោភបំពានលើទឹកដីកម្ពុជា។

ក្នុងអំឡុងពេលនៃដំណើរទស្សនកិច្ចនេះផងដែរ គណៈប្រតិភូទូតបានឃើញទាហានថៃលើកទង់ជាតិថៃនៅលើទឹកដីកម្ពុជា ដែលត្រូវបានចាត់ទុកថា ជាសកម្មភាពមិនគោរពដល់អធិបតេយ្យភាព និងបូរណភាពទឹកដីរបស់កម្ពុជា។

The post ទាហានថៃលើកទង់ជាតិលើទឹកដីកម្ពុជា បំពានដែនអធិបតេយ្យ និងមិនគោរពវត្តមានគណៈប្រតិភូទូតបរទេស appeared first on Kampuchea Thmey Daily.

សម្តេច ហ៊ុន ម៉ាណែត៖ ទ័ពថៃកាន់កាប់ចូលជ្រៅក្នុងទឹកដីកម្ពុជា បញ្ហាព្រំដែននៅតែ«ផុយស្រួយ»

Rann Reuy — Wed, 18 Feb 2026 04:34:33 +0000

ក្នុងដំណើរទៅចូលរួមកិច្ចប្រជុំក្រុមប្រឹក្សាសន្តិភាព (Board of Peace) លើកដំបូងនៅទីក្រុងវ៉ាស៊ីនតោន សហរដ្ឋអាមេរិក សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រាប់ទីភ្នាក់ងារសារព័ត៌មានអន្តរជាតិ ថា កងទ័ពថៃនៅតែកាន់កាប់ចូលជ្រៅក្នុងទឹកដីកម្ពុជា លើសពីអ្វីដែលពួកគេធ្លាប់ទទួលស្គាល់ខ្សែរបន្ទាត់ព្រំដែនដែលមានជាយូរមកហើយ។

នៅក្នុងបទសម្ពាសន៍ផ្តាច់មុខ ( Inclusive Interview) ជាមួយសារព័ត៌មានរ៉យទ័រនៅថ្ងៃទី១៧ខែកុម្ភៈ សម្តេចបវរធិបតី ហ៊ុន ម៉ាណែត លើកឡើងថា កងកម្លាំងរបស់ប្រទេសថៃកំពុងកាន់កាប់ទឹកដីកម្ពុជា បើទោះបីជាមានកិច្ចព្រមព្រៀងសន្តិភាពដែលសម្របសម្រួលដោយប្រធានាធិបតីអាមេរិក ដូណាល់ ត្រាំ និង នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ដែលជាប្រធានអាស៊ាន។

ក្រោមកិច្ចខិតខំប្រឹងប្រែងរបស់ប្រធានអាស៊ាន និងរដ្ឋាភិបាលសហរដ្ឋអាមេរិក ក៏ដូចជា ការអន្តរាគមន៍ជាច្រើនលើក ពីរដ្ឋាភិបាលទីក្រុងប៉េកាំង ជម្លោះប្រដាប់អាវុធរវាងថៃនិងកម្ពុជាបានបញ្ជប់ក្រោមបទឈប់បាញ់ចំនួនពីរលើក និង កិច្ចព្រមព្រៀងសន្តិភាពដែលភាគីថៃនិងកម្ពុជាបានចុះហត្ថលេខាកាលថ្ងៃទី២៦ខែតុលាឆ្នាំ២០២៥ នៅទីក្រុងកូឡាឡាំពូ។

ប៉ុន្តែចាប់តាំងពីសង្គ្រាមផ្ទុះឡើងលើកទី២រយៈពេល២១ថ្ងៃ ពីថ្ងៃទី៧ដល់ថ្ងៃទី២៧ខែធ្នូឆ្នាំ២០២៥ ភាគីថៃបានប្រើប្រាស់មធ្យោបាយប្រយុទ្ធដ៏សាហាវបំផុតក្នុងនោះ មានការប្រើប្រាស់យន្តហោះចម្បាំង F-16 ជាដើម ទម្លាក់គ្រប់បែកធុនធ្ងន់លើប្រាសាទបុរាណប្រវត្ថិសាស្រ្ត ហេដ្ឋារចនាសម្ព័ន្ធស៊ីវិល ស្ពាន់ វត្តអារាម ដោយការឈ្លានពានចូលកាន់កាប់ទឹកដីកម្ពុជាជាច្រើនកន្លែងផ្ទុយពីការអំពាវនាវរបស់អន្តរជាតិ។

លោក ហ៊ុន ម៉ាណែត បានប្រាប់រ៉យទ័រនៅក្នុងបទសម្ភាសន៍លើកដំបូងរបស់លោកជាមួយប្រព័ន្ធផ្សព្វផ្សាយអន្តរជាតិថា «យើងនៅតែឃើញមានកងកម្លាំងថៃកាន់កាប់ចូលជ្រៅចូលទៅក្នុងទឹកដីកម្ពុជានៅក្នុងតំបន់ជាច្រើន។ ការកាន់កាប់របស់ថៃគឺហួសពីផែនទីសូម្បីកំណត់ដោយឯកតោភាគីរបស់ភាគីថៃ»។

ដោយបន្ថែមថា កងទ័ពថៃបានដាក់កុងតឺន័រ និងរាយលួសបន្លានៅខាងក្នុងអ្វី [ព្រំដែន]ដែលប្រទេសថៃបានទទួលស្គាល់ជាយូរមកហើយថាជាទឹកដីកម្ពុជា ហើយប្រជាជនមិនអាចត្រឡប់ទៅផ្ទះវិញបានទេ។

នៅក្នុងបទសម្ភាសន៍ចេញផ្សាយនៅថ្ងៃទី១៨ខែកុម្ភៈនេះ សម្តេច ហ៊ុន ម៉ាណែត បានអំពាវនាវឱ្យប្រទេសថៃអនុញ្ញាតឱ្យគណៈកម្មការព្រំដែនរួម (JBC) ចាប់ផ្តើមធ្វើការលើព្រំដែនដែលមានជម្លោះរបស់ពួកគេ។

នាយករដ្ឋមន្ត្រីកម្ពុជា សម្តេចបវរធិបតី ហ៊ុន ម៉ាណែត (កណ្តាល) ចាប់ដៃជាមួយនាយករដ្ឋមន្ត្រីថៃ លោក អានុទីន ឆានវីរៈគុល ក្នុងពិធីចុះហត្ថលេខាតលើកិច្ចព្រមព្រៀងសន្តិភាពកាលថ្ងៃទី២៦ខែតុលាឆ្នាំ២០២៥។

ភ្លាមៗក្រោយថ្ងៃចុះហត្ថលេខាលើបទឈប់បាញ់លើកទី២កាលថ្ងៃទី២៧ខែធ្នូឆ្នាំ២០២៥ គណៈកម្មការព្រំដែនរួម (JBC) ភាគីកម្ពុជា បានបញ្ជូនលិខិតស្នើបើកកិច្ចប្រជុំលើបញ្ហាបច្ចេកទេសកំណត់បង្គោលសីមា ប៉ុន្តែភាគីថៃបានយកលេសរដ្ឋាភិបាលរបស់ខ្លួនមិនទាន់រៀបរយ ក្នុងចេតនាពន្យាពេលនៃកិច្ចចរចារកដំណោះស្រាយ ប៉ុន្តែក្រុមយោធារបស់ពួកគេ បានធ្វើសកម្មភាពស្ថាបនាផ្លូវ ជីកប្រឡាយ សាងសង់សំណង់ផ្សេងៗនៅលើតំបន់ដែលពួកគេឈ្លានពាន។

តាមរ៉យទ័រ សម្តេច ហ៊ុន ម៉ាណែត បានធ្វើដំណើរទៅកាន់ទីក្រុងវ៉ាស៊ីនតោន ដើម្បីចូលរួមកិច្ចប្រជុំក្រុមប្រឹក្សាសន្តិភាពដែលដឹកនាំដោយប្រធានាធិបតី ដូណាល់ ត្រាំ ក្នុងសប្តាហ៍នេះ ដោយសង្ឃឹមថា ស្ថាប័នថ្មីនេះអាចដើរតួនាទីក្នុងការបន្ធូរបន្ថយស្ថានការណ៍នៅតាមព្រំដែននៃប្រទេសទាំងពីរ ដោយសម្តេច ពណ៌នាថា ស្ថានការណ៍នៅព្រំដែននៅតែ«ផុយស្រួយ»នៅឡើយ៕

រ៉ាន់ រើយ

The post សម្តេច ហ៊ុន ម៉ាណែត៖ ទ័ពថៃកាន់កាប់ចូលជ្រៅក្នុងទឹកដីកម្ពុជា បញ្ហាព្រំដែននៅតែ«ផុយស្រួយ» appeared first on Kampuchea Thmey Daily.

កាសែត Straits Times៖ លោក អានុទីន ញុះសង្គ្រាមជាតិនិយមដើម្បីជួយលោកបន្តអំណាច

Rann Reuy — Fri, 06 Feb 2026 03:02:52 +0000

សារព័ត៌មានដ៏ល្បីល្បាញរបស់ប្រទេសសិង្ហបុរី The Straits Times បានផ្សាយអំពីការបញ្ឆេះជម្លោះព្រំដែនដ៏គ្រោះថ្នាក់ជាមួយកម្ពុជា ដើមម្បីជូនលោកទទួលបានការគ្រប់គ្រងអំណាចនៅក្នុងការបោះឆ្នោតរបស់ប្រទេសថៃនៅចុងសប្តាហ៍នេះ។

លោក អានុទីន ពេលចុះឃោសនារកការគាំទ្រ។ Khaosod

លោក អានុទីន ឆានវីរៈគុល នាយករដ្ឋមន្ត្រីថៃដែលឡើងកាន់អំណាចដោយមានលក្ខខណ្ឌសម្រាប់រយៈពេល៤ខែចាប់ពីខែដើមខែតុលា២០២៥ ដល់ដំណាចខែមករា២០២៦ បានប្រកាសរំលាយសភាមុនកាលកំណត់កាលពីថ្ងៃទី១២ខែធ្នូឆ្នាំ២០២៥ នៅក្នុងពេលដែលសង្គ្រាមជាមួយកម្ពុជាកំពុងតែផ្ទុះឡើងយ៉ាងខ្លាំង និង ក្រោមសម្ពាធពីអន្តរជាតិឲ្យលោក បញ្ជប់សង្គ្រាម និងវិលទៅអនុវត្តកិច្ចព្រមព្រៀងសន្តិភាព។

ក្នុងអត្ថបទរបស់សារព័ត៌មាន The Straits Tines ដែលដាក់ចំណងជើងថា ល្បែងរបស់លោកអានុទីននាយករដ្ឋមន្ត្រីថៃ លើជាតិនិយមដើម្បីសាកល្បងនៅជិតការបោះឆ្នោត។ ការបោះឆ្នោតប្រទេសថៃ ដើមឡើយ ដោយផ្អែកតាមកិច្ចព្រមព្រៀងជាមួយគណបក្សប្រជាជនថៃ នឹងត្រូវរៀបចំនៅចុងខែមិនា ឬក៏ដើមខែមេសា ប៉ុន្តែលោក អានុទីន បានប្រើប្រាស់យុទ្ធសាស្រ្តបង្កសង្គ្រាម បង្កើនស្មារតីជាតិនិយមរបស់ជនជាតិថៃសម្រាប់គាំទ្រលោក ឲ្យបន្តកាន់អំណាច។

សំណេរដើមរបស់អត្ថបទនោះ បានលើកឡើងថា នៅពេលដែលនាយករដ្ឋមន្ត្រីថៃ លោក អានុទីន ឆានវីរៈគុល បានរំលាយសភានៅថ្ងៃទី១២ ខែធ្នូ លោកបានធ្វើដូច្នេះដោយសង្ឃឹមថា ការកើនឡើងនៃជាតិនិយមដែលជំរុញដោយការប្រយុទ្ធគ្នាដ៏មរណៈនៅព្រំដែនជាមួយកម្ពុជានៅឆ្នាំ២០២៥ នឹងជួយលោកឱ្យពង្រឹងអំណាចនៅក្នុងការបោះឆ្នោតសកល។

ក៏ប៉ុន្តែ ការស្ទង់មតិជាច្រើនបានបង្ហាញឲ្យឃើញថា គណបក្សគូប្រជែងរបស់គណបក្សភូមិចៃថៃដឹកនាំដោយលោកអានុទីន ឆានវីរៈគុល ទៅវិញទេ ដែលកំពុងដឹកមុខ។ រហូតមកដល់ពេលចុងក្រោយនេះ មានតែគណបក្ស៤ ប៉ុន្តែដែលមានការប្រកួតប្រជែងគ្នាខ្ពស់ ហើយគណបក្សប្រជាជនថៃដែលដឹកនាំដោយក្រុមយុវជនដែលដាក់គោលដៅកំណែទម្រង់ដ៏សំខាន់នៅក្នុងប្រទេសថៃជាពិសេសលើអំណាចយោធាថៃ និងរបបរាជានិយមថៃ គឺជាគណបក្សដែលមានប្រជាប្រិយខ្ពស់បំផុតសម្រាប់ការបោះឆ្នោតនៅថ្ងៃអាទិត្យទី៨ខែកុម្ភៈនេះ៕

រ៉ាន់ រើយ

The post កាសែត Straits Times៖ លោក អានុទីន ញុះសង្គ្រាមជាតិនិយមដើម្បីជួយលោកបន្តអំណាច appeared first on Kampuchea Thmey Daily.

ទស្សនៈវិភាគ «ខុសពីប្រជាជនថៃ ប្រជាជនកម្ពុជាផ្តល់តម្លៃខ្ពស់ដល់តួនាទីអ្នកសម្របសម្រួលឱ្យមានសន្តិភាពរវាងប្រទេសទាំងពីរ»

កម្ពុជាថ្មី — Sun, 23 Nov 2025 15:01:04 +0000

នៅចុងសប្តាហ៍នេះ ប្រជាពលរដ្ឋថៃមួយចំនួនបាននាំគ្នាចុះផ្លូវធ្វើបាតុកម្មដោយប្រមូលផ្តុំគ្នានៅពីមុខស្ថានទូតម៉ាឡេស៊ី និងសហរដ្ឋអាម៉េរិក ក្នុងទីក្រុងបាងកកដើម្បីប្រឆាំងជាមួយលោក អាន់វ៉ា អ៊ីប្រាហ៊ីម នាយករដ្ឋមន្ត្រីម៉ាឡេស៊ី និងលោក ដូណាល់ ត្រាំ ប្រធានាធិបតីសហរដ្ឋអាម៉េរិក។ ពួកគេបានចោទប្រទេសម៉ាឡេស៊ី ដែលជាប្រធានប្តូរវេនអាស៊ាន ក្នុងឆ្នាំ២០២៥ ជាពិសេសគឺចោទត្រង់ទៅលោកអាន់វ៉ា អ៊ីប្រាហ៊ីម និងលោក ដូណាល់ ត្រាំ ថា បានលូកដៃចូលកិច្ចការផ្ទៃក្នុងប្រទេសថៃ និងថា មានភាពលម្អៀងទៅរកប្រទេសកម្ពុជា។ ចំពោះមុខទង្វើរបស់ប្រជាជនថៃបែបនេះ ពិភពលោកកំពុងបើកភ្នែកធំៗ ដោយក្តីងឿងឆ្ងល់ថា ហេតុអ្វីបានជាប្រជាជនថៃធ្វើសកម្មភាពបែបនេះ ខណៈដែលគេបានដឹងជាទូទៅថា ម៉ាឡេស៊ី និងសហរដ្ឋអាម៉េរិក បានដើរតួនាទីយ៉ាងសំខាន់ ក្នុងការសម្របសម្រួលឱ្យមានបទឈប់បាញ់រវាងកម្ពុជា និងថៃដើម្បីរក្សាសន្តិភាព រវាងប្រទេសទាំងពីរ ក៏ដូចជាថែរក្សាសន្តិភាព និងសន្តិសុខក្នុងតំបន់អាស៊ានទាំងមូល។

សូមរម្លឹកថា បន្ទាប់ពីប្រយុទ្ធគ្នាអស់រយៈពេល ៥ថ្ងៃ កិច្ចព្រមព្រៀងឈប់បាញ់រវាងកម្ពុជា និងថៃត្រូវបានឯកភាព ដោយនាយករដ្ឋមន្ត្រី នៃប្រទេសទាំងពីរកាលពីថ្ងៃទី២៨ ខែកក្កដា ឆ្នាំ ២០២៥ ក្នុងកិច្ចប្រជុំពិសេសនៅទីក្រុងពុត្រាចាយ៉ា ប្រទេសម៉ាឡេស៊ី ក្រោមគំនិតផ្តួចផ្តើមរបស់លោកប្រធានាធិបតី ដូណាល់ ត្រាំ និងដោយមានការសម្របសសម្រួលពីលោក អាន់វ៉ា អ៊ីប្រាហ៊ីម ដោយមានការចូលរួមយ៉ាងសកម្មពីសំណាក់ប្រទេសចិន។ ក្រោយមក សេចក្តីថ្លែងការណ៍រួមស្តីពីសន្តិភាពក៏ត្រូវបានចុះហត្ថលេខា ដោយនាយករដ្ឋមន្ត្រីកម្ពុជា និងថៃនៅថ្ងៃទី២៦ ខែតុលាឆ្នាំ ២០២៥ នៅទីក្រុងកូឡាឡំពួរ ដោយមានវត្តមានជាសាក្សីដោយលោកដូណាល់ ត្រាំ និងលោក អាន់វ៉ា អ៊ីប្រាហ៊ីម។ ប៉ុន្តែទាំងកិច្ចព្រមព្រៀងឈប់បាញ់ ទាំងសេចក្តីថ្លែងការណ៍រួមស្តីពីសន្តិភាព ដែលមេដឹកនាំពិភពលោកអបអរសាទរយ៉ាងខ្លាំងនោះបែរជាថ្នាក់ដឹកនាំថៃមួយចំនួន និងប្រជាពលរដ្ឋថៃ ពិសេសក្រុមជ្រុលនិយមមិនសប្បាយចិត្តជាមួយសមិទ្ធផលដ៏ធំធេង និងមានតម្លៃនេះឡើយ។ ពួកគេ មិនត្រឹមតែមិនផ្តល់តម្លៃ និងមិនគោរពតាមស្មារតីនៃបទឈប់បាញ់ និងសេចក្តីថ្លែងការណ៍រួមស្តីពីសន្តិភាពប៉ុណ្ណោះទេ ប៉ុន្តែបែរជាខឹងសម្បារជាមួយអ្នកជួយជ្រោមជ្រែងឱ្យមានសន្តិភាពទៅវិញ។ ដោយឡែកថ្នាក់ដឹកនាំ និងប្រជាជនកម្ពុជា ពិតជាបាននិងកំពុងផ្តល់តម្លៃយ៉ាងខ្លាំងដល់បទឈប់បាញ់ និងសេចក្តីថ្លែងការណ៍រួមស្តីពីសន្តិភាព ដែលសម្រេចបាន និងបានផ្តល់តម្លៃយ៉ាងខ្លាំងដល់តួនាទីអ្នកសម្របសម្រួលឱ្យសម្រេចបានសមិទ្ធផលដ៏ធំធេងជាប្រវត្តិសាស្ត្រនេះ ជាពិសេសតួនាទីដ៏សំខាន់របស់លោកប្រធានាធិបតី ដូណាល់ ត្រាំ និងលោកនាយករដ្ឋមន្ត្រី អាន់វ៉ា អ៊ីប្រាហ៊ីម ក្នុងនាមប្រធានប្តូរវេនអាស៊ានឆ្នាំ២០២៥។ ប្រតិកម្មខុសគ្នារវាងថ្នាក់ដឹកនាំនិងប្រជាជនកម្ពុជា និងថ្នាក់ដឹកនាំនិងប្រជាជនថៃចំពោះបញ្ហាសន្តិភាព និងតួនាទីអ្នកសម្របសម្រួលឱ្យមានសន្តិភាព មិនពិបាកយល់ឡើយ។

ដោយគ្រាន់តែពិនិត្យមើលកត្តាសត្យានុម័តមួយចំនួនដូចខាងក្រោម យើងពិតជាអាចយល់បាន៖ ទី១៖ អ្នកដែលស្រឡាញ់សន្តិភាពតែងតែធ្វើអ្វីគ្រប់យ៉ាងដើម្បីរក្សាសន្តិភាព និងលះបង់គ្រប់យ៉ាងដើម្បីបញ្ចៀសសង្គ្រាម។ ផ្ទុយទៅវិញ អ្នកដែលស្រឡាញ់សង្គ្រាមតែងតែរកវិធីដើម្បីបញ្ឆេះសង្គ្រាម និងធ្វើយ៉ាងណាឱ្យសន្តិភាពបាត់បង់ដើម្បីមានលេសក្នុងការធ្វើសង្គ្រាម។ ទី២៖ ជនរងគ្រោះដែលទទួលរងការរំលោភបំពានតែងតែស្វះស្វែងរកភាគីទី៣ ដើម្បីជួយរកយុត្តិធម៌ ខណៈដែលអ្នកបំពានគេតែងបដិសេធការលូកដៃពីអ្នកខាងក្រៅ។ ទី៣៖ មនុស្សស្មោះត្រង់តែងបង្ហាញតម្លាភាពគ្រប់សកម្មភាពដែលខ្លួនបានធ្វើ និងត្រូវការសាក្សីដើម្បីបញ្ជាក់ការពិត ប៉ុន្តែមនុស្ស ដែលមានពុតត្បុត មិនចូលចិត្តធ្វើសកម្មភាពនៅចំពោះមុខសាក្សីឡើយ ពីព្រោះ ពួកគេពិបាកបន្លំ។ ចំណុចទាំងបីខាងលើអាចឆ្លុះបញ្ចាំងបានអំពីឥរិយាបថរបស់ប្រជាជនថៃ និងប្រជាជនកម្ពុជា ចំពោះសន្តិភាព និងតួនាទីរបស់អ្នកសម្របសម្រួលដើម្បីសន្តិភាព ក៏ដូចជាតួនាទីរបស់សាក្សីនៅក្នុងដំណើរការអនុវត្តបទឈប់បាញ់ ក៏ដូចជាដំណើរការអនុវត្តសេចក្តីថ្លែងការណ៍រួមស្តីពីសន្តិភាព។ ថ្នាក់ដឹកនាំ និងប្រជាជនកម្ពុជាមានជំហរច្បាស់លាស់ចំពោះសន្តិភាព និងតែងតែគោរពនិងអនុវត្តយ៉ាងខ្ជាប់ខ្ជួននូវរាល់ខ្លឹមសារដែលបានព្រមព្រៀងគ្នា។ លើសពីនេះ កម្ពុជាតែងតែគាំទ្រ និងផ្តល់តម្លៃយ៉ាងខ្លាំងដល់តួនាទីរបស់ ភាគីទី៣ ដែលបានចូលរួមចំណែកបង្កើតឱ្យមានសន្តិភាពរវាងកម្ពុជា និងថៃ។ ផ្ទុយទៅវិញ អ្វីដែលប្រជាជនថៃបាន និងកំពុងប្រឆាំងជាមួយអ្នកផ្តួចផ្តើម និងជួយជ្រោមជ្រែងឱ្យមានសន្តិភាពមានន័យថា ពួកគេមិនត្រូវការសន្តិភាព មិនត្រូវការភាគីទី៣ និងមិនត្រូវការសាក្សី។ តើបំណងរបស់ពួកគេគឺជាអ្វី? គ្រប់គ្នាប្រាកដជាអាចយល់បាន៕

ដោយ វង្ស មករា សាស្ត្រាចារ្យ និងអ្នកវិភាគសង្គមនិងនយោបាយ

The post ទស្សនៈវិភាគ «ខុសពីប្រជាជនថៃ ប្រជាជនកម្ពុជាផ្តល់តម្លៃខ្ពស់ដល់តួនាទីអ្នកសម្របសម្រួលឱ្យមានសន្តិភាពរវាងប្រទេសទាំងពីរ» appeared first on Kampuchea Thmey Daily.

[វិចារណកថា] ក្រសែភ្នែកពលរដ្ឋកម្ពុជារងគ្រោះ កំពុងបាញ់ឆ្ពោះការធ្វើសមយុទ្ធកងទ័ពអាកាសថៃ និងចិន

Rann Reuy — Fri, 19 Sep 2025 02:53:14 +0000

ប្រជាជនកម្ពុជាដែលរងគ្រោះពីទង្វើឈ្លានពានរបស់យោធាថៃ ជាពិសេសកងទ័ពអាកាសថៃ ដែលប្រើប្រាស់យន្តហោះចម្បាំងទំនើបៗ ដូចជា F-16 និង Gripen បេះដូង និងស្មារតីរបស់ពួកគេហាក់បានញាប់ញ័រជាថ្មី នៅពេលដឹងថា កងទ័ពអាកាសនៃកងទ័ពរំដោះប្រជាជនចិន (PLAAF) និងកងទ័ពអាកាសថៃ (RTAF) បានធ្វើសមយុទ្ធយោធារួមគ្នាដែលកើតឡើងមិនដល់២ខែនៃការឈ្លានពានរបស់កងទ័ពថៃមកលើប្រទេសកម្ពុជា។

មេទ័ពអាកាសថៃទទួលយោធាចិននៅមុនសមយុទ្ធយោធាឆ្នាំ២០២៥។ Thaipress

ការធ្វើសមយុទ្ធរូមគ្នានេះត្រូវបានប្រកាសឲ្យដឹងនៅថ្ងៃទី១៥កញ្ញា និងចាប់ផ្តើមធ្វើពីថ្ងៃទី១៨ដល់ថ្ងៃទី២៥ខែកញ្ញា ដែលធ្វើឲ្យប្រជាជនកម្ពុជាតក់ស្លុតជាថ្មី និងបានប្រតិកម្មបង្ហាញការមិនពេញចិត្តចំពោះការសម្រេចចិត្តរបស់រដ្ឋាភិបាលចិន ក្នុងការបន្តកិច្ចសហប្រតិបត្តិការយោធាជាមួយកងទ័ពថៃដែលឈ្លានពានកម្ពុជាដ៏សាហាវបំផុតកាលពីពេលថ្មីៗនេះ ខណៈដែលចិនអះអាងពីការគាំទ្រកម្ពុជា និងជាមិត្តដែកថែបរបស់កម្ពុជាផងនោះ។

លំហាត់សមយុទ្ធយោធាអាកាសរួមគ្នា ដែលឲ្យឈ្មោះថា «Falcon Strike 2025» ដែលជាសមយុទ្ធប្រចាំឆ្នាំរបស់ទ័ពអាកាសថៃនិងចិន ធ្លាប់ធ្វើចាប់តាំងពីរឆ្នាំ២០១៥ ពោលគឺក្រោមការដឹកនាំរបស់អតីតនាយករដ្ឋមន្ត្រី ប្រាយុធ ចាន់អូចា ក្រោយពីទម្លាក់រដ្ឋាភិបាលរបស់លោកស្រី យីងឡាក់ ស៊ីណាវ៉ាត្រកាលឆ្នាំ២០១៤។

សមយុទ្ធដែលឥឡូវនេះបានឈានដល់លើកទី៨ទៅហើយ និងក៏ធ្វើឡើង៤ឆ្នាំជាប់ៗគ្នាលើដីថៃ ត្រូវបានរៀបចំរួមគ្នារវាងកងទ័ពអាកាសនៃកងទ័ពរំដោះប្រជាជនចិន (PLAAF) និងកងទ័ពអាកាសថៃ (RTAF) នៅក្នុងខេត្ត ឧដនថានី (Udon Thani) ស្ថិតនៅភាគនីរតីនៃប្រទេសថៃ ជិតព្រំដែននៃប្រទេសឡាវ។

អ្វីដែលធ្វើ់ឲ្យសមយុទ្ធយោធាអាកាសនៃប្រទេសទាំងពីរនៅឆ្នាំនេះហាក់មិនបានប្រព្រឹត្តទៅក្រោមបរិយាកាសដែលគួរឲ្យស្ញប់ស្ញែងដូចកាលពី៧លើកកន្លងទៅនោះ ក៏ព្រោះថា វាត្រូវបានរៀបចំឡើងក្រោមសម្រែកដ៏ឈឺចាប់នៃប្រជាជនកម្ពុជាដែលទើបរងគ្រោះដោយសារតែទង្វើឈ្លានពានរបស់កងទ័ពថៃ ដែលប្រើប្រាស់មធ្យោបាយវាយប្រហារដ៏សន្ធប់មកលើប្រទេសកម្ពុជា។

ការប៉ះទង្គិចដោយប្រដាប់អាវុធចន្លោះថ្ងៃទី២៤ដល់ថ្ងៃទី២៨ខែកក្កដាឆ្នាំ២០២៥ ដែលកងទ័ពអាកាសថៃបានប្រើប្រាស់យន្តហោះចម្បាំងសេរីទំនើប គឺ F-16 ផលិតនៅសហរដ្ឋអាមេរិក និងប្រភេទយន្តហោះចម្បាំង Gripen C/D ផលិតនៅប្រទេសស៊ុយអែត បានធ្វើឲ្យប្រជាជនកម្ពុជាឈឺចាប់ពីទង្វើឈ្លានពាន និងស្រេកឃ្លានទឹកដីរបស់ថៃ។

សម្រែកនៃការឈឺចាប់របស់ប្រជាជនកម្ពុជាបានឮយ៉ាងច្បាស់ដល់ប្រទេសមហាអំណាច ដោយសារតែកម្ពុជាទទួចចង់បានបទឈប់បាញ់ និងងាកទៅរកការចរចាសន្តិភាពដែលបានប្រព្រឹត្តទៅនៅប្រទេសម៉ាឡេស៊ីកាលថ្ងៃទី២៨ខែកក្កដាឆ្នាំ២០២៥ ក្រោមការអង្កេតការណ៍របស់មហាអំណាចសហរដ្ឋអាមេរិក និងមហាអំណាចចិន។

បទឈប់បាញ់ដែលសម្រេចបានមិនដល់២ខែផង ក្រោមវត្តមានសាក្សីម្នាក់របស់ឯកអគ្គរដ្ឋទូតចិនប្រចាំប្រទេសម៉ាឡេស៊ី លោក Ouyang Yujing ប្រជាជនកម្ពុជាបានទទួលដំណឹងដ៏រន្ធត់ និងតក់ស្លុតម្តងទៀត បន្ទាប់ពីដឹងថា កងទ័ពអាកាសចិននឹងធ្វើសមយុទ្ធរួមគ្នាជាមួយកងទ័ពអាកាសថៃដើម្បីពង្រឹងទំនាក់ទំនងលើបញ្ហាបច្ចេកទេសផង និង លើបញ្ហាល្បិចកលប្រយុទ្ធផង។

ការពង្រឹងវិស័យយោធាទ័ពអាកាសរវាងចិននិងថៃនាពេលនេះ គឺហាក់រំឭកប្រជាជនកម្ពុជាដែលទើបឈឺចាប់ដោយសារតែការវាយប្រហាររបស់កងទ័ពថៃមកលើកងទ័ពកម្ពុជា ដោយប្រើប្រាស់យន្តហោះចម្បាំងវាយប្រហារមកលើកងទ័ពកម្ពុជា ប្រាសាទព្រះវិហារដែលជាទីតាំងប្រវត្តិសាស្រ្តនិងសម្បត្តិមនុស្សជាតិ វត្តអារាម និងផ្ទះប្រជាជន។

នៅក្នុងសេចក្តីថ្លែងការណ៍ផ្លូវការមួយ ក្រសួងការពារជាតិនៃសាធារណៈរដ្ឋប្រជាមានិតចិនបានប្រកាសថា សមយុទ្ធនេះ «អំណោយផលដល់ការពង្រឹងសមត្ថភាពបច្ចេកទេស និងយុទ្ធសាស្ត្ររបស់កងទ័ពដែលចូលរួម និងការធ្វើឱ្យកាន់តែស៊ីជម្រៅនូវទំនុកចិត្ត និងកិច្ចសហប្រតិបត្តិការជាក់ស្តែងរវាងយោធាទាំងពីរ»។ យោងការផ្សាយរបស់ Defense Security Asia។

យន្តហោះចម្បាំងរបស់ចិនដែលនឹងត្រូវបញ្ជូនទៅចូលរួមសមយុទ្ធ រួមមានយន្តហោះចម្បាំង J-10C ចំនួន៦គ្រឿង យន្តហោះចម្បាំង J-11 ចំនួន២គ្រឿង និងយន្តហោះទម្លាក់គ្រាប់បែក JH-7 ចំនួន២គ្រឿង ខណៈដែលភាគីទ័ពអាកាសថៃ RTAF បញ្ជូនយន្តហោះចម្បាំងប្រភេទ Saab JAS 39 Gripen ចំនួន ៥គ្រឿង និងយន្តហោះវាយប្រហារធុនស្រាល Alpha Jet ចំនួន៤គ្រឿង។

សរុបមកប្រទេសចិនក្នុងនាមជាមិត្តភ័ក្រ្តល្អនិងជាមិត្តដែកថែបរបស់កម្ពុជាផងដែរ គួរណាស់តែពិចារណាឡើងវិញក្នុងការបន្ថយកិច្ចសហប្រតិបត្តិការលើវិស័យយោធាជាមួយប្រទេសថៃ ដើម្បីបង្ហាញដល់ប្រជាជនកម្ពុជាពីការគិតគួរ និងការព្យាបាលផ្លូវចិត្តដល់ប្រជាជនកម្ពុជា៕

The post [វិចារណកថា] ក្រសែភ្នែកពលរដ្ឋកម្ពុជារងគ្រោះ កំពុងបាញ់ឆ្ពោះការធ្វើសមយុទ្ធកងទ័ពអាកាសថៃ និងចិន appeared first on Kampuchea Thmey Daily.

បក្សភឿថៃនិងភូមិចៃថៃកំពុងប្រជែងកៅអីនាយករដ្ឋមន្ត្រីថៃ

Rann Reuy — Sat, 30 Aug 2025 08:29:21 +0000

ការប្រជែងតំណែងនាយករដ្ឋមន្ត្រីថៃទី៣២ បានកើតឡើងជាថ្មីក្នុងនយោបាយថៃ ខណៈពេលនេះ គណបក្សភឿថៃកំពុងជជែកជាគណបក្សប្រជាជន (People Party) ដែលកើតចេញពីអតីតគណបក្ស Move Forward ដែលត្រូវតុលាការធម្មនុញ្ញរំលាយកាលខែសីហាឆ្នាំ២០២៤ និងដាក់បម្រាមមិនឲ្យថ្នាក់ដឹកនាំគណបក្សធ្វើនយោបាយរយៈពេល១០ឆ្នាំ ដោយសារតែការប៉ងធ្វើវិសោធនកម្មរដ្ឋធម្មនុញ្ញបន្ថយអំណាចព្រះមហាក្សត្រ។

សារព័ត៌មាន Khaosod English ដោយការស្រង់សម្តីនាយករដ្ឋមន្ត្រីចាំផ្ទះ លោក Phumtham Wechayachai បានផ្សាយថា គណបក្សភឿថៃមានផែនការជជែកជាមួយគណបក្សប្រជាជនដើម្បីគាំទ្រដល់ការបង្កើនរដ្ឋាភិបាលថ្មីមួយ។

សេចក្តីរាយការណ៍នោះ ក៏បានរំលេចនូវលទ្ធភាពដែលលោកថាក់ស៊ីន ស៊ីណាវ៉ាត្រ ដែលត្រូវបានគេជឿថា ជាអ្នកកាច់ចង្កូតគណបក្សភឿថៃ មានផែនការជួបជជែកជាមួយ លោក Thanathorn Juangroongruangkit មេដឹកនាំគណបក្សប្រឆាំងនៅរសៀលថ្ងៃសៅរ៍ទី៣០ខែសីហានេះ។

ក្នុងករណីគណបក្សទាំងពីរនេះរូបរួមគ្នា គេនឹងមានអាសន្នសភាសរុបចំនួន ២៨៥ ពីគណបក្សភឿថៃចំនួន១៤២ នាក់ និងគណបក្សប្រជាជនចំនួន១៤៣។ ការរួមគ្នារបស់ពួកគេគ្រប់គ្រាន់ក្នុងបោះឆ្នោតគាំទ្រដល់បេក្ខភាពនាយករដ្ឋមន្ត្រីថ្មី។

ជាមួយគ្នានេះ តាមការចេញផ្សាយរបស់សារព័ត៌មាន The Nation គណបក្សភុមចៃថៃ ដឹកនាំដោយលោក អានុទីន ឆានវីរ៉ាកុល (Anutin Charnvirakul) ដែលបានអះអាងថា គណបក្សភូមិចៃថៃបានទទួលការគាំទ្រពីសមាជិកសភាចំនួន ២៧៩ នាក់ ដែលអាចមានចំនួនកូរ៉ុមគ្រប់គ្រាន់គាំទ្រ ធ្វើឱ្យលោក អានុទីន ឆានវីរ៉ាកុល ក្លាយជាបេក្ខជននាយករដ្ឋមន្ត្រីសម្រាប់ការដឹកនាំរដ្ឋាភិបាលថ្មី។

ដើម្បីក្លាយជានាយករដ្ឋមន្ត្រីថៃ បេក្ខជនត្រូវទទួលបានសំឡេងគាំទ្រលើសពីពាក់កណ្តាលសមាជិកសភា ស្មើនឹងជាង២៤៧សំឡេង ក្នុងចំណោមសមាជិកសភាតំណាងរាស្ត្រសរុប៤៩២នាក់។

ប្រទេសថៃបានធ្លាក់ចុះទៅក្នុងវិបត្តិនយោបាយបាត់បង់នាយករដ្ឋមន្ត្រី បន្ទាប់ពីតុលាការធម្មនុញ្ញថៃដែលមានសមាជិក៩រូប បានបោះឆ្នោតលើការសម្រេចបណ្តេញលោកស្រី ផែថងថាន ស៊ីណាវ៉ាត្រ ចេញពីតំណែង ដោយចោទប្រកាន់ពីការរំលោភក្រមរដ្ឋធម្មនុញ្ញ ដោយសារតែអតីតនាយករដ្ឋមន្ត្រីផែថងថាន បាននិយាយទូរស័ព្ទជាលក្ខណៈឯកជនជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និយាយពីបញ្ហាជាតិ និង បានទម្លាក់កំហុសទៅលើមេបញ្ជាការភូមិថៃលោក ប៊ុនស៊ីន ផាតក្លាង។

បច្ចុប្បន្ននេះមានបេក្ខភាព៥រូបដែលអាចក្លាយជានាយករដ្ឋមន្ត្រីថៃ រួមមាន លោក ឆៃកាសែម នីទីស៊ីរី (Chaikasem Nitisiri) ជាបេក្ខជនមកពីបក្សភឿថៃ។ ទី២ គឺ លោក អានុទីន ឆានវីរ៉ាកុល (Anutin Charnvirakul) នៃគណបក្សភូមិចៃថៃ។ បេក្ខជន ៣នាក់ទៀត មាន លោក ពីរ៉ាផាន់ សាលីរ៉ាថាវីបាហ្គា (Pirapan Salirathavibhaga) រដ្ឋមន្ត្រីក្រសួងថាមពលបច្ចុប្បន្ន ជាមេដឹកនាំបក្សជាតិថៃរួបរួម និង លោក ប្រាយុធ ចាន់អូចា (Prayuth Chan-ocha) មកពីគណបក្សថៃរួបរួមដូចគ្នា។ លោក ប្រាយុធ អតីតនាយករដ្ឋមន្ត្រីដែលបានដឹកនាំរដ្ឋប្រហារទម្លាក់រដ្ឋាភិបាលរបស់លោកស្រី យីងឡាក់ ស៊ីណាវ៉ាត់ កាលពីឆ្នាំ២០១៤ និងបច្ចុប្បន្នជាសមាជិកនៃក្រុមប្រឹក្សារាជបល្ល័ង្ករបស់ស្តេចថៃ។ បេក្ខជនចុងក្រោយគឺ លោក ជូរីន ឡាក់សាណាវីស៊ីត (Jurin Laksanawisit)ជាបេក្ខជនរបស់បក្សប្រជាធិបតេយ្យ។

រ៉ាន់ រើយ

The post បក្សភឿថៃនិងភូមិចៃថៃកំពុងប្រជែងកៅអីនាយករដ្ឋមន្ត្រីថៃ appeared first on Kampuchea Thmey Daily.

លោក មហាធៀរ៖ ថៃចេះតែនៅមិនសុខជាមួយអ្នកជិតខាង ព្រោះក្នុងចិត្តតែងគិតថាទឹកដីគេនៅជាប់ព្រំដែនជារបស់ខ្លួន

Rann Reuy — Wed, 27 Aug 2025 07:13:59 +0000

រដ្ឋបុរសរបស់ប្រទេសម៉ាឡេស៊ី លោកបណ្ឌិត មហាធៀរ មហាម៉ាត់ (Mahathir Mohamad) អតីតនាយករដ្ឋមន្ត្រីកាន់អំណាចយូរបំផុតរបស់ប្រទេសម៉ាឡេស៊ី បានលើកឡើងថា ប្រទេសថៃតែងតែយល់ថា ទឹកដីនៃប្រទេសជិតខាងនៅជាប់ព្រំដែនប្រទេសរបស់ខ្លួន ជាទឹកដីរបស់ថៃ ដែលនាំទៅដល់ការបង្កអរិភាពជាមួយប្រទេសជិតខាងជាបន្តបន្ទាប់។

រូបភាពបង្ហាញមុនចាក់ផ្សាយកម្មវិធីសម្ភាសន៍រវាងកញ្ញា Dana Lee និង លោក មហាធៀរ មហាម៉ាត់។ BC News

ការលើកឡើងរបស់លោក មហាធៀរ មហាម៉ាត់ បានរំលេចក្នុងកិច្ចសម្ភាសន៍មួយដែលត្រូវបានចាក់ផ្សាយតាមបណ្តាញសង្គម Buddhist Cambodia News (BC News) កាលថ្ងៃទី២៦ខែសីហាឆ្នាំ២០២៥ ដោយការរៀបចំបទសម្ភាសដោយកញ្ញា Dana Lee (Ms DANA LEE) ដែលជានិស្សិតកម្ពុជាសិក្សាថ្នាក់បរិញ្ញាប័ត្រជាន់ខ្ពស់ ដែលសិក្សាស្រាវជ្រាវពីសន្តិភាពនិងជម្លោះ ( Peace and Conflict) នៃសាកលវិទ្យាល័យជាតិអូស្រ្តាលី (Australian National University)។

នៅក្នុងកិច្ចសម្ភាសន៍ចំនួន៤០នាទីនោះ មានសំណួរ១ ដែល កញ្ញា Dana Lee បានចោទសួរថា «អ្នកជាអ្នកនយោបាយដ៏មានបទពិសោធន៍ច្រើន តាមការយល់ឃើញរបស់អ្នក តើអ្នកយល់ថា ប្រទេសមួយណាឈ្លានពានប្រទេសមួយណា?»

ជាការឆ្លើយតបចំពោះសំណួរនេះ លោកបណ្ឌិត មហាធៀរ មហាម៉ាត់ បានតបថា៖«ប្រទេសថៃជាប្រទេសចក្រពត្តិ (Imperial Nation)។ ប្រទេសថៃស្ថិតនៅចំណុចកណ្តាល។ ភាគខាងត្បូងនៃរដ្ឋរបស់ប្រទេសម៉ាឡេស៊ី ជាផ្នែកមួយនៃទឹកដីរបស់ប្រទេសថៃ។ នៅភាគខាងកើតជាប់ប្រទេសកម្ពុជានិងប្រទេសឡាវ ក៏ជាផ្នែកនៃទឹកដីរបស់ប្រទេសថៃ។ វាក៏មានរូបភាពដូចគ្នាជាមួយប្រទេសមីយ៉ាន់ម៉ាដែរ។ ដូចនេះប្រទេសថៃរីកចម្រើនឡើងជាមួយការចំណាយរបស់ប្រទេសជុំវិញខ្លួន ហើយ ប្រទេសនេះបានក្លាយជាប្រទេសដែលមានឥទ្ធិពលនៅក្នុងតំបន់អាស៊ាន។ ខ្ញុំមានន័យថា នៅក្នុងតំបន់ឥណ្ឌូចិននេះតែម្តង»។

លោកបានបន្តថា៖«ដោយសារមូលហេតុនោះហើយ មានជម្លោះមួយចំនួនជុំវិញបូរណៈភាពទឹកដី។ នៅក្នុងជម្លោះដ៏សំខាន់ទាំងនោះ គឹមានការអះអាងជាម្ចាស់នៃប្រាសាទ១ ដែលទាំងប្រទេសថៃនិងប្រទេសកម្ពុជាអះអាងជារបស់ពួកគេរៀងៗខ្លួន ហើយ រឿងបែបនេះមិនត្រូវបានដោះស្រាយទេ»។

កញ្ញា Dana Lee និង លោក មហាធៀរ មហាម៉ាត់។ BC News

នៅក្នុងកិច្ចសម្ភាសន៍ចំនួន៤០នាទីនោះ កញ្ញា Dana Lee បានសម្ភាសន៍យ៉ាងលម្អិតអំពីប្រវត្តិដឹកនាំរបស់ លោក មហាធៀរ ដែលបានដឹកនាំប្រទេសម៉ាឡេស៊ីអស់រយៈពេលជាង២ទសវត្សរ៍ និងបានកែប្រែប្រវត្តិប្រទេសម៉ាឡេស៊ីទៅរកការអភិវឌ្ឍសេដ្ឋកិច្ចក្នុងសម័យទំនើប និងបទពិសោធន៍នៃការសម្របសម្រួលប្រកបដោយភាពប៉ិនប្រសព្វក្រោមការដឹកនាំរបស់លោក។

ជាមួយគ្នានោះ កញ្ញា Dana Lee ក៏បានសាកសួរអំពីដំណោះស្រាយសមស្របដើម្បីបញ្ចប់ជម្លោះរវាងប្រទេសជិតខាង ដោយលោកជំរុញឲ្យនាំយកករណីជម្លោះទៅកាន់តុលាការយុត្តិធម៌អន្តរជាតិ (ICJ) ដូចជាករណីប្រទេសម៉ាឡេស៊ីធ្លាប់ធ្វើជាមួយប្រទេសសិង្ហបុរី ប្រទេសឥណ្ឌូណេស៊ី និង ប្រទេសហ្វីលីពីនជាដើម។

លោក មហាធៀរ មហាមាត់ ជាអ្នកនយោបាយដ៏មានបទពិសោធន៍និងស្នាដៃអភិវឌ្ឍន៍ជាតិយ៉ាងច្រើន និងត្រូវបានទទួលស្គាល់យ៉ាងទូលំទូលាយនៅក្នុងតំបន់និងក្នុងពិភពលោក។ ក្នុងឆ្នាំ១៩៧៦ លោក មហាធៀរ បានតែងតាំងធ្វើជា ឧបនាយករដ្ឋមន្ត្រីម៉ាឡេស៊ី។ រហូតដល់ឆ្នាំ១៩៨១ បន្ទាប់ពីលោក ហូសែន អន (Hussein Onn) ប្រកាសលាលែងពីដំណែង លោក មហាធៀរ ស្បថចូលកាន់ដំណែងជានាយករដ្ឋមន្ត្រីទីបួន របស់ប្រទេសម៉ាឡេស៊ី រហូតដល់ឆ្នាំ២០០៣ ដែលធ្វើឱ្យលោកក្លាយជាអ្នកកាន់តំណែងនេះយូរជាងគេនៅប្រទេស ម៉ាឡេស៊ី។ អាជីពនយោបាយរបស់លោក មហាធៀរ មានរយៈពេលជាង៧០ឆ្នាំ រាប់ចាប់តាំងពីលោកបានចូលរួមជាលើកដំបូងជាមួយ គណបក្ស UMNO ដែលបង្កើតថ្មីនៅឆ្នាំ១៩៤៦ ក្រោយមកទើបលោកបង្កើតគណបក្សផ្ទាល់ខ្លួន គឺគណបក្ស Parti Pribumi Bersatu Malaysia (គណបក្សជនជាតិភាគតិចម៉ាឡេស៊ី) ក្នុងឆ្នាំ២០១៦។

ក្នុងអំឡុងពេល លោកកាន់តំណែងជានាយករដ្ឋមន្ត្រីលើកទីមួយ លោកបានធ្វើឱ្យប្រទេស ម៉ាឡេស៊ី ទទួលនូវបទពិសោធន៍នៃការធ្វើទំនើបកម្ម និងកំណើនសេដ្ឋកិច្ចយ៉ាងឆាប់រហ័ស ហើយរដ្ឋាភិបាលរបស់លោកបានផ្ដួចផ្ដើមគម្រោងកសាងហេដ្ឋារចនាសម្ព័ន្ធសំខាន់ៗជាច្រើន។ លោកគឺជាឥស្សរជននយោបាយដ៏លេចធ្លោម្នាក់ ដែលបានឈ្នះការបោះឆ្នោតសកល ជាប់ៗគ្នាចំនួនប្រាំលើក និងយកឈ្នះលើគូប្រជែងជាបន្តបន្ទាប់ ក្នុងនាមជាមេដឹកនាំបក្ស UMNO។ ទោះជាយ៉ាងណាក៏ដោយការប្រមូលផ្ដុំអំណាចក្នុងរយៈពេលដ៏យូរ នៃការកាន់អំណាចរបស់លោក បានធ្វើឱ្យប្រព័ន្ធតុលាការបាត់បង់ឯករាជ្យ និងបង្កើតជាអំណាចបែបប្រពៃណីលេចឡើងក្នុងប្រទេសម៉ាឡេស៊ី៕

រ៉ាន់ រើយ

The post លោក មហាធៀរ៖ ថៃចេះតែនៅមិនសុខជាមួយអ្នកជិតខាង ព្រោះក្នុងចិត្តតែងគិតថាទឹកដីគេនៅជាប់ព្រំដែនជារបស់ខ្លួន appeared first on Kampuchea Thmey Daily.

ថៃបង្កហេតុនិងផ្ទុះអាវុធមុន ប៉ុន្តែរំអែរំអួយធ្វើដូចជនរងគ្រោះនៅមុខអន្តរជាតិ

Bun sopheap — Thu, 24 Jul 2025 10:45:45 +0000

អ្នកនាំពាក្យរដ្ឋាភិបាលថៃ លោក Jirayu Houngsub បានដើរតួធ្វើដូចខ្លួនជាជនរងគ្រោះក្នុងអំពើដែលយោធាថៃជាអ្នកបង្កហេតុ ដោយអំពាវនាវឱ្យសហគមន៍អន្តរជាតិថ្កោលទោសកម្ពុជា បន្ទាប់ពីការប៉ះទង្គិចគ្នារវាងកងកម្លាំងកម្ពុជានិងថៃ ដោយចោទកម្ពុជាថាបានវាយប្រហារលើជនលើជនស៊ីវិល។

អ្នកនាំពាក្យរដ្ឋាភិបាលថៃ លោក Jirayu Houngsub

សារព័ត៌មានThe Nation ផ្សាយថា លោក Jirayu បាននិយាយថា កងទ័ពភូមិន្ទថៃបានប្រាប់មជ្ឈមណ្ឌលព្រំដែនពិសេសមួយដោយចោទកម្ពុជាថា ទាហានកម្ពុជាបានបាញ់គ្រាប់រ៉ុក្កែត BM-21 និង RPG ជាច្រើនគ្រាប់ វាយប្រហារផ្ទះ និងមន្ទីរពេទ្យក្នុងទឹកដីថៃ ស្រុក Phanom Dong Rak ខេត្ត Surin បណ្ដាលឲ្យមានជនស៊ីវិលស្លាប់។

អ្នកនាំពាក្យរូបនេះ បានបញ្ជាក់បន្ថែមដោយចោទកងកម្លាំងកម្ពុជាថា បានបង្កការប៉ះទង្គិចគ្នា តាមរយៈការបញ្ជូនយន្តហោះគ្មានមនុស្សបើក ចូលទៅក្នុងដែនអាកាសថៃ និងចាប់ផ្តើមការវាយប្រហារតាំងពីព្រឹកព្រលឹមទៅលើថៃ ខណៈដែលការពិតថៃជាអ្នកចាប់ផ្ដើមមុនទាំងអស់សោះ។

ថៃបានយកលេសនេះធ្វើជាការចោទប្រកាន់កម្ពុជាទាំងគ្មានមូលដ្ឋាន ថា កំណត់គោលដៅដោយចេតនាលើហេដ្ឋារចនាសម្ព័ន្ធស៊ីវិល និងបានអំពាវនាវដល់សហគមន៍ពិភពលោកឱ្យថ្កោលទោសកម្ពុជាចំពោះការរំលោភលើបទដ្ឋានមនុស្សធម៌អន្តរជាតិ។ លើសពីនេះសារព័ត៌មានរបស់ថៃកំពុងសម្រុកផ្សាយពីភាពរងគ្រោះរបស់ខ្លួននិងដើរតួកំសត់ ក្រោយបើកការវាយប្រហារមកលើកម្ពុជាមុន។

សូមបញ្ជាក់ថា បើតាមអ្នកនាំពាក្យក្រសួងការពារជាតិកម្ពុជា ភាគីកម្ពុជាមិនបានបើកការបាញ់ប្រហារទៅលើភាគីថៃមុននោះទេ ហើយក្រសួងការពារជាតិកម្ពុជា ប្រកាសថ្កោលទោសយ៉ាងដាច់អហង្ការចំពោះទង្វើឈ្លានពានយោធាយ៉ាងកម្រោល សាហាវ ឃោរឃៅ របស់ថៃ មកលើអធិបតេយ្យ និងបូរណភាពទឹកដីកម្ពុជា។ កម្ពុជាអំពាវនាវឱ្យសមាជិកសហគមន៍អន្តរជាតិ ថ្កោលទោសដោយមិនស្ទាក់ស្ទើរ និងយ៉ាងម៉ឺងម៉ាត់ ចំពោះសកម្មភាពខុសច្បាប់របស់ថៃ ហើយត្រូវឱ្យភាគីថៃទទួលខុសត្រូវទាំងស្រុងចំពោះការរំលោភបំពានដ៏កម្រោលរបស់ថៃ។ កម្ពុជាអំពាវនាវឱ្យថៃបញ្ឈប់រាល់អរិភាពជាបន្ទាន់ ដកកម្លាំងទៅខាងព្រំដែនរបស់ខ្លួន និងជៀសវាងសកម្មភាពឈ្លានពានដែលអាចធ្វើឱ្យស្ថានការណ៍កាន់តែតានតឹង៕

ថៃដាក់ពង្រាយយន្តហោះ F-16 ដល់ទៅ ៦ គ្រឿងឯណោះ ក្នុងពេលឈ្លានពានកម្ពុជា។

ប្រជាជនកម្ពុជាជម្លៀសទៅកាន់កន្លែងសុវត្ថិភាពក្រោយថៃឈ្លានពានកម្ពុជា។

អត្ថបទ៖ ប៊ុន សុភាព

The post ថៃបង្កហេតុនិងផ្ទុះអាវុធមុន ប៉ុន្តែរំអែរំអួយធ្វើដូចជនរងគ្រោះនៅមុខអន្តរជាតិ appeared first on Kampuchea Thmey Daily.

ជម្លោះ​ព្រំដែន​ Archives - Kampuchea Thmey Daily

ទាហានថៃលើកទង់ជាតិលើទឹកដីកម្ពុជា បំពានដែនអធិបតេយ្យ និងមិនគោរពវត្តមានគណៈប្រតិភូទូតបរទេស

​កាសែត Straits Times៖ លោក អានុទីន ​ញុះ​សង្គ្រាម​​​ជាតិ​និយម​ដើម្បី​​​ជួយលោក​បន្តអំណាច​​

​បក្ស​​ភឿថៃ​និង​​ភូមិចៃ​ថៃ​​កំពុង​ប្រជែង​កៅអី​នាយករដ្ឋមន្ត្រីថៃ​

លោក មហាធៀរ៖ ថៃចេះតែនៅមិនសុខជាមួយអ្នកជិតខាង ព្រោះក្នុងចិត្តតែងគិតថាទឹកដីគេនៅជាប់ព្រំដែនជារបស់ខ្លួន

ថៃ​បង្កហេតុនិ​ងផ្ទុះ​អាវុធ​មុន ប៉ុន្តែរំអែរំអួយ​ធ្វើ​ដូច​​​ជនរងគ្រោះ​នៅ​មុខ​អន្តរជាតិ​

ជម្លោះព្រំដែន Archives - Kampuchea Thmey Daily

កាសែត Straits Times៖ លោក អានុទីន ញុះសង្គ្រាមជាតិនិយមដើម្បីជួយលោកបន្តអំណាច

បក្សភឿថៃនិងភូមិចៃថៃកំពុងប្រជែងកៅអីនាយករដ្ឋមន្ត្រីថៃ

ថៃបង្កហេតុនិងផ្ទុះអាវុធមុន ប៉ុន្តែរំអែរំអួយធ្វើដូចជនរងគ្រោះនៅមុខអន្តរជាតិ