ជីកសិកម្ម Archives - Kampuchea Thmey Daily

រោងចក្រផលិតជីធំៗក្នុងស្រុក រួមចំណែកកាត់បន្ថយជីនាំចូល ជួយសេដ្ឋកិច្ចជាតិរាប់លានដុល្លារក្នុងមួយឆ្នាំៗ

Dy Bunnara — Fri, 15 May 2026 03:34:13 +0000

ក្រៅពីជីនាំចូល កម្ពុជាក៏មានសមត្ថភាពផលិតជីក្នុងស្រុកសម្រាប់បម្រើលើវិស័យកសិកម្ម ដែលបានរួមចំណែកកាត់បន្ថយការខាតបង់សេដ្ឋកិច្ចជាតិរាប់លានដុល្លារក្នុងមួយឆ្នាំៗពីការនាំចូលជីពីបរទេស។

ខាងក្រោមនេះជារោងចក្រផលិតជីធំៗកំពុងដំណើរការខ្សែសង្វាក់ផលិតកម្មក្នុងប្រទេសកម្ពុជា ហើយមួយចំនួនទៀតកំពុងសាងសង់ជាបន្តបន្ទាប់។

ក្រុមហ៊ុន ហ៊ុយ យន់ អេហ្គ្រីខលឈ័រ

រោងចក្រផលិតជីក្នុងស្រុកមួយនេះ មានសមត្ថភាពផលិតជីធម្មជាតិបានប្រមាណ ១០០ តោន ក្នុងមួយថ្ងៃ ហើយថែមទាំងបានជួយសម្អាតបរិស្ថានសង្គម តាមរយៈការប្រមូលកាកសំណល់មកកែច្នៃឡើងវិញ។

រោងចក្រផលិតជីរបស់ក្រុមហ៊ុន ហ៊ុយ យន់ បានចាប់ផ្ដើមដំណើរការតាំងពីឆ្នាំ ២០១៣ មានទីតាំងស្ថិតនៅឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ។

ជីធម្មជាតិដែលក្រុមហ៊ុនផលិតមាន ៣ មុខសំខាន់ៗ ក្នុងនោះមាន ជីគ្រាប់ សម្រាប់ការងារស្រែចម្ការ ជីទឹកធម្មជាតិ និងជីកំបោរកសិកម្ម ដែលភាគច្រើនជីទាំងនេះផលិតចេញពីកាកសំណល់និងលាមកសត្វ ដែលក្រុមហ៊ុនប្រមូលចូលរោងចក្រ។

ក្រុមហ៊ុនជីធម្មជាតិជប៉ុនសញ្ញាផែនដី

អ្នកវិនិយោគកម្ពុជានិងជប៉ុន បានសហការគ្នាបង្កើតរោងចក្រផលិតជីធម្មជាតិ ដើម្បីផ្គត់ផ្គង់តម្រូវការក្នុងស្រុក និងនាំចេញទៅបរទេស។

ទស្សនៈវិស័យក្នុងដំណើរការរោងចក្រផលិតជីក្នុងស្រុកនេះ គឺដើម្បីចង់ជួយកែប្រែនិងស្ដារគុណភាពដីរបស់កសិករដែលបានខូចខាតដោយសារការប្រើប្រាស់ជីគីមី និងថ្នាំពុលខុសបច្ចេកទេស។ បន្ថែមពីនេះ ក្រុមហ៊ុនចង់ជំរុញឲ្យកសិករកាត់បន្ថយការប្រើប្រាស់ជីគីមីដែលចំណាយលុយច្រើន ហើយងាកមកប្រើជីធម្មជាតិវិញ។

ក្រុមហ៊ុនផលិតជី ផេនដា មែន

ក្រុមហ៊ុន ធាន ម៉ុង បានសម្ពោធដំណើរការអាជីវកម្ម ព្រមជាមួយនឹងរោងចក្រផលិតជីកសិកម្មក្នុងស្រុកម៉ាក ផេនដា មេន (Panda Man) កាលពីឆ្នាំ ២០២៤ ដែលមានទីតាំងរោងចក្រនៅក្នុងស្រុកឆ្លូង ខេត្តក្រចេះ។

រោងចក្រផលិតជីកសិកម្ម ផេនដា មេន មានសមត្ថភាពផលិតជី អិនប៉េកា រហូតដល់ទៅ ១៥ ម៉ឺនតោនក្នុងមួយឆ្នាំ និងជីទឹកចំនួន ៣ ម៉ឺនតោនក្នុងមួយឆ្នាំ។

ក្រុមហ៊ុន ធានម៉ុង ជាក្រុមហ៊ុនបច្ចេកវិទ្យាកសិកម្ម ដែលផ្ដួចផ្ដើមឡើងដោយស្ថាបនិកជាជនជាតិខ្មែរ និងចិនរួមគ្នា ដោយផ្ដោតលើការស្រាវជ្រាវ ការអភិវឌ្ឍ និងការផ្គត់ផ្គង់ជីគីមី និងជីទឹក សម្រាប់ផលិតកម្មកសិកម្មនៅកម្ពុជា។

ផលិតផលជី ផេនដា មេន របស់ក្រុមហ៊ុនមានដូចជា ជីអ៊ុយរ៉េ ដេអាប៉េ កាលី និងអិនប៉េកា (NPK) ជាដើម។

ក្រុមហ៊ុនផលិតជីកសិកម្មវីរៈ ប៊ុនថាំ

រោងចក្រផលិតជីរបស់ក្រុមហ៊ុន វីរៈ ប៊ុនថាំ សាងសង់នៅលើផ្ទៃដីទំហំប្រមាណ ១០ ហិកតា ស្ថិតនៅឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។

ដោយសាងកេរ្តិ៍ឈ្មោះដំបូងតាមរយៈអាជីវកម្មក្រុមហ៊ុនដឹកជញ្ជូនអ្នកដំណើរ ក្រុមហ៊ុនវីរៈ ប៊ុនថាំ បានវិវឌ្ឍចូលរួមអភិវឌ្ឍន៍លើវិស័យកសិកម្ម ដោយឈានទៅបើកដំណើរការរោងចក្រផលិតជីបន្ថែម។

រោងចក្រដែលមានស្ថាបនិកជាជនជាតិខ្មែរនេះ មានសមត្ថភាពផលិតជីបានប្រមាណ ២០០ តោនក្នុងមួយថ្ងៃ ដូចជាជីសរីរាង្គ ជីលាមកជន្លេន និងជីទឹក។

បើតាមប្រភពពីក្រុមហ៊ុន មុនបញ្ចេញលក់ចែកចាយជាផ្លូវការ ជីរបស់ក្រុមហ៊ុនខ្មែរនេះបានយកទៅសាកល្បងប្រើប្រាស់នៅលើដំណាំជាច្រើនប្រភេទដូចជាស្រូវ ស្វាយ ទុរេន ដោយទទួលបានលទ្ធផលល្អ មិនបង្កប៉ះពាល់ដល់គុណភាពដីនោះឡើយ។

ក្រៅពីរោងចក្រផលិតជីសរីរាង្គ ក្រុមហ៊ុនក៏គ្រោងសាងសង់រោងចក្រផលិតជីគីមីបន្ថែមទៀតនាពេលខាងមុខ។

ក្រុមហ៊ុន husk venture

ក្រុមហ៊ុន Husk Ventures ជាក្រុមហ៊ុនវិនិយោគពីបរទេសមានមូលដ្ឋានផលិតកម្មនៅខេត្តកំពង់ធំ។ ក្រៅពីផលិតជីកសិកម្មដើម្បីផ្គត់ផ្គង់តម្រូវការក្នុងស្រុក ក្រុមហ៊ុនក៏បាននាំចេញទៅប្រទេសមួយចំនួន ខណៈនៅឆ្នាំ ២០២៤ ក្រុមហ៊ុនបាននាំចេញជោគជ័យផលិតផលជីសរីរាង្គចំនួន ៣០០ តោន ទៅកាន់ប្រទេសវៀតណាម។

ក្រុមហ៊ុនបានដាក់ផែនការពង្រីកទីផ្សារក្នុងស្រុក និងក្រៅស្រុកបន្ថែមទៀត ហើយក្នុងឆ្នាំ២០២៥ ក្រុមហ៊ុនបានទិញឧបករណ៍ថ្មីក្នុងផែនការជំរុញការផលិតជីសរីរាង្គឱ្យបាន ១០ ០០០ តោន។

ក្រុមហ៊ុនបានប្រើប្រាស់បច្ចេកវិទ្យាជួយក្រុមហ៊ុនអាចលក់កាបោន ដែលកើតចេញពីការផលិតជីសរីរាង្គនៅលើទីផ្សារអន្តរជាតិបានទៀតផង។

ក្រុមហ៊ុនសុជាតិយ៉ាខ្មែរកសិកម្ម

នៅខេត្តកំពង់ស្ពឺ ក្រុមហ៊ុនសុជាតិយ៉ាខ្មែរកសិកម្ម បានបង្កើតខ្សែច្រវាក់ផលិតកម្មរោងចក្រផលិតជីសរីរាង្គដែលមានទីតាំងនៅភូមិព្រិចខ្ពស់ ឃុំយាអង្គ ស្រុកថ្ពង ខេត្តកំពង់ស្ពឺ នៅឆ្នាំ២០២៤។ បច្ចុប្បន្នក្រុមហ៊ុនផលិតជីធម្មជាតិពីរប្រភេទ គឺទី១ ប្រភេទជីម្សៅ និងទី២ ជាប្រភេទជីគ្រាប់។

ឆ្នាំ ២០២៥ ក្រុមហ៊ុនបានបំពាក់ខ្សែច្រវាក់ផលិតកម្មបន្ថែម ដើម្បីផលិតជីធម្មជាតិឱ្យកើនដល់ ២០០ ទៅ ៣០០ តោនក្នុងមួយថ្ងៃ សម្រាប់ចូលរួមអភិវឌ្ឍវិស័យកសិកម្ម និងចូលរួមលើកកម្ពស់ជីវភាពកសិករនៅតាមតំបន់ជនបទ។

ក្រុមហ៊ុនផលិតជីកសិកម្មឧកញ៉ា ម៉ុង ឫទ្ធី

ក្រៅពីរោងចក្រផលិតចំណីសត្វ អ្នកឧកញ៉ា ម៉ុង ឫទ្ធី បានចាប់ផ្តើមសាងសង់រោងចក្រផលិតជីធម្មជាតិទាញប្រភពពីលាមកជ្រូក មាន់ ទា ដែលមានទីតាំងនៅតំបន់អភិវឌ្ឍសែនជ័យ មានចម្ងាយផ្លូវធ្វើដំណើរប្រហែលមួយម៉ោងពីរាជធានីភ្នំពេញ។

ផ្តល់បទសម្ភាសន៍ដល់ក្រុមអ្នកសារព័ត៌មានក្នុងដំណើរទស្សនកិច្ចតំបន់អភិវឌ្ឍកសិឧស្សាហកម្មនៅស្រុកព្រៃនប់ ខេត្តព្រះសីហនុ អ្នកឧកញ៉ា ម៉ុង ឫទ្ធី បានបង្ហើបពីផែនការក្នុងការសាងសង់រោងចក្រផលិតជីធម្មជាតិ ខណៈដែលគ្រឿងចក្រនិងឧបករណ៍សម្រាប់ដំឡើងបានមកដល់អស់ហើយ។

បើតាមអ្នកឧកញ៉ា គម្រោងសាងសង់រោងចក្រផលិតជីធម្មជាតិបន្ថែមនេះ មានគោលបំណងទាញយកសំណល់ចេញពីការចិញ្ចឹមសត្វ និងផលិតផលផ្សេងៗទៅកែច្នៃផលិតជាជីធម្មជាតិសម្រាប់ប្រើប្រាស់ក្នុងកសិដ្ឋាន និងចែកចាយដល់កសិករប្រើប្រាស់លើផលដំណាំ។

បើតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ គិតត្រឹមបំណាច់ឆ្នាំ ២០២៥ រោងចក្រផលិតជីកសិកម្មក្នុងប្រទេសកម្ពុជាមានចំនួន ២៥ ក្រុមហ៊ុន ជាមួយសមត្ថភាពអាចផលិតបានចំនួន ១៨ ម៉ឺនតោនក្នុងមួយឆ្នាំ៕

The post រោងចក្រផលិតជីធំៗក្នុងស្រុក រួមចំណែកកាត់បន្ថយជីនាំចូល ជួយសេដ្ឋកិច្ចជាតិរាប់លានដុល្លារក្នុងមួយឆ្នាំៗ appeared first on Kampuchea Thmey Daily.

កម្ពុជាទទួលបានផលសេដ្ឋកិច្ចជាង ៩ ពាន់លានដុល្លារ ពីការនាំចូល ជី-ថ្នាំ កសិកម្ម

deth leng — Tue, 17 Mar 2026 07:30:08 +0000

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា កាលពីពេលថ្មីៗនេះ មានការចុះផ្សាយព័ត៌មានថា កម្ពុជាបាននាំចូលជីនិងថ្នាំកសិកម្មក្នុងទំហំទឹកប្រាក់ ៦៣៦ លានដុល្លារ ក្នុងឆ្នាំ២០២៥ ដែលបានធ្វើឱ្យសាធារណៈជនមួយចំនួនមានការភ្ញាក់ផ្អើលចំពោះតួលេខនេះ។

អ្នកនាំពាក្យក្រសួងកសិកម្ម អះអាងថា ផលសេដ្ឋកិច្ចទទួលបានពីការប្រើប្រាស់ធាតុចូលកសិកម្មទាំងនេះ បង្កើតជាតម្លៃសេដ្ឋកិច្ចរហូតដល់ជាង ៩,៧ ពាន់លានដុល្លារ (៩៧៧០) នៅក្នុងឆ្នាំ២០២៥ ដោយមិនត្រឹមតែបានធានាសន្តិសុខស្បៀងប៉ុណ្ណោះទេ តែថែមទាំងអនុញ្ញាតឱ្យកម្ពុជាទាញយកចំណូលពីការនាំចេញកសិផលរហូតដល់ទៅ ៥៦២៥ លានដុល្លារ ផងដែរ៕

The post កម្ពុជាទទួលបានផលសេដ្ឋកិច្ចជាង ៩ ពាន់លានដុល្លារ ពីការនាំចូល ជី-ថ្នាំ កសិកម្ម appeared first on Kampuchea Thmey Daily.

រោងចក្រផលិតកជីកសិកម្មរបស់វិនិយោគិនក្នុងស្រុកនឹងបើកសម្ពោធជាផ្លូវការនៅខែក្រោយ

May Kunmakara — Wed, 11 Jun 2025 06:45:48 +0000

អគ្គនាយកនៃក្រុមហ៊ុនដឹកជញ្ជូន វិរៈ ប៊ុនថាំ អេចប្រេស អ្នកឧកញ៉ា សួរ វីរៈ បានថ្លែងមកកាន់កម្ពុជាថ្មីថា ក្រុមហ៊ុនរបស់លោកបានធ្វើពិពិធកម្មនៃការវិនិយោគពីវិស័យទេសចរណ៍ និងដឹកជញ្ជូនអ្នកដំណើរមកកាន់វិស័យកសិកម្មលើការបង្កើតរោងចក្រផលិតជីធម្មជាតិ និងគីមី ដែលគ្រោងដាក់ឱ្យដំណើការនាខែកក្កដាខាងមុខនេះ ដើម្បីចាប់យកឱកាសនៃវិស័យកសិកម្មនៅកម្ពុជា។

រោងចក្រកែច្នៃ និងផលិតជីកសិកម្មរបស់អ្នកឧកញ៉ា សួង វីរៈ។

ការបោះទុនវិនិយោគលើរោងចក្រផលិត និងកែច្នៃជីក្នុងស្រុករបស់អ្នកឧកញ៉ា សួរ វីរៈ ក៏ជាការឆ្លើយបតទៅនឹងការលើកឡើងរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីថ្ងៃទី ០៣ ខែមិថុនា ឆ្នាំ ២០២៥ថា រាជរដ្ឋាភិបាលកម្ពុជា បន្តលើកទឹកចិត្តក្នុងការវិនិយោគផ្នែកឧស្សាហកម្មកែច្នៃ ផលិតផលកសិកម្ម និងជំរុញបង្កើតរោងចក្រជីកសិកម្មក្នុងស្រុក។

អ្នកឧកញ៉ា សួរ វីរៈ បានលើកឡើងថា បន្ទាប់ពេលចំណាយពេលលើការសាងសង់រោងចក្រផលិតជីដែលសាងសង់លើផ្ទៃដីទំហំ ១៥ ហិកតាក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ អស់ប៉ុន្មានខែមកនេះ ឥឡូវការសាងសង់រោងចក្រនឹងត្រូវបានបញ្ចប់នាពេលឆាប់ៗនេះ ដែលគ្រោងនឹងបើកសម្ពោធនាខែក្រោយ។

អ្នកឧកញ៉ាបានថ្លែងយ៉ាងដូច្នេះថា៖«ការសាងសង់រោងចក្រផលិតជីរបស់យើងជិតរួចរាល់ហើយ ដែលយើងគ្រោងនឹងធ្វើការសម្ពោធនៅខាងក្រោយនេះ។ សម្រាប់ប្រភេទជីដែលយើងផលិតមានដូចជាជីកំប៉ុស ជីអាចម៍ជន្លេន និងជីទឹក។ ជំហ៊ានបន្ទាប់យើងនឹងសាងសង់ជីគីមីបន្ថែមទៀត»។

«ទន្ទឹមនឹងការបើកសម្ពោធនោះ យើងអាចផលិតបានទាំងជីកំប៉ុស និងជីអាចម៍ជន្លេននោះគឺ២០០តោនក្នុង១ថ្ងៃ។ យើងក៏មានផែនការបង្កើនការផលិតរបស់យើងដើម្បីបំពេញទៅតាមតម្រូវការផងដែរនាពេលខាងមុខ»។ នេះបើយោងតាមការថ្លែងអះអាងរបស់អ្នកឧកញ៉ា។

លោក គង់ ច័ន្ធវាសនា រដ្ឋលេខាធិការនៃក្រសួងកសិកម្មបានលើកឡើងនៅក្នុងកម្មវិធីមួយក្នុងខេត្តកំពង់ធំ កាលពីចុងខែមេសា ឆ្នាំ២០២៥ថា ក្នុងឆ្នាំ២០២៤ កន្លងទៅនេះ រដ្ឋាភិបាលបានអនុញ្ញាតដល់ឯកជនមួយចំនួនអាចធ្វើការនាំចូលនូវជី ចំនួន៩៦ម៉ឺនតោន និងថ្នាំកសិកម្មជាង៧ម៉ឺនតោនដើម្បីយកមកផ្គត់ផ្គង់ដល់ប្រជាកសិករក្នុងស្រុក។ ជាមួយគ្នានេះដែរ គិតមដល់បច្ចុប្បន្ន កម្ពុជាមានក្រុមហ៊ុន និងសិប្បកម្មផលិត និងផ្គត់ផ្គង់ជីសកម្មចំនួន១៦ ដែលអាចផលិត និងចែកចាយប្រមាណ៥ម៉ឺនតោនក្នុង១ឆ្នាំ។

នៅក្នុងឆ្នាំ ២០២៤ កម្ពុជាទទួលបានចំណូលជាង ៥ ពាន់លានដុល្លារ (៥,៣) ពីការនាំចេញកសិផលប្រមាណ ១២ លានតោន ទៅកាន់ ៩៥ ប្រទេស កើនឡើងជាង ៣ លានតោន ធៀបនឹងឆ្នាំ ២០២៣។ នេះបើយោងតាមរបាយការណ៍របស់ក្រសួងកសិកម្ម៕

The post រោងចក្រផលិតកជីកសិកម្មរបស់វិនិយោគិនក្នុងស្រុកនឹងបើកសម្ពោធជាផ្លូវការនៅខែក្រោយ appeared first on Kampuchea Thmey Daily.

ម្ចាស់អាជីវកម្មជាង ១៥០កន្លែង ទទួលបានការអប់រំសមត្ថភាពវិជ្ជាជីវៈលក់ដុំ លក់រាយ ថ្នាំជីកសិកម្ម

deth leng — Wed, 07 May 2025 08:50:23 +0000

ម្ចាស់អាជីវកម្មចំនួន ១៥៩កន្លែង មកពី១៩ខេត្តទទួលបានការអប់រំសមត្ថភាពវិជ្ជាជីវៈលក់ដុំ លក់រាយ ថ្នាំជីកសិកម្ម ដើម្បីពង្រឹងការអប់រំសមត្ថភាពវិជ្ជាជីវៈ ក្នុងការការពារសុខភាពអ្នកប្រើប្រាស់ និងសុខភាពសាធារណៈ។

មន្ទីរកសិកម្មខេត្តកំពង់ធំនៅថ្ងៃទី៧ ខែឧសភា ឆ្នាំ២០២៥ បានសហការជាមួយអាជ្ញាធរខេត្តកំពង់ធំ រៀបចំបើកវគ្គបណ្ដុះបណ្ដាល អប់រំសមត្ថភាពវិជ្ជាជីវៈ ដល់អាជីវករលក់ដុំ លក់រាយ ថ្នាំកសិកម្ម និងជីកសិកម្ម រយៈពេល៣ថ្ងៃ ចាប់ពីថ្ងៃទី០៧-០៩ ខែឧសភា ឆ្នាំ២០២៥ នៅសាលប្រជុំសាលាខេត្តកំពង់ធំ។

លោក ព្រឹម រដ្ឋា អភិបាលរងខេត្តកំពង់ធំ លើកឡើងថា វិស័យកសិកម្ម មានតួនាទីសំខាន់ក្នុងការទ្រទ្រង់កំណើន សេដ្ឋកិច្ច ធានាសមធម៌ ធានាសន្តិសុខស្បៀង និងជំរុញការអភិវឌ្ឍសេដ្ឋកិច្ចជនបទ។

អាជីវកម្មលក់ ថ្នាំជីកសិកម្មរបស់បងប្អូនអាជីវករ គឺត្រូវធានាបាននូវផលិតផលដែលមិនធ្វើឲ្យប៉ះពាល់ដល់សុខភាព សាធារណៈទាំងអ្នកប្រើប្រាស់ និងអ្នកបរិភោព។

លោកបន្តថា អាជីវកម្មទាំងនេះ ក៏ជាផ្នែកនៃការបង្កើនទំនើបកម្មវិស័យកសិកម្ម តាមរយៈការបង្កើនផលិតភាពការធ្វើពិពិធភាវូបនីយកម្មកសិកម្ម និងពាណិជួបនីយកម្ម កសិកម្ម ដោយបានជំរុញការអនុវត្តវិធានការចាំបាច់ ការកសាងកែលម្អហេដ្ឋារចនាសម្ព័ន្ធ សេវាដែលបម្រើ ដល់ផលិតកម្មកសិកម្ម ការផ្តល់សេវាផ្សព្វផ្សាយបច្ចេកទេសកសិកម្មដល់កសិករ ការស្រាវ ជ្រាវបច្ចេកទេស កសិកម្មសំដៅបង្កើនទិន្នផលដំណាំ បន្សំការប្រែប្រួលអាកាសធាតុ ការគ្រប់គ្រង បង្កើនជីជាតិដី កសិកម្ម ការពង្រឹងសហគមន៍កសិកម្ម ព្រមទាំងការកសាងពង្រឹងសមត្ថភាពធនធានមនុស្ស និងស្ថាប័ន ដើម្បីជំរុញការអភិវឌ្ឍវិស័យកសិកម្មកាន់តែប្រសើរឡើង។

លោក ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ការបើកវគ្គអប់រំសមត្ថភាពវិជ្ជាជីវៈលក់ដុំ លក់រាយថ្នាំ ជីកសិកម្ម ដល់បុគ្គលិកក្រុមហ៊ុន សិស្ស និស្សិត អាជីវករ និងប្រជាពលរដ្ឋ ដែលបានឆ្លងវគ្គថ្មីៗពិតជាមានសារៈសំខាន់ណាស់ ក្នុងការចូលរួម ចំណែកលើកកម្ពស់ និងពង្រឹងសមត្ថភាពវិជ្ជាជីវៈដល់វិស័យកសិកម្ម ដើម្បីឱ្យទទួលបានចំណេះដឹង វិជ្ជាជីវៈពិតប្រាកដស្របតាមច្បាប់ស្តីពីការគ្រប់គ្រងថ្នាំកសិកម្ម និងជីកសិកម្ម។

អាជីវករក៏ដើរតួនាទីសំខាន់ ដែលជាអ្នកផ្គត់ផ្គង់ធាតុចូលកសិកម្ម ជាអ្នកផ្តល់ព័ត៌មាន បច្ចេកទេសពាក់ព័ន្ធ និងការប្រើប្រាស់ថ្នាំ ជីកសិកម្ម ដល់ប្រជាកសិករ ហើយក៏ត្រូវមានការសហការយ៉ាងល្អជាមួយសមត្ថកិច្ចកសិកម្ម ជាពិសេសគឺការិយាល័យនីតិកម្ម នៃមន្ទីរកសិកម្មផងដែរ៕

អត្ថបទ៖ ឈាង មករា

The post ម្ចាស់អាជីវកម្មជាង ១៥០កន្លែង ទទួលបានការអប់រំសមត្ថភាពវិជ្ជាជីវៈលក់ដុំ លក់រាយ ថ្នាំជីកសិកម្ម appeared first on Kampuchea Thmey Daily.

វៀតណាមរំពឹងពីកំណើនការនាំចេញជីកសិកម្ម ចំពេលតម្លៃកើនឡើង

Huon Dina — Tue, 25 Feb 2025 02:56:01 +0000

វៀតណាមរំពឹងពីការកើនឡើងនៃការនាំចេញជីកសិកម្មរបស់ខ្លួន ចំពេលដែលតម្រូវការស្ទុះងើបឡើងវិញ អមជាមួយនឹងកំណើនតម្លៃ។ នេះបើតាមការចុះផ្សាយរបស់កាសែត Viet Nam News នាថ្ងៃអង្គារនេះ។

ក្រុមហ៊ុនស្រាវជ្រាវទីផ្សារ AgroMonitor បាននិយាយថា ក្នុងខែកុម្ភៈ ការនាំចេញជីអ៊ុយរ៉េរំពឹងថានឹងកើនដល់ប្រមាណ ៧០ ០០០ តោន ខណៈក្រុមហ៊ុនផលិតជីក្នុងស្រុក កំពុងផ្តោតលើការបំពេញកិច្ចសន្យានាំចេញដែលចុះហត្ថលេខា មុនបុណ្យចូលឆ្នាំចិន-វៀតណាម។

AgroMonitor បន្តថា ទីផ្សារជីអ៊ុយរ៉េសកលនឹងបន្តកើនឡើងជាមួយនឹងការជួញដូរយ៉ាងសកម្មនៅក្នុងទីផ្សារសំខាន់ៗ។ តម្រូវការកំពុងកើនឡើងនៅទូទាំងទ្វីបអាមេរិក អឺរ៉ុប និងអាហ្រ្វិក ខណៈការផ្គត់ផ្គង់មានកម្រិតនៃជីអ៊ុយរ៉េ កំពុងជំរុញកំណើនតម្លៃបន្ថែមទៀត។

នាពេលបច្ចុប្បន្ននេះ តម្លៃជីអ៊ុយរ៉េជាសកលកំពុងកើនឡើង ដែលជំរុញដោយការកើនឡើងតម្រូវការនៅឥណ្ឌា ក្នុងតម្លៃចន្លោះពី ៤២២-៤២៧ ដុល្លារ/តោន។

បើតាមសមាគមជីអន្តរជាតិ (IFA) តម្រូវការជីអ៊ុយរ៉េពិភពលោកប្រចាំឆ្នាំ ត្រូវបានព្យាករថានឹងកើនឡើង ៦ ភាគរយ ចន្លោះឆ្នាំ ២០២៤ និងឆ្នាំ ២០២៨ ខណៈការនាំចេញជីសកលនឹងងើបឡើងវិញ ជាពិសេសនៅក្នុងទីផ្សារប្រពៃណីដូចជាកម្ពុជា និងកូរ៉េខាងត្បូង។

បន្ថែមពីនេះ វៀតណាមក៏កំពុងពង្រីកទីផ្សាររបស់ខ្លួនទៅកាន់អឺរ៉ុប ដែលទាមទារស្តង់ដារគុណភាពផលិតផលខ្ពស់ផងដែរ។

The post វៀតណាមរំពឹងពីកំណើនការនាំចេញជីកសិកម្ម ចំពេលតម្លៃកើនឡើង appeared first on Kampuchea Thmey Daily.

ជីកសិកម្ម Archives - Kampuchea Thmey Daily

​កម្ពុជា​ទទួល​បាន​ផលសេដ្ឋកិច្ច​ជាង ៩ ​ពាន់លានដុល្លារ ​ពីការនាំចូល​ ជី-ថ្នាំ​ កសិកម្ម​

រោងចក្រផលិតកជីកសិកម្មរបស់វិនិយោគិនក្នុងស្រុកនឹងបើកសម្ពោធជាផ្លូវការនៅខែក្រោយ

ម្ចាស់អាជីវកម្មជាង ១៥០កន្លែង ទទួលបានការអប់រំសមត្ថភាពវិជ្ជាជីវៈលក់ដុំ លក់រាយ ថ្នាំជីកសិកម្ម

វៀតណាមរំពឹង​ពី​កំណើន​​​ការនាំចេញជីកសិកម្ម ចំពេលតម្លៃកើនឡើង

កម្ពុជាទទួលបានផលសេដ្ឋកិច្ចជាង ៩ ពាន់លានដុល្លារ ពីការនាំចូល ជី-ថ្នាំ កសិកម្ម

វៀតណាមរំពឹងពីកំណើនការនាំចេញជីកសិកម្ម ចំពេលតម្លៃកើនឡើង