មន្ត្រីជំនាញផ្នែបរិស្ថានខេត្តកែបបានបញ្ជាក់ថា កែបជាខេត្តសំបូរដើមក្ងោកដុះច្រើនជាងគេនៅទូទាំងប្រទេស តាមការប៉ាន់ស្មានប្រមាណជាង១០ម៉ឺនដើម។ ដើមក្ងោកហាក់បីដូចជារុក្ខជាតិបញ្ជាក់អត្តសញ្ញាណរបស់ខេត្តកែប ហើយទេសចរតែងតែមកពីគ្រប់ទិសទីដើម្បីទស្សនា និងថតរូបអនុស្សាវរីយ៍នៅរដូវក្ងោកផ្កានេះ។ មន្ត្រីជំនាញបានជំរុញឲ្យមន្ទីរ អង្គភាព ស្ថានប័នរដ្ឋ និងឯកជន ពិសេសពលរដ្ឋបន្តដាំដើមក្ងោកបន្ថែម។

លោក អិន សៅ ប្រធានមន្ទីរបរិស្ថានខេត្តកែបបានបន្ថែមឱ្យដឹងទៀតថា ខេត្តកែបដែលមានដើមក្ងោកច្រើនជាងគេនៅទូទាំងប្រទេស ទើបខេត្តកែបបានប្រែក្លាយជាទីក្រុងផ្កាក្ងោកដែលមានសម្រស់ឆើតឆាយ និងបានទាក់ទាញភ្ញៀវទេសចរណ៍ជាតិ និងភ្ញៀវទេសចរណ៍អន្តរជាតិជាច្រើនបានមកលេងកម្សាន្តទស្សានា នៅរដូវផ្កាក្ងោក នៅចន្លោះខែមីនា ដល់ ខែសីហា ហើយក្ងោករាប់រយដើមបានដាំបន្ថែមនៅតាមដងផ្លូវនានា ក្នុងរដូវវស្សាឆ្នាំនេះ។

លោកប្រធានមន្ទីរបរិស្ថានបានបន្តទៀតថា ចំពោះដើមឈើលម្អក្រៅពីបានដាំដើមក្ងោក រដ្ឋបាលខេត្តក៏បានដាំដើមដូចជា លឿងរាជ ភួងម៉ាឡៃ និងប្រភេទដើមផ្កាសាកុរ៉ាផងដែរ ដើម្បីធ្វើឲ្យមានផ្កាចម្រុះព័ណ៍នៅរដូវផ្ការីក។ លោកបានជំរុញលើកទឹកចិត្តដល់មន្ទីរអង្គភាព ស្ថាប័នរដ្ឋ និងឯកជន ប្រជាពលរដ្ឋនៅទូទាំងខេត្ត សូមចូលរួមដាំ និងអភិរក្សធនធានមានស្រាប ពិសេសព្រៃឈើតំបន់ឧទ្យានជាតិកែប។

គួររំលឹកថា ក្រសួងទេសចរណ៍បានដាក់ចេញនូវសៀវភៅផែនការមេអភិវឌ្ឍន៍វិស័យទេសចរណ៍ខេត្តកែប ២០២៣-២០៣៥ ក្នុងចក្ខុវិស័យប្រែក្លាយខេត្តកែបជា “គោលដៅទេសចរណ៍ធម្មជាតិ និងសមុទ្រសម្រាកកម្សាន្តបែបប្រណិតកម្រិតខ្ពស់ដោយប្រកាន់យកគោលការណ៍ នៃការអភិវឌ្ឍន៍ប្រកបដោយចីរភាព សុវត្ថិភាព គុណភាព ភាពប្រកួតប្រជែង និងទេសចរណ៍បែបឆ្លាតវៃ ។ ហើយសម្រាប់ឆមាសទី១ ឆ្នាំ២០២៤ ខេត្តកែបបានទាក់ទាញទេសចរណ៍ឲ្យមក​លេងលម្ហែកម្សាន្តប្រមាណជាង៨១ម៉ឺននាក់នៅឆ្នាំ២០២៤៕

អត្ថបទ៖ សឹង រ៉ាត់

The post មន្ទីរបរិស្ថានខេត្តកែបជំរុញឲ្យស្ថាប័នរដ្ឋ និងវិស័យឯកជនចូលរួមដាំដើមក្ងោកបន្ថែម ដើម្បីបង្កើនភាពទាក់ទាញអ្នកទេសចរណ៍ appeared first on Kampuchea Thmey Daily.

លោក នួន ចាន់ធារ៉ា ប្រធានសហភាពសហព័ន្ធយុវជនកម្ពុជាសង្កាត់អូរតាវ៉ៅ​ បានមានប្រសា​សន៍លើកឡើងថា ក្រោមការណែនាំពីលោកស្រី បាន ស្រីមុំ អភិបាលខេត្តប៉ៃលិន និងជាប្រធានសហភាពសហព័ន្ធយុវជនកម្ពុជាខេត្តបាន​ចាត់​ឲ្យលោកដឹកនាំក្រុមការងារយុវជន ស.ស.យ.ក សង្កាត់អូរតាវ៉ៅសហការជាមួយក្រុមការងាររដ្ឋបាលខេត្ត និងអាជ្ញាធរមូលដ្ឋបាល បន្តចុះដាំដើមឈើដែលជាប្រភេទដើមក្ងោក នៅតាមសងខាងផ្លូវជាតិលេខ៥៧ ត្រង់ចំណុចភូមិប៉ាងរលឹម សង្កាត់អូរតាវ៉ៅ គឺដើម្បីសោភណភាព នៃគម្របពណ៌បៃតង ព្រោះដើមក្ងោកនេះ វានឹងធ្វើឱ្យតាមដងផ្លូវជាតិចំណុចនេះ
មានសោភណភាពខៀវស្រស់បំព្រងក្នុងរដូវវស្សា និងភាគច្រើនៅរដូវប្រាំងតែងចេញផ្កាផ្តល់សោភណភាពក្នុងការទាក់ទាញភ្ញៀវជាតិ និងអន្តរជាតិ មកកម្សាន្តក្នុងខេត្តប៉ៃលិនកាន់តែច្រើន និងបានចូលរួមចំណែកលើកស្ទួយជីវភាពប្រជាពលរដ្ឋតាមរយៈការលក់ដូរជូនដល់ភ្ញៀវទេសចរផងដែរ។​

លោកប្រធាន ស.ស.យ.ក សង្កាត់អូរតាវ៉ៅ បានបន្តថា ដើមឈើមានសារៈសំខាន់ខ្លាំងណាស់សម្រាប់មនុស្សសត្វ និងផែនដី ក្នុងការទាក់ទាញនៅទឹកភ្លៀង កាត់បន្ថយកំដៅ និងជួយបន្សុទ្ធជាតិពុលបង្កើននូវខ្យល់បរិសុទ្ធ សម្រាប់មនុស្ស សត្វ នៅលើផែនដី ហើយចំពោះការដាំរយៈពេលកន្លងទៅ គឺយើងបានដាំចំនួន១៥០០ដើមរួចមកហើយដោយឡែកនៅពេលនេះ គឺយើងដាំដើមក្ងោកចំនួន១៣៥ដើមបន្ថែមទៀត។

ជាមួយគ្នានេះលោក នួន ចាន់ធារ៉ា ប្រធានសហភាពសហព័ន្ធយុវជនសង្កាត់អូរតាវ៉ៅ ក៏បានអំពាវនាវដល់ប្រជាពលរដ្ឋ
និងសាធារណជនចូលរួមថែរក្សា ការពារ និងអភិរក្សដើមក្ងោកឱ្យបានគង់វង្ស ព្រោះដើមក្ងោកដែលដាំនាពេលនេះ គឺជាសម្បត្តិរបស់យើងទាំងអស់គ្នា ដើម្បីសោភណភាព បរិស្ថានល្អសម្រាប់ខេត្ត ដងផ្លូវជាតិលេខ៥៧ ក្នុងសង្កាត់អូរតាវ៉ៅ ក្រុងប៉ៃលិនផងដែរ៕​

អត្ថបទ៖ សេង សុវណ្ណារិទ្ធ

The post ស ស យ ក សង្កាត់អូរតាវ៉ៅ សហការជាមួយអាជ្ញាធរដាំដើមក្ងោក១៣៥ដើមនៅសងខាងផ្លូវជាតិ​លេខ​៥៧​ appeared first on Kampuchea Thmey Daily.

​អាជ្ញាធរ​ខេត្តតាកែវ​បាន​ដាំដើមក្ងោក ពូជ​ផ្កា​លឿង ចំនួន៣០០​ដើមស្របតាម​ចិញ្ចើម​ផ្លូវជាតិ​២ ចាប់ពី​រង្វង់​មូល​អូរ​ចំបក់ ដល់​វិមានឯករាជ្យ ដើម្បី​លម្អ​សោភ័ណភាព​ទីក្រុង​ដូន​កែវ ដែលជា​បេះដូង​នៃ​ខេត្តតាកែវ ឱ្យ​កាន់​តែមានភាពស្រស់​បំព្រង​ថែមទៀត​។​

ការដាំ​ដើម​ក្ងោក​នេះ​ បានធ្វើ​ឡើង​នៅ​ព្រឹក​ថ្ងៃទី២៩ ខែកក្កដា ឆ្នាំ​២០២១​ ដោយមាន​ការចូលរួម​ពី​លោក អ៊ូច ភា អភិបាល នៃ​គណៈ​ខេត្តតាកែវ រួមជាមួយលោក ស៊ឹម ឡា​បុ័ង នាយក​ខណ្ឌ​រដ្ឋបាល​ព្រៃឈើ​តាកែវ និង​អាជ្ញាធរ​ក្រុង​ផងដែរ​។​

លោក អ៊ូច ភា បានឱ្យដឹងថា​ ការដាំ​កូនឈើ​ជា​ប្រភេទ​ដើម​ផ្កាក្ងោក​នៅអម​សងខាង​តាម​ដងផ្លូវ​នេះ គឺ​ដើម្បី​សោភណភាព​នៃ​គម្រប​ពណ៌​បៃតង ព្រោះ​ដើម​ក្ងោក​នេះ​វា​នឹងធ្វើឱ្យ​តំបន់​នេះ​មាន​សោ​ភណ្ឌ​ភាព​ខៀវ​ស្រស់បំព្រង​ក្នុង​រដូវវស្សា និង​ភាគច្រើន​នៅ​រដូវប្រាំងតែង​ចេញ​ផ្កា​ផ្តល់​សោភណភាព​ក្នុងការ​ទាក់ទាញ​ភ្ញៀវ​ជាតិ និង​អន្តរជាតិមក​កម្សាន្ត​ក្នុង​ខេត្ត​កាន់តែច្រើន និង​បាន​ចូលរួមចំណែក​លើកស្ទួយ​ជីវភាព​ប្រជាពលរដ្ឋ​យើង​តាម​ការលក់ដូរ​ជូន​ដល់​ភ្ញៀវ​ទេសចរ​ផងដែរ​៕​

អត្ថបទ ៖ សំអឿន​

The post ដាំ​ដើម​ក្ងោក​៣០០​ដើម​ លម្អ​សោភ័ណភាព​និង​លើក​សម្រស់​ទីក្រុង​ដូន​កែវ​ឱ្យ​កាន់តែ​ស្រស់បំព្រង appeared first on Kampuchea Thmey Daily.