ដំណាំកញ្ឆា Archives - Kampuchea Thmey Daily

អភិបាលខេត្តតាកែវ ឡើងភ្នំ ដក និងដុតបំផ្លាញដំណាំកញ្ឆាបានជាង ៣ពាន់ដើម នៅស្រុគិរីវង់

Ken Malis — Sun, 02 Feb 2025 06:45:16 +0000

ទីតាំងដាំដុះដំណាំកញ្ឆាចំនួន ៧កន្លែង ដែលមានដើមកញ្ឆាជាង ៣ពាន់ដើម ត្រូវបានប្រធានគណៈបញ្ជាការឯកភាពរដ្ឋបាលខេត្តតាកែវ ដឹកនាំកម្លាំងចម្រុះបង្ក្រាប និងដុតបំផ្លាញនៅព្រឹកថ្ងៃទី២ ខែកុម្ភៈ ឆ្នាំ២០២៥។ ការចុះបង្ក្រាបនេះ ធ្វើឡើងនៅចំណុចថ្មចង្រ្កាន ជួរភ្នំបាយ៉ង់កោរ ស្ថិតក្នុងភូមិព្រៃធំ ឃុំព្រះបាទជាន់ជុំ ស្រុកគិរីវង់ ខេត្តតាកែវ។

ប្រតិបត្តការបង្ក្រាបដំណាំកញ្ឆាដែលជាជំងឺរ៉ាំរ៉ៃនេះដឹកនាំផ្ទាល់ដោយ លោក វ៉ី សំណាង អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តតាកែវ រួមទាំងកម្លាំងស្នងការនគរបាល កម្លាំងកងរាជអាវុធហត្ថ កម្លាំងតំបន់ប្រតិបត្តិការសឹករងខេត្ត និងគណៈបញ្ជាការឯកភាពរដ្ឋបាលស្រុកគិរីវង់។

ជាលទ្ធផល បានកាប់ដុតបំផ្លាញដាំណាំកញ្ឆាខុសច្បាប់ បានចំនួន ៧ទីតាំង ដែលមានដើមកញ្ឆា ៣៣៦៥ដើម ស្មើនឹង ១៨៩០ម៉ែត្រការ៉េ និង ៦អាងទឹក ផងដែរ៕

អត្ថបទ៖ វីរៈ

The post អភិបាលខេត្តតាកែវ ឡើងភ្នំ ដក និងដុតបំផ្លាញដំណាំកញ្ឆាបានជាង ៣ពាន់ដើម នៅស្រុគិរីវង់ appeared first on Kampuchea Thmey Daily.

នាយករដ្ឋមន្រ្តីថៃ ចង់ផ្ដាច់ភាពស្របច្បាប់នៃកញ្ឆា ២ ឆ្នាំក្រោយដាក់វាឱ្យស្របច្បាប់

May Kunmakara — Thu, 09 May 2024 05:46:26 +0000

នាយករដ្ឋមន្ត្រីថៃ លោក ស្រេតថា ថាវីស៊ីន បានថ្លែងកាលពីថ្ងៃពុធថា លោកមានបំណងចង់ផ្ដាច់ភាពស្របច្បាប់នៃកញ្ឆា ដោយព្រួយបារម្ភពីកង្វះបទប្បញ្ញត្តិចរាចរណ៍ ដែលធ្វើឱ្យក្មេងៗអាចប្រើប្រាស់បាន និងឧក្រិដ្ឋកម្មកើនឡើង។ នេះបើតាមការរាយការណ៍របស់ទីភ្នាក់ងារសារព័ត៌មាន AP។

លោក ស្រេតថា បានសរសេរនៅលើបណ្ដាញសង្គម X (អតីតធ្វីតធឺរ) ថា លោកបានស្នើសុំទៅក្រសួងសុខាភិបាល ឱ្យធ្វើវិសោធនកម្មបញ្ជីថ្នាំញៀនរបស់ខ្លួន ដោយរួមបញ្ចូលកញ្ឆាសារជាថ្មី ហើយចេញច្បាប់ថ្មីដើម្បីអនុញ្ញាតឱ្យការប្រើប្រាស់កញ្ឆា ធ្វើឡើងតែក្នុងគោលបំណងវេជ្ជសាស្រ្តប៉ុណ្ណោះ។

ជាមួយគ្នានេះ នាយករដ្ឋមន្រ្តីថៃដដែល ក៏បានបញ្ជាឱ្យអាជ្ញាធរមូលដ្ឋាន បង្ក្រាបសកម្មភាពឧក្រិដ្ឋកម្ម ពាក់ព័ន្ធនឹងការជួញដូរគ្រឿងញៀនខុសច្បាប់ និងទាមទារឱ្យឃើញវឌ្ឍនភាពក្នុងរយៈពេល ៩០ ថ្ងៃ ផងដែរ។

គួរគូសបញ្ជាក់ថា ថៃបានដាក់កញ្ឆាឱ្យចរាចរណ៍ស្របតាមច្បាប់នៅឆ្នាំ ២០២២ ដែលធ្វើឱ្យថៃក្លាយជាប្រទេសនៅអាស៊ីទី១ ដែលបោះជំហានយ៉ាងដូច្នេះ។ ពីដំបូងៗឡើង វាត្រូវបានអនុញ្ញាតឱ្យប្រើសម្រាប់តែឱសថប៉ុណ្ណោះ ប៉ុន្តែជាក់ស្ដែង គ្មានការគ្រប់គ្រងត្រឹមត្រូវនៅលើទីផ្សារនោះទេ។ ការណ៍នេះជំរុញឱ្យមានប្រតិកម្មជាសាធារណៈ និងការព្រួយបារម្ភអំពីការប្រើប្រាស់ខុស និងឧក្រិដ្ឋកម្ម។

ទោះជាយ៉ាងណាក៏ដោយ អ្នកតស៊ូមតិ និងសហគ្រិនខាងកញ្ឆា បានប្រឆាំងនឹងការដាក់កញ្ឆាឱ្យនៅក្រៅច្បាប់ ដោយពួកគេអះអាងថា វានឹងធ្វើឱ្យខូចខាតដល់សេដ្ឋកិច្ច។ គេមើលឃើញថា ភាពស្របច្បាប់នៃកញ្ឆា បានជំរុញវិស័យទេសចរណ៍ និងកសិកម្មរបស់ប្រទេសថៃ ហើយបង្កើតបានការលក់រាយកញ្ឆារាប់ពាន់កន្លែង រាប់ចាប់ពីហាង ឡានដឹកទំនិញ រហូតដល់តូបផ្សារទូទាំងប្រទេស៕

The post នាយករដ្ឋមន្រ្តីថៃ ចង់ផ្ដាច់ភាពស្របច្បាប់នៃកញ្ឆា ២ ឆ្នាំក្រោយដាក់វាឱ្យស្របច្បាប់ appeared first on Kampuchea Thmey Daily.

អាវុធហត្ថខេត្តតាកែវ បង្ក្រាបដំណាំកញ្ឆាពីរទីតាំង នៅជួរភ្នំបាយ៉ង់កោ

Sokhom Khon — Fri, 24 Jun 2022 07:26:00 +0000

កម្លាំងកងរាជអាវុធហត្ថខេត្តតាកែវ ក្រោមការសម្របសម្រួលពីតុលាការ ចុះបង្ក្រាបសាជាថ្មីនូវទីតាំងដាំកញ្ឆាដុះស្លែរាប់ឆ្នាំមកហើយ នៅជួរភ្នំបាយ៉ង់កោ ស្រុកគិរីវង់ ខេត្តតាកែវ ។

ប្រតិបត្តិការនេះ ធ្វើឡើងរយៈពេញមួយថ្ងៃទី២៣ ខែមិថុនា ឆ្នាំ២០២២ ដោយមានការចូលរួមពីលោក ខាន់ សុខា អភិបាលរងខេត្តតាកែវ និងលោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្ត ក្រោមការសម្របសម្រួលនីតិវិធីដោយលោកព្រះរាជអាជ្ញារងអមសាលាដំបូងខេត្តតាកែវ ផងដែរ ។

លោកវរសេនីយ៍ឯក ង៉ែត ចាន់ធី មេបញ្ជាការរងកងរាជអាវុធហត្ថខេត្តតាកែវ ថ្លែងថា សមត្ថកិច្ចនឹងប្រឹងប្រែងបន្តស្រាវជ្រាវបន្ថែមទៀត ដើម្បីកំណត់មុខសញ្ញាជនល្មើសដែលលួចកាប់ទន្រ្ទាន់ដីព្រៃ ដើម្បីធ្វើការដាំដុះដំណាំកញ្ឆាខុសច្បាប់ នៅជួរភ្នំបាយ៉ង់កោឱ្យមានប្រសិទ្ធភាពខ្ពស់ ដើម្បីយកមកផ្ដន្ទាទោសទៅតាមច្បាប់ឱ្យខានតែបាន។

សមត្ថកិច្ចបន្តថា ក្នុងប្រតិបត្តិការនេះសមត្ថកិច្ចបង្រ្កាបបានដំណាំកញ្ឆាចំនួន២កន្លែង ទី១ នៅត្រង់ចំណុចខាងកាប់ថ្មជ្រោះទួងទូង ភូមិស្លា ឃុំតាអូរ ស្រុកគីរីវង់ ខេត្តតាកែវ ដោយកាប់បំផ្លាញកញ្ឆាស្រស់ចោលចំនួន ៥៣៦០ដើម ផ្ទៃដី ២៥៩ម៉ែត្រការេ ស្មើចំនួន ៦ទីតាំង និងអាងស្តុបទឹកចំនួន ៤កន្លែង ។ ទី២ នៅត្រង់ចំណុចភ្នំថ្មត្រួត ស្ថិតនៅភូមិឈើទាលភ្លោះ ឃុំព្រៃអំពក ស្រុកគីរីវង់ ខេត្តតាកែវ ដោយកាប់បំផ្លាញកញ្ឆាស្រស់ចោលចំនួន ២៩៨៩ដើម ស្មើ ៦ទីតាំង ផ្ទៃដី១១០០ ម៉ែត្រការេ និងអាងស្តុកទឹក ចំនួន ៣។ ក្រោយពីកាប់បំផ្លាញរួចកម្លាំងសមត្ថកិច្ចបានដុតបំផ្លាញចោលនៅនឹងកន្លែងទីតាំងនេះតែម្តង ។

ជុំវិញការចុះបង្រ្កាបដំណាំកញ្ឆាខុសច្បាប់នេះដែរ ប្រជាពលរដ្ឋខ្លះក៏បានសម្ដែងការងឿងឆ្ងល់ថា «ហេតុអ្វីបានជាក្រុមជនខិលខូចនោះ តែងតែលួចធ្វើការដាំដុះបានដោយសុវត្ថិភាពបែបនេះ ដោយកើតមានរាប់សិបឆ្នាំមកហើយ ដោយគ្មានសមត្ថកិច្ច ឬ អាជ្ញាធរ ចាប់បានអ្នកដាំដុះបានម្ដងណាឡើយ» ៕

អត្ថបទ៖ រ៉ាវុទ្ធ

The post អាវុធហត្ថខេត្តតាកែវ បង្ក្រាបដំណាំកញ្ឆាពីរទីតាំង នៅជួរភ្នំបាយ៉ង់កោ appeared first on Kampuchea Thmey Daily.

នគរបាលស្រុកភ្នំក្រវ៉ាញចុះកាប់បំផ្លាញចម្ការកញ្ឆាមួយកន្លែងដែលជនខិលខូចលួចដាំ

Sokhom Khon — Tue, 31 May 2022 08:19:10 +0000

កម្លាំងនគរបាលស្រុកភ្នំក្រវ៉ាញ ខេត្តពោធិ៍សាត់ បានចុះកាប់បំផ្លាញចម្ការដំណាំកញ្ឆាមួយកន្លែងដែលជនខិលខូចលួចដាំដោយខុសច្បាប់។

ប្រតិបត្តិការចុះកាប់បំផ្លាញនេះ បានធ្វើឡើងកាលពីថ្ងៃទី៣០ ខែឧសភា ឆ្នាំ២០២២ នៅចំណុចភូមិក្សេត្របូរី ឃុំសន្ទ្រែ ស្រុកភ្នំក្រវាញ ខេត្តពោធិ៍សាត់។

ក្នុងប្រតិបត្តិការបង្ក្រាបនេះ កម្លាំងនគរបាលបានកាប់កបំផ្លាញដើមកញ្ឆាចំនួន៥៥០ដើម ក្នុងទំហំដីទទឹង១០ម៉ែត្រ និងបណ្ដោយ១៤ម៉ែត្រ ដោយឡែកម្ចាស់ដំណាំកញ្ឆាខុសច្បាប់នេះ កម្លាំងសមត្ថកិច្ចកំពុងស្រាវជ្រាវចាប់ខ្លួនដើម្បីកសាងសំណុំរឿងចាត់ការតាមផ្លូវច្បាប់៕

អត្ថបទ ៖ សុខុម

The post នគរបាលស្រុកភ្នំក្រវ៉ាញចុះកាប់បំផ្លាញចម្ការកញ្ឆាមួយកន្លែងដែលជនខិលខូចលួចដាំ appeared first on Kampuchea Thmey Daily.

អធិការស្រុកគីរីវង់ ៖ ការដាំដំណាំកញ្ឆានៅស្រុកគីរីវង់ មានការថយចុះមិនដូចមុនទេ

Sokhom Khon — Thu, 06 Jan 2022 06:51:15 +0000

មួយរយៈចុងឆ្នាំ២០២១ និងដើមឆ្នាំ២០២២នេះ សមត្ថកិច្ចជំនាញហាក់បានធូរដៃធូរជើងក្នុងការរុករកដំណាំកញ្ឆាដែលជនខិលខូចលួចលាក់ដាំតាមជ្រលងដងភ្នំនៅភូមិសាស្ត្រស្រុកគីរីវង់ ដែលទាំងនេះអាចជាការស្បើយឈប់ដាំដំណាំកញ្ឆាពីសំណាក់ជនខិលខូចឬយ៉ាងណា។

ពលរដ្ឋជាច្រើនរស់នៅក្បែរជើងភ្នំស្រុកគីរីវង់បានបង្ហើបថា ដំណាំកញ្ឆាដែលដាំនៅតាមជើងភ្នំនិងខ្នងភ្នំមួយចំនួនក្នុងភូមិសាស្ត្រស្រុកនេះ គឺមិនងាយបង្ក្រាបអស់នោះទេ ព្រោះជាទីតាំងអំណោយផលល្អ ទាំងធម្មជាតិ ទាំងស្ថានភាពភូមិសាស្ត្រក៏ស្មុគស្មាញងាយស្រួលលាក់បាំងពីភ្នែកសមត្ថកិច្ច ពិសេសងាយស្រួលក្នុងការជួញដូរផងដែរ។ ដោយឡែកតាមការបង្ហើបពីពលរដ្ឋផងដែរ រឿងដាំដំណាំកញ្ឆានេះមិនមែនគ្រប់គ្នាសុទ្ធតែដាំបាននោះទេ គឺដាំបានតាមខ្សែក្រឡុះ មិនចឹងទេមិនបាច់ដល់កូនកញ្ឆាដោតដាំដល់ដី សូម្បីតែធ្វើរងរៀបចំដីដាំ គឺត្រូវសមត្ថកិច្ចបង្ក្រាបបាត់ទៅហើយ។

ជុំវិញដំណាំកញ្ឆានេះ លោក យុគ សារ៉ាត់ អធិការនគរបាល ស្រុកគីរីវង់បានឲ្យដឹងថា ដំណាំនេះនៅតែមានជនខិលខូចលួចដាំ តែការដាំដុះមានការថយចុះមិនដូចពីមុននោះទេ គឺនៅសេសសល់ប្រហែល៣០ភាគរយប៉ុណ្ណោះ ព្រោះអ្នកដាំគេដូរទីតាំងទៅដាំនៅខេត្តផ្សេងៗខ្លះហើយ។

ពលរដ្ឋជាច្រើនក្នុងខេត្តតាកែវ រង់ចាំមើលថា តើដំណាំកញ្ឆាដែលជាជំងឺរ៉ាំរ៉ៃបង្ក្រាបមិនចេះអស់រាប់ឆ្នាំ រាប់ខែមកហើយនេះ នឹងលុបបំបាត់ទាំងស្រុងក្នុងអាណត្តិលោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ ដែលទើបនឹងឡើងកាន់ដំណែងថ្មីៗនេះដែរឬយ៉ាងណា ! ៕

អត្ថបទ៖ វីរៈ

The post អធិការស្រុកគីរីវង់ ៖ ការដាំដំណាំកញ្ឆានៅស្រុកគីរីវង់ មានការថយចុះមិនដូចមុនទេ appeared first on Kampuchea Thmey Daily.

នគរបាលស្រុកគិរីវង់ កាប់និងដុតបំផ្លាញដំណាំកញ្ឆាជាង១៨០ម៉ែត្រការ៉េ

Sokhom Khon — Thu, 11 Nov 2021 02:59:30 +0000

កម្លាំងនគរបាល នៃអធិការដ្ឋាននគរបាលស្រុកគិរីវង់ ខេត្តតាកែវ សហការជាមួយកម្លាំងប៉ុស្ដិ៍ទាំង១២ ចុះបង្ក្រាបកាប់និងដុតបំផ្លាញដំណាំកញ្ឆា ដែលជនខិលខូចលួចដាំចំនួនពីរទីតាំងលើផ្ទៃដីដាំដុះប្រម៉ាណ១៨១ម៉ែត្រការ៉េ និងអាងស្ដុកទឹក២។

ប្រតិបត្តិការចុះកាប់និងដុតបំផ្លាញនេះ បានធ្វើឡើងកាលពីព្រឹកថ្ងៃទី១០ ខែវិច្ឆិកា ឆ្នាំ២០២១ នៅចំណុចដុបបែកថ្លាង ស្ថិតក្នុងភូមិសាស្ត្រឃុំព្រះបាទជាន់ជុំ ស្រុកគិរីវង់ ខេត្តតាកែវ។

បច្ចុប្បន្នកម្លាំងជំនាញកំពុងស្រាវជ្រាវស្វែងរកម្ចាស់ទីតាំងជាអ្នកដាំដំណាំកញ្ឆាខាងលើដើម្បីយកមកផ្តន្ទាទោសតាមផ្លូវច្បាប់ផងដែរ។

គួរបញ្ជាក់ថា ដំណាំកញ្ឆានៅស្រុកគិរីវង់ ត្រូវបានកម្លាំងសមត្ថកិច្ចចុះកាប់និងដុតបំផ្លាញជាច្រើនលើកច្រើនសារមកហើយ ប៉ុន្តែនៅមិនទាន់ចាប់បានជនខិលខូចដែលលួចដាំដំណាំខុសច្បាប់ទាំងនេះនោះទេ ហើយការលួចដាំនេះ ភាគច្រើនគឺនៅលើភ្នំ ស្ថិតក្នុងភូមសាស្ដ្រឃុំព្របាទជាន់ជុំ៕

អត្ថបទ៖ សុខុម

The post នគរបាលស្រុកគិរីវង់ កាប់និងដុតបំផ្លាញដំណាំកញ្ឆាជាង១៨០ម៉ែត្រការ៉េ appeared first on Kampuchea Thmey Daily.

បន្តបង្ក្រាបករណីលួចដាំកញ្ឆា៥ទីតាំងទៀតនៅស្រុកគិរីវង់

Sokhom Khon — Sun, 05 Sep 2021 05:43:11 +0000

នគរបាលស្រុកគិរីវង់ សហការជាមួយកម្លាំងប៉ុស្តិ៍នគរបាលរដ្ឋបាលទាំង១២ ឡើងលើភ្នំស្វែងរុករក និងកាប់ដុតបំផ្លាញដំណាំកញ្ឆាដែលជនខិលខូចលួចដាំខុសច្បាប់បានចំនួន៥ទីតាំង អាងស្តុកទឹកចំនួន៣អាង ។

សមត្ថកិច្ចប្រាប់អោយដឹងថា ដោយអនុវត្តន៍តាមបទបញ្ជាដឹកនាំរបស់លោកឧត្តមសេនីយ៍ទោ សុខ សំណាង ស្នងការនៃស្នងការដ្ឋាននគរបាលខេត្តតាកែវ កម្លាំងជំនាញអធិការដ្ឋាននគរបាលស្រុកគិរីវង់ សហការជាមួយកម្លាំងប៉ុស្តិ៍នគរបាលរដ្ឋបាលទាំង១២ប៉ុស្តិ៍ ឡើងលើភ្នំស្វែងរុករក និងកាប់ដុតបំផ្លាញដំណាំកញ្ឆាដែលជនខិលខូចលួចដាំខុសច្បាប់បានចំនួន០៥ទីតាំង អាងស្តុកទឹកចំនួន០៣អាង នៅចំណុចដុបភ្នំទទឹងស្ថិតក្នុងភូមិសាស្ត្រ ឃុំគិរីចុងកោះ ស្រុកគិរីវង់ ដែលមានផ្ទៃដីដាំដុះប្រមាណ៩៨៤ម៉ែត្រការ៉េ កាលពីថ្ងៃសៅរ៍ ១២រោច ខែស្រាពណ៌ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី០៤ ខែកញ្ញា ឆ្នាំ២០២១ វេលាម៉ោង០៧ និង៤៥នាទី ។

ជុំវិញករណីនេះកម្លាំងជំនាញកំពុងស្រាវជ្រាវស្វែងរកម្ចាស់ទីតាំងជាអ្នកដាំដំណាំកញ្ឆាខាងលើ ដើម្បីយកមកផ្តន្ទាទោសតាមផ្លូវច្បាប់ ។

សូមជម្រាបជូនអោយដឹងថា កាលពីថ្ងៃពុធ០៩រោច ខែស្រាពណ៌ ឆ្នាំឆ្លូវ ត្រីស័ក ព.ស២៥៦៥ ត្រូវនឹងថ្ងៃទី០១ ខែកញ្ញា ឆ្នាំ២០២១ វេលាម៉ោង០៧ នឹង៣០នាទី ក្រោមការចង្អុលបង្ហាញពីសំណាក់លោកឧត្តមសេនីយ៍ទោ សុខ សំណាង ស្នងការ នៃស្នងការដ្ឋាននគរបាលខេត្តតាកែវ កម្លាំងជំនាញអធិការដ្ឋាននគរបាលស្រុកគិរីវង់ សហការជាមួយកម្លាំងប៉ុស្តិ៍នគរបាលរដ្ឋបាលឃុំទាំង ១២ បានឆ្មក់ឡើងរុករកកាប់ដុតបំផ្លាញដំណាំកញ្ឆាដែលជនខិលខួចលួចដាំខុសច្បាប់ ០៩ទីតាំង អាងស្តុកទឹក ០៧ នៅចំណុចដុបភ្នំទទឹងស្ថិតនៅភូមិសាស្ត្រ ឃុំគិរីចុងកោះ ស្រុកគិរីវង់ ខេត្តតាកែវ ដែលមានផ្ទៃដីប្រមាណ ១៥៨១ ម៉ែត្រក្រឡា ៕

អត្ថបទ៖ រ៉ាវុទ្ធ

The post បន្តបង្ក្រាបករណីលួចដាំកញ្ឆា៥ទីតាំងទៀតនៅស្រុកគិរីវង់ appeared first on Kampuchea Thmey Daily.

ជង្រុកកញ្ឆា ក្នុងស្រុកគិរីវង់ សមត្ថកិច្ចចាប់អ្នកដាំមិនបាន

Sokhom Khon — Thu, 12 Aug 2021 04:01:20 +0000

ចម្ការដំណាំកញ្ឆាដែលជនខិលខូចលួចដាំខុសច្បាប់ប្រមាណ៥ទីតាំងបន្ថែមទៀត នៅក្នុងស្រុកគិរីវង់ ខេត្តតាកែវ ត្រូវសមត្ថកិច្ចកាប់បំផ្លាញបន្តទៀត ដែលកមន្លងមកកម្លាំងសមត្ថកិច្ចចុះកាប់ដុតបំផ្លាញជាច្រើនកន្លែងមកហើយ នៅក្នុងមូលដ្ឋានស្រុកគិរីវង់ តែមិនទាន់ចាប់អ្នកលួចដាំដំណាំខុសច្បាប់នេះបាននៅឡើយ ។

សមត្ថកិច្ចប្រាប់អោយដឹងថា កាលពីថ្ងៃពុធ ទី១១ ខែសីហា ឆ្នាំ២០២១ លោកវរសេនីយ៍ឯក យុគ សារ៉ាត់ អធិការ នៃអធិការដ្ឋាននគរបាលស្រុកគិរីវង់ បានដឹកនាំកម្លាំងជំនាញអធិការដ្ឋាននគរបាលស្រុក សហការជាមួយកម្លាំងប៉ុស្តិ៍នគរបាលរដ្ឋបាលទាំង ១២ប៉ុស្តិ៍ ឡើងលើភ្នំស្វែងរុករក និងកាប់ដុតបំផ្លាញដំណាំកញ្ឆាដែលជនខិលខូចលួចដាំខុសច្បាប់បានចំនួន០៥ទីតាំង អាងស្តុកទឹកចំនួន០៤អាង នៅចំណុចខាងលើទឹកទូងៗ ស្ថិតក្នុងភូមិសាស្ត្រ ឃុំតាអូរ ស្រុកគិរីវង់ ខេត្តតាកែវ ដែលមានផ្ទៃដីដាំដុះប្រមាណ ៣១៨៩ម៉ែត្រការ៉េ។

ចំពោះប្រតិបត្តិការនេះកម្លាំងជំនាញកំពុងធ្វើការស្រាវជ្រាវស្វែងរកម្ចាស់ទីតាំងជាអ្នកដាំដំណាំកញ្ឆាខុសច្បាប់ ដើម្បីយកមកផ្តន្ទាទោសតាមផ្លូវច្បាប់ ។

សូមជម្រាបជូនថា នៅក្នុងមូលដ្ឋានភូមិសាស្ត្រស្រុកគិរីវង់ ខេត្តតាកែវ នេះ ល្បីល្បាញមានជនខិលខូចលួចដាំដំណាំកញ្ឆាខុសច្បាប់រាប់ឆ្នាំមកហើយ ផ្ទុយទៅវិញសកម្មភាពល្មើសច្បាប់បែបនេះ នៅតែកើតមានជាបន្តបន្ទាប់ ៕

អត្ថបទ ៖ រ៉ាវុទ្ធ

The post ជង្រុកកញ្ឆា ក្នុងស្រុកគិរីវង់ សមត្ថកិច្ចចាប់អ្នកដាំមិនបាន appeared first on Kampuchea Thmey Daily.