សន្តិសុខសង្គម

អធិការស្រុកគីរីវង់ ៖ ការដាំដំណាំកញ្ឆានៅស្រុកគីរីវង់ មានការថយចុះមិនដូចមុនទេ

បានផុស

៤ years មុន

នៅ

ថ្ងៃព្រហស្បតិ៍ ៦ មករា ២០២២

ដោយ

មួយរយៈចុងឆ្នាំ២០២១ និងដើមឆ្នាំ២០២២នេះ សមត្ថកិច្ចជំនាញហាក់បានធូរដៃធូរជើងក្នុងការរុករកដំណាំកញ្ឆាដែលជនខិលខូចលួចលាក់ដាំតាមជ្រលងដងភ្នំនៅភូមិសាស្ត្រស្រុកគីរីវង់ ដែលទាំងនេះអាចជាការស្បើយឈប់ដាំដំណាំកញ្ឆាពីសំណាក់ជនខិលខូចឬយ៉ាងណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពលរដ្ឋជាច្រើនរស់នៅក្បែរជើងភ្នំស្រុកគីរីវង់បានបង្ហើបថា ដំណាំកញ្ឆាដែលដាំនៅតាមជើងភ្នំនិងខ្នងភ្នំមួយចំនួនក្នុងភូមិសាស្ត្រស្រុកនេះ គឺមិនងាយបង្ក្រាបអស់នោះទេ ព្រោះជាទីតាំងអំណោយផលល្អ ទាំងធម្មជាតិ ទាំងស្ថានភាពភូមិសាស្ត្រក៏ស្មុគស្មាញងាយស្រួលលាក់បាំងពីភ្នែកសមត្ថកិច្ច ពិសេសងាយស្រួលក្នុងការជួញដូរផងដែរ។ ដោយឡែកតាមការបង្ហើបពីពលរដ្ឋផងដែរ រឿងដាំដំណាំកញ្ឆានេះមិនមែនគ្រប់គ្នាសុទ្ធតែដាំបាននោះទេ គឺដាំបានតាមខ្សែក្រឡុះ មិនចឹងទេមិនបាច់ដល់កូនកញ្ឆាដោតដាំដល់ដី សូម្បីតែធ្វើរងរៀបចំដីដាំ គឺត្រូវសមត្ថកិច្ចបង្ក្រាបបាត់ទៅហើយ។

ជុំវិញដំណាំកញ្ឆានេះ លោក យុគ សារ៉ាត់ អធិការនគរបាល ស្រុកគីរីវង់បានឲ្យដឹងថា ដំណាំនេះនៅតែមានជនខិលខូចលួចដាំ តែការដាំដុះមានការថយចុះមិនដូចពីមុននោះទេ គឺនៅសេសសល់ប្រហែល៣០ភាគរយប៉ុណ្ណោះ ព្រោះអ្នកដាំគេដូរទីតាំងទៅដាំនៅខេត្តផ្សេងៗខ្លះហើយ។

ពលរដ្ឋជាច្រើនក្នុងខេត្តតាកែវ រង់ចាំមើលថា តើដំណាំកញ្ឆាដែលជាជំងឺរ៉ាំរ៉ៃបង្ក្រាបមិនចេះអស់រាប់ឆ្នាំ រាប់ខែមកហើយនេះ នឹងលុបបំបាត់ទាំងស្រុងក្នុងអាណត្តិលោកឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ ដែលទើបនឹងឡើងកាន់ដំណែងថ្មីៗនេះដែរឬយ៉ាងណា ! ៕

អត្ថបទ៖ វីរៈ