​លោករដ្ឋមន្ត្រី ​ឌិត ទីណា ​បាន​លើកឡើង​នៅក្នុងសន្និបាតបូកសរុបលទ្ធផលការងារ​របស់​ក្រសួង​កសិកម្ម នៅ​ថ្ងៃទី ១៩ ខែមីនា ឆ្នាំ ២០២៦ថា​ ក្រសួងកសិកម្មនឹងត្រៀម​ចូល​រួម​វាយតម្លៃ​នូវស្ថានភាព​ពិភពលោក​​ ខណៈ​សង្គ្រាម​ឈូងសមុទ្រ​ ដែលបានធ្វើឱ្យ​ប៉ះពាល់​ទៅ​ដល់​ថ្លៃប្រេង​ និង​ប៉ះពាល់ទៅដល់​ទំនិញផ្សេងៗ​។ ​

​លោក​យល់ឃើញថា៖ ​«ពេលនោះ​អត្រា​នៃអតិផរណា ​នឹង​មានការកើនឡើងមួយចំនួន​ ពេលនោះ​ចាំ​ពិនិត្យជាមួ​យគ្នា ​តើយើងចង់បានម្ហូបថោក ​ឬយើងចង់បាន​កសិផលថ្លៃ»។​

​នៅក្នុងឆ្នាំ២០២៥ កន្លងទៅនេះ​ វិស័យកសិកម្មកម្ពុជា​បានបង្ហាញពីភាពធន់​ និងការរីកចម្រើនគួរ​ឱ្យ​កត់សម្គាល់ ​ដោយបានដើរតួនាទីយ៉ាងសំខាន់ក្នុងការធានាសន្តិសុខស្បៀង ​បង្កើតការងារ​ និង​ទ្រទ្រង់​កំណើនសេដ្ឋកិច្ចជាតិ ទោះបីជាពិភព​លោក​ និងតំបន់ជួបប្រទះនឹងបញ្ហា​ប្រឈមជាច្រើន​ក៏ដោយ។

​យោងតាមក្រសួងកសិកម្ម​ នៅក្នុងឆ្នាំ ២០២៥ ​វិស័យកសិកម្មបានរួមចំណែកប្រមាណ ១៦,១% ក្នុងផលិតផល​សរុបក្នុងស្រុក (GDP) ​ជាមួយនឹងកំណើនប្រចាំឆ្នាំ ១,២%​ ដែលធ្វើឱ្យតម្លៃបន្ថែម​សរុប​នៃវិស័យ​នេះកើនឡើងដល់ជាង ៨,៣ពាន់​លានដុល្លារអាមេរិក។​

​ការនាំចេញ​ម្រេចបានទឹកប្រាក់ជិត ​៦,៥ ពាន់លានដុល្លារ ​(កើនឡើងជាង ៣២០លានដុល្លារ​ ធៀប​នឹង​ឆ្នាំ២០២៤) ក្នុងនោះ អនុវិស័យដំណាំមានទំហំធំជាងគេគឺជាង ៥,៦ពាន់លានដុល្លារ។

ផលិតផលកសិកម្មកម្ពុជាដែល​​មាន​សក្តានុពល​នាំចេញ​រួមមាន ​ស្រូវ ​អង្ករ កៅស៊ូ ដំឡូងមី ​គ្រាប់ស្វាយចន្ទី ​ស្វាយ​ ម្រេច ចេក ​និងទុរេនជាដើម៕

អត្ថបទ៖ ឡេង ដេត

The post ​លោក ​ឌិត ​ទីណា៖ ​សង្គ្រាមតំបន់​មជ្ឍិមបូព៌ា ​តម្លៃ​ទំនិញ​នឹង​កើន​ឡើង​ appeared first on Kampuchea Thmey Daily.

លោក ​វន់ ពៅ ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅប្រព័ន្ធ ប្រាប់កម្ពុជាថ្មី​នៅ​ថ្ងៃ​ទី ២០ ខែមិថុនា ឆ្នាំ ២០២៥ថា ចាប់តាំងពីថៃបិទច្រកព្រំដែន មិនទាន់មានទំនិញ​ណាមួយ​ឡើង​​ថ្លៃនៅឡើយនោះទេ រាប់តាំងពីសាច់គោ សាច់ជ្រូក បន្លែ និងអាហារទទួលទានប្រចាំថ្ងៃ ដោយ​​សារ​កម្ពុជាមានទំនិញប្រទេសផ្សេងៗនាំចូលជំនួសបាន។  

សម្រាប់លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា តម្លៃទីផ្សារសាច់ជ្រូក មិនមានការ​ឡើង​ថ្លៃនោះទេ ពោលគឺនៅថេរដដែល សាច់សុទ្ធលក់រាយនៅលើទីផ្សារតម្លៃក្រោម ២ ម៉ឺនរៀល ក្នុង​មួយគីឡូក្រាម។

លោក ឡយ ស៊ាងអាង ប្រធាន​គណៈកម្មការ​គ្រប់គ្រង​ផ្សារ​អូរឫស្សី បាន​ប្រាប់​ឱ្យ​ដឹង​ថា អាជីវករ​លក់​ដូរ​ក្នុង​ផ្សារ ក្រោម​ការ​គ្រប់គ្រង​របស់​លោក បាន​លក់ដូរ​យ៉ាង​ទូលំទូលាយ​លើ​ម្ហូបអាហារ បន្លែ ផ្លែឈើ ដោយ​មិន​មាន​ការ​ព្រួយបារម្ភ​ពី​កង្វះខាត​ទំនិញ​ក្នុង​ការ​លក់​នោះ​ទេ ខណៈ​ប្រជាពលរដ្ឋ​ជា​ច្រើន ក៏បាន​បន្ត​អញ្ជើញ​មក​ទិញ​អីវ៉ាន់​របស់​ខ្មែរ​ផង​ដែរ ដោយ​មិន​ផ្តោត​ខ្លាំង​លើ​ទំនិញ​ក្រៅ​ស្រុក ជាពិសេស​កសិករ​ក្នុងស្រុក​ផលិត​បាន​គ្រប់គ្រាន់​សម្រាប់​ផ្គត់ផ្គង់​ប្រចាំថ្ងៃ។

ជាមួយ​នេះ អាជីវករ​លក់ដូរ​នៅ​ផ្សារ​អូរឫស្សី ក៏បាន​សម្តែង​ក្តី​ពេញចិត្ត​ក្នុង​ការ​លក់ដូរ​ផលិតផល​ខ្មែរ​ជូន​ប្រជាពលរដ្ឋ​ខ្មែរ​យក​ទៅ​បរិភោគ ដោយ​ពួកគាត់​យល់​ឃើញ​ថា ការ​គាំទ្រ​ផលិតផល​ខ្មែរ​មក​លក់​ដូរ ជា​ការ​ជួយ​ដល់​សេដ្ឋកិច្ច​ប្រជាជន​ក្នុងស្រុក ក៏ដូចជា​សេដ្ឋកិច្ច​ជាតិ​ទាំងមូល​ផង​ដែរ។ ជាពិសេស​ប្រជាពលរដ្ឋ​បាន​បរិភោគ បន្លែ ត្រី សាច់ រស់​ធម្មជាតិ របស់​កសិករ​ខ្មែរ និង​ប្រជាកសិករ​ផលិត​ក្នុង​ស្រុក​មាន​ការ​សប្បាយ​ចិត្ត ដោយ​ពុំ​មាន​របស់​ក្រៅ​ស្រុក​ហូរ​ចូល។

យោងតាមធនាគារ ARDB តម្លៃកសិផលតាមទីផ្សារនៅរាជធានីភ្នំពេញនៅថ្ងៃទី ២០ ខែមិថុនា ឆ្នាំ ២០២៥ នេះ មិនមានការឡើងថ្លៃនោះទេ សាច់គោមួយគីឡូតម្លៃ ៣ ៧០០០ រៀល សាច់ជ្រូក ១ ៥០០០ រៀល ក្នុងមួយគីឡូក្រាម សាច់មាន់ ១ ម៉ឺនរៀល ក្នុងមួយគីឡូក្រាម និងស្ពៃចង្កឹះ ៣០០០ រៀល ក្នុងមួយគីឡូក្រាម អង្ករផ្កាខ្ចី ៣០០០ រៀល និងអង្ករ​សែនក្រអូប ៣ ៥០០ រៀល ក្នុងមួយគីឡូក្រាម៕

អត្ថបទ៖​ ឡេង ដេត

The post ទំនិញនៅលើទីផ្សារកម្ពុជា មិនឡើងថ្លៃទេ ក្រោយ​ថៃបិទព្រំដែន appeared first on Kampuchea Thmey Daily.

អាជីវករលក់ផ្លែឈើនៅផ្សារចម្រើនផលអ្នកស្រី រឿន សោភា បានលើកឡើងថា រដូវកាលបុណ្យទាន បន្លែផ្លែឈើអាចមានការឡើងថ្លៃខ្លះតាមមុខទំនិញ ប៉ុន្តែមិនឡើងខ្លាំងប៉ុន្មានឡើយ។ អ្នកស្រី បានលើកជាឧទាហរណ៍ថា ផ្លែប៉ោមលក់ថ្ងៃធម្មតាតម្លៃ ១២,០០០រៀល តែថ្ងៃបុណ្យទានអាចឡើង ១៤,០០០រៀល ពោលគឺឡើង ២០០០រៀល។ តូបអ្នកស្រី សោភា មានលក់ដូចជា ផ្លែមៀន ប៉ោម ក្រូច បឺរ និងស្រកានាគ ជាដើម។ អាជីវកររូបនេះ បញ្ជាក់បន្ថែមថា ការឡើងថ្លៃទំនិញ មិនមែនអ្នកលក់ចេះតែឡើងដោយខ្លួនឯងទេ គឺដោយសារតែការយកមកលក់បន្តមានការឡើងថ្លៃដូចគ្នា។ លើសពីនេះទៀត អាជីវករតែងដំឡើងថ្លៃបន្តិច នៅពេលដែលទំនិញណា ដែលមានតម្រូវការខ្ពស់។

ដោយឡែក អាជីវករលក់សាច់ជ្រូក នៅផ្សារដើមគរ អ្នកនាង ទួន ចិន្តា បានលើកឡើងថា តម្លៃសាច់ជ្រូកនៅផ្សារដើមគរ ពុំមានការឡើងថ្លៃនោះទេ គិតមកដល់ពេលនេះ។ ប៉ុន្តែ ថ្ងៃភ្ជុំបិណ្ឌអាចឡើងថ្លៃខ្លះ ព្រោះមានតម្រូវការច្រើន ទាំងខ្លាញ់ សាច់ និងឆ្អឹងស៊ុបជាដើម។ អ្នកនាង ចិន្តា បានបញ្ជាក់ថា សាច់ជ្រូកនៅផ្សារដើមគរលក់ក្នុងតម្លៃ ១គីឡូ ១៦,០០០រៀល សាច់បីជាន់ និងឆ្អឹងជំនីតម្លៃ ១៩,០០០រៀល ក្នុងមួយគីឡូក្រាម។ អាជីវកររូបនេះ បានឱ្យដឹងទៀតថា តាមការសង្កេតទំនិញផ្សេងៗ រួមទាំងសាច់ជ្រូកផងដែរ ចាប់ផ្តើមលក់ដាច់បណ្តើរៗហើយ ដោយសារកៀកថ្ងៃដាក់បិណ្ឌ បងប្អូនប្រជាពលរដ្ឋដើរផ្សារទិញអីវ៉ាន់ត្រៀមទុកខ្លះឱ្យហើយ។

ពាក់ព័ន្ធនឹងការផ្គត់ផ្គង់ត្រីវិញ លោក សុខ រ៉ាដែន ប្រធានក្រុមប្រឹក្សាភិបាល សមាគមវារីវប្បករកម្ពុជា មើលឃើញថា នៅរដូវកាលបុណ្យភ្ជុំបិណ្ឌនេះ មិនខ្វះត្រីសម្រាប់ផ្គត់ផ្គង់តម្រូវការទីផ្សារឡើយ ដោយសារកសិករ បានចិញ្ចឹមជាបន្តបន្ទាប់មក។ ប៉ុន្តែលោកសង្កត់ធ្ងន់ថា ទៅមុខទៀត មិនអាចវាយតម្លៃបាន ដោយសារកសិដ្ឋានធំៗចំនួនពីរ បានផ្អាកដំណើរការចិញ្ចឹម ព្រោះខ្វះទីផ្សារ និងចំណីឡើងថ្លៃ។

លោក ឯក និមល ប្រធានផ្សារបឹងកេងកង បានប្រាប់កម្ពុជាថ្មីថា ប្រជាពលរដ្ឋចាប់ផ្តើមចូលផ្សារជាបណ្តើរៗ ខណៈថ្ងៃដាក់បិណ្ឌកាន់តែខិតជិតមកដល់។ លោកប្រធានផ្សារ បានលើកឡើងថា ចំពោះអាជីវករផ្សារបឹងកេងកង ក៏ចាប់ផ្តើមសកម្មនឹងការលក់ដូរផងដែរ។ ប្រធានផ្សាររូបនេះ ក៏បានណែនាំដល់អាជីវករ ក្នុងការកំណត់តម្លៃសមរម្យ កុំឱ្យមានការឡើងថ្លៃស្រេចតែចិត្ត នាំឱ្យមានការនិយាយមិនល្អអំពីកេរ្តិ៍ឈ្មោះផ្សារ។ លោក ឯក និមល ក៏បានអះអាងថា លោកបានណែនាំដល់ក្រុមការងារឱ្យត្រៀមខ្លួនជាស្រេច ក្នុងការរក្សាសណ្តាប់ធ្នាប់ និងការពារសុវត្ថិភាពជូនបងប្អូនប្រជាពលរដ្ឋ ដែលចូលផ្សារបឹងកេងកងផងដែរ។

សូមបញ្ជាក់ថា ពិធីបុណ្យភ្ជុំបិណ្យប្រពៃណីជាតិខ្មែរ ចាប់ផ្តើបបិណ្ឌមួយនៅថ្ងៃទី ១១ ខែ កញ្ញា និងភ្ជុំធំត្រូវនឹងថ្ងៃទី ២៤-២៦ ខែ កញ្ញា ឆ្នាំ ២០២២៕

 អត្ថបទ៖ នាង រតនៈ

The post អាជីវករ៖ តម្លៃទំនិញនៅលើទីផ្សារឡើង​ចុះតាមតម្រូវការអ្នកទិញ appeared first on Kampuchea Thmey Daily.

ទំព័រហ្វេសបុក​​ក្រសួង​ពាណិជ្ជកម្ម​បាន​ឱ្យដឹង​ថា​ ការចុះត្រួតពិនិត្យ និងតាមដានតម្លៃទំនិញនេះ ធ្វើឡើងក្រោមដឹកនាំដោយលោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម និងលោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក អគ្គនាយដ្ឋានការពារអ្នកប្រើប្រាស់ កិច្ចការប្រគួតប្រជែង និងបង្រ្កាបការក្លែងបន្លំ (ក.ប.ប.)។

ជាលទ្ធផលនៃការចុះត្រួតពិនិត្យនេះ ឃើញថា តម្លៃទំនិញគឺមានស្ថេរភាពល្អ ហើយក្រុមការងារក៏បានណែនាំដល់អាជីវករទាំងអស់ ឲ្យបិទស្លាកថ្លៃនៅលើមុខទំនិញ និង កុំឲ្យមានការតម្លើងថ្លៃទំនិញហួសពីតម្លៃដែលបានលក់កន្លង​មក(តម្លៃមុនពេលបិទខ្ទប់ LOCKDOWN) ហើយបើមានករណីលួចបន្លំតម្លើងថ្លៃណាមួយកើតឡើង សូមឲ្យអតិថិជនរាយការណ៍ជាបន្ទាន់មកកាន់អាជ្ញាធរមានសមត្ថកិច្ច និង អង្គភាពពាក់ព័ន្ធ ដើម្បីចាត់វិធានការណ៍ឱ្យបានទាន់ពេលវេលា។

ជាមួយគ្នានេះ ក្រុមការងារអគ្គនាយកដ្ឋាន ក.ប.ប. ក៏បានធ្វើការដកហូតអាល់កុលប្រភេទមេតាណុលចំនួន​០២ប៊ីដុង ស្មើនឹង៦០លីត្រ នៅក្នុងផ្សារសាំហាន់ ផងដែរ។

កាលពីសប្តាហ៍​មុន​ប្រជាពលរដ្ឋជាច្រើន​នាក់​បាន​ត្អូញត្អែរពីការហក់​ឡើង​តម្លៃ​មុខទំនិញមួយចំនួន​លើ​ទីផ្សារពិសេស​នៅរាជធានី​ភ្នំពេញ​។​​ភ្លាម​ៗ​មន្ត្រីជំនាញនៃក្រសួងពាណិជ្ជកាលពីពេលថ្មីៗនេះ បានឱ្យ​ពលរដ្ឋរាយការណ៍ និងតាមដានតម្លៃទំនិញ នៅតាមផ្សារមួយចំនួន និងរក​ឃើញ​ថា អាជីវករ​មួយ​ចំនួន​ពិតជាបាន​តម្លើង​ថ្លៃ​ពិត​ប្រាកដមែន​៕

The post ក្រសួងពាណិជ្ជកម្មថា តម្លៃទំនិញ​​​ ក្នុងទីក្រុងមានស្ថិរភាពល្អ appeared first on Kampuchea Thmey Daily.