តំបន់West Bank Archives - Kampuchea Thmey Daily

UN ថា អំពើហិង្សារបស់អ៊ីស្រាអែល ប្រឆាំងប្រជាជនប៉ាឡេស្ទីននៅ West Bank កើនខ្ពស់មិនធ្លាប់មាន

Minea Neu — Fri, 12 Jun 2026 03:35:48 +0000

អង្គការសហប្រជាជាតិ(UN) បានព្រមានកាលពីថ្ងៃព្រហស្បតិ៍ ថា ការវាយប្រហាររបស់អ៊ីស្រាអែលប្រឆាំងនឹងប្រជាជនប៉ាឡេស្ទីន ក្នុងតំបន់ West Bank ដែលកាន់កាប់ដោយអ៊ីស្រាអែល កំពុងស្ថិតក្នុងកម្រិតខ្ពស់ជាងឆ្នាំណាទាំងអស់ ដែលមានឧប្បត្តិហេតុជាមធ្យម ៦ករណីក្នុងមួយថ្ងៃ បណ្តាលឱ្យមានអ្នកស្លាប់ របួស និងខូចខាតទ្រព្យសម្បត្តិ។ នេះបើយោងតាមភ្នាក់ងារសារព័ត៌មាន Anadolu នៅថ្ងៃទី១១ ខែមិថុនា ឆ្នាំ២០២៦ ។

ដោយដកស្រង់សម្តីការិយាល័យសម្របសម្រួលកិច្ចការមនុស្សធម៌ (OCHA) អ្នកនាំពាក្យអង្គការសហប្រជាជាតិ លោក Stephane Dujarric និយាយក្នុងសន្និសីទសារព័ត៌មានមួយថា៖ « ចំនួននៃការវាយប្រហាររបស់អ្នកទៅតាំងទីលំនៅ ធ្វើឱ្យមានអ្នកស្លាប់ របួស និងខូចខាតទ្រព្យសម្បត្តិក្នុងឆ្នាំនេះ នៅតំបន់ West Bank ! ឥឡូវនេះលើសពី ១ ០០០នាក់ ហើយ»។

អ្នកនាំពាក្យអង្គការសហប្រជាជាតិ លោក Stephane Dujarric ។ រូបភាព៖ UN

លោក Stephane និយាយថា៖ « ការវាយប្រហារទាំងនេះ បានប៉ះពាល់ដល់សហគមន៍ជាង២៣០ នៅគ្រប់តំបន់ West Bank។ ប្រជាជនប៉ាឡេស្ទីនជាង២ ២០០នាក់ ត្រូវបានផ្លាស់ទីលំនៅ ក្នុងឆ្នាំនេះដោយសារតែអំពើហិង្សារបស់អ្នកតាំងទីលំនៅ ឬការរឹតបន្តឹងការចូលប្រើប្រាស់ផ្សេងទៀត រួមជាមួយនឹងមនុស្សរាប់រយនាក់ត្រូវបានផ្លាស់ទីដោយសារតែការរុះរើផ្ទះដោយអាជ្ញាធរអ៊ីស្រាអែល»។

លោក បន្ថែមថា៖ « ល្បឿននៃការវាយប្រហាររបស់អ្នកតាំងទីលំនៅបច្ចុប្បន្ន បង្កឱ្យមានអ្នកស្លាប់ ខូចខាតទ្រព្យសម្បត្តិ ជាមធ្យមមានឧប្បត្តិហេតុចំនួន៦ ក្នុងមួយថ្ងៃ គឺខ្ពស់ជាងឆ្នាំណាៗទាំងអស់ដែលបានកត់ត្រាទុក»។

អាជ្ញាធរប៉ាឡេស្ទីនបានអំពាវនាវដល់សហគមន៍អន្តរជាតិអស់រយៈពេលជាច្រើនទសវត្សរ៍មកហើយឱ្យដាក់សម្ពាធលើអ៊ីស្រាអែល បញ្ឈប់ការសាងសង់លំនៅឋានក្នុងតំបន់ West Bank ដែលអង្គការសហប្រជាជាតិចាត់ទុកថាខុសច្បាប់ក្រោមច្បាប់អន្តរជាតិ។

គួរបញ្ជាក់ថា ចាប់តាំងពីអ៊ីស្រាអែលបានចាប់ផ្តើមសង្គ្រាមលើតំបន់ហ្គាហ្សាក្នុងខែតុលា ឆ្នាំ២០២៣ មន្ត្រីប៉ាឡេស្ទីនថា វិធានការរបស់អ៊ីស្រាអែលលើតំបន់ West Bank បានកើនឡើង រួមទាំងការរុះរើផ្ទះសម្បែង ការបង្ខំឱ្យផ្លាស់ទី និងការពង្រីកការតាំងលំនៅ។

តួលេខរបស់អាជ្ញាធរប៉ាឡេស្ទីនបង្ហាញថា កងកម្លាំង និងអ្នកកាន់កាប់អ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ១ ១៦៩នាក់ នៅតំបន់ West Bank រួមទាំងភាគខាងកើតក្រុងយេរូសាឡឹម មានមនុស្សជាង ១២ ៦០០នាក់ រងរបួស និងឃុំខ្លួនប្រមាណ២៣ ០០០នាក់ ចាប់តាំងពីខែតុលា ឆ្នាំ ២០២៣ ៕

សម្រួល៖ ណឺ មិនា

The post UN ថា អំពើហិង្សារបស់អ៊ីស្រាអែល ប្រឆាំងប្រជាជនប៉ាឡេស្ទីននៅ West Bank កើនខ្ពស់មិនធ្លាប់មាន appeared first on Kampuchea Thmey Daily.

សហភាពអឺរ៉ុបឯកភាពគ្នាដាក់ទណ្ឌកម្មជុំថ្មីលើអ៊ីស្រាអែល កាន់កាប់តំបន់ West Bank

Minea Neu — Tue, 12 May 2026 11:30:00 +0000

រដ្ឋមន្ត្រីការបរទេសសហភាពអឺរ៉ុប បានឯកភាពគ្នាលើការដាក់ទណ្ឌកម្មជុំថ្មីមួយទៀត ដោយផ្តោតលើអ្នកកាន់កាប់ គឺអ៊ីស្រាអែលនិងអង្គការណាដែលគាំទ្រសកម្មភាពតាំងទីលំនៅខុសច្បាប់នៅតំបន់ West Bank ក្នុងប្រទេសប៉ាឡេស្ទីន។ នេះបើយោងតាមសារព័ត៌មាន TRT World ចុះផ្សាយថ្ងៃទី១១ ខែឧសភា ឆ្នាំ២០២៦ ។

រដ្ឋមន្ត្រីការបរទេសបារាំង លោក Jean-Noel Barrot សរសេរលើបណ្តាញសង្គម X កាលពីថ្ងៃចន្ទថា៖ « រួចរាល់ហើយ! សហភាពអឺរ៉ុបកំពុងដាក់ទណ្ឌកម្មនៅថ្ងៃនេះ[ថ្ងៃចន្ទ] ចំពោះអង្គការស្ថាប័នសំខាន់របស់អ៊ីស្រាអែលពីបទគាំទ្រអាណានិគមជ្រុលនិយមនិងហិង្សានៅតំបន់ West Bank ក៏ដូចជាមេដឹកនាំរបស់ពួកគេ។ ទង្វើធ្ងន់ធ្ងរនិងមិនអាចអត់ឱនទាំងនោះត្រូវតែបញ្ឈប់បន្ទាន់»។

រដ្ឋមន្ត្រីការបរទេសបារាំង លោក Jean-Noel Barrot. រូបភាព៖ Reuters

លោក បានបន្ថែម ដោយសំដៅលើអ៊ីស្រាអែលនិងប៉ាឡេស្ទីនថា៖ « ក្តីសង្ឃឹមប្រទេសបារាំងបានរស់ឡើងវិញកាលពីឆ្នាំមុននៅទីក្រុងញូវយ៉ក ជាក្តីសង្ឃឹមនៃរដ្ឋពីរត្រូវបានទទួលស្គាល់ គោរព និងរស់នៅជាមួយគ្នាក្នុងសន្តិភាព និងសន្តិសុខ យើងនឹងមិនអនុញ្ញាតឱ្យនរណាម្នាក់ធ្វើឱ្យខូចវាឡើយ»។

ដោយឡែក លោកស្រី Kaja Kallas ប្រធានគោលនយោបាយការបរទេសរបស់សហភាពអឺរ៉ុប ក៏បានបញ្ជាក់ពីការសម្រេចចិត្តលើការដាក់ទណ្ឌកម្មអ៊ីស្រាអែលថា៖ « រដ្ឋមន្ត្រីការបរទេសរបស់សហភាពអឺរ៉ុប បានផ្តល់ការអនុញ្ញាតឱ្យដាក់ទណ្ឌកម្មលើអ្នកតាំងលំនៅខុសច្បាប់របស់អ៊ីស្រាអែល ពីបទហិង្សាប្រឆាំងនឹងជនជាតិប៉ាឡេស្ទីន»។

លោកស្រី Kallas សរសេរលើបណ្តាញសង្គម X ថា៖ « វាដល់ពេលហើយដែលយើងត្រូវផ្លាស់ប្តូរពីភាពជាប់គាំងទៅជាការសម្រេចបាន។ ភាពជ្រុលនិយម និងអំពើហិង្សាគឺនាំមកផលវិបាកប៉ុណ្ណោះ»។

យោងតាមមន្ត្រីប៉ាឡេស្ទីនឱ្យដឹងថា តំបន់ West Bank កាន់កាប់ដោយអ៊ីស្រាអែលបានប្រើអំពើហិង្សាកាន់តែខ្លាំងឡើង ចាប់តាំងពីការ វាយប្រហារនៅតំបន់ហ្គាហ្សាក្នុងខែតុលា ឆ្នាំ២០២៣ រួមទាំងការសម្លាប់ ចាប់ខ្លួន ពង្រីកការតាំងទីលំនៅ និងការរុះរើផ្ទះសម្បែង។

យោងតាមតួលេខផ្លូវការរបស់អាជ្ញាធរប៉ាឡេស្ទីន ជនជាតិប៉ាឡេស្ទីនយ៉ាងហោចណាស់ ១ ១៥៥នាក់ ត្រូវបានសម្លាប់ ហើយ ១១ ៧៥០ នាក់ រងរបួស និងជាង ២២ ០០០នាក់ ត្រូវបានចាប់ខ្លួននៅតំបន់ West Bank ៕

ប្រែដោយ៖ ណឺ មិនា

The post សហភាពអឺរ៉ុបឯកភាពគ្នាដាក់ទណ្ឌកម្មជុំថ្មីលើអ៊ីស្រាអែល កាន់កាប់តំបន់ West Bank appeared first on Kampuchea Thmey Daily.

លោកត្រាំ ប្រឆាំងនឹងការកាត់យកទឹកដី West Bank ខណៈពិភពលោកថ្កោលទោសអ៊ីស្រាអែល

Chheang — Tue, 10 Feb 2026 04:09:04 +0000

ប្រធានាធិបតីអាមេរិក ដូណាល់ ត្រាំ បានបង្ហាញជំហរប្រឆាំងនឹងការប៉ុនប៉ងរបស់អ៊ីស្រាអែល ក្នុងការកាត់យកទឹកដី West Bank ដែលកំពុងស្ថិតក្រោមការកាន់កាប់ ដោយសេតវិមានព្រមានថា ទង្វើបែបនេះនឹងធ្វើឲ្យប៉ះពាល់ដល់ស្ថិរភាពក្នុងតំបន់។

តំបន់ West Bank (រូបថត៖ Reuters)

ចេញផ្សាយថ្ងៃអង្គារទី១០ខែកុម្ភៈឆ្នាំ២០២៦ សារព័ត៌មាន Al Jazeera បានឲ្យដឹងថា បន្ទាប់ពីមន្ត្រីជាន់ខ្ពស់អ៊ីស្រាអែលបានប្រកាសវិធានការថ្មីៗ ដើម្បីពង្រីកការគ្រប់គ្រងលើទឹកដីប៉ាឡេស្ទីនកាលពីចុងសប្តាហ៍ មន្ត្រីអាមេរិកម្នាក់បានបញ្ជាក់កាលពីថ្ងៃចន្ទថា «តំបន់ West Bank ដែលមានស្ថិរភាព» គឺជាកត្តាចាំបាច់សម្រាប់សន្តិសុខរបស់អ៊ីស្រាអែល និងគោលដៅសន្តិភាពរបស់រដ្ឋបាលលោកត្រាំ។

ជំហររបស់អាមេរិកនេះ បានកើតឡើងស្របពេលមានរលកនៃការថ្កោលទោសយ៉ាងខ្លាំងពីអន្តរជាតិ បន្ទាប់ពីរដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich បានទទួលស្គាល់ថា គោលនយោបាយថ្មីនេះមានបំណង «កប់ចោលគំនិតនៃការបង្កើតរដ្ឋប៉ាឡេស្ទីន»។ ចាប់ពីទីក្រុងឡុងដ៍ រហូតដល់ទីក្រុងម៉ាឌ្រីដ មេដឹកនាំពិភពលោកបានរិះគន់ទង្វើនេះថាជាការរំលោភច្បាប់អន្តរជាតិ។ អង្គការសហប្រជាជាតិ និងរដ្ឋាភិបាលចក្រភពអង់គ្លេស សុទ្ធតែបានចេញសេចក្តីថ្លែងការណ៍តវ៉ា ដោយទាមទារឲ្យអ៊ីស្រាអែលលុបចោលជាបន្ទាន់នូវការផ្ទេរអំណាចគ្រប់គ្រងសំណង់ និងទីតាំងសំខាន់ៗពីអាជ្ញាធរប៉ាឡេស្ទីន មកឲ្យអ៊ីស្រាអែលវិញ។

ភាពតានតឹងបានកើនឡើងកាន់តែខ្លាំង នៅពេលដែលប្រទេសកាន់សាសនាឥស្លាមចំនួន៨ រួមមាន អារ៉ាប៊ីសាអូឌីត តួកគី និងអារ៉ាប់រួម ជាដើម បានចេញសេចក្តីថ្លែងការណ៍រួមគ្នា ដោយចោទប្រកាន់អ៊ីស្រាអែលថា កំពុងព្យាយាមបង្ខំឲ្យមាន «តថភាពច្បាប់ថ្មី» តាមរយៈការបណ្តេញចេញដោយខុសច្បាប់។ អគ្គលេខាធិការ UN លោក Antonio Guterres ព្រមានថា វិធានការទាំងនេះកំពុងបំផ្លាញដំណោះស្រាយរដ្ឋពីរ ហើយបញ្ហាសំខាន់នៅពេលនេះ គឺថាតើរដ្ឋបាលលោកត្រាំ នឹងអាចរារាំងសម្ព័ន្ធមិត្តរបស់ខ្លួន ពីការបន្តពង្រីកទឹកដីបន្ថែមទៀតបានឬយ៉ាងណា៕

លោក ដូណាល់ ត្រាំ (រូបថត៖ Reuters)

ប្រែសម្រួល៖ ឈាង

The post លោកត្រាំ ប្រឆាំងនឹងការកាត់យកទឹកដី West Bank ខណៈពិភពលោកថ្កោលទោសអ៊ីស្រាអែល appeared first on Kampuchea Thmey Daily.

អ៊ីស្រាអែលបើកការវាយឆ្មក់យ៉ាងសាហាវទៅលើជំរុំជនភៀសខ្លួន Jenin ក្នុងតំបន់ West Bank

Bun sopheap — Wed, 22 Jan 2025 10:13:49 +0000

មនុស្សជាច្រើននាក់ត្រូវបានសម្លាប់ ខណៈយោធាអ៊ីស្រាអែលវាយឆ្មក់ចូលជំរំជនភៀសខ្លួន Jenin ក្នុងតំបន់ West Bank បន្ថែមទៀត បន្ទាប់ពីមានបទឈប់បាញ់នៅតំបន់ហ្គាហ្សា។ នេះបើយោងតាមការចេញផ្សាយរបស់សារព័ត៌មានAl Jazeera នៅថ្ងៃទី២២ខែមករានេះ។

រថយន្តសេវាសង្គ្រោះនៅ West Bank។ Reuter

អាជ្ញាធរសុខាភិបាលប៉ាឡេស្ទីន បានឲ្យដឹងថា យ៉ាងហោចណាស់ជនជាតិប៉ាឡេស្ទីន១០នាក់ត្រូវបានសម្លាប់ និង៣៥នាក់រងរបួសនៅក្នុងការវាយឆ្មក់កាលពីព្រឹកព្រលឹមថ្ងៃអង្គារដល់យប់ ហើយត្រូវបានគេរំពឹងថានឹងមានរយៈពេលជាច្រើនថ្ងៃទៀត។ បើតាមនាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ប្រតិបត្តិការនេះហៅថា «ជញ្ជាំងដែក» គឺមានបំណង «លុបបំបាត់អំពើភេរវកម្ម» នៅក្នុងតំបន់នេះ។

អគ្គលេខាធិការអង្គការសហប្រជាជាតិលោក Antonio Guterres បានអំពាវនាវឱ្យមាន «ការអត់ធ្មត់» ពីកងកម្លាំងសន្តិសុខ ហើយបាននិយាយថា លោកនៅតែមានការព្រួយបារម្ភយ៉ាងខ្លាំង។

អង្គការក្រៅរដ្ឋាភិបាលអ៊ីស្រាអែល B’Tselem បានចោទប្រកាន់រដ្ឋាភិបាលអ៊ីស្រាអែលថា បានប្រើប្រាស់បទឈប់បាញ់នៅតំបន់ហ្គាហ្សាជា លេស និងឱកាសដើម្បីលុបបំបាត់ការគៀបសង្កត់របស់ប៉ាឡេស្ទីននៅ West Bank។ បើតាមអភិបាលក្រុង Jenin លោក Kamal Abu al-Rub បានប្រាប់ AFP ថា ប្រតិបត្តិការនេះគឺជា «ការលុកលុយជំរំជនភៀសខ្លួន»។

គួរបញ្ជាក់ថា ចាប់តាំងពីចាប់ផ្ដើមមានបទឈប់បាញ់នៅតំបន់ហ្គាហ្សា ក្នុងរយៈពេលប៉ុន្មានថ្ងៃថ្មីៗនេះ ការវាយឆ្មក់បានកើនឡើងញឹកញាប់ និងខ្លាំងនៅក្នុងក្រុងJenin៕

អត្ថបទ៖ ប៊ុន សុភាព

The post អ៊ីស្រាអែលបើកការវាយឆ្មក់យ៉ាងសាហាវទៅលើជំរុំជនភៀសខ្លួន Jenin ក្នុងតំបន់ West Bank appeared first on Kampuchea Thmey Daily.

តំបន់​West Bank Archives - Kampuchea Thmey Daily

UN ថា​ ​​អំពើ​ហិង្សា​របស់​​អ៊ីស្រាអែល ប្រឆាំង​​ប្រជាជន​ប៉ា​ឡេស្ទីន​​​នៅ West Bank កើន​ខ្ពស់​​មិនធ្លាប់​មាន​

សហភាព​អឺរ៉ុប​​ឯក​ភាព​គ្នា​​ដាក់​ទណ្ឌ​កម្ម​ជុំ​ថ្មីលើ​អ៊ីស្រាអែល កាន់​កាប់​តំបន់​ West Bank

លោកត្រាំ ប្រឆាំងនឹងការកាត់យកទឹកដី West Bank ខណៈពិភពលោកថ្កោលទោសអ៊ីស្រាអែល

អ៊ីស្រាអែលបើកការវាយឆ្មក់យ៉ាងសាហាវទៅលើជំរុំជនភៀសខ្លួន Jenin ក្នុងតំបន់ West Bank

តំបន់West Bank Archives - Kampuchea Thmey Daily

UN ថា អំពើហិង្សារបស់អ៊ីស្រាអែល ប្រឆាំងប្រជាជនប៉ាឡេស្ទីននៅ West Bank កើនខ្ពស់មិនធ្លាប់មាន

សហភាពអឺរ៉ុបឯកភាពគ្នាដាក់ទណ្ឌកម្មជុំថ្មីលើអ៊ីស្រាអែល កាន់កាប់តំបន់ West Bank