ថ្នាំអាស្ពីរីន Archives - Kampuchea Thmey Daily

សាស្ត្រាចារ្យមួយរូបចែករំលែកពីផលប៉ះពាល់នៃថ្នាំអាស្ពីរីន ជាពិសេសលើមនុស្សចាស់

Boa Sokunveary — Tue, 27 Jun 2023 04:54:06 +0000

លោកសាស្ត្រាចារ្យ Rob Galloway បានឲ្យដឹងថា ថ្នាំអាស្ពីរីន ៣០០ មិល្លីក្រាម ដើរតួជាថ្នាំប្រឆាំងការរលាក និងបំបាត់ការឈឺចាប់ ចំណែកការប្រើថ្នាំ ៧៥ មិល្លីក្រាម ដល់ ១០០ មិល្លីក្រាម ជាប្រចាំអាចការពារជំងឺគាំងបេះដូង និងជំងឺដាច់សរសៃឈាមខួរក្បាលយ៉ាងមានប្រសិទ្ធភាព ។

ទន្ទឹមនឹងអត្ថប្រយោជន៍ខាងលើ ថ្នាំអាស្ពីរីនក៏ផ្ដល់នូវគុណវិបត្តិមិនស្ទើរដែរ ហើយបញ្ហាចម្បងនោះគឺវាមានតម្លៃថោក ងាយស្រួលទិញ និងប្រើប្រាស់តាមអំពើចិត្ត ។

ជាច្រើនសតវត្សមកហើយដែលថ្នាំអាស្ពីរីនស្ថិតក្នុងទម្រង់ជាអាស៊ីដ Salicylic គេធ្វើវាចេញពីសំបកដើមលូស សម្រាប់ប្រឆាំងការរលាក ។ រហូតដល់ឆ្នាំ ១៨៩៩ ទើបក្រុមហ៊ុនឱសថ Bayer បន្សុទ្ធ និងកែច្នៃវាទៅជាថ្នាំអាស្ពីរីនដែលយើងស្គាល់បច្ចុប្បន្ននេះ ។

យោងទៅតាមការស្រាវជ្រាវលើមនុស្សចាស់ជាង ១៩០០០ នាក់ វ័យចាប់ពី ៦៥ ឆ្នាំឡើងទៅនៅសហរដ្ឋអាមេរិក និងអូស្ត្រាលី បង្ហាញថា មនុស្សចាស់ប្រើអាស្ពីរីនមានហានិភ័យកើតជំងឺស្លេកស្លាំងខ្ពស់ជាងអ្នកប្រើថ្នាំឥតប្រយោជន៍ដល់ទៅ ២០ ភាគរយឯណោះ ព្រោះពួកគាត់មានហូរឈាមក្នុងក្រពះស្ទើរទាំងអស់ ។

ជាក់ស្ដែងហានិភ័យជំងឺស្លេកស្លាំងកាន់តែខ្ពស់ចំពោះមនុស្សចាស់ដោយសារហេតុផលជាច្រើនដូចជា ពោះវៀនមិនសូវស្រូបជាតិដែក ខួរឆ្អឹងមិនសូវផលិតគ្រាប់ឈាមក្រហមច្រើនដូចមុន ហើយក្រលៀនផលិតអ័រម៉ូនអេរីត្រូប៉ូអ៊ីទីនដែលជាអ័រម៉ូនជំរុញការផលិតគ្រាប់ឈាមក្រហមកាន់តែតិច ។

ក្នុងឆ្នាំ ២០២២ ក្រុមការងារសេវាបង្ការរបស់សហរដ្ឋអាមេរិកបានណែនាំអ្នកមានអាយុលើសពី ៦០ ឆ្នាំ មិនឲ្យប្រើប្រាស់ថ្នាំអាស្ពីរីនជាប្រចាំថ្ងៃឡើយ ដោយសារហានិភ័យនៃការហូរឈាមខាងក្នុងគឺខ្ពស់គួរឲ្យកត់សម្គាល់ ។ សូម្បី NHS ក៏និយាយផងដែរថា យើងគួរតែលេបថ្នាំអាស្ពីរីនក្នុងកម្រិតទាបប្រចាំថ្ងៃ បើវេជ្ជបណ្ឌិតណែនាំវា ដោយសារតែហានិភ័យខ្ពស់នៃការគាំងបេះដូង ឬដាច់សរសៃឈាមខួរក្បាលធ្វើឲ្យអាក់ខានមិនបាន ៕

ប្រែសម្រួល៖ វារី

ប្រភព៖ dailymail

ចុចអាន៖ លម្អិតខ្ទេចខ្ទីរឿងពុលថ្នាំអាស្ពីរីន និងវិធីព្យាបាលទាន់ពេល

The post សាស្ត្រាចារ្យមួយរូបចែករំលែកពីផលប៉ះពាល់នៃថ្នាំអាស្ពីរីន ជាពិសេសលើមនុស្សចាស់ appeared first on Kampuchea Thmey Daily.

លម្អិតខ្ទេចខ្ទីរឿងពុលថ្នាំអាស្ពីរីន និងវិធីព្យាបាលទាន់ពេល

សាង ស្រីល័ក្ខ — Sat, 15 May 2021 05:18:13 +0000

គ្នាយើងមួយចំនួនដឹងស្រាប់ហើយថា ថ្នាំអាស្ពីរីន ជាប្រភេទថ្នាំបំបាត់ការឈឺចាប់។ អ្នកខ្លះប្រើខុសក្បួនរហូតដល់ពុលក៏មាន។ រឿងពុលថ្នាំអាស្ពីរីនទៀតសោត អាចដោយចេតនា ឬចៃដន្យ។ អ្នកខ្លះប្រើថ្នាំអាស្ពីរីនក្នុងចំនួនច្រើន ធ្វើអត្តឃាត។

ការពុលថ្នាំអាស្ពីរីនដោយចៃដន្យ ធម្មតាកើតចំពោះកុមារ។ ការពុលថ្នាំអាស្ពីរីនអាចកើតឡើង បើគ្នាយើងណាម្នាក់ប្រើថ្នាំអាស្ពីរីន លាយបញ្ចូលគ្នាជាមួយសារធាតុដូចអាស្ពីរីន ក្នុងកម្រិតប្រើប្រាស់ខុស ឬក្នុងរយៈពេលយូរអង្វែង។ ជាទូទៅ ករណីនេះកើតឡើងលើអ្នកមានជំងឺរ៉ាំរ៉ៃ។

១- រោគសញ្ញាពុលថ្នាំអាស្ពីរីន
– ក្អួត
– គ្រុនក្ដៅ
– សន្លប់ធំ
– ចង់សន្លប់
– ងងុយដេក
– ដើរមិននឹង
– ខ្សោះជាតិទឹក
– វង្វេងវង្វាន់ស្មារតី
– អាកប្បកិរិយាចម្លែក
– សមត្ថភាពស្ដាប់ថយចុះ
– ហ៊ឹងត្រចៀក (ឮសំឡេងងឺងក្នុងត្រចៀក)
– ដកដង្ហើមញាប់ (ដង្ហើមខ្ពស់ច្រើនខុសធម្មតា)។

២- ពេលត្រូវរត់រកពេទ្យ

បើមានរោគសញ្ញាកម្រិតស្រាលនៃការលើសកម្រិតជាតិថ្នាំអាស្ពីរីន ដូចជា ហ៊ឹងត្រចៀក ស្ងួតមាត់ និងវិលមុខ សូមទៅពេទ្យឆែកមើល។ ពេទ្យអាចនឹងបញ្ឈប់ ឬកាត់បន្ថយកម្រិតប្រើថ្នាំមួយចំនួន។ ទៅពេទ្យភ្លាម បើប្រើលើសកម្រិតជាតិថ្នាំអាស្ពីរីន ដែលមានចេញសញ្ញា៖
– សន្លប់
– ប្រកាច់
– ក្អួតខ្លាំង
– មិនដកដង្ហើម
– ឡេះឡះ ឬទន់ល្វើយ។

ហើយសូមប្រាប់ពេទ្យព័ត៌មានទាក់ទងថ្នាំយើងប្រើ និងអ្នកពុល៖
– ដបថ្នាំ
– លេបថ្នាំអីខ្លះ
– អាយុអ្នកពុល
– លេបថ្នាំពេលណា
– មានបញ្ហាសុខភាពអីផ្សេងអត់
– លេបថ្នាំហើយ មានផឹកស្រាអត់ ឬលេបជាមួយថ្នាំផ្សេងទៀតអត់។

៣- ព្យាបាលការពុលថ្នាំអាស្ពីរីន

ការព្យាបាលគឺដើម្បី៖
– បង្ការការជ្រាបថ្នាំអាស្ពីរីន
– ផ្ដល់ជាតិទឹកឡើងវិញ និងកែតម្រូវលំនឹងអាស៊ីដ-បាស
– លាងជម្រះចេញជាតិសាលីស៊ីឡាត (salicylate) ចេញពីរាងកាយ។

មួយម៉ោងក្រោយពុលថ្នាំ (លេបចូលជាតិសាលីស៊ីឡាត) ត្រូវលាងក្រពះ។ ពេទ្យអាចប្រើសូលុយស្យុងសូដ្យូម (ទឹកសេរ៉ូមប្រៃ) ដែលមានកំហាប់ដូចនឹងកំហាប់ឈាមក្នុងរាងកាយ មកលាងក្រពះ។ ពេទ្យអាចប្រើបច្ចេកទេសនេះ ជួយអ្នកមានបញ្ហាខ្សោយតម្រងនោម ដើម្បីសម្អាតជាតិពុល កាន់តែរហ័ស។

ដើម្បីព្យាបាលការពុលថ្នាំអាស្ពីរីន ទូទៅ គេត្រូវប្រើថ្នាំ៖

– ថ្នាំធ្យូងខ្មៅ៖ ដើម្បីបញ្ឈប់ជាតិថ្នាំអាស្ពីរីនជ្រាបចូលរាងកាយ ពេទ្យអាចប្រើថ្នាំធ្យូងខ្មៅ ដើម្បីជួយបឺតស្រូបយកជាតិសាលីស៊ីឡាតសល់ក្នុងក្រពះ។ ថ្នាំបញ្ចុះលាមក ក៏មានប្រយោជន៍ដែរក្នុងការជំរុញបន្ទោបង់លាមក ដើម្បីជួយដល់រាងកាយលាងជម្រះជាតិពុលចេញមកក្រៅ។ ការពុលថ្នាំអាស្ពីរីនធ្ងន់ធ្ងរ ត្រូវប្រើថ្នាំធ្យូងខ្មៅច្រើន។

– ចាក់សេរ៉ូមតាមសរសៃ៖ ពុលថ្នាំអាស្ពីរីន ធ្វើឲ្យខ្សោះជាតិទឹក។ ដើម្បីឲ្យមានជាតិទឹកគ្រប់គ្រាន់វិញ ពេទ្យនឹងចាក់សេរ៉ូមតាមសរសៃវ៉ែន (សរសៃឈាម)។

– បញ្ចុះទឹកនោមដោយប្រើសារធាតុអាល់កាឡាំង ជួយកាត់បន្ថយជាតិសាលីស៊ីឡាត ក្នុងរាងកាយ។ ក្នុងអំឡុងបញ្ចុះទឹកនោមដោយសារធាតុអាល់កាឡាំង សមាសធាតុក្នុងធាតុអាល់កាឡាំង មានឥទ្ធិពលលើគីមីសាស្ត្រក្នុងឈាម និងទឹកនោម ដើម្បីជួយតម្រងនោមសម្អាតជាតិសាលីស៊ីឡាត បានកាន់តែច្រើន។ ស្ទើរគ្រប់ករណីទាំងអស់ គេប្រើសូដ្យូមប៊ីកាបូណាត (sodium bicarbonate) ចាក់បញ្ចូលតាមសរសៃវ៉ែន ដើម្បីធ្វើឲ្យឈាម និងទឹកនោមកាន់តែអាល់កាឡាំងថែមទៀត។ ជាតិសាលីស៊ីឡាតកាន់តែច្រើន នឹងចេញពីរាងកាយតាមទឹកនោម។ ពេលខ្លះ គេក៏ប្រើប៉ូតាស្យូម ដើម្បីបង្ការការថយចុះជាតិប៉ូតាស្យូមក្នុងឈាមដែរ។

អ្នកពុលថ្នាំអាចត្រូវការ៖
– ម៉ាស៊ីនជំនួយដង្ហើម
– ដាក់សុងនោម ដើម្បីតាមដានទឹកនោម
– ប្រើថ្នាំគ្រប់គ្រងការឡេះឡះ ប្រកាច់ និងផលវិបាកផ្សេងៗទៀត៕

អត្ថបទផ្ដល់ដោយ៖Hello Krupet

ចុចអាន៖ការស្រាវជ្រាវ៖ ថ្នាំអាស្ពីរីនកម្រិតទាប អាចកាត់បន្ថយហានិភ័យ មិនឱ្យអ្នកជំងឺកូវីដឈឺធ្ងន់ឬស្លាប់បាន

The post លម្អិតខ្ទេចខ្ទីរឿងពុលថ្នាំអាស្ពីរីន និងវិធីព្យាបាលទាន់ពេល appeared first on Kampuchea Thmey Daily.

ពីរថ្ងៃមុនចាក់វ៉ាក់សាំង ហាមប្រើថ្នាំបំបាត់ការឈឺចាប់ បើមិនចាំបាច់

សាង ស្រីល័ក្ខ — Mon, 29 Mar 2021 08:36:52 +0000

មជ្ឈមណ្ឌលត្រួតពិនិត្យនិងបង្ការជំងឺ (CDC) និយាយថា ខ្លួនមិនបានណែនាំឲ្យប្រើថ្នាំ Ibuprofen (ថ្នាំរលាក) និងថ្នាំបំបាត់ការឈឺចាប់ដទៃទៀតដូចជាអាស្ពីរីននិងអាសេតាមីណូហ្វេន ដើម្បីការពារផលប៉ះពាល់ពីការចាក់វ៉ាក់សាំងកូវីដនោះទេ។

ការប្រើប្រាស់ថ្នាំបំបាត់ការឈឺចាប់មុនពេលចាក់វ៉ាក់សាំង អាចធ្វើឲ្យប្រតិកម្មភាពស៊ាំរំខានដល់សមត្ថភាពរាងកាយ ក្នុងការបង្កើតប្រព័ន្ធការពារប្រឆាំងនឹងវីរុស។

វេជ្ជបណ្ឌិត Gregory Poland ប្រធានក្រុមស្រាវជ្រាវវ៉ាក់សាំងនៅគ្លីនិក Mayo ក្នុងទីក្រុង Rochester រដ្ឋមីនីសូតាបានប្រាប់ HealthDay News ថា ការប្រើថ្នាំបំបាត់ការឈឺចាប់មុនពេលចាក់វ៉ាក់សាំង អាចបណ្ដាលឲ្យមានការថយចុះនៃការឆ្លើយតបនៃអង្គបដិប្រាណ។ នេះដោយសារតែគេមិនទាន់ដឹងថា តើថ្នាំទាំងនេះអាចប៉ះពាល់ដល់មុខងាររបស់វ៉ាក់សាំងយ៉ាងដូចម្ដេច។

លោកស្រីវេជ្ជបណ្ឌិត Abinash Virk អ្នកឯកទេសខាងជំងឺឆ្លងនិងអ្នកសម្របសម្រួលកម្មវិធីគ្រប់គ្រងវ៉ាក់សាំងបានប្រាប់ Newsweek ថា ភាពស៊ាំអាចនឹងចុះខ្សោយបន្តិច។ ការឆ្លើយតបចំពោះវ៉ាក់សាំងនេះ គឺសំដៅដល់កុមារដែលបានទទួលថ្នាំអាសេតាមីណូហ្វេន ដែលជាថ្នាំប្រឆាំងនឹងការរលាកមិនមែនជា steroidal ស្រដៀងទៅនឹង ibuprofen។

ទោះយ៉ាងណាមានករណីលើកលែង។ CDC និយាយថាអ្នកដែលលេបថ្នាំទាំងនេះជាទៀងទាត់សម្រាប់លក្ខខណ្ឌផ្សេងៗទាក់ទងនឹងផ្នែកវេជ្ជសាស្ត្រគួរតែបន្ត ហើយជៀសវាងការបញ្ឈប់ឬពន្យារពេលប្រើថ្នាំសម្រាប់ស្ថានភាពសុខភាពនៅជុំវិញការចាក់វ៉ាក់សាំងកូវីដ។

ទោះបីជាមានការណែនាំរបស់ CDC ក៏លោកស្រី Virk មានប្រសាសន៍ថា មនុស្សគួរតែជៀសវាងប្រើថ្នាំបំបាត់ការឈឺចាប់រយៈពេល ៤៨ ម៉ោង មុនពេលចាក់វ៉ាក់សាំងប្រសិនបើអាច៕

ប្រែសម្រួល៖ សាង ស្រីល័ក្ខ

ប្រភព៖newsweek

ចុចអាន៖វេជ្ជបណ្ឌិតហាមផឹកស្រាដាច់ខាតមុនចាក់វ៉ាក់សាំង ហើយត្រូវទទួលទានអាហារជីវជាតិ និងទឹកឲ្យគ្រប់គ្រាន់

The post ពីរថ្ងៃមុនចាក់វ៉ាក់សាំង ហាមប្រើថ្នាំបំបាត់ការឈឺចាប់ បើមិនចាំបាច់ appeared first on Kampuchea Thmey Daily.

ការស្រាវជ្រាវ៖ ថ្នាំអាស្ពីរីនកម្រិតទាប អាចកាត់បន្ថយហានិភ័យ មិនឱ្យអ្នកជំងឺកូវីដឈឺធ្ងន់ឬស្លាប់បាន

Sonya — Wed, 24 Mar 2021 07:12:25 +0000

ការស្រាវជ្រាវថ្មីមួយបង្ហាញថា ការប្រើថ្នាំអាស្ពីរីនអាចបន្ថយហានិភ័យនៃអ្នកជំងឺ COVID-19 មិនឱ្យធ្លាក់ខ្លួនកាន់តែធ្ងន់ធ្ងរឬស្លាប់បាន។

ក្រុមអ្នកស្រាវជ្រាវបានរកឃើញថា ថ្នាំគ្រាប់ក្នុងកម្រិតទាបប្រចាំថ្ងៃអាចជួយកាត់បន្ថយអត្រាប្រើបំពង់អុកស៊ីហ្សែន ឬចៀសបានការចូលក្នុងបន្ទប់ ICU រហូតដល់ជាង ៤០ ភាគរយ។

លើសពីនេះទៅទៀតវាកាត់បន្ថយហានិភ័យនៃការស្លាប់ពីការឆ្លងបានជិតពាក់កណ្តាល បើប្រៀបធៀបនឹងមនុស្សដែលមិនបានប្រើថ្នាំ។

ក្រុមដែលដឹកនាំដោយសាលាវេជ្ជសាស្រ្តនៃសាកលវិទ្យាល័យ ចច វ៉ាស៊ីនតោន (George Washington) សហរដ្ឋអាមេរិក និយាយថា ការស្រាវជ្រាវបង្ហាញថា ថ្នាំអាស្ពីរីនអាចជាការព្យាបាលលឿន ងាយស្រួល និងថោកជាងថ្នាំដទៃទៀត។

ដោយឡែក លោកវេជ្ជបណ្ឌិត Jonathan Chow មានប្រសាសន៍ថា “មូលហេតុដែលយើងចាប់ផ្តើមប្រើថ្នាំអាស្ពីរីនជាមួយអ្នកជំងឺកូវីដ-១៩ ដោយសារតែអ្នកជំងឺភាគច្រើននឹងចាប់ផ្តើមមានផលវិបាកនៃការថប់ដង្ហើមនៅរដូវក្ដៅ”។

ស្របពេលគ្នាដែរ ក្រុមអ្នកជំនាញជឿជាក់ថា សមត្ថភាពរបស់ថ្នាំអាស្ពីរីនក្នុងការការពារការកកឈាមអាចមានអត្ថប្រយោជន៍ចំពោះអ្នកជំងឺកូវីដ។

ការស្រាវជ្រាវដែលចុះផ្សាយនៅក្នុងទិនានុប្បវត្តិ Anesthesia & Analgesia បានធ្វើឡើងចំពោះអ្នកជំងឺ COVID-19 ចំនួន ៤១២ នាក់ដែលចូលមន្ទីរពេទ្យនៅសហរដ្ឋអាមេរិកចន្លោះខែមីនា ២០២០ និងខែកក្កដា ឆ្នាំ ២០២០។ ក្នុងនោះអ្នកជំងឺ ៣១៤ នាក់ (៧៦,៣%) មិនបានទទួលថ្នាំអាស្ពីរីន រីឯអ្នកជំងឺ ៩៨ នាក់ (២៣,៧ ) ទៀតដែលនៅសល់ បានទទួលថ្នាំក្នុងរយៈពេល ២៤ ម៉ោងបន្ទាប់ពីចូលសម្រាកព្យាបាល។

លទ្ធផលបានបង្ហាញថា អ្នកជំងឺដែលលេបថ្នាំអាស្ពីរីនមិនសូវត្រូវការខ្យល់អុកស៊ីហ្សែនមាន ៤៤% ហើយ ៤៣% មិនមានហានិភ័យត្រូវចូលក្នុងបន្ទប់ ICU ទេ។

លើសពីនេះទៅទៀត អ្នកដែលត្រូវបានគេផ្តល់ថ្នាំមាន ៤៧% ហាក់ដូចជាមិនស្លាប់ដោយសារជំងឺ COVID-19 នៅក្នុងមន្ទីរពេទ្យឡើយ។

អ្នកនិពន្ធបានសរុបថា “ការប្រើប្រាស់ថ្នាំអាស្ពីរីនអាចធ្វើឱ្យអ្នកជំងឺទទួលបានលទ្ធផលប្រសើរឡើងពេលដែលកំពុងសម្រាកព្យាបាលនៅមន្ទីរពេទ្យ” ។

ទន្ទឹមនឹងនេះ ការសិក្សាមួយទៀតបានរកឃើញថា ថ្នាំអាស្ពីរីនមួយគ្រាប់ក្នុងមួយថ្ងៃអាចកាត់បន្ថយហានិភ័យនៃការឆ្លងវីរុសកូវីដ-១៩ បានដល់ ២៩ ភាគរយ៕

ប្រែសម្រួល៖ សន្យា

ប្រភព៖ Daily Mail

ចុចអាន៖ ការស្រាវជ្រាវថ្មីបង្ហាញថា អ្នកជំងឺកូវីដ-១៩បានបាត់បង់សមត្ថភាពស្តាប់សំឡេង

ចុចអាន៖ ការស្រាវជ្រាវថ្មី៖ អ្នកគេងមិនសូវលក់ពេលយប់ ឬឧស្សាហ៍ធ្វើការអស់កម្លាំង ងាយឆ្លងជំងឺកូវីដ១៩

The post ការស្រាវជ្រាវ៖ ថ្នាំអាស្ពីរីនកម្រិតទាប អាចកាត់បន្ថយហានិភ័យ មិនឱ្យអ្នកជំងឺកូវីដឈឺធ្ងន់ឬស្លាប់បាន appeared first on Kampuchea Thmey Daily.

ថ្នាំអាស្ពីរីន Archives - Kampuchea Thmey Daily

សាស្ត្រាចារ្យមួយរូបចែករំលែកពីផលប៉ះពាល់នៃថ្នាំអាស្ពីរីន ជាពិសេសលើមនុស្សចាស់

លម្អិត​ខ្ទេចខ្ទី​រឿង​ពុល​ថ្នាំ​អាស្ពីរីន និង​វិធី​ព្យាបាល​ទាន់​ពេល

ពីរ​ថ្ងៃ​មុន​ចាក់​វ៉ាក់សាំង ហាម​ប្រើ​ថ្នាំ​បំបាត់​ការ​ឈឺចាប់ បើ​មិន​ចាំបាច់

ការស្រាវជ្រាវ៖ ថ្នាំអាស្ពីរីនកម្រិតទាប អាចកាត់បន្ថយហានិភ័យ មិនឱ្យអ្នកជំងឺកូវីដឈឺធ្ងន់ឬស្លាប់បាន

លម្អិតខ្ទេចខ្ទីរឿងពុលថ្នាំអាស្ពីរីន និងវិធីព្យាបាលទាន់ពេល

ពីរថ្ងៃមុនចាក់វ៉ាក់សាំង ហាមប្រើថ្នាំបំបាត់ការឈឺចាប់ បើមិនចាំបាច់