អ្នកនាំពាក្យក្រសួងបរិស្ថាន លោកខ្វៃ អាទិត្យា បានឱ្យដឹងថាមន្រ្តីឧទ្យានុរក្ស បានចាត់វិធានការច្បាប់ ស្របតាមក្រមបរិស្ថាននិងធនធានធម្មជាតិ ធ្វើការរុះរើ ផ្ទះលំហែចំនួន១ខ្នង (សាងសង់បានប្រមាណ៨០% ) រោងប្រក់តង់ចំនួនពីរ (រោងស្នាក់នៅ និងរោងបាយ) របងព័ទ្ធបន្លាលួសព័ទ្ធតំបន់ព្រៃមួយផ្នែកប្រហែល១៥០ម៉ែត្រ និងតំបន់ហេដ្ឋារចនាសម្ព័ន្ធមួយចំនួនទៀត នៃតំបន់ឧទ្យានជាតិព្រះសុរាម្រិត កុសមៈ«គិរីរម្យ»  បន្ទាប់ពីបានរកឃើញបទល្មើសធនធានធម្មជាតិ បង្កឡើងដោយជនខិលខូច ដែលបានលួចឈូសឆាយ សាងសង់ដោយខុសច្បាប់ កាលពីពេលថ្មីៗកន្លងមកនេះ។

ក្រសួងបរិស្ថាន ថ្លែងអំណរគុណដល់សាធារណជន ដែលបានចូលរួមសហការផ្តល់ព័ត៌មាន ផ្តល់រូបភាព រាយការណ៍អំពីជនល្មើស សម្រាប់តាមដានស៊ើបអង្កេត លើករណីកាប់គាស់ រុករានដីព្រៃ និងកាប់ឈើ ខុសច្បាប់ នៅតាមតំបន់ការពារធម្មជាតិ នៅក្នុងព្រះរាជាណាចក្រកម្ពុជា។ ចំពោះករណីបទល្មើសធនធានធម្មជាតិ នៅឧទ្យានជាតិព្រះសុរាម្រិត កុសមៈ«គិរីរម្យ» ក្រុមការងារក្រសួងបរិស្ថាន បានសហការជាមួយក្រុមអ្នកច្បាប់ ក្រសួងយុត្តិធម៌ និងស្ថាប័នពាក់ព័ន្ធ ស្រាវជ្រាវ និងនាំខ្លួនជនល្មើស ដើម្បីបញ្ជូនទៅតុលាការចាត់ការ តាមនីតិវិធីនៃច្បាប់។

អ្នកនាំពាក្យក្រសួងបរិស្ថាន ធ្លាប់បានអះអាងថា ក្រសួងនឹងចាត់វិធានការច្បាប់ចំពោះជនល្មើស ដែលបានកាប់រុករានដីព្រៃនៅក្នុងតំបន់ការពារធម្មជាតិ ស្របតាមក្រមបរិស្ថាននិងធនធានធម្មជាតិ មាត្រា៨៥៥ ការធ្វើសកម្មភាពសាងសង់ ឬធ្វើប្រតិបត្តិការគម្រោងបំពានការហាមឃាត់ និងមាត្រា៨៥០ ចំណុច «ង»   ដឹកជញ្ជូន ប្រមូល ធ្វើសន្និធិ ឬប្រមូលសន្និធិផល និងអនុផលធនធានធម្មជាតិដោយគ្មានការអនុញ្ញាត និងចំណុច «ឌ» បោះបង្គោលហ៊ុមព័ទ្ធ ឬដាក់សញ្ញាសម្គាល់លើដីដែលជាទ្រព្យសម្បត្តិរដ្ឋក្នុងតំបន់ការពារធម្មជាតិ ក្នុងគោលបំណងកាន់កាប់ដើម្បីយកដីធ្វើជាកម្មសិទ្ធិ ជាបទល្មើសពាក់ព័ន្ធនឹងការគ្រប់គ្រងតំបន់ការពារធម្មជាតិ។

រាជរដ្ឋាភិបាលពិនិត្យនិងសម្រេច  ព្រមទាំងអនុវត្តន៍ទៅតាមគោលការណ៍បែបបទបច្ចេកទេស ស្របតាមនិតីវិធីច្បាប់ជាធរមាន ចំពោះការអភិវឌ្ឍ រៀបចំ សាងសង់សំណង់ និងហេដ្ឋារចនាសម្ព័ន្ធនានា ហើយមិនអនុញ្ញាតឱ្យមានការឈូសឆាយ កាប់រុករាន ដីព្រៃធ្វើជាកម្មសិទ្ធិដាច់ខាត។

ក្រមបរិស្ថាននិងធនធានធម្មជាតិ ក្នុងមាត្រា៣៧៩ ចំណុច «១» ការរៀបចំគម្រោងស្ថាបនានិងអភិវឌ្ឍហេដ្ឋារចនាសម្ព័ន្ធសាធារណៈគ្រប់ប្រភេទ នៅក្នុងតំបន់ការពារធម្មជាតិ ត្រូវធ្វើការពិគ្រោះយោបល់ជាមុន ជាមួយក្រសួងទទួលបន្ទុកវិស័យបរិស្ថាននិងធនធានធម្មជាតិ និងរដ្ឋបាលថ្នាក់ក្រោមជាតិ និងចំណុច «២» រាល់គម្រោងស្ថាបនា សាងសង់សំណង់ឯកជន នៅក្នុងតំបន់ការពារធម្មជាតិ ត្រូវទទួលការអនុញ្ញាតជាមុនពីក្រសួងទទួលបន្ទុកវិស័យបរិស្ថាននិងធនធានធម្មជាតិ ឬរដ្ឋបាលថ្នាក់ក្រោមជាតិ និងមាត្រា៣៨៦ ការហាមឃាត់សិទ្ធិរបស់បុគ្គល ចែងថា «បុគ្គលពុំមានសិទ្ធិ ផ្តល់ការអនុញ្ញាតទោះដោយផ្ទាល់ក្តីឬប្រយោលក្តី ឱ្យរានដីព្រៃ កាន់កាប់ដី កាប់ដើមឈើ ចាប់សត្វព្រៃគ្រប់ប្រភេទ ឬធ្វើសកម្មភាពគ្រប់យ៉ាង ដើម្បីប្រមូលផល អនុផលធនធានធម្មជាតិក្នុងតំបន់ការពារធម្មជាតិ ដែលផ្ទុយនឹងបទប្បញ្ញត្តិនៃក្រមនេះ»៕

The post មន្ត្រីបរិស្ថានចុះរុះរើសំណង់ខុសច្បាប់ និងប្ដឹងទៅតុលាការករណីទន្ទ្រានដីនៅឧទ្យានជាតិ«គិរីរម្យ» appeared first on Kampuchea Thmey Daily.

ក្រុមការងារជំនាញរបស់អគ្គនាយកដ្ឋានតំបន់ការពារធម្មជាតិ ក្រសួងបរិស្ថាន កាលពីថ្ងៃទី១០-១១ ខែកញ្ញា ឆ្នាំ២០២៥ បានចុះពិនិត្យ និងចាត់វិធានការលើទីតាំងមួយកន្លែងនៅក្នុងតំបន់ឧទ្យានជាតិព្រះសុរាម្រិត កុសមៈ«គិរីរម្យ» ដែលជនខិលខូច បានធ្វើសកម្មភាពឈូសឆាយ ទន្ទ្រានដី សាងសង់ ដោយខុសច្បាប់ ភូមិសាស្ត្រស្រុកភ្នំស្រួច ខេត្តកំពង់ស្ពឺ។

អ្នកនាំពាក្យក្រសួងបរិស្ថាន លោក ខ្វៃ អាទិត្យា បានឱ្យដឹងថា ជនខិលខូច បានលួចសាងសង់ផ្ទះលំហែចំនួន១ខ្នង(សាងសង់បានប្រមាណ៨០% ) បម្រុងនឹងសាងសង់ផ្ទះស្នាក់មួយកន្លែងទៀត រោងប្រក់តង់ចំនួនពីរ បានធ្វើរបងព័ទ្ធបន្លាលួសព័ទ្ធតំបន់ព្រៃមួយផ្នែកប្រហែល១៥០ម៉ែត្រ ហើយកាប់ដើមស្រល់មួយចំនួន និងការដាំដុះដើមដូងប្រមាណ២០ដើម។

យោងតាមអ្នកនាំពាក្យក្រសួងបរិស្ថានរូបនេះ ក្រសួងនឹងចាត់វិធានការច្បាប់ចំពោះជនល្មើស ដែលបានកាប់រុករានដីព្រៃនៅក្នុងតំបន់ការពារធម្មជាតិ ស្របតាមក្រមបរិស្ថាននិងធនធានធម្មជាតិ មាត្រា៨៥៥ ការធ្វើសកម្មភាពសាងសង់ ឬធ្វើប្រតិបត្តិការគម្រោងបំពានការហាមឃាត់ និងមាត្រា៨៥០ ចំណុច «ង» ដឹកជញ្ជូន ប្រមូល ធ្វើសន្និធិ ឬប្រមូលសន្និធិផល និងអនុផលធនធានធម្មជាតិដោយគ្មានការអនុញ្ញាត និងចំណុច «ឌ» បោះបង្គោលហ៊ុមព័ទ្ធ ឬដាក់សញ្ញាសម្គាល់លើដីដែលជាទ្រព្យសម្បត្តិរដ្ឋក្នុងតំបន់ការពារធម្មជាតិ ក្នុងគោលបំណងកាន់កាប់ដើម្បីយកដីធ្វើជាកម្មសិទ្ធិ ជាបទល្មើសពាក់ព័ន្ធនឹងការគ្រប់គ្រងតំបន់ការពារធម្មជាតិ។

ក្រសួងបរិស្ថាន អះអាងថា ខ្លួននឹងសហការជាមួយក្រសួងយុត្តិធម៌ និងស្ថាប័នពាក់ព័ន្ធ ស្រាវជ្រាវ និងនាំខ្លួនជនខិលខូច ដែលទន្ទ្រានដីដោយខុសច្បាប់នៅតំបន់ការពារធម្មជាតិ ទៅកាន់តុលាការ ដើម្បីអនុវត្តវិធានការច្បាប់ជាធរមាន។

សូមបញ្ជាក់ថា រាជរដ្ឋាភិបាលពិនិត្យនិងសម្រេច ព្រមទាំងអនុវត្តន៍ទៅតាមគោលការណ៍បែបបទបច្ចេកទេស ស្របតាមនិតីវិធីច្បាប់ជាធរមាន ចំពោះការអភិវឌ្ឍ រៀបចំ សាងសង់សំណង់ និងហេដ្ឋារចនាសម្ព័ន្ធនានា ហើយមិនអនុញ្ញាតឱ្យមានការឈូសឆាយ កាប់រុករាន ដីព្រៃធ្វើជាកម្មសិទ្ធិដាច់ខាត។

ក្រមបរិស្ថាននិងធនធានធម្មជាតិ ក្នុងមាត្រា៣៧៩ ចំណុច «១» ការរៀបចំគម្រោងស្ថាបនានិងអភិវឌ្ឍហេដ្ឋារចនាសម្ព័ន្ធសាធារណៈគ្រប់ប្រភេទ នៅក្នុងតំបន់ការពារធម្មជាតិ ត្រូវធ្វើការពិគ្រោះយោបល់ជាមុន ជាមួយក្រសួងទទួលបន្ទុកវិស័យបរិស្ថាននិងធនធានធម្មជាតិ និងរដ្ឋបាលថ្នាក់ក្រោមជាតិ និងចំណុច «២» រាល់គម្រោងស្ថាបនា សាងសង់សំណង់ឯកជន នៅក្នុងតំបន់ការពារធម្មជាតិ ត្រូវទទួលការអនុញ្ញាតជាមុនពីក្រសួងទទួលបន្ទុកវិស័យបរិស្ថាននិងធនធានធម្មជាតិ ឬរដ្ឋបាលថ្នាក់ក្រោមជាតិ និងមាត្រា៣៨៦ ការហាមឃាត់សិទ្ធិរបស់បុគ្គល ចែងថា «បុគ្គលពុំមានសិទ្ធិ ផ្តល់ការអនុញ្ញាតទោះដោយផ្ទាល់ក្តីឬប្រយោលក្តី ឱ្យរានដីព្រៃ កាន់កាប់ដី កាប់ដើមឈើ ចាប់សត្វព្រៃគ្រប់ប្រភេទ ឬធ្វើសកម្មភាពគ្រប់យ៉ាង ដើម្បីប្រមូលផល អនុផលធនធានធម្មជាតិក្នុងតំបន់ការពារធម្មជាតិ ដែលផ្ទុយនឹងបទប្បញ្ញត្តិនៃក្រមនេះ»។

ក្រសួងបរិស្ថាននឹងបន្តនីតិវិធីច្បាប់ កសាងសំណុំរឿងបញ្ជូនទៅតុលាការ ករណីរាល់បទល្មើសធនធានធម្មជាតិខាងលើ មិនលើកលែងចំពោះជនល្មើស និងអ្នកពាក់ព័ន្ធបទល្មើស ដើម្បីធានាការគ្រប់គ្រងធនធានធម្មជាតិ ការអភិរក្សជីវ:ចម្រុះ និងការរស់នៅប្រកបដោយចីរភាព ជាពិសេសការបង្កើនគម្របបៃតង និងការសម្រេចបានគោលដៅយុទ្ធសាស្រ្តរបស់រាជរដ្ឋាភិបាល ដែលនៅឆ្នាំ២០៥០ កម្ពុជាជាប្រទេសអព្យាក្រឹតកាបូន៕

The post ក្រសួងបរិស្ថាននឹងចាត់វិធានការច្បាប់លើលើជនខិលខូច ដែលឈូសឆាយ ទន្រ្ទានដី សង់សំណង់ល្មើសច្បាប់នៅឧទ្យានជាតិ«គិរីរម្យ» appeared first on Kampuchea Thmey Daily.

លោក ផេន សុផាត អភិបាលរងស្រុកកោះសូទិន បានបញ្ជាក់ឲ្យដឹងថា ចំពោះករណីនេះ ប្រជាពលរដ្ឋនៅតំបន់នោះបានអាស្រ័យផលតៗគ្នា មិនមានប៉ះពាល់ដល់ដែនឡូត៍បឹងលេខ៨នោះឡេីយ ពោលគឺប្រជាពលរដ្ឋដែលប្រកបរបរធ្វេីស្រែចម្ការអាចទាញទឹកយកមកប្រើប្រាស់ដោយមិនមានការហាមឃាត់ដូចការចុះផ្សាយនោះទេ។ លោកអភិបាលរងស្រុកបន្ថែមថា ទោះបីជាយ៉ាងណាក៏ដោយ អាជ្ញាធរនៅតែបន្តថែរក្សា និងទប់ស្កាត់ជានិច្ចចំពោះបទល្មេីសទន្ទ្រាន​យក​ដីបឹង ដីរដ្ឋមកធ្វេីកម្មសិទ្ធ ធ្វេីយ៉ាងណារក្សាឲ្យបាននូវសម្បត្តិធនធានធម្មជាតិ ដេីម្បីជាជំរកត្រីពងកូននៅរដូវទឹកឡេីង។

លោក អភិបាលរងស្រុក ក៏បានជំរុញឲ្យអាជ្ញាធរមូលដ្ឋានសហការគ្នាផ្សព្វផ្សាយពីច្បាប់ និងការថែរក្សាដែនបឹងឲ្យនៅគង់វង្ស ហេីយកុំឲ្យមានសកម្មភាពប្រជាពលរដ្ឋនាំគ្នាមកទន្ទ្រានយកដីបឹងធ្វេីកម្មសិទ្ធឬអាស្រ័យផលបន្តទៀត៕

អត្ថបទ៖​ ឡេក​ ចាន់ពេជ្រ

The post អាជ្ញាធរស្រុកកោះសូទិន ច្រានចោលការផ្សព្វ​ផ្សាយ​ការទន្ទ្រានដីឡូត៍លេខ៨ ដោយនាយប៉ុស្តិ៍នគរបាលឃុំល្វេ appeared first on Kampuchea Thmey Daily.

 លោក អ៊ាង សុផល្លែត លើកឡើងដូច្នេះ នៅក្នុងកិច្ចសន្ទនាអំពីសមភាពយេនឌ័រនៅក្នុងផែនការជាតិរួមចំណែកឆ្លើយតបនឹងបម្រែបម្រួលអាកាសធាតុដំណាក់កាលទី៣ រៀបចំឡើងនាថ្ងៃទី២៥ ខែមេសា ឆ្នាំ២០២៥។

រដ្ឋមន្ត្រីក្រសួងបរិស្ថាន លើកឡើងដូច្នេះ៖« សប្ដាហ៍មុន មានករណីមួយនៅខេត្តពោធិ៍សាត់ ចុះកិច្ចសន្យាហើយដោះលែងវិញ! ខ្ញុំសូមជម្រាបជូនថា យើងមានច្បាប់ដែលឡាយព្រះហស្ថដោយព្រះករុណាដាក់ឱ្យប្រើប្រាស់។ នៅពេលដែលយើងមានច្បាប់ដែលដាក់ឱ្យប្រើប្រាស់ហើយ យើងជាមន្ត្រី យើងបែជាមិនអានច្បាប់ យើងចុះកិច្ចសន្យាដោះលែងមន្ត្រី អ្នកដែលប្រព្រឹត្តបទល្មើសទៅវិញ។ សួរថាតើអ្នកណាជាអ្នកខុស? គឺមន្ត្រីដែលមិនអនុវត្តច្បាប់ គឺជាអ្នកខុស។»។

លោករដ្ឋមន្ត្រី បញ្ជាក់ជាថ្មីថា ជនល្មើស មិនធំជាងច្បាប់ដែលមានជាធរមានឡើយ ដូច្នេះមន្ត្រីក្រសួងបរិស្ថាន ត្រូវតែយកច្បាប់មកអនុវត្តជាដាច់ខាតឱ្យបានម៉ឺងម៉ាត់ ហើយត្រូវបញ្ឈប់សកម្មភាពចុះកិច្ចសន្យាដោះលែងជនល្មើសតទៅទៀត។

លោក អ៊ាង សុផល្លែត អះអាងថា នៅក្រោមការដឹកនាំរបស់លោក ក្រសួងបរិស្ថាន ដាក់ចេញវិធានការដើម្បីដោះស្រាយបញ្ហាកាប់ព្រៃឈើ និងបទល្មើសលើវិស័យបរិស្ថានដូចជា ការអនុវត្តច្បាប់ម៉ឺងម៉ាត់, ការសហការជាមួយអាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធ និងការប្រើបច្ចេកវិទ្យាដ្រូន ដើម្បីបង្ក្រាបបទល្មើសក្នុងវិស័យបរិស្ថាន។

ពីពិធីដដែល លោក អ៊ាង សុផល្លែត ប្រាប់មន្ត្រីថា ដើម្បីការពារធនធានធម្មជាតិឱ្យបានគងវង្ស គឺទាល់តែយកច្បាប់ដែលមកអនុវត្តឱ្យបានម៉ឺងម៉ាត់ រួមជាមួយការសហការជាមួយគ្រប់ភាគីពាក់ព័ន្ធទាំងអស់ រួមទាំងអង្គការសង្គមស៊ីវិលផងដែរ។៕

ដោយ៖ ង៉ិល ណារ៉ាត់

The post រដ្ឋមន្ត្រីបរិស្ថាន ខកចិត្តរឿងមន្ទីរបរិស្ថានពោធិ៍សាត់មិនអនុវត្តច្បាប់លើអ្នកទន្រ្ទានដីខុសច្បាប់ បែជាឱ្យចុះកិច្ចសន្យាហើយដោះលែង appeared first on Kampuchea Thmey Daily.

ពលរដ្ឋ​រាយការណ៍ករណីទី ១ ប្រទះឃើញសកម្មភាពឈួសឆាយនិងដុតព្រៃនៅព្រឹកថ្ងៃទី ០៩ ខែ មិថុនាឆ្នាំ ២០២៤ នៅលើគោលដៅស្ថិតក្នុងភូមិដូនទ្រី ឃុំជ្រៃ ស្រុកមោងឬស្សី ត្រង់ចំណុចបឹងត្រស់ ដែលព្រៃក្នុងតំបន់ខាងលើនេះពុំធ្លាប់មានការអាស្រ័យផលម្តងនោះទេ។ ករណីទី ២ នៅថ្ងៃទី ១៥ ខែមិថុនា ឆ្នាំ២០២៤ នៅចំណុចបាសឹង ស្ថិតក្នុង ភូមិទួលប្រាំពីរ ឃុំកកោះ ស្រុកម៉ោងឬស្សី ខេត្តបាត់ដំបង។

ជុំវិញករណីខាងលើ លោក ទេព ហន អភិបាលស្រុក​មោងឫស្សី​បានប្រាប់កម្ពុជាថ្មីតាមតេលេក្រាមថា លោកកំពុងជាប់រៀន​​នៅភ្នំពេញ ឲ្យកម្ពុជាថ្មីធ្វើការទំនាក់ទំនងជាមួយអភិបាលស្តីទីតែទំនាក់ទំនងមិនបាន។

លោក ជួង សុភា នាយខ័ណ្ឌរដ្ឋបាលជលផលប្រាប់ឲ្យ​កម្ពុជាថ្មី​ដឹង​ថា «ចាំខ្ញុំឲ្យមន្ត្រីខ្ញុំចុះពិនិត្យមើល»។

កាលពី​ថ្ងៃទី១៣ ខែឧសភា ឆ្នាំ២០២៤ កម្លាំងផ្នែកសឹករងមោងឫស្សីចំនួន ០២ នាក់ សហការជាមួយកំលាំងកងពលតូចថ្មើរជើងលេខ ៥២ ចំនួន ០៣ នាក់ បានដើរល្បាតត្រួតពិនិត្យមើលដីតំបន់ ៣ ក្នុងភូមិសាស្រ្ត ភូមិដូនទ្រី ឃុំជ្រៃ ស្រុក​មោងឫស្សី នៅចន្លោះបង្គោលលេខ ២២២ និងបង្កោលលេខ ២២៣ បានប្រទះឃើញមានការទន្ទ្រាន និងសាបព្រួសស្រូវថ្មី លើតំបន់តែមួយលើចំណុច ៤ ផ្សេងគ្នា (ករណីទី១)។

ប្រភព​បានបង្ហាញអត្តសញ្ញាណ​ជន​​ដែលពាក់ព័ន្ធ​មានឈ្មោះ “ឡាក់” រស់នៅភូមិអង្រ្គង ឃុំជ្រៃ ស្រុកមោងឫស្សី ដែលបាន​ឈួស​ឆាយ​និងព្រួសស្រូវ ក្នុងនោះ មាន ១-តំបន់បឹងត្រស់ ចំណុចទី១ ចំនួន ០.៥៩ហិតា។ ២-តំបនត់បឹងត្រស់ ចំណុច​ទី​២ ចំនួន ០.៧០ ហិតា។ ៣-តំបន់បឹងត្រស់ ចំណុចទី៣ ចំនួន០.២០ហិតា ។ ៤-តំបន់បឹងត្រស់ ចំណុចទី៤ ចំនួន​០.៥០ ហិតា (ជាដីកូនឈ្មោះ ឡាក់)។

បើទោះបីយ៉ាងណា ប្រជាពលរដ្ឋសំណូមពរឲ្យអភិបាលខេត្តយកចិត្តទុកដាក់បើពុំនោះទេតំបន់ព្រៃដែន​ជម្រកត្រី នឹងបាត់បង់កាន់តែច្រើន ខណះរាល់បទល្មើសពលរដ្ឋ​អះអាងថាបានរាយការណ៍មន្រ្តី តែ​គ្មានប្រសិទ្ធិភាពក្នុងការអនុវត្តផ្លូវច្បាប់។

ពលរដ្ឋ​ចោទ​ប្រកាន់ថា រាល់ការ​រាយការណ៍ទៅអត់ប្រយោជន៍ ពេលខ្លះក៏ឃើញមន្រ្តី ២ ទៅ ៣ នាក់ចុះមើល ក្រោយ​មក​ស្ងាត់ដូចចោរលួចសេះ ពេលនេះពលរដ្ឋ​ឈប់ប់ខ្វល់ឃើញពេលណាប្រាប់តែអ្នកកាសែតពេលនោះ៕

អត្ថបទ៖ សៅ សារិទ្ធ

The post កើតករណី​ឈូសឆាយ​ ទន្រ្ទានព្រៃ​ដែន​​ជម្រកមច្ឆាជាតិបន្តបន្ទាប់ ២ ករណី​នៅស្រុកមោងឫស្សី appeared first on Kampuchea Thmey Daily.

ប្រភពព័ត៌មានបានឲ្យដឹងថា ក្រុមអ្នកឈូសឆាយព្រៃរដ្ឋនៅតំបន់ព្រៃឡង់ មានឈ្មោះ ម៉ាប់ បានយកត្រាក់ទរ័របស់ខ្លួនចូលទៅឈូសឆាយយកដីព្រៃធ្វើកម្មសិទ្ធិ ខណៈពលរដ្ឋនៅមិនទាន់ឃើញអាជ្ញាធរចាត់វិធានការណាមួយនៅឡើយ។

  លោក តូច សុភី ជាភ្នាក់ងារបរិស្ថានគ្រប់គ្រងនៅតំបន់ព្រៃឡង់ បានឲ្យដឹងថា លោកចាត់កម្លាំងចុះទៅពិនិត្យនឹងចាត់ការទៅតាមច្បាប់។ លោក អះអាងថា កម្លាំងជំនាញមិនដែលធ្វេសប្រហេស និងការបំពេញតួនាទីរបស់ខ្លួនម្ដងឡើយ ហើយលោកតែងតែចាត់កម្លាំងជំនាញចុះពិនិត្យជានិច្ច ប៉ុន្តែពួកគាត់មានគ្នាតិច វិសាលភាពគ្រប់គ្រងមានទំហំធំធេងណាស់ ចឹងត្រូវមានការចូលរួមទប់ស្កាត់ទាំងអស់គ្នា។

ជុំវិញការបំភ្លឺរបស់មន្ត្រីជំនាញនេះដែរ គេនៅមិនទាន់ឃើញមានសមត្ថកិច្ចជំនាញណាម្នាក់ចុះមកបង្ក្រាបសោះឡើយ។

ដោយឡែក ពលរដ្ឋនៅស្រុកឆែប បានឲ្យដឹងថា នៅតំបន់ខាងលើសំបូរទៅដោយព្រៃដីមានជីវជាតិល្អ ហេតុនេះហើយក្រុមឈ្មួញតែងតែចង់បានដោយបំពានមិនខ្លាចច្បាប់ ដោយពួកគេបានខិតខំរកគ្រប់ល្បិចកល ដើម្បីច្បាមយកមកធ្វើជាកម្មសិទ្ឋិរបស់ខ្លួន ហើយនៅមានមេឈ្មួញមានលុយជាច្រើនទៀត កំពុងលួចឈូសឆាយដីព្រៃរបស់រដ្ឋយកធ្វើកម្មសិទ្ឋផ្ទាល់ខ្លួន ហើយពួកគេតែងតែរួចផុតពីការបង្ក្រាបនិងមិនជាប់ទណ្ឌកម្មពីសំណាញ់ច្បាប់នោះឡើយ។

ប្រជាពលរដ្ឋបានសំណូមពរដល់លោកគឹម រិទ្ធី អភិបាលខេត្តព្រះវិហារ និងក្រសួងពាក់ព័ន្ធនានា មេត្តាចាត់វិធានការក្តៅចំពោះក្រុមឈ្មួញដែលកំពុងធ្វើព្យុះភ្លៀងតាមទំនើងចិត្តដោយមិនខ្លាចច្បាប់សោះឡើយ៕

អត្ថបទ៖​ ជុន កុសល

The post ក្រុមឈ្មួញឈួសដីព្រៃរបស់រដ្ឋក្នុងតំបន់ព្រៃឡង់ យកធ្វើជាកម្មសិទ្ធិផ្ទាល់ខ្លួន ខណៈមិនទាន់ឃើញអាជ្ញាធរបង្ក្រាប appeared first on Kampuchea Thmey Daily.

រដ្ឋបាលខេត្តបានចេញមកស្នើសុំទៅកាន់ប្រជាពលរដ្ឋបែបនេះ គឺបន្ទាប់ពីរដ្ឋបាលខេត្តសង្កេតឃើញថា មានពលរដ្ឋ បានជឿលើមេក្លោង មេខ្យល់  ដែលញុះញង់ឱ្យទន្រានដី និងមានអ្នកប៉ុនប៉ងទន្រានដីព្រៃដោយខុសច្បាប់លើដីស្ថានីយស្ដារព្រៃឈើឡើងវិញដែលស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ។

គួរឱ្យដឹងថា រាជរដ្ឋាភិបាលកម្ពុជា បានប្រគល់ទីតាំងដីស្ថានីយស្តារព្រៃឈើឡើងវិញ ដែលស្ថិតនៅស្រុកកូនមុំ ខេត្តរតនគិរីនេះ  ជូនក្រសួងកសិកម្ម រុក្ខាប្រមាញ់ និងនេសាទ ប៉ុន្តែកន្លងមកគេសង្កេត ឃើញថាមានសកម្មភាពរំលោភទន្ទ្រានកាន់កាប់ដីនេះដោយខុសច្បាប់។

នៅមុនការចេញសេចក្ដីជូនដំណឹងនាពេលនេះ ពោលគឺកាលពីថ្ងៃទី២៦ ខែមករា ឆ្នាំ២០២៤ អភិបាលរងខេត្តរតនៈគិរី លោក ខ័ណ្ឌ ចំណន បានដឹកនាំកម្លាំងសមត្ថកិច្ចជំនាញចម្រុះស្ថាប័នចុះពិនិត្យជាក់ស្ដែងអំពីស្ថានភាពកាប់បំផ្លាញទន្រ្ទានដីព្រៃរបស់រដ្ឋយកធ្វើជាកម្មសិទ្ធិឯកជន នៅទីតាំងចំនួន ៤ ស្ថិតក្នុងភូមិកាំបាក់ ឃុំតឺន ស្រុកកូនមុំ ខេត្តរតនគិរី។  

ជាលទ្ធផល សមត្ថកិច្ចជំនាញបានរកឃើញថា ទីតាំងទី១ ត្រង់ចំណុចទំពាំងកំភេន និយាមកាលេខ០៦៨៣២១០-១៥១៦៧៦៩ ទីតាំងទី២ ត្រង់ចំណុចជើងភ្នុំគ្រែខាងត្បូងនិយាមកាលេខ០៦៨២៨១៩-១៥១៧២៧៤ ទីតាំងទី៣ ត្រង់ចំណុចខ្នងភ្នុំគ្រែនិយាមកាលេខ០៦៨២៤៣៦-១៥១៩១៤៣ និងទីតាំងទី៤ ស្ថិតនៅជើងភ្នុំគ្រែខាងជើងនិយាមកាលេខ០៦៨២៣៣៩-១៥២០១៧៩ ត្រូវបានកាប់ទន្ទ្រានភាគច្រើនជាដីកាប់ទន្រានរានចាស់ និងថ្មី ប៉ុន្តែបច្ចុប្បន្នដីខ្លះ ត្រូវបានប្រជាពលរដ្ឋដាំដំឡូងមី ដីខ្លះទៀតដាំកៅស៊ូ ស្វាយចន្ទី ហើយត្រង់ទីតាំងទី៤ គឺមានពលរដ្ឋកសាងសាលាបុណ្យ ដោយមិនទាន់ប្រក់ដំបូល ថែមមានព្រះសង្ឃគង់នៅទីនោះ៕

អត្ថបទ៖ វុទ្ធឦសាន

The post អាជ្ញាធរ ឱ្យពលរដ្ឋឈប់រំលោភយកដីព្រៃ តាមមេក្លោងញុះញង់ និងចាកចេញពីដីស្ថានីយស្ដារព្រៃឈើជាបន្ទាន់ appeared first on Kampuchea Thmey Daily.

ជាក់ស្តែង នៅព្រឹកថ្ងៃទី២៣ ខែមករា ឆ្នាំ២០២៤ រូបភាពជាច្រើនសន្លឹកបានបង្ហាញថា សកម្មភាពលួចដុតក្នុងព្រៃស្រោងជាច្រើនហិកតា ត្រូវបានគេក្រៀវឲ្យងាប់បន្តិចម្តងៗងាយស្រួល និងគេដុតនៅពេលយប់ស្ងាត់ ដែលមានផ្សែងហ៊ុយទ្រលោម។

បើតាមអ្នកយាមដីម្នាក់ បានឲ្យដឹងថា ករណីនេះមានអ្នកមានលុយរស់នៅក្រុងបានលុងមួយចំនួន បានផ្តល់លុយជួលកម្មករ ឲ្យដើរបាញ់ថ្នាំព្រៃស្រោង ទុកចំណាំដុតជាកង់ៗ លក្ខណៈសន្សឹមៗ បង្វែងដានអាជ្ញាធរ និងមន្ត្រីជំនាញ ពោលគឺធ្វើការដុតបំផ្លាញព្រៃឈើខាងក្នុងមុន ចេញមកក្រៅលាតសន្ធឹងលើផ្ទៃដីរាប់រយហិកតាដោយបំលែងជាដីកម្មសិទ្ធិដូចជាដាំកៅស៊ូ ដាំដំឡូង ដាំស្វាយចន្ទីជាដើម ម្ល៉េះបើគ្មានការទប់ស្កាត់ទេដីព្រៃស្រោងខាងលើនេះ នឹងវិនាសហិនហោចជាក់ជាមិនខានឡើយ។

ទាក់ទិនទៅនឹងការកាប់ទន្ទ្រាន ដុតដីព្រៃរបស់រដ្ឋខាងលើនេះដែរ លោក សេក ហៃ អភិបាលស្រុកកូនមុំ បានឲ្យ កម្ពុជាថ្មី ដឹងតាមប្រព័ន្ធតេឡេក្រាម នៅរសៀលថ្ងៃទី២៣ ខែមករា ឆ្នាំ២០២៤ថា នាពេលនេះលោកកំពុងបញ្ជារឲ្យកម្លាំងចុះទៅពិនិត្យទីតាំងជាក់ស្ដែងម្ដងទៀត ខណៈជំនាញបរិស្ថានធ្លាប់បានចុះទៅពិនិត្យម្តងរួចមកហើយ។

លោក ញ៉ែម សំអឿន អភិបាលខេត្តរតនគិរី និងជាប្រធានគណៈបញ្ជាការឯកភាពខេត្ត បានប្រាប់«កម្ពុជាថ្មី» តាមប្រព័ន្ធតេលេក្រាមនៅយប់ថ្ងៃទី២៣មករា ថា ករណីនេះ កើតឡើងតាំងពីដើមខែមិនា ឆ្នាំ២០២៣​ ខណៈជំនាញបរិស្ថានបានចុះទៅត្រួតពិនិត្យមើលបានឃើញដែរ តែរកមិនឃើញជនល្មើសទេ ទោះមានរោងនៅទីតាំងជាក់ស្ដែង។ អភិបាលខេត្តបានអះអាងថា នៅថ្ងៃខានស្អែក អាជ្ញាធរស្រុកកូនមុំនឹងចុះទៅពិនិត្យមើលម្តងទៀត៕

អត្ថបទដោយ៖ វុទ្ធឦសាន

The post ដីព្រៃរបស់រដ្ឋរាប់រយហិកតា ក្នុងស្រុកកូនមុំ រងការកាប់ទន្ទ្រាន និងដុតបំផ្លាញធ្វើជាកម្មសិទ្ធិផ្ទាល់ខ្លួន appeared first on Kampuchea Thmey Daily.