បើតាមកញ្ញា សុខ ច័ន្ទរស្មី លេខាធិការថ្នាក់ជាតិនៃបណ្ដាញ ALiSEA បានបញ្ជាក់ថា កម្មវិធីនេះ មានគោលបំណងលើកកម្ពស់ការយល់ដឹងអំពីកសិអេកូឡូស៊ី និងអត្ថប្រយោជន៍របស់វាសម្រាប់អ្នកប្រើប្រាស់ អ្នកផលិត និង បរិស្ថាន តាមរយៈការបង្ហាញពីការអនុវត្តកសិអេកូឡូស៊ី គំនិតផ្ដួចផ្ដើមប្រកបដោយភាពច្នៃប្រឌិតនៅក្នុង សហគមន៍ និងពង្រឹងការយល់ដឹងរួមលើកសិអេកូឡូស៊ី។ ផ្សារភ្ជាប់អ្នកសារព័ត៌មានទៅកាន់ប្រភពព័ត៌មានដែលអាចទុកចិត្តបានទាក់ទងនឹងការច្នៃប្រឌិតផ្នែក កសិកម្ម និងសុវត្ថិភាពចំណីអាហារ។ សម្រួលដល់ការចែករំលែកបទពិសោធន៍ និងផ្សារភ្ជាប់អ្នកសារព័ត៌មានជាមួយអ្នកជំនាញ អាជ្ញាធរមូល ដ្ឋាន កសិករ យុវជន និងនិស្សិត និងជាការពង្រឹងសមត្ថភាពអ្នកសារព័ត៌មានក្នុងស្រុកឱ្យយល់កាន់តែស៊ីជម្រៅ អំពីកសិអេកូឡូស៊ី។

លោក សុខ សុធា អ្នកជំនាញកសិអេកូឡូស៊ី បានបង្ហាញថា កសិអេកូឡូស៊ី គឺជាវិធីសាស្ត្រមួយដែលរួមបញ្ចូលគោលការណ៍អេកូឡូស៊ី ជាមួយសង្គម និងសេដ្ឋកិច្ច ហើយវាត្រូវបានអនុវត្តនូវទូទាំងពិភពលោក។ ការអនុវត្តកសិអេកូឡូស៊ី មានគោលបំណងដើម្បីគ្រប់គ្រងប្រព័ន្ធកសិកម្ម និងប្រព័ន្ធស្បៀងអាហារប្រកបដោយនិរន្តរភាព បង្កើនប្រតិភាពក្នុងការអនុវត្តកសិកម្មរួមគ្នារវាងមនុស្ស សត្វ រុក្ខជាតិ និងបរិស្ថានជុំវិញ ព្រមទាំងលើកកម្ពស់ប្រព័ន្ធស្បៀង និងសមធម៌សង្គម ដោយបុគ្គលម្នាក់ៗអាចមានសិទ្ធិជ្រើសរើសអ្វីដែលពួកគេចង់បរិភោគ និងជ្រើសរើសរបៀបដែលស្បៀងអាហារទាំងអស់នោះត្រូវបានផលិតឡើង។

លោក សុខ សុធា បានឱ្យដឹងថា គោលការណ៍សំខាន់ៗរបស់កសិអេកូឡូស៊ី គឺជាការលើកកម្ពស់ផលិតកម្មដំណាំចម្រុះ និងការចិញ្ចឹមសត្វ ដើម្បីធ្វើឱ្យប្រព័ន្ធអេកូឡូស៊ីមានភាពល្អប្រសើរ ជួយថែរក្សា និងការអភិរក្សដីដោយប្រើប្រាស់បច្ចេកទេសស្របតាមគោលការណ៍ធម្មជាតិ ដូចជាការគ្រប់គល់ ឬរងដំណាំ ការប្រើប្រាស់ជីកំប៉ុសគោក ជីកំប៉ុសទឹក ជីធម្មជាតិផ្សេងៗទៀត និងកាត់បន្ថយនូវភាពរំខានដល់ដី។ កាត់បន្ថយការប្រើប្រាស់សារធាតុគីមី ជំនួសវិញដោយប្រើថ្នាំពុលផលិតផលពីរុក្ខជាតិ ឬវិធានការចម្រុះការពារដំណាំតាមរយៈវិធីសាស្ត្រកម្ចាត់សត្វល្អិត និងជំងឺ។ ការអនុវត្តនេះដែរ ក៏ជាការបង្កើនការយល់ដឹង ជំនាញ និងការអនុវត្តដែលបង្កើតឡើងដោយផ្អែកលើបទពិសោធន៍របស់កសិករលើផ្នែកកសិកម្មបរិស្ថាន និងស្បៀងអាហារក្នុងតំបន់ និងស្វែងយល់បន្ថែមនៅអ្វីដែលថ្មី។

អ្នកជំនាញដដែលក៏បានបញ្ជាក់ថា កសិអេកូឡូស៊ីផ្ដល់អត្ថប្រយោជន៍យ៉ាងច្រើនដល់កសិករ តាមរយៈការជួយរក្សាប្រព័ន្ធអេកូឡូស៊ី អភិរក្សទឹក និងកាត់បន្ថយការបំពុល និងសឹករីករិលនៃដី។ ជួយជំរុញជីវភាពប្រជាកសិករកាន់តែល្អប្រសើរឡើង តាមរយៈការលើកកម្ពស់ការអនុវត្តកសិកម្មប្រកបដោយនិរន្តរភាព កសិអេកូឡូស៊ីក៏អាចបង្កើនប្រាក់ចំណូលកសិករ និងលើកកម្ពស់សុខុមាលភាពរបស់កសិករ។ ក្រៅពីនោះ កសិអេកូឡូស៊ីក៏ជាជួយបង្កើនលទ្ធភាពទទួលបានស្បៀងអាហារប្រកបដោយគុណភាព ជាពិសេសសម្រាប់សហគមន៍មូលដ្ឋាន ហើយតាមការអនុវត្តកសិអេកូឡូស៊ី និងជួយឱ្យប្រព័ន្ធកសិកម្មអាចសម្របទៅនឹងការប្រែប្រួលអាកាសធាតុ។

សូមបញ្ជាក់ថា ទស្សនកិច្ចសិក្សាឈ្វេងយល់ការអនុវត្តកសិអេកូឡូស៊ីនៅខេត្តសៀមរាប និងខេត្តកំពង់ធំនេះ គឺដើម្បីឆ្លើយតបតម្រូវការនៃការផ្លាស់ប្តូរចំណេះដឹង និងចែករំលែកបទពិសោធន៍នៃតំបន់ផ្សេងៗគ្នា បង្កើតកន្លែង ឬជាវេទិកាប្រមូលផ្តុំមួយ ដែលភាគីពាក់ព័ន្ធទាំងអស់ អាចចូលរួម និងរៀនពីគ្នាទៅវិញទៅមកលើការផ្លាស់ប្តូរនេះ និងបង្កើនការលើកកម្ពស់ការយល់ដឹងលើផ្នែកកសិអេកូឡូស៊ីឱ្យកាន់តែទូលំទូលាយ ទាំងថ្នាក់ជាតិ និងតំបន់ តាមរយៈការគាំទ្រប្រព័ន្ធផ្សព្វផ្សាយបែបចម្រុះ៕

អត្ថបទ៖ គឿនវេត

The post អ្នកសារព័ត៌មានជាង២០ស្ថាប័ន បានធ្វើទស្សនកិច្ចសិក្សាឈ្វេងយល់ ពីការអនុវត្តកសិអេកូឡូស៊ី នៅខេត្តសៀមរាប និងកំពង់ធំ appeared first on Kampuchea Thmey Daily.

ការបំពេញទស្សនកិច្ចរបស់អ្នកនយោបាយ និងសកម្មជនវ័យក្មេងកម្ពុជាទៅកាន់ប្រទេសជប៉ុននេះ ជាផ្នែកមួយនៃកម្មវិធីផ្លាស់ប្តូរយុវជនរបស់ក្រសួងការបរទេសជប៉ុន ហៅថា JENESYS (កម្មវិធីបណ្តាញផ្លាស់ប្តូរសិស្សនិស្សិត និងយុវជនរវាងប្រទេសជប៉ុន និងបណ្តាប្រទេសអាស៊ីខាងកើត) ដោយនេះ គឺជាដំណើរទស្សនកិច្ចលើកទី៨ ។

អំឡុងពេលបំពេញទស្សនកិច្ច អ្នកចូលរូមទាំង១០រូប នឹងទៅទស្សនាសភាជាតិ ហើយធ្វើការផ្លាស់ប្តូរទស្សនៈជាមួយសមាជិកសភាជប៉ុននៃសម្ព័ន្ធមិត្តភាពសភាជប៉ុន-កម្ពុជា នៅរាជធានីតូក្យូ។ លើសពីនេះ ពួកគេក៏នឹងធ្វើដំណើរទៅខេត្តកាណាហ្គាវ៉ា ដើម្បីស្វែងយល់ការបោះឆ្នោតជ្រើសរើសក្រុមប្រឹក្សាក្រុងហ្ស៊ូស៊ីថែមទៀតផង។

សូមជម្រាបថា កម្មវិធីនេះបានដំណើរការចាប់តាំងពីឆ្នាំ២០១៨ មក ក្នុងគោលបំណងជួយគាំទ្រដល់ការអភិវឌ្ឍតាមបែបប្រជាធិបតេយ្យរបស់ប្រទេសកម្ពុជា តាមរយៈការជំរុញការសន្ទនារវាងគណបក្សកាន់អំណាច គណបក្សប្រឆាំង និងភាគីផ្សេងៗ៕

The post អ្នកនយោបាយ និងសកម្មជនវ័យក្មេងកម្ពុជា ១០រូប ទៅបំពេញទស្សនកិច្ចនៅជប៉ុន appeared first on Kampuchea Thmey Daily.

ក្នុង​សេចក្ដីប្រកាសព័ត៌មាន​ចុះថ្ងៃទី​២៨ ខែ​មិថុនា ក្រសួងការបរទេស​កម្ពុជាឱ្យ​ដឹង​ថាក្នុងដំណើរទស្សនកិច្ច​នេះលោក Lawrence Wong នឹងមានព្រះរាជសាវនាការជាមួយ ព្រះករុណាព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង ព្រមទាំង​មានជំនួបសម្តែងការគួរសមជាមួយប្រធាន​ព្រឹទ្ធសភា សម្ដេច​តេជោ ហ៊ុន សែន និង​នាយករដ្ឋមន្ត្រី សម្ដេចធិបតី ហ៊ុន ម៉ាណែត ផងដែរ។

ក្នុង​សេចក្ដីប្រកាសនោះបន្ថែមថា៖ «នាយករដ្ឋមន្ត្រីទាំងពីរនឹងធ្វើការពិភាក្សាស៊ីជម្រៅបន្ថែមទៀត លើទំនាក់ទំនងដ៏យូរអង្វែង និងកិច្ចសហប្រតិបត្តិការ ដែលមានផលប្រយោជន៍ទៅវិញទៅមក រវាងកម្ពុជា និង សិង្ហបុរី»។

លោក Lawrence Wong គឺជានាយករដ្ឋមន្ត្រី​ទី​៤របស់ប្រទេស​សិង្ហបុរីកាន់អំណាច​ពី​ឆ្នាំ២០២៤ និង​​ត្រូវ​បានបន្តតណែងជានាយករដ្ឋមន្ត្រីបន្ត​ទៀតបន្ទាប់ពី​ទទួល​ជ័យជម្នះលើការ​បោះឆ្នោតសភាកាលពី​ខែ​ឧសភា កន្លង​ទៅផងដែរ។

ដំណើរទស្សនកិច្ចនាយករដ្ឋមន្ត្រីសិង្ហបុរីនេះកើតឡើងស្របពេលជាមួយនឹងការប្រារព្ធខួបលើកទី៦០ នៃការបង្កើត ទំនាក់ទំនងការទូតរវាងកម្ពុជា និងសិង្ហបុរី។ ប្រទេសសិង្ហបុរី និងកម្ពុជា​បាន​បង្កើត​ទំនាក់ទំនង​ការទូត​កាលពីថ្ងៃទី​១៥ ខែកញ្ញា ឆ្នាំ១៩៦៥ ១ខែបន្ទាប់ពីប្រទេស​សិង្ហបុរីទទួលបាន​ឯករាជ្យពី​ម៉ាឡេស៊ី៕

អត្ថបទដោយ ហ៊ុន សិរីវឌ្ឍន៍

The post នាយករដ្ឋមន្ត្រីសិង្ហបុរីនឹង​បំពេញទស្សនកិច្ចផ្លូវការនៅកម្ពុជា​ក្នុងសប្ដាហ៍ក្រោយ appeared first on Kampuchea Thmey Daily.

ក្នុងឱកាសនៃដំណើរទស្សនកិច្ចនេះ លោក នាយឧត្ដមសេនីយ៍ រ៉ូណាល់ ខ្លាក នឹងអញ្ជើញចូល ជួបសម្តែងការគួរសមជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជួបសម្តែងការគួរសមជាមួយ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង​ជួបសម្តែងការគួរសមជាមួយ នាយឧត្តម សេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ។

លោក​នាយឧត្តមសេនីយ៍ រ៉ូណាល់ ខ្លាក នឹងមានជំនួបទ្វេភាគីជាមួយ លោក​នាយឧត្តមសេនីយ៍ ម៉ៅ សុផាន់ នៅទីបញ្ជាការ បញ្ជាការដ្ឋានកងទ័ពជើងគោក ដែល​លោក​មេបញ្ជាការទាំងពីរនឹង ពិភាក្សាស៊ីជម្រៅ ក្នុងគោលបំណងពង្រឹង និង​ពង្រីកកិច្ចសហប្រតិបត្តិការយោធាសំដៅកសាងទំនុកចិត្ត និងការជឿជាក់ក្នុងវិស័យការពារជាតិរវាងប្រទេសទាំងពីរ។

ដំណើរទស្សនកិច្ចរបស់ លោក​នាយឧត្តមសេនីយ៍ រ៉ូណាល់ ខ្លាក នៅពេលនេះ គឺធ្វើ​ឡើង​ស្រប​ពេលខួប លើកទី៧៥ ទំនាក់​ទំនង​ការ​ទូត​ប្រទេសទាំងពីរ កម្ពុជា- សហរដ្ឋអាមេរិក ហើយក៏ជាលើកទី២ដែលមេបញ្ជាការ កង​ទ័ពជើងគោកសហរដ្ឋអាមេរិក ប្រចាំប៉ាស៊ីហ្វិក អញ្ជើញបំពេញទស្សនកិច្ចនៅព្រះរាជាណាចក្រកម្ពុជាដែលលើក ទី១ គឺដឹកនាំដោយ លោក​នាយឧត្តមសេនីយ៍ វ៉ីនសេន ប៊ុ្រក (VINCENT BROOKS) នៅក្នុងឆ្នាំ២០១៤៕

កែសម្រួលដោយ ៖ នាគព័ន្ធ

The post មេបញ្ជាការ​កងទ័ពជើងគោក​សហរដ្ឋអាមេរិក ប្រចាំ​ប៉ាស៊ីហ្វិច​នឹង​បំពេញទស្សនកិច្ចផ្លូវការនៅកម្ពុជាចាប់ពីថ្ងៃទី២៤ ដល់ ២៥ ខែកុម្ភៈ appeared first on Kampuchea Thmey Daily.

យោងតាមសេចក្ដីប្រកាសរបស់ក្រសួងការបរទេស សម្តេចធិបតី ហ៊ុន ម៉ាណែត នឹងដឹកនាំគណៈប្រតិភូជាន់ខ្ពស់បំពេញទស្សនកិច្ចផ្លូវការនៅហ្វីលីពីន ចាប់ពីថ្ងៃទី១០ ដល់ថ្ងៃទី១១ ខែកុម្ភៈ ឆ្នាំ២០២៥ ដែលតបតាមការអញ្ជើញរបស់លោក Ferdinand R. Marcos Jr. ប្រធានាធិបតីនៃហ្វីលីពីន។

អញ្ជើញអមដំណើរ សម្តេចធិបតី និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត រួមមាន ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំងរដ្ឋមន្ត្រី មន្ត្រីសំខាន់ៗនៃរាជរដ្ឋាភិបាល និងថ្នាក់ដឹកនាំវិស័យឯកជននៃសភាពាណិជ្ជកម្មកម្ពុជា។

សម្តេចធិបតី នឹងមានជំនួបទ្វេភាគីជាមួយលោក Ferdinand R. Marcos Jr. ដើម្បីពិភាក្សាលើកិច្ចសហប្រតិបត្តិការទ្វេភាគី តំបន់ និងអន្តរជាតិ។ បន្ទាប់ពីជំនួបពិភាក្សានេះ ថ្នាក់ដឹកនាំទាំងពីរ នឹងចូលរួមជាអធិបតីក្នុងពិធីផ្លាស់ប្តូរឯកសារកិច្ចសហប្រតិបត្តិការដែលបានចុះហត្ថលេខា មួយចំនួន។

ក្នុងឱកាសនៃទស្សនកិច្ចនេះ សម្តេចធិបតី នឹងជួបពិភាក្សាការងារដាច់ដោយឡែកជាមួយលោក Francis “Chiz” G. Escudero ប្រធានព្រឹទ្ធសភា និងលោក Ferdinand Martin Gomez Romualdez ប្រធានរដ្ឋសភាហ្វីលីពីន។ សម្តេចធិបតី ក៏នឹងអញ្ជើញផ្តល់កិត្តិយសថ្លែងសុន្ទរកថាបើកក្នុងវេទិកាធុរកិច្ចកម្ពុជា-ហ្វីលីពីន ព្រមទាំងជួបជាមួយបណ្តាក្រុមហ៊ុនហ្វីលីពីន ផងដែរ៕

The post ទស្សនកិច្ចទៅកាន់ហ្វីលីពីន សម្ដេចធិបតិ និងសមភាគី នឹងចូលរួមក្នុងពិធីចុះហត្ថលេខាលើឯកសារមួយចំនួន appeared first on Kampuchea Thmey Daily.

តាមសេចក្ដីប្រកាសព័ត៌មានរបស់ក្រសួងការបរទេស បានឱ្យដឹងថា សម្តេចធិបតីនាយករដ្ឋមន្ត្រី និងមានជំនួបទ្វេភាគីជាមួយ លោក Ferdinand R. Marcos Jr. ដើម្បីពិភាក្សាអំពីកិច្ចសហប្រតិបត្តិការទ្វេភាគី តំបន់ និងអន្តរជាតិ ។ បន្ទាប់ពីជំនួបពិភាក្សានេះ ថ្នាក់ ដឹកនាំទាំងពីរ នឹងចូលរួមជាអធិបតីក្នុងពិធីផ្លាស់ប្តូរឯកសារកិច្ចសហប្រតិបត្តិការដែលបានចុះហត្ថលេខា មួយចំនួន។

ក្នុងឱកាសនៃទស្សនកិច្ចនេះ សម្តេចធិបតី នឹងជួបពិភាក្សាការងារដាច់ដោយឡែកជាមួយ លោក Francis “Chiz” G. Escudero ប្រធានព្រឹទ្ធសភា និងលោក Ferdinand Martin Gomez Romualdez ប្រធានរដ្ឋសភាហ្វីលីពីន ។ សម្តេចធិបតី ក៏នឹងអញ្ជើញផ្តល់កិត្តិយសថ្លែងសុន្ទរកថាបើក ក្នុងវេទិកាធុរកិច្ចកម្ពុជា-ហ្វីលីពីន ព្រមទាំងជួបជាមួយបណ្តាក្រុមហ៊ុនហ្វីលីពីន ផងដែរ។

ក្រសួងការបរទេស បានចាត់ទុកដំណើរទស្សនកិច្ចផ្លូវការរបស់ សម្តេចធិបតី ទៅកាន់ប្រទេសហ្វីលីពីននាពេលខាងមុខ ថា នឹងផ្តល់សន្ទុះថ្មីក្នុងការពង្រឹង និងពង្រីកបន្ថែមទៀតនូវទំនាក់ទំនង និងកិច្ចសហប្រតិបត្តិការដ៏ល្អដែល មានស្រាប់ រវាងប្រទេសទាំងពីរ ។

អញ្ជើញអមដំណើរ សម្តេចធិបតី និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត រួមមាន ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំង រដ្ឋមន្ត្រី មន្ត្រីសំខាន់ៗនៃរាជរដ្ឋាភិបាល ហើយនិងថ្នាក់ដឹកនាំវិស័យឯកជននៃ សភាពាណិជ្ជកម្មកម្ពុជា។

គួរឱ្យដឹងថា កម្ពុជា និងហ្វីលីពីន បានចងភ្ជាប់ទំនាក់ទំនងការទូតជាមួយគ្នាជាផ្លូវការនៅក្នុងឆ្នាំ ១៩៥៧។ រាប់មកដល់ឆ្នាំ២០២៥ នេះ ទំនងទំនងនៃប្រទេសទាំងពីរ ឈានដល់ខួបទី៦៨។

គួរជម្រាបថា នៅក្នុងក្របខណ្ឌអាស៊ាន បន្ទាប់ពីសម្ដេចធិបតី ហ៊ុន ម៉ាណែត បានចូលកាន់តំណែងជានាយករដ្ឋមន្ត្រីជាផ្លូវការ កាលពីថ្ងៃទី២២ ខែសីហា ឆ្នាំ២០២២ សម្ដេចបានអញ្ជើញទៅបំពេញទស្សនកិច្ចផ្លូវការនៅប្រទេសមួយចំនួនដូចជា ប្រទេសវៀតណាម, ថៃ, ឡាវ, ម៉ាឡេស៊ី, សិង្ហបុរី៕

The post លើកទី១ក្នុងឆ្នាំថ្មី សម្ដេចធិបតី បំពេញទស្សនកិច្ចនៅហ្វីលីពីន ដើម្បីផ្ដល់សន្ទុះទំនាក់ទំនងប្រទេសទាំងពីរ appeared first on Kampuchea Thmey Daily.

តាមការគ្រោងទុក លោកឧបនាយករដ្ឋមន្ត្រីប្រចាំការ វង្សី វិស្សុត នឹងមានជំនួបពិភាក្សាការងារជាមួយសមាជិកគណៈរដ្ឋមន្ត្រីជប៉ុន និងថ្នាក់ដឹកនាំសំខាន់ៗ ជាអាទិ៍ រដ្ឋមន្ត្រីទីស្តីការគណៈរដ្ឋមន្ត្រី រដ្ឋមន្ត្រីក្រសួងកិច្ចការផ្ទៃក្នុងនិងទូរគមនាគមន៍ រដ្ឋមន្ត្រីទទួលបន្ទុកកិច្ចការសន្តិសុខសេដ្ឋកិច្ច អនុរដ្ឋមន្ត្រីក្រសួងការបរទេស និងប្រធាន JICA។ ដែលនេះជំនួបទាំងនេះដើម្បីសិក្សាអំពីប្រព័ន្ធអភិបាលកិច្ចជប៉ុន ពិសេសពិភាក្សា ផ្លាស់ប្តូរបទពិសោធ និងចំណេះដឹងពាក់ព័ន្ធការពង្រឹងមុខងារ និងភារកិច្ចរបស់ទីស្តីការគណៈរដ្ឋមន្ត្រី ក្នុងនាមជាសេនាធិការដ៏សំខាន់មួយរបស់នាយករដ្ឋមន្ត្រី និងគណៈរដ្ឋមន្ត្រី ព្រមទាំងសិក្សាស្វែងយល់អំពីគោលនយោបាយសំខាន់ៗពាក់ព័ន្ធនឹងវិស័យរដ្ឋបាល ច្បាប់ ការតាមដាន និងវាយតម្លៃការអនុវត្តគោលនយោបាយរបស់រដ្ឋាភិបាល និងទិដ្ឋភាពពាក់ព័ន្ធមួយចំនួនទៀត។

គោលបំណងដ៏សំខាន់នោះ គឺការពង្រឹងកិច្ចសហប្រតិបត្តិការទ្វេភាគី និងចំណងមិត្តភាពរវាងប្រទេសទាំងពីរឱ្យកាន់តែស្អិតរមួតសម្រាប់ជាប្រយោជន៍ដល់ការអភិវឌ្ឍ និងទំនាក់ទំនងប្រជាជននិងប្រជាជន។

ក្រៅពីជំនួបខាងលើនេះ ឧបនាយករដ្ឋមន្ត្រីប្រចាំការ នឹងមានជំនួបពិភាក្សាជាមួយប្រធាន JETRO និងប្រធានសមាគមជប៉ុន និងកម្ពុជា (JCA) ផងដែរ ដើម្បីពិភាក្សាការងារពាក់ព័ន្ធនឹងការវិនិយោគនិងធ្វើធុរកិច្ចនៅកម្ពុជា ដើម្បីស្វែងយល់អំពីកង្វល់ និងបញ្ហាប្រឈមដែលវិនិយោគគិនជប៉ុនកំពុងជួបប្រទះ សំដៅស្វែងរកដំណោះស្រាយ សម្រួលដល់ការធ្វើធុរកិច្ច និងជំរុញការវិនិយោគនៅកម្ពុជា ស្របតាមគោលនយោបាយ និងយុទ្ធសាស្ត្ររបស់រាជរដ្ឋាភិបាលកម្ពុជា។

ឧបនាយករដ្ឋមន្ត្រីប្រចាំការ ក៏នឹងអញ្ជើញធ្វើដំណើរទៅកាន់ខេត្តគូម៉ាម៉ូតូ (Kumamoto) ដែលមានទីតាំងនៅភាគនិរតីនៃប្រទេសជប៉ុន ដើម្បីជួបជាមួយអភិបាលខេត្តកូម៉ាម៉ូតូ និងប្រធានសមាគមន៍ឧស្សាហកម្មកូម៉ាម៉ូតូ ដើម្បីដកពិសោធ ពីជោគជ័យរបស់តំបន់នេះក្នុងការទាក់ទាញការវិនិយោគក្នុងវិស័យឧស្សាហកម្មនិងការរីចម្រើនផ្នែកបច្ចេកវិទ្យា ក៏ដូចជាការគ្រប់គ្រងរដ្ឋបាលថ្នាក់ក្រោមជាតិនៅប្រទេសជប៉ុន។

ដំណើរទស្សនកិច្ចនេះ បង្ហាញអំពីការយកចិត្តទុកដាក់ និងការប្តេជ្ញាចិត្តរបស់រដ្ឋាភិបាលកម្ពុជា ក្នុងការជំរុញកម្មវិធីកែទម្រង់របស់រាជរដ្ឋាភិបាល ការពង្រឹងអភិបាលកិច្ចប្រព័ន្ធការងារ ក៏ដូចជាពង្រឹងសមត្ថភាព និងសមិទ្ធកម្មស្ថាប័ន ជាពិសេសដើម្បីពង្រឹងគុណភាព និងប្រសិទ្ធភាពក្នុងការអនុវត្តនូវមុខងារគន្លឹះ និងមុខងារស្នូលមួយចំនួនរបស់ទីស្តីការគណៈរដ្ឋមន្ត្រី ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជាអាណត្តិទី៧៕

The post លោក វង្សី វិស្សុត ទៅបំពេញទស្សនកិច្ចនៅជប៉ុន ដើម្បីពង្រឹងកិច្ចសហប្រតិបត្តិការទ្វេភាគី appeared first on Kampuchea Thmey Daily.

តាមការកត់ត្រាប្រទេសដំបូងដែលនាយករដ្ឋមន្ត្រីធ្វើទស្សនកិច្ចដំបូងគេនៅដើមឆ្នាំ២០២៤ គឺប្រទេសបារាំង ដែលសម្ដេចធ្វើទស្សនកិច្ចនៅថ្ងៃទី១៨ ដល់១៩ ខែមករា ឆ្នាំ២០២៤ ហើយដំណើរទស្សនកិច្ចចុងក្រោយគេគឺនៅប្រទេសចិន ចាប់ពីថ្ងៃទី៦-៧ ខែវិច្ឆិកា ដើម្បីចូលរួមកិច្ចប្រជុំមហាអនុតំបន់មេគង្គ GMS។

ប្រទេសឡាវត្រូវបានសម្ដេចធ្វើទស្សនកិច្ច២ដងក្នុងឆ្នាំ២០២៤ លើកទី១គឺទស្សនកិច្ចផ្លូវការចាប់ពីថ្ងៃទី២៥-២៦ ខែមីនា និងលើកទី២ សម្ដេចទៅចូលរួមកិច្ចប្រជុំកំពូលអាស៊ាន។

ដំណើរទស្សនកិច្ចភាគច្រើនរបស់សម្ដេចធិបតីគឺក្នុងតំបន់អាស៊ីដែលសម្ដេច​អញ្ជើញធ្វើទស្សនកិច្ចនៅថៃ ថ្ងៃទី៧ ខែកុម្ភៈ ទស្សនកិច្ចនៅសាធារណរដ្ឋកូរ៉េ ពីថ្ងៃទី១៥-១៨ ខែឧសភា, សឹង្ហបុរី ពីថ្ងៃទី១៨-១៩ មិថុនា, ប្រទេសឥណ្ឌូនេស៊ីនៅថ្ងៃទី២០ ខែតុលា ក្នុងឱកាសចូលកាន់តំណែងថ្មីរបស់ប្រធានាធិបតីប្រទេសនេះ។

ក្រៅពីនេះសម្ដេចធិបតីក៏បានអញ្ជើញទៅប្រទេសអូស្ត្រាលីផងដែរដើម្បីចូលរួមកិច្ចប្រជុំកំពូលពិសេសអាស៊ាន-អូស្ត្រាលី ពីថ្ងៃតី៤ ដល់ទី៦ ខែមីនា។

អ្វីជាការកត់សម្គាល់ក្រៅពីដំណើរទស្សនកិច្ចសម្ដេចក៏បានអញ្ជើញឡើងថ្លែងសុន្ទរកថាពិសេសនាឱកាសពិធីបើកសន្និបាតលើកទី៨០ របស់គណៈកម្មការសេដ្ឋកិច្ច និងសង្គមអង្គការសហប្រជាជាតិសម្រាប់អាស៊ី-ប៉ាស៊ីហ្វិក នាទីក្រុងបាងកក ប្រទេសថៃ នៅថ្ងៃទី២០ ខែមេសា និងបានអញ្ជើញចូលរួមវេទិកាសេដ្ឋកិច្ចពិភពលោក នៅទីក្រុងដាវ៉ូស ប្រទេសស្វីសផងដែរ នៅថ្ងៃទី១៦និង១៧ខែមករា។

ក្នុងវេទិការសារព័ត៌មាននៅទីស្ដីការគណៈរដ្ឋមន្ត្រីកាលពីថ្ងៃទី១៨ ខែវិច្ឆិកា រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកកិច្ចការការបរទេស លោក ហ្សង់ ហ្វ្រង់ស្វ័រ តាន់ បានលើកឡើងថា ដំណើរទស្សនកិច្ចរបស់សម្ដេចធិបតីនៅបរទេសទាំងនេះបានពង្រឹងនូវនយោបាយការទូតសេដ្ឋកិច្ចកម្ពុជា តាមរយៈការជំរុញពាណិជ្ជកម្មអន្តរជាតិ ទាក់ទាញការវិនិយោគផ្ទាល់ពីបរទេស និងលើកម្ពស់វិស័យទេសចរណ៍៕

អត្ថបទដោយ ហ៊ុន សិរីវឌ្ឍន៍

The post ក្នុងឆ្នាំ២០២៤ នាយករដ្ឋមន្ត្រីធ្វើទស្សនកិច្ចផ្លូវការទៅកាន់ប្រទេសចំនួន៨ appeared first on Kampuchea Thmey Daily.