អ្នកនយោបាយ និងសកម្មជនវ័យក្មេងកម្ពុជា ១០រូប ទៅបំពេញទស្សនកិច្ចនៅជប៉ុន

អ្នកនយោបាយ និងសកម្មជនវ័យក្មេងកម្ពុជាចំនួន ១០រូប បានទៅបំពេញទស្សនកិច្ចនៅប្រទេសជប៉ុន ចាប់ពីថ្ងៃទី១៧ ដល់ថ្ងៃទី២៤ ខែមីនា ឆ្នាំ២០២៦។ ជាមួយគ្នានេះ មុនពេលដំណើរទស្សនកិច្ចនេះ កាលពីថ្ងៃទី៣ ខែមីនា ឯកអគ្គរាជទូតជប៉ុនប្រចាំកម្ពុជា លោក អ៊ូអិណុ អាត់ស៊ូស៊ី បានរៀបចំពិធីជូនដំណើរ សម្រាប់អ្នកចូលរួមទាំង១០រូប នៅឯនិវេសនដ្ឋានរបស់លោកផងដែរ។

ការបំពេញទស្សនកិច្ចរបស់អ្នកនយោបាយ និងសកម្មជនវ័យក្មេងកម្ពុជាទៅកាន់ប្រទេសជប៉ុននេះ ជាផ្នែកមួយនៃកម្មវិធីផ្លាស់ប្តូរយុវជនរបស់ក្រសួងការបរទេសជប៉ុន ហៅថា JENESYS (កម្មវិធីបណ្តាញផ្លាស់ប្តូរសិស្សនិស្សិត និងយុវជនរវាងប្រទេសជប៉ុន និងបណ្តាប្រទេសអាស៊ីខាងកើត) ដោយនេះ គឺជាដំណើរទស្សនកិច្ចលើកទី៨ ។

អំឡុងពេលបំពេញទស្សនកិច្ច អ្នកចូលរូមទាំង១០រូប នឹងទៅទស្សនាសភាជាតិ ហើយធ្វើការផ្លាស់ប្តូរទស្សនៈជាមួយសមាជិកសភាជប៉ុននៃសម្ព័ន្ធមិត្តភាពសភាជប៉ុន-កម្ពុជា នៅរាជធានីតូក្យូ។ លើសពីនេះ ពួកគេក៏នឹងធ្វើដំណើរទៅខេត្តកាណាហ្គាវ៉ា ដើម្បីស្វែងយល់ការបោះឆ្នោតជ្រើសរើសក្រុមប្រឹក្សាក្រុងហ្ស៊ូស៊ីថែមទៀតផង។

សូមជម្រាបថា កម្មវិធីនេះបានដំណើរការចាប់តាំងពីឆ្នាំ២០១៨ មក ក្នុងគោលបំណងជួយគាំទ្រដល់ការអភិវឌ្ឍតាមបែបប្រជាធិបតេយ្យរបស់ប្រទេសកម្ពុជា តាមរយៈការជំរុញការសន្ទនារវាងគណបក្សកាន់អំណាច គណបក្សប្រឆាំង និងភាគីផ្សេងៗ៕