ទស្សនៈ Archives - Kampuchea Thmey Daily

បណ្ឌិត ឈត ប៊ុនថង៖ បើនរណាម្នាក់បញ្ចេញទស្សនៈខុស ឬផ្ទុយពីគំនិតខ្លួន មិនបាច់ខឹងទេកុំជឿទៅបានហើយ!

អុន ស្រីមាន — Wed, 08 Jan 2025 03:19:47 +0000

បណ្ឌិត ឈត ប៊ុនថង អ្នកជំនាញទស្សនវិជ្ជាបានលើកឡើងថា ប្រសិនជាបណ្ឌិត វាគ្មិន ឬនរណាម្នាក់លើកឡើងពីទស្សនៈខុស ឬផ្ទុយពីការគិតរបស់ខ្លួនយើងនោះ មិនបាច់ខឹង តិះដៀលឡើយ គ្រាន់តែកុំស្តាប់ កុំអាន កុំជឿទៅបានហើយ។

លោកបណ្ឌិត លើកឡើងបែបនេះ ស្របពេលដែលសង្គមបច្ចុប្បន្ន ជាពិសេសនៅលើបណ្តាញសង្គម តែងសង្កេតឃើញថា បុគ្គលមួយចំនួន នៅពេលដែលមានបណ្ឌិត អ្នកជំនាញ ឬនរណាម្នាក់បានចែករំលែកអ្វីមួយដែលមិនសមហេតុផល ឬ បញ្ចេញមតិដែលខុសពីការគិតរបស់ពួកគេ គឺតែងរងការតិះដៀល ការបញ្ចេញមតិនូវពាក្យមិនសមរម្យទៅលើអ្នកដែលបានបង្ហាញទស្សនៈផ្ទាល់ខ្លួននៅទីសាធារណៈនោះ។ បុគ្គលមួយចំនួនទៀត ហាក់មានការប្រតិកម្មខ្លាំងរហូតឈានដល់ការជេរប្រមាថអាយុជីវិតអ្នកដទៃទៀតផង។

ជាមួយគ្នានេះ តាមរយៈសំណេរលើហ្វេសប៊ុករបស់បណ្ឌិត ឈត ប៊ុនថង នៅព្រឹកថ្ងៃទី៨ ខែមករា ឆ្នាំ២០២៥ បានលើកឡើងថា ប្រសិនបើវាគ្មិន បណ្ឌិត ឬអ្នកណាម្នាក់និយាយខុស ឬបញ្ចេញទស្សនៈខុសពីចិត្តយើង យើងមិនបាច់ជេរ តិះដៀល ឬខឹងច្រឡោតទេ គ្រាន់តែកុំស្តាប់ កុំអាន កុំមើល កុំជឿ កុំធ្វើតាមគឺជាការស្រេច ។

លោកបណ្ឌិត ក៏បានសង្កត់ធ្ងន់ថា គួររៀនបន្ទោសខ្លួនឯង ជាជាងបន្ទោសអ្នកដទៃ ដោយលោកបានលើក ២ចំណុចទៀតថា៖ “បើអ្វីដែលគេហៅថាអទិទេព អមនុស្ស តួអង្គអស្ចារ្យ អបិយជំនឿ…មិនបាននាំយើងទៅរកសេចក្តីសុខ សេចក្តីចម្រើន សុភមង្គល…និងសុខដុមរមនាទេ ម៉េចក៏យើងមិនបញ្ឈប់ការជឿនិងការពឹងផ្អែកលើរបស់ទាំងអស់នោះទៅ! អ្នកខ្លះបន្តជឿនិងពឹងផ្អែកលើវា ហើយបែរជាមកបន្ទោសព្រហ្មលិខិតឬ ព្រេងសំណាង…ទៅវិញ ត្រូវបន្ទោសខ្លួនឯងដែលមិនឆ្លាតជ្រើសរើសជំនឿខុស”។

រីឯ ចំណុចមួយទៀត អ្នកជំនាញខាងលើ បានលើកឡើងពីមេដឹកនាំខ្មែរក្រហម នៅពេលដែលដឹកនាំប្រទេសខុស បែរជាបន្ទោសអង្គការ បន្ទោសអ្នកដទៃទៅវិញ៕

The post បណ្ឌិត ឈត ប៊ុនថង៖ បើនរណាម្នាក់បញ្ចេញទស្សនៈខុស ឬផ្ទុយពីគំនិតខ្លួន មិនបាច់ខឹងទេកុំជឿទៅបានហើយ! appeared first on Kampuchea Thmey Daily.

ទស្សនៈ ៩ ឃ្លាពីអតីតនាយករដ្ឋមន្ត្រី អង់គ្លេស ល្បីសម័យសង្គ្រាមលោកលើកទី ២

Mean Ratana — Thu, 15 Feb 2024 09:00:53 +0000

លោក វីនស្តុន ឆឺឈីល “Winston Churchill” ជាអតីតនាយករដ្ឋមន្ត្រីអង់គ្លេសដ៏ល្បីមួយរូបនៅក្នុងសម័យសង្រ្គាមលោកទី ២ ។ លោកមានភាពល្បីល្បាញដោយហេតុថា លោកមានភាពវៃឆ្លាតក្នុងការដឹកនាំ ពិសេសសង្គ្រាមដែលហៀបនឹងចាញ់ ប៉ុន្តែលោកបានប្រើយុទ្ធសាស្រ្តយកឈ្នះវិញ ។

ដោយសារភាពវៃឆ្លាតក្នុងការដឹកនាំនេះហើយ ទើបព្រះមហាក្សត្រអង់គ្លេសទុកព្រះទ័យលើលោកនាយករដ្ឋមន្ត្រីអង់គ្លេសរូបនេះ ។ បន្ថែមពីនោះ លោក ឆឺឈីល ក៏បានបន្សល់ទុកនូវទស្សនៈគំនិតល្អៗ សម្រាប់សម្គាល់មើល និងពិចារណាផងដែរដូចជា៖

១- អត្តចរិត គឺជារឿងតូចតាច ប៉ុន្តែវាអាចបង្កើតឲ្យមានភាពខុសគ្នាយ៉ាងធំធេង។

២- ភាពក្លាហាន គឺជាអ្វីដែលអ្នកត្រូវក្រោកឈរឡើងហើយនិយាយ ។ ហើយភាពក្លាហាន ក៏ជាអ្វីដែលអ្នកត្រូវអង្គុយចុះហើយស្តាប់ផងដែរ។

៣-យើងរស់នៅដោយអ្វីដែលយើងទទួលបានប៉ុន្តែយើងបង្កើតជីវិតឲ្យកាន់តែមានន័យដោយអ្វីដែលយើងផ្តល់ឲ្យ។

៤-ទោះបីអ្នកមានយុទ្ធសាស្រ្តល្អឥតខ្ចោះយ៉ាងណាក៏ដោយ អ្នកត្រូវតែឆ្លៀតពេលបន្តិចដើម្បីពិនិត្យមើលលទ្ធផល។

៥- ខ្ញុំតែងតែត្រៀមខ្លួនជាស្រេចដើម្បីរៀនសូត្រ ទោះបីជាខ្ញុំមិនចូលចិត្តការបង្រៀនក៏ដោយ។

៦-មនុស្សទុទិដ្ឋិនិយមមើលឃើញបញ្ហាក្នុងឱកាស ស្របពេលដែលអ្នកសុទិដ្ឋិនិយម មើលឃើញឱកាសនៅក្នុងរាល់បញ្ហា។

លោក វីនស្តុន ឆឺឈីល

៧-ភាពជោគជ័យ គឺជាសមត្ថភាពដែលអាចធ្វើដំណើរពីបរាជ័យមួយ ទៅកាន់បរាជ័យមួយទៀត ដោយមិនបាត់បង់ការខិតខំប្រឹងប្រែងរបស់ខ្លួន ។

៨- អ្នកមិនអាចទៅដល់គោលដៅបានទេ បើអ្នករវល់តែយកដុំថ្មគប់សត្វឆ្កែកំពុងព្រុសតាមផ្លូវនោះ។

៩- ល្អបំផុតគឺត្រូវធ្វើការផ្លាស់ប្តូរ ហើយបើអ្នករឹតតែចង់ល្អឥតខ្ចោះត្រូវផ្លាស់ប្តូរឲ្យបានជាប្រចាំ៕

ដោយ៖ មាន រតនា

The post ទស្សនៈ ៩ ឃ្លាពីអតីតនាយករដ្ឋមន្ត្រី អង់គ្លេស ល្បីសម័យសង្គ្រាមលោកលើកទី ២ appeared first on Kampuchea Thmey Daily.

ទស្សនៈ និងគោលការណ៍ជ្រុលនិយម មិនថានៅក្នុងសាសនា ឬនយោបាយទេ ត្រូវលុបបំបាត់ និងបំផ្លាញចោលឲ្យអស់

sopheak khoun — Fri, 17 Nov 2023 02:48:05 +0000

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ទស្សនៈ និងគោលការណ៍ជ្រុលនិយម មិនថានៅក្នុងសាសនា ឬនយោបាយទេ ត្រូវលុបបំបាត់ និងបំផ្លាញចោលឲ្យអស់ ព្រោះវាធ្វើឲ្យបែកបាក់សាមគ្គី នៅក្នុសង្គមជាតិ។ ការលើកឡើងនេះ ធ្វើឡើងក្នុងពិធីស្រោចស្រពព្រះសុគន្ធវារី «ប្រគេនសម្តេច និងព្រះមន្ត្រីសង្ឃជាន់ខ្ពស់នៃគណៈមហានិកាយ នៅព្រះរាជា ណាចក្រកម្ពុជា» នៅព្រឹកថ្ងៃទី ១៧ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត មានប្រសាសន៍ថា នៅក្នុងប្រទេសកម្ពុជា មិនមានសាសនាណាមួយ ដែលប្រកាន់នូវនិន្នាការជ្រុលនិយមនោះទេ។ «ការប្រតិបត្តិ ពិតណាស់នៅក្នុងព្រះពុទ្ធសាសនា យើងមាននិកាយខុសគ្នា នៅក្នុងសាសនាឥស្លាម ក៏មាននិកាយខុសគ្នា នៅក្នុងគ្រឹះសាសនា ក៏មាននិកាយខុសគ្នា ប៉ុន្តែមិនមានការប្រតិបត្តិជ្រុលនិយម ដែលធ្វើឲ្យមានជម្លោះនៅក្នុងសាសនាតែមួយ ឬរវាងសាសនាណានៅកម្ពុជានោះទេ»។ នេះជាការលើកឡើបន្តរបស់សម្ដេចនាយករដ្ឋមន្ត្រី។

សម្ដេចធិបតី ហ៊ុន ម៉ាណែត បានបន្ថែមថា ទាំងកត្តាគោលនយោបាយរបស់រាជរដ្ឋាភិបាល ក៏ដូចជាការចូលរួមរបស់សហគមន៍ បានជួយទប់ស្កាត់ និងលុបបំបាត់ មិនឲ្យកើតមាននៅលើទឹកដីកម្ពុជា នូវការប្រកាន់គោលជំហររើសអើង គោលនយោបាយរើសអើង ឬគោលនយោបាយទស្សនៈជ្រុលនិយមបែបណាមួយនោះ។

ប្រមខុរាជរដ្ឋាភិបាល បានអំពាវនាវឲ្យរួមគ្នាការពារកុំឲ្យកើតមាន នូវគោលនយោបាយរើសអើង ឬទស្សនៈជ្រុលនិយម ហើយបើមានត្រូវលុបបំបាត់ឲ្យអស់ ដើម្បីថែរក្សានូវសុខសន្តិភាព និងសុខដុមរមនានៅក្នុងសង្គមកម្ពុជា។

«ទស្សនៈ និងគោលការណ៍ជ្រុលនិយម មិនថានៅក្នុងសាសនា ឬនយោបាយ ត្រូវលុបបំបាត់ និងបំផ្លាញចោលឲ្យអស់ ព្រោះវាធ្វើឲ្យបែកបាក់សាមគ្គីនៅក្នុសង្គមជាតិ ដែលជាកត្តាបំផ្លាញនូវសុខសន្តិភាព សេរីភាព។ នេះជាការបញ្ជាក់របស់សម្ដេចធិបតី ហ៊ុន ម៉ាណែត។

សម្ដេចនាយករដ្ឋមន្ត្រី បានលើកឡើងដែរថា សង្គ្រាមមិនចាំបាច់កើតឡើងដោយសារអាវុធនោះទេ តែអ្វីដែលកើតឡើងមុនគេ គឺជម្លោះនៅក្នុងចិត្តរបស់ប្រជាពលរដ្ឋ ការប្រកាន់ការរើសអើង ការលាបពណ៌គ្នា ការឲ្យស្អប់សញ្ជាតិនេះ ឬសាសនានោះ គឺជាកត្តាធ្វើឲ្យមនុស្សឈានទៅដល់ការស្អប់គ្នា ហើយបើស្អប់គ្នាហើយ មិនចាំបាច់មានអាវុធទេ សូម្បីតែដៃ ឬដុំថ្ម ក៏អាចបង្កើតជាសង្រ្គាមបានដែរ៕

The post ទស្សនៈ និងគោលការណ៍ជ្រុលនិយម មិនថានៅក្នុងសាសនា ឬនយោបាយទេ ត្រូវលុបបំបាត់ និងបំផ្លាញចោលឲ្យអស់ appeared first on Kampuchea Thmey Daily.

និស្សិត ២ រូបអះអាង ការអប់រំតាមអ៊ីនធឺណិតមានផលពីរដើរទន្ទឹមគ្នា

Din Thary — Tue, 06 Jun 2023 09:10:28 +0000

បច្ចុប្បន្ន ការសិក្សាតាមប្រព័ន្ធអ៊ីនធឺណិតជាតម្រូវការមួយយ៉ាងសំខាន់នាពេលបច្ចុប្បន្ននេះ។ បើក្រឡេក មើលសិស្សសព្វថ្ងៃ ភាគច្រើនត្រូវពឹងផ្អែកលើអ៊ីនធឺណិតសម្រាប់សិក្សាបន្ថែម និងការចែករំលែកព័ត៌មានផ្សេងៗ។

ជុំវិញបញ្ហានេះ និស្សិត ២ រូប បានលើកឡើងពីមតិផ្ទាល់ខ្លួនថា ការសិក្សាតាមប្រព័ន្ធអនឡាញផ្តល់ទាំងគុណសម្បត្តិ និងគុណវិបត្តិ ។

និស្សិតស្រី រាត់ ផាន្នី ជាសិស្សនៃសាកលវិទ្យាល័យអាស៊ីអឺរ៉ុប បានលើកឡើងឱ្យ«កម្ពុជាថ្មី» ដឹងថា ការសិក្សាតាមប្រព័ន្ធអ៊ីនធឺណិត «បើនិយាយពីគុណសម្បត្តិ ខ្ញុំគិតថា វាអាចឱ្យសិស្ស សិក្សាស្វែងយល់កាន់តែស៊ីជម្រៅបន្ថែមទៀត ពីប្រព័ន្ធអនឡាញ ក៏ដូចជារបៀបនៃការប្រើប្រាស់ផ្សេង»។ ហើយ មួយវិញទៀត ក៏អាចជួយឱ្យសិស្សចំណេញពេលវេលា សិក្សាបន្ថែមពីមេរៀននៅផ្ទះ និងអាចរៀនដោយខ្លួនឯងបាន។

ប៉ុន្តែ បើនិយាយទៅដល់កត្តាអវិជ្ជមាន ក៏ដូចជាផលប៉ះពាល់ និស្សិត ផាន្នី រៀបរាប់ថា វាអាចមានច្រើនលើសពីគុណសម្បត្តិ ព្រោះ ការរៀនតាមអនឡាញ អាចធ្វើឱ្យសិស្សរៀនមិនសូវចេះ ចាប់មេរៀនមិនបានល្អ ដែលធ្វើឱ្យការសិក្សាធ្លាក់ចុះ។ ហើយការរៀនតាមប្រព័ន្ធអ៊ីនធឺណិត តម្រូវឱ្យមានទូរស័ព្ទប្រើប្រាស់គ្រប់គ្នា ដូច្នេះប្រសិនបើសិស្សយកមកប្រើមិនបានត្រឹមត្រូវ ឬយកទៅលេងហ្គេម នោះនឹងធ្វើឱ្យខាតបង់ទាំងពេលវេលា ថវិកា ការសិក្សារបស់សិស្សខ្សោយជាដើម។

ដោយឡែកនិស្សិតប្រុស គង់ ទិតរស្មី បានលើកឡើងថា ចំពោះសិស្សនិស្សិតនាពេលបច្ចុប្បន្ននេះ តាមរយៈការដាក់ឱ្យសិក្សាតាមប្រព័ន្ធអ៊ីនធឺណិត នូវមេរៀនមួយចំនួនរបស់សាលា ពិតណាស់វាអាចជួយឱ្យសិស្សចំណេញពេលវេលា ដោយមិនចាំបាច់ធ្វើដំណើរវែងឆ្ងាយទៅដល់សាលារៀន និងអាចជួយកាត់បន្ថយកំណើនគ្រោះថ្នាក់ចរាចរណ៍។

សិស្សអាចមានពេលវេលាច្រើន ជួយការងារផ្ទះ សម្រួលបន្ទុកមួយចំនួន។ មិនតែប៉ុណ្ណោះ ការសិក្សាតាមអ៊ីនធឺណិត អាចឱ្យសិស្សអាចស្វែងយល់ពីកម្មវិធី ឬប្រភពនៃចំណេះដឹងនានា ដើម្បីប្រើប្រាស់សម្រាប់ការរៀនសូត្រ និងស្គាល់ពីរបៀបសិក្សាថ្មីបន្ថែមផងដែរ។

តែក្រៅពីផលប្រយោជន៍ទទួលបាន ក៏នៅមានគុណវិបត្តិកំពុងដើរទន្ទឹមគ្នា។ ក្នុងន័យនេះអាចនិយាយបានថា សិស្សស្ទើរគ្រប់រូប សុទ្ធតែបានយល់ដឹងពីចំណុចប៉ះពាល់ ព្រោះការសិក្សាតាមប្រព័ន្ធអនឡាញ ធ្វើឱ្យសិស្សមិនមានសកម្មភាពជាក់ស្ដែងដូចសិក្សានៅក្នុងថ្នាក់ឡើយ ហើយសិស្សមួយចំនួនក៏មិនអាចផ្តោត ១០០%ទៅលើការបង្រៀនរបស់គ្រូតាមអ៊ីនធឺណិតបានដែរ។

ម្យ៉ាង យើងដឹងហើយថា កំឡុងពេលបើកអ៊ីនធឺណិតដើម្បីសិក្សា ក៏ជាពេលមួយដែលប្រព័ន្ធ Social Media ផ្សេងៗលោតនៅព្រឹត្តិការណ៍ជាច្រើននៅលើទូរស័ព្ទ ឬកុំព្យូទ័រ ដែលជាហេតុធ្វើឲ្យសិស្សងាយនឹងចុចមើលទៅក្នុងប្រព័ន្ធSocial media ពេញនិយមទាំងនោះ។

អ្វីដែលកាន់តែកត់សម្គាល់មួយទៀត ពាក់ព័ន្ធនឹងសេវាអ៊ីនធឺណិត ដែលសិស្សអាចនឹងជួបប្រទះ ព្រោះតំបន់ខ្លះពុំមានសេវាគ្រប់គ្រាន់ដើម្បីឆ្លើយតបឲ្យឮសំឡេងច្បាស់រវាងគ្រូ និងសិស្ស ដែលជាហេតុធ្វើឲ្យខាតពេលវេលាយូរជាដើម។

គួររំលឹកដែរថា ការអប់រំតាមប្រព័ន្ធអ៊ីនធឺណិត មានសក្ដានុពលយ៉ាងខ្លាំងនៅក្នុងបរិបទនៃការរីករាលដាលជំងឺសាកលកូវីដ ១៩ ព្រោះនៅតាមសាលា ឯកជន ក៏ដូចជាក្រសួង ស្ថាប័ននានាតម្រូវឲ្យសិក្សាពីចម្ងាយ៕

The post និស្សិត ២ រូបអះអាង ការអប់រំតាមអ៊ីនធឺណិតមានផលពីរដើរទន្ទឹមគ្នា appeared first on Kampuchea Thmey Daily.

ស្បែកជើងបាត់តា កាន់តែពេញនិយមក្នុងចំណោមសិស្សសាលា

Din Thary — Fri, 27 Jan 2023 03:13:51 +0000

បច្ចុប្បន្នយើងឃើញថា សិស្សសាលាជាច្រើនចូលចិត្តពាក់ស្បែកជើងបាត់តាទាំំងការទៅសាលារៀន និងការចេញក្រៅ ដើរកម្សាន្ត។ ដូច្នេះមកស្តាប់ពីអារម្មណ៍ផ្ទាល់របស់សិស្សនិសិ្សត តើពួកគេយល់យ៉ាងណាដែរ?។

និស្សិតស្រី សូ រីយា បានឱ្យដឹងថា នាងតែងចូលចិត្តពាក់ស្បែកបាត់តា ទាំងពេលទៅសាលា និងពេលចេញក្រៅ ព្រោះថានេះមកពីចំណូលចិត្តផង និងមើលទៅស្អាតប្លែកម្យ៉ាង។

ស្រីណេត ជានិស្សិតម្នាក់ទៀតដែលចូលចិត្តពាក់ស្បែកជើងបាត់តាដែរនោះក៏បានលើកឡើងថា ស្បែកជើងបាត់តាពាក់ងាយស្រួល អាចបង្ហាញពីភាពលេចធ្លោលក្ខណៈសាមញ្ញ។ យុវតីរូបនេះបន្តថា ស្បែកជើងនេះមានម៉ូដផ្សេងៗគ្នាអាស្រ័យលើចំណង់ចំណូលចិត្តមនុស្សម្នាក់ៗ អាចជ្រើសរើស Style តាមការនិយមចូលចិត្ត។

ស្រីណេត បានបន្តថា «ខ្ញុំគិតថាការរើសយកស្បែកជើងបាត់តា មិនថាទៅសាលារៀន ឬទៅកន្លែងផ្សេងៗ ជាជម្រើសល្អបំផុត ព្រោះវាសាមញ្ញ លឿន ស្រស់ស្អាត អាចពាក់បានទាំងបុរស និងនារី ពិសេសមនុស្សប្រុសមើលទៅសមស្របបំផុតសម្រាប់ខោអាវរបស់ពូកគេ»។

ស្នា ដែលជានិស្សិតម្នាក់ទៀតចូលចិត្តពាក់បាត់តា ក៏បានឱ្យដឹងទៀតថា ការពាក់បាត់តាជាចំណង់ចំណូលផង គូបផ្សំភាពស្រស់ស្អាតផង ព្រោះស្បែកជើងបាត់តា សម្រាប់មនុស្សប្រុសទោះតែងខ្លួនបែបណាក៏អាចពាក់បាត់តាបាន។

សូម្បីតែពេលទៅសាលា ដើរលេង ហាត់ប្រាណ ចូលរួមកម្មវិធីពិព័រណ៍នានា ឬទៅកន្លែងផ្សេងៗមានភាពទាក់ទាញមួយកម្រិតផងដែរ អាចនិយាយបានថា ស្បែកជើងបាត់តាបានក្លាយជាភាពពេញនិយមសម្រាប់មនុស្សទូទៅ៕

ដោយ៖ ថារី

The post ស្បែកជើងបាត់តា កាន់តែពេញនិយមក្នុងចំណោមសិស្សសាលា appeared first on Kampuchea Thmey Daily.

តោះ! ស្តាប់សិល្បករពីរនាក់ ជជែកពីការទិញរថយន្ត

Din Thary — Wed, 31 Aug 2022 07:08:35 +0000

ការប្រើប្រាស់រថយន្តបានក្លាយជាតម្រូវការចាំបាច់សម្រាប់មនុស្សទូទៅ ពិសេសមហាជន អ្នកធ្វើការ កូនអ្នកមាន និងអ្នកសិល្បៈជាដើម។ ក្នុងនោះដែរ ចំពោះការប្រើប្រាស់រថយន្តផ្ទាល់ខ្លួនទទួលបានទាំងផលប្រយោជន៍ និងផលវិបាកមួយចំនួនផងដែរ ព្រោះរថយន្តខុសពីម៉ូតូ និងទាមទារការចំណាយច្រើន។

សិល្បករមួយរូប លោក ឃីង សាន់ បានឲ្យកម្ពុជាថ្មីដឹងថា ដោយសារលោកជាអ្នកសិល្បៈ ដូច្នេះទាមទារឲ្យមានរថយន្តផ្ទាល់ខ្លួន មិនមែនជាភាពហ៊ឺហា ឡានថ្លៃ ទំនើប អ្វីនោះទេ តែជាតម្រូវការងារពេលត្រូវធ្វើដំណើរទៅឆ្ងាយៗ។ ប្រសិនបើជិះឡានឈ្នួល អាចជួបការពិបាក ទាំងការធ្វើដំណើរ ការរង់ចាំយូរ ពេលខ្លះអាចបង្កភាពរញ៉េរញ៉ៃជាដើម។

ពេលមានរថយន្តផ្ទាល់ខ្លួនអាចមានជាមតិមិនល្អមួយចំនួនផងដែរ ប៉ុន្តែលោក ឃីង សាន់ បានឆ្លើយតបថា «ចំពោះទស្សនៈដែលថា អ្នកមានឡាន ជាមនុស្សស៊ីវិល័យ ឬហ៊ឺហា នោះមិនខុសទេ តែមានបុគ្គលមួយចំនួនតូចដែលគាត់មានតិចតួច ក៏ចាប់ផ្តើមតម្កើងឫកជាមនុស្សអច្ឆរិយៈ ទាំងការពិតឡាននោះអាចបង់រំលោះ ឬនៅផ្ទះជួលប៉ុណ្ណោះ។ សម្រាប់អ្នកដែលគេមានពិតប្រាកដ គេមិនធ្វើខ្លួនបែបនេះឡើយ ប៉ុន្តែមនុស្សទាំង ១០ សុទ្ធតែមានចិត្តខុសគ្នា ដូច្នេះការលេងខ្លួនបែបណាជាសិទ្ធិរបស់បុគ្គលប៉ុណ្ណោះ»។

លោក ឃីង សាន់ បន្តថា ដោយសារការប្រើប្រាស់រថយន្តខុសពីម៉ូតូ ប្រសិនខូចខាត ត្រូវការគ្រឿងបម្លាស់ថ្លៃ ការចំណាយច្រើន និងទាមទារឲ្យអ្នកបើកបរគោរពច្បាប់ រៀនសូត្រពីច្បាប់ចរាចរណ៍ មានប័ណ្ឌបើកបរ ចេះគោរពសិទ្ធិអ្នកដទៃ កុំអំនួត ឬឆ្មើងឆ្មៃ ទើបមិនបង្កជាបញ្ហាសម្រាប់ខ្លួនឯង គ្រួសារ និងមនុស្សជុំវិញខ្លួន។

ចូលរួមផ្តល់យោបល់ក្នុងប្រធានបទនេះដែរ លោក ពេជ្យ ឃីង ជាអ្នកចម្រៀង ដែលមានការងារច្រើនចល័តគ្រប់ខេត្តក្រុង ហើយត្រូវធ្វើដំណើរពេលយប់ច្រើនឲ្យដឹងថា ការមានឡានផ្ទាល់ខ្លួនជាមធ្យោបាយសុវត្តិភាព និងរហ័សទាន់ចិត្តជាងគេសម្រាប់ការធ្វើដំណើរ ជាជាងតាមរថយន្តឈ្នួល។ តែលោកថា ការប្រើប្រាស់រថយន្តត្រូវការចំណាយច្រើន ទាំងថ្លៃសាំង សម្ភារៈផ្សេងៗ និងត្រូវមានការបង់ពន្ធក្នុងមួយឆ្នាំៗ។ ម្យ៉ាងប្រសិនបើទិញចំឡានមិនសូវមានគុណភាពនោះ អាចប្រឈមនឹងការចំណាយថែទាំ ជួសជុលច្រើន និងបង្កជាបញ្ហាក្នុងពេលធ្វើដំណើរក៏ថាបាន។ ទៀតសោទ ការមានឡានក៏ទាមទារឲ្យមានចំណូលមួយមធ្យមជាទៀងទាត់ មិនជំពាក់បំណុលគេជាដើម។

លោក ពេជ្យ ឃីង បានបន្ថែមថា អ្នកប្រើប្រាស់រថយន្តផ្ទាល់ខ្លួន ត្រូវស្គាល់ឲ្យបានច្បាស់ពីច្បាប់ចរាចរណ៍ផ្លូវគោក មានឯកសារគ្រប់គ្រាន់ ដូចជាប័ណ្ថបើកបរ ឆៀករថយន្តជាដើម ។

«បើចង់បានរថយន្តផ្ទាល់ខ្លួន គឺត្រូវត្រៀមខ្លួនសម្រាប់ការចំណាយច្រើនជាងមុន។ ទិញរថយន្តក៏ត្រូវមើលគុណភាព កុំចង់បានរថយន្តដែលមានតម្លៃថោកពេក ព្រោះភាគច្រើនរថយន្តដែលមានតម្លៃថោកក្រោមទីផ្សារ អាចជាបន្ទុកថែមទៀតផង»។ នេះជាការបន្ថែមរបស់ លោក ពេជ្យ ឃីង។

The post តោះ! ស្តាប់សិល្បករពីរនាក់ ជជែកពីការទិញរថយន្ត appeared first on Kampuchea Thmey Daily.

គ្រូជួបផលលំបាកអ្វីខ្លះកំឡុងពេលបង្រៀនសិស្សពិការភាព?

Din Thary — Tue, 30 Aug 2022 10:03:11 +0000

អ្នកគ្រូ វ៉ាន្នី ជាគ្រូបង្រៀនសិស្សពិការភាពប្រចាំថ្នាក់ នៃសាលារៀនទន្សាយបានឲ្យដឹងថា កំឡុងពេលនៃការបង្រៀនរបស់លោកគ្រូអ្នកគ្រូដល់សិស្សពិការភាពអាចប្រឈមនឹងបញ្ហាច្រើន ដោយសិស្សខ្លះ អាចវៃ ឬមានអាក្បកិរិយាអវិជ្ជមាន មិនសមប្រកបនោះឡើយ។ តែទោះបីបែបនេះ ក៏លោកគ្រូអ្នកគ្រូនៅតែខិតខំអស់ពីកម្លាំងកាយចិត្ត ដើម្បីបង្រៀនដល់កុមារទាំងអស់នោះ។

នៅក្នុងបទសម្ភាសជាមួយកម្ពុជាថ្មី អ្នកគ្រូ វ៉ាន្នី បានរៀបរាប់ឲ្យដឹងពីបញ្ហាមួយចំនួន នៃការបង្រៀនដល់សិស្សពិការភាព ដោយក្នុងនោះអាចមានកុមារខ្លះ មានអារម្មណ៍មួម៉ៅមិនសប្បាយចិត្ត ធ្វើឲ្យមិនស្តាប់លោកគ្រូអ្នកគ្រូ ដូច្នេះទើបខាងសាលារៀបចំឲ្យមានជាបណ្ណាល័យឌីជីថល នឹងមានបន្ទប់ផ្ចង់អារម្មណ៍សម្រាប់កុមារ។

ដោយហេតុថា នៅក្នុងបន្ទប់ផ្ចង់អារម្មណ៍មានសម្ភាររំញោចអារម្មណ៍ច្រើន ទាក់ទាញអារម្មណ៍ឲ្យកុមារសប្បាយចិត្ត ជក់ចិត្ត ចាប់អារម្មណ៍។ មិនតែប៉ុណ្ណោះ ចំពោះកុមារ ដែលមានអាក្បកិរិយាពិបាកខ្លាំង លោកគ្រូអ្នកគ្រូម្នាក់ៗ ព្យាយាមស្វែងយល់អំពីចិត្តចំណុចខ្លាំង និងចំណុចខ្សោយ អ្វីដែលចង់បាន នឹងនាំលេងនៅរបស់ដែលពួកគេចូលចិត្ត។

លើសពីនេះទៅទៀត គ្រូបង្រៀនអាចប្រឈមបញ្ហាខ្លាំង ដោយសារ ពួកគេជាកុមារដែលមានបញ្ហាបញ្ញា មានន័យថា មិនសូវមានអាកប្បកិរិយាល្អ ហើយរាល់អាកប្បកិរិយារបស់គាត់ភាគច្រើនគឺអវិជ្ជមាន នឹងបង្កជាអំពើរហិង្សាមកលើគ្រូដូចជាខាំ និងបោចសក់ជាដើម។

ជុំវិញបញ្ហានេះអ្នកគ្រូ វ៉ាន្នី បាននិយាយថា «ខ្ញុំធ្លាប់ជួបប្រទះ ដោយពេលខ្លះគាត់បោកយើង វៃយើង ដែលអាកប្បកិរិយាយគាត់ នៅពេលគាត់បញ្ចេញអាកប្បកិរិយាខ្លាំង យើងពីបាក់ក្នុងការទប់ទល់ជាមួយគាត់ ប៉ុន្តែយើងនៅតែខិតខំឲ្យអស់ពីកម្លាំងកាយចិត្តដើម្បីជួយពួកគាត់»។

អ្នកគ្រូ វ៉ាន្នី បាននិយាយថា ដោយសារនៅក្នុងប្រទេសភាគច្រើន ការយល់ដឹងនៃពិការភាពនៅមានកម្រិត ដូច្នេះ ចង់ឲ្យខាង សារព័ត៌មានផ្សេងៗ ជួយផ្សព្វផ្សយឲ្យប្រជាជនទូទាំងប្រទេស ក៏ដូចជាស្ថាប័ន្តពាក់ព័ន្ធ ថ្នាក់ដឹងនាំ គាត់ជួយគាំទ្ររពីពិការភាព ព្រោះកុមារពិការភាពត្រូវការថ្នាក់រៀន ត្រូវការគ្រូ ហេតុនេះប្រសិនបើមានខ្វះត្រង់ចំណុចណានោះ កុមារទាំងនោះមិនបានចូលរៀន ដែលបង្កឲ្យមានបន្ទុកក្នុងគ្រួសារ និងសង្គមផងដែរ៕

ដោយ៖ ឌឿនចាន់ ថារី

The post គ្រូជួបផលលំបាកអ្វីខ្លះកំឡុងពេលបង្រៀនសិស្សពិការភាព? appeared first on Kampuchea Thmey Daily.

អាចារ្យធំនិយាយពីការចាក់សាក់ ប្រវត្តិរាប់ពាន់ឆ្នាំ មានអត្ថន័យផ្សេងៗគ្នា

Din Thary — Tue, 30 Aug 2022 01:17:00 +0000

ការចាក់សាក់ គឺមានតាំងពីសម័យបុរាណកាល រហូតមកដល់ពេលបច្ចុប្បន្ននេះ។ ប៉ុន្តែអាចផ្លាស់ប្តូរទៅតាមបរិបទនៃសង្គម ដោយសារការសាក់បានក្លាយជាសិល្បៈមួយនៃការតុបតែងលំអរខ្លួនកាន់តែមានភាពទាក់ទាញរបស់យុវវ័យ មនុស្សគ្រប់ស្រទាប់វណ្ណៈ មិនថាប្រុស ឬស្រីទេនោះទេ។ ការសាក់រូបអ្វីម្យ៉ាងនៅលើរាងកាយ មិនមែនអាក្រក់ឡើយ គេមានបង្កប់នៅអន្តន័យផ្សេងគ្នានៃរូប។ តែក្នុងនោះក៏មានមតិរិះគន់មួយចំនួនថា ឲ្យតែអ្នកមានស្នាមសាក់សុទ្ធតែជាអ្នកលេង មិនល្អ ឬមានធ្វើអំពើអ្វីជាដើម។

អាចារ្យធំ បានឲ្យ«កម្ពុជាថ្មី» ដឹងតាមរយៈប្រព័ន្ធតេឡេក្រាមថា ចាស់ពីដើមបានសាក់ជាជំនឿអាគមបារមី ជាប់លាប់របស់មនុស្សខ្មែរតាំងពីសម័យបុរាណ សម័យមហានគររហូតមកដល់បច្ចុប្បន្នភាព ទោះបីនាសម័យមុនមានកើតសង្គ្រាមណាមួយក៏ដោយ ប៉ុន្តែនៅសម័យនេះមិនអាចបាត់បង់ការសាក់នេះះបានដែរ ព្រោះវាបានផ្សារភ្ជាប់ជាមួយមនុស្សខ្មែរគ្រប់ជំនាន់មកហើយ។

«សាក់ទី១មានជំនឿថា នឹងញាំងខ្លួនឯងឲ្យក្លាយជាវិសេសជនណាមួយ មានយ័ន្តដើម្បីការពារឃុំគ្រងវាជាផ្លូវចិត្តមួយ។ ទី២ អបីយជំនឿដែលតពីដូនតាមកនោះ សាក់ដើម្បីបានគង់វង្សស្ថិតស្ថេរ ក្នុងនាមជាមរតកវប្បធម៏ខ្មែរកុំឲ្យបាត់ដានទៅ ថែររក្សាឲ្យគង់ និងបង្ហាញទៅឲ្យមហាជនទូទៅឬក៏ជាតិសាស្រ្តដទៃ តាមរយះពណ៌សម្បុរ អត្ថសញ្ញាណតាមរយៈការសាក់លើខ្លួន បួកជាមួយយ័ន្តបុរាណនោះ»។ លោកអាចារ្យធំ បានបន្ថែមបែបនេះ។

ពាក់ព័ន្ធការសាក់យ័ន្តបានដិតដាមជាមួយផ្នត់គំនិតខ្មែររាប់ពាន់ឆ្នាំមកហើយ។ យ័ន្តទាំងអស់ត្រូវបានឧប្បត្តិកដោយអាគមគាថា បាលីដែលអ្នកប្រាជ្ញជំនាន់ចាស់លោកបានចងក្រងនៅក្នុងបរិបទនៃសម័យកាលនីមួយៗ។ យ័ន្តខ្លះប្រើសម្រាប់មេត្តាមហានិយម យ័ន្តស្នេហ៏ យ័ន្តខ្លះសម្រាប់ការពារខ្លួន បញ្ជៀសអំពីអាវុធផ្សេងៗពីសត្រូវ ព្រូញ ស្នា ធ្នូ។ យ័ន្តខ្លះទៀតជាយ័ន្តស្បែកគង់ដែលគេគិតថាកាប់មិនមុត តាមអត្ថន័យផ្សេងគ្នាទៅតាមប្រភេទ។

អាចារ្យធំ បានលើកឡើងទៀតថា បច្ចុប្បន្នយុវវ័យមួយចំនួនសាក់យ័ន្តគិតថាជាសិល្បៈ។ យ័ន្ត ៥ ជួរដែលថៃគេកាត់មកហៅថាយ័ន្តហាថែវ យ័ន្តមហាកម្រើក យ័ន្តប្រាំទិស មានន័យដូចម្តេច ពួកគេមិនបានដឹង តែចាក់ដោយសារមើលឃើញតារាហូលីហ្វូត អេន ជេលីណា សាក់យ័ន្ត ៥ ជួរស្អាត នោះមានទំនោរ ជោរតាមគ្នា តែមិនបានដឹងពីអត្ថន័យនៃរូបយ័ន្តនីមួយៗ។

បន្ថែមពីនេះ ចំពោះផ្នត់គំនិតមហាជនមួយចំនួនតូចដែលបានគិតថា មនុស្សមានសាក់សុទ្ធតែអ្នកលេង មនុស្សមិនល្អនោះ អាចារ្យធំបាននិយាយថា« គាត់បាននិយាយមកជាង ១០ ឆ្នាំហើយពីបញ្ហាមួយនេះ ខ្ញុំថាជាផ្នត់គំនិតអវិជ្ជមាន និងអាចមេរោគមួយដែលជ្រៀតជ្រែកចូលក្នុងសង្គមខ្មែរមួយធ្វើឲ្យយើងកើតមានគំនិតស្អប់ខ្ពើមនៅមរតនៅបុព្វការីជន វាយតម្លៃមនុស្សតែសំបកក្រៅ ដោយមើលតែសំបកសៀវភៅរហែកវាយតម្លៃដល់ខ្លឹមសារនៅក្នុងសៀវភៅ ដូច្នេះយើងមិនអាចទាយមនុស្សត្រឹមសំបកក្រៅថាល្អឬអាក្រក់នោះទេ»។ ទន្ទឹមនេះ អាចារ្យធំ បានគូសបញ្ជាក់ថា មិនមែនត្រឹមតែយ័ន្តទេ រហូតមាននៅពាក្យខ្លះៗ «កុំរៀនចាប៉ី ប្រយ័ត្នខ្វាក់ភ្នែក គួរទៅរៀនហ្គីតា កុំផ្លុំខ្លុយប្រយ័ត្នសុំទាន ទៅផ្លុំសាក់សូហ្វូនបានកាលីប ទៅចុចតាខេអាហ្នឹងក្រ ទៅចុចអ័កបានកាលីបមានទីផ្សារ»។

អាចារ្យធំ លើកឡើងទៀតថា បើទោះបីអ្នកណាមានគំនិតល្អ ឬមិនល្អ វិជ្ជមានឬអវិជ្ជមានទាក់ទងទៅនឹងសិល្បៈនៃការសាក់រូប ជាសិទ្ធិរបស់បុគ្គល។ តែសូមឲ្យមានការថ្លឹងថ្លែងបែងចែកឲ្យបានច្បាស់លាស់អំពីរឿងរួមជាចេនារបស់បុគ្គលណាម្នាក់ ដែលចង់ដែលរក្សាអភិរក្ខនៅយ័ន្ត និងចេនាមួយណាផ្សេងទៀត។

បច្ចុប្បន្ននេះ សិល្បៈនៃការសាក់រូបបានក្លាយជាការពេញនិយមខ្លាំង សម្រាប់មនុស្សទូទៅនៅលើពិភពលោក។ ការសាក់រូបនៅលើផ្នែកផ្សេងៗនៃរាងកាយ ការសាក់រូបមានគ្រប់ម៉ូត គ្រប់ប្រភេទទៅតាមតែការកម្មងចង់បានរបស់យុវវ័យ។

អាចារ្យធំបានបញ្ជាក់ថា ជំនាញសាក់នេះអាចត្រូវបានរៀនពីជំនាន់មួយទៅជំនាន់មួយតាមរយៈព្រះសង្ឃ ឬគ្រូមន្តអាគមហើយភាពស្អាតអាស្រ័យលើការរចនានៃអ្នកចាក់សាក់។ ប៉ុន្តែអ្នកចាក់សាក់ខ្លះមិនចេះសូត្រប្រោះព្រំមន្តអាគមទេ។

ការចាក់សាក់យ័ន្តត្រូវបានគេជឿថានឹងការពារបានតាំងពីគ្រាប់កាំភ្លើងរហូតដល់ខ្មោចព្រាយបិសាច ការសាក់ដោយការប្រសិទ្ធិ ឬបញ្ចុះមន្តអាគមក្នុងការការពារខ្លួនពីអំពើរអាប ធ្មបផ្សេងៗ អាស្រ័យទៅលើប្រភេទយ័ន្តនីមួយៗ។

អាចារ្យធំបានលើកទឹកចិត្តដល់មនុស្សខ្មែរថា «បើចង់សាក់អ្វីក៏សាក់ទៅព្រោះជាសិល្បៈ ប៉ុន្តែសុំសាក់ឲ្យចំណេញសាក់ឲ្យមើលមកឃើញថាវាយកជាការបាន ដោយមិនត្រូវសាក់រូប កាំភ្លើង រូបកំបិត ពូថៅ ពាក្យពេចន៍ណាដែលឆ្គាំឆ្គង ប្តូរមកសាក់ជារូបយ័ន្តបុរាណ ឲ្យចំជាយ័ន្តបុរាណ សាក់ជារូបអប្សរា ល្ខោនខោល អង្គវត្ត ប្រាសាទបាយ័ន្ត ព្រោះកូណាអង្គជ័យវរ្ម័នទី៧ រូបផែនទីខ្មែរ អក្ខរក្រមនៃភាសារខ្មែរ កុំឲ្យគេមើលមកសាក់ដែរតែប្រលាក់ជារឿងគ្មានប្រយោជន៍»៕

The post អាចារ្យធំនិយាយពីការចាក់សាក់ ប្រវត្តិរាប់ពាន់ឆ្នាំ មានអត្ថន័យផ្សេងៗគ្នា appeared first on Kampuchea Thmey Daily.

ទស្សនៈ Archives - Kampuchea Thmey Daily

បណ្ឌិត ឈត ប៊ុនថង៖ បើនរណាម្នាក់បញ្ចេញទស្សនៈខុស ឬផ្ទុយពីគំនិតខ្លួន មិនបាច់ខឹងទេកុំជឿទៅបានហើយ!

ទស្សនៈ ៩ ឃ្លាពីអតីតនាយករដ្ឋមន្ត្រី អង់គ្លេស ល្បីសម័យសង្គ្រាមលោកលើកទី ២

ទស្សនៈ និងគោលការណ៍ជ្រុលនិយម មិនថានៅក្នុងសាសនា ឬនយោបាយទេ ត្រូវលុបបំបាត់ និងបំផ្លាញចោល​ឲ្យអស់

និស្សិត ២ រូបអះអាង ​ការ​អប់រំ​តាម​​អ៊ីនធឺណិត​មាន​ផល​ពីរ​ដើរ​ទន្ទឹម​គ្នា

ស្បែកជើង​បាត់តា កាន់តែ​​ពេញនិយម​ក្នុង​ចំណោម​​​សិស្ស​សាលា​

តោះ! ស្តាប់​សិល្បករពីរនាក់ ជជែក​ពី​ការទិញ​រថយន្ត