លោកបន្តថា ទីមួយ​ទំនប់​នេះ​ក្រៅពី​ការ​ផ្គត់ផ្គង់ ស្រោចស្រព​ដំណាំ​កសិកម្ម​របស់កសិករបងប្អូនប្រជាពលរដ្ឋដែលតំបន់នេះ និយាយជារួម គឺ​បាន​ទាញ​យក​ប្រភព​ទឹក​ស្អាត​សម្រាប់​ប្រើប្រាស់​ទាំង​ក្នុងស្រុក​អូររាំង ក៏​ដូច​ប្រជាពលរដ្ឋ​ក្រុងសែនមនោរម្យ ខេត្តមណ្ឌលគិរីផងដែរ។ លើស​ពី​នេះ ហើយនៅពេលខាងមុខ ថ្វីដ្បិតតែមិនទាន់អាច បញ្ចប់ដោយការទាញទឹកបម្រើសេវាសាធារណៈចែកចាយទៅដល់ពលរដ្ឋ តែ​នៅ​ថ្មីៗ​នេះ​មន្ត្រី​ជំនាញ​កំពុង​តែ​បន្ត​នីតិវិធី ដោយ​មន្ទីរ​ឧស្សាហកម្ម​និង​សិប្បកម្ម និង​កំពុង​សិក្សា​បង្កើត​ឱ្យ​មាន​អនុស្ថានីយថ្មីនៅក្បែរនោះបន្ថែមទៀត ដើម្បី​ទាញ​យក​ផលិត​ជា​ទឹក​ស្អាត​ត​បណ្តាញទៅដល់ខ្នងផ្ទះតែម្តង។

លោកអភិបាលស្រុកបានបន្ថែម​ថា ក្រោយ​ពី​ការ​ផ្គត់ផ្គង់ទឹកស្អាត​ទំនប់​អូរតេធិបតី ក៏​មាន​សក្ដានុពលផ្នែកវិស័យទេសចរណ៍ខ្លាំង ដែលបានទាក់ទាញភ្ញៀវទេសចរយ៉ាងច្រើនសន្ធឹកសន្ធាប់ ដែលមកទស្សនាកម្សាន្តនាបរិវេណនេះ។

ក្រៅពីបុណ្យជាតិធំៗ ជាពិសេសភ្ញៀវទេសចរតែងមកកម្សាន្តនាចុងសប្ដាហ៍ថ្ងៃសៅរ៍និងថ្ងៃអាទិត្យ ដែល​ក្រុម​អ្នក​ទេសចរ​ទាំង​នោះ​មើល​ទេសភាព​ធម្មជាតិ​យ៉ាង​ស្រស់បំព្រង​ហ៊ុមព័ទ្ធ​ដោយជួរដងភ្នំរុក្ខជាតិខៀវខ្ចី ដែល​ជា​ទី​មនោរម្យ​បរិយាកាសបរិសុទ្ធ​សម្រាប់​ភ្ញៀវទេសចរជាតិ​និង​អន្តរជាតិ ដែលបានមកកម្សាន្តនៅទីនេះ។

លោក សៀក មុន្នី បានបញ្ជាក់ថា នាពេលខាងមុខ អាជ្ញាធរស្រុកនឹងគ្រោង ដាក់ឧបករណ៍ពោងបណ្ដែតទឹកជិះលេងកម្សាន្តនៅក្នុងទំនប់ធិបតីនេះផងដែរ ព្រោះនៅបរិវេណទំនប់មានពីដំណាក់។ និងមានឧបករណ៍ផ្សេងៗបន្ថែមទៀតដើម្បីអាច​ឱ្យ ប្រជាពលរដ្ឋក្នុងស្រុកក៏ដូចជាអាចទាក់ទាញភ្ញៀវទេសចរជាតិនិងអន្តរជាតិមកលេង កម្សាន្តនៅខេត្តមណ្ឌលគិរី បានច្រើនថែមមួយកម្រិតទៀត។

គួរគូសបញ្ជាក់​ថា ទំនប់អូរតេធិបតី ដែលជាគម្រោងធនធានទឹកពហុវិស័យតម្លៃ ៦២លានដុល្លារអាមេរិក បានសម្ភោធដាក់​ឱ្យប្រើប្រាស់ជាផ្លូវការកាលពីចុងឆ្នាំ២០២៤ ក្រោយចំណាយពេលសាងសង់ប្រមាណ៣ឆ្នាំ។ ទំនប់នេះមានសមត្ថភាពស្តុកទឹក ១២លានម៉ែត្រគូប និងបំពាក់ដោយហេដ្ឋារចនាសម្ព័ន្ធសំខាន់ៗជាច្រើន រួមមាន ទំនប់បេតុងប្រវែង ៣០៦ម៉ែត្រ ដែលដើរតួជាស្ពានឆ្លងកាត់, សំណង់បង្ហូរទឹក, អគារការិយាល័យ, និងផ្លូវបេតុងជុំវិញអាងនេះ៕

អត្ថបទ ៖ រៀម សុខហេង

The post វឌ្ឍនភាព​ទំនប់​អូរតេធិបតី ៖ ក្រោយ​ដាក់​សម្ពោធ​ អាជ្ញាធរ​ត្រៀម​ត​បណ្តាញ​ផ្គត់ផ្គង់​ទឹកស្អាត​ជូនពលរដ្ឋ​ក្នុងខេត្តមណ្ឌលគិរី appeared first on Kampuchea Thmey Daily.

ក្រោម​ក្របខ័ណ្ឌ​ឥណទាន​មូលនិធិទ្រទ្រង់ថវិការបស់រាជរដ្ឋាភិបាលកម្ពុជា ទំនប់អាងទឹកអូរតេ ក្នុង​ខេត្តមណ្ឌលគិរី​ត្រូវ​បាន​សាងសង់​ឡើង​ជា​ ២​ ជំហាន​ផ្សេង​គ្នា​។ ក្នុង​នោះមាន​ ៣​ ទំនប់​ គឺ​ទំនប់អាងទឹកអូរតេ ទំនប់លើ និង​ទំនប់ក្រោម ដែល​ទំនប់​ទាំង ៣ មាន​សមត្ថភាព​ស្តុក​ទឹកបាន​ផ្សេង​ៗ​គ្នា ដូច​ខាងក្រោម​៖ ​

១-អាងទឹកអូរតេ ស្ថិតក្នុងស្រុកអូររាំង មានសមត្ថភាពស្តុកទឹកបាន ១២ លានម៉ែត្រគូប។ អាងទឹកអូរតេ​នេះ​ត្រូវបាន​សាងសង់់ឡើងដោយមានទំនប់បេតុងប្រវែង ៣០៦ម៉ែត្រ កម្ពស់ ២០ម៉ែត្រ មានតួទំនប់ជាស្ពានធ្វើចរាចរណ៍ឆ្លងកាត់បាន មានសំណង់បង្អោរបេតុងប្រវែង ១០០ម៉ែត្រ កម្ពស់១៥ម៉ែត្រ និងទ្វារទឹកចំនួន ២ទ្វារ និងសំណង់ការពារជើងទេរប្រវែង ៣ ១៧៦ ម៉ែត្រ។ ក្នុងនោះ ក៏មានអគារការិយាល័យ និងសហគមន៍កសិករប្រើប្រាស់ទឹកចំនួន ១ខ្នង, ស្ថានីយភ្លើងដំឡើងត្រង់ស្នូរ ១ឈុត និងម៉ាស៊ីនភ្លើង ១ឈុត, ផ្លូវបេតុងក្រវាត់ជុំវិញអាងប្រវែង ៣ ១៧៦ម៉ែត្រ, ផ្លូវបេតុងចូលទៅកាន់ទំនប់ប្រវែង ៣ ០៦១ម៉ែត្រ និងស្ពានបេតុងចំនួន ៣កន្លែង មានប្រវែងសរុប ៣០៤ម៉ែត្រ។

២-អាងទឹកទំនប់លើ ស្ថិត​នៅ​ក្រុង​សែន​មនោរម្យ​ មានសមត្ថភាពស្តុកទឹក ២១ ម៉ឺនម៉ែត្រគូប និងមានផ្ទៃអាងទំហំ ៤,២ហិកតា។ អាងទឹកទំនប់លើ ត្រូវបានសាងសង់ឡើង​ដោយមានទំនប់អាងប្រវែង ៧៩៩ម៉ែត្រ, ទំនប់ និងផ្លូវជុំវិញអាងប្រវែង ៩៦០ម៉ែត្រ, សំណង់សិល្បការ្យលម្អជើងទេរ ក្រឡាផ្ទៃ ៥ ១១៦ ម៉ែត្រការ៉េ និងប្រព័ន្ធលូដោះទឹកកខ្វក់ ប្រវែង ៧៩៩ ម៉ែត្រ។

៣-អាងទឹកទំនប់ក្រោម ស្ថិត​នៅ​ក្រុង​សែន​មនោរម្យ​ មានសមត្ថភាពស្តុកទឹក ២២ ម៉ឺនម៉ែត្រគូប និងមានផ្ទៃអាងទំហំ ៤,៤២ហិកតា។ អាងទឹកទំនប់ក្រោម សាងសង់់ឡើងដោយមានទំនប់អាងប្រវែង ១៤៨០ម៉ែត្រ ក្នុងនោះ ទំនប់ និងផ្លូវជុំវិញអាងប្រវែង ១៧២៣ម៉ែត្រ, សំណង់សិល្បការ្យលម្អជើងទេរ ក្រឡាផ្ទៃ ៧ ៨៨៦ម៉ែត្រការ៉េ និងប្រព័ន្ធលូដោះទឹកកខ្វក់ប្រវែង ១៧២៣ម៉ែត្រ។

«យោងលិខិតលេខ ២៨០៦ ធទឧ របស់ក្រសួងធនធានទឹក និងឧតុនិយម ចុះថ្ងៃទី២១ ខែសីហា ឆ្នាំ២០២៤ បានគោរពស្នើសុំការឯកភាពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងការដាក់ឈ្មោះទំនប់ទាំង ៣ គឺ ទំនប់អូរតេ ទៅជាទំនប់អូរតេធិបតី,​ ទំនប់លើ ទៅជាទំនប់សែនសុខដុម និង ទំនប់ក្រោម ទៅជាទំនប់សែនមនោរម្យ»។

គម្រោងអភិវឌ្ឍន៍ ធនធានទឹក​សម្រាប់​ពហុវិស័យ​​នៅ​​ក្នុង​ខេត្តមណ្ឌល​គិរី គឺជាផ្នែកមួយនៃផែនការ មេរបស់​ក្រសួងធនធានទឹក និងឧតុនិយម ដើម្បីផ្គត់ផ្គង់ធនធានទឹកដល់គ្រប់វិស័យបម្រើដល់សេចក្តី ត្រូវការរបស់ខេត្ត ហើយ​បណ្តាអាងទឹក​ក្នុង​តំបន់នេះ​ក៏នឹងទាក់ទាញកំណើនភ្ញៀវទេសចរណ៍ផងដែរ។ មិន​តែ​ប៉ុណ្ណោះ គម្រោងនេះ​នឹង​ជួយលើក​កម្ពស់ជីវភាព​ប្រជាជន​ក្នុង​តំបន់​ដែល​ជា​កម្លាំងចលករជំរុញកំណើនសេដ្ឋកិច្ច ជាតិ និង​រួមចំណែក​កាត់​បន្ថយហានិភ័យ​នៃគ្រោះ​មហន្តរាយ​ធម្មជាតិ​ដូចជាគ្រោះទឹកជំនន់ និងគ្រោះ រាំងស្ងួត ដែល​តែងតែ​កើតមាន​ឡើង​ក្នុង​បរិបទ​នៃការប្រែប្រួល​អាកាសធាតុ៕

The post ទំនប់អាងទឹកអូរតេ តម្លៃ​សាងសង់​​ជាង​ ៦២​ លាន​ដុល្លារ​ មានសមត្ថភាពស្តុកទឹកបានដល់ ១២ លាន​ម៉ែត្រគូប appeared first on Kampuchea Thmey Daily.

គម្រោង​អភិវឌ្ឍន៍​ទំនប់អាងទឹកអូរតេ ​អនុវត្តការសាងសង់​អស់​រយៈ​ពេលប្រមាណ ៣ ឆ្នាំ ចាប់ពីថ្ងៃទី១៨ ខែតុលា ឆ្នាំ​២០២១ ដល់ថ្ងៃទី២៧ ខែកញ្ញា ឆ្នាំ២០២៣ ដោយ​ចំណាយថវិកាសរុបប្រមាណ ៦២ លានដុល្លារ​អាមេរិក ក្រោម​ក្របខ័ណ្ឌ​ឥណទាន​មូលនិធិទ្រទ្រង់ថវិការបស់រាជរដ្ឋាភិបាលកម្ពុជា។

គម្រោងនេះ​ឆ្លើយ​តប​តាម​តម្រូវ​ការ​របស់ក្រសួងឧស្សាហកម្ម វិទ្យាសាស្ត្រ និង នវានុវត្តន៍ (MISTI) ក្នុង​ការផលិតទឹកស្អាតឱ្យបាន ៩៤០០ ម៉ែត្រគូបក្នុងមួយថ្ងៃ សម្រាប់​ផែនការមេអភិវឌ្ឍន៍ទេសចរណ៍ខេត្តមណ្ឌលគិរី និង​​ផែនការ​អភិវឌ្ឍន៍​កសិកម្ម​ខេត្ត​មណ្ឌលគិរី​សម្រាប់បម្រើឱ្យការស្រោច​ស្រពផ្ទៃដីផលិតកម្មកសិកម្មចំនួន ១៥ ០០០ ហិកតា។

គម្រោងទំនប់​ទឹក​អូរតេត្រូវបាន​អនុវត្តន៍ជា ២ ជំហាន ដោយ​ជំហានទី១ ក្នុងខែតុលា ឆ្នាំ២០២១ និង​បាន​បញ្ចប់ក្នុងខែមិថុនា ឆ្នាំ២០២២ ដោយចំណាយ​អស់ថវិកា​ចំនួន ២៨ លានដុល្លារអាមេរិក និង​បាន​ស្នើ​​ថវិកាបន្ថែម​​ចំនួន ៧ លាន ដុល្លារអាមេរិក ​បានបញ្ចប់ក្នុងខែវិច្ឆកា ឆ្នាំ ២០២២។ សរុប​ថវិកាចំណាយអស់​ចំនួន​ ៣៥ លាន​ដុល្លារអាមេរិក។

ជំហានទី២ អនុវត្តន៍​ក្នុងខែកញ្ញា ឆ្នាំ២០២៣ និង​បាន​បញ្ចប់​ក្នុងខែមករា ឆ្នាំ២០២៤ ដោយ​ចំណាយ​អស់​ថវិកា​ចំនួន ២៧ លានដុល្លារអាមេរិក។

គួរ​ជម្រាប​ថា គម្រោងអភិវឌ្ឍន៍ធនធានទឹកសម្រាប់ពហុវិស័យនៅក្នុងខេត្តមណ្ឌលគិរី គឺជាផ្នែកមួយនៃផែនការមេរបស់ក្រសួងធនធានទឹក និងឧតុនិយម ដើម្បីផ្គត់ផ្គង់ធនធានទឹកដល់គ្រប់វិស័យបម្រើដល់សេចក្តី ត្រូវការរបស់ខេត្ត ហើយបណ្តាអាងទឹកក្នុងតំបន់នេះក៏នឹងទាក់ទាញកំណើនភ្ញៀវទេសចរណ៍ផងដែរ៕

​

The post ទំនប់អាងទឹកអូរតេតម្លៃជាង ៦២ លានដុល្លារ សម្ពោធឱ្យប្រើប្រាស់ជាផ្លូវការស្អែកនេះ appeared first on Kampuchea Thmey Daily.