នាយក្រូច Archives - Kampuchea Thmey Daily

តាស្លេក លេចមុខជាថ្មី បង្កការចាប់អារម្មណ៍ដល់អ្នកគាំទ្រ ខណៈជាការវិលត្រឡប់មកសម្តែងរួមជាមួយ នាយក្រូច

Chan Sotheavy — Tue, 05 May 2026 08:09:35 +0000

បន្ទាប់ពីបាត់មុខពីវិស័យសិល្បៈអស់មួយរយៈ ធ្វើឱ្យអ្នកគាំទ្រជាច្រើននឹករលឹក តារាសម្តែងជើងចាស់ និងជាតារាកំប្លែង តាស្លេក បានលេចមុខជាថ្មីក្នុងការសម្តែងរួមគ្នាជាមួយ នាយក្រូច តារាកំប្លែងរួមក្រុមដែលធ្លាប់សាងកេរ្តិ៍ឈ្មោះល្បីទូទាំងប្រទេស។

ការវិលត្រឡប់របស់ “តាស្លេក” លើកនេះ បានបង្កការចាប់អារម្មណ៍យ៉ាងខ្លាំងពីសំណាក់មហាជន ជាពិសេសអ្នកគាំទ្រក្រុមកំប្លែងតាវិចទ័រ ដែលធ្លាប់ទទួលបានសំណើចរីករាយពីការសម្តែងរបស់លោកកាលពីមុន។ ជាមួយនឹងស្ទីលកំប្លែងបែបធម្មជាតិ និងទេពកោសល្យកំណាព្យ តាស្លេក ជាតារាកំប្លែងដែលទស្សនិកជនចូលចិត្ត និងគាំទ្រយ៉ាងខ្លាំងផងដែរអំឡុងពេលនោះ ពិសេសពេលដែលលោកចាប់ដៃគូសម្តែងជាមួយ យាយ តយ។

នៅថ្ងៃនេះដែរ តាមរយៈវីដេអូខ្លីជិត ២នាទី នាយក្រូច បានបង្ហាញអារម្មណ៍រីករាយក្នុងការបានវិលមកធ្វើការជាមួយដៃគូចាស់ឡើងវិញ ខណៈការសហការលើកនេះ មានគោលបំណងនាំមកនូវសំណើចថ្មីៗ និងបន្តផ្តល់ភាពសប្បាយរីករាយដល់ទស្សនិកជន។

សាធារណជនបានបង្ហាញអារម្មណ៍រំភើប និងស្វាគមន៍ការវិលត្រឡប់នេះ ដោយរំពឹងថា ការរួមដៃរបស់តារាកំប្លែងជើងចាស់ទាំងនេះ នឹងនាំមកនូវស្នាដៃថ្មីៗ និងបន្តរក្សាប្រជាប្រិយភាពក្នុងវិស័យកំប្លែងខ្មែរ៕

The post តាស្លេក លេចមុខជាថ្មី បង្កការចាប់អារម្មណ៍ដល់អ្នកគាំទ្រ ខណៈជាការវិលត្រឡប់មកសម្តែងរួមជាមួយ នាយក្រូច appeared first on Kampuchea Thmey Daily.

នាយ ក្រូច ប្រែសាច់ឈាមស្រស់ថ្លា ក្រោយធ្លាក់ខ្លួនឈឺស្គមស្លេកស្លាំងដោយសារជំងឺ

អ៊ិន ពិសី — Mon, 19 Jun 2023 07:18:13 +0000

ទស្សនិកជនដឹងហើយថា ថ្មីៗនេះតារាកំប្លែងអ្នកនាង ស្រីអ៊ិត បានទម្លាយយ៉ាងភ្ញាក់ផ្អើល ធ្វើឲ្យអ្នកគាំទ្របង្ហាញការព្រួយបារម្ភស្ទើរគ្រប់គ្នា ក្រោយបង្ហោះរូបភាព និងជូនពរតារាកំប្លែងនាយ ក្រូច ឆាប់ជាសះស្បើយពីជំងឺ។

គេចាំបានថា ខ្លឹមសារតារាកំប្លែង ស្រីអ៊ិត រៀបរាប់បានលើកឡើងដូច្នេះថា «សូមជូនពរបងប្រុសឆាប់ជាសះស្បើយ ចង់ឃើញបងមានសុខភាពល្អ ហើយមានសាច់ មានឈាមមកវិញ មិនចង់ឃើញបងឈឺ គ្មានសាច់ឈាមស្គមអ៊ីចឹងទេ ប្អូនពិតជាពិបាកចិត្តខ្លាំងណាស់បង គុណឪពុក គុណម្ដាយ ជួយថែរក្សាបងឆាប់ជាលែងឈឺណាបង»។ ដំណឹងខាងលើនេះ ឃើញមានអ្នកគាំទ្រមួយចំនួន ព្រមទាំងអ្នករួមអាជីពសិល្បៈ បានបង្ហាញការព្រួយបារម្ភ និងផ្ញើសារសួរនាំគ្រប់គ្នាផងដែរ។

មកដល់ពេលនេះ តារាកំប្លែងនាយក្រូច មិនទាន់អាចទាក់ទងដើម្បីសូមការសួរនាំបន្ថែមបាននៅឡើយទេ ខណៈកម្ពុជាថ្មី បានព្យាយាមធ្វើការទំនាក់ទំនងតាមរយៈប្រព័ន្ធសង្គមតេឡេក្រាមដែរ តែលោកមិនបានឆ្លើយតបនោះទេ។

ដោយឡែកបើងាកទៅចាប់អារម្មណ៍នៅលើបណ្ដាញសង្គមហ្វេសប៊ុករបស់ នាយក្រូច គេឃើញតារាកំប្លែងរូបនេះ បង្ហោះរូបភាពមួយសន្លឹកដែលមើលទៅមានសាច់ឈាមស្រស់ថ្លាជាងមុន។ ក្នុងនោះនាយក្រូច បាននិយាយថា «អរុណសួស្ដីបងប្អូន ព្រឹកនេះក្រោកពីគេងមកស្រស់ថ្លាច្រើន ចុះបងប្អូនវិញយ៉ាងម៉េចដែរ សូមមានលាភ មានជ័យ ហេងៗ ទាំងអស់គ្នា»។

បើតាមតារាកំប្លែង និងជាប្អូនស្រីបង្កើតរបស់នាយក្រូច គឺ អ្នកនាង អ៊ិត បានអះអាងប្រាប់ព័ត៌មានក្នុងស្រុកមួយថា បច្ចុប្បន្ននាយក្រូច កំពុងញាំញីដោយជំងឺទឹកនោមផ្អែម ជំងឺមួយនេះ បានកើតមានចំពោះលោកអស់ជាច្រើនឆ្នាំមកហើយ។ ស្រីអ៊ិត បញ្ជាក់បន្ថែមថា កន្លងមក ជំងឺនាយក្រូច មិនបានធ្វើទុក្ខខ្លាំងនោះឡើយ ប៉ុន្តែមួយរយៈចុងក្រោយនេះក៏ចាប់ផ្ដើមធ្វើទុក្ខខ្លាំង បណ្ដាលឲ្យលោកចុះស្គម និងទាមទារការព្យាបាលជាចាំបាច់៕

អត្ថបទ ៖ ចាន់រ៉ា

The post នាយ ក្រូច ប្រែសាច់ឈាមស្រស់ថ្លា ក្រោយធ្លាក់ខ្លួនឈឺស្គមស្លេកស្លាំងដោយសារជំងឺ appeared first on Kampuchea Thmey Daily.

ស្ងាត់ៗ នាយក្រូច ឡើងគេហដ្ឋានថ្មីយ៉ាងស្កឹមស្កៃតម្លៃខ្ទង់សែនដុល្លារ

អ៊ិន ពិសី — Thu, 24 Nov 2022 07:23:00 +0000

ស្របពេលជោគជ័យលើវិថីសិល្បៈ តារាកំប្លែងនាយក្រូច ព្រឹកមិញ បានធ្វើឲ្យមហាជនចាប់អារម្មណ៍ និងភ្ញាក់ផ្អើលគ្រប់គ្នា ខណៈលោកប្រកាសពិធីឡើងគេហដ្ឋានថ្មីតម្លៃរាប់សែនដុល្លារ។

ជាក់ស្ដែងនៅលើទំព័រហ្វេសប៊ុករបស់តារាកំប្លែងនាយក្រូច នាព្រឹកថ្ងៃសិរីសួស្ដីឡើងគេហដ្ឋានថ្មីនេះដែរ បានបង្ហោះសារទាំងអារម្មណ៍រំភើបថា កម្មពិធី សែនក្រុងពាលី និងហែជំនូនកាត់ខ្សែបូលាបជ័យសិរីសួស្ដី សូមឲ្យហេងៗ។ អគុណបងប្អូនអ៊ំពូមីងយាយតាទាំងអស់គ្នា។

នាយក្រូច បន្តថា ដល់ថ្ងៃជួបជុំគ្នាហើយបងប្អូន ថ្ងៃទី ២៤.១១.២០២២ ថ្ងៃឡើងគេហដ្ឋានថ្មីរបស់ខ្ញុំ អរគុណបងប្អូន សុំលាភសុំជ័យ ហេងមហាហេង។

ជាមួយគ្នានេះដែរ គេឃើញមានមហាជន និងអ្នកគាំទ្រជាច្រើន បានសម្ដែងការចូលរួមអបអរនាឱកាសថ្ងៃជោគជ័យសិរីសួស្ដីពិធីឡើងគេហដ្ឋានថ្មីដ៏ស្កឹមស្កៃរបស់តារាកំប្លែងនាយក្រូច ផងដែរ។

បើតាមការបង្ហើប ផ្ទះថ្មីរបស់នាយក្រូច ដែលទើបសង់រួចរាល់នេះ គឺមានតម្លៃរហូតខ្ទង់សែនដុល្លារឯណោះ។

សូមបញ្ជាក់ដែរថា នាយក្រូច គឺជាតារាកំប្លែងស្ថិតក្នុងក្រុមនាយ ពែកមី ដ៏មានប្រជាប្រិយភាពមួយរូប ដែលទទួលបានការស្រឡាញ់គាំទ្រខ្លាំងពីមជ្ឈដ្ឋានមហាជនគ្រប់យុវវ័យ។

បច្ចុប្បន្នទេពកោសល្យកំប្លុកកំប្លែងរបស់នាយក្រូច កាន់តែទទួលបានការគាំទ្រ និងទាញការចាប់អារម្មណ៍ពីមហាជនជាច្រើនទាំងក្នុង និងក្រៅប្រទេស៕

អត្ថបទ ៖ ចាន់រ៉ា

The post ស្ងាត់ៗ នាយក្រូច ឡើងគេហដ្ឋានថ្មីយ៉ាងស្កឹមស្កៃតម្លៃខ្ទង់សែនដុល្លារ appeared first on Kampuchea Thmey Daily.

នាយ ក្រូច បណ្តុះកូនស្រីឲ្យដើរតាមគន្លងសិល្បៈ

Sorn Phanith — Mon, 11 Jul 2022 06:57:18 +0000

អ្នកគាំទ្រកំពុងនាំគ្នាចាប់អារម្មណ៍ក្រោយ ពេលតារាកំប្លែងល្បីឈ្មោះនាយ ក្រូច បានបង្ហាញមុខកូនស្រីរបស់ខ្លួន ដែលមានវ័យពេញក្រមុំយ៉ាងស្រស់ស្អាត។ ម្យ៉ាងទៀងរឿងដែលគេកាន់តែនឹក ស្មានមិនដល់នោះគឺកូនស្រីនាយ ក្រូច ថែមទាំងមានដុងសិល្ប:ទៀតផង។

តួយ៉ាងថ្មីៗនេះនាយ ក្រូច កាន់តែពញ្ញាក់អារម្មណ៍របស់អ្នកគាំទ្រថែមទៀត បន្ទាប់ពីឃើញលោកបានទម្លាយរូបភាពកូនស្រីជាទីស្រឡាញ់របស់ខ្លួន នៅលើបណ្តាញសង្គមឲ្យមហាជនបានឃើញគ្រប់គ្នា។ កូនស្រីរបស់តារាកំប្លែងនាយ ក្រូច ក៏ត្រូវបានគេដឹងថា មានដុងក្នុងវិស័យសិល្បៈផងដែរ ខណៈនាយ ក្រូច កំពុងខិតខំបណ្តុះកូនស្រី ដើម្បីចេញរកលុយក្នុងអាជីពសិល្បៈសព្វថ្ងៃ។

បើតាមការបញ្ជាក់ឲ្យដឹងពីនាយក្រូច ក្នុងនាមជាឪ ពុកបាននិយាយប្រាប់ថាកូនស្រីសំណព្វចិត្តរបស់លោកមានឈ្មោះ បឿន សុបុនបញ្ញា។ ខណៈពេលនេះលោកក៏បានដឹកដៃកូនស្រីចេញរកលុយជាមួយគ្នា ក្នុងកម្មវិធីមង្គលការ ដែលនាងមានជំនាញផ្នែករាំរបាំអបអរក្នុងកម្មវិធីមង្គលនោះផងដែរ។ យ៉ាងមិញនាយ ក្រូច មិនទាន់បញ្ជាក់ទេថា កូនស្រីលោកមានអាយុប៉ុន្មានទេ។

សូមបញ្ជាក់ដែរថា នាយក្រូច គឺជាតារាកំប្លែងស្ថិតក្នុងក្រុមនាយ ពែកមី ដ៏មានប្រជាប្រិយភាពមួយរូប ដែលទទួលបានការស្រឡាញ់គាំទ្រខ្លាំងពីមជ្ឈដ្ឋានមហាជនគ្រប់យុវវ័យ។ បច្ចុប្បន្នទេពកោសល្យកំប្លុកកំប្លែងរបស់នាយ ក្រូច កាន់តែទទួលបានការគាំទ្រ និងទាញការចាប់អារម្មណ៍គាំទ្រពីមហាជនជាច្រើនទាំងក្នុងនិងក្រៅប្រទេស៕

អត្ថបទ៖ ចាន់រ៉ា

The post នាយ ក្រូច បណ្តុះកូនស្រីឲ្យដើរតាមគន្លងសិល្បៈ appeared first on Kampuchea Thmey Daily.

នាយ ក្រូច បញ្ជាក់ថា ទោះបីមិនបានឆ្លងកូវីដ-១៩ ពីស្រី អ៊ីត ក្តី តែពេលនេះកំពុងធ្វើចត្តាឡីស័ក១៤ ថ្ងៃនៅផ្ទះ

Sokhom Khon — Mon, 15 Mar 2021 09:15:00 +0000

តារាកំប្លែងនាយ ក្រូច បានបញ្ជាក់ប្រាប់កម្ពុជាថ្មីតាមទូរស័ព្ទនៅរសៀលថ្ងៃទី១៥ ខែមីនា នេះថាទោះបីជាប្អូនស្រីអ្នកនាង ស្រីអ៊ីត បានតេស្តរកឃើញជំងឺកូវីដ-១៩ក៏ពិតមែន តែនាយមិនបានឆ្លងពីប្អូនស្រីខ្លួនឡើយ ខណៈលទ្ធផលតេស្តលើកទី១អវិជ្ជមាន។

នាយ ក្រូច បាននិយាយទៀតថា កន្លងមករវាងនាយនិងស្រី អ៊ីត គឺមិនបានជួបគ្នារយៈពេលប្រមាណជាកន្លះខែមកហើយ ប៉ុន្តែទើបអំឡុងពេលកាលពីថ្ងៃទី០៧ ខែមីនាកន្លងទៅ នាយនិងស្រី អ៊ីត ក៏បានជួបគ្នាដោយប្រយោលម្តងក្នុងពេលប្រជុំក្រុមកំប្លែងនៅCTN។

តារាកំប្លែងនាយ ក្រូច បានបញ្ជាក់ថា បន្ទាប់ពីការប្រជុំនាថ្ងៃទី០៧ ខែមីនា រួចហើយដោយមានការសង្ស័យគឺទាំងលោករួមទាំងក្រុមការងារកំប្លែងដែលបានចូលរួមប្រជុំនោះបានទៅធ្វើតេស្តសំណាករកមេរោគកូវីដ-១៩នៅថ្ងៃទី១១ ខែមីនា ហើយជាលទ្ធផលរកឃើញតែស្រី អ៊ីត ម្នាក់ដែលវិជ្ជមានកូវីដ-១៩។ ចំណែកឯផ្សេងៗទៀតគឺលទ្ធផលអវិជ្ជមានទាំងអស់។

នាយបន្តថា កាលពីថ្ងៃដែលជួបប្រជុំក្រុមកំប្លែងនោះគឺគ្រប់គ្នាសុទ្ធតែអនុវត្តតាមវិធានការណែនាំដោយការពាក់ម៉ាស់ រក្សាគម្លាតឆ្ងាយពីគ្នា និងបាញ់ទឹកអាល់កុលឬជែលជាដើម។ លោកថាបច្ចុប្បន្នខ្លួនកំពុងបន្តតាមដានសុខភាពនិងធ្វើចត្តាឡីស័ក១៤ថ្ងៃនៅផ្ទះទោះបីលទ្ធផលតេស្តលើកទី១គ្មានកូវីដ-១៩ក្តី៕

អត្ថបទ ៖ ចាន់រ៉ា

The post នាយ ក្រូច បញ្ជាក់ថា ទោះបីមិនបានឆ្លងកូវីដ-១៩ ពីស្រី អ៊ីត ក្តី តែពេលនេះកំពុងធ្វើចត្តាឡីស័ក១៤ ថ្ងៃនៅផ្ទះ appeared first on Kampuchea Thmey Daily.