ព័ត៌មានជាតិ

នាយ ក្រូច បញ្ជាក់ថា ទោះបីមិនបានឆ្លងកូវីដ-១៩ ពីស្រី អ៊ីត ក្តី តែពេលនេះកំពុងធ្វើចត្តាឡីស័ក១៤ ថ្ងៃនៅផ្ទះ

បានផុស

៥ years មុន

នៅ

ថ្ងៃចន្ទ ១៥ មីនា ២០២១

ដោយ

តារាកំប្លែងនាយ ក្រូច បានបញ្ជាក់ប្រាប់កម្ពុជាថ្មីតាមទូរស័ព្ទនៅរសៀលថ្ងៃទី១៥ ខែមីនា នេះថាទោះបីជាប្អូនស្រីអ្នកនាង ស្រីអ៊ីត បានតេស្តរកឃើញជំងឺកូវីដ-១៩ក៏ពិតមែន តែនាយមិនបានឆ្លងពីប្អូនស្រីខ្លួនឡើយ ខណៈលទ្ធផលតេស្តលើកទី១អវិជ្ជមាន។

នាយ ក្រូច បាននិយាយទៀតថា កន្លងមករវាងនាយនិងស្រី អ៊ីត គឺមិនបានជួបគ្នារយៈពេលប្រមាណជាកន្លះខែមកហើយ ប៉ុន្តែទើបអំឡុងពេលកាលពីថ្ងៃទី០៧ ខែមីនាកន្លងទៅ នាយនិងស្រី អ៊ីត ក៏បានជួបគ្នាដោយប្រយោលម្តងក្នុងពេលប្រជុំក្រុមកំប្លែងនៅCTN។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាកំប្លែងនាយ ក្រូច បានបញ្ជាក់ថា បន្ទាប់ពីការប្រជុំនាថ្ងៃទី០៧ ខែមីនា រួចហើយដោយមានការសង្ស័យគឺទាំងលោករួមទាំងក្រុមការងារកំប្លែងដែលបានចូលរួមប្រជុំនោះបានទៅធ្វើតេស្តសំណាករកមេរោគកូវីដ-១៩នៅថ្ងៃទី១១ ខែមីនា ហើយជាលទ្ធផលរកឃើញតែស្រី អ៊ីត ម្នាក់ដែលវិជ្ជមានកូវីដ-១៩។ ចំណែកឯផ្សេងៗទៀតគឺលទ្ធផលអវិជ្ជមានទាំងអស់។

នាយបន្តថា កាលពីថ្ងៃដែលជួបប្រជុំក្រុមកំប្លែងនោះគឺគ្រប់គ្នាសុទ្ធតែអនុវត្តតាមវិធានការណែនាំដោយការពាក់ម៉ាស់ រក្សាគម្លាតឆ្ងាយពីគ្នា និងបាញ់ទឹកអាល់កុលឬជែលជាដើម។ លោកថាបច្ចុប្បន្នខ្លួនកំពុងបន្តតាមដានសុខភាពនិងធ្វើចត្តាឡីស័ក១៤ថ្ងៃនៅផ្ទះទោះបីលទ្ធផលតេស្តលើកទី១គ្មានកូវីដ-១៩ក្តី៕

អត្ថបទ ៖ ចាន់រ៉ា